|
يا كاعب ... إحترامي .. للحرامي
إحترامي .. للحرامي !!إحترامي .. للحرامي !! صاحب المجد العصامي .. صبر مع حنكة وحيطة .. وابتدا بسرقة بسيطة .. وبعدها سرقة بسيطة .. وبعدها تَعدى محيطه .. وصار في الصف الأمامي .. ! احترامي .. للحرامي .. !! احترامي .. للحرامي .. صاحب المجد العصامي .. صاحب النفس العفيفة .. صاحب اليد النظيفة .. جاب هالثروة المخيفة .. من معاشه في الوظيفة .. وصار في الصف الأمامي .. احترامي .. للحرامي .. !! احترامي .. للحرامي .. صاحب المجد العصامي.. يولي تطبيق النظام .. أولوية واهتمام .. ما يقرب للحرام .. إلا في جنح الظلام .. صار في الصف الأمامي احترامي .. للحرامي .. !! احترامي .. للحرامي .. صاحب المجد العصامي .. يسرق بهمة دؤوبة .. يكدح ويملي جيوبه .. يعرق ويرجي المثوبة .. ما يخاف من العقوبة .. صار في الصف الأمامي .. احترامي .. للحرامي .. !! احترامي .. للحرامي .. صاحب المجد العصامي .. صار يحكي في الفضا .. عن نزاهة ما مضى .. وكيف آمن بالقضا .. وغير حقه ما ارتضى .. صار في الصف الأمامي .. احترامي .. للحرامي .. احترامي للنكوص .. عن قوانين ونصوص .. احترامي للفساد .. وأكل أموال العباد .. والجشع والازدياد .. والتحول في البلاد .. من عمومي للخصوص .. احترامي للصوص .. !! (ألقى الشاعر هذه القصيدة لأول مرة في أمسية جدة عام 2000 م ) ************* يا كاعب ( هذه القصيدة عبارة عن مداعبة مع الجنس اللطيف بشكل ممكن ان يكون غير لطيف ابدا. ) ألقى الشاعر هذه القصيدة لأول مرة في أمسية جدة 1999م يا كاعب الطبع الفريد ....... يَللي في صدقك تكذبي يا أقدم الكيد الجديد ....... كيد انسجن منه نبي يا جاريه تملك عبيد ....... يا مقيّده تسبي سبي القوه في ضعفك تبيد ....... وسلاحك الدمع اسكبي ما يعجزك قاسي عنيد ....... الكهل يصبح بك صبي ينصاد ويظن انه يصيد ....... ويصدقك هذا الغبي ويظن انه الفذ الوحيد ....... ما يدري انك تلعبي مسكين هالجاهل بليد ....... ظنك بوصله ترغبي ان جاك اقفيتي بعيد ....... وان صد عنك تقربي وان شفتي اخلاصه يزيد ....... في حيرتك تتقلبي وان بان لك فجأة سعيد ....... من هالسعادة تغضبي وان قلتي عني لا تحيد ....... وطاوعك تستغربي وان قلتي فراقك أريد ....... وغاب عنك تندبي ياطالب الراي السديد ....... يا حاير بطبع الظبي أقرب من حبال الوريد ....... وابعد من المجد الأبي وأوضح من أنوار ٍ تقيد ....... واخفى من النملة دبي الشك فيها والأكيد ....... وغموضها به تختبي شف فعلها يحكي ويعيد ....... الغدر شيمة مذهبي زادي النكد به استزيد ....... والمكر صافي مشربي البعض ينصاني مجيد ....... والبعض يحبيلي حبي ضعفي قوي وذلي عتيد ....... يا ليت اعرف مأربي شف فعلها برجل ٍ شديد ....... تلقى طلبك ومطلبي تعطيه بعض اللي يريد ....... وتاخذ جميع اللي تبي أستثني من هذا القصيد ....... كل النساء بكوكبي ******* قد الحروف ( غنت هذه القصيدة المطربة الشهيرة أصالة نصري) قد الحروف اللي في اسامي العاشقين بحبك قد الثواني والدقايق والسنين ،، بحبك قد الهموم اللي في قلوب البشر قد العيون اللي كحلها السهر قد ما ليلي اشتكى من نار حبك ،،، قد ما ليلي حكى عن طول بعدك ليه القمر غالي عليا ؟؟ يمكن عشان في نوره وبعده في حاجه منك ليه الشتاء ،،، في قلبي حزين ؟؟ يمكن عشان برضه بقساوته ،،، في حاجه منك ليه السحاب بعشق بياضه ؟؟ يمكن عشان زي قلبي ،،، في قربي منك ليه المطر ،، بيصعب عليا ؟؟ يمكن عشان يشبه دموعي ،،،، في بعدي عنك ليه لما تبعد .... عن عنيا ،، بخاف عليك ،،، وبرضه منك ليه لما اشوف في السماء نجوم كتير ،،، منها بغير ؟؟ يمكن عشان قد السماء وقد النجوم ،،، بحبك ****** >> قصائد من شعر الأمير عبد الرحمن بن مساعد بن عبد العزيز << |
صاحب النفس العفيفة ..
صاحب اليد النظيفة .. جاب هالثروة المخيفة .. من معاشه في الوظيفة .. وصار في الصف الأمامي ______________________________ شكرا الك اخي عالقصيده ياريت لو تنزل المزيد خلينا نتعرف على الشعراء من هالنوع المخفي الابيات المقتبسه تدل على الطموح القوي تقبل مروري |
دائمـــــــــــــــــــــــــــــــــــــــــــأً مبــــــــــــــــــــــــــــــــــدع شاعرنا الكبير ....الأمير عبدالرحمن بن مساعد شـكــ وبارك الله فيك ـــرا لك ... لك مني أجمل تحية . |
احترامي للحرامي
|
شكرا لكم جميعا على التعليقات الكريمة
نضيف اليوم من قصائد الشاعر المشهورة هذه القصيدة: جميل مُحبط (ألقى الشاعر هذه القصيدة لأول مرة في أمسية البحرين عام 1995م ) ارفع حجر تلقى مُغني ... اكتب شطر تصير شاعر اكسب صحافة .. تصير سيّد للثقافة جميل هذا الوقت مُحبط اكتب بما يرضي ضميرك .. تصير حاقد اشتم بحدة .. تصير ناقد نافق بشدة .. يصير مستقبلك واعد جميل هذا الوقت مُحبط اسرق رغيفين .. تصير المجرم السارق اسرق ملايين .. تصير الماجد الحاذق جميل هذا الوقت مُحبط اشرب على وقت العشا .. كاسة نبيذ واسمع لشوبان .. وارقص الفالس .. تصير متحضر اطلق اللحية ورتل القرآن وصل الخمس .. تصير إرهابي جميل هذا الوقت مُحبط اجرح يهودي .. تقوم هالدنيا وتقعد اهتك أعراض .. ثكّل يتامى .. شيل بيت وامحي مسجد ... تنوم هالدنيا وتسكت جميل هذا الوقت مُحبط عيش هالعمر الوسيع .. وبعد ماتحياه موت عيشوا هالعمر الوسيع .. وموتوا الوعد يوم الوعيد .. يوم تنسى الأم الطفل الرضيع عظيم ذاك الوقت .. منصف |
تعاريف ( قصيدة لها بداية وليس لها نهاية ! ) ألقى الشاعر هذه القصيدة لأول مرة في أمسية جدة عام 1999م الاقتصاد ناس تزرع من فجر ربي إلين الشمس تغرب وناس تصحى في العِشا تتولى تقسيم الحصاد بغداد حضارة شاهقة وأمجاد أقدار صلفة وشعب يفاخر بنزفه وتحتاج الحكاية لص يصير الأقوى بالصدفة ويكون القاضي والجلاد وبحسن إعداد وقدرة فائقة في البطش والتنظيم وبداعي خوفه الأطماع والتقسيم والأنواء يقسّم شعبه لأجزاء جزء يعيش في المنفى وجزء في عيشته منفى ومواطنين معززين مكرمين مقرنين في الأصفاد بغداد خبر لو أنها أنداد مدينة .. بائها بوابة التاريخ ودالها دنيا من الأمجاد سنين صلفة وشعب يفاخر بنزفه وتحتاج الحكاية لص يصير الأقوى بالصدفة ويوطد حكمة الأوغاد بغداد السجون هي مكان لعزل من يخرج على القانون وان غدا القانون جائر تصبح القضبان دنيا تعزل الخارج عن المسجون النفاق رغم اختلافك تبقى آرائك وآراء الذي تخشاه دايم في اتفاق أو نقول : هو انتمائك كل فتره لانتماء أو نقول : هو ارتماء أو بمعنى آخر نقول : النفاق هروله صوب اليهود وبُكى على أطفال العراق السراب وهم .. ما هو ماء لكن يعطي للظامي أمل وإحساس مفعم بالرجاء والسراب ينادي : يا ظامي تعال ما بقى الا خطوتين وتنعم برشف الشراب أو بمعنى آخر نقول : السراب.. الوعود اللي قطعها المرشح للمرشح في انتخاب الجزيرة الجزيرة من قديم الوقت تُعرف : بالمكان اللي يحيطه ماء من كل الجهات وفي جديد الوقت دولة ما عجبها وضعها وسط الخريطة قالت اتعدى حدودي .. و اثبت لغيري وجودي .. في الحياة .. و هكذا نقدر نقول ان الجزيرة : دولة مغمورة صغيرة .. كبرت وصارت قنااة التطبيع التطبيع .. ربط المصالح للجميع .. يبغى عدوك يشتري .. ليه ماتبيع ؟! ليه مايكون الراعي هو ؟! ليه ماتصير انت القطيع ! وش يمنع ان الذئب يصبح حارس الحمل الوديع ؟! الإرهاب تدبير إجرامي .. قتل مدنيين .. ترويع أبريا .. تطبيق شرع الغاب هدم البيوت العامرة .. سفك الدماء الطاهرة .. قتل الكهل والشاب وان قلنا اسرائيل تفعل كذا دوما ً !! تقول أمريكا : مايعتبر إرهاب ! كي يعتبر إرهاب .. فيه شرط إلزامي .. يكون إسلامي .. ومدعوم من أعراب مؤسسة خيرية مشروع يعُنى .. بتخفيف الألم والمرض .. والكمد .. يعنى بتعمير المساجد .. والمساكن .. والمدارس .. والمشافي .. داخل وخارج البلد .. يُعنى بفك الدين .. تفريج الكرب .. رفع المشقة والكبد .. يُعنى بتقريب المسافة للرغد .. مؤسسة خيرية .. فرقها عن غيرها .. كونها سرية .. تعطي ولا يعلم أحد مؤسسة خيرية عبدالعزيز بن فهد |
صدّق أو لا تصدّق (ألقى الشاعر هذه القصيدة لأول مرة في أمسية جدة عام 1999 م) صدّق أو لا تصدّق كل ما تباعدت المسافة بين الرغيف والجوع تلقى الفرح أصدق صدّق أو لا تصدّق لامن غدت كل المشاكل جوع الصغار وسقفٍ يداريهم قبل يصحى النهار تلقى الشعور أعمق صدّق أو لا تصدّق كل ما انقفل درب انفتحت أبواب صدّق أو لا تصدّق لو فيه احد طيّب .. للطيبة أسباب صدّق أو لا تصدّق قليل من يعفي ويسامح .. كثير وده ينتقم بس ينتظرله وقت سانح صدّق أو لا تصدّق القناعة كنز يفنى ولو كل من ياخذ قنع .. وكل من ياكل شبع كان الفرح غطى شوارعنا صدّق أو لا تصدّق كل النهايات البداية .. وأحلى البدايات النهاية وكلنا رغم القساوة الظاهرة .. نبكي قدّام المراية صدّق أو لا تصدّق به مطوّل لحيته .. والثوب يلمس ركبته وما قرا في الشهر آية صدّق .. ان الشعر صدقه .. اعذبه ودي احكيلك حكاية وقبلها ابغى لسؤالي اجوبة المال هذا هو وسيلة والا غاية ؟! لو ماهو غاية .. ليه الحروب ؟ .. ليه السلام اللي تمناه الشعوب ؟ ليه الحسد يملى القلوب ؟ وليه الفقير المُعدم الكادح .. بهجته تملى الملاح لامن لقى ذاك الثري يعطي هاذيك المطربة مليون وهذا الثري لامن سرى من حفلته .. وقفت سيارته عند الإشارة وجاه شايب يطلبه .. الهم عاثي في وقاره دق بـ اصابع مُتعبه .. على الشبّاك قال : انا يا سدي مديون .. وانت الكريم يحكون عنك في الجرايد .. وتقال في جودك قصايد ويُقال انك للأرامل واليتامى عون ما ابغى منك الا حاجة .. لبس الشتا لجل العيال الله يسدد لك خطاك .. اعطني مما عطاك واعتدل راعي الملايين الكثير في جلسته وعقد حجاجه ثم قال : ألا ما اثقلك واغباك .. ليه يا اخي ما تشتغل انت كسول .. ومستغل وطلّع من المحفظة فكّه .. رماها وقفل الشبّاك ابغى لسؤالي اجوبة ... ليه البر والتقوى .. مليان في جرايدنا ؟! وليه هموم هالشارع ؟! .. بعيده عن قصايدنا ؟! ليه الفساد .. ليه الكساد ؟! وليه الحروب ؟! .. وليه الحسد مالي القلوب ؟! وشهو الجواب ؟! اتمنى انه مايكون المال هذا هو وسيلة ماهو غاية هذي الكلمة النبيلة .. اخترعها أغنيا لجل مسكين ٍ شقى .. يرضى بقليلة وصدّق انت او لا تصدّق ماني الشخص المثالي .. كل مافي الأمر اني شاعر ٍ ماهو يبالي كان صار اللي اقوله علقم ٍ او صار حالي كل مافي الأمر اني استريح .. لا مشابي مركبي عكس اتجاه الريح وما ابرّي من الخطى نفسي .. واللي اجاهربه مثل همسي صدّق اني ماني الشخص المثالي كل مافي الأمر اني اجمع احساس الحواري وسط صدري وانقل الواقع لشعري كل مافي الامر اني شاعر ٍ مطرود من جنة خيالي صدّق اني ما قصدت اني اكون صوت للي مايبون صدّق اني ماني الشخص المثالي والا تدري لا تصدّق |
الشاعر الأمير عبد الرحمن بن مساعد ,,
تعجز الكلمات عن وصفه ,, لك كل الشكر اخي ’,, |
السلام عليكم ارى إن الأمير عبد الرحمن بن مساعد بن عبد العزيز فنان بقلمه وبصدق اشعاره الي بتطابق الواقع بجوانب الحياة اليومية وكأنه عاش كل شيء في كلمات شعره وذاق او رأى هذة المشاهد شكر خاص للشاعر ولقصائدة الشعرية ولقلمه البار وشكر ثاني passerby_intime للنقل الواعد والرائع للكلمات تسلم وموفق يا رب |
| الساعة الآن 07:43 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية