|
ذنبهم ايه ؟؟
:besm6jb3: ازيكم أعزائي موضوعي النهاردة موضوع مضايقني أوي وبجد عايز أعرف هل فيه حل ولا لأ عايزكم تشاركوني برأيكم في ناس عايز اعرف ايه ذنبهم الراجل الي بيبيع مجلات وجرايد في الشارع والست الي بتبيع خضار والولد الصغير الي بيبيع مناديل والي عنده عربية بيبيع عليها بطاطا وبتاع الكشري وبتاع الفول ... وغيرهم من الناس الي أقل ما يمكن نوصفهم بيه انهم غلابه وعايزين يكسبوا القليل بس بالحلال ليه الناس دي بيتحاربوا .. ليه الحكومات بتقول انهم مظهر غير حضاري و بيتقال عليهم انهم عار على شكل المجتمع وكل ما يشوفوا حد منهم ياخدو الي معاه يرموه ( على الرغم انه ممكن ما يساويش اكتر من 20 او تلاتتين جنيه ) لا ويحبسوه ويكتبوه تعهدات انه مش هيبيع تاني ابدا بالمنظر دا وبعدين نستغرب ان عدد حالات السرقة والنصب بتزيد وان عدد تجار المخدرات أصبح أكتر من الي بيتعاطوها ليه محلات بيع الخمور مفتوحة .. عشان طبعا دا مظهر حضاري وعادي !! ليه الكازينوهات والنايت كلابس مسموح بيها .. يمكن بتقدم فن راقي وبتزيد الدخل القومي !! بس الناس دي الي بتشوه سمعة البلد وعار على منظرها الحضاري هل كتير عليهم انهم يكسبوا 10 جنيه في يومهم بالحلال ولا يبيعوا مخدرات ويكسبوا 1000 جنيه في اليوم ويضيعوا كام ألف شخص في ناس اتخرجت من جامعات بقالها عشرين سنة واكتر ولغاية النهاردة من غير شغل مش لأنهم سلبيين أو كسالى .. لأن مافيش شغل فمابالك براجل مش متعلم عنده أولاد في الجامعات ويمكن بنات عايزة تتجوز ومتطلبات تانية كتير زي ايجار بيت زي أقساط و زي حلجات تانية كتيييير وعربية الكشري ( الي كسروها ) وحبسوا صاحبها ( عشان شكلو وحش ) هي مصدر الدخل الوحيد بالله عليكم لو أولاده ( كنتيجة حتمية مش هنقول طبيعية ) بقوا مجرمين أو تجار مخدرات أو سلاح أو أي مصيبة .. ما تلتمسلوش العذر ؟؟ مش هنقول الغلط عمره ما يكون حل والكلام الي لا بيودي ولا يجيب دا .. بس هو دا الي هيحصل وبيحصل مع الأسف الناس مش ولاد ... زي ما بيقولوا عليهم الناس دي أشرف من ناس تانية كتير معاهم فلوس بس كلنا عارفيين جايه منين وبتروح فين جبتلكم جزء من قصيدة لشاعر عامي جميل عايش الوضع جدا ولو انها ما تخصش الحكاية هنا تحديدا بس ليها علاقة جامدة بالحكاية الكبيرة ككل اسمه علي سلامة بيقول وضيعت شوية سنين .. عايز أفهم الفرق .. بين النكسة والهزيمة .. والأحترام وقلة القيمة .. و أبقي نجم سيما .. م المشهورين .. وبعدين ضيعت شوية سنين ... واقف عند نظرية المؤامرة .. لا عارف أعيش ف الزمالك .. ولا راضي أعيش ف غمرة .. ومش عارف ليه .. الحشيش ممنوع .. مدام مصرحين بالخمرة .. وياتري بقي أتجوز .. واحدة بيضة ولا سمرة .. ولا أسأل فيها .. رجال الفتوي والدين .. وضيعت شوية سنين .. مركز ف السيراميك والبيبان والشبابيك .. وألوان الحيطان .. وده بيج وده سن فيل .. والمودة الأصفر .. قشر الموزة .. وضيعت شوية سنين .. لا انا بحر ولا نيل .. حاجة كده بعيد عنك .. ملهاش عوزة .. ولما بقيت كام وخمسين ... لقيتني لسه .. بحب من بعيد لبعيد .. وبرضة مش فاهم .. ميدان الجيزة ... هههههههه ساخر جدا بس صريح ومعاصر حقيقي بجد مش عارف الناس دي ايه الي ممكن تعملو هل فعلا وصلت حكوماتنا انها اول ما تطبق نظرية المؤامرة تطبقها على الناس الغلابة دول النظرية الي بتطبقها أمريكا من قديم الأزل على كل الشعوب العربية ياريت لو حد يعرف هما ايه الي ممكن يعملوه معلش طولت عليكم شوية بس فعلا محتاج رأيكم أخوكم |
اخي metvirus
ذنبهم انهم ناس غلابه زى ما انت قلت ذنبهم انهم مش معاهم حتى قوت يومهم ليه مش معاهم فلوس هه؟ ليه طلعو الدنيا دى وملقوش بابي ومامي يدلهم فلوس و.......الخ احنا في زمن للاسف كل القيم والاخلاق والدين راحت في البيباي احنا في زمن الاحترام فيه للاغنى لليورو "مش للقرش" احنا عندنا مثل اكيد انت عارفة"الي معاه قرش يساوي قرش واللي مش معاه ما يساويش" حكومتنا اهم حاجة عندها تاخد الناس اللى انت وصفتهم عايزة اللى يديها مش عندها حاجة تديه علشان كده همه وصمه عار على مجتمعاتنا وشكلهم ياي خالص سوفاج طيب ايه المشكله لو ادو لكل واحد زاوية او داكن او حتى كشك وبدون مقابل واخيرا موضوعك جميل والابيات روعة |
و يعني يا أخي العزيز احنا كلنا ذنبنا إيه في الحالة الهباب اللي كلنا بقينا فيها دي ^_^
أنا لسة موصلين أخي الأصغر للمطار ، مسافر للعمل بدولة أخرى بعد أن ضاقت بنا سبل العيش ببلدنا منذ الصباح و أمي تبكي ، و عيناي متورمة من البكاء للفراق لو كنا في بلد بتحترم آدمية المواطن و بتعطيه أبسط حقوقه للعيش ، وظيفة ، مرتب يمكن أن يعيش منه و يبدأ حياته بدون الغربة في بلاد الله بحثا عما كان المفروض أن يوفره له وطنه و لا الموظف اللي مرتبه 400 أو 500 جنيه لو كان شريف و مابيمدش إيده للحرام ممكن يعيش إزاي و غيره و غيره يعني هي جات على دول اللي انت بتقول عليهم و هايخدوا حقهم و الله حاجة تحزن على فكرة ، علي سلامة ده رائع حريصة على متابعة قصائده بالدستور تحياتي |
موضوع رائع المشكلة في السياسة من وجهت نظري يعني الشخص العادي لو يبيع فول وطعمية وبسعر متوفر للكل راح يشتري منه كثير وكثير وبهذي الطريقة تجار البلد الي عندهم المطاعم والمقاهي الخ راح يخسرون فيعني سياسة الدولة تقول أنا مع القوي عى الضعيف،أنا مع الي عندوا ضد الي معندوش وبعدين لو صارت الدولة افقر دولة وانتشرت فيها السرقات يبقى الطبقة الي فوق هيي الي ربحانه المعونات الي بتعطيها الدول التانية علشان الغلابة والفقر خخخخخخ بس طبعًا تروح في جيوب الي فوق قبل لتوصل للي تحت وإذا وصلت تكون شحيحة أو عطيه من غير نفس . سياسة قبيحة ،والظاهر إن بتنتشر مثل الوباء ومثل ما قالي استاذ مجدي (اللقمة صارت صعبة اليومين دول)يومها ضحكت عليه بس الآن فهمت قصده |
ذنبهم انهم فقراء
الفقراء دوما وفى اى مكان ليس لهم ذنب سوى فقرهم وكأنه عار فوق الجميع ولان الفقر اليومين دول بقى عيب يبقى لازم نتخلص منه ومن اهله ربنا يرحمنا ويرحمهم |
| الساعة الآن 07:12 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية