|
هل توافق على دخول مصر منظمه حقوق الانسان
لقد تمت بالفعل الموافقه على دخول مصر منظمه حقوق الانسان يعنى على رأى كاتب صحفى كليبات التعذيب دى كانت كدبة ابريل ازاى مصر تبقى من الدول دى وهى ارخص حاجه عندها الانسان وهناك الكثير من الدول اللى تستحق انها تكون مكان مصر مثل الدنمارك للاسف مصر محتاجه كتير علشان تبقى من المنظمه دى و لكن ما يهمنى الان ان نقوم باستفتاء فيما بيننا هل توافق على دخول مصر منظمه حقوق الانسان ارجو الرد و ابداء الراى |
أنا رأيي كحكومه مصريه لا نستحق مطلقا بسبب العباره والتعذيب وحبس صحفيين وفساد يعني ماشاء الله على الحكومه واكله حقوق الإنسان 10 على 10 اما بالنسبه للمنظمات الحقوقيه والمجتمعات المدنيه المصريه أعتقد إنهم عاملين عمل جيد في هذا الدور لكن كحكومه مصريه طبعا أرفض بس أنا نفسي أعرف كسبت من أول مرحله إزاي يعني العالم كله ده أعمى
|
ربنا يسهل مش جايز لو دخلنا نبقى احسن؟
مين عارف؟ |
ازاى مصر دخلت منظمة حقوق الأنسان وهى تحكمها حكومة أفسد من أى حكومه حكمتها
على مر التاريخ هذه الحكومه تورد اليها بعض الدول مساجينها السياسيين لتعذيبهم ناهيك عن تعذيبها للمواطن المصرى داخل السجون وفى أقسام الشرطه بل وفى الشوارع عند حدوث المظاهرات هذه الحكومه يجب أن تحاكم كمجرمى الحروب هذا شرف لاتستحقه هذه الحكومه ولكنه مكافأة لها على موالتها لأسرائيل وأمريكا وليس عمى منهم شكرا يا هند على موضوعك المهم .......................شروق الشمس :flowers2: :flowers2: :flowers2: :flowers2: |
العفو اي جماعه وانا معاكى يا شروق
فعلا لازم تتحاكم |
رفقا شوية فى الكلام عن مصر
مهما كانت بلدنا انا معاكم ان مصر مفيهاش اى حق للمواطن للاسف ولكن الله اعلم ممكن دخولها المنظمة يغير الحالة ربنا يرفع شانك يا ام الدنيا |
يمكن يا ندا تتغير
وانا النهارده قرات مقال بيقول انها بتوعد منظمة حقوق الانسان باعادة النظر فى اسلوبها فى التعامل مع المواطنين وانها بدخولها المنظمه ستحترم تلك الحقوق كلنا نتمنى الخير لمصر لانها بلدنا وملناش غيرها مهما حصل وربنا يحفظها دوما |
امين يارب العالمين
ده حلمنا كلنا |
بيبو
ايه يا جماعه انتوا بتتكلموا عن مصر كده ليه
مصر اه فيها بعض السلبيات بس ايجابيتها اكتر وانا بجد بعتز بمصريتي وافخر بذلك انا لو مش مصر وقرأت الموضوع ده كنت افتكرت ان مصر بلد سيئه للغايه |
مين قال اننا بنتكلم عن مصر وحش
احنا مش بنكره مصر احنا بنتكلم عن النظام الحاكم يعنى الحكومه ربنا يهدها احنا بنكره الحكومه اكيد مصر دى اجمل مكان فى الدنيا ولا شك مش علشان انا مصريه بس بجد بجد بجد مصر احب الاماكن واروعها على الاطلاق ربنا يحميها مين اللى ممكن يكرهها يا بيدو ؟؟؟؟؟؟؟؟؟؟؟؟؟ دا حتى اللى مش مصريين بيحبوها نقوم نكرهها احنا احنا بنقول ان الحكومه سيئه مفيش شك واللى مش شايف كده يبقى اعمى وكل الناس عارفه وشايفه فضايح الحكومه والنظام الحاكم ربنا يهديها كلنا نفخر بانتمائنا لها ولا يمكن ان يتغير ذلك مهما حصل الف شكر على مشاركتك يابيدو شرفتنى وشرفت الموضوع ياترى دخلت الاستفتاء ولا لأ |
تسلمي عزيزتي هند على الموضوع الرائع
انا حابة اشارك ولو انا مش مصرية بس بحس بانتمائي ليها طالما انا عربية وهاي حال جميع الدول العربية تقريبا عايزين يدخلوا في منظمات حقوق الانسان ومنظمات اخرى وهم مش فاهمين حاجة نسبة البطالة في ارتفاع والشباب المهاجر عايزين الشباب يبطلوا الهجرة صلحوا حال الدولة طالما ان الحكومة فاسدة مافيش حاجة حاتتغير والحال في الدول العربية من سي الى اسوء قال تعالى :" ان الله لا يغير ما بقوم حتى يغيروا ما بانفسهم " الله يعطيك العافية يا هند ودمت في حفظ الله ورعايته |
شوفى يا ندا كلنا بنحب بلدنا أنا بعشق ترابها و كل حاجه فيها دى مصر أم الدنيا فيه حد ممكن يكرها دى أجمل بلد فى الدنيا لكن زى ما قالت هند ألحكومه فاسده لأقصى درجه
والناس كلها زهقانه من أوضاع البلد الى متسرش واحنا فى المنتدى بنقول رأينا بصراحه فى الموضوع و الحكومه هل الحكومه هى الشعب المصرى لأ طبعا ...............شروق الشمس |
بيبو
مصر اكيد فيها فساد وفيها فضايح بس
مفيش دوله في العالم تخلو من الفساد او التدليس واللي يقولك كده يبقي كداب اكيد الفساد في كل حته بس بنسب متفاوته والنسبه في مصر ضيئله وانا بصراحه شايف ان الحكومه من ايام نظيف ماشيه حلو واحوالها بتتحسن وربنا يهدي انا لسه مصوتش بس هصوت علي فكره انا معرفش حد في الحكومه لحسن حد يفكرني بدافع عنهم عشان ليا مصلحه ولا حاجه لأ انا بقول اللي انا شايفه من وجهه نظري |
طبعا ياهمسات مصر بلدك اكيد ومصر يشرفها ده
ويشرفنى انك دخلتى الموضوع وشاركتى فيه وانا متفقه معاكى يا شروق وفعلا مصر مش هى الحكومه شكرا على تشريفك وتفاعلك اسمح لى يا بيدو الفساد فى مصر بنسبه ضئيله !!!!!!!!!!!!!! مش ممكن تكون بتتكلم بجد بيدو مصر دى ارض مقدسه ربنا بيحبها البلد دى بلد زراعى صناعى تجارى ساحلى سياحى وكمان التقارير الامريكيه بتقول انها عايمه على بحيرة من البترول وبلاش نتكلم على الغاز الطبيعى ولا جبال الدهب والاحجار الكريمه فى سينا كل ده ومش عارفين ناكل ولا نشتغل ازاى ؟؟؟؟؟؟؟؟ البلد دى قبل كده اكلت شبه الجزيرة العربيه كلها لما اتعرضت لمجاعه فى عهد عمر بن الخطاب رضى الله عنه واكلت جيش قوات الحلفاء ايام الاحتلال البريطانى نبقى النهارده مش عارفين ناكل نفسنا ويبقى الفساد قليل الفساد كبير صدقنى لكن ان شاء الله مش هيستمر ولا هيدوم |
من الضروري على اي دوله بالعالم انها تكون مسجله بمنظمة حقوق الانسـان
ولكن لي تعقيب على الرد اللي ذكر فيه تعذيب الصحفيين والفساد والخ عزيزي بكل دول العالم ..وليس مصر فقط ..يوجد تجاوزات كبيره ولا تنسى مافعله ولايزال يفعله الامريكان بالعراق واسرائيل بفلسطين والمخابرات بالمعتقلين باختصـار شديد هذا ليس مقياس كنت مستغرب بانه معقول مصر ماكانت عضوه بحقوق الانسان !! غريب فعلا فهذا حق على اي دوله بالعالم انها تحترم حقوق الانسان حتى ولو بدون عضويه |
ايه يا بيبو ؟
اقتباس:
بص يا بيبو يا اخويا ... انا اهلاوي زيك بس انت شكلك مش من هنا ؟!!!! او بتتفرج على التلفيزيون القومي بس !!! يا بني بطله دا بيؤدي للتخلف وخصوصا البرنامج العظيم الرائع "البيت بيتك" ومزيعه الأشهر تامر أمين واخيرا اسمحلي اسالك سؤال شخصي : انت عندك كام سنة ؟ والله العظيم ما هي تريقة بس شكلك لسه ورور وما تعرفش اللي بيحصل في بلدك |
عزيزتي هند
التساؤل بحد ذاتو بيحمل نوع من الاستنكار كيف لمصر ان تلتحق بالمنظمة وفعلها معاكس لقولها ولكن لما العجب والاستغراب طالما ان جميع الدول الملتحقة بالمنظمة تمضي على نفس الدرب لك مني فائق التحية ،،، |
عزيزي mico mark
انا مش عارف اقولك ايه بس اللي انا فهمته من كلامك انك بتنتمي لمصر ومضايق علشان كده وفي اعتقادك"الخاطئ" ان الفهم او المعرفه مقيده بالعمر وواخد فكره وحشه ي عن التلفزيون المصري بص يا حبيبي اي دوله في العالم بتطوع الاعلام بتعها تبع مصلحتها والتلفزيون المصري " اللي انا مبتفرجش عليه من شهورالا بالصدفه" مش شايف فيه اي حاجه وانت بسألني عن سني عمر السن مكان بيفهم الناس بل الاطلاع والمعرفه هي اللي بتنمي فيك حته الثقافه وكونك اهلاوي فأنت علي راسي من فوق هههههههههه ومش علشان في سلبيات في دولتك مبرر انك تكره مصر ابدا من الواضح انك ات***ت للظلم او ما شابهه ذلك ليس مبرر ايضا لكره مصرنا العزيزه مصر دي يا حضرات مش مجرد اسم او مكان مصر اكبر من كده بكتييييييييييير انا مش هديلك درس في حب الوطن ههههههههههه تحبها او تكرهها دي حاجه بتاعتك بس لو انت مبتحبهاش تبقي بجد ظالمها اوي وعلي فكره انا مصري وابويا مصري بس جدي مش مصري هههههههههه تقبل فائق تحياتي |
اسمح لى يا بيبو لتانى مرة اختلف معاك
انت ليه مصمم اننا بنكره مصر او متضايقين من انتمائنا ليها والله العظيم والله العظيم بنحبها ونموت فى ترابها ومين اللى ميحبهاش اعتقد من كلام ميكو مارك مفيش شك انه بيحب مصر وبرغم كده انت شككت فى انتماؤه مش معنى اننا مش راضين عن الوضع الحالى ليها نبقى ب نكرهها مش ممكن تتكره لانها الضهر والحضن الكبير احنا ممكن نكره نظام حكم او فئه معينه من الناس وده نتيجه لحبنا الكبير ليها وخوفنا عليها كلام اخونا يوضح انه مستغرب لرؤيتك الورديه مش اكتر ومش معنى كده انه مستصغرك لا معتقدشى انما هو كان قاصد يفهمك ان الرؤيه مش ورديه قوى للدرجه دى انا بشكر كل اللى ساهموا فى التصويت سواء كانوا مصريين او عرب _اكيد بيحبوها قدنا وبشكر كل اللى شارك برائه دمتم لى |
هند انا متهيألى ان مصر لما تدخل المنظمه ممكن حاجات كتير و انظمه كتير تتغير لصالحنا
و انا فعلا بحب بلدى و اتمنالها الخير |
كلنا نتمنى لها الخير ونتمنى ان بدخولها المنظمه تتغير
لكن كان علشان تدخلها تكون ملتزمه فى الحفاظ على حقوقنا وده طبعا ما حصلشى وانما دخلتها بالكوسه وهناك بلدان تستحق دخولها عننا _الاعتراف بالحق فضيله ربنا يهدى الحكومه وتحترم اداميتنا ويارب احفظ مصر من كل شر |
وهو فيه انسان اصلالالالالالالالالالا
في كل الدول العربيه المهم المنصب والباقي طز تحيااااااااااااااااااتي :Thanx: |
شكرا هند ... ويا رب بيبو يكبر ويفهم !!!
اولا شكرا للاخت هند لطرح الموضوع ... ولتفهمها لكلامي ومحاولة الشرح كمان !!!!
اقتباس:
كل اللي بالاحمر في كلامك دا غلط ... ومش من حقك تستنتج حاجة وتقتنع باستنتاجك وتتهم ناس بما ليس فيها واذا ما كنتش قادر تستوعب ان في حد ممكن يكون بيحب حد تاني او بيحب بلده بس ينتقدها وكمان يلعن ابوها - بعشق زي الداء - تبقى دي مشكلتك وحاول تحلها !!!! وكمساعده : حاول تقرا لجاهين ... الابنودي ... الفاجومي ... والسن بيدي خبرة ... وشكلك ما عندكش خبرة ملحوظة : في ردك يا ريت عايز اغنية ماشربتش من نيلها ... وطبعا انا مصري ماتضرش |
السلام عليكم ورحمه الله وبركاته
مارك : انا مش عايز اجادلك تاني لان من الواضح ان فرق السن والخبره في صالحك اسف يا مايكي لاني جعلتك حبيبي وده في حد ذاته غلط برأيك وعلي فكره انا مش محتاج قرائه للأبنودي او لغيره لاني بعد خمس سنين هكبر وهكتسب الخبره اللي انت بتقول عليها ..........صح والواضح اني لا امتلك اي شيئ من الخبره التي تؤهلني للمشاركه في مثل هذه المواضيع الكبيره فالمفروض ان تترك"بضم التاء"هذه المواضيع لاصحاب الخبره من امثال حضرتك اما انا فلا اعدو ان اكون جاهلا بعد سنوات قليله سأمتلك واصح ذا علم وخبره ........مثلك مارك : الذي لاحظته في كلامك فقط هو انه يكشف عن شخصيه متناقضه فكلامك يناقض نفسه لاحظ معي واكتشف بنفسك مثالـــــ1ـــ تقول ان الفهم والدرايه تأتي بالسن وتتمسك بهذا وفي نفس الموضوع اتهمتني بعدم الخبره وقلت مساعده اقرأ للأبنودي فلو طرحنا هنا سؤالا لماذا اقرأ للأبنودي ؟ فالجواب هو كي اكتسب الخبره في حين اني لما لما قلت الثقافه والمعرفه هي اللي بتنمي فيك الثقافه انتقدتني في ذالك فمره تنفي الحصول علي الخبره بالقرائه ومره تؤيد ذالك ومره انها تاتي بالسن و"مساعتك" تنفي هذا مثالــــ2ــ تقول لي بالنص" مش من حقك تستنتج حاجه وتقتنع بيها وتتهم ناس بما ليس فيهم" وفي نفس الموضوع ايضا تقول بالنص " السن بيدي خبرة ... وشكلك ما عندكش خبرة" فكيف تنهاني عن شيئ وتشرع انت فيه؟!!!! كيف تستنتج اني معنديش خبره وتتهمني بذالك وانت قائل النص الاول للأسف يا مايكل كنت بفتكر الحوار بناء ولكن من ردك الاخير اكتشفت عكس ذالك تماما حضرتك ببتهكم عليا في الملحوظه بتاعتك وانا اوعدك اني هعمل موضوع وانزل فيه معظم الاغاني عن التي تدعو الي حب مصر والوطن العربي هند : الموضوع جيد لكن طريقه عرضه لم تكن بالطريقه المثلي فالسؤال استنكاري ويحمل شيئا من التهكم وهذا كفيل بأستفذاذ اي شخص غيور علي بلده شكرا يا هند علي الموضوع وشكرا ايضا لاحترامك للمختلفين معك في الرأي بغض النظر عن ايهم الرأي الصحيح. |
بيبو انا بشكرك على مشاركتك
واضح انك زعلت اوى منى ومن مارك ياسيدى والله لا نقصد انك تزعل على الاطلاق لاننا بنحبك وده اكيد ثانيا الموضوع غير محدد بسن و الكل ممكن يشارك فيه وانا شرفتنى مشاركتك احنا اختلفنا معاك وده مش معناه اننا نتخاصم واحنا مش ممكن نسمح لك انك تزعل مننا لان زعلك غالى علينا قوى كل واحد وضح وجهة نظرة والمفروض انها ماتغيرشى من علاقتنا اللى هى علاقة اخوة ومحبة وفوق كل ده علاقة مصريين ببعضهم ثانيا السؤال والله بتاع الموضوع مفيش فيه سخريه على الاطلاق بالعكس انا عرضته بمحايده وتركت الكل يشارك واضفت راى الشخصى بمشاركه زى اى حد تانى لان مش من حقى انى اصادر على اراء الاخرين احنا كلنا بنغير على بلدنا وبنقدرها ونتمنى لها الخير ولم اكن اقصد اى استفزاز من اى نوع لانها بلدى انا كمان انا لا اتهكم على مصر لانها اكبر من كده بكتير ومش ممكن اتهكم عليها ابدا انا واحده شفت اننا اخدنا حاجه لا نستحقها واردت معرفة ارائكم اذا كنت ترون اننا نستحقها ام لا |
لما لا
أنا اوافق على دخول مصر في منظمة حقوق الانسان بالعكس على جميع الدولة العربية ايضا ان تدخلها مع انه الدول العربية تعرف جيدا ما هي حقوق الانسان لكن ما الضرر في دخول منظمة ممكن أن تعود بالفائدة على اهل البلاد لنفكر بالامر من ناحية ايجابية ربما تقترح مصر رايك صائب و تعتمد عليه هذه المنظمة بل ربما يكون لهذا الراي تغير في الاحداث الحالية أتمنى أن يكون راي قد وصل للكل بالمعنى |
انا صراحة ما بوافق
لانو كتير بشوف عالنت صور التعذيب بالسجون صراحة صور مخزية شكرا هند موفقة |
ايه يابيبو الى يفرح فى البلد وأنا مع ميكو فى مسألة السن واضح ان أنت لسه مخلصتش كليه فلسه متعرفش الأحباط الى ممكن تشعر بيه وانت بتدور على شغل و متلاقيش و
تطر تم ايدك لبابا أو ماما وتاخد المصروف ويمر بيك العمر واانت مش لاقى شغل وان لاقبت هيبقى غير مناسب لمؤهلاتك اانت عارف الشقه الى فوقنا كانت بتتوضب عارف العمال الى شغالين فيها مبلطين ونقاشين لما بابا سألهم طلعوا مؤهلات عليا واحد خريج سياسه و اقتصاد والتانى اعلام والتالت تجاره فيه أكتر من كده انت ما شفتش الشباب عمرهم بيضيع وهم بيدورو على شقه علشان يتجوزوا وما يلاقوش اقولك كفايه كده أنا مش عايزه اقول اكتر من كده ولسه شايف الدنيا وردى وبردو بحب بلدى و بعشق ترابها وما ارضاش أعيش غير فيها لأنها مصر أم الدنيا فيه ولو ححد قال عليها كلمه وحشه أخنقه لكن لازم نبص بواقعيه لحال البلد يمكن نقدر نعمل حاجه ونصلح حالها مش نقول الحكومه ماشيه حلو انت بتضحك علينا ولا على نفسك بص حواليك كويس وانت تعرف المأسه الى احنا عايشنها على فكره أنا مش بهاجمك أنا بحاول أوصلك شىء من المراره الى فى قلب كل مصرى حالها بس انشاء الله مش هتستمر الحاله ديه وبكره ترجع مصر منارة الدنيا ............شروق الشمس |
هند : انا عمري مازعل منكم لانكم بمثابه اخواتي بالظبط
شروق: البطاله في كل حته في العالم وليست افه محليه بل عالميه بتقولي ان اللي بلطولنا كانو خريجين "اقتصاد و سياسه " و"تجاره"و"اعلام" وانا بقولك ان اللي دهن لنا طقم الانتريه دلوقتي دكتور في جامعه القاهره هو زميل والدي وكان عاطل بس مستسلمش زيهم وقعد يقول كلام لا هيقدم بس ممكن يأخر ولم يفكر باليأس كحال معظم الشباب بصي لعدد الخريجين كل سنه كم هائل من الشباب ولكن يبقي السؤال هل الحكومه مكلفه بتشيغل كل هذا العدد في جزئ اكيد بيقع علينا ومتنسيش اننا من دول العالم الثالث انجلترا العظمي تعاني من البطاله انا مش بدافع عن الحكومه هي اكيد عليها جزئ كبير من المشكله وانا معاكي لازم نبص بواقعيه بس الواقعيه اننا نبص بكل الاتجاهات مش باتجاه واحد فقط شكرا علي التفاعل والرد |
البطاله اكيد موجوده فى كل مكان بالعالم مفيش شك اخى لكن مش بالشكل اللى احنا بنعانيه
ناس بتطلع معاش ومفيش حد بيشتغل مكانها انا اعرف خريجين من سنة 83 لسه من غير شغل يبقى ايه ده ؟؟؟؟؟؟؟؟؟؟؟ احنا عندنا مشاكل اااااه موجوده فى كل مكان فى العالم بس عندنا اكثر شويه شويه كتير والغريب اننا عندنا كل شىء حلو يخلينا اغنى بلد والله بجد المشكله مش مشكلة الحكومه لوحدها اكيد بس صدقنى الحكومه بتاعتنا ربنا يهدها بتحارب حتى اللى مش عاوز منها حاجه عموما جميل اننا على الاقل متفقين فى بعض النقاط انا بكرر شكرى لك من ساهم فى التصويت او شرفنى بمشاركه برايه بجد نورتونى ونورتوا الموضوع لا تحرمونى من طلتكم |
مصر تستحق بجداره دخول منظمه حقوق الانسان واللى عنده راى تانى يدرس بقيه الدول الاعضاء فى المنظمه وهو يعرف ليه مصر تستحقها وسلااااااااااامات |
الله يسلمك وانا درست وشوفت ومازلت مختلفه معاك
ومش معنى انهم غلط نقبل اللغلط احنا كمان ومش امريكا المعيار بتاعنا |
اخوانى الاعضاء
انا قلت راييى فى الموضوع ده قبل كده وللاسف متابعتش الموضوع فى الفترة الى فاتت وجيت الوقتى قريت الردود الى الصراحة ادهشتنى لما قلت كلمة رفقا بام الدنيا لم انفى او امنع ان فى سلبيات وفساد للركب فى مصر ده شىء انا مقتنعة بيه ولكن طول عمرى ليا وجهة نظر محددة ان الامم بتتقدم بتقدم ابناءها ونفوسهم وسلوكياتهم واخلاقهم نبتدى بنفسنا الاول وبعد كده نعتب على الحكومة والحكماء ووو معلش اسمحولى كل واحد من المتحاملين اوووى عن مصر يقعد كده مع نفسه ويدرسها هل هو نفسه يمتلك مقومات المواطن المتقدم واسمحولى ليس معيار التقدم بالعلم لا والف لا بتكلم هنا عن الاخلاق والعادات والمثل الى المفروض انها موجودة فينا عندنا امانة فى الشغل ؟؟؟؟ بندى شغلنا حقه ؟؟ 3/4 من المواطنين فى اعمالهم منتهى الاهمال والتكاسل قاعدين على مكاتب وبناخد فلوس ومش بنعمل حاجة محدش يقولى مفيش شغل لا بعنيا بشوف مهااازل فى المصالح الحكومية هل مسؤل عليها حاكم كلنا حكام لو كل موظف اتقى الله فى عمله هنتقدم كل موظف يروح يمضى ويمشى والى قاعد يا بيتكلم يا بيقشر خضار لا والغريبة ان الكلام ده غالبا ما بيكون انتقادا لحال مصر طيب ابتدى بنفسك يا اخ الاول مفيش امانة ادينى نسبة كده كام فى المية لو ضاع منك حاجة تلاقيها 20% بالكتير اشتغل اتحرك اتقن عملك ارفض الكسل الى عايز يعمل حاجة بيعملها انما كلنا حاطيين ادينا على خدنا وبنشتم فى البلد وبننتقدها ملحوظة : انا مش بنكر ان كلامكم صحيح لا صحيح جدا بس قبل ما نبص للحكومة نبص لنفسنا الاول عملنا الى علينا اخلاقنا واجباتنا وبعدين ننتقد ومحدش يقول بنعمل عايزين تتساوو مع البلاد المتقدمة روحوها وانتو تعرفو المواطن فيها بيعمل ايه روحو وشوفو ولا بلاش اسالو الى عاشو فيها هتعرفو مستنكرين اوى ان ناس معاها بكلوريوس وبتشتغل اعمال اقل من المستوا فى البلاد المتقدمة مفيش عقدة التعليم كلهم بيشتغلو تلاقى البنت فى كلية طب وبتشتغل بيبى سيتر اسمحولى مين مننا توافق تشتغل كده انا للوقتى مخلصة كلية من فترة وقاعدة فى البيت عالة على اهلى والمجتمع ليه ؟؟ مفيش شغل لا فيه بس بتامر لالازم اشتغل بمؤهلى ولازم يكون شغل محترم وشركة كبيرة وده حال الكل انما زمايلى نزله واشتغلو حتى لو شغلة اقل من المستوا دى مشكلتنا اسمحولى نصلح نفسنا وبعدين وقتها نشتم حكوماتنا براحتنا ابتدى بنفسك الاول اذا كنا مش عارفين اولى حقوق ابداءالراى وهى احترام الراى الاخر منين احنا مواطنين بنطالب بحرية المواطن ومنين بنعترض على كلام الاخ بيبو ونقوله سنك وروح اقرا الكتاب الفلانى ووو هو حر مش شايف مشاكل ده رايه شايف الدنيا وردى برده رايه دى الف به تقدم المجتمع احترام الراى واسمحولى الصغير قبل الكبير ليه حق بابداء الراى ومش من حق حد يمنع الصغير من انه يقول رايه اما عن راييى انا عمر السن ماكان عامل من عوامل الحكمة او رجاحة العقل ياما ناس مخلصة جامعات وتافهين جداااا ومش بيفهمو ا وتلاقى طلبة لسة فى ثانوية عامة عقولهم توزن عشرة منهم ثم اسمحولى مصر مش هى لوحدها الى فيها فساد وطننا العربى كله فساااد اشمعنا المصريين الى دايما بيشتمو وبيتريقو وبيهزقو فى حكامهم ولكن دى برده صفة من صفات المواطن الى همه الكلام والكلام وبسسسسس هند انا مش معترضه على موضوعك بالعكس سؤالك للمناقشة انما الردود الى خلتنى احزن شوية على مصر محبش اسمع الكلام والتجريح عليها فى كل مكان والى فيها فى جميع بلاد الوطن العربى ولكن المصريين للاسف لازم يشنعو ببلدهم انا مش ضد الانتقاد ولكن معاه يكون خطوة من الى بينتقد للحل او المساعدة لانى كده ابقى مواطن غيور على سمعة بلدى كتير منكم هينتقد كلامى مفيش اى مشكلة ولكن اسمحولى يا من تنادو بحقوق المواطن ان تعطو لا خوانكم الاعضاء ابسط حقوق العضوية وهى ابداء الراى ملحوظة : انا سنى 24 سنة وبكالريوس بالاضافة كمان لانى مازلت للان بحب الاغانى الوطنية المصرية ولا امل منها بالرغم من انى اعانى مما اراه ولكنى القى العت على نفسى لانى لم اصل للان لاكون مواطنة صالحة .... |
جميل انك شرفتينى تانى يا ندا
كلامك انا متفقه معاه كلية صحيح الحكومه مش كل حاجه _وده انا قلته فى ردودى السابقه _ بس السمكه بتفسد من راسها الحكومه عليها دور واحنا علينا دور احنا مش متحاملين على مصر احنا مش بنحاول ندفن راسنا فى الرمل زى النعام اه الفساد فى الوطن العربى من اوله لاخره بس مش معنى كده اننا نسكت معنى ان المصريين بينتقدوا حكومتهم معناه انهم احسن من ناس تانيه عارفه ان حكومتها وحشه وبالعه وساكته معناه اننا اشجع واجرأ معناه اننا عرفنا الغلط فين وناويين نصلحه ومعرفه الخلل نصف الحل واكيد انى لازم ابدا بنفسى اولا قبل اى حد تانى وصدقينى يا ندا اننا فعلا بنحاول نتغير وفعلا انا متفقه معاكى ان الموظف عندنا مبيشتغلشى وعارفه انها بطاله مقنعه وعارفه ان فيه سلبيه ماهو اكيد ان الناس اللى انا شايفه انها السبب فى عدم استحقاقنا دخول المنظمه_وده راى شخصى _ناس زى وزيك .........ناس مش بتعمل اللى عليها بالعكس كانت اكثر ظلما من الحكومه وياندا للمرة المليون انا مش بشتم فى مصر وعمرى ما هشتمها ابدا واللى هيجى ناحيتها نهارده اسود منى واكيد احنا بنحترم اراء الكل مهما كان سنه واذا كان حد نصح الاخ بيبو بقراءة شىء فدى مجرد نصيحه واعتقد ان النصيحه شىء عادى ولا تؤثر على احترام الراى فى شىء (ولا انا غلطانه) واكيد السن مش معيار للعقل والفكر وان كان عامل مؤثر بالطبع ولكنه ليس بمعيار وفعلا فيه ناس سنها صغير واعقل مليون مرة ياندا انا عارفه انك مش معترضه على الموضوع ويشرفنى وجودك وردك النقطه مش تشنيع احنا ما بنحبش نسكت عن الحق فالناس كلها بتتفرج على الفضائيات وشافت الفضايح كل ما هنالك اننا بناقشها وبعدين اكبر دليل على رجاجة عقل المصرى انه بيقول على الغلط غلط حتى لو كان فيه والله يا ندا بنغير على سمعة بلدنا وبنحبها قوووووووووووى واكبر دليل على غيرتنا اننا بعد العرض الشنيع لكليبات التعذيب مش عاوزينها تاخد شىء متستحقوش وانا كمان بحب الاغانى الوطنيه ومش بغنى غيرها وكلنا نتمنى اننا نكون مواطنين صالحين علشان نليق بمصر انا اسفه اذا كنت طولت عليكى بس بجد انا مبسوطه بوجودك حتى لو اختلفنا _وان شاء الله مفيش خلاف_ شرفتينى وشرفتى الموضوع ويهمنى اسمع تعليقاتك باستمرار ومنتظره اسمع ردك |
مشكورة هند على كلامك وخلينا نقول اننا متفقين على الموضوع العام
او هدف الموضوع وده شىء مش اقدر انكره ان الكلام صحيح ولكن فى اختلافات بينى وبينك فى وجهات النظر زى بتقولى اننا عشان بنتكلم وبننتقد نبقى اشجع من مجتمعات تانية واننا عارفين الغلط فين وناويين نصلحه وليه منقولش اننا بنتكلم وبنتكلم وبسسس وبننتقد وبسسس احسبيلى كام واحد فكر انه يصلح نفسه الاول وبعدين ينتقد بلده ؟ نسبة قليلة جدا وتكاد تكون معدومة انتقد نفسك ثم انتقد المجتمع لان المجتمع مكون من افراد يحسب تقدم المجتمع بتقدم ورقى افراده افلاطون حاول يثبت انه بالحكم والادارة الصحيحة ممكن انه يوصل بلبلد الى بيحكمها انها تكون المدينة الفاضلة يقدر بحكمه الصحيح انه يخلى الافراد منتهى الرقى والتطور وفشل فى التجربة ومقدرش ليه تفتكرى لان المواطنين نفسهم ميمتلكوش الصفات اللازمة للمدينة الفاضلة انما انما لو عكسنا التجربة كل فرد من نفسه صلح نفسه هنقدر نحقق المدينة الفاضلة لسبب بسيط جداا وهو ان واحد مننا من المواطنين الصالحين بقى حاكم علينا هو كمان كان فرد وصلح نفسه واخلاقه ودينه فا بالتاكيد هيكون حاكم بمعنى الكلمة واذا كانت السمكه بتفسد من راسها فا المجتمع بيفسد من مواطنيه دى راييى الشخصى واحترم رايك الشخصى اما بالنسبة لان النصيحة مش غلط فا هى مش غلط ولكن اسلوب النصيحة هو الى غلط فى اغلب الاحيان ودى نقطة سودة فى مجتمعنا او خلينى اقولك مفهوم خاطىء لان دائما بتكون النصيحة ليها وجه اخر انا مش عايزة اتكلم فى النقطة دى اكتر من كده لان الموقف مش خاص بيا ولكن كنت بقول ملاحظة عامة على احدى صفات المجتمع وفى الاخر انا زييى زيكم ليا انتقادات على بلدى ولكن بشبه الحكاية باسرتى الصغيرة كتير مننا ليه انتقاداته على ابيه او امه او اخواته وبنناقش الموضوع والانتقادات دى فى بيتنا وداخل جدرانه انما مطلعش للجيران وادخل وسط الناس واقف احكيلهم وانتقد اهلى محدش من الجيران هيحللنا مشاكلنا مشاكلنا ان محلينهاش بين جدران بيتنا الاربعة مش هتتحل محدش هيهتم بمشاكلنا اكتر مننا دى وجهة نظرى ورؤيتى للموضوع اننا لما ننتقد بلدنا ننتقدها جواها مش نروح الفضائيات وعلى المنتديات انا ضد الحكاية دى لانها مش بتجيب اى فائدة سوى الشوشرة على مصر وعلى مواطنين مصر بالخارج والى بيعيش فى الغربة بيعرف معنى كلامى ده اكتر من غيره انا مع مناقشة التجاوزات بالداخل وليس الخارج وعلى فكرة ياهند انا هنا فى مصر مسميينى المشاغبة بسبب انى دايما مش عاجبنى الوضع وبنتقد ولكن جوا الاربع حيطان ويبقى هذا راييى الشخصى ولكى رايك الشخصى الى بحترمه جدا و شكرااا الاختلاف فى الراى لايفسد للود قضية |
اها كلام ندا صحيح نبدا فى انفسنا فى الاول وبعدين نصلح المجتمع اكيد كل انسان على سبيل المثال عندو من سلبيات من الاجيبايات هدا على سبيل شخص واحد كيف بيت او حارة او مجتمع رح يكون اوضع اصعب كل ما كبرت الدائرة اجتماعية فعلينا البدء فى انفسنا اولا وبعدين انعاتب الاخرين ---هى وجهة نظى الى الموضوع مع تحياتى - رفيق محاميد
|
اقتباس:
انحنى لكى احتراما رياحين بصى كلامك ده من النهاية يتحط بعده نقطة اخر السطر طول عمرى بيعجبنى عقلك بجد:flowers2: |
خلاص ياندا
انا فهمت انى لازم اتكلم مع المصريين بس مش مع الكل يعنى اى موضوع عن مصر اكتفى بانى انزله فى المنتديات المصريه اللى انا مشتركه فيها ماشى ياستى مفيش مشكله انا مش هنزل مواضيع تانى عن مصر ومواضيعى هتبقى عامه وعلى فكرة ما طلبناش من الجيران انهم يحلوا لنا مشكلنا كل ما هنالك انه للاسف الجيران عرفوا بمشاكلنا_كليبات التعذيب_تقريبا كان صوتنا واحنا بنتخانق عالى فالجيران عرفوا بس عمرهم ما هيتدخلوا واكيد اللى هيحل مشاكل البيت اهل البيت ياندا مع التكنولوجيا النهارده مش ممكن حاجه تستخبى ابدا من غير ما نحاول نعمل شوشره الناس عارفه بره وجوه يبقى على الاقل نوضح اننا رافضين ومش راضيين والفضائيات ظهرت علشان مفيش حريه على القنوات الارضيه والنت انتشر الكلام عليه علشان اننا نعرف نقول ارائنا البسيطه دى ونختلف زى دلوقتى كده عموما يا ستى ما تزعليش برغم الاختلاف الا انى يهمنى انك ما تزعليش ومش هنزل مواضيع تانى تضايقك على المنتدى هنا انا هنزل فى منتديات تانيه مصريه لو تحبى نتخانق جوه البيت ههههههههه ياجماعه شرفتونى واتمنى ان كلكم يكون صوت |
مفيش زعل منك ياهند بكل تاكيد
فى نقاش فى وجهات النظر مش معنى اختلافنا فى وجهات النظر يبقى فى زعل بالعكس الاختلاف فى الراى لا يفسد للود قضية ابداا على العموم شكرا ليكى لاسلوبك الجيد فى النقاش وتفهمك للراى والراى الاخر وتقبلك للراى الاخر حتى لو مش مقتنعة بيه وانا عموما احترم الشخص الى يتقبل الراى المخالف ليه هند تانى بقولك مفيش زعل ابدا انتى اختى وبحبك وبحب مواضيعك عندى فى القسم وياريت متكونيش زعلانة منى لاى سبب كان ومنتظرة مواضيعك الى زى العسل فى الضحك والفرفشة مشكورة حبيبتى |
ماشى ياندا
ادينى نزلت مواضيع فى المنتدى ابقى اقريها وقولى رايك عموما حبيبتى انا كمان بحترم رايك وبقدره وبقدر كمان اصرارك فى اثباته شرفتينى واحب دايما اشوفك فى مواضيعى |
| الساعة الآن 02:33 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية