|
أحبك كلمة لو قلتها ما بلت عروقي ولا قدرت توصلك حنين الحب وأشواقي....
الصراحة هذي مب أول مرة نكتب قصة، بس هي أول مرة نشارك في منتدى.............
بتسئلوني ليش جمعت؟؟؟؟؟؟؟؟ بقولكم لأن نحن ثنتين - أنا وطير الغروب - قعدنا نكتب قصة يمكن ما تكون يديدة عليكم بس نحن متأكدات انها بتأثر فيكم... يمكن بعضكم يقول شو ها السخافة ويمكن بعضكم يقعد في حجرته ثلاث ساعات يصيح ، لكن كل همنا ان احنا نوصلكم درس واحد بنقولكم اياه في نهاية القصة ....... ونتمنى انكم تتابعونا....... part 1 ايطاليا في 17/1/2006 " جننا ظعنا " " شي طبيعي يا غبي .. يوم انك انت ماسك الخريطة ، وترى انت ماسكنها بالمقلوب!! " " ليش ما تقول من ساعة؟! " " ليش انت تسمع؟! وبعدين شحجا تفلسف ؟ تسوي روحك فالح في الايطالية ؟ انت ما تعرف تقول فوود بالانكليزي وياي هني تبى تقرى خريييطة بالايطالي ؟! " " ها اللي يهمك.. بطنك وبس.. الحين قول لي : شو نسوي؟ " " واللي.. احنا شيابنا في هالبلاد ؟! انا قالوا لي سير مصر ادرس هناك .. قلت لا .. ايطاليا احسن ، مسوي روحي فالح.. شان فلحت انا الحين .. لا دراسة نفس الناس .. لا بيت نفس الناس .. حتى الدرب ضيعناه .. زين ما ضيعنا أعمارنا وياه " " هيه تعال بخبرك .. مب وقتك انت الحين تحرطم .. شوف جدامك .. في ليتات " " ليتات ؟! تعال نقرب ونشوف شو بيطلعلنا " وقربوا صوب الليتات .. شان يشوفون قصر عود مليان ليتات بشكل غريب وفيه حديقة عودة مليانة ورود بابونج بيظا مستوية شراة اللولو تحت كل هالليتات .. طبعا شراة العبط دشوا لا احم ولا دستور ودقوا الباب مليون مرة جنا وراهم حمير تركظ .. عقب انصدمو يوم فتحلهم ريال شيبته مغطية على كل شي فيه ورد علهم بأدب وقالهم : " هي .. مظيعين حد؟ " طبعا هو قالها بالايطالي عشان جي كل واحد قام يطالع فويه الثاني ويهزون راسهم شراة الخمة ما يدرون هو شو قال ولو دروا ما بيعرفون يردون عليه .. عقب هو هز راسه بعد شراتهم وبطل الباب وقال لهم بالانجليزي : " come in " هاي طبعا يفهمها كل جاهل.. ودشوا .. يوم دشوا.. حصلوا صورة عووودة حق بنية حلوة ... وقاموا يسألون الريال: " الصراحة نحن بغينا حد يساعدنا " " يا ثور.. ارمس وياه انجليزي .. فبلادك انت ؟؟ " " ها ؟! .. هي صح ، والله نسيت هالسالفة .. we need someone to help us " بطل الشيبة عيونه عدل وقال في خاطره : " شو هالثيران ؟! " بعدين رد علهم : " which kind of help do you need sir? " هم قاموا يفهمونه انهم يبون مكان يرقدون فيه الليلة .. وهو ما قصر طال عمره .. ودهم في حجرة عودة فيها سريرين .. وقبل ما يطلع عشان ينامون قال له راشد : " الصراحة نحن نبا نسألك سؤال بس مستحين منك " يعني رزة فيس منهم .. " لا عادي اسالوا .. لا تستحون " " صورة منو هاي المعلقة في الصالة ؟ " " أو .. انت تطري ليدي ميرة !! " " ليدي ؟! .. والله !! " " تعالوا وياي وانا بخبركم السالفة ".. To be continued…. |
أحبك كلمة لو قلتها ما بلت عروقي ولا قدرت توصلك حنين الحب وأشواقي 2....
نحن لما شفنا ان محد رد على البارت الأول من القصة ، قلنا ننزل البارت الثاني احسلنا ...
ولا تنسون تقرون البارت لين نهايته !! عشان جي نحن حنبدأ البارت الثاني بدون مقدمات .... Part 2 أبوظبي في 3/9/2000 ميرة .. بنية عيونها بنية غامجة .. وشعرها ؟ .. طبعا مصبغتنه .. هو اصلا كان في حد في 2000 مو مصبغ شعره ؟! وحاطتنه بني .. ليش ؟ قالت عشان يتطقم مع عيونها !!! سيف .. واحد مغازلجي درجة اولى .. طبعا قبل ما تكون الشرطة معبية المولات وقبل ما كان الناس كلهم ماشين على بطاقات التلفون والرصيد .. أما عن شكله .. فواااااااااااااااووو .. يعني مغازلجي لازم يكون حليوة – لزوم القصة - .. الحين ابدأ.......... اليوم خميس: يعني ما في جامعة .. يعني اجازة .. يعني طلعة .. يعني ربيعات .. يعني شما.. هذا كان جدول ميرة حق يوم الخميس.. " ألو .. بغيت ميرة اخوي " " ميرة ؟! .. مين ؟! " " اختك يا ثور .. نش هزاعوو " " جني اعرف ها الصوت !! " " طبعا بنت حمدان ترمس .. بعد منو ؟ .. غصبا عنك بتعرفها " طبعا قبل ما يقول أي شي قام يصارخ : " ميروووو " " ويع .. يعلك المرض على هالصوت .. شو بلاك تصارخ من صباح الله خير ؟ " " تعالي .. تلفون .. الشيخة شما تباج " " اوكي سكر تحت وانا برد فوق " *** " الو .. هلا شما .. صبحج الله بالخير " " أي صبح ؟ .. الساعة وحدة يالراقدة " " عن ابوه .. امس ارمسج لين خمسة الفير .. جيف تبيني انش من وقت وانت مو مخلية حد ما شبكتيه ويانا على الخط ؟! " " صدقج كلهم راقدين لين الحين .. كل ما ادق على وحدة يقولولي راقدة " " لازم يرقدون عشان يسهرون وياج في الليل " " اشقالولج .. بات وومن ؟! " " لا .. سوبر وومن .. ما ترقدين يا بنية ؟! " " جنج قاعدتلي من الصبح تسبين فيني ؟! " " خلاص .. اشعندج داقة ؟ " " بغيت اسولف وياج " طبعا قامت ميرة وسكرت الخط في ويها وقامت شما دقت مرة ثانية .. " ألو .. أنتي ؟! " " تعالي بخبرج .. اشعندج اليوم؟ " " ماشي .. سوالف وياج لين الغدا .. وبعدين سوالف وياج لين العشا .. يعني وياج طول اليوم " " خليج من السوالف وتعالي بنسير المول " " اوكي .. why not .. بس بعلم الوالدة وبرد عليج " واتفقوا يسيرون المول .. *** |
وفي المول .. ما خلت شما محل ما دشته وخذت منه شي .. حتى محلات الرياييل ما سلموا منها ..
وفي نفس الوقت كان سيف يغازل .. مسرع ما نسيتوا من هو ؟! .. الظاهر ان شما خربت دماغكم انتوا بعد !! .. سيف المغازلجي .. كل من يسير المول يعرفه .. إلا هبلتينّا .. ما علينا .. دش الاخ محل جاشنمال .. شو يسوي هناك ؟ .. طبعا مواعد .. اعرف انه ما في حد يواعد في جاشنمال .. بس يعني شو تبون في سيف ؟! .. وطبعا البنية فظت مخابيه كالعادة .. وهني سمع وحدة يمبه تقول : " شما .. شرايج في ها الشغاب ؟ " " يخبل .. خاصة لونه " سيف يتطنز: " خاطري اعرف شو يعيب البنات في ها السخافات؟ " صدق ميرة عاقلة .. بس لسانها طويل وارثتنه من امها اللي ابوها ما يروم عليها .. عشان جي قالت له : " ياي تغازل انت ؟ " " سوري يا السبالة .. ما كنا نقصد " طبعا سيف معصب لأن بيزاته خلصت على البنية .. عشان جي لازم تراعون حالته النفسية .. " والله ويسب بعد !! .. ما سمعت .. شو قلت ؟ " " واللي .. ما قريت في أي مكان ان السبلان يرمسون " قامت ميرة وهزت المول من لسانها .. لين ما تفشل سيف وشرد حتى من البنية اللي وياه .. واللي طبعا هدته عقب ما خلص راتبه عليها .. *** بعد 3 شهور ... " يا الله يا العنود .. ما يسوى علينا ها الخياط اللي انتي سايرتله " " يا الله يا الله .. ما ادري مين اللي يتزهب ثلاث ساعات حق المول .. وبعدين تعال بخبرك .. انت اشدراك انه ما شي بنات عند الخياط ؟ " " صدقج والله .. تريّ بسير بتزهب عيل " وطبعا سيف سار يتسبح لأنه ناش بدون ما يغسل ويهه .. وعقب سار يلبس الغترة والعقال .. وخلص وحدة من عطوره .. العنود: " شو .. ليكون قررت تخطب الخياط من ورانا ؟! " " يا الله عاد عن اللقافة .. خلصتي ؟ " " من ثلاث ساعات " وركبو السيارة وساروا خطفوا على كل الخياييط لأن العنود ما حصلت اللي في بالها عند أي واحد فيهم .. " اف .. ما صارت .. شو ها ؟! .. الملكة اليزابث بتخيط .. حشى مب العنود " " شسوي بعد .. لزوم الكشخة .. وانت ادرى عني " " خلاص بنسير عند هذا وشان ما عيبج بنرد البيت .. لا كشخة ولا غيره " وطبعا العنود غصب عنها بتحصل اللي تباه لأن سيف قال لها آخر خياط يعني آخر واحد .. ويوم هي قاعدة تفلسف على الخياط .. سمع سيف وحدة تصارخ على الخياط واتقول حج الهندي: " أقولك ها مب ثوبي .. شسالفتك ..ما تفهم يا ريال ؟ " سيف: " أنا وين سامع هالصوت ؟! " جان يلف صوب الصوت ويقول: " هلا يا السبالة .. اشحالج ؟ " تقرب ميرة صوبه وتقول له: " انت مرة ثانية ؟! .. حرّم يا ريال .. حتى في خياييط الحريم تغازل ؟! " " لا .. انت مب فاهمة .. وراج اختي ترى " تلف ميرة .. جان تسلم عالعنود ويقومون يسئلون عن احوال بعظ .. فيبطل سيف عينه لأنهن ربيعات .. وعقب ما خلصوا كل وحدة طلعت روحها .. وميرة اخيرا حصلت ثوبها وخذته من الخياط.. العنود حق سيف في السيارة : " والله وعرفت تختار يا خوي " سيف ما عطاها ويه لأنه أصلا مب فاهم هي شو تطري .. وساروا صوب البيت .. *** |
عقب اسبوعين ..
شما مع ميرة في ستاربكس يشربون كابتشينو ويتطنزون على اللي رايح واللي راد .. ما مر وقت طويل الا ميرة لمحت سيف .. جان الاخت تتحرى عمرها في فيلم انجليزي .. ورفعت ايدها تزجر سيف : " هييي .. احن هني " وطبعا سيف خش ويهه في غترته لأن وياه وحدة مواعدنها .. بس هالمرة مب وحده هبلة .. قالت له : " جنا في حد يزجرك هناك !! " " وين ؟! .. انا ما سمعت شي .. خلج من ها الكافيه .. تعالي نظهر بسرعة " " لا صدق .. في وحدة تزجرك هناك " جان سيف سار صوب ميرة وقالها: " انتي مرة ثانية يا السبالة ؟! .. شو تبين هالمرة بعد ؟ .. ما تسدج الفظيحة الاولية ؟ .. تبين تكملينها بعد ؟! " ميرة : " شو بلاك قايملي ؟! .. ما عرفتنا على الاخت .. بعد بنت امك مرة ثانية ؟! " " لا تغلطين عالوالدة " " يبا ما غلطنا .. بس نبا نتعرف على البنية .. ولا نقول عالحرمة ؟! " ترد مها وتسلم على ميرة وتقول: " هلا .. انا مها .. I'm his girlfriend " وهني وصل الموضوع حده مع ميرة وشما وقاموا نقعوا من الظحك .. ونزل سيف راسه من الفشلة وخذا البنية وسار عن السبالتين ... *** ومن ذاك اليوم عرف سيف ان حياته ما رح تكون شراة قبل .. ليش ؟! .. لأن شي غريب استواله .. قام المغازلجي يشوف السبالة في كل مكان .. المول .. الشغل .. حتى في البيت .. وقال في خاطره : " الظاهر ان هذا آخر الزمان .. كل الناس يتينون .. وانا بشر .. صدق حليو .. بس بعد .. مب غريبة عليّ اتين " وطبعا ما كا يعرف اشكثر هو صادق في رمسته هذي .. وفي يوم .. " العنوووود .. ويع " " يصيبك وياخذك مني .. اشعندك اتصارخ ؟! " " تعالي برمسج رمسة " " ها ؟ .. ما سمعت " " لو سمحتي يا اختي الصغيرة .. تعالي برمسج فوق شوي " " هي .. جي تعيبني يا اخوي العود .. سير وانا بلحقك " " انا الصراحة تخبلت !! " " من زمان يا اخوي .. سالفة جديمة هاي !! .. شو الشي اليديد ؟ " " اليديد ان ربيعتج خبلتني " " والله كلهم يخبلون .. أي وحدة فيهن ؟ " " السبالة " " ها !! " " لا .. اقصد اللي شفناها عند الخياط " " هااا .. تطري ميرة " " مو كان اسمها السبالة ؟! " " السبالة اللي بتاخذها .. اشعندك وياها ؟ " " صاير اشوفها في كل بقعة " " يمكن تحبها !! " بطل سيف حلجة يبا يبلع الكلمة بس ما رد عليها وسار .. عقب اسبوعين .. كانت حالة سيف لا يرثى لها .. السبالة في كل مكان .. مخابيه فاظية .. يعني باختصار حالته في كل آخر شهر .. سيف قاعد عند الربع ويرمّس حمد على صوب .. " حمد .. جنني تخبلت !! " " جديمة هاي .. شي يديد ؟! " " اشسالفتكم انتوا ؟! .. كلكم تقولون نفس الرمسة " " ما علينا .. شو اليديد ؟ " " مستوي اشوف بنية في كل مكان " " ليش ؟ .. هو في بنية ما تشوفها في كل مكان ؟! " " لا .. بس هاي غير " " شو الغير في الموظوع ؟ " " هاي تسويلي فظيحة في كل مكان .. يعني مستحيل افكر فيها " " يمكن تحبها !!" يا ترى شو بسوي سيف مع هالسالفة ؟ To be continued … |
شسالفة ؟؟؟؟ ليش محد يرد ؟؟؟ نحن ننطر ترى !!! |
القصة باين عليها حلوة وفيها احداث مشوقة نحن في الانتظار والله يعطيكم العافية
|
السلامـ عليكمـ يعطكيـ العافيهـ و بدايهـ موافقه ان شاء الله وسوف يتمـ دمج الموضعين عشان يكون فرصه للجميع قرات الاجزاء مع بعض في موضوع واحد موافقين باذن الله ^_^ |
أحبك كلمة لو قلتها ما بلت عروقي ولا قدرت توصلك حنين الحب وأشواقي( الجزء الثالث )...
اسمحولنا طولنا عليكم عقب البارت الاول والثاني .. بس تعرفون يعني .. ظروف الاجازة بعد شو ..
ما علينا .. الحين بنكمل القصة .. وهذا هو البارت الثالث ... Part 3 أبوظبي في 26 / 5/ 2000 حمد ريال رزين وثقيل شوي .. واحد من ربع سيف.. طبعا بتقولون اشياب السما للأرض ؟! .. وشو اللي يخلي حمد يرابع واحد مغازلجي ؟!.. بنقول ان ها مشكلته هو مب مشكلتنا .. اما اذا كنتو رزة وايد فاسئلوه هو مب احن !!.. ما علينا .. حمد اليوم مستانس .. ما تشوفون لابس نعال يديد مب اللي لابسه من 100 سنة ؟! .. والكندورة .. صدق لونها يقرف .. بس يديدة على الاقل .. ليش ؟؟ .. لأنه رايح الاخ يخطب .. طبعا حق عمره بعد حق منو ؟!! .. مين اللي بتاخذه ؟ .. وحدة بايعة عمرها .. " ألو .. " " هلا .. منو وياي ؟ " " بنية يديدة !! .. طبعا حمد بعد منو ؟! " " أي وحدة فيهن ؟ " " يا اخ نش وفكنا " " لحظة .. هذا صوت ريال !! " " سواااااف .. نش !! " " صمختنا بها الصراخ .. شو تبا ؟ " " أباك بسرعة .. وإلبس شي عدل " " ليكون ساير تخطب ؟! " " ما شاء الله !! .. أول مرة اكتشف ان عندك عقل " "يعني اليوم خطوبتك ؟ .. خلاص ؟! " " شو خلاص ؟! .. ساير الحي انا ؟! .. هي خلاص " " منو المنحوسة ؟ " " بنت سالم " "خلاص اوكي .. يايك " " بسرعة اترياك " وسكروا ... *** في السيارة.. " اخبرك .. شو اسم البنية ؟ " " اشحجا ؟! " " أواعدها يا الاهبل !! .. بعد حق شو ؟! .. شو اقول حق الشيبة لما يسألني أي وحدة فيهن ؟! " " هي صح .. اسمها ميرة " " شرات اسم السبالة " " أي سبالة ؟! " " اللي تسويلي فظيحة في كل مكان " " ها .. عرفتها .. لا .. هاي غير " " يوم انها بتاخذك .. اكيد غير " وسارو يخطبون البنية .. أقصد ميرة بنت سالم ... *** سيف في بيت آل سالم .. الاب : " هلا والله .. اقربوا " سيف : " الصراحة يا الشيبة .. احنا طالبين القرب " وفي لحظة بطل الاب عينه وبلع كلمة الشيبة اللي اتدل على ذوق وادب عالي ورد : " هاي الساعة المباركة .. أي وحدة فيهن ؟ " " السبالة !! " " ها ؟!!! " حمد يهامس حق سيف : " اسمها ميرة يا ثور .. " سيف بسرعة : " اقصد الاخت ميرة يا الشيبة " بلع الاب الكلمة مرة ثانية وقال وهو معصب: " الشور شور البنية " سيف : " أي بنية ؟! " الاب بخبث : " السبالة " " هي عرفت " ورد الاب يقول : " مرة ثانية اعيد .. ترى الشور شور البنية " قال حمد عشان يحسن الوضع: " معلي يا عمي .. خذو راحتكم .. نروم نتريا .. " الاب : " على خير انشاء الله " حمد : " عيل نستأذن ونتريا جوابكم " وطبعا قام حمد وسيف بعده مسطل وقاعد ما يدري شو يتريا .. يتحرى ان البنية بتاخذ خمس دقايق تفكر وخمس دقايق ثانية عشان ترد .. عشان جي قال له حمد : " قم يا ثور " " ها ؟! " " قم فظحتنا .. اشحجا قاعد ؟ " " خلصتو ؟! " " لا نترياك !! " وقام الاخ سيف عشان يظهر ولاحظ ان الاب يطالعه باحتقار وبسرعة قذب ويهه وشرد ... *** حمد في السيارة : " فظحتنا " " شو سويت بعد ها المرة ؟! " " ما تعرف غير السبالة ؟! " " مو كان جي اسمها ؟! " وسكت حمد قبل ما يقوم ويذبحه ويدش السجن حق واحد ما يستاهل .. وكملو الدرب للبيت .. *** سيف في البيت.. العنود: " غريبة راد مبجر !! .. شو ؟ .. ما في بنات في المول ؟! " " ها ؟! .. لا مب جي السالفة " " عيل ؟ " " رحنا نخطب حق حمد " " ومنو المنحوسة ؟!! " " ما ادري .. وحدة اسمها ميرة سالم .. شرات ربيعتج السبالة " " هي .. عيل كنتو انتو ؟! .. توها داقتلي تقول انخطبت من واحد اسمه حمد .. كان وياه واحد ثور .. وطبعا انا استويت اعرف منو ها الثور !! " " جم وحدة تعرفين اسمها ميرة ؟ " " هي وحدة .. نفسها السبالة " "عيل ما ادري منو المنحوس .. هو ولا هي " " اثنينهم طايحين في حظ بعظ !! " " هي .. وانا اقول .. المهم .. شو رايها ؟ " " ما ادري .. تقول عايبنها .. الصراحة بعد ما عرفت من هو .. بدقلها وبقول لها اشردي !! " " لا حرام .. الريال يباها " " ما علينا .. " *** بعد اسبوع .. سيف يسلم على حمد عقب ما قال له ان ميرة وافقت ويقول: " مبروك .. تستاهل " " الفال لك يا اخوي " " لا دخيلك .. خلني بعيد عن الينون !! " ما فهم حمد سيف منو يقصد بالمينون .. وكملو سوالفهم .. *** بعد اسبوعين .. " سواااف " " اشعندج مقعدتني من الصبح ؟" " يا الله نش .. اباك توديني سوق الذهب " " اشعندج هناك؟ " " بسير باخذ حمام شمس .. بعد اشعندي .. اكيد سايرة آخذ ذهب " " ما احيده يعيبج .. كان الالماس يسدج !! " " لا .. ترى الحين الموظة ذهب " رقد سيف مرة ثانية ، ومرة ثانية قالت العنود: " سواااف " " اوكي .. خلاص .. يا الله سيري اتزهبي وانا بلحقج " قعدت العنود تتزهب 3 ساعات ويوم نزلت ما حصلت سيف ، جان تروح حجرته واتحصله بعده راقد ، وهني طلع اليني الازرق منها وقامت تصفع فيه وهي تصارخ: " يا الله قوم " وهني بس نش الاخ ودش الحمام وعقب قام يتزهب 3 ساعات ثانية، ويوم نزل.. " امبجر يا اخوي .. " " ليش الساعة جم الحين ؟ " " مستوية 11 " " صدقج .. بعده امبجر !! " العنود سحبت كلامها وقالت: " خلاص .. يا الله نسير " وسارو سوق الذهب ... *** سوق الذهب عقب 3 ساعات .. " يا الله يا العنود .. ما يسوى علينا الذهب اللي بتاخذينه " " ما حصلت اللي أباه " " كل ها الذهب ما سدج ؟! .. شو؟ .. تبين ذهب الفراعنة ؟! " " ها ؟ .. لا .. هو أصلا ما في شي اسمه ذهب مصري .. الكل يركظ ورا الهندي " " هاي بتخبلبي ولا شو " " قلت شي ؟ " " هي .. قلت مستوي مينون " " سالفة جديمة !!.. ماشي يديد ؟ .." وقبل ما تكمل العنود رمستها قامت اتصارخ وهي تحصل طقم في وحدة من المحلات : " وااو .. هذا بالظبط اللي اباه " ودشت العود المحل وقعد سيف برة يترياها تخلص .. وهني شاف ربيعه حمد مع ميرة واهلها يدشون وحدة من المحلات وهم يظحكون عشان يختارون ذهب العرس .. طبعا بتسألون كيف عرف انهم يايين يختارون حق العرس .. يعني شو ها الذكاء ؟! .. ريال وخطيبته واهلها شو يسوون في سوق الذهب ؟ .. أكيد مب يايين يختارون نعال يديد حق حمد .. ما ندري شو استوى حق أدب سيف ظهر فجأة .. بس هو حس أنه مب حلوة يرز ويهه عندهم .. عشان جي دش عالعنود في المحل وتم وياها لين ما خلصت حفلتها عقب ظهروا من السوق ... *** وفي الليل ... سيف قاعد يفكر في حجرته.. لا..لا .. لا تفهمون غلط .. لا ما يفكر في البنية اليديدة اللي عطاها رقمه ، ولا اللي شافها في الشارع من دقايق.. هالمرة يفكر في السبالة .. السبالة اللي شافها في المول أول مرة وكانت شردانة من حديقة الحيوان... *** الخميس... اليوم عرس ميرة وحمد ، وفي نفس اليوم سيف سافر لإيطاليا... وتابعونا في الجزء الياي.... To be continued … |
بالانتطار يالغلا ربي يخليج روعه تسلمين لاتططولين علينا
|
|
أحبك كلمة لو قلتها ما بلت عروقي ولا قدرت توصلك حنين الحب وأشواقي.... part 3
......................
|
تم دمج الموضوعين
واتمنى اختي AAN تضيفين البارت لموضوعك حتى ماتشتتين القراء وتبعثرين المواضيع وايضاً الفائدة لكِ بالدرجة الأولى اتمنى انك تتعاونين وتتفهمين .. .... بصراحة اسلوبك مرة حلو . . قرأت اول بارت على عجل .. لكنه جميل وهادي والاسلوب مو متكلف اتمنى لك التوفيق وتحقيق هدفك من روايتك تحيتي وودي |
متوقفة منذ2007
|
| الساعة الآن 05:59 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية