منتديات ليلاس - المدينة والغريب

المدينه والغريب
________________________________________
جاء يشوف الحال كيف بعد ماهزه حنينه!!
وقبل يسألني سالته كيف حالك يالحبيب؟!

قال انا كني غريب ضيع دروب المدينه!!
قلت انا كني مدينه تنتظر رجعه غريب!!

قال اجل وش فيك تكره سيرة الحب وسنينه!!
قلت اجل وشلون ما اكره سيرته دامك تغيب؟؟!

انت لامن غبت حتى مرايتك صارت حزينه!!
كيف ماتبغاني احزن وانت لي حظ ونصيب؟؟!

الهدايا والرسايل والمكاتيب الثمينه!!
والليالي والقمر والريح والكون الرحيب!!

كل ماتبعد تجيب الشعر لي من يدينه!!
وتقعد جروحي تودي في الطواريق وتجيب!!!

يابعد كل القصيد ونزوة حداه وانينه!!
لاذكرتك لاح بيت وطاح ورد وفاح طيب!!

وان نسيتك مانساني صوتك المبحوح لينه!!
ياخذ لجرحي بثاره من خطاياك ويطيب!!

وبعد هذا جاي ترمي ذنبك بوجه المدينه!!
مادريت ان المدينه كلها شمعة غـــــريــــب؟؟

سليمان المانع