منتديات ليلاس

منتديات ليلاس (https://www.liilas.com/vb3/)
-   القصص المكتمله (https://www.liilas.com/vb3/f717/)
-   -   البحث عن الحب للكاتبة طرماء وثرثاره (https://www.liilas.com/vb3/t77323.html)

no000r 12-06-08 12:46 AM

...(الفصل الثاني عشر)...





اهواك .. اهوااك .. يالمحبوب اهواك ..
يامن سكنت القلب والعين .. حياتي ماتسوى بليااك ..
يامهجتي ياكامل الزين ..

قام بصعوبه...ومدد ايدينه وريوله في فراشه..وطالع السقف بأسهاب...حط ايدينه على بطنه المسطح من التمارين الاخيره اللي داخلها في النادي مع رفيجه محمد....اه ..يامحمد نسيتك...من جفت حبيبة القلب...اوهو...لازم أذكر ابوي في موضوعنا...وقام يغسل ويهه ويلحق على ابوه قبل لايطلع الشغل...
نزل راشد مستعجل وغترته على جتفه...بس لابس الطاقيه وحاط العقال ..اول مادخل حصل امه وابوه قاعدين يتقهون وحبهم على روسهم وقعد جنب ابوه وحط اغراضه جنبه..خذ قلاص الحليب من امه...:يبه...فديتك لاتنسى الموضوع اللي كلمتك عنه...
ابوراشد :ان شاءالله...
ام راشد بستغراب:شموضوعه...؟
راشد طالع ابوه يبي يجوف ردة فعله...ابوراشد..وهويطالع مرته:والله شاقولج ياالغاليه...ولدج يبي..
وطالع ولده...تبيني اقول لها ولاانت تقول....
راشد حب يستعبط عليها..:لايبه ...خله مفاجاءه...بعدين...احسن..
ابوراشد..:والله يبه كيفك...هاذي امك وانت حر تنجاز انت وياها....
ام راشد..بعصبيه..:بتقولون سالفه ولا شلون...شلي وراك انت وابوك...
راشد حب يورط ابوه بعد ماورطه معاها..:يمه ...ابوي بيعرس....
ام راشد بطلت عيونها من الصدمه...:يهبي الشيبه يسويها...عشان اقص ايدينه وريوله قبل لايطلع من هالباب...
ابوراشد بضحكه من ردة فعلها...:ههههههههههههه...لو بعرس جان عرست ولا عرفتي...بس من بعد هالقمر وين اجوف غيره...يا ام عيالي وامي وسندي...وانت يامسود الويه ..جف عاد من اللي يخطب لك...
راشد قام يحب خشم ابوه..:يبه شفيك محد يضحك معاك...؟
ام راشد استحت من كلام ريلها...وطالعت بولدها بنظرة سخط.....ابوراشد بجديه..:خلينا من خبال ولدج...اللي يبي يقوله ..انه يبي بنت عمه..ويبني اكلم عمه اليوم ...
ام رشد بفرح..:والله...سبقتني ..كنت بكلم ابوك عن هالموضوع...والله هند مافي مثلها...وان شاءالله تكون من نصيبك...
راشد:اميييييييييييين...الله يسمع منج يالغاليه....
ام راشد...:يمه شفيك...مغلوث على العرس...اركد يمه يمدحون العقل....
راشد:معليه ...خليها تحصل...بعدين بنعقل...
ام راشد بجديه..:وانت شلون تبي تعرس وانت بعدك ماكملت باقليك سنتين...؟
راشد:يممممممممممممه...واللي يرحم والديج...لاتكسرين مجاديفي من الحين...ترى انا قلت بس خطبه عشان اظمن محد ياخذها مني...
ابوراشد وهو قايم...:ان الله كتبها من نصيبك مارح حد يقدر يردها منك...يله الغلا بغيتي شي قبل لااروح...
ام راشد..:سلامتك الله يحفظك...
راشد لحق ابوه..يبي يروح لرفيجه محمد..وقف عند دريشة سيارته وقعد يعدل غترته...راشد شاب وسيم خصوصا ًطلته الشيوخيه وعيونه الحاده وخشمه السيوفي وشفايف المملؤه ..والعارض الخفيف اللي زايد حلاته...وكان طوله فارع بس مب اطول من عبدالله ...حنطاوي البشره ...راشد طلع بسيارته وزوج من العيون العسليه تلاحقه من ورى الدريشه اللي مقابل بيتهم....حياه كانت معجبه في راشد للدرجه الهبل وتعرفت على اخته خلود بس عشانه ولاهي ماتحبها على قولتها خقاقه...بس عشان توصله لازم تحملها....بس من ابتدت الاجازه ماجافتها ولااتصلت عليها....انا ليش مااتصل فيها اليوم وازورها ...بس لازم اختار الوقت المناسب اللي يكون فيه موجود الغالي... راشد وصل لرفيجه محمد في المستشفي كان بروحه...كانت اصابته خفيفه...كسر بسيط في رجله..
راشد :ماتشوف شر يالغالي...
محمد :الشر ماييك....بعدين وين غالي وانت من امس محد....
راشد :اسمحلي يابوجسوم....امس الشيبه مسوي عشى لعماني وانت خبرك من زمان ماجفناهم....
محمد بعد مافهم الغمنده :هاه...عمانك...قول جذي من البدايه....خلاص معذور....
راشد :فديت هالخشم ...محد يفهمني الاانت....
محمد :خليك من خشمي....هاه شسويت على الله كلمتها...ولا كالعاده بلعت لسانك وسكت ...
راشد ببتسامه :الا....كلمتها وطريت الدنيا على بعض....
محمد :شسويت....؟ياخوفي منك...؟والا انت ويه تحب....؟
راشد قاله السالفه كامله....محمد ضحك...:ماشي وقت عندك اعترفت وخطبت سيده...اثريك حاربحار..
راشد بجديه :عيل شتبيني اسوي علاقه من ورى اهلنا وحب من ورى الدرايش انا مرضاها عليها..ولاارضاها على نفسي...حلات الشي ساتر... بعدين مابي احس اني اسوي شي غلط اذا قعدت اكلمها...
محمد :عين العقل يابوسنيده من يومك عاقل....
راشد :ادري مايحتاي تقول...وقام الحمام(وانتوا بكرامه) وخلى تلفونه جنب راشد... تلفوناتهم كانت نفس الشي فرن تلفون راشد ...وشاله محمد وجاف المتصل (خلود)...حط التلفون في اذنه في اعتقاده انها خالته خلود...
خلود بصوت ناعم: الو...
محمد بستغراب :الو...
خلود مانتبهت لصوت محمد لانها من شوي قايمه..:رشود يا السخيف....ليش تخطب من غير لااعرف..وليش ماستشرتني...ترى باخليها تغير رايها...
محمد عرف ان الجوال اللي معاه جوال رفيجه وتوهق..:لا...حرام عليج تخربين على اخوج مايستاهل..بعد هالحب كله والسنين...
خلود صخت شوي هذا مب راشد..:راشد...؟
محمد....:لا انا رفيجه....محمد..
خلود بعصبيه..:وانت شلون ترد على جوال اخوي صج ماتستحي...انت ترضى انه اخوي يرد على خواتك....؟راشد وينه........ فيه شي عشان مايرد علي.........؟
راشد عصب من هجومها :الشيخه ...اسف ترى مب قصدي ان ارد عليج...بس احنا معانا نفس موديل الجوالات ...واعتقدت انج خالتي...وراشد مافيه شي راح الحمام وانتي بكرامه...
خلود من غير لاتصدقه:اسمع الشيخ.... روح قص على وحده عمرها سنتين...اونه خالتي...صج قلة حيا..ورقعت التلفون في ويهه...
محمد احترق ويهه من كلامهاومن الغيض...وطالع التلفون بعصبيه ومسح قيد المكالمه..عشان راشد مايعرف انه رد عليها بس على الله ماتفضحني...هالملسونه...نزل التلفون مكانه...
راشد بعد ماطلع :شفيك ...صوتك...طالع..؟
محمد برتباك..:وحده مغلطه...وتزامر علي جني اشتغل عندها جان اعطيها من السنع وسكرت في ويهها...
راشد..:اهاه ....شكلها هي اللي مسكره...والاانت ماظن ...اصلن مافيه بنت في البلاد الاورقمتها...
محمد : اصلا ًانا من زمان مخلي هالحركات...وانت ادرى...
راشد :الله يتممك على العقل....
محمد :ليش شايفني خبل...؟
راشد :يعني على خفيف..
وقعدوا يتناقرون في الحجي لين ضحى بعدين استأذن راشد منه بيروح عنده شوية اشغال...,ابوراشد فاتح اخوه في الموضوع ورحب بسرعه من غير تردد لانه من زمان يتمني راشد لهند وقال له لويبيها من الحين ياخذها بس ابوراشد لزم ياخذون راي البنت واخوها قبل كل شي...وطبعا لازم يشاورون ابوهم .....
سالم كان توه داخل بيت ابو عبدالله...وسافط بسياره يبي يسلم على ابوخالد وابوعبدالله صاربه مده ماواجهم من عرست بنت اخته...وهو نازل حصل حمد واقف في نص الحوش ..:سلام عليكم....
حمد راح صوبه واجهه بالخشم ...: هلا خالي شلونك..؟
سالم وهو يفسخ النظاره ويبتسم له ..:الله يسلمك ...شموقفك هني...؟
حمد هو يحك راسه منحرج:امي....متحلفه فيني اذا دخلت بطقني بالخيزران...؟
سالم ضحك من داخله تذكر امه اول اذا شرد من المدرسه تفلع العصا على ظهره...:ليش ..؟اكيد مسوي شي..
حمد...:عشان طقيت هالدلوع عبود....
سالم...: وانت ليش اطقه مب انت اكبر منه حرام ...المفروض انك ماتمد ايدك لازم تعلمه ...بس مب تظربه...
حمد..:انزين قهرني ...كسر سيديهاتي كلهم ماضل لي شي العب فيه...
سالم :حتى ولو المفروض تفهمه اللي يسويه غلط...يله روح تأسف من امك ومنه..ولاتعيدها....
حمد نزل راسه..:ان شاء الله...
سالم :بارالله فيك...حمد يدك موجود...
حمد :اوه نسيت اقولك تفضل الميلس صار لي ساعه موقفك في الشمس بيذبحني يدي...حياك الميلس..وباروح انادي يدي...
دخل الميلس وهو يفكر في حمد والله ونعم التربيه اللي ربتها نور عرفت تربيهم وهي بروحها...دخل ابوعبدالله وسلم عليه وقعد يسولف معاه لين اذن المغرب وطلعوا للمسيد كلهم....
بعد الصلاه قعدوا في الدكه اللي عند الميالس ...وجاهم عبدالله الصغير ينافخ وقعد جنب يده...ابوخالد بعصبيه..:شفيك تنافخ مثل الحريم..؟
عبدالله بعيون ذبلانه :ملل...كله من خالي عبدالله...
ابوعبدالله..:يالله ..ليش شمسوي ليك ولدي..؟
عبدالله بحزن ..:خذا ساره وداها بعيد...زهق...ابيها...
سالم ابتسم بحزن....ومسح على راسه ..:ان شاء الله قريب بترد...
ابوخالد.:وانت شلك فيها ...هاذي صارت حرمه معرسه وباجر بتيب يهال...ولاعادتسأل فيك...
عبدالله وعيونه متروسه..:لا...لا... ساره مالتي بس...مراح تيب حد..صح خالي..وطالع سالم...
سالم طالع ابوخالد بعتب :شفيك يامعود...شوي ...شوي على الياهل....اكيد ساره مالتك ماراح حد ياخذها منك....واللي بياخذها بظربه لك....
عبدالله لوى سالم :الله يعني بتيب ساره...
سالم وهو يضحك..:لا...مب الحين عاد...بعد اسبوع...
ابوعبدالله..:ههههه...محد قالك بتهوق عمرك معاه...
سالم وعبدالله بعده في حظنه ..:يستاهل...عبدالله...حبيب الغاليه....ابوعبدالله..؟
ابوعبدالله.:هلا..؟
سالم.:اذا مافي خاطركم شي..معليه اخذ العيال امشيهم شوي من الحكره..
ابو عبدالله..:انا مافي خاطري شي ..اذا هم بيرحون...يقلون لأمهم اول..
حمد نقز ..:يدي امي عادي ماتقول شي..
سالم..:حتى ولو رح قلها انت وخوك وبدلو ملابسكم...بالمره...
حمد من خلص كلامه سحب اخوه وطيران داخل....سالم ضحك عليهم....يحليلهم ....
حمد وهو يصارخ...:يماه ....يمممممممممممه....
نور معصبه طالعه من غرفة امها وشيلة الصلاه على راسها..:وجع....شهالصوت حشى... خرعتني شتبي..؟
حمد بل شبت فيني قبل لاقول شي على جذي بترفض , فقرب منها وباسها على خدها..:اسف مماتي..
نور بضحكه..:مماتي...سالفه فيها طلبه صح..؟
حمد بتذلذل..:يمه فديتج لاتعيين...خالي سالم يبي يودينا انا وعبود نتمشى ..
نور:شلون ترحون ...عيب ماتستحون..
حمد:يمه تراه خال ساره يعني خالنا...بعدين هو الي قال لنا مب حن اللي طلبناه اذا هاذا قصدج..
نور:ويدك شقال..؟
حمد..:يدي قال معليه بس لازم انقولج...يمه فديتج ترى ملينا من القعده....
نور بخضوع..:انزين معليه بس مب تأذون ريال..؟
حمد وهو يلوي على امه ..:مشكوره الغاليه...وان شاءالله مراح انأذيه...
وراح للغرفتهم يبدل ونور خذت عبدالله تبدله ملابسه....وقبل لايطلعون ..عطتهم فلوس...
راشد من عرف رد عمه حاس ان الدنيا مو سايعته لان يده بيفرح بهالشي وعبدالله مستحيل يعارض
خلاص ماقى شي يعيق لقاء القلب..كان نازل من فوق وعقاله في ايده ولابس غترته خلود كانت حاطه ريل على ريل وتقرى مجله وعندها قلاص نسكافيه...راشد دز ريلها وتعدلت ريولها...
خلود بعد مانزلت المجله...الله يستر..:خير..؟
راشد...:ههههههه....شنوخير اطر عندج...لاتقعدين جذي جدام الريايل احترميني عيب...
خلود..:عشتوا...من وين الاخ ياي شهالتخلف...بعدين انا قاعده بروحي محد عندي..
راشد..:اقسم بالله ..محد بياكل عشاك..كليتيني..
خلود..:احسن تستاهل...ليش حاط لك راس على,,؟
راشد..:خخخ ...يحق لي بخطب...
خلود.:ليش عمي رد عليكم...
راشد..:ايه ...اليوم ابوي كلمه..وقال عنه موافق بس يبون ياخذون شورها ...
خلود..:شهالثقه..انها بتوافق...
راشد..:ادري..
خلود..:شدراك...؟
راشد..:هاذا..مد على قلبه وقام يلبس عقاله..يبي يطلع...سالته خلود..:وين بتروح..؟
راشد..:باروح للمستشفى..لرفيجي..محمد...
خلود..:انت للحين مارحت له من سوى الحادث...
راشد..:شدعوه...لا..رحت له اليوم الصبح...
خلود يعني هو اللي رد علي اليوم أهو.... هاذا وهو مكسر يغازل عيل لو بعافيه شبيسوي...راشد وهو طالع خذ قلاصها..بس لانها سرحانه مانتبهت...
في عاصمه اخرى وتوقيت غير ...ولحظات سابقه لأحداثنا...قامت ساره من النوم وغسلت ويهها..وطلعت الصاله بالفانيله الطويله الصفرا اللي توصل لين نص ساقها وايدينها طويله..وفيها رسمة دبدوب ملوي على قلب..وشعرها معجفته عجفه وحده على صوب واحد ..ويهها مورد من النوم...وقفت في نص الصاله ومددت ايدينها.......
:اه..العيال كبرت ....
ساره التفت له معصبه..:سخيف...وردت عجفتها الطويله ورى وراحت للمطبخ ...عبدالله كان توه قايم من النوم وبعده بجامته سودا..ضحك من عصبيتها.... قطوه.....لحقها للمطبخ...:سويلي كوفي معاج..
ساره وهي معطيته ظهرها :كيفي...
عبدالله قرب منها ومسك عجفتها وسحبها على الخفيف..:نعم..؟
ساره والتفت عليه وشعرها بعده في ايده..:ولا شي باسوي لك..
عبدالله رفع حاجبه..:على بالي سمعت شي.. انزين يبيه في البلكونه...فك شعرها وطلع...
ساره فكه..السخيف انزين ماتحرشت ولا كنت رجعت البلاد قرعا...وسوت لهم كوفي..وطلعت من المطبخ للبلكونه وكان قاعد على الكرسي المصنوع من الخيزران..وحاط ريوله على طاوله اللي جدامه...ساره وقفت عند باب البلكونه خافت حد يجوفها من غير شيله ولبسها بعد قصير..:عبدالله..
التفت عليها بعيون كانت سرحانه..مدته بالكوفي..قام من الكرسي وخذ القلاص ورجع لمكانه بنفس الهدوء...مالت انزين قل شكرا صج مايعرف السنع وقعدت على الكنبه في الصاله وفتحت التلفزيون..وقعدت تقلب في القنوات...وتلعب في طرف شعرها..
عبدالله كان واقف في البلكونه يبي يطلع ولفتت نظره بشكلها الناعم..وهي تلعب بشعرها..وجمالها الرباني..عبدالله نفض مخه من الافكار وحاول انه يقاومها مايبي يضعف مره ثانيه..:ساره...تبين تطلعين..؟
ساره التفت له بفرح بس ماكنت تبي تبين له..:كيفك..
عبدالله..:شنو كيفك ..انا أسألج تبين تطلعين يله قومي لبسي...
ساره..:اوكي..
عبدالله قال لها قبل لاتدخل الغرفه.:البسي لبس ثجيل...
ساره كانت تبي تعانده..بس قررت انها تعدي هاليوم على خير مدام انه رايق معاها للحين..كملت لبسها وطلعت كانت لابسه تنوره جنز مطرزه بصورة تنين وردي واخظر على طرف ولابسه معاها سويترمن الصوف الكشميري هاي نك بلون الورد ولبست جكيتها الاسود...وشيله سودا..وشنطه مصنوعه من الصوف مثل الكيس تنزم بالخيط وعلقتها في ايدهاولبست لها بوت من الجنز سبورت وفيه تطريز وردي..ونفحه قليله من الغلوس الوردي والكحل الداخلي...
اول ماطلعت من الغرفه كان ينطرها بلبسه المكون من بنطلون اسود وسوتر رمادي وجكتيه في ايده والوشاح الاسود حولين رقبته ونظراته كانت راد شعره الحريري لورى...طلعوا من الفندق..ساره على بالها بينطرون تكسي ..وقفت عند البوابه بس عبدالله ماوقف توجه لسياره سافطه جدام الفندق مرسيدس كوبى...مكشوفه وركب وتوجهت لسياره للباب الثاني وركبت...:من سيارته..؟
عبدالله وهو ينزل نظراته على عيونه ويشغل السياره ويطالعها..:محد مستأجرها..
ساره.:اهاه...انزين وين بنروح..؟
بعد ماتحركت السياره رد عليها..:بنروح الارياف...
ساره صفقت بيدينها..:الارياف ...يالله وناسه..احلى شي هاالمكان..كنا انروح اناو...بعدين سكتت بعد مامر شبح الذكرى..
عبدالله..بعصبيه.:مع من..؟
ساره التفت عليه بحزن..من غير لاتنتبه للعصبيه :مع هلي..ومرت خالي..؟
عبدالله وهومتلوم..:الله يرحمهم..
ساره التفت على الجنب الثاني وغابت في بحر الذكريات السعيده...عبدالله غرق في بحر افكاره الجنونيه بين تردد في التمادي معاها ولا الانسحاب من محيطها اللي شكله كله عثرات...بعد ساعه دخلو الارياف الفرنسيه وقفوا عند مطعم على الطريج مبني على شكل كوخ..ويقدم وجبات خفيفه..خذوا لهم سندويشات وعصير وقعدوا على طاوله مصنوعه من جذع شجره وجنبها بحيره صغيره وقعدوا ياكلون بهدوء...
بعدين تحركوا لين وصلوا مكان مثل المنتزه بس من غير اسوار في اكشاك على اطراف الشارع تبيع تذاكارات وفشاروعصير وحلويات وجبات خفيفه....كان موجود القليل من العوائل..عبدالله سفط بسيارته ونزلوا يتمشون جنب بعض من غير لاينطقون بكلمه...وهم يمشون بشوي شوي تدحرجت جدامهم كوره..ساره رفعت راسها للمصدر جافت صبي اشقر عمره خمس سنوات ابتسم لهاشاتت له الكوره بخفيف لين وصلت له ..وطلب منها تلعب معاه التفت لريلها..:تبين كيفج..؟
ساره..:اذا انت بعد بتلعب انا عادي..؟
عبدالله..:شايفتني ياهل مثلج... لابقعد هني...
ساره خذت في خاطرهاولفت للولد وخذت الكوره منه وقعدت تلعب معاه خلي استانس احسن من هالمعقد وانسى الهم شوي...عبدالله قعد تحت شجره وقعد يلعب في العشب ويطالعها...وهي تلعب وطارد الكوره وتشوتها وتظحك اذا غلطتها ..كانت ضحكتها مثل الفراشه ترفرف على قلبه وتخليه يبتسم غصب...ساره شاتت الكوره يوم جافته سرحان ويضحك...طالعها وهو رافع حواجبه بستغراب....طالعته ساره بتحدي..:شوت الكوره...اوه نسيت انك ماتعرف..هاذ شي مطور عندك..
ماتعرفه...
عبدالله وهويرفع نظاراته على شعره وشطانه تلمع في عيونه..:عيل شعرف..؟
ساره وهي حاطه ايدينها على خصرها تنطره يرجع الكوره اللي مسكها..: انت ماتعرف غير سبر..
يله جيب الكوره...
عبدالله وقف والكوره في ايده..وهو يضحك..:هههه ...ان ماعرف غير الاالسبر ياسخيفه..شقالولج شيبه..وشات الكوره وضربت ساقها...
ساره وهي معصبه..:والله بعد تعرف تشوت...
عبدالله جاها بخطوات سريعه يبي بس يخرعها بس هي شردت تضحك ووقفت ورى الشيره وطلعت لسانها..:يالشيبه
عبدالله:شابت حواجبج يام السعف واليف...
ساره..:احسن منك يالمخرف...
عبدالله..:تعالي يالجبانه..مب تتحدين من ساعه تعالى لعبي انت زيدان رفيجج....وانا ضدكم..
ساره وهي تبي تطلع من ورى الشيره بس متردده..:اعرفك تبي تفلعني بالكوره..
عبدالله بضحكه ..:لا مب فالعج بس تعالي وعد...
ساره بعد ماطلعت..:ياويلك..ترى قلت وعد...
عبدالله بضحكه شيطانيه..:شبتسوين يعني,,؟
ساره بقهر:عبداااااالله..حرام عليك..
عبدالله..:هههههههههههههههههههههه ..انا ماسويت لج شي للحين..
ساره..:يعني ناوي..وشردت مره ثانيه ورى الشيره...وعبدالله وراها ويحاول يفلعها بالكوره وهي تركض حذفها بالكوره وضربت راسها.. :اخخخخخخخخخ ...يالبايخ يعور..... وقعدت على الارض ومدت ريولها جدامها وعبدالله وقف عندها ميت من الضحك لدرجه ان عيونه دمعت وحط ايدينه على خواصره من كثر الضحك....ساره قعدت اطالع فيه وهو يضحك الله لايحرمني من هالضحكه..كان شكله قمة الروعه وهو يضحك والغمازيات يبانون بقوه وعيونه السودا اللي تلمع حركت المشاعر في اطرفها وحست بالبرد فيها ومثل الكهرب في عمودها الفقري من قعد يطالعها بنظرات حالمه ومبتسمه...مد ايده عشان توقف.... ومدت ايدها له وسحبها لين وقفت جدامه حست ان دمهايغلي في عروقها من لمست ايده دافئه...ساره مانزلت عيونها من عيونه اللي سلبت روحها وضاعت في اغوارها...بس عبدالله قطع اللحظه الحلوه بعد مالتفت بعيد مايبي يتورط معاها اكثر..
وسحبت ايدها من ايده بعد ماأشاح نضره عنها وحست بالصد ساره بصوت خفيف..:عبدالله عطشانه...
عبدالله حس انها توترت منه..:تعالي بوديج مكان تشربين منه وسحبها من غير لاترد....دخلوا من بين الاشجارومشوا لمكان خلاب وساحر كان فاضي وفيه مثل الشلال الصغير تنحدرمنه مياه النهر..عبدالله فسخ قفازاته الجلديه ومد وركب على الحصى ومد ايده لشلال وشرب من الماي....والتفت لها ...:هاه تبين تشربين...؟
ساره هزت راسها موافقه وقربت من المكان اللي وقف فيه....بس عبدالله قال..: ماراح توصلين للشلال...قربي على على هالحيده...وانا باعطيج..
ساره قربت من الحيده اللي اشر عليها..ووقفت..:شلون بتعطيني معاك قلاص..خخخخ..
عبدالله مارد عليها وجمع الماي بين ايدينه وقربه منها...:شربي..
ساره كانت في قمة الاحراج كان ويهها الوان...: خلاص ...مابي...
عبدالله عصب..وخلى الماي يتسرب بين اصابعه..:الحين جايبج هالمكان...وتقولين مابي..الشرهه على..اللي داق مشوار عشانج..ونزل من الحيد ورجع مع المكان اللي جاو منهوهو يمشي بخطوات واسعه لدرجة ان ساره ماقدرت اتجاريه في المشي..وكانت تفكر ليش عصب هاذا اللي ناقص اني اشرب من ايده صج مايستحي ..من كثر ماهو متعود على الفري على باله وحده من رفيجاته الخايسات...وفولت من هالفكره...دعمت في ظهره مانتبهت انه وقف عند السياره...:سوري..
عبدالله افحمها بنظره ناريه..وخلها تبلع اي رد ثاني..ركبوا السياره وكملوا طريقهم ...لين وصلوا مطعم راقي وتغدوا فيه....وعادوا ادراجهم لفندقهم...بعدماتمشوا في اكثر من مكان بهدوء قاتل...
اول ماوصلوا عبدالله دخل المكتب وقفل على نفسه وقعد يكمل شغله المتراكم عليه...وساره دخلت غرفتها وتسبحت وصلت...بعدين قعدت على سريرها..وهي سرحانه...لفت نظرها دفتر ظاهر طرفه من شنطتها اللي طلعت فيها اليوم المشؤوم...وسحبته...وقربته منها ولوت عليه بعدين نزلته باسوي لي كوفي بعدين بقراه...
بعد ماسوت لها قلاص كوفي...مرت على المكتب تبي تسأله يبي شي...بس سمعته يتكلم بصوت قوي وطويل...:يبه كفايه انكم زوجتوني غصب...وبليتوني..اختي سمحولي مراح حد يغصبها...وراشد لازم يفهم مب عشان انه ولد عمكي خلاص انه بنحذف خواتي له...يبه انا مب موافق...لاني اعرف اختي بتوافق عشان ماتزعل....يبه واللي يرحم والديك لاتظلمهم مثلي....شلون ماانظلمت ليش انت تعرف شنو احس فيه الحين....معليش يبه اجلوا الموضوع لين ارد لاتكلمونها لين ارد...
ساره كلام عبدالله انكت مثل الماي البرد عليها...وذبح براعم الحب اللي تنمو في حنايها...وكرهت نفسها وكرهته...ليش...ليش ياعبدالله...وركضت لغرفتها ونزلت القلاص على الكوميدنو...وقعدت وهي تنتفض من الحزن المؤلم....ليش ياعبدالله..لهدرجه انت كارهني...حست ان عبدالله ذبح اخر امل انها تعيش معاه بسعاده...

ارحم عيوني لو عيونك تبيني.....
حرام هذا الحب تقتل مـــعانــــيه......
مو حب هذا إلي تسويه فيـني........
في فرق بين الحب وإلي تســويه.....
يا ساكن ما بين عيني وبـيني.......
لا تصدم إلي صرت أغلى أمانيه.......
جيتك بقلبٍ شايله في يميــني......
كلمـــه تجيبه لك وكلــمه تــوديـه.....
أرجوك بلي باقي ٍ من حنيني.....
حرام من يسعد عيــونك تبــكيــه.....
بالله شوفوا الفرق بينه وبيني.....
هــمه يزعــني وأنا همي أرضيه...
هذي قيودك حلها من أيديني......
حبٍ يذل القــلب يانــاس مـا أبيه.....
موحب هذا إلي يسويه فيني....
في فرق بين الحب وإلي يسويه......




قراءه ممتعه :flowers2:

masayeb 13-06-08 12:58 AM

شكررررررررررررررررررااا نور
انا عندى امتحان فزيا يوم الاربع مش عارفه هعرف ادخل
ولا لا ادعيييييييييييييييييييييييلى والنبى

no000r 13-06-08 11:07 AM

الله يوفقك حبيبتي


ونشوف نتايج حلوه

عطر الأماكن 14-06-08 04:31 PM

قصه رائعه أختيار موفق ألف شكر على النقل

no000r 14-06-08 10:56 PM

اقتباس:

المشاركة الأصلية كتبت بواسطة عطر الأماكن (المشاركة 1476457)
قصه رائعه أختيار موفق ألف شكر على النقل



هلا والله


اشكرك على المرور الراااااااائع


الساعة الآن 10:00 AM.

Powered by vBulletin® Version 3.8.11
Copyright ©2000 - 2022, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية