منتديات ليلاس - كيف تتخيل اعضاء الهندسة الصوتية

المشاركة الأصلية كتبت بواسطة alamaireh بتاريخ 14-12-07 الساعة 02:48 AM:

سلام اخواني ..

ومن غير مقدمات .. انا حاسس انه احنا صايرين كسولين شوي .. وبدنا نغير جو ..
وبما انه احنا ( معظمنا ) ما بنعرف بعض معرفة شخصية .. وما تقابلنا مع بعض ..
علشان هيك قلت خليني احكيلكم .. كيف بتخيل بعض اعضاء قسم الهندسة الصوتية ..
وطبعا كله من خيالي .. وما حدا يزعل .. واذا صار فيه زعل ولا يهمكم .. بنلغي الموضوع ..
و برضة ممكن بعد ما نغير جو .. بعد يومين مثلا .. نلغي الموضوع ..
يعني المهم .. اننا نغير جو شوي .. علشان بعد هيك نعرف نركز على ما هو جديد ..

kamalmerhi :

شخصية حبّابة ويحب كل الناس .. قلب ابيض ..يسامح من أساء له .. وينسى الاساءه بسرعة ..
ما بيحب يزعل حدا و اذا احس بانه ضايق شخص من دون قصد .. فانه ما بعرف ينام طول الليل ..
يحب ان يقدّرة الآخرون .. ولا يتاخر عن تقديم اي مساعدة .. لاي كان ..
يقضي ساعات على الانترنت يبحث عن ما هو جديد .. ليقدمه لباقي الاعضاء ..
وهو غير ناجح في التجارة .. ولا يهتم بالمظاهر ..ولا يهتم كثيرا بمظهره من ملابس وغيره ..
يحب الاكل المنزلي اكثر من الجاهز ( طبايخ ) ههههه.. يشرب القهوة كثيرا .. ولا يحب الحلويات كثيرا ..
بيفضل افلام الكاوبوي .. ولا يحب افلام الخيال العلمي ..وروحه معلقة بالارجيلة .. و على طول كيس الفستق بجنبه هههه ..

mustafasst :

الجنتل .. لا يتكلم كثيرا .. ويهتم جدا بمنظرة وهندامه .. معظم الوقت يلبس بدلة ..
نظيف من الداخل .. وكريم وما بيهمه المصاري ( الفلوس ).. ومنظم اموره منيح ..
و بيخاف على صحته كثير .. ويهتم بنوعية غذاءه .. ما بهتم كثير بالرياضة .. لكن بيحب يتابع سباقات الرالي ..
بيعرف يكوي الملابس منيح ههههه .. بحب الافلام الاجنبية .. وخصوصا القصص اللي فيها عبرة مثل ( قلب شجاع ) .. وما بحب يحضر افلام كرتون .. لكن بيعجبه : مخلص صديق الحيوان .. بحب يسمع لميادة الحناوي و صباح فخري وهاني شاكر ..
دائما مستعجل .. واذا مر عليك وقلتله تفضل اشرب شاي .. بيحكيلك والله مستعجل و علينا مشوار وبدنا نلحق نوصل هههه..
صاحب واجب .. وفي اي مناسبة بتلاقيه اول الحاضرين ..ما بحب المشروبات الغازية .. ولازم يشرب فنجان قهوة على الصبح ..

abulame3 :

ابو لامع مرح .. خفيف دم .. شغل تعليقات حلوة على المواقف ..
ماخد الامور بطريقة كله ماشي .. وعنده نوع من اللامبالاة .. عنيد .. واذا عصّب بتسكّر معاه ..
طوشاته( مشاجراته ) كثيرة ههههه .. بحب الحلويات كثير خصوصا ( الوربات ) هههه .. وكل شوي بتلاقيه بفتح الثلاجة وبعمل سندويشة ههههههه..
وما بفوت البيت ( دايما بره البيت ) .. كان يدخن مالبورو بس مع هالغلا صار يدخن فايسروي .. وهو شخص مش سهل ..
وعنده ذكاء .. وقوي الملاحظة .. و بعرف يدهن كويس ( طراشة يعني ) ههههه.. ومعلم بالستلايتات ..بيحب كرة القدم ..
و بعدين ابو لامع بحب المقالب .. وياما ناس اكلت مقالب منه .. بحب يحضر الافلام الكوميدية .. وافلام الرعب .. و عدنان ولينا .. وابطال الملاعب .. و مرات توم اند جيري هههههههه ..

JORDAN :

سامر .. يهتم بالتكنولوجيا كثيرا .. ويحب يجرب كل البرامج ..
مدمن على العاب الكمبيوتر ..بيسهر كتير ..سامر غير مدخن ..صعب انه ينضحك عليه ( مش قليل ) ..
وبينفع بالتجارة .. يحب انه يكون عندة معارف مميزين ..ومدمن على مطاعم الوجبات السريعة والجاهزة ( مثل الكنتاكي )هههه..
ما بحب يشرب قهوة ..وبيشرب ببسي كتير ..وبيوكل شوكلاطة ( شوكولاه ) كثيرههههه..
و هو مش رياضي .. وما بحب الرياضة ..و يهتم بالسيارات وانواعها .. بحب افلام الخيال العلمي ..
و افلام الرعب .. وبحب يحضر زنغو ورينغو ههههه..

taoufik rai :

توفيق .. صديقي العزيز .. فنان مفعم بالحيوية والنشاط .. عنده ثقه بنفسه ..
توفيق يتميز بتقبله للانتقاد بصدر رحب ..وما بحب يجرح او يحرج احد ابدا .. وهو يحب البحر كثيرا .. ويشعر بالراحة حينما يذهب اليه ..لا يسهر كثيرا .. متفائل .. و رومنسي .. و بحب الطشات ( النزهات )..ولا ياكل كثيرا .. ويشرب سوائل كثير .. يحب الارجيلة ( شغل كيف ).. وبحب البسكوت المحشي بالكريمة ( الويفر ) هههههه ..
و توفيق من السهل انه نعمل فيه مقلب .. وياما اكل مقالب من الناس هههههه.. وطبعا لانه طيب ..
بحب يشاهد افلام الكاوبوي .. والافلام البوليسية .. وبحب كمان يحضر توم اند جيري ههههه..

مثل ما قلنا هه .. مابدنا زعل .. واللي بيحب كمان يتخيل كيف اكون .. ويشاركنا ..

تحيّتي وتقديري .