|
انتــي نــصفي الثــاني(غير مكتمله ) 3 اجزاء
السـلام علـيكم أول مشـاركة بمنتديات ليلاس بعدما كنت ضيفة خلف الكواليس اتمنى ان تنال قصتي على اعجابكم وبالتاكيد انا بحاجة لتعليقاتكم ونصائحكم كل الود ذكريات |
أهلا وسهلا بك في منتدانا أيتها العزيزة وبنتظار جديدك أختي الحبيبة |
حياك الله اختي ذكريات
نتمنى لك طيب المقام وانتي تجدي غايتكِ هنا في ليلاس نترقب الجزء الأول واتمنى ان يكون قريباً جداً |
ننتظر ابداعك ............
|
في أحد الضواحي الخليجية بعد صلاة المغرب أبو سيف: الا قولي يا أبو محمد منهو الرجال هذا (وهو ياشر عليه)؟ أبو محمد: والله هذا طال عمرك أبو راشد رجال حشيم وما عليه زود أبو سيف: (باعجاب واضح وتقدير لهيبته) ما شاء الله لا باين عليه بس اول مرة اشوفه يجي المسجد؟ أبو محمد: (ابتسم) ما ادري والله بس هو انسان ذاكر ربه ليل نهار أبو سيف: ما شاء الله الله يبارك فيه ويكثر من امثاله أبو محمد: اللهم امين أبو سيف بعد شوفته لابو راشد ووقاره والنور بوجهه حس باحساس غريب ارتاح واطمن قلبه له مع انه ما كان بينهم الا سلام وهو اول مرة يشوفه وقال لازم يتعرف عليه هالرجاجيل امثاله ما نلاقي مثلهم بهالزمن وحط في باله انه لازم يتعرف عليه عن طريقه صديقه ابو محمد. بعد ايام من الاحداث السابقة ابو راشد: (بوجهه البشوش) عسى كل شي جاهز يا الغالية؟ ام راشد: (وهي تقابل بنفس البشاشة زوجها) اي الحمدلله كل شي جاهز بس انت قول متى انزل العشا ابو راشد: خلاص ابعث لكم خبر مع حد من العيال ام راشد: ان شالله في مجلس الرجال ابو راشد: حي الله ابو سيف ابو سيف: (بابتسامة كبيرة) الله يحييك ويبقيك ابو راشد: (وهو يلتفت على عيال ابو سيف) شخباركم يا عيال عساكم بخير؟ عيال ابو سيف (سيف،غيث،مروان) : الحمدلله يا عمي ابو راشد: (ابتسامة رضى على وجهه) عساه دوم ابو سيف:ترى يا ابو راشد ما بغيت اني اكلف عليك ولا له داعي اتعبوا اعماركم بالعشا والله ما له لزوم ابو راشد: (ودمه البدوي الي ما زال رغم التمدن) لا تقول هالكلام وانا اخوك ما بينا كلافة ان شالله عيال ابو سيف كل واحد منهم كان يفكر بفكرة وحدة ولو انه طريقة التفكير فيها شوي غير لكنهم كانوا مجتمعين بفكرة حول ابو راشد الي ابوهم من يوم ما رجع من صلاة المغرب ذاك اليوم وهو ما يتكلم الا عنه وقاره ولا نوره ولا احترامه...بس الحين يوم شافوه عرفوا السبب والي جى لابوهم جالهم ما ينلام لي حبه ابوهم رجال كريم ويدخل القلب وامير بصفاته. ابو راشد: بارك الله فيكم ما قصرتوا ام راشد وبناتها (وداد،هند،نورة،سارة) : بالهنا والعافية وداد: عسى بس بيضنا وجهك يبه ابو راشد: (وهو يشوف بنص عين) ايه يبه بيضتيه وداد: (بضحكة شريرة) ليه تناظرني كذا يبه ابو راشد:ما ادري عنك الا كل ورى عزومة قلتي هالجملة تقول انتي الي طابخة مش امك ام راشد: (معجبها الوضع) وداد:اهئ اهئ يعني حرام اسال باباتي حبيبي اسال من؟ راشد ولا خالد؟ ابو راشد: لا تسالي احد انا موجود خلاص ابو راشد: (يجول بنظره على بناته شاف كل وحدة لاهية بشي وطال نظره على سارة اخر العنقود يا حبه لهالبنت هدوئها وخجلها ماخذة عنه الكثير يمكن لهالسبب يحبها زود عنهم الا ان سنها 17 ما خرب عليها وهو يشوف بنات اخوانه وخفات عقولهم الا انها شيختهم) هند:تامرني بشي يبه انا بروح جى فيصل ابو راشد: سلامتك يبه خل بالك على روحك وزوجك هند: ان شالله مع السلامة الجميع: ربي يحفظك بيت ابو سيف ابو سيف: ها يا ام سيف شو قلتي؟ ام سيف: (وهي متلخبطة من زوجها) والله ما اعرف شو اقولك بس....انت تعرف انه الحين رافض هالفكرة ابو سيف: (بعصيبة) لامتى يعني؟؟ عمره 25 اخوه بعمره كان عنده ولد وهو الحين حتى خطبة ما في سمعيني انا هالرجال شاريه وشاري اهله والي عرفته انه عنده بنت وحدة ما حد متكلم عليها واريدها لولدي شوفي ولدك وقوليله الي في خاطري وردي علي ام سيف: ان شالله ما يصير خاطرك الا طيب ام سيف وعلامات الاستفهام تطير فوق راسها شو غير حاله؟ من دخل علينا هالابو راشد قلب حال الرجال؟ والحين يبى يزوج ولده لابنته لانه شاريه؟ وهو الي كان يقول خلي غيث لي بغى يتزوج بيتزوج!! والله حالة الله يعين من الغيث ما فيني على لسانه حديقة بيت ابو راشد سارة قاعدة في امان الله تقرا بكتاب كعادتها الا تيجي اختها وداد وربشتها المعتادة والي يشوفها يقول ما كنها ام وعندها عيال!!! وداد: (باعلى صووت عندها) بووووووووووووووووووووووووووووووووه سارة: (نشف الدم بعروقها وقلبها طار ورجع) وعمـــــــــى انتي وبعدين معاك؟؟ ترى بيجي يوم وبموت والسبة انتي والبووووووووووه مالتك هذي وداد: (رحمت اختها وهي تشوف وجها) اهون عليك سوسو تقولين لي عمى؟؟ وين حبنا اول؟ نسيتي؟ سارة: (وهي مولعة) اقول قومي من وجهي لا بارك الله في ابلسيك وداد: (تتصنع الزعل) اوك يا سوسو سارة: (اشفقت عليها بطيبة قلبها) اوووف خلاص تعالي ما ادري متى بتوقفين هبلك وداد: (شاقة الحلق) هبلي!! هاهاها انتوا اساسا ما تعيشون من غير هبلي خلاص صار يسري بدم عائليتنا انتي تدرين اني لو يوم وقفت هبلي الي انتي تسميه ما تدرون شو يصير فيكم من بعده؟ سارة: (باستهزاء واضح وشفة مايلة) لا والله حبيبتي اذا وقفت يوم عن هبلك نقول اكيد صار فيها شي ولا وداد كيف تكون في يوم عاقلة؟ وداد:اصلا ما يهمني رايك المهم ناصر يموت فيني وبهبالي سارة: (وبضحكة قوية) ههههههههههههههههههه والله ما المسكين الا ناصر الي بتلش فيك وداد: (عصبت على طاري ناصر) اقول انطمي ولا تجيبين اسمه على لسانك سارة: (وضحكة مكتومة) اشتغلت قرون الاستشعار ترى هو زوجك وانتي اختي وداد: (معروفة بغيرتها) ادري ادري بس ما احب سارة:كذابة الا تحبين ونص وداد: ان شالله يا رب اشوف فيكي يوم يا سوسو وانتي تحبين لشوشتك سارة: (عيونها طلعت لبرة من الدعوة اول مرة حد يدعي لها انها تحب) ايييييييه انتي انهبلتي وداد: (والفرحة شالتها شل وهي تشوف سارة) الحب مش عيب سارة:روحي من تزوجتي وانتي اختربتي ما ادري ناصر شو سوى فيك وداد: (احمرت من الخاطر) ناصر ها اوك يا سوسو انا اوريك وكالعادة تمت الملاحقة بينهم وداد ورى سارة خوات بكل معنى الكلمة لا زعل يطوول بينهم والوحدة منهم من نظرة تعرف الثانية شو يدور في بالها..قلبهم طيب وصافي كاملات والكمال لله غيث بعد ما شاف امه وكيف كانت مترردة قال اكيد الموضوع كايد!!! بس لما عرف السبب ما يدري ليش ما سوى مثل السنفونية المعهودة "ما ابى اتزوج الحين" "لا تضغطون علي" ابوه يريد بنت ابو راشد رجال والنعم فيه حسب ونسب وذوق واخلاق ما يدري ليه مرتاح يمكن عشان ابوها؟ انا بتزوج البنت ولا ابوها؟؟ لا اكيد بتطلع على ابوها وتربيته لها من تربيته؟ شو ابى اكثر من كذا؟ الله يختار الافضل غيث يدق باب عرفة ابوه ابو سيف: ادخل غيث: السلام عليكم يبه ابو سيف: (وقلب دق) وعليكم السلام تعال يبه غيث:(حب راسه وباس يده) ابو سيف: (بابتسامة حنونة) الله يرضى عليك غيث: (عينه في عين ابوه) كلمتني امي ابو سيف: (بهدوء) وانت شو رايك؟ غيث: يبه انت شاري الرجال صح؟ ابو سيف: (وبلهفة) ايه وانا ابوك غيث: وانا بعد شاريه ما اظن اني بلاقي احسن من اهل ابو راشد ابو سيف: (نط نطة عجيبة رغم كبر سنه) الله يرضى عليك يا ولدي غيث: (دمعت عيونه بفرحة ابوه) يبه هذا شي في خاطرك وانا مستحيل اخلي شي في خاطرك ابو سيف: الله يرضى عليك ويوفقك ويسعدك غيث: (برضى تام) امين بعد اسبــوع ابو راشد قاعد في الصالة وخلقه ضايق شوي يا رب ساعدني الا هي ما قوى زعلها ابو راشد: (بصوت عالي) ســــارة بعد ثواني تمد راسها بخجل سارة: نعم يبه ناديتني؟ ابو راشد: (ابتسم) اي يبه تعالي ابيك في موضوع سارة: (خير يا رب) امرني يبه ابو راشد: (بنظرة حنونة ورضى) يبه اسمعيني ما ابي اطولها وهي قصيرة في عرب طلبوك مني وانا اشهد انهم عرب قول وفعل ناس محشومة وراعية اصول انا عرفت الابو وعرفت عياله هم شارينك ويبوك لولدهم وانتي يبه صرتي عروس ما ابيك تفكرين بشي الا بروحك وبس صلي واستخيري ومهما كان ردك اذا ايه او لاء ما عليك من احد وانا ابوك المهم انتي ورايك انزين يا ابنتي؟ سارة: (مبلمة)..... ابو راشد: (تنهد) يبه سارة: (رفعت راسها لابوها وهي متقطعة من الخجل انا خلقة اخجل من ابوي والحين يجي يكلمني بهالموضوع ليه امي ما كلمتني؟؟) ان شالله يبه اصلي واردلك جوابي ابو راشد: الله يكملك بعقلك يا ابنتي سارة: (حبت راس ابوها) عن اذنك يبه ابو راشد ما يوقف في نصيب بناته او مستقبلهم الي يجيها نصيبها وهي مخلصة الثانوية ما عنده مانع يفكر في الموضوع او بناته لكن قبل لاء والي حابة تكمل دراستها تكملها في بيت زوجها والي عايفة الدراسة بكيفها المهم ما يوقف في نصيب بناته ويتحكم فيهم وهذا السبب الي خلاه يكلم سارة كونها خلصت ثانوية من جديد وولد ابو سيف ما عليه غبار ودعى في قلبه ان الله يوفقهم نهاية الجزء الاول تعليقاتكم ذكريات |
اقتباس:
تسـلمين اختي وشكرا لك دمتي بخير |
اقتباس:
غاليتي شكرا لك على الترحيب العطر واتمنى ان تطيب كلماتي بينكم والجزء في متناول يديكـِ دمتي بخير |
اقتباس:
شكرا لتشجيعك عزيزتي دمتي بخير |
قلبي بدايت القصه حلوه تسلمي عمري بس لاتتاخري علينا
|
:Thanx:
مشكورررره شكل القصه جيده بس فيه مشكله واااحده اني مااني فااهم شئ؟؟! :dancingmonkeyff8: |
اقتباس:
عزيزتي شكرا لتواجدكـ وتشجيعكـ وان شالله لن اتاخر كثيرا دمتي بخير ذكريات |
اقتباس:
شكرا اخي ما الذي لم تفهمه؟؟ ربما في الاجزاء القادمة توضح القصة اكثر بالنسبة لكـ دمت بخير ذكريات |
شكل الرواية حلوة والعنوان احسه غير وان شاء الله اقره البارت واعلق واسمحيلي اكون من متابعينج:flowers2:
|
اقتباس:
أهلاً بكـِ عـزيزتي يفـرحني ان تكوني من المتابعين انرتِ القصة بالتاكيد شكرا لكـِ ذكريات |
بداية جميلة لقصة أجمل أهنيك أختي الحبيبة على مدخل الرواية مع تمنياتي لك بالتوفيق والنجاح إن شاء الله وبنتظار البارت القادم ولك خالص الشكر والتقدير أختك عذبة التجريح |
ماشاء الله عليك ياذكريات
سرد جميل واسلوب سلس وسهل الحكاية اذاً ستبدأ بين سارة وغيث والقادم يحمل الكثير اعجبني الترابط الأسري بين العايلتين وغيث يدور رضى اهله وسارة بالمثل موفقه يالغلا وعساك على القوة يارب تخرجين روايه ناجحه بجميع المقاييس وتحققين فيها طموحك وأملك من طرحها |
البداية حلوة
وعجبتني علاقة بوراشد باهله وشخصية سارة شكلها حلوة وهبال وداد كثري منهوحلو ان غيث سوا الي يبي ابوههالمرة تعليقي صغيرون لأن ماعرفتهم عدل بس المرة الياية بيبلج تعليق طويل عريض ان شاء الله اذا مافيها ازعاج لج تقبلي مروري:Thanx: |
اقتباس:
يا مرحبا غناتي نورتي والله ومشكورة واايد على المديح وان شالله دوم هب يوم دمتي بخير ذكريات |
اقتباس:
اقدار حبيبتي والله اخجلتيني ورفعتي معنوياتي وان شالله القادم ينال على رضاج ورضى الجميع واكيد القصة بين سارة وغيث والترابط الاسري له يد في القصة وامين يا رب مشكورة ولا يحرمني منج ذكريات |
اقتباس:
هلا وغلا بنوتة مشكورة والله وان شالله دوم ومن العين بكثر من هبال وداد لازم هالنكهة وسارة وشخصيات غيرها بتوضح اكثر عقب وافا عليج غناتي الصفحة كلها لك واكيد ما فيه ازعاج هذا شي يفرحني نورتي ولا عدمانج ذكريات |
مرحبا شحالكم؟ :friends: لمتابعين قصتي ان شالله الجزء الثاني باجر :YkE04454: نلتقي على خير ذكريات :flowers2: |
الجــزء الثاني يـوم الملكة ..: ســـارة:.. سرحانة بعالم ثاني فكرة تروح وفكرة تيجي كبرت وصرت عروس؟ كلام سمعته وايد هالفترة الي طافت بس ليه ما احس اني كبرت؟ والحين برتبط باسم رجال طول عمري!! افكار ممكن البعض يقول انها ساذجة لكن عند سارة غير خلاص اليوم ملكتي وبشوف غيث!! ما انكر اني اريد اشوفه حقي على الاقل!! بكون زوجي وابو عيالي!! ضحكت بخفوت بكون ام بعد!! الله يا دنيا...وتنقطع افكارها بدقة على الباب : ســارة؟ نايمة؟ سارة: (ابتسمت) لا يمه ام راشد: صباح الخير على الحلوين....واعية من وقت سارة: ايه ما نمت زين ام راشد: (وحنانها المعهود) يمه سارة انتي خايفة ولا ما تريدين الملكة؟ سارة: (رفعت راسها بقوة) يمه كيف ما اريد الخطبة؟! ام راشد: يعني انتي ما وافقتي عشان ابوك؟ سارة: (وبقناعة) لا يمه هذي حياتي قبل لا تكون حياة ابوي ام راشد: الله يوفقك يمه .... وداد متى بتجيك؟ سارة: هههههههههه الحينه تنط لا تخافين عليها ام راشد: ايه والله دومها مربوشة حتى بعد زواجها سارة: (بحب لاختها) ما تحلى الا بربشتها ..: ام راشــد:.. تناظر ابنتها بحب وحنان ما ادري ليه احسك زعلانة وتكابرين؟ هذي سارة ما تقول الي بقلبها دومها كاتمة تخاف اذا قالت احد يخالفها رايها او محد يسمع لها دومها تسمع وتنصح لكن محد سوى العكس معها!! ان شالله غيث يقدر عليها وتقدر هيه تفتح قلبها له الله يستر عليك يمه. بيت ابو سيـف منـى: (اخت غيـث) غيث .. غيث غيث: نعـــــــم؟؟ منى: (بنص عين) ايوة ايوة منو قدك يا عريس غيث: يالله بالستر اقول قولي ما شاء الله ما فيني على عينج تونا بنملك منـى: انا بحسدك روح روح ما ادري شوفيك ولا ما ادري سارة اصلا شو بتشوف فيك غيث: (نظرة نارية) اولا انتي غيورة ثانيا ما الك شغل بـ سارة انزين!! منـى: (بصوت عااالي) يا سلاااااااام من الحين ارحم عمرك تراك بعدك ما شفتها يمكن ما تعجبك ادري فيك ابو مواصفات نادرة يا خوفي بس غيث: اقول انتي انطمي امي قالت بتعجبك البنت لا تسوي فيلم من لا شيء منـى: الله يا ام سيف على طول قالتك ما شاء الله عليها امي رويترز مستوية ام سيـف: وشووو شو ها رويترز بعد انتي ما تحشمين احد منـى: (وجها قلب الوان) انا ابى اعرف حظي هذا دوم وياج ليش انا بروح اتجهز ام سيـف: الحينه ها راح صوتي راح وانا اقولك تجهزي قربنا نروح والحينه ياية بتروحين ما عليه منايه براويج لين نرد غـيث: وييييوووو نازعوها سيري سيري ما فينا نتاخر ..: غـيث:.. اليوم احسه غير ما ادري ليه مرتاح واحس قلبي من كثر دقه بطلع من صدري...اليوم بشوف شريكة حياتي كيف بتكون؟ من اخوانها باين عنهم جميلين؟ وامي تقول بتعجبك؟ ان شاء الله انا واثق انه اخلاقها زينة بس باقي شكلها..ابتسم بقولهم ابى العرس قريب ما له داعي التاخير للصيف وهي دراسة ومخلصة...الله يا غيث منو قدك بتتزوج!! بيت ابو راشد ابو راشد: ام راشد ام راشد: سم ابو راشد: (ضحك بويها) سم الله عدوك ام راشد: (خجل الكبار عاد) امرني؟ ابو راشد: وين سارة غيث يبى يشوفها ام راشد: يالله بناديها مجلس الحريم وداد: انتي شو فيج والله الي يشوفج يقول بذبوحها اهدي يا ابنتي سـارة: (مفولة) اقول انطمي نسيتي عمرج الظاهر ما ادري منو سوت مناحة ليلة ملكتها وعدلنا مكياجها ميت مرة!! وداد: (بنص عين) هاهاهاها لا تحاولين اليوم يومج يا سوسو لا تقلبينه علي سـارة: سكتي تراج توتريني اكثر مالت عليج وداد: (حطت ايدها ورى رقبة سارة وتحسس عليها شوي شوي) سـارة: (مسكت رقبتها تشوف شو فيه) وداد: (بتموت من الضحك على سارة) سـارة: وداد تراج ماصخة تعرفين وداد: هههههههههههههه كيف عرفتي بسم الله رقبتج فيها عين ورى سـارة: هيهيهيهيهيهي وداد: (ابتمست) سوسو لا تخافين ولا تتوترين شي طبيعي توكلي على الله واهدي سـارة: ان شاء الله ام راشد: (ياية ناحية سارة) يمه سارة ابوك قال غيث يبى يشوفك سـارة: (ماي باردة انصبت عليها) ......... وداد: سارة يلا قومي سـارة: (نزلت راسها) ما ابى ام راشد: سارة قومي سـارة: (طالعت وداد بتوسل) وداد: لا تطالعيني وزارة الداخلية موافقة مالي شغل سـارة: (تنهدت وقامت) مكـان ثاني من المجلس منـى: (تساسر ميثاء اختها) الله الله الحين اللقاء بتم بين قيس وليلى نفسي اشوف اخوج هذا ويهي خمس دقائق وبترجع تراهنين؟ ميثاء: قلنا غيث خجول بس عاد مب خمس دقائق ما بيلحق يرفع راسه يباله عشر دقائق لين يستوعب انها قاعدة وياه وعشر دقائق بسلم عليها وعشر دقائق بودعها.. منـى: هههههههههههههههه هيه والله * ســـارة * بنوتة حلوة عمرها 17 سنة توها مخلصة ثانوية عامة .. طولها مقبول .. جسمها حلو مش ضعيفة ولا متينة .. شعرها لين كتوفها مقصوص مدرج لونه اسود ليل .. حواجبها مرسومة رسم من عند الله .. بشرتها ناعمة مثل الحرير بيضاء على جدتها ام ابوها .. عيونها عسلية .. رموشها طويلة .. خدودها كبار ومتوردين .. خشمها ( انفها) صغيرون وحلو .. شفايفها مليانة ووردية .. وجها بملامحها عامةً .. عسل مجلس اخر بيت ابو راشد ابو راشد: تعالي يبه سـارة: (متقطعة اصعب موقف الحينه هذا كيف بشوفه انا يالله يالله بعباة وشيلة والحين جذي الله ياخذج يا وداد ليتني ما خذت هالفستان) * فستان سـارة* اخضر هادي ناعم لدرجة فضعية يرفعه خيطين من الكرستال يكشف شي بسيط عن جمالها الانثوي ايدينها وكتوفها وشوي من صدرها يلتف حولها بطبقات خفيفة من الدانتيل غـيث: (وقف امبلم الحين هذي امي تقول بتعجبك؟ ومنايه الخبلة ما ادري شو قالت بعد؟ ما قالوا بتسحرك؟ يا ربي الحين هذي مرتي؟؟ هذي باخذها وبحبسها في عيوني..ما شاء الله عن احسدها.. وانا اوني فرحان بخواتي..طلعوا جبنها ولا شي..الله الله شو هالزين..) توه انتبه انها قالت السلام عليكم...(لا وايد صوتها هذا يا ربي على النعومة والرقة والمستحى) وعليكم السـلام سـارة: (لالالا وين رحت بابا يا ربي هاييل ما يحسون ليش خلاني بروحي وراح؟؟ بذبح عمري..والله لاراويهم مسوين حزب علي .. بصيح) غـيث: (يلس قريب منها شوي..وهي ابد تيبست..) شحالج سـارة؟ سـارة: (يا زين اسمي على لسانه بس لو يخوز شوي بختنق) ... بخير.. وانت؟ غـيث: (شق الحلج) زانج حالي يا الغلا سـارة: (الله من اولها غلا لا هذا شكله مب هين يا ربي وين اودي ويهي) غـيث: (بطرف اصبعها رفع راسها..وشاف صدمتها من حركته..بس لازم يسوي جي منزلة راسها ابى اشوفها .. ابتسم بويها كانه يقولها شو فيج؟) تدرين..؟ سـارة: (الصيحة على الباب) شو؟ غـيث: انتي مب حلوة سـارة : (فتحت عيونها بقو) غـيث: (باس راسها) فديتج انتي ... انتي مب حلوة بس ملكة جمال ما شاء الله عليج سـارة : (قامت بطولها تبى تطلع لكنه مسك ايدها بقو) بروح غـيث: (اتضايج .. الحين انا صدق لا استحي ولا اخيل مالت على ويهي البنت بتموت من المستحى وانا ما صدقت) لا خلاص يلسي عشاني سـارة: لا بروح غـيث: (مسك ايدينها الاثنتين وباسهم وبعدين باس راسها) لا تزعلين تراج مرتي الحين واذا كنت جريء وياج صدقيني انا ما ادري شو صار فيني... سـارة: (يا ربي بذبحني هذا اليوم) ..... انزين ... مع السلامة غـيث: الله يحفظج غناتي * غـيث* شاب 25 سنة موظف .. طول بعرض .. جسمه حلو الي يميزه عرض كتفه ..شعره اسود ناعم قصير .. حواجبه قوس .. عيونه سود .. رموشه طولها عادي .. خشمه (انفه) طويل مثل السيف .. له لحية خفيفة .. شفايفه وسط .. له غمازة بخد اليمين .. ملامحه وجها بشكل عام .. جذاب بيت ابو سيـف منـى: (قاعدة وتشوف اخوها الي سرحان بعيد .. مفتحة عيونها عليه) غيث انزين وبعدين؟؟ غـيث: (الله على النشاز) نعم؟؟ منـى وميثـاء: شو رايك فيها؟؟ غـيث: (ضحكة كبيرة) آآآآه فديتها منـى وميثـاء: نــــــــــــــــــــعم!!!! غـيث: (عصب) ونعامة خير في شي؟؟؟ منى وميثاء: ..... منـى: عجبتك؟ شو سويتوا؟ رمستها؟ غـيث: عجبتني لاء الا حبيتها بعد .. شو سوينا مب شغلج .. رمستها طبعا ميثـاء: (فتحت عيونها) الله اثاريك مب هين غـيث:..... منى وميثـاء: (طالعوا بعض وغمزوا) منـى : وانا اقوول شو فيها البنت؟ غـيث: (نط) سـارة شو فيها؟ ميثـاء: هههههههههههههههههههههههه لا اخوج طاح ومحد سمى عليه غـيث: (عصب) انتي وياها يبالكن ادب قومن عن ويهي اشوف يلاااااااا بيت ابو راشد وداد : (تفتح عين وتغمض عين وتروح وترجع تقرب وتبعد عن سارة) سـارة: اووووووف وبعدين يعني دوختي راسي روحي شو تترين؟ وداد: لا والله لا حبيبتي يلا اشوف ابى تقرير سـارة: فاضية انا بنام (وتلحفت) وداد: (بكل قوتها شالت اللحاف ورمتها اخر الغرفة) سـارة: (عصبت .. اعصابها مب متحملة شي بعد ما شافت غيث مالها) وداااااااااااااد وداد: قولي يلا .. كيف شكله .. شو سويتوا؟ سـارة: (ااااااااه شكله ذبحني.. مالت عليه بس ما يستحي.. هذا تونا ملكنا وهو جذي كيف يوم بنتزوج.. يا ربي..بصيح) وقالت لها الي صار.. وداد: .......... والله هـالغيث مب هين طلع سوالف عجيب.. مالت علي خلخليه يعطي ناصر كورسات سـارة: طلعي برع كورسات اونه وداد: ههههههههه الله يا سوسو لا خلاص ثبتت الرؤية..انتي يا حبيبتي ان شاء الله بتحملين اممم ثاني او ثالث شهر من تتزوجين سـارة: (احترقت) طلـــــــــــــعــــــــــي بيت ابو سيـف غـيث: شو قلت يبه؟ بترمسهم؟ ابو سيـف: غيث ليش مستعيل تو الناس.. غـيث: لا ليش ما ورانا شي..بيتنا ما يباله الا اثاث..شهرين يسدن ابو سيـف: خلاص برمسهم ... انت شاورتها.؟ غـيث: لاء ابو سيـف: (هز راسه .. واطمن اكثر .. غيث يبى البنت ..الحمدلله) خلاص برمسهم وارد عليك بيت ابو راشد سـارة: (سلمت على ابوها وباست راسه) شحالك يبه؟ ابو راشد: بخير يبه ...سارة سـارة: نعم بابا؟ ابو راشد: (ابتسم) الله ينعم عليج... غيث يبى العرس بعد شهرين..شو رايج؟ سـارة: (بصوت مبحوح) شهرين؟ ابو راشد: هيه..قالي عمج بيتكم بس يباله اثاث..(بيت غيث عبارة عن غرفتين وصالة كبيرة ومطبخ وحمامين كبار وحمام للصالة موجود في بيت اهله) وانتي تقدرين تتجهزين بشهرين؟ سـارة: (بخجل) انزين ... ما تو الناس؟ ابو راشد: ما له داعي التاخير دام كل شي جاهز صح سارونة؟ سـارة: (ضحكت للدلع) صح بابا .. خلاص بتجهز من الحينه ابو راشد: الله يرضى ويوفقك يا ابنتي سـارة: (ابتمست لابوها..وهي داخلها نااار.. مستعيل هو ويهه..شهرين؟؟) . . . نهاية الجزء الثاني تعليقاتكم؟ ذكريات |
السلام عليكم..شلونج اختي ذكريات مبين على قصتج انها حلوه وتستاهل من يتابعها ننتظر الجزء الجاي..وداعيه
|
اقتباس:
وعليكم السلام والرحمة بخير حبيبتي وانتي شحالج؟ مشكورة واتمنى دوم تكونين من المتابعين نورتي والله ذكريات |
تسلم ايدج عالبارات
ولي عودة مع التعليق باذن الله |
اقتباس:
تسـلمين بنوتة وبانتظار رايكـ نورتي غناتي ذكريات |
البارت يجنــــــــــــــن
غيث:حركات هذا الي يقولون عنه خجول سارة: شخصيتها حلوة بس المفروض مو كل شي تسكت عنه وتقول اي وداد: هبالها عجيب وخاصة بالملكة طلعت هبالها على سارونة خوات غيث شكلهم حبوبين وان شاء الله يعاملون سارة زين تقبلي مروري |
اقتباس:
بنوتة تسلمي غناتي وان شالله ظنك بالشخصيات يا تغير يا يتحسن من خلال الاجزاء القادمة مشكورة وما انحرم ذكريات |
مشاء الله عليك ذكريات أسلوبك يدخل القلب على طول
سارونه يا بعد قلبي الله يعينها على جرأة غيث منتظرينك بكل شوق |
اقتباس:
يا هلا وغلا تسملين حبيبتي والله تراني احاول مشكورة واايد ولا عدمناج ذكريات |
شكرا لك أختي ذكريات على البارت الذي اتحفتنا به وطلع غيث صج مو هين هذا وهو مستحي جذي والله يعين لو كان مايستحي جان شسوى بسارة المسكينة والله اسعتيدنا أختي بهذا البارت ولي رجاء خاص أن تكثري من الآكشنات مابين سارة وغيث لأنها ستكون كالتوابل التي تطعم الرواية ولك خالص الشكر والتقدير يالغالية أختك عذبة التجريح |
اقتباس:
يا مرحبا وسهلا تامرين امر يا الغلا وابشري باللي تبيه مشكورة على التواصل وان شالله البارت الثالث بيكون بعد اسبوع يمكن لاني عندي امتحانات نهائية ذكريات |
انا شايفة الحياة فلةوفللي ياتري في مشاكل حتحصل؟ كالعادة
فيانتظار الباقي منك وماتنسيناش شكرا علي ابداعك الرائع |
أخذي راحتج يالغالية والدراسة دوم تيي بالمرتبة الأولى وربي يوفقج بجميع امتحاناتج وتكونين من المتفوقين اللهم آمين خالص المودة والتقدير أختك ومحبتك عذبة التجريح |
غيثو : عجبني << لحد يسمع
ساروة : الله يوفقها وداد :سكر القصة يسلمووو ع القصة الرووووعة ننتظر التكملة |
هههههههه عسل و الله يا غيث احب الراجل الجرئ ....سارة يا حليلها عن جد الحيا زينة المراءة...ممكن خلين لينا اكشنا بين وداد و ناصر شكلهم علاقتهم حلووة
و الله يعطيك العافية |
السلام عليكم بصراحة انصدمت يوم شفت القراء 2000 وشي.. والسبب اني ما بغيت اكمل القصة حسيت الموهبة ناقصتني >> ما ادري ليش يعني مثل ما شفتو رمست وايد عن غيث ووداد وسارة همشتها والمفروض تكون بالقائمة ممممم بس صدق استانست الاعضاء اللي دخلو القصة 195 والقراء 2000 وشي هذا يكفيني اني اكمل واللي فيها فيها :rfb04470: ان شالله يوم الخميس بكمل القصة بجزء ثالث وان شالله ينال اعجابكم يمكن القصة تكون متوسطة الطول لانها اول قصة لي اتمنى منكم النصيحة دوم وشكراً للجميع وزوار واعضاء وخصوصاً اللي تابعو معاي ذكريات |
الجــزء الثــالث فصل اول بيت ابو راشد + غرفة سارة ( سارة تكلم اختها وداد ) سارة: (واصلة حدها) يعني هو ليش مستعيل؟ بطير يعني انا شهرين!! وين يبى وداد:(تاكل شيبس ولا هامنها) قلتلج ماما هذا الريال ربي يساعدج عليه سارة:انتي انا معصبة وانتي تاكلي شيبس احر ما عندي ابرد ما عندج شو ما سمعتي انا شو قلت انا شو ابى فيه هو شكله اساسا فاصخ الحياة في بيتهم وياي انا شو سوي الحين وداد:(عاد سارو) اقولج انتي يوم انج ما تبين ليش ما قلتي حق ابويه؟ اونه صح بابا سارة: انزين هو قالي ماله داعي التاخير .. يعني اكسر كلمة ابويه؟ وداد: امممممممم انزين خلاص رمسي الغيث وطلبي منه ياجل العرس هو بيفهم عليج اكثر انتي حرمته سارة: نـــــــــــــعــــــــــم ارمسه لا واطلب منه بعد ليش حبيبتي يخسي وداد: حووووه تراه ريلج لا تستهبلين سارة: وداد انا بعدني ما استوعبت اني مالكة تبيني استوعب اني بعد شهرين بتزوج؟ وداد:(حست انه سارة متضايجة) سارونه حبيبتي انتي كبرتي وهذا شي بصير شهر او سنة بتتزوجين وبتسيرين بيت ريلج وبيكون لج حياة خاصة..لا تفكرين وايد سارة:(فيها صيحة) انزين انا ما ابى بعد شهرين ابى اتعود شوي هو جريء بكفيه وداد انا غير حسي فيني وداد:(تنهدت) خلاص حاولي تقولين حق وحدة من خواته بطريقة غير مباشرة شوفي شو بتقولج سارة:يعني جي تشوفين .. اخاف يفهموني غلط وداد: لالا ما فيها شي خواته زينات ما ظنتي سارة:خلاص برمس منى احسها مربوشة شراتج وداد: لا حبيبتي محد شراتي سيري سيري اونه منى يلا بسير عند ريلي سارة:هيه يا ناصر ربي يكون في عونك وداد:ساروه جلبي ويهج اشوف ضيعت وقت وايد معاج سارة:انزين ذليتني ما يسوى علي وداد:هاها يلا رقدي لا تفكرين بشي سلبي اوك؟ سارة: ان شالله يلا مع السلامة وداد: مع السلامة *وداد* الحين سارة مب مقتنعة انها خلاص عروس وبتتزوج؟؟ من الحين بتبني حاجز بينها وبين غيث..يا ربي معقولة لانها بعدها صغيرة؟ 17 سنة مب صغيرة وايد..خجولة هي خجولة خجلها هذا ذابحنها ولا هذاك ياي روميو مالت عليه صدق مب شايف بنات..بنشوف سارونه لوين بتوصل..ربي يهدي سرها اليوم الثاني بيت ابو سيف الصالة يالسين ام سيف وغيث ..يت بعدها منى ويلست وياهم منى:(تتطالع غيث كل دقيقة) منى:غيث حددتو العرس؟ غيث: هيه منى:(يا ربي اونه هيه قوات عين) انزين ليش ما خبرتونا متى انزين؟ غيث:(يطالع بنظرة نارية) ليش منو العروس انتي..عقب شهرين منى:شهرين حرام عليك تو الناس اتعودوا على بعض اول غيث:(استغرب مب من عادتها) ليش نتعود على بعض ونحنا قريب بنتزوج؟ ام سيف: منايه عندج رمسة قوليها لا تمي تلفين ودورين منى:(كملت الوالده بعد) امممم انزين بقول بس لا تعصب غيث:(رفع حاجب) قولي منى:(تتطالع امها وعقب غيث) اممم سارة رمستني اليوم العصر وسولفنا ويابت طاري العرس طبعا انا ما كنت ادري وانصدمت يوم عرفت اني ما ادري انكم بتعرسون عقب شهرين..(تتطالع غيث) فـ حسيت عندها رمسة قلتلها قولي شفيج؟؟ قالت ما ادري ما تحسين انه العرس قريب وايد؟ انا ما رمست فـ قالت بس خلاص انا بجهز عمري بيكفيني الوقت..(سكتت وهي تشوف غيث ملامحه تغيرت) ام سيف:(مالت عليج منوه صدق ما عندج اسلوب) يعني هي ما تبى العرس عقب شهرين؟ غيث:(وجنها امه شعلت الكبريت) شوووه مب على كيفها هو لعب يهال رمسة ريايل هاي شو يعني ما يكفيها السوق كل شي فيه شو تبى بعد تسير باريس تتشرى من هناك.. منى وام سيف (صخو عرفوه عصب ويوم يعصب خوزو عنه) ام سيف: يا ولدي صل على النبي مب قصدها جي البنت شفيك غيث:(مغتاظ مب عارف ليش يعني شو ما تباني يالسة تاجل..؟) انا بسير ارقد ام سيف:(تتطالع منى) وانتي جي على طول عقيتي الرمسة انزين قولي لي انا بقوله باسلوب احسن منى:(متضايجة) ماما شو اسلوب احسن البنت انحرجت شهرين ما يسدن مب اغراض نفسيتها يعني البنت غير الريال ام سيف:(تنهدت) والله ما ادري باخوج منى: انزين اقول حق سارة شي؟ ام سيف:لا خلج بعيد هم روحاهم بتفاهمون غرفة غيث *غيث* يعني ليش ما تبى العرس عقب شهرين؟؟ لا يكون حد غاصبنها علي يا سلام هذا اللي قاصر بعد بس ما ظنتي عمي ما يوحي يغصب حد على شي ما يباه..شو اسوي بشوفها وبرمسها احسن حل. تابع الفصل الثاني يوم الخميس هدية صغنونة :flowers2: |
السلام عليكم ورحمة الله وبركاته
يا هلا ومسهلا يا ذكريات وحياك الله في ليلاس وان شاء الله تلقين التشجيع والمتابعة من جميع الاعضاء موفقة بأذن الله عز وجل (فروووحه) |
اول شي اهنيج على الاسلوب بس عندي ملاحظة :انتي تطولين بين جزء وثاني صح اتمنى متطولين لانه البنات صدقيني بتشوفينهم كل معطيتهم انتي اجزء هم راح يكونون معاج في الردود ولا احلى >>اتمنى مازعجتج غيث:صحيح يبغي له سنع ماقلت البنت شي بس طلبها اصغير بس هو اعوذ بالله منه اتمنى الجزء الى بعده تكون الموجهة بين غيث وساره مدري ليه احس كذا راح يكون احسن وحمس اكثر وتسلمين مذهلة |
بارت جنـــــــــــــــــــــــــــــان
صج انه قصير بس بعد كل هالغياب حتى لو كلمة تكفينا وداامج بتنزلين يوم الخميس بارت بعد وااااااااااااااااااااااي حدي مستنانسة تسلم ايدج غيث مسكين الحين الافكار بتوديه وتييبه وبيظن السوء بسارة الله يعينها هذا واهي قالت بتأجل وسوا فيها جذي شلون لو درا انها ما تبيه منى يعني لو معدلة اسلوبج شوي مو احسن؟ الحين شنو استفدتي من الدفاشة غير انج خربتي على اخوج وسارة؟ تبين نصيحتي روحي لاخوج وقوليله ليش سارة تبي تأجل و مو انها ما تبيه بس عشان ما يمديها تجهز وجذي سارة خخخخخخ شكلها واايد حاقدة على غيث الله يعينها تقبلي مروري |
اقتباس:
هلا وغلا عزيزتي الله يعلم ما ادري عنهم :pQ204444: يمكن ..؟ اتمنى دوم التواصل ومشكورة :cgE05050: |
اقتباس:
مرحب ملايين تسلمين حبيبتي وان شالله التوفيق للجميع مشكورة .. كلج ذوق واتمنى تكونين وياي :flowers2: |
اقتباس:
:YkE04454: عن تسمعج سارة ترمسين عن غيث ههههههههههه مشكورة غناتي عساه دوم :flowers2: |
اقتباس:
هي نعم جريء :friends: سارة خجلها هو اللي محليها لكن بنشوف لوين بنوصل وياها :YkE04454: وداد فديت روحها :3EO05175: وان شالله بحاول ادمج ناصر ووداد مشكورة يا الغلا :flowers2: |
اقتباس:
وعليكم السلام والرحمة تسلمين فروحة استانست للترحيب الحلو مشكورة :flowers2: |
اقتباس:
هلا واللهـ مشكورة غناتي احس هذا احلى تشجيع وملاحطتج صحيحة نوعا ما بس السبب مب لاني اطول لاني كنت مقررة اني ما اكمل القصة بس انا يوم التزم بشي احاول اتقنه والحين والحمدلله بالتزم بالقصة والاجزاء بتكون منتظمة واتمنى صدق اشوف تشجيع من الاعضاء ومتابعة ونصائح اممممم بالنسبة لـ غيث هو ما فهم وجهة النظر فـ لذلك ما نبى نحكم عليه :lWR04888: واحساسج صحيح هو مواجهة بين غيث وسارة واتمنى تعجبج بعد :rfb04470: مشكورة واتمنى دوم المتابعة الحلوة :flowers2: |
اقتباس:
هلا والله بنووووتة تسلمين حبيبتي وتسلمين على الرسالة بعد بس تدرين ما اقدر ارد لين توصل مشاركاتي 100 فرحت لوجودج ويكفي اني ع البال وغيث وسارة بنشوف شو بيستوي فيهم ومنى ما عليه سامحوها دفشة شوي البنت :lol: بعد شوي بنزل البارت وان شالله يكون مثل التوقعات او احسن مشكووورة واايد ولا عدم |
تابع الجزء الثالث الفصل الثاني حديقة ابو راشد *سارة* سرحانه بعالمها ابشع شعور انه تكون متردد بشي...الا الزواج عقد مدى الحياة اذا تردد فيه اكبر مشكلة؟ سارة كانت جي مترددة وبين مد وجزر بين السرعة بالاربتاط وتكوين عائلة..وبين الجراة وعدم التعود انه حد يفرض عليها شي غير الاهل..؟ يمكن هو فرض او طلب لكن النتيجة وحدة ما تقدر تخالف ابوها او تكدر خاطره..حيرة وشتات وخجل صح غيث ريلها لكن حياها يمنعها من وايد اشياء اهمها انها تتقرب له..وتحاول تفهمه اطباعها..لكن السؤال هل بيقدر يتمشاى وياها؟! دخل ابو راشد البيت حزة العصر وشاف سارة قاعدة في الحديقة وشكلها سرحان اتقدم لها وسلم عليها ويلس عندها ابو راشد:(حاس بشي ما يعرف شو هو) شحالج بباتي سارة:بخير باباتي ابو راشد:(طالعها وصد جدام وتنهد)بابا سارة شو فيج سارة:(دق قلبها)ما فيني شي ابويه ابو راشد:(طالعها وابتسم ومسح على راسها) امبلا انتي زعلانة او تفكرين بشي بالج مشغول قولي بابا لازم تاخذين وتعطين مع حد اذا ما تبين ترمسين وياي رمسي وداد لكن لا تحبسين شي داخلج انزين حبيبتي..؟ سارة:(دمعت ما تعرف ليش حنية ابوها تقتلها) فديتك بابا والله ما فيني شي مب زعلانة ويمكن صح بالي مشغول عسب العرس وجي (نزلت راسها) بس صدقيني ما في شي جايد ابو راشد:بصدقج لكن اذا بغيتي تتكلمين انا موجود سارة:(قامت تبوس راس ابوها) الله يحرمني منك ادري فديتك ابو راشد:(وقلبه يزيد محبة لهالبنت)الله يرضى عليج ويستر عليج ابو راشد:وينها عيل وداد ما شفتها ما حدرت البيت يومين..؟ سارة:ههههههه ما ادري شفيها اونه تعيد ديكور البيت ابو راشد:هي تحب تشغل عمرها وناصر اكيد مبتلش وياها سارة:هههههههه هي مسكين اونه يترجاها تعتقه يبى يظهر من البيت شوي ما تبى الا ييلس وياها ويساعدها ابو راشد:(ابتسم) خلها تيوده لازم يساعد ...خواتج ما يو..؟ سارة: امبلا يو الصبح فطرو عندنا وسارو ابو راشد:على خير قومي نيلس داخل ويا امج الحين بتقول ليش ما تيلس وياي ..........الخ سارة:ههههه فديتها ماماتي البحــر *غيث* قرر خلاص يسير لهم ويرمسها يبى يتاكد هل هي مغصوبة او بس تبى تاجل لسبب ثاني..؟ اكيد عيونها بتكشف خبايا نفسها هي شفافة ما تقدر تخبي مشاعرها وان شالله ما تكون مغصوبة علي لاني ما بتحمل اصعب شي على الريال يحس نصه الثاني مغصوب عليه...يا رب بنفجر من التفكير لا ليلي ليل ولا نهاري نهار...ااااااااه مالت على القلب يوم بغى يعشق عشق بكل ما فيه.. غيث:(يتصل على عمه بو راشد) الو السلام عليكم عمي ابو راشد:وعليكم السلام والرحمة حي الله ولدي غيث:(يا حلات ولدي على لسانه) الله يحييك ويبقييك شحالك عمي عساك بخير ابو راشد:بخير ونعمة ومن صوبكم غيث:الحمدلله ما نشكي باس ابو راشد:خير ابويه بغيت شي غيث:(ما شالله يعرفني ابغى شي)هي عمي اذا ما فيها كلافة بغيت ازوركم ابو راشد:حياك الله ما يبغالك تدق تلفون وتقول متى ما بغيت احدر البيت مفتوح وانت مب غريب غيث:(ااااااااه بس)تسلم عمي بس قلت يمكن مشغولين او مب في البيت ابو راشد:انا موجود او حد من العيال ما عليك اقرب غيث:قريب قريب خلاص عيل عقب العشا بمركم ابو راشد:حياك ولدي بيت وداد وداد:(تشوف ناصر بنص) شفيك؟ ناصر:(خاطره يسطرها سطار)ما شي وداد:لا قول قول ليش تطالعني جي ناصر:سلامتج وداد:لا والله...شكلج تبى تذبحني اونه سلامتج ناصر:وداد صخي خليتني اكرف كراف هديتي حيلي وما ابى اسمع رمسة زايدة وداد:(نشت وحطت ايدها على خصرها)نعم نعم تباني اصخ ليش حبيبي وبعدين ليش لهدرجة مكدر عمرك شو فيها لو ساعدني في البيت تراه بيتك مثل ما هو بيتي ولا تشوف غير جي؟؟ وبعدين شو بيستوي لو ما ظهرت من البيت ويا ربعك انا حرمتك ناصر:(ااااااااه بموووت) انزين انزين ما قلنا شي بيتي وانتي حرمتي على عيني وراسي بس لمتى الحبس؟ وداد:(بنص عين) حبس ها ما عليه (وتشل مخدة صغيرة وتضربها فيه ويت على راسه) ناصر:(استوت عيونه شرات البقرة الهولندية مب مصدق) انتــــــــــــــــــي ياهل انا ريال طول بعرض ولحى وابو عيـــال تعقي علي مخدة!!!! وداد:(صخت اوييييه عصب مالت علي) تراها رمسة قلتها اتحمل عاد ناصر:اتحمل ما عليه (وجان يقرصها بخدها وصار شي وخلاص) ^_^ مجلس بيت بو راشد بو راشد :حي الله غيث غيث: مشكور عمي *بعد مرور نص ساعة كان خلالها سؤال عن الحال والاحوال ورمسة عادية* غيث:(يا رب اخاف اقوله يرد علي بطراق) عمي بغيت اشوف سارة اذا ما فيها كلافة..؟ بو راشد:ابداً لحظة بس بقولها خذ راحتك غيث:مشكور غيث:(يا رب يسرها) صالة بو راشد بو راشد:سارة بابا نشي ريلج يبى يسلم عليج سارة:(بققت عيونها يشوفني مااالت وين اودي ويهي) الحين؟ بو راشد:(وهو ييلس عدال حرمته) هي الحين سيري تزهبي سارة:(تشوف ابوها ييلس) بتم يالس هنيه ابويه؟ ام راشد:(يا سلام بتصييح البنت) بو راشد:(تعمد ييلس لازم تتعود عليه سارة كافي ما تبى ترمسه تلفون)هي سيري لا تتحيري عليه سارة:(بنظرة رجاء لامها) ام راشد:(هزت كتوفها بمعنى مالي شغل) *سارة* في غرفتها تشل ثياب وتحط ثياب والله انه يقهر شو يبى يعني وبابا ليش يخلينا برواحنا؟؟ لا وماما اونه هزت كتفها مالت علي نحسة شو البس يا ربي جلابية؟؟ وين ابى بعد انا افففففففف بصيح ..اكيد منى قالتله عن العرس امييييييييييه بنازعني ليش بالله ع كيفيه هو..استغفر الله خلني البس واسير وامري لله *اختارت طقم تنورة وبلوزة اورنج على بني ناعم وايد وسحت شعرها وحطت طوق في فصوص وحطت بودرة وبلشر بس* غيث:(دق الباب حسيت الدق بقلبي...هذي هي اكيد) سارة:(مديت راسي هذا وين يالس ما اشوفه) غيث:(فديته راسها الصغيرون،،وقف) سارة:(الله كاشخ مالت جان لبست مخور ابرك)السلام عليكم غيث:(تقرب منها ومد ايده)وعليكم السلام سارة:(رفعت راسها بمعنى ليش تمد يدك) غيث:(بتموتني هاي) شو ما بتسلمي علي؟؟ سارة:(اميييه...مدت يدها وهي تتحترق) غيث:(ابتسم ...وهو ياشر انها تيلس في مكان قريب منه) شحالج؟ سارة:(تقول البيت بيته)الحمدلله بخير...وانت شحالك؟ غيث:الحمدلله بخير ونعمة غيث:(امبلم وين الرمسة اللي بقولها مالت علي لفت نظره الدبلة تم يطالعها) عيبتج الدبلة؟ سارة:(الدبلة؟؟)هي حلوة غيث:(خلني ارمس احسن قبل لا يي عمي) انزين سارة ليش ما تبغين العرس عقب شهرين؟ سارة:(وهو صح كان يرمس بهدوء بس ما ادري ليش ويهي احترق ..تميت اطالعه)...... غيث:(شفيها حمرت)سارة؟ سارة:(شو اقول ااااااه يا ليت كان عندي لسانج يا وداد في هالحزة) غيث:(مسك ايدها) قولي تراني بسمعج سارة:(اكملت هذا يباله طراااق ..سحبت ايدها من ايده) غيث:(اتضايج هاي وبعدين وياها) شو خبريني ليش ما تبيين العرس عقب شهرين سارة:امممم .... احس وايد قريب غيث:(عقد حواجبه)من اي ناحية؟ سارة:(نبضها يزيد ويزيد) من ناحية اني بعدني ابى مدة اكثر.... غيث:مدرة اكثر حق شو؟ سارة:(انزين اصبر)ابى اتعود ....علينا غيث:(رفع حاجبه)وكيف تبيين تتعودين؟ (تنهد) سمعيني تبيين تتعودين بطريقتج النتيجة فاشلة انتي من يوم ملكنا ما تبيين ترمسيني تلفون وما قلت شي وزيارة لبيتكم انا ما احب هالسوالف اما انج تبيين توصلين رمسة عن طريق وحدة من خواتي في شي خاص فيني وفيج هذا شي ما يعجبني والحين تقولين لي تبيين تتعودين علينا ما بتتعودين لانج يبالج سنة...اذا بتتنازلين عن شي انا مستعد اتنازل شو قلتي؟؟ سارة:(خلاص بعد الرمسة اللي سمعتها حست عمرها صغيرة)..... غيث:(رفع راسها) شو قلتي؟ سارة:(ما درت انه نظراتها كانت توحي انها كارهتنه بس هي كانت كاره الموقف اللي انحطت فيه) غيث:ليش جي تطالعيني؟ سارة:(صدت عنه) خلاص بشو تباني اتنازل؟ غيث:(وقفها ومسكها من كتفوها) بسالج سؤال؟ سارة:(تتطالعه وهي خايفة) غيث:انتي ما تبيني؟ سارة:(جفت عروق الدم فيها) شوووه؟ غيث:(رفع صوته شوي)رد علي اذا ما تبييني قولي؟ سارة:مب جي انت فاهم غلط غيث:عيل فهمني رمسي يا بنت الحلال سارة:(تحاول تخوز ايده عنها لانها ما مستحملها) لو سمحت خوز ايدك غيث:(بلم لو مسحت وخوز ايدك هاي شو تتحراني) انا منو؟ سارة:(ما فهمت) غيث(رص على كتوفها) انا منوووه؟ سارة:غيث غيث:منو بالنسبة لج؟ سارة:(نزلت راسها)ريلي غيث:رفعي راسج وقوليها سارة:(دمعت)ريلي غيث:يعني حلال امسك كتوفج وكلمة لو سمحت ما تنقال لي ؟ سارة:انزين خلاص خلني بروح غيث:ما خلصت رمسة بعدني غيث:يلسي..متى تبين العرس؟ سارة:ما اعرف غيث:كيف تبيين تتعودين علي؟ بترمسني تلفون؟ سارة:(بسرعة) لاء غيث:(عصب) عيل كيف انا للحين ما اعرف عنج شي غير اشياء بسيطة يمكن يرانكم (جيرانكم) يعرفوها عنج سارة:شو تباني اسوي ما اقدر ارمسك غيث:خلاص العرس عقب شهرين وبعدها تعودي علي مثل ما تبين سارة:(تتطالعه بنظرة مكسورة) غيث:(تنهد)سمعيني انا ما ابى اغصبج على شي بس انتي وافقتي والحين تقولين تبيين تتعودين علي؟كيف وانتي ما تبيين حتى ترمسيني وانا ما رفضت التاجيل لكنج جي تبين اتمنى تفهمين هالشي سارة:.......... غيث:واذا في شي بخاطرج تبيين تقولينه حقي رمسيني او طرشي مسج ما ابى حد يدخل بينا اوك؟ سارة: ان شالله غيث:(ابتسم فديته المطيع)انزين...متى عيد ميلادج؟ سارة:(استغربت) 25/1 غيث:زين بلحق عليه سارة:(ولاول مرة تبتسم) وانت؟ غيث:(جان من زمان سالت عن عيد ميلادها) 16/12 سارة:بلحق عليه انا بعد غيث:(ضحك من قلب)هههههههههههههههههه هي بتلحقين عليه غيث:لا تزعلين مني ولا تاخذين على خاطرج تراج غالية سارة:(احترقت)مب زعلانة سارة:(بشجاعة بسيطة) بس ابى اقولك شي.. غيث:(ها الله يستر)قولي سارة:انا....هممممم....وايد خجولة فـ يمكن عسب جي تشوفني ... غيث:(ارتاح)لا ابد ما اباج تتغيرين وخجلج عايبني غيث:يلا انا بروح احس عمي بيي يطردني سارة:ههههه لا ما يسويها غيث:خلاص دامج قلتي انا في حمايتج سارة:(ابتسمت) غيث:يلا تحملي بعمرج ولا تنسين (باس راسها) انزين غلاي سارة:(يا ربي احس ويهي بنفجر)ان شالله غيث:يلا سيري نادي عمي بسلم عليه وبسير سارة:اوك..مع السلامة غيث:(بارتياح) ربي يحفظج احم احم :AaZ04485: التوقعات >>> للبارت اللي بعده :t9L04569: تعلقيكم لهالفصل :qUA04678: واتمنى يكون نال الاعجاب :ZlY04550: ومشكورين :flowers2: |
سلام الجزء حلو الاحداث هم كانت حلوه وخلتنا نفهم الابطال اكثر وداد هذي رهيبه والله اني مت ضحك عليه خخخخخخخخخ ماقول غير الله يعين زوجه عليها غيث وساره ما شاء الله عليهم اسلوب غيث كان مره حلو وصح كذا احسن كل واحد يوجه الثاني ومن غير احد ميكون في الوسط بينهم وبنشوف كيف بتكون فترة زوجهم انا اعتقد بعد زوجهم بتبداء المعنات لانه كل واحد بيكتشف الثاني سلام مذهلة |
يوهـ ؟؟؟؟؟
خلاص كده؟؟ هذا بيبي بارت !!!!! ما يصير كده ................. متحمسه على الجزء ويطلع جنين جزء !!!!!!! حرااااااااااااااااااام ..................... بس حــــــــــــــــــــــــلـــــــــــــــــووووووووووووووووو وووووو أخيراً الآنسة ساره حتفك خجلها ويرتاح غيث شوية من التشنج اللي يجيها ............................ يســــــــــــــــلمووووووووووووووووو |
لا لا لا
ما اصدق عيوني بارتين باسبوع واحد الله ونااااااااااااااااااااااسة تيلم ايدج عالبارت الي شكثر فرحني خصوصا ان علاقة غيث وسارة تحسنت سارة واخيرا تخلت عن شوي من خجلها و كلمت غيث لا لا لا في تطور غيث مسكين احسه وده يعطي سارة طراق لما قالتلته لو سمحت وخر ايدك خخخخخخخخخخخخ الله يصبره على خجلها والحمد لله انه عرف انها مو مغصوبة وداد مسكين ريلها الله يعينه خخخخخخخخخخ صج ياهل وداد تهبل تقبلي مروري |
متوقفة منذ 2008
ننتظر الكاتب للتوضيح |
السلام عليكم بقية المحافظة على القصص ،،تم وضع قانون جديد للروايات الغير مكتملة بقسم من وحي قلم الاعضاء يرجى زيارة هذا الرابط http://www.liilas.com/vb3/t134089.html ولفتح القصة لتكملتها يرجى ،،وضع طلب بهذا القسم الخاص http://www.liilas.com/vb3/f30/ تغلق الرواية من تاريخ وضع الرد نرجو التعاون ،،موفقة |
| الساعة الآن 05:25 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية