منتديات ليلاس - اجتماع في فصول الصف الثالث << اللي ما يحضر بيفوته

بسم الله الرحمن الرحيم

مرحبا .. السلام عليكم .. كيف الحال ؟..

يالله بسرعة تجمعوا قبل لا نبدا الاجتماع

طخ طخ طخ <<مطرقة البدأ>> اغلقت الأبواب
و
بدأ الاجتماع ...

________________

اجتمعت الطاولات تشكي لبعض معاناتها وأحلامها مع السنة الجديدة وحالها مع الطلاب والطالبات ..
وقفت طاولة أنواع الفتحات والشقوق على ملامحها وهي تقول: داخلة على الله ثم عليكم ما ابي اجلس الا قدام ودي يجلس علي واحد دافور ويحترمني ويقدرني وربي تملعت العام من الطالب اللي كنت طاولته ما خلى فرجار غلا وفتح في خشتي حفر وشقوق وما خلى موس الا وشخط علي ذكريات هذا من غير العلوك اللي ملصقها حدري .. هالسنة بجلس قدام وما علي منكم ..
الا وتجيك هذيك الطاولة اللي تقول نجفة -جميلة ونظيفة وش زينها تهبل- تقولها: انتبهي يا وخيتي انا جالسة قدام العام اللي كان جالس علي ولد وش حليله بس الله يهديه من اول يوم جلس علي ما شفت شي ابد على طول كتمني بتجليده ..
قالت وحدة: وانتي عندك استعداد تجلسين طول السنة عرجا ؟
قالت: وشلون ؟
قالت لها هالطاولة المسكينة: انا بلاني الله بواحد جلف يتمازح مع اخوياه بي انا ماغير تنطيل بي وتجديع لين فقدت رجلي الرابعة وجلست الحين بثلاث ماغير ارقل .. والحين مهددة اني احال للتقاعد ويصكون علي بدورة المياه الاخيرة (وانتم بكرامة)
والا فيه طاولة جالسة وخشتها مايلة تقول صايبها ابو الوجيه ما تقول شي ابد.. قالوا لها: وانت وراك كذا ؟
قالت: انا العام كنت جالسة على الجدار واللي جالس علي ماغير يهز فيني ومسح في خشتي جدران الفصل لين صار الجدار مثل صبات الدائري وانا خشتي تقول ازياق صدام ليموزين ..
والا وحدة من الطاولات ترطرط مياه وهي تقول: من العام وانا على هالحال كل يوم بلاني الله وصرت طاولة لواحد دعله من يدخل الفصل لين يطلع وهو راقد وسعبولته تقطر علي لين تدبقت وتصدقون طول هالصيف جالسة بالشمس انحمست حمس والسعابيل ما انشفن ..
قالت وحدة من الطاولات -وخشتها تقول خدود نورية انواع الوشم فيها- : نعنبوا ذا الطالب اللي ما يستحي على دمه تصدقون من اول يوم استلم فيه الكتب برشم كتاب النصوص ومادة الانجليزي ..
والا طاولة واقفة على رؤوس الاشهاد وهي تقول: علموني انا الحين قدامكم طاولة والا وشو ؟
ردت وحدة من الطاولات معروفة بمصالتها: لا انتي وشو .
قالت الطاولة: انا الظاهر معينيني طاولة برقم مكتبة او كومدينة .. من بداية السنة وانا زامتن "شايلتن" كتب هالماخوذ لين ما طاحت كتوفي حتى ايام الاختبارات ما فكر ياخذ دروسه ومافيه قرطاسة تحوس بالفصل مالها مكان الا جابها وحطها فيني..

ترررررررررررررررررررررن
ورن جرس المدرسة ودلف الطلاب للفصول وكما جرت عليه العادة اختيار المكان المناسب والطاولة النظيفة .. ومن سبق لبق..

____________

سؤال صريح ومحرج من أي نوع طاولتك؟ :lol:
لا تخرج قبل تجاوب بصدق