بلادي بلدي هرم جنبه غوازي
سوق للجواري ما تقرب يا غازي
عاين وشوف وف بلدك لينا سيح
ولما نفوق نبقي نقيم المعازي
بلادي بلادي يا خمرة وحشيش
وواد مبرشم يتسكع على الكورنيش
في أيده مزه وعلني معاها يعيش
ظابط قصاده شايفه ومديها تطنيش
بلادي بلادي يا حزبنا الوطني
والله ناجح غصب عنك وعني
أومال مين ح يكوش وبره يسفر
برغوت وعايش على دمك ودمي
بلادي بلادي يا أم الخراب
ح يبيعوا هواكي بعد التراب
اكلونا لحم الحمير والكلاب
بكره لاقي مطعم اكلني غراب
بلادي بلادي كوتشينة وطاولة
شباب على القهاوي ضايعه ومايله
ضاقت وطقت وزهقت من ديه دولة
بتحلم بفرصه ولو في القدس المقاولة
بلادي بلادي يا درس خصوصي
استاذى منفض دماغي وناهب فلوسي
وزارة لينا عارفة جابت دينا وبكره لوسي
ولما اخلص اخرها اعبي السبارس بكوزي
بلادي بلادي يا ناي ويا كمان
قلت الحقيقة والحق يؤدي الليمان
بلحظة تجلي اترقت أكتوبر وحلوان
وشبرا زعلت من الريس عشان البيان
بلادي بلادي يا كوسة شبه الخيار
في اختبار ينجح اللي مؤهلاته حمار
ويفشل الماهر اللي وسطته الجبار
طبيعي نفشل ونبقي بآخر القطار
بلادي بلادي فلوس ويا حصانه
على رقاب الناس تعلى المكانه
لكن برده تفضل رحت النتانة
تقول هو دهوه عاشق الخيانة
بلادي بلادي يا مطرب يجعر
وفاكر دا انه لينا بيسحر
صداع في راسي عمال يكسر
ياهووه اكتموا اللى بينعر
بلادي بلادي يا فيديو كليب
كله مباح ومفيش حرام او عيب
ترقص وتخلع وانت تشيب
ونفسك تنط وليها تجيب
بلادي بلادي مجنونة يا قوطة
الناس من كل ناحية مشموطه
علاوة تنزل اسعار تجيها شوطه
خوازيق ومدقوقه وعلينا مظبوطة
بلادي بلادي يا مدنه ويا كنيسه
مشروع وترعاه الست الكونتيسه
وابناها راخر يمشي وحوليه زفه وهيصه
ما عدت عارف إن كان لينا رئيس ولا رئيسه
بلادي بلادي لومات الراجل ابنه هيجيبوه
اصل الحياة كده الواد يورث ابوه
ان كان على القانون يعطلوه يزوره يلخبطوه
هيمسكوه هيمسكوه والمواطن يكتموه
بلادي بلادي يا فولنا المدمس
مديحة خايفة زاى اختها تعنس
هتوافق على اعور ولو حتى مفلس
بس يقرب وهتقول جميل وكويس
بلادي بلادي يا فرخه دايخه
كلمة حضارة بقت نكته بايخه
امته تقومي وتقولى انا مش شايخه
هبني واعلي واعود تاني شامخه

بلادي بلادي يا بطيخة ولمونه
امتى نبطل ناخد المعونه
وندي امريكا بايدنا الصابونة
ونلم ولادنا اللي سافروا وفتونا
بلادي بلادي يا بسطرمة وزتون
يا حزن معشش في القلب والعيون
حالك يخلي العاقل مجنون
ابن البلد في البلد يبقي زبون
بلادي بلادي يا فشه وكرشه
عيله بست ارغفه عايشه
لو غاندي شافها يقول طايشه
من الجوع بدوافرها بالارض نبشه
بلادي بلادي يا حلم اشتراكي
وديك ويا صحبته بيكاكي
ناس من الجوع بتموت
وناس ليها مؤمن ويا كنتاكي
بلادي بلادي يا حلم ديمقراطي
على السجن عارف هيكون صراطي
كان لازم أرضى كان لازم اطاطي
مثورش واقول ربنا ياخد الواطي