منتديات ليلاس - البطالة بين الاجبارية والاختيارية

منتديات ليلاس (https://www.liilas.com/vb3/)

- الحوار الجاد (https://www.liilas.com/vb3/f35/)

- - البطالة بين الاجبارية والاختيارية (https://www.liilas.com/vb3/t45467.html)

اقتباس:

المشاركة الأصلية كتبت بواسطة همس الخيال (المشاركة 1349916)

البطالة .. لها اكثر من سبب .. اما قصور الدولة عن ايجاد وظائف للخريجين " مثل عندنا بالسعودية
كل خريجات كليات التربية من يمكن 7 سنوات الا اللي لقيوا عقود لمدة اشهر او سنة جالسات البيوت بانتظار الفرج ومبروزين الشهايد معلقينها بالمطبخ " ليش لانو مايتم تقاعد المعلمات ذوات الخبرة الا برغبتهم وماعتقد انهم عمرهم رح يطلبوا تقاعد .. بالنسبة لي اشوف انو الشاب المؤهل والجامعي لو مالقى وظيفة بشهادته مش يعني نهاية العالم وانو لازم ينتظر ,, بالعكس اعتقد انو المفروض يغير من اهدافه وتوجهاته عشان يقدر يكون مفيد لمجتمعه ولنفسه ..بعض الشباب يرفضوا الوظائف المهنية يعني
مثل الميكانيكا والنجارة غيرها "عشان البرستيج" هههههههه يعني برستيجه وهو عاطل عن العمل احلى
بصراحة المسئولية تقع على عاتق الجميع .. بس مين يفكر ويسمع

بصراحة همس اعتقد مثلك ان المشكلة تقع على عاتق الجميع
الحكومة والمجتمع ونحن الشباب
فالحكومة لاتوفر فرص عمل كافية والمجتمع لا يشجع الشباب ان يبحث عن اي وظيفة ايا كانت زي مابتقولي عشان البريستيج
طب نعمل ايه؟

اقتباس:

المشاركة الأصلية كتبت بواسطة ola_mfs (المشاركة 1350037)

أهلا إسراء
المسئولية مشتركة بين الحكومات و بيننا كمواطنين ....... بنسبة ممكن تكون 95% مسئولية حكومات - 5% مسئولية أفراد
البطالة بتنشأ من عدم قدرة الحكومات على تحقيق معدلات نمو اقتصادي تلاحق الزيادة بأعداد السكان
يعني لو كانت أعداد الخريجين من المدراس الصناعية و الجامعات كل عام 100000 خريج مثلا فيجب أن يكون هناك بالمقابل عدد 1000 مصنع جديد تم افتتاحه للعمل مثلا ليستوعب الـ100000 خريج
و هكذا
و طبعا هذا لا يحدث ، بل بالعكس .... أحيانا كثيرة الديكتاتورية و حكم الفرد و الغباء السياسي و الإقتصادي بيدفع النمو إلى الوراء بدلا من الأمام
و هناك مصانع كثيرة تغلق أبوابها و تسرح أعداد جديدة تضاف لأعداد العاطلين عن العمل

أحب بس أعلق على كلمة أننا السبب في البطالة لأننا ننتظر الوظيفة الحكومية
الكلمة دي بقت قديمة أوييييييييي ......... بذمتك يا إسراء تعرفي حد بيعمل كدة؟؟؟؟؟
الكلام ده يمكن كان بالثمانينات من القرن الماضي آخر عهدنا به
الناس نسيت أصلا موضوع الوظائف الحكومية ده من زمااااااااااان ....... و بقت تدور على أي فرصة بالقطاع الخاص
الظالم و المهدر لحقوق الناس بحماية من الحكومة لأصحاب المال على حساب العمال ... ومع ذلك لا نجد
على رأي المثل الشعبي "رضينا بالهم و الهم مش راضي بينا" ههههههه

كمان كلمة إن الناس بتتمسك بكليات القمة : طيب ...... لو اللي ما دخلوش طب أو هندسة دول دخلوا تجارة أو حقوق
هيلاقوا شغل أكثر؟ الإجابة طبعا لا
و لو أقنعنا الناس مثلا إنها تدخل أولادها مدارس صناعية بدلا من الجامعات ... هل سيجدون وظائف؟؟؟؟؟؟

أعتقد الإجابة معروفة

نسبة الـ5% المسئول عنها الأفراد بتكون غالبا في عدم الكفاءة و الدراية أو التدريب الكافي
و حتى هذه تشترك بها الحكومات المسئولة عن تدني مستوى الخريجين ^_^

أنا بحب أحمل الحكومات كل المصايب هههه

حبيبتي علا لما قلت اننا بنستنى الوظيفة الحكومية قلت كدة من اللي شايفاه حواليا مش من خيالي
لحد النهاردة في شباب قاعد مستني الوظبفة ومؤمن بمبدأ ان فاتك الميري اتمرغ في ترابه
بس في ناس تانية كافحوا واشتغلوا وماستنوش وظيفة
تعرفي مرة كنت راكبة ميكروباص وسمعت السائق بيتكلم مع راكب وبيقوله انه خريج علوم قسم جيولوجيا وقال انه اشتغل على الميكروباص لحد ماييجي جواب التعيين ولما جاله فوجئ ان مرتبه اقل بكتير من اللي بيكسبه من شغلته كسواق وهو متزوج وعنده اسرة ففضل انه يستمر بالسواقة ورفض الوظيفة
تفتكري كام واحد ممكن يعمل كدة؟
انا معاكي ان الحكومة المفروض انها توفر فرص عمل وان دة حقنا عليها كمواطنين, لكنها ماقدرتش يبقى نقول هي السبب ونفضل ساكتين؟ ولا نحاول نتصرف ؟
بالنسبة لموضوع الجامعات, قصدي بكليات القمة كل الكليات مش كليات معينة, وقصدي ان عدد الخريجين منها بالالاف , وفي كليات معينة محتاجين تخصصها وعدد خريجينها اقل من المطلوب
عندك مثلا كلية الزراعة المفروض انها تعتبر كلية قمة لان دة اهم تخصص(المفروض) لان الشعب اللي يملك قوت يومه لايمكن حد يتحكم فيه
تقدري تقوليلي كام واحد بيدخل الكلية دي بمزاجه؟
لما يتكدس الالاف من الطلاب في الجامعات( ومعاكي ان دي من ضمن تخصصات الحكومة) تفتكري هيتعلموا كويس؟
تعرفي دفعتنا كانت 480 طالب وكنا في مدرج يسع بالكاد 200 تفتكري كنا بنقدر نسمع ونفهم كويس؟
ونفس المشكلة بالسكاشن ياترى دا بيساعد اننا نتعلم كويس ونقدر نشتغل بعد كدة؟ابدا
ما قلتش ان الناس لما تدخل ولادها مدارس صناعية الوضع هايتحسن لكن كام واحد اختار مجال دراسته بمزاجه بدون تدخل الاهل؟ وكام واحد منهم قدر يكمل ويكون فرد منتج؟

اقتباس:

المشاركة الأصلية كتبت بواسطة metvirus (المشاركة 1350097)

اهلا دكتور

وأهلا بالمواضيع المحورية

البطالة

مشكلة مسئولة عنها حكوماتنا بالدرجة الأولى

لكن مقدرش اقول اننا مالناش دخل بيها .. احنا كمان مسئولين لكن ازاي .. هقولك

الأخت علا ماشاء الله كفت ووفت في عرض المسئولية الملقاة على عاتق حكوماتنا الرشيدة ! .. بس هضيف على كلامها

ان لو حتى قدرت الحكومة انها تظهر بشكل ( أم الشعب " وآسف لاستخدام اللفظة دي " بس دي الحقيقة ) يعني هي المسئولة تماما عن أكله وشربه ومصروفه وعن كل حاجة تخصه واننا مالناش دور في الي بيحصل يبقى هنفضل سلبيين لقترة كبيرة .. أقصد اني مش شرط عشان انا معايا بكالوريوس متخصص في الرسم بس اني محاولش أكتب مثلا أو أنحت وأقول مش شغلي .. طيب خلاص أقعد استنى بقى لغاية اما ماما تجيبلك رسومات ترسمها وتاخد فلوس .. مع ان جارك بيطلب منك تكتبله اسمه بس ع البيت وهيديلك فلوس برضو .. مش ماليش دعوة بقى .. الي أقصده هنا ان كل واحد يستفيد بأي حاجة ربنا اداهاله وما يقفش مكتوف الأيدي ويقعد يقول مافيش شغل , دورنا اننا نتحرك طالما مش قادرين نحل المشكلة الي احنا هنقول مالناش دخل فيها .. أو نعتبرها مسألة حرب وفي الحرب كل واحد بيستخدم كل أسلحته .

يارب أكون قدرت أوصل وجهة نظري من غير ما اتفلسف

شكرا دكتور e

وجهة نظرك وصلت متفيرس
واتفق معاك فيها
مش كل حاجة نقول الحكومة هي السبب
صحيح ان لها دور كبير(95%زي ماعلا قالت) لكن دة مايمنعش ان دورنا اهم
شكرا ليك

اقتباس:

المشاركة الأصلية كتبت بواسطة ola_mfs (المشاركة 1350115)

و أنا أتفق معك تماما يا متفيرس في أننا لا يجب أن نستسلم للوضع .... و عيب قوي ان يكون راجل طويل عريض و قاعد مستني في بيتهم بابا يعطيه المصروف
الراجل اللي بجد بيتصرف
حتى لو هيشتغل في فرن
أو يكنس الشوارع
علشان يصرف على نفسه و مايكنش عالة على حد

و لكن......... دي مسكنات بنعملها .. و حلول مؤقته لا تحل المشكلة .....

هذا لا ينفي إطلاقا مسئولية الدول عن توفير الوظائف الملائمة و الحياة الكريمة لمواطنيها
لو مقدروش يعملوا كدة يبقوا يمشوا مع السلامة .. لأن ليس لوجودهم مبرر بقى .. ياخدوا مرتباتهم بمناسبة إيه؟؟

يجب أن نعرف حقوقنا ....... الحكومة مش بتعطينا حاجة من جيب أبوها ههههه
ده حقي عليها كمواطن

شكلك هاتودينا في داهيةهههههه
لكن اسمحيلي علا
احيانا دي مابتكونش مسكنات ولا حلول مؤقتة
وانما هي الحل الوحيد

اقتباس:

المشاركة الأصلية كتبت بواسطة Honey1900 (المشاركة 1350135)

السلام عليكم

اولا بحييكي يفندم ع الموضوع

بالنسبة بقي لمداخلتي فانا بتفق مع علا و متفيرس ف ردودهم

و كمان مننساش حاجة يا جماعة ان الطلبة بتخلص عايزة تشتغل من غير ما تتدرب

ازاي و كل اللي بناخده ف المدارس و الجامعات قشور القشور و مفيش عملي

اعتقد المشكلة بتبدا من التعليم مرورا بالتطبيق العملي

و بعدين لو الدولة وفرت التعليم الجيد و التدريب التطبيقي الفعلي هتلاقي الناس منتجة انما دلوقتي انا كصاحب شركة هعين واحد خريج جديد ليه و هو لسه خام ف الخبرة و خام ف العلاقات ولا اجيب واحد خبرة و متدرب و دايس ف المجال دا

معلش كلامي مش مرتب بس يا ريت تكون النقطة اللي بتكلم فيها وصلت

نفس المشكلة,لما يكون عندك 100طالب في فصل, و400طالب في مدرج يسع 200 و40 في سكشن يسع 20 تفتكر هايتعلموا حاجة؟
وليه الشركات ماتفتحش مجال التدريب للخريجين؟ اكيد هايساعدهم في ايجاد فرص عمل
كلامك وصل يابشمهندس وفهمناه وعندك حق بس ياترى الحل في يد الحكومة بس؟