|
قصة مرة حلوة (إذا قال لشيء كن فيكون)
أنا عندي قصة في الثقة بالله وحاب أذكرها
هادي وحدة من قريباتي جميلة جداً بس عندها عيب صغير في الوجه وحبت الله يهديها تسوي عملية تجميل عشان تعدل هذا العيب الصغير وراحت لدكتور وسألها قلها تبغينا نسوي العملية جراحة عادية ولا بالليزر قالت بالليزر المهم بعد ما خلصت طالعت في وجهها لقت محل العيب الصغير إلي كان مو باين سواد كإنه الجلد محروق بدأت تبكي وقالت للدكتور اش هذا قالها لا تخافي الجلسة الجاية يروح وأعطاها كريم المهم المسكينة جلست لمدة أسبوع تحط في الكريم وما في تغير وفي موعد الجلسة الجاية راحت وما أتغير شي الدكتور الحيوان قلها أنا العلاج عندي في البيت لو بدك العلاج ممكن تجي معايا المهم البنت مسكينة عرفت إنه نيته بطالة خرجت من عنده وفي اليوم التاني راحت لدكتورة تانية وقالتلها القصة الدكتورة قالتها الصراحة يا بنتي هادي مالها علاج الدكتور إلي سوالك العملية الظاهر إنه غلط المهم البنت خرجت من الدكتورة وهي تبكي منهارة وركبت السيارة مع أبوها هذا الكلام الساعة 9صبح المهم قالت لأبوها وديني الحرم دحين وداها أبوها للحرم وقالتله خلاص إنت روح وأنا لمن أخلص أكلمك المهم دخلت الحرم وأتعلقت بأستار الكعبة وجلست تبكي وتدعي وتقول:يا رب أِشفيني يا رب يا رب إنت عارف إنه الدكتور قليل حيا وأنا ما عندي هذا الكلام يا رب يا رب أشفيني يا رب يا رب الدكتورة تقول ما يتعالج وإنت يا رب إلي تقدر تشيله يا رب يا رب إنت إللي تقول كن فيكون المهم جلست تدعي وتدعي لين ما حست إنه قلبها برد وهدأت شوية وفجأة لقت حرمة تقلها ليش ما تدخلي تدعي في حجر إسماعيل قالتلها زحمة المهم الحرمة سحبتها من يدها ودخلتها الحجر والله البنت تحلف تقول بس درت بدي أِشكرها والله ما لقيتها كإنها أختفت المهم تقول جلست تدعي في الحجر وتبكي وشوية ووحدة حرمة مصرية جالسة جنبها قالتها يا بنتي ليش قاعدة تبكي إش فيك قالتلها القصة المهم هادي المصرية قالتها أنا دكتورة علاج بالأعشاب وقالتها قومي جيبي كاسة زمزم وأقرئي عليها آية (الله نور السماوات والأرض مثل نوره كمشكاة ....) وبعد كذا أمسحي وجهك وأشربي الباقي قامت البنت وسوت إلي قالت عليه المصرية وجلست في الحرم تقرأ قرآن لين صلاة العصر صلت وكلمت أبوها البنت تقول: والله خرجت مبسوطة ورايقة ومرتاحة حتى الوالد لمن شافني أستغرب من الصباح كنت منهارة ودحين مرة مبسوطة المهم قالت لأبوها أشتريلي أكل عشان ما أكلت من الصباح المهم لمن رجعت البيت وهي بتفسخ العباية والله البنت تحلف تقول: طالعت في المراية والله ما في شي والله إنه وجهي زي القمر وما في سواد ولا شي حتى أهلي كلهم أستغربوا وسألوني إِش صار الدكتورة قالت ما يروح قالتلهم:الدكتورة قالت ما يروح بس الله لو قال لشي كن يكون. إش رايكم في القصة حلوة صح |
سبحان الله.....
قصة حلوة.....يسلمو ايديك (شخابيط قم) |
الله يسلمك ايمان
|
سبحان الخالق تسلم شخابيط قلم
|
الله يسلمك
مشكور على المرور |
ياااااااااااااي حلوة كثيييييييييييييييييير سبحااان الله
|
مشكورة المجنونة على المرور
لا تحرمينا من طلتك |
تسلم ايدك وصح لسانك .........
*تصدق دايم مواضيعك رائعه وتعجبني* عسانا ماننحرم من طلتك......... :rdd12tf: |
الله يسلمك يا رب
هذا من ذوقك وهادي شهادة أعتز فيها وربنا ما يحرمنا من ردودك الحلوة |
سبحاان الله
وفقت في الاختياار شخابيط قلم .. القصة رووووعه بكل ما تعنيه الكلمة .. يعطيك العاافية |
واوو
سبحان الله .. الله قادر ع كل شي ... وربي عوضها .. الحمد الله شكرا .. شخابيط قلم . قصه حلوة .. بيتم نقلها للقسم الاسلامي .. لا تحرمنا .. |
مشكور شخابيط قلم وجزاك اللة خير صراحة الموضوع مرة حلو
|
سبحان الله
يعطيك العافيه شخابيط قلم دمتى بحفظ الرحمن |
اقتباس:
عيونك الأروع الله يعافيكي شكراً على مرورك |
اقتباس:
العفو وانو ما سوينا شي عيونك الحلوة والله مشكورة الله يعينك تعبناكي معانا أصلاً من اول مني عارف فين احطها ولا تحرمينا من مرورك الكريم على مواضيعي |
اقتباس:
العفو ما سوينا شي هذا واجبنا نتشارك المواضيع الحلوة مع بعض وجزاكي الله الف خير والموضوع ما يحلى إلا بالناس الحلوة |
اقتباس:
الله يعافيكي ويسلمك ما ننحرم منك يا رب أحلى لو كانت دمت بحفظ الرحمن أخوكي: شخابيط قلم |
| الساعة الآن 01:58 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية