اشهر الجمل التى يرددها كل الاباء والامهات
بالطبع لاأقصد اى اساءه للأباء والأمهات ولكنها على سبيل المزح.
1- مالكش دعوة بالسياسة .. وماتمشيش فى مظاهرات : وقد نجحت الأمهات فى هذه الجزئية نجاحا ساحقا ... وده بيظهر عندما ترى أكبر مظاهرة فى البلد لا تتجاوز 500 شخص أو أقل . 2- مش عاوزه أسمع صوت : هذه الجملة تدريب هام جدا للتعود منذ الصغر على تقبل القمع والديكتاتورية اللذين ستواجههما طوال حياتك . 3- ماتردش عليا : دى نصيحة لو التزمت بيها ستكسب مديرك فى العمل . 4- تقعد فى أول صف قدام السبورة : جملة تعودك على أن تكون فى المقدمة دوما . 5- لو مش فاهم حاجة .. ارفع إيدك وقول للأستاذ مش فاهم ...ماتتكسفش (فاكرين المدرسين زى اللى كانوا على أيامهم زمان ) 6- اللى بيشيل قربة مخرومة بتخر عليه لوحده . 7- ومالها الكتب بتاعت الوزارة . 8- بص كويس وإنت بتعدى الشارع . 9- ماتتأخرش بعد المدرسة وتقعد تصيع مع أصحابك : دى نصيحة ستحقق لك قدرا من السعادة الزوجية (باعتبار إنك من الشغل للبيت ) 10- افرد ظهرك . 11- مافيش مذاكرة على المزيكا ... أو .. بتذاكر إزاى والبتاع ده شغال جنبك . 12- ما تمشيش حافى فى السقعة دى . 13- صليت العصر ..؟! ( إشمعنى العصر ....!!!!!) 14- ربنا يهديك ... ربــنــا يــهــديــك ... أو ... إنك لا تهدى من أحببت . 15- إطفى التليفزيون وقوم ذاكر ... أو ... إطفى التليفزيون وقوم خش أوضتك . 16- إوعى تقول لحد هات لى حاجة . 17- إقفل صدرك . 18- بلاش وقفة فى الشبابيك والبلكونات . 19- كل على مهلك .. وأمضغ كويس .. وماتاكلش وإنت واقف وكل من قدمك متحفش . 20- المسلسل مش هاينفعك ... قوم . 21- كفاية رغى فى التليفون . 22- ماتقعدش قدام المروحة وإنت مستحمى . 23- وإنت فاكر إحنا مستنيين منك حاجة ؟! 24- ماتعليش صوتك . 25- بلاش لعب فى الشارع . 26- يا ابنى اللى ذاكر ذاكر خلاص .. قوم نام . 27- بلاش لعب بالمقص .. بيجيب الفقر . 28- يا ابنى كلم خالتك العيانة .. اسأل عليها . 29- إوعى حد غريب يديلك حاجة تاكلها او تشربها وتاخدها منه . 30- النوم لحد الضهر بيجيب الفقر . 31- إوعى تكدب عليا تانى مرة . 32- لازم تاكل سلطة . 33- لو شوفت خناقة مالكش دعوة بيها . 34- عيب .. لازم تحترم الأكبر منك . 35- كلمنا لما توصل . 36- بلاش أكل بره . 37- لو فلحت ابقى قابلنى . 38- يا ابنى أنت مسطول ولا إيه . 39- إنت فاكرنا نايمين على ودانا . 40- وطى المدعوق ده شوية . 41- قوم إقرالك كلمتين ينفعوك . 42- إيه اللامبالاة والاستهتار اللى إنت عايش فيهم دول . 43- إنت فاكرنا لاقيين الفلوس دى فى الشارع . 44- والله ما إنت فالح .. وآدى دقنى اهيه . 45- ما تتكلمش بصوت عالى فى الحمام . 46- ماتنامش غير لما تغسل سنانك . 47- ماتلزقش فى التليفزيون كده .... نظرك هايضيع . 48- ضرب أمثلة تشجع على الكفاح .. أشهرها : ( أحد الاقارب اللى كان بيذاكر على لمبة جاز أو على نور العامود فى الشارع ونجح وأخد الدكتوراة وسافر أمريكا ) 49- سلم على عمك كويس يا ولد . 50- يا ابنى محدش بينفع حد . 51- ماتطلعش إيدك من شباك العربية . 52- قصة الغريق اللى ك**** اللى كل مرة يقول إلحقونى .. لحد ما غرق . 53- التهديدات المخيفة شكلا .. والكارتونية موضوعا .. مثل : هاقطم رقبتك ... هاقطع لسانك ... هادبحك دبح. 54- ربنا يرزقك بعيل يوريك اللى وريتهولى . 55- ماتطلعش على الملاية النضيفة ورجليك مت******ة كده . 56- حول القناة دى ... بلاش مسخرة وقلة أدب . 57- نسيت تشرب ؟ نسيت تاكل ؟ نسيت تقول هاتوا مصروف ؟ نسيت تعكنن عليا وعلى أمك ؟ 58- طلع إيدك من جيبك وإنت بتكلمنى . وأخـــــيــــــرا ..... ياللا يا أبو كحكة إنت فاكر نفسك هاتقعد تاكل معانا |
56- حول القناة دى ... بلاش مسخرة وقلة أدب .
هههههههههههههههههههههههههه واللة دايم اسمعها ومشكورة اختي على الموضوع مرة حلو |
شكرا لمرورك
|
اه والله معظم الجمل صح ههههههههههه
شكرا على الموضوع الرائع |
انا لو عندى بنت دمها خفيف زيك كده مش هقولها انتى قصيره
|
الساعة الآن 03:46 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية