|
*&* يا قصيدة ارمي حبالك و انشليني - تميم البرغوثي *&*
هذه قصيدة أخري لتميم البرغوثي اتفضلوا يا قصيدة ارمي حبالك وانشليني - تميم البرغوثي يا قصيدةْ اْرمي حبالك وانشليني يا حمامةْ بيضاْ فوق جناْحاتْها عالجنبينْ هلالَ اْحمرْ وشايلة حبال تِلِفّ الكوكب البشري كإنه خُضار من البلكونة بتشِدُّه وبياع الخضار ماسك ف إيده صَكَّ واهْبَة فيه حياتها ليهْ تمن للأرض والخلق اللي فيها تْشِدِّ في سَبَتِ الخضار ويشدِّ فيهْ إرميه بدال ما يشدَّكِ البياع لِعَنْدُه كبَّري مخك سيبيهْ واوعي، تسيبيني يا قصيدة ارمي حبالك وانشليني وانشليني زي نَشَّال المواصلة الزحمة، بالكلمة أو البسمة، ولاغي الدنيا والهيها وسهيها وخديني من جيوبها الورانية الضيقة الضلمة وحطيني ف إيديك واجري في أول محطة وطيري بيا في الشوارع واضحكي لما الأمم تلهث وراكي بس خليني معاكي واحفظيني يا قصيدة ارمي حبالك وانشليني وانشليني من بحور مش هايجة خالص، من بحور اسمنت أو من جَوَّ مِتْحَنَّطْ، مَاكِتَّ نْجُومُه مِتْفَنَّطْ كما الدومينو وزهر الطاولة، غرقان، مش بقى في شبر مية زي ما بيقولوا، إنما غرقان في تفل الشاي في نقطة مية نازلة من مكيف في قفا موظف بكرش اصلع بيحمد ربنا برضه فِ دمعة عينيْ من ثلاثين سنة فْ عيني، بقى وصولها لخدي معضلة عايزالها تسعين دولة ومعونة ومجلس أمن، غرقانْ يا قصيدة في سكوتي وفي كلامي، في حروبي مع زُرار كُمِّي وسلامي عللي نفسي يموت ببطء قوي أمامي مال ميزاني يا قصيدة فاوزنيني يا قصيدة ارمي حبالك وانشليني وانشليني، هاقلب التاريخ كإنه ساعة رملية واصيح: شيلي هلالكْ واتبعيني أصلُه في الأيام ديْ باتوا بيصلبوا الناس عَ الأهلة، تكنولوجيا! والبني آدم كمان بَقَىْ جسمه ممكن يِتْعِوِجْ أسهل كإنه جنين، إذا ثَبِّتُّه يبقى هْلال، وَاْنَاْ يا قصيدة راضي إنيْ أموت على هْلالِكْ على القفلة في موَّالِكْ على بسمِةْ مُجامْلَة لو سألت ازَّيَّ أحوالِكْ وأرضيْ أموت، بلا قافية، عشان العيشة زي الخمسة صاغ شغلتها بس ترخص الهرم اللي منقوش فوقها، يا صرَّاف يا متحنتف با قول لك إيه بقى، ماتخليهالك، مش عايزها، ويا قصيدة لولا إني مِسْتَعَرَّ من الحياةْ كنتَ ادِّيْهالِكْ والنَّبي شيلي هلالك واتبعيني أو تكوني انتي هلالي واتبعِكْ يا عاليةْ جداً في السما وبتغمزيلي أَوَقَّعِكْ تعبان انا المرَّة ديْ وحياتِكْ يا غالْية وقَّعيني يا قصيدة وارفعيني أرفَعِكْ راضي أموت لكن مَعِكْ وان كنت يا عالية بَاخَرَّف في الكلامْ، صبرِكْ عَلَيَّا واسْمَعِيني يا قصيدة اسْتَحمِليني ياقصيدة ارمي حبالك وانشليني واذكري مرَّة جَمَايْلي يا قصيدة ولما اموت، هاتي قَدُوم سِنُّه رقيق، وبحق ما كَتَبْتِكْ بذمَّة ابقي سَمِّي يا قصيدة واكتبيني... |
سلمت يمينك " بيجاسوس " ساكتب نبذة مختصرة عن الشاعر " تميم البرغوثي " تميم البرغوثي شاعر فلسطيني من ام مصريه وهي الروائيه الناقده رضوى عاشور عاش بمصر وهو شاعر للعاميه المصريه لكن تم ترحيله للاردن بعد اعتقاله في المظاهرات التي كانت تندد بالعدوان الامريكي على العراق والده الشاعر الفلسطيني مريد البرغوثي لك مني فائق التحية ،،، |
و دي برضه نفس المعلومات الي قرأتها عنه أزيد عليها انه من أصول مصرية فلسطينية لبنانية و له دوواوين باللهجة الفلسطينية و دوواوين أخري باللهجة العامية المصرية و دوواوين أخري بالفصحي أشعاره سياسية - معقدة نظرا لتعقيد الأحداث التي تتحدث عنها قصائده |
اذن رضوى عاشور هيي امو لهيده الشاعر ...انا كنت سءلتو لبيجاسوس في احد رودودي ع القصائد ياللي منزلا ازا رضوى هالكاتبة والناقدة المعروفة هيي ذاتها بتكون امو لهيده الشاعر لانو بيذكرها في احد القصائد ياللي منزلاا بيجاسوس ...شكرا الك رياحين على المعلومات انا بحبا كتير لرضوى وبحب دراساتها وابحاثها النقدية بس ولا مرة دريت انو الها ابن شاعر بهيده الحجم ...مشان هيك انا بشكرك كتير بيجاسوس لانو عن طريقك اتعرفت على تميم البرغوثي وعلى نماذج من روائع شعرو ......الف شكر الك والله يعطيك الف عافية |
العفو و شكرا علي المرور |
| الساعة الآن 04:51 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية