منتديات ليلاس - مسلسل ( مرسى الرومانسى ) .......... متجدد ......

حسن يقف اسفل المنزل الذى يسكن فيه مرسى وينادى بصوت عال ......... ومرسى نائم فى حجرته اعلى السطح ..........

حسن بصوت عال : مرسىىىىىىىىىىىىى .

مرسى بصوت خافت وهو على السرير : الله يخرب بيت صوتك ياحسن ......... هو اللى حاجه الوحيدة اللى فيك عاليه وكلك على بعضك واطى .

حسن بنفس الازعاج : مرسىىىىىىىىىىىىىىىى .

مرسى يقوم من نومه ويتجه ناحية الشرفة وهو يتمتم : ربنا يولع فيك ياشيخ عالصبح .

مرسى يكلم حسن : عاوز ايه يابوز الاخص انت عالصبح كده ؟؟

حسن بمرح : صباح الفل يامروووووسه .

مرسى بغضب : مروسة ايه يازفت .... انت بتكلم كلب ؟ ............ ثم ايه الازعاج اللى عالصبح ده يخرب بيتك .

حسن بصوت عال : قوم ياعم يالا عشان الكلية ........ عاوزين نلحق .

مرسى بنفس الغضب : يابنى نلحق ايه ...... انا محضرتش محاضرات من ساعة ابو الدكتور اللى بيدينا ماكان بيدينا هو الله يرحمه بقى .

حسن : يااينى محاضرات ايه اعوذ بالله ...... انتى ناسى ان النهارده التحدى بينك وبين عباس الناشف شاعر الجامعة ؟

مرسى بملل : بذمتك فيه شاعر فى الدنيا ناشف ؟ ....... هو انا رايح اتحدى حلاوة المولد ؟

حسن : لا ياعم دا شاعر جااااامد اوى ........ وواخد المركز التالت على الجامعة .

مرسى : ياعم انت محسسنى انه فاروق جويده ......... طيب اصبر نازل .

ثم يبدل مرسى ملابسه وينزل ........ وبينما هو على السلالم ........ تقابله لوزه اخت حسن ....

لوزة : مرسىىىىىىىىىى .

مرسى بفزع : يامه ....... ايه يالوزه هو انتى هاطله زى اخوكى كده ؟ ..... نعم .... عاوزه ايه ؟

لوزة بدلال : مرسى .... امتى هتطلبنى من بابا زى ماوعدتنى ؟

مرسى : ياستى انتى انا وعدتك بحاجه ؟ ....... سيبينى فى حالى الله يهديكى .

لوزة بدلال : لكن انا بحبك يامرووووووووسه ....... اى لف يو ......... جى تيم .

مرسى : طيب نشوف الموضوع دا بعدين يالوزة ...... اخوكى مستنينى تحت .

لوزة بدلال اكبر : طيب مش ناسى حاجه ؟

مرسى : لا المحفظة معايا وكله تمام .

لوزه تشير لخدها : لا لا احجه تانيه .

مرسى بتعجب : مش فاهم بتشاورى على خدك ليه ...... اوبااااا ....... لا انا مرسى اه لكن انا جدع اوى ..... واوعى يغرك جسمك ......... وبعدين يالوزه خللى بالك يعنى ..... انتى عشان تتباسى محتاجه خريطة .

لوزة تمسك مرسى من كتفه : نفسى تاخدنى فى حضنك واصرخ واقول للناس كلها بحببببببببببه .

مرسى بقلق : استهدى بالله يالوزه ...... وبعدين اخدك فى حضنى ازاى ...... دى عملية محتاجه وسطه يعنى .......... ثم انتى ماسكانى كده ليه .

لوزه بحزن : امال بيقولوا عليك رومانسى ليه ...... طيب قولى كلمتين حلوين ......... اى كلمتين حلوين .

مرسى بتعجب : جرى ايه يالوزة كلمتين حلوين ايه .... هو انتى واقفة قدام حلوانى ...... وسعى يالوزة وسعى اخوكى مستنينى تحت .

لوزة بنفس نبرة الدلال : طيب هنروح السيما النهاردة يامرووووووووووووسة ........ نفسى اعمل زى تيتانبك .

مرسى : تعملى زى تيتانيك ازاى ؟ ... تغرقى يعنى ؟

لوزة : لا يامرسى ...... شفت البت لما كانت مع الواد حبيبها لما رفعت ايديها وهو حضنها ؟ ..... اهو انا نفسى تحضنى كده .

مرسى : ايوة يالوزة بس الواد اللى بتتكلمى عنه حضن البنت لانه قدر ....... انما انتى اصلا عاوزه كتالوج عشان حد يحضنك ........ يالا سيلام يالوزة ...... وياريت تغيرى اسمك ولا حاجه وتخليه شوال لوز ......... سلام .

لوزة بتحدى : بكرة تيجى تتحايل عليا ابصلك بصه واحدة وساعتها هبيعك واروح لجمهورى .

مرسى يضحك : اه دا على اساس انك هتتحولى لنادية الجندى مثلا ...... يالا ياشيخه .

مرسى يتمشى مع حسن ........

حسن : ايه اللى اخرك يامرسى ؟

مرسى : اختك ياعم كانت عاوزانى امثل معاها تيتانيك عالسلم .

حسن يضحك : هههههههههههههه تيتانيك !! يانهار ازرق ......... بس دا فيلم كله اكشن وفاندام كان عامل شغل فيه ...... البت دى مجنونة والله .

مرسى : فاندام ؟ ..... طيب مشى ياحسن احسن والله العظيم ارميك قدام اى تاكسى واخلص .

حسن : طيب يالا وصلنا والواد الشاعر اللى اسمه عباس الناشف عامل جو جامد اوى .

مرسى : ياعم هو احنا رايحين نقابل تكييف ؟ ...... يالا ياعم .

مرسى : صباح الخير ياجماعه .

عباس الناشف : صباح النور ..... انت بقى اللى بيقولوا عليك رومانسى ؟ ..... امال مش باين يعنى ؟

مرسى : بلاش نتكلم على حكاية مش باين دى يااستاذ ناشف .

حسن : يالا ياجماعه نبدأ ......... اتفضل يااستاذ عباس .

عباس : انا عامل قصيدة عاطفية اسمها ( حبيبتى ) ..... بتقول ايه بقى : حبيبتى بعدك سهرنى وخلانى حزين محتار ...... نار بعدك بتولع قلبى امتى هتيجى وتطفى النار .... عايش عمرى ببكى وببكى والدنيا بعدك بس دمار ...... ارجعى ارجوكى بقى ميبقاش تفكيرك تفكير حمار )

مرسى بتعجب : حمار ايه ياباشمهندس ...... انت كاتب القصيدة دى فى زريبة ؟ ...... ياجماعة مش دى الرومانسية .... الرومانسية مش كلام بس ....... الرومانسية فعل واحساس .... عبر عن حبك للى بتحبها ..... متتحسهاش ان الحب كلام بيتألف وبس .

عباس : سيبك من الكلام الفاشل ده ..... فين قصيدتك ولا انت خايف تواجهنى .

مرسى : ياعم خايف من ايه بس ...... انا معنديش كلام اقوله قدام كلامك ..... ثم انا كلامى بالفصحى مش بالعامية .

عباس بشماتة : هو دا ياجماعة اللى عمالين تنفخوا فيه من الصبح ؟ ...... اهو انسحب .

صمت تام ..... يهمس حسن فى اذن مرسى .........

حسن يهمس : مرسى قول اى حاجه عشان متزعلهومش .

مرسى بغضب : لا ياحسن .... اللى هيزعل يبقى مش فاهمنى بجد ..... يبقى محدش عارف مرسى الرومانسى ....... استاذ عباس مبروك عليك انت الفايز ...... عن اذنكم .... بس خللوا بالكم انا كل ماابنى بينا الرومانسية ييجى واحد ناشف يهدها .

عباس : انت مجرد شخص فاشل يامرسى بيه .

مرسى : ياعم اتنيل عاللى انت كاتبه .... وعامة انا هنافسك ...... قصيدتى اسمها ( لون عينيكى ) وعامية .... بتقول .......... لون عينيكى .. لمسة ايديكى .... كل حاجه حبيبتى فيكى ....... خلونى اجيلك واحكيلك ... دوبت فيكى وبناديكى .... ليه تحرمينى منك ومن نظرة عينيكى ...... العيون فى جمال الخير لما بييجى ويهل .... والدموع توصف جروحها ياريت جروح حبيبتى تقل ...... والكلام يشفى العليل لو كان كلام الناس يعل .... هى شمسى اللى بشوفها بنسى كل شجر وضل ..... هى حب هى قلب هى ملكة فى عرشها ...... هى شمس هى نفس احلف ياناس بحبها ..... هى طيف جميل بيظهر مهما يظهر مش بمل ....... هى نسمة هى رسمة فى لوحة حلوة للجمال .... هى زهرة فى عينى ظاهرة هى صورة للدلال ..... هى بس اجابة واحدة ليها ميت مليون سؤال ....

تصفيق لمرسى وعباس ينظر بغضب ويرحل .......

مرسى بهدوء : ياجماعة متفتكروش انى كده كسبت ...... بالعكس دى اول خطوة فى خسارتى لما تجروا ورا الكلام بس ............. خسارة فعلا ضيعتوا الرومانسية .............. عن اذنكم ....

يتبع