منتديات ليلاس

منتديات ليلاس (https://www.liilas.com/vb3/)
-   القصص المكتمله (https://www.liilas.com/vb3/f717/)
-   -   للحب عنوان للكاتبة بنت البلاد (https://www.liilas.com/vb3/t81054.html)

Cheer 11-06-08 12:31 AM

..
ألمانيا..
تمت وداد قاعده مكانها واتصيح.. ودخلت عليها هند وشافتها في هالحاله استغربت.. شو فيها؟؟ شو الي يخلي وداد اتصيح؟؟ ياترى شي صايب هادف.. الأهل هناك شي فيهم؟؟
هند: ودااااااد.. شوفيج؟؟
وداد: هند.. تعبت يا هند.. مب قادره اتحمل..
هند: بسم الله عليج شو فيج.. خبريني..
دخل عليهم سعيد وشاف هالمنظر.. ماهان عليه اخته الحبيبه وداد الحنونه اتكون في هالحاله.. قرب وقعد وياهم..
سعيد: شوفيج؟؟ خبرينا.. ما يهون علينا نشوف هاللآلئ تنزل من عيونج..
وداد: سلطان.. ليش دومي اجرحه؟؟ ما ودي بس غصبن عني.. لازم ينساني.
سعيد: وداد.. انزين شو الي يعيبه خبرينا.. ؟؟ هو يحبج؟؟ وشو الي يخليج تجرحينه؟
هند: صدقه سعيد يا وداد.. شو الي مخلنج ترفضينه..
وداد: ما تعرفون .. ولا في عمركم بتحسووون..
سعيد: انزين خبرينا.. ؟؟ شو الموضوع..
وداد: بس بشرط محد يعرف عن الموضوع غيركم,... لني حاسه بخنقه ما اقدر اني اكتم في نفسي اكثر من جيه
هند: ارمسي.. طلعي الي في خاطرج
وداد: اتعرفون مريم بنت خالته.. ؟
هند: هي بلاها..
وداد: اتحيدون من كم سنه ... يوم طاحت في المستشفى انها حاولت تنتحر؟
هند: هي احيد السالفه.. يوم كان مقرر انه سلطان يخطبج.. بس انتي على اخر لحظه هونتي..
وداد: هذا هو السبب.. مريم اعترفت لي انها اتحب سلطان.. وانها حاولت تنتحر يوم انها سمعت انه بيخطبني.. وخلتني اوعدها اني ما اخذ سلطان وانساه.. وعشان جيه من يومها وانا اصد سلطان
سعيد: شووووووو.. انتي خبله ولا شو.. اشعليج منها...
وداد: سعيد.. شو اشعلي منها.. تباني اكون سبب في موتها
سعيد: لا مب انتي ولا سلطان السبب.. السبب قلة عقلها.. غبائها.. ياهل.. هاي يوم بغت تنتحر كم كان عمرها.. 18 سنه.. يعني مراهقة..
وداد..: حتى لو.. هي اتحبه..
سعيد: شو اتحبه ما اتحبه.. وانتي بكيفج توعدينها.. ليش قلبج لهالدرجه طيب.. تحرمين قلبج من الحب الي نمى فيه من صغرج وتهدمينه بلحظه عشان خاطر بنت شرات هاي.. ياااااااهل.. اسمحي لي اقول لج يا وداد انتي الياهل مب هي..
وداد: بس مابا اكون سبب في ضررها..
سعيد: اقول انا ساير ارقد.. ماشي فايده من اني ارمسج.. اول مره احس بج ياهل يا وداد..
طلع سعيد والقهر متملك قلبه.. كيف تتنازل عن حبها لطيش مراهقة.. لييييييش؟
هند: لا تزعلين من سعيد.. تدرين فيه اشكثر يحب سلطان.. وحلم حياته انه يصير نسيبه.. خصوصا انج اتحبين سلطان بعد
وداد: هند.. انتي لو مكاني شو بتسوين؟
هند: الصراحه.. بسوي الي سويتيه.. ولو انه تصرف جنوني.. بس هالي اقدر عليه.. ما يهون علي وحده تتضرر بسببي.. بحس بتأنيب الضمير..
وداد والدموع تذرف من عيونها: افهميني يا هند.. والله اني تعبانه.. يوم عن يوم يزداد تعبي.. لاني قادره اوافق على انسان غير سلطان.. ولا قادره اوافق على سلطان.. شو اسوي.. فهميني..
هند: الله يهديها بس.. وسلطان شو رايه فيها؟
وداد: ما يحس بحبها رغم محاولاتها.. يعتبرها شرات اخته لفارق العمر من بينهم
هند: وهي لازم تضحي بحبها عشان سلطان.. لو صدق اتحب سلطان.. جان ما سوت الي سوته وحرمت سلطان منج..
دخلت عليهم غزلان وقطعت كلامهم.. : السلام عليكم.. بل.. شوفيكم سكتوا.. يعني ما تبوني اسمع رمستكم؟؟
وداد: لا بالعكس.. تعالي قعدي ويانا يا احلى غزاله في البيت,..
غزلان: ههههه.. وناسه.. لو سعيد ولا هدووف هني وسمعوج.. جان قطعوني..
هند: هههههه ما يحق لهم.. ما عندنا غير غزاله وحده..
غزلان: توني سمعت ابوي يقول انه بيجدم موعد التذاكر على اساس نرجع السبت
هند: احسن.. لأني بصراحه مليت.. ولاعت جبدي من قعده هني.. ابا ارد البلاد
وداد: انا بعد الصراحه.. وخصوصا يوم هادف مب ويانا الواحد ما يقدر يستانس..
غزلان: وانا اشتقت حق حصوووونه ربيعتي.. فديتها والله
وداد: هاج التليفون ودقي لها شو تتريين..
غزلان..: هي والله.. بس اخاف تكون راقده
وداد: لا ان شاء الله .. تدرين في البلاد الكل يسهر لوقت متأخر واحين يادوب الساعه 11 في البلاد
غزلان: هاتي .. بتصل. وبخليهم يوعونها.. ما يخصني انا مشتاقه لها الجلبه..
اتصلت غزلان .. ورد عليها عبيد.. ولد اخو حصه..
عبيد: الووو
غزلان: عبيداااااان.. حبيبي.. اشحالك؟؟
عبيد: اوه.. غزوله.. انتي اثحالث.. وينث؟
غزلان: انا في المانيا حبيبي.. بخير.. انت اشحالك؟
عبيد: بخير.. تعالي عندنا ابا اثوفث.. انا وااااااايد احبث..
غزلان: وانا بعد.. وين حصوووو؟
عبيد: حثوو.. تتطالع تلفثيون..
غزلان: ابيييييه احين بتضربك.. لازم اتقول عمووو ..
عبيد: مب كيفها..
حصه: شو فيك.. اتكلم منو انت؟
عبيد: اكلم حبيبتي.. ما يخثج..
حصه: هات.. ضربته على راسه وسحبت عنه السماعه.. الووو
غزلان: حصووووووونه حبيبتي..
حصه: هيييييييييييييييه.. ما اصدق.. غزلانووووووو.. اشحالج فديتج انا
غزلان: تمام.. وانتي اشحالج.. وحشتيني يالحماره..
حصه: عيل انا شو اقول ملاااااااااانه هني من غيرج.... تعالي بسج قعده هناك ما اشتقتي لي؟
غزلان: اففف وايد اشتقت لقعداتنا وسوالفنا..
حصه: فديييتج وانا بعد.. بسكم تعالو هني..وايد سوالف عندي ابا اخبرج عنها..
غزلان: وانا بعد والله .. بقولج مغامراتنا..
حصه: اقووووول.. يقولون شفتي روميو هناك؟
غزلان: شووو.. روميو.. ها احيده ماااااات من سنه سكتوا..
حصه: لا لا لا.. روميو اماراتي..
غزلان: الله يخس ابليسج.. تقصدين الله يذكره بالشر
حصه: خييييييبه قويه في حق اخوي الصراحه..
غزلان: وعععع.. كرهت عيشتي وطلعتي وكل شي فيني من شفته
حصه: اصلا تتمنين اتشوفين شراته
غزلان: اخبرج.. يلا باي.. خسرتيني.. اتصلت اسمع اخبارج مب اخباره
حصه: ههههههه فديتج والله .. لا خلاص كله ولازعلج.. اصلا هو الفير بيوصل.. راد البلاد عندنا خلاص.. خذي راحتج هناك
غزلان: ونحن بعد احتمال نرجع على يوم السبت
حصه: حلفي.. اللللللللللللله ونااااااسه
غزلان: والله ملينا من القعده هني
حصه: وشخبار هندوو؟
غزلان: الحمد لله.. المهم يلا ما بطول عليج.. برد البلاد.. اخبرج سويتي الي قلت لج عليه؟
حصه: افا عليج انتي بس..
غزلان: جيه اباج.. شاطره يلا سلمي على خالوو... وعلى عبيدان حبيبي..
حصه: تعالي حشرني كل يوم يسأل عنج.. اونه شاري لعبه يديده يبا يلعبها وياج
غزلان: ههه.. فديته.. شريت له العاب من هني بعد..
حصه: تسلم ايدج.. يلا مع السلامه
بندت غزلان عن حصووو .. ومسكتها وداد من جتفها..
غزلان: بسم الله .. خرعتيني؟؟
وداد: شو الي طالبته منها؟وتتخبرين اذا سوته ولا لا؟
غزلان: ماشي.. قلت لها تاخذ نوته وتكتب فيه كل يوم مع التاريخ من يوم ما سافرت لليوم الي برد فيه السوالف الي تستوي..
وداد: خييييييبه وكاله انباء انتي..
غزلان: لازم .. عشان ما اكون مثل البهيمه ما اعرف شي..
وداد: لا زين زين ماشاء الله الإخت أم هلال..
هند: ههههههه .. وحليلج يا غزلان..
..


:liilas: :liilase: :liilas: :liilase:

Cheer 11-06-08 12:32 AM

..
بيت ثابت..
عادل: امووور.. مادري ليش هالبنت جذبتني بهالطريقه.. مع انها اصغر عني..
أميره وهي مب منتبهه لكلامه واتبدل في القنوات..
عادل: حوووووو.. اكلمج انا.. خلي عنج الريموت شوي..
أميره: هههههه.. سوري والله بس كنت مندمجه شوي. شو قلت
عادل: البنت الي قلت لج عنها.. وايد تطري لى بالي..
أميره: ابييييييييي.. عدووووول والله وقمت اتحب..
عادل: شو احب الله يهداج.. فسرتيها على حب..
أميره عيل شو تفسيرها يا فيلسوف.. ترا ماشي غيرها بنت شفتها وللحين كله اتفكر فيها
عادل: يمكن اعجاب.. مب حب..
أميره: ترا الإعجاب يتحول إلى حب..
عادل: يجوز..
ام عادل: عادل.. أميره.. انا سايره ارقد تامروني بشي؟
عادل نش من مكانه وباس راسها: فديتج يامي مابا غير سلامتج..
ام عادل: فديتك يمي.. ان شاء الله اتبوس الكعبه..
اميره وهي تركض اتدز عادل بعيد عن امها: خوز انت بس اتبوسها انا لازم احضنها وابوس هالخدود الحلوه وهالراس..
ام عادل: فديتج والله
ام عادل.. توفى زوجها يوم كانت اميره صغيره.. ومن يومها كرست حياتها لتربيه عيالها.. رغم انها مب كبيره في السن وايد .. عمرها 41 سنه.. رفضت كل من تقدم لها .. لأنها بغت تتفرغ لعادل وأميره .. فكانت لهم الأب والأم والإخت والأخ.. حبهم لأمهم يفوق أي احساس ثاني.. امهم تشتغل مديره في إحدى المدارس.. الكل يحبها .. لحنانها وطيبتها..
اميره: ربي يخليج لنا يا امي..
ام عادل: ولا يحرمني من عيال مثلكم..
اميره: امي... ترا ولدج عاشق..
ام عادل: هههه.. فديته ولدي والله كبرت.. وقمت اتحب وتعشق.. منو هي يمي.. خبرني عنها.. ودي اشوفك معرس والله
عادل: خيييييييبه.. معرس وعاشق مره وحده.. ماعليج من هالجذابه لا عاشق ولا شي
اميره: افا اتخش عن امي.. خل عنك.. انا بقولها.. نحن مب متعودين انخش شي عنها
ام عادل: عيل انا اليوم بسهر وياكم.. ماشي رقاد..
اميره: امي.. ولدج شاف وحده وعيبته ومن يومها مب قادر يشيلها من باله..
ام عادل: من هاي؟؟ اعرفها؟
عادل: ماعرف شي عنها.. بس انا اعرف ريل اختها كان استاذي في الجامعه.. والبنت عيبتني حسيتها صح صغيره بس محترمه ومؤدبه
ام عادل: اشكثر صغيره يعني؟
عادل: جيه امبين عليها في الثانويه..
اميره: امي.. لا تكون وحده من البنات الي عندج في المدرسه..
ام عادل: يجووز.. عطني اسمها وانا بشوف؟
عادل: ماعرف والله
اميره: مايبالها شي.. اتخبر عن اسم ابوها اقل شي.. وامي بتروم اظهر اسمها..
عادل: مادري بشوف.. بتخبر..
امير: الللللللله وناسه.. اخيرا
عادل: اخيرا شو؟
اميره: بتعرس.. وبلبس فستان وبكشخ..
ام عادل: والله لو بنت زينه واهلها ناس زينين.. ليش لا يا عادل... فرحتك تراها فرحتي..
عادل: ههههههه.. مستعيلين وايد..

Cheer 11-06-08 12:34 AM




الجزء ( 3 ) : للحب عنوان


ملخص الجزء السابق..: تدبر سلطان وابوه موضوع هادف الي في المركز.. واعتراف وداد بسبب رفضها لسلطان.. وقرار عادل بأنه يسأل عن حصه

في مركز الشرطه.. راح بوسلطان يقابل هادف ويكلمه..
بو سلطان: مسود الويه.. هاي اخرة سواياك يا هادف يا ولد اخووووي؟؟ .. يا فشيله ابوك فيك..
هادف: لا حول ولا قوة إلا بالله.. عمي.. اسمعني انا هالرمسه موووول ما تعيبني.. وبعدين انا ما سويت شي.. ييت ادافع عن نفسي.. وليش هو يغلط علي.. يستاهل الي اييه..
بوسلطان: تف عليك من ريال.. هاي مريلتك .. السلام يا ولد خليفه.. وهاي الطريقه المثلى في الدفاع عن النفس يا فهيم زمانك..
هادف: لو سمحت عمي.. عندك شي مهم تبا اتقوله قوله.. ما عندك.. خلاص
بوسلطان: الله الله .. ماشاء الله عليك.. اصفق لك..
دخل سلطان عليهم وشاف هالجدال.. ما قدر ايود اعصابه.. كان بيجرب منه وبيضربه بس منعه ابوه..
هادف: اسمعني انت يأشر على سلطان.. انا ابوي ما ضربني.. اتي انت اونك تستريل علي.. ؟
بوسلطان: وهاي غلطة ابوك.. انه ما صفعك.. يمكن كنت بتوعي من الي انت فيه..
سلطان: اخبرك.. انا كنت ناوي اساعدك.. وكنت ياي ومستانس لأن اهل الولد وافقوا على التنازل .. يعني كنت بتظهر.. بس احين عقب الي شفته وسمعته منك.. مابخليك تظهر..
هادف من سمع هالرمسه زاد غياضه.. لكنه مغرور ما بين هالشي: شو يعني.. عادي ترا الولد ما مات.. يعني ما بنعدم وانا بعدني ما كملت 18.. يعني كلها كم سنه وبطلع.. عااااااادي
بوسلطان: ايا الظالم.. وامك وابوك.. وهند المسكينه.. ما فكرت فيهم شو بيصيبهم..
هادف: هههههههه.. اتصدق عمي ضحكتني.. شو بيصيبهم يعني.. ليش هم مفتكرين فيني اصلا
سلطان: ايا يا ناكر الجميل.. انت تدري الدلع الي دلعوك فيه.. محد لقى شرواك.. وتدري انهم حارقين تليفوناتنا بس عسب يطمنون عليك..
هادف.. : اقول انا تعبان.. عندكم شي مهم..
بو سلطان حس بتعب.. وحس ان قلبه بدا يقبضه.. وانشلت حركه ايديه وريوله.. وبدى يعرق ما لقى عمره الا وطايح على الأرض.. وسلطان على طول لحق على ابوه..واما هادف فكان يطالع بنظرات لا مبالاة ورد ويا الشرطي لداخل السجن.... اما سلطان فطلب الإسعاف ونقل ابوه المستشفى..
..

Cheer 11-06-08 12:35 AM

في ألمانيا..
غزلان و وداد وامهم كانوا يلمون اغراضهم لأنهم بيردون البلاد.. وسعيد يلم اغراضه والحزن في عيونه.. لأنه ما بيرد البلاد وياهم.. هو راح يرد استراليا لأنه دراسته راح تبتدي..
غزلان: سعييييييييييييد.. قاعد سرحان جيه في البلكونه.. وماعندك شغل. تعال ساعدنا شوي..
سعيد تم ساكت وما رد عليها.. استغربت غزلان.. شو الي خلا سعيد يسكت عنها.. وهو بالعاده يدور اللحظه الي يتقارض فيه وياها..
غزلان قربت منه وقفت حذاله وحطت ايدها على جتفه: شو بلاه اخوي سرحااااااان.. في شو يفكر
سعيد: ااااه يا غزلان.. بتوحشوني.. تدرين اني في اخر سنه.. يعني ماشي مجال اني اييكم في الإجازات.. لأن ضغط الدراسه كبير..
غزلان: ما عليه.. ان شاء الله بترجع لنا بالسلامه.. وبتمر عليك الأيام جنها الا البرق.. انت هد عمرك وبالك..
سعيد: غزلان.. حطي بالج على هند..
غزلان: افا عليك.. شو هالرمسه.. هند في عيونا كلنا..
سعيد: لا تخلين هادف الغيور هذا يغصص فيها.. تدرين به مينون.. وعقله مب في راسه..
غزلان: بس .. تامر امر..
سعيد: وحطي بالج على عمرج ودراستج.. وامي وابوي.. طيعيهم ولا تزعلينهم..
غزلان: سعيييييد.. شو بلاك.. رمستك غريبه.. دومك اتسافر وما اتقول هالكلام.. اشمعنى هالمره
سعيد: تبين الصدق.. انا حاس ان في شي .. وخايف على امي وابوي..
وداد دخلت وسمعت رمسه سعيد: شي مثل شو يا سعيد؟؟
سعيد: وداد.. مادري والله.. بس قلبي قابضني..
غزلان: ما عليك.. يمكن من الضيق انك بتسافر ونحن بنسافر بعد.. ليش انك بتفارقني مثلا..
سعيد: لا عاد في هاي صدقتي.. فراقج انتي صعب جدا.. مافي حد اتقارض وياه..
غزلان ما قدرت تتمالك رغبتها في الصياح.. نزلت منها الدمعه وحست بحرقتها على خدها..
سعيد: لا .. مابا اشوف هالدموع
وداد: ولا نحن نبا انشوف الحزن في عيونك ياخوووي..
سعيد.. : وداد.. طلبتج..
وداد: انا حاسه شو بتطلب.. عشان جيه ما بقول تم..
سعيد: حرام عليج.. فكري فيه.. لا تعذبين الريال مب زين..
وداد: هالشي راجع لي في النهايه..
غزلان: ماعليك .. بتم على راسها لين ما تقتنع..
وداد: لا والله شاطره اونج.. اوكي..
هند كانت تنادي على غزلان.. من سمعتها ربعت صوب غرفتها..
غزلان: خير..
هند: ماشي مكان حق البوت ها.. خليه عندج
غزلان: زيغتيني غربلج الله.. اتحريت شي.. اخر شي تبين مني احط لج البوت في شنطتي.. ما اقول غير مالت على ويهي..
هند: ههههههه.. يلا شلي بلا رمسه زايده..
..

Cheer 11-06-08 12:44 AM

الإمارات..
عادل كان قاعد ويا مجموعه من ربعه.. ويسولف وياهم.. وعقبها راح ويا عبيد ربيعه على جنب ..
عبيد: خير شو السالفه الي اتخليك تبعدني عن الربع
عادل: عبيد.. بتخبرك عن شي.. اتحيد دكتور سالم الي كان يدرسنا في الجامعه في اخر سميستر لنا..
عبيد: هيه بلاه
عادل: احيدك كنت وايد اوكي وياه.. ودومك اتسولف وياه.. بغيت اتخبرك عن اهل حرمته جان اتعرف اسمهم ولا شي.. يعني من قوم منو.. هالكلام يعني..
عبيد: عادل.. ؟؟
عادل: لا .. يروح فكرك بعيد.. كل قصدي خير صدقني.. امسات شفت الدكتور في ميركاتو.. وكان ويا هله سلمت عليه.. واخت حرمته الصراحه عيبتني.. ودشت خاطري.. ابا اتخبر عنها .. لأني ابا اخطبها
عبيد: هي اتحرى بعد.. انا احيدك مب راعي سوالف.. فاستغربت شو ياك .. هيه حرمتي تعرفهم.. وتروح بيتهم دوم..
عادل: دخييييييييييييلك.. اترجااااك.. اسمها.. الله يخليك..
عبيد: ههههه.. يالعاشق.. شوي شوي علينا.. ماصار زواج الي نويت عليه فجأة.. بتخبر لك عنها..
عادل: يلا شو تتريا..
عبيد: احين؟؟
عادل: لا باجر... هيييه احين شو تتريا بعد
عبيد: هههههه.. لا انت حالتك الصراحه اتعور القلب.. اوكي احين بكلم ام العيال وبسألها..
اتصل عبيد في مرته ندى..
عبيد: هلا والله بالقلب.. هلا بروووووحي.. هلا بحياتي.. فدييييييتج.. اشتقت لج.. انا مب عارف كيف انا ظهرت من دونج.. حاس اني بختنق..
عادل كان صدق مغيض.. وكل شوي ينغز عبيد.. وعبيد يزيد الجيله ويغيضه زود..
عبيد: هههههه.. لا بس حرام برحمك.. انزين الغاليه اتخبرج
ندى: آمر تدلل.. روحي لك..
عبيد: فديت روحج انا.. لا كل الي اباه منج اتقولين لي عن وحده ربيعي حاط عينه عليها بس ما يعرف عنها شي..
ندى: هههه.. كيف جيه بعد؟
عبيد: بعد ربج حب من اول نظره اونه..
ندى: انزين انا شو عرفني فيها.. يوم هو ما يعرف شي عنها؟
عبيد: ترا هاي اتصير اخت مرت دكتور سالم..
ندى: حصوووو.. هيه بلاها
عبيد: شو فيج.. شو بلاها.. اقولج ربيعي حاط عينه عليها بس ما يبالها شي.. بس يبا يعرف رايج في البنت.. واسمها بالكامل عشان يخبر هله عنها..
ندى: قوله لو يلف الدنيا سبع لفات احسن من حصوو ما بيلقى.. أدب وجمال وأخلاق وطيبه.. ولا بعد دمها خفيف..
عبيد: الللللللله.. هالمطلوب.. وين بيتهم بسير اخطبها..
ندى: لا والله.. اتهبي.. انا اراويك.. يعني انت الي تباها هب ربيعك.. ما عليه اتقص علي.. و..
عبيد: هود هود.. شوي شوي علي.. شو بلاج كلتيني.. امزح وياج يا بابا صدقتي مسرع.. اسفييييين اصلا انا مالي غناة عن القمر الي عندي يسوى الكل..
ندى: فديتك.. انزين اسمها.. حصه مشعل عبدالله
عبيد: اوكي.. اقول عادل بس ما تبا شي ثاني ؟
عادل: هيه عمرها؟
عبيد: كم عمرها ؟؟
ندى: هالسنه ثانويه عامه..
عبيد: السنه ثانويه عامه اتقول..
عادل: مثل ما توقعت.. بس وصيها لا تقول لهم شي لين ما اظبط اموري.. وعقب عاد خل اتضبطني وياهم جيه تمدح مني مناك.. ترا انا بعد ما اتعوض..
عبيد: ها سمعتيه..
ندى: ههههه.. قوله لا يحاتي.. وربي يتمم لهم على خير..
عبيد: ها يا العاشق احين ارتحت..
عادل: هي والله ربي يريحك دنيا واخره..
عبيد: بس تدري اول مره اشوفك متحمس لسالفه الزواج هذي.. قبل على ايام نوال ما كنت ..
عادل يقاطع رمسه عبيد: بس.. لا تذكرني فيها.. هاي ماعرفت قدري.. ولا حشمتني.. ما انكر ان في خوف متملكني ان اشوف الي شفته من سنتين.. بس بعد في شي اقوى من هالخوف يشجعني على هالخطوه
عبيد وهو يطبطب على ظهر عادل: لا تخاف ياخوووي.. مب كل صبوعك سوى.. ذيج الله يستر عليها.. كل يوم اسمع عنها سالفه من الشباب.. الله يحبك لأنه فكك منها.. وصدقني هالبنت مدحتي اياها الحرمه.. واتقول انها بنت ماشي مثلها..
عادل: الله يتمم على خير.. انا بخبر امي عن اسمها.. يمكن سبحان الله ماره عليها البنت في المدرسه.. ونعرف كل شي عنها..
عبيد: هي صدقك.. الله يوفقك يا خوي.. اتمنى لك الخير من كل قلبي..
..
ناصر قاعد ويا أحمد وسلطان.. وكل واحد فيهم يفكر شو يسوي..ما بقى على ردة عمهم وعياله من السفر الا ساعات معدوده..
سلطان: انا الصراحه مب عارف شو اسوي.. حاس عمري اذا واجهتهم وقلت الكلام لهم.. بيزيد كره وداد لي.. كافي انها تكرهني من غير شي..
أحمد: والله انا الي بتخبل ومب عارف شو اسوي.. لا رقاد مثل الناس ولا شي.. كلها 5 ساعات والطياره بتوصل.. واذا سرنا نستقبلهم من غير هادف.. هني المشكله..
سلطان: اخبركم انا مب ساير وياكم..
ناصر: بالعكس هالشي بيشككهم زوووود.. انت .. وهادف.. غيابكم مشكله اكبر.. فكروا
رن تليفون سلطان والي كانت متصله مريم بنت خالته.. انعفس ويهه زود.. مب مرتاح لملاحقتها له.. وما يستصيغها.. : احين هاي وقته تتصل..
أحمد: جيه منو الي متصل..
سلطان: في غيرها.. مريم..
ناصر: العاشقه الولهانه..
سلطان: هاللي ناقص بعد.. ها تعشقني..
أحمد: هات التليفون انا برد عليها.. رد على التليفون.. الو..
مريم:سلطان..
أحمد: لا انا أحمد.. سلطان راقد.. شو تبين فيه؟؟
مريم: ابا ارمسه شو ابا فيه بعد..
أحمد: ايه انتي ما تستحين تتصلين في الريال ..
مريم: ايه انت,.. شو هالرمسه.. اصلا انا وسلطان حبايب انرمس بعض متى ما نبا..
أحمد: هههههه... حبايب اونه.. هههه.. ضحكتيني.. اخبرج.. انتي من صدقج حاطه في راسج ان سلطان يحبج.. حوووو.. اصحي عن هالخبال.. تراج خاله حال فدوى عنده.. عمره وحياته ما فكر يحبج.. وانتي تدرين انه ما يفكر غير في وداد بنت عمه..
مريم: ههههه.. خبرك عتييييج.. انزين.. واتهقى ودادوووو هاي اتحبه؟؟
أحمد: مريووووووووم.. سمعيني.. اخبرج.. وداد هاي تاج راسج.. مب اصغر عيالج عشان تقولين ودادووو فاهمه..
مريم: اوه ماشاء الله محامي الدفاع .. اخبرك.. قول حق سلطان يشيل من باله وداد.. لنها ما تفكر فيه خلاص.. وصدقني سلطان ما بيكون لغيري.. خصوووصا وداد.. هاي بالذات الوحييييده الي لا يمكن تجرحني وتاخذ عني الي احبه.. اوكي
أحمد: لحظه لحظه.. انتي شو الي يخليج هالكثر متأكده ..
مريم: ههههههههه.. انزين قوله لا تنسى.. بااااااااااي
وبندت الخط وأحمد كان واصل حده ومعصب.. وفر التليفون في حضن سلطان وصعد غرفته..ودخل لها
أحمد.. والله اراويج يا مريم بنت امج وابوج.. مب انتي الي تتحدين أحمد.. مب انتي الي تغلطين على وداد.. هاي اختي وبنت عمي ومرت سلطان وبس.. اصلا انا صدق غبي ليش قاعد افكر في كلامها.. اصلا لو وداد صدق ما اتحب سلطان جان ما رفضت كل من يتقدم لها من بعد سلطان..
ناصر استغرب من تصرف أحمد ولحقه لغرفته... ونفس الشي سلطان..
ناصر: أحمد.. شو السالفه؟؟
سلطان: شو قالت لك هاي ام لسانين..
أحمد: كلام يقهر يا سلطان.. كلام يرفع الضغط..
سلطان: شوووووو.. قول..
أحمد: تتحداني اونها.. مادري شو فاكره عمرها.. ياهل ومافيها عقل يايه تتفلسف... اونها اتقول ان بينك وبينها علاقة حب.. ولا بعد اتقول اونه وداد ما تباك.. كيف وهي ترفض كل من يتقدم لها من عقبك مع انه ولا واحد فيهم كان ينعاب بشي.. بالعقل ها على شو يدل.. وبعدين اتقول وبكل ثقه وداد مستحيل تجرحني وتاخذ سلطان.. شو الي يخليها واثقه من هالشي؟؟ انا شاك انها سبب بعد وداد عنك يا سلطان
ناصر: وانا بعد حاس جيه.. لني يوم تميت افكر فيها صح.. واحسبها في راسي.. اشمعنى الإخت ما حبت تنتحر غير قبل ملجه سلطان بليله..
سلطان حس ان راسه افتر عليه.. والتفكير اتعبه.. ما يقدر يتحمل اكثر.. حاس بضغط من كل الجهات.. سالفه هادف.. واحين سالفه مريم.. تم ساكت طول الوقت.. وظهر من الغرفه بكل هدوء ونزل الصاله عند ابوه.. شاف امه وابوه قاعدين في الميلس وراح لهم؟
سلطان: هلا ابوي.. اشحالك؟؟ باس راس راسه
بوسلطان: سلمت.. بخير دام انك بخير..
سلطان: وهاي احلى بوسه على راس امي الغاليه.. ام سلطان..
ام سلطان: فديت ولدي انا..
سلطان: ابوي.. فكرت.. شو بنسوي.. ما تم شي وعمي بيوصل..
بو سلطان: توني ياي من عند المحامي.. قالي ان القضيه صعبه .. ولازم اهل الولد يتنازلون.. والصراحه انا ماودي اني اطلعه.. تدري ليش.. لني اعرفه ما بيتأدب لا طلع..
سلطان: بس ابوي.. انت ادرى بالحال.. والموضوع انتشر.. اخاف اذا ما سمع عمي السالفه من عندنا يسمعها من غيرنا.. الكل يطري السالفه ويرمس عنها في البلاد.. كل ما اظهر مكان ربعي يسألوني عنه
بو سلطان: عيل انا شو اقول.. ريال اشكبري
سلطان: المهم احين عمي.. ومرت عمي.. والله اني حاس بفشله.. مب عارف كيف ارمس واقول..
بو سلطان: سلطان يا ولدي.. عمك يدري في ولده.. وان شاء الله من يتنازلون اهل الولد من القضيه راح يظهر من السجن.. بس احنا نعرف كيف انعاقبه احين..
ناصر: هي والله ابوي.. اتسوي خير .. وانا الصراحه ابا انتقل من المدرسه الي فيها.. الشباب بياكلون ويهي.. هم احين ماكلين ويهي من غير شي عيل عقب شو..
بوسلطان: ناصر.. انت لازم اتكون اقوى من هالكلام كله..
ناصر: بس كيف .. والله انا مااقدر اتحمل رمستهم..
سلطان: جنك بنيه ما تقدر اونه.. لازم.. لا اتخلي هالمشاكل البسيطه اتأثر عليك.. وانت الكل يعرفك.. ويعرف انت كيف.. ويفرقون بين طبايعك وطبايع ولد عمك
ناصر: نصبر أمري لله.. ..
..


الساعة الآن 11:59 PM.

Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية