منتديات ليلاس - إقلبوا حمير احسن لكم ههههههه

طول عمري حمار شغل ومع ذلك لم تصل يوميتي إلى 150 جنيه ولا أعتقد أنني يمكن في يوم من الأيام إن أصل إلى هذا الرقم مهما بلغت درجة حموريتي هكذا كنت اكلم نفسي بصوت مرتفع وانا ألقي بالجريدة التي كنت اقرأها جانبا فإذا بزوجتي تعتقد انني مصاب بحمى لدرجة الهلوسة فأسرعت من تلقاء نفسها على المطبخ لتعود بطبق فيه ماء بارد وقماشه لزوم الكمادات التي قررت أم البنات ان تجريها على راسي حتى لا تصل السخونيه إلى نافوخي ويحدث مالا يحمد عقباه فاستسلمت لكمادات الماء الساقع التي وقعت على راسي بردا وسلاما بينما كانت زوجتي تطيب خاطري وهي تقول : مالك بس ياحبيبي إيييه اللي جرى لك .... ياما قلتلك بلاش تعبي في نفسك ... يعني كويس كده لما تعد تهلوس زي المجاذيب ... الناس كلها مضغوطة ولو كل واحد عمل في نفسوا كده يبقى قول على الدنيا السلام
قلت لنفسي وكأني لم أسمع زوجتي : ولما الكلب بسلامتوا ياخد 100 جنيه في اليوم والحصان 250 يبقى بني آدم مستني اييه ؟! ... أنا لازم أشتري شقه جديدة أربي فيها جاموسه على حمار على كام كلب
قالت زوجتي وهي تشعر إن حالتي حرجه :أسترها معانا يارب إيه اللي جرى لعقلك يازينة الرجال ثم قالت كما لو كانت تذكرت شيئا ما :ما تكنش عضة الكلب لسه مآثره فيك ولا شفت حاجه في الجرنان فكرتك بالحمار اللي وقعت منه وأنت صغير .
قلت وانا أشير إلى الجريده : اتفضلي الجرنان قدامك وإقري الموضوع بنفسك يمكن تعذريني .كان الموضوع يتناول الماني الذي يتقاضاه الحمار وغيره من الحيوانات التي تظهر في الأفلام والمسلسلات التلفزيونه فالحصان أجره في اليوم 250 جنيه والحمار 150 جنيه والكلاب تتراوح أسعارها بين 100 و 150 جنيه في اليوم حسب شكلها ونوعيتها وطبعا حسب مساحة الدور !! والقطط 250 جنيه ... يارب مخلقتناش كلب ليه ........ والبقر والجاموس 150 جنيه
تأملت زوجتي الموضوع جيدا ثم بدأت تطيل النظر في صورة الحمار المنشورة مع الموضوع ثم أخذت تنظر لي نظره فاحصه ثم تنظر نفس النظرة للحمار اللي في الصورة فقلت لها في سرعه : بتفكري في إيه ياوليه ؟؟ أوعى يكون قصدك يعني ........ فقاطعتني قائله : والله دي فكره هايله عمليات التجميل باقت عاديه ومنتشرة في كل مكان ... يعني ساعة زمن ممكن يتعملك نيولوك تقدر من خلاله تاخدلك 150 جنيه في اليوم ... أنا واثقة إن العملية ده مضمونة النجاح من بعد ماشبعنا إحنا البني آدميين من أكل لحمة الحمير ... اللي كل شويه يقفشوها عند الجزارين
فقلت لزوجتي معترضا : طب بلاش حكاية الحمار خلينا أبقى حصان .. على الأقل عمر ما حد شتم حد وقاله يا حصان فقالت زوجتي بسرعة : عمليا مينفعش لأننا مش عارفين إذا كنا أكلنا قبل كده لحمه حصان ولا لأ لكن لحمة الحمير ده مفروغ منها وتوكل على الله وماتخفش هتبقى نجم سينما ومحدش هيعرف يكلمك ... معجبات بقى واتوغرافات ومش بعيد تمثل قدام كل اللي بتحبهم هيفا ونانسي واليسا ومن عارف يمكن ساعتها تسيبنا وتعيش في اوتيل على النيل زي ما بيعمل النجوم الكبار .
فجمعت البنات لأستطلع رأيهن في هذه الخطوة فقالت يثرب في تحفظ : بس يابابا ياحبيبي لو العملية ده نجحت تفتكر ينفع تعيش معانا بعد كده في الشقة ؟؟ وأكملت لقاء كلام أختها : وحتى لو كان ينفع إزاي بعد كده تقعد معانا على الطابليه وإحنا بناكل ؟! فقالت أسرار : طب وهنعمل اييه يابابا في هدوم حضرتك فقالت وعود التي كانت آخر العنقود قبل مجئ الآنسه كلمات : طبعا يابابا لو العملية نجحت هتديني كل يوم لفه في الشارع ....
سارعت إلى المركز الطبي المتخصص في عمليات التجميل ... وقفت في الطابور العامر بالرجال والنساء وعندما جاء دوري إلى موظف الاستقبال فوجئت به يقول لي : ها حمار ولا كلب ولا جاموسه !!
سرحت مفكرا فإذا به يعطيني استمارة ويقول لي عموما دورك بعد 3 سنين... أتفضل على جنب أملأ الإستماره ده وروح سدد الرسوم في الخزنة ثم زعق قائلا الجاموسه اللي بعدوا قصدي الآنسه اللي بعدوا !!!