|
]¦[حــدود المـفـاهيـم]¦[
السلام عليكم..
هذي قصتي الاولى..اتمنى تحوز ع رضاكم.. :flowers2: واتقبل النقد الهادف.. :3EO05175: (الفصل الأول) الخميس – الساعة 7:37 مساء فهد:أنا أبغى افهم شي واحد أنا اللي بتزوج ولا أنت أركد. ماجد:أقول على ما اعتقد يالحبيب أن العروس أختي ودي تجرب المرارة اللي أذوقها من عرفتك.....أقول فهد فهد:أمر ماجد:أنا ماني مصدق إنا بنكون نسايب فهد: من قال..أنا إلى الحين ما شفتها وأنا قايل إن كان فيها بوهه من هالخشه..هونت ماجد: حامض على بوزك تحصل وحده تشبهني ...أقول يا الله ادخل برجلك اليمين وقول بسم الله ....في مجلس الرجال في بيت ابو ماجد (محمد) فهد ينتظر.....!!!! يدخل ماجد رأسه من الباب.. ماجد: واااو من هذا المعرس.. ما لقيتو أشين منه ههههه. فهد:كل لك هواء يا الله عاد اقسم بالله أن قلبي بين رجولي أقول ماجد أنا قايل لكم أني موافق بدون شوفه.. ماجد: طيب وإذا بكره ما أعجبتك..؟ فهد: يا أخي عاجبتني أنا اذكرها وهي صغيره ماجد: هاه من متى ولك علاقة بأختي اعترف؟؟ ويمسكه من رقبته ويهزه فهد: الله يرجك خربت التسريحة مدري التشخيصه ابو ماجد: لا اله إلا الله..هلا هلا يا الله حيهم فهد: هلا والله خالي حياك الله..وباس رأسه ابو ماجد: ماجد وأنا أبوك رح لهلك وشف أن كان هم جاهزين خلهم يجون فهد يطالع ماجد يترجاه بعيونه تكفى لا تروح ... ماجد مبسوط الله هذي أحسن لحظه..أشوف فهد وهو منحرج.. ... فهد في خاطره يا الله يا ربي تتعب ولا تقدر تجي ولا تعيي أمها ولا يموت عمها أي شي أي شي بس المهم ما تدخل ............................ في الصالة...... جمانه أخت فهد: يا الله يا نوره ع الهزاز أنتي شوي شوي اهدي وشلون بتشيليين العصير أبي افهم نوره: والله مقدر والي يرحم والديك ادخلي معي تكفين جمانه: ياهوووووووووه ما اقدر هذي مليون طعش مره أقولها لازم معك محرم أبوك أخوك فهمتي..؟؟ نوره: بس هذا أخوك أكيد تتجرئين عليه جمانه : أقول نوره قلت لك فهد اخوي إنسان حبوب خجول والله ما يعظ بس يمص دماء يفتح باب الغرفة...... طراااااااااااااااااااااااخ راكان :أختي العزيزة انتبه وشاف احد في الغرفة.. راكان: sory..sory... نوره : وشو عقبه طق الباب قبل لا تدخل يا الثور راكان برى الغرفة : من الثور يالبقره ع العموم يالبقره فيه ثور تحت يبغى يشوفك بسرعة لأنه تارك العجول في المزرعة ما عندهم احد نوره: احم احم أقول ركون أخته هنا راكان: حيا الله أخته وأقول وراء العيون ماهي طبيعيه صارت عيون بقره .. هههههااااي يا الله بسرعة انزلي ماجد ينتظر.. جمانه : أقسم بالله أخوك هذا ما يحشم أحد بس تصدقين ولو محبوب ولا هذاك ملك الموت اللي تحت منتظرك يقبض روحك نوره : صدقتي ملك الموت ارحم ... آه أنا نازله بس أدعي لي وانتظريني لا تروحين .. جمانه من كل قلبها :آمين يا رب يوفقك. (نوره تستاهل حبوبه وطيبه وفهد أخوي حبوب ويبي يحطها بعيونه على الأقل تملى علينا البيت..قطع حبل أفكارها الجوال يرن تطالع الجوال .. بدون اسم.... جمانه: هلا. بدر : هلا وغلا بـ ها لصوت . جمانه :كفيك ؟ بدر :تماااااام وينك أنتي ما قلت لك حاولي أسمع صوتك بأقرب فرصه ... جمانه : أنا قلت لك بحاول بعدين كم مره قلت لك لا تتصل إلا إذا أعطيتك خبر أنت عارف لو أخواني عندي وإلا أحد وش أقول.. بدر: عادي قولي بدوري فيها شي .. جمانه: إن شاء الله أقول الكلام هذا لفيصل ولا فهد .. بدر : أوه على طاري فهد بشري . جمانه :تمام توها نازله علشان تشوفه . بدر : قولي آمين . جمانه:ليش؟ بدر : قولي آمين وبس. جمانه : آمين. بدر : إن شاء الله عقبال ما أجـ .. جمانه :لا تكمل خلاص.. بدر :خلاص آسفين وأحلا بوسه على أحلى جبين أمووووووااااااه.. جمانه : يالله بدر مضطرة اقفل عشان أشوف وش صار... بدر : جوجو أبغى أسمع صوتك قريب .. جمانه : أوكي.. يا الله مع السلامة. بدر: هلا والله. في المجلس...... بعد ماد خلت نوره ... أبوها موجود جالس جنب فهد وماجد واقف يطالع المشهد ....لحظه صمت ... صوت الكاساات يرج فيها العصير . ماجد: احم فهد يرفع راسه شوي شووي منحرج من ابو ماجد وماجد تذكر كلام فارس خوويه يوم يقول اذا بغيت تشوف شوفه شرعيه طالع ولاتستحي من احد تراها بتنام معك وتاكل معك وتموت معك فطالع زين . وينك يافارس؟؟ ..نوره(في نفسها)الله ياخذك يا ماجد يعني ما ينفع تنقلع على الاقل ابوي مايشوف زين يالله ياربي استرها وعدها على خير لا أكب العصير فوقه . قربت الصينيه لابوها وخذ ابوها كاس . تصنمت ماتحركت الحبيبه على بالها ان اللي قاعد عندها لبناني بيقووم ياخذ الصينيه ويقول تفضلي من الخوف تيبست رجولها . الموقف هذا صار كله قدام ماجد. فهد : هذي وش فيها ليكون ما أعجبتها رفع عيونه شافها منزله رأسها تحت... انتهز ماجد ألفرصه : أقول نوره وش رأيك في جزمه فهد شكلها عاجبتك ترى ماهي اللي بتتزوجينها ..! ابو ماجد:هاههههاها بس اترك عنك هالهرج وأنا أبوك يانوره وأنا ابوك عطي فهد العصير. تحركت الأخت وليتها ماتحركت خطوتين وتمد الصينيه قدامه الرجال وين والعصير وين.. الأخت دايسه بكل قوتها على رجله ولا هي داريه فهد(في نفسه)لامن جد مااعجبتها الله يعديها على خير من الربكه قال : مااشتهي شكرا ماجد: احلى ياناس اكيد ماتبي تشرب الا من يدي ....... جمانه قفلت ونزلت تحت عند أم نوره وإخوانها [سارة] الكبيرة متزوجة و[روان]أم 18 سنه في ثالث ثانوي عائله آل(محمد) بالنسبة لجمانه شئ كبير من وعت على الدنيا وهم يعرفون بعض ابوها كان رفيق أبوهم وأمها كانت رفيقه أمهم قبل لا تتوفى الله يرحمها ويرحم الجميع ... على قد ماتحب هالعائله على قد ما تكره واحد فيها ... جمانه بكل مرح: ها بشرو طلعت .؟ روان: لا شكل أخوك كلها . أم نوره: روحي ياجمانه عند الباب اسمعي يمكن يقولون شئ .. جمانه: من زمان داخله . سارة: لا قبل دقايق جمانه : حلوو ......... في المــجلس .. جلست نوره وعيونها على ماجد متى يأشر لها عشان تطلع . . في الدقايق هذي سمع ماجد صوت الباب تبع قسم الرجال راح يشوف. . جمانه قربت للقسم ماسمعت شئ انقهرت قالت لروان : وش رأيك ندخل شوي ترى باب المجلس بعيد .. روان: يالله بسرعه صراحه ودي اشوف خل نطل شوي بسرعه ترى امي ماهي منتبهه . في فتحتها للباب هز الجوال في جيبها طالعت [أعز الناس ] يتصل بك . ماقدرت تقاوم ماتقدر تشوف هالرقم وما ترد : هلا وغلا هلا قلبي . وليد: هلا بأحلى أخت في العالم.. جمانه: ههه.. فيك شئ حبيبي(تتكلم بصوت واطي) وليد: جمانه انتي وش فيك عندك احد نايم والا فهد اغمى عليه جمانه: وليد مو وقته بسرعه قفل .. وليد: جمانه متى بتجين ؟ جمانه: وليد خلااص بعدين اكلمك. وليد: طيب جوجو قبل ماتقفلين قولي لي شئ احبه . جمانه: وليد احبك احبك احبك يالله باي. قفلت الجوال وبصوت واطي قالت:مجنون ههه احبك.. وهي تدخل الجوال بجيبها رفعت رأسها بعد ماكانت منزلته عشان مايطلع صوتها عالي وهي تكلم شافت طرف ثوب ابيض.. وتوقف كل شئ ... تحياتي..غموض:flowers2: |
الحقيقة
رائعة بكل معنى الكلمة المواقف حلوة كثير اكملي ولا تترددي |
زهره
مشكوره ع التشجيع.. شرفني مرورك |
(الفصل الثاني)
قفلت الجوال وبصوت واطي قالت:مجنون ههه احبك.. وهي تدخل الجوال بجيبها رفعت رأسها بعد ماكانت منزلته عشان مايطلع صوتها عالي وهي تكلم شافت طرف ثوب ابيض.. وتوقف كل شئ ... لا شعوريا اتخذت خطوه ورجعت وراء بسرعه بس اذنها سمعت اللي انقال ماجد:والله قله ادب .. رجع ماجد للمجلس اشر لنوره وقامت بسرعه لقتها فرصه ودخلت على اهلها سيده في حضن جمانه نوره: جمانه دثريني دثريني ههه والله بمووت من الخوف جمانه: ............ نوره : جمانوه وش فيك؟؟ جمانه: ولاشئ ها نقول مبرووك . نوره: بدري جت امها واختها يسألون وهي تجاوب . وجمانه ؟؟ ماتدري وش الطبخه .. ليه يقول قلة ادب ؟؟وش شايف نفسه الحين هو قليل الادب اللي واقف وقاعد يطالع والله اعلم من متى بعد.. الله ياخذه يارب ويريحني منه اكرهه اكرهه اكرهه ( يهز جوالها في جيبها) طلعته صار فهد : هلا الغالية جمانه : حياك فهد: يالله تطلعين أنا في السيارة.. جمانه: ان شاء الله فهد: بسرعه عندي لك سواليف واجد.. جمانه: يالله ياجماعه اخوي ينتظرني. ام ماجد: ياحافظ والعشاء جمانه: كثر الله خيركم الجايات اكثر وانتي عارفه الوالد في البيت اليوم ولازم نروح. نوره: جمانوه ودي تجلسين شوي ماسولفنا في التفاصيل . جمانه: ان شاء الله لاحقين قوليها لي بعد العرس . نوره: ؟؟؟ جمانه: الحمدلله ان فهد يبي يقولي كل شئ نوره: جمانه أمانه اذا وصلتي كلميني . جمانه: ليه؟ نوره: مدري محتاجتلك <<بصوت واطئ ماينسمع واحس ان فيك شئ.. لبست عبايتها بسرعه وطلعت وهي طالعه هز الجوال جمانه(بخاطرها) احول هذا وقته ردت بسرعه : هلا هيفاء هيفاء: هلا فيك وش فيك تلهثين لاحقك احد. جمانه: اقول هيفاء عيوني انا الحين ابا اطلع اروح للبيت اذا وصلت ...... قبل ماتكمل كلمتها وهي واقفه عند باب الشارع وجها لوجه ماجد يبي يدخل .. بسرعه تنحت على جنب وغطت عيونها . جمانه:خلاص اذا وصلت البيت كلمتك وقفلت . وهو ماشي ماجد: اقول المفرووض يكون عندك جوالين واحد للاهل والثاني للحبايب. جمانه: مشكور بس احب اقولك كل يناظر الناس بعين طبعه. ماجد كان معطيها ظهره التفت بسرعه ومالحق لانها طلعت.. ماجد(في نفسه) ياناس اعرفها والله اعرفها متغطيه كاشفه ساكته تتكلم . ولا بعد ترد ال********************************ه والله مااكون انا ماجد ان ماجبت خشمها في الارض. [ماجد عمره 28 ضابط برتبه رائد] جالس ويتذكر اللي صار قبل اسبوع يوم تحولت له قضيه مثل قضايا كل يوم حادث تصادم واللي إنصدم في العناية وإجراءات وتحقيقات ثم جابوا إغراضه الشخصية للضابط المسئول وكان مافيه وقتها الاهو واعطوه الجوال عشان يبلغ اهله.. مباشره ع فتحته دخل الصادر شاف رقم مخزن بدون اسم دخل الوارد نفس الشئ فيه نفس الرقم ولم يرد عليها دخل القائمه لقى الأهل اتصل عليهم مباشره بلغهم ان ولدهم صار له حادث ومافيه شئ بس هو في المستشفى ممكن يجوون ويجي احد من اهله للشرطه عشان الاجراءات . من الفضول الزائد أو الحظ الشين أو الطبع.. مدري..؟؟ فتح الرسائل كلها لنفس الرقم ( انتبه عيوني لا تسرع لأني جالسه انتظرك ) نزل شاف الرقم انصدم بس رجع طالعه مره ثانيه يمكن ماركز الا هو رقم خويي فهد مستحيل هذا رديفه طالعه مره ثانيه لاهو [0555] والثلاثه الاولى رقم واحد والثلاثه الثانيه رقم واحد يعني مافيها إن؟؟ ....انهى دوامه كمل كشوفاته طلع واتصل على فهد فهد حبيبه رفيق دربه من يومهم صغار كان دايم يروح لبيت فهد يلعب معه كوره كان يقوله بيتكم فله مافيه ام تقول العبوا ولا تلعبون بس وقتها ما كنت افهم وش معنى الأم .. كيف اتصل على فهد..صعبه يقوله اللي شافه لكن يبي يستفسر اول قبل لا يتسرع ويقول رقمك مع وحده وعلى علاقه بواحد ورسا يل وغزل وكلام لانه شاف بطاقته وعرف انه اعزب .. ماجد: هلا فهود وينك يالغالي.؟ فهد: وشذا اللسان الحلو وش بغيت ؟ ماجد:ابد ابي الرقم تبيع؟ فهد: ليه وش فيه رقمك؟ ماجد: الا بالله رديفك انت تصرفت فيه لاني انا وياك طلعناها سوى [فهد 25 سنه خريج حاسب يشتغل بالإتصالات] فهد: لا وين أنت, جوجو حبي استولت عليه كن احد صب مويه نار في جوفي وتقول حبي بعد آه يافهد وش أقول... اّه بس لو تدري عن حبك.. فهد: ماجد وش فيك ؟ ماجد: ولاشئ بس وصلت البيت وأبوي واقف أبسلم عليه بعدين بيننا اتصال قفل ماجد . وقف ع جنب على الخط ونزل من السياره يبغى يصرخ يبغى يتكلم . كان اذا ضاقت به الدنيا ما يكلم الا فهد بس وين يا فهد اختك اللي تشوفها ملاك اختك اللي كلكم تقدسونها لدرجت اني اغار منها لحب فهد لها ... صارت بدنائه ؟؟؟؟ ولا انتظرك بعد آه آه يا فهد أحس فيه يطِعن في ظهره وأشوفه وأنا ساكت لكن والله مااسكت.. المشكلة مامعي دليل الولد واخذ جواله؟؟؟؟؟ ليتك يافهد قلت بعته ليتك قلت عطيته وحده أي شئ الا هذي .. مافيه الا حل واحد اواجه ال********************************ه هذي..! اتصل بدون تفكير وما شاف الوقت انصدم شافه _انتظــــــــــار_ دق ثانيه وثالثه ورابعه وفي الخامسه ردت جمانه:......... ماجد: الــــــــــو _بمده_وهو ينافخ جمانه: نعم- باستغراب لانها ماهي عارفه الرقم بس قالت على هذا التصميم يمكن واحد من اخواني والا شئ ماجد: انتي جمانه؟ جمانه: خير اخوي من معي؟ ماجد: انتي جمانه والا لا؟ جمانه: انت المتصل على مااعتقد عرف بنفسك اول .! من الادب مع انك ماتعرف الادب اصلا والا ماكان اتصلت بنص الليل. ماجد:لا والله نص الليل بس عادي انتظار وعادي ((انتظرك ولا تسرع)) . جمانه: اقول اخوي انت مو صاحي شكلك غلطان مع السـلاـ..... قبل ماتكمل صرخ بأعلى صوته جمــــــــانــــــه وعمـــــى لانه عرف صوتها وهي تتكلم معه بس اول ماردت ما مييز لانه مع الحمق مايمييز شئ. جمانه منصدمه خير وش هاللي ينافخ بعد . ماجد: انا ماجد ولد محمد . جمانه: هلا ماجد ليكون فهد فيه شئ. ماجد بكل قوه: جمانه الرقم هذا تعرفينه ********055. جمانه: ماجد وش فيك ؟ اول شئ من وين جبت رقمي ؟ ثاني شئ بصفتك منهو تكلمني؟ ثالث شئ انا مااشتغل في 905. ماجد احترق من برودها قالها: خالد الـ........ تعرفينه؟؟ جمانه بلعت ريقها حست ان حلقها جاف ترتعد كل اطرافها . ســكـــوت.. ماجد: صاير له حادث اليوم وياليته ميت.! جمانه: ماجد ابي افهم بالضبط انا وش دخلني في الموضوع؟؟ ماجد: دخلك ياقليله الادب اني شفت رقمك عنده ولا مكالماتك ورسايلك شفتها وانتظرك.. صار صوته يعلى ويعلى الى ماصار يصرخ مافهمت شئ اللي يقوله الا يال********************************ه ياللي ماصنتي اعراض اخوانك الله ينتقم منك ولا مع ميـن؟؟ واحد مايسوى خسك الله ماملوا عينك ابوك واخوانك؟؟ وماحشمتي النسايب احنا محنا برا عشان تلعبين بذيلك لكن والله ما اسكت لك والله ما أصير انا ماجد إن ماخليتك تكرهين عيشتك....... .............طووووووووط طوووووووووط...... تقفل الخط هدأت العاصفه جمانه: صمت ودمووع ليه يابدور سويتي كذا ليه؟؟! الساعه 9 في الليل دخل ماجد البيت شاف راكان اخوه [راكان توه متخرج ومتعين في الاتصالات] ماجد صارله اسبوع والموضوع مايفارق باله لقاها : ركون اخوي. راكان: بسرعه ادخل في الموضوع لاني مشغول . ماجد: مشغول في وشو ياحسره. ركان: اتابع توم وجيري الحلقه الاخيره اللي بيمسك فيها القطو الفار عصب ماجد : راكان سكر لا افتح وجهك الحين راكان التفت عليه: آمر اخوي العود . ماجد: راكان لو عطيتك رقم تقدر تجيب لي بياناته كامله الصادر والوارد كل شئ ..ممكن.. راكان سكت فتره: اقول اخوي عسا ماشر انت كضابط تقدر تطلب بشكل رسمي . ماجد: راكان ركز بليز ماله علاقه بالعمل . راكان: طالعه من طرف عينه : انثى والا ذكر.؟؟ ماجد طلع عيونه : راكان تقدر والا لا؟؟؟ راكان: على حسب خطوره الموقف انا لامااقدر ..يمكن واحد من اخوياي بس.. ماجد: بس ايش؟ راكان: انت عادي لو احد درى ترى مـش.... ماجد: لاتكمل تعلمني . لكن عندي طلب ممكن؟ راكان : آمر ؟ ماجد: ماابغاك تشوف الفواتير قبل مااشوفها .. راكان: احاول ماجد: وش تحاول بكره إن شاء الله راكان: هيه صح انت اخوي وتطلعني من مواقف مثل الشعره من العجين وتوسطت لي في الوظيفه وجمايلك مغرقتني بس عاد ماجد ولع : خلاااااااص راكان واللي يرحم امك وابوك ماابغى كثر حكي نفذ وبس ومشى وخلاه. راكان يتحلطم : عجب يحسبني واحد من العسكر بس ماعليه عشانك ياخوي لو اخسر الوظيفه اصلن اضمن انك تبي تجيب لي وظيفه احسن منها.. ................. الساعه 9:20 في السيارهـ . فهد: تصدقين احس اني مرتاح جمانه: هذا اللي نبغاه اهم شئ عجبتك ؟ فهد: موبطاله جمانه: اقول ترى ماهي سياره عشان تقول ماهي بطاله فهد: جمانه هذا زواج ماشي انا ماارضي طرف واحد بس ارضي اطراف ابوي من جهه فيصل من جهه وخالتي عشان افتك من زنها جمانه: فهد عيني بعينك فهد: هاه جمانه: نوره تقول مو مرتاحه !! فهد:............ جمانه: وش رايك؟؟ فهد: قولي قسم بالله جمانه: اقول انا ماني في الابتدائي عشان تقولي قولي والله فهد: جمانوه صدق والله جمانه: اقول ركز في السواقه وش فيك تلخبطت فهد: جمانه انت الوحيده اللي عارفه اني ابغا نوره من كنت صغير اذا جت تلعب معك اتمنى اصير بنت عشان العب معكم , بس والله برايها اذا مابغتني ترى عندي كرامــــ.... غموض |
(الفصل الثالث)
فهد: جمانه انت الوحيده اللي عارفه اني ابغى نوره من كنت صغير اذا جت تلعب معك اتمنى اصير بنت عشان العب معكم , بس والله برايها اذا مابغتني ترى عندي كرامــــه.. جمانه: اقول خلاص مادامك باغيها وتحبها ليه تقول مو بطاله واطراف عده وهالخرابيط فهد: خلاص ابغاها احبها يا شيخه لو هي عرجا وحولا وصمخا ان شاء الله على كرسي جمانه: اقول عسا نتحمل معاق واحد ويالله فهد: يالله وصلنا بليز جمانه حاولي تمهدين لابوي موضوعي انت الوحيده اللي يسمعها . جمانه: تسلم لعيون احلى اخو. فهد فتح باب السياره ونزل ونزلت جمانه فهد: ابشري ظلالك ينتظرك جمانه: ياناس احبه متصل علي عشر مرات من رحت. فتح البابا ودخلوا البيت فهد: مراحب وليد ركض بسره على طول لحضن جمانه جمانه قبصت خد وليد: اقول اخوي ترا الغيبه كلها 3 ساعات مو ثلاث ايام وليد: احس انها ثلاث اسابيع المهم ترا ابوي جاء وفيصل بعد جمانه: حلو يالله ابعد خل اشيل عباتي وليد: ترا بدور متصله تقول اذا جيتي تكلمينها جمانه في نفسها/ الله يستر من مصيبه جايبتها دخلت جمانه الصاله على ابوها (علي) واخوها الكبير فيصل[فيصل عمره 32 سنه طبيب جراح ] ومساعد اللي جالس وفوق رجليه اللاب توب [مساعد عمره 17 سنه ثاني ثنوي علمي ] ووليد جاي وراها اللي هو ظلها على قولتهم [12 سنه في سادس ابتدائي ] تعتبر هي امه وابوه واخته وكل حياته مع جمانه نايم قايم فرحان زعلان الحياه كلها بالنسبه له ((جـــمــانــه)) فيصل: بشري وش اخبار المعاريس؟ جمانه: كله تمام يقولون مرتاحين. ابو فيصل : اجل وينه. وليد: يقول ابي اغير ملابسي وانزل . لان العشاء جاهز فيصل: ومن متى اخوي صار شيف وليد: ماصرت بس فلبينو تقول العشاء جاهز جمانه جلست جنب فيصل فيصل: اقول جمانه وش عنده اخوك بغيير ملابسه عسى ماصار شئ؟؟ جمانه: اقول عيوني ليش ماتطلع وتسأله؟ فيصل : مدري احس عيب بس انتي ماحسيتي بشئ غريب فيه جمانه: فيصل شارب شئ فيصل : لا بس جوعان وليد يركض جاي من عند الدرج يالله ياشباب العريس وصل. ابو فيصل:وليد وش هالرجه مدري متى بتعقل.؟! جمانه تطالع وليد وكنها تقوله ماعليه طنش . في نفسها ليه يابوي هالجفاء وليد ماطلع من الابتدائي حتى عشان يعقل. [ابو فيصل شخصيته جدا سيئه وخصوصا مع وليد هو لانه يحس ان وليد سبب في موت امه و لانه دايم بعيد عن البيت روحاً موجسداً مايتحمل دوشه اطفال . من عمر وليد سبع سنين من بدا يستوعب وليد ابوك موجود لا تلعب لاتصرخ لا تضحك بصوت عالي لا تطلب شئ بمعنى اخر خلك مثل التمثال الى مايروح ( قتل فيه كل معنى البراءه) ................................. بعد العشاء .. علي: انا طالع انام يالله تصبحون على خير . مساعد:انا ابغى شاهي احد يبغى معي؟ فيصل+فهد:ايه مساعد: احلى ولد في العالم اللي جالس جنبي يبي يطمر ويقول لحبيبته فلبينو تسوي شاهي يالله؟!. وليد يهز راسه بالنفي جمانه: وليد حبيبي عيب تقول للي اكبر منك لا . وليد: بس شوفي وش قالي جمانه: ماعليه اصلن هو يغار منك لأنك تحبها لانها حبيبته مساعد بالخداديه على جمانه ووليد: تخسون ماقاله الله جمانه بصوت عالي: رومــــــــــــــا رومـــــــــــا روما من بعيد : نعم ممكن شاهي روما وشاهي فيصل بدون سكرok. روماk جمانه قامت من مكانها وراحت وقفت قدام فيصل: فيصل متى تبي تنام ؟ فيصل:ليه؟ جمانه: قل متى بس فيصل: شوي لأن عندي اوراق ابكملها جمانه: ع العموم بكره الجمعه ماعندك دوام ابغاك في موضوع انا بطلع الحين اذا خلصت من اوراقك عطني دقه ع الجوال واجيك . مساعد: ليه الموضوع ماينفع قدامنا يعني؟؟ فيصل: وانت قاط اذنك معنا؟ ................................. الساعه 10:30 .في الليل في بيت خاله جمانه ( العنود) ام عبدالمحسن عبدالمحسن: يالله ياعيال سرينا محمد: يبه بدري سعد : وين بدري يالله الفلم يبي يبدأ [محمد وسعد عيال عبدالمحسن 17 و14 سنه وشوق 11 سنه وواحد في الطريق] عبدالمحسن : يالله تصبحون على خير يالله بدور خلي ام محمد تطلع ابوه +امه+عبدالملك+بدور: مع السلامه راحت بدور تقول لمرت اخوها تطلع وام عبدالمحسن راحت تودع وابو عبدالمحسن طلع ينام . رن التلفون عبدالملك: بدور وينك عبدالملك [ عمره 30 سنه د. في العلوم السياسيه في الجامعه] رفع التلفون: مرحبا جمانه: السلام عليكم عبدالملك: وعليكم السلام هلا ببنت الخال حياك جمانه: حياك ربي وش اخبارك ؟ عبدالملك : هالدقيقه صرت بخير جمانه: اقول ترى بصدق قسم اقول لاهلي احب هذا الشايب زوجوني اياه عبدالملك: والله لو ما بقى من البنات الا انتي ماخذتك جمانه: احسن اصلن انا فتى احلامي امه مابعد شافها ابوه عشان يجيبونه عبدالملك: ليه الاخ اجنبي؟ جمانه: وش عرفك لا يكثر اقول وين الشيفه اختك؟ وش فيك هذي هي جت. بدور: مين؟ عبدالملك: خذي جمانه بدور: لك وجه بعد قاعد تكلم خذت السماعه وقام عبدالملك بدور: هلا وينك؟؟ جمانه: اسمعي عندك احد ؟؟ بدور: لا ليه؟ جمانه: وش اخبار خالد؟ بدور: بخير الحين. ليه تسألين عنه؟؟ جمانه: بدور ليش ماقلتلي انك متصله عليه من جوالي ؟؟؟!! غموض |
القصة حلوة
مشيقة ارجو ان تنال اعجاب الجميع لا تتاخري |
اختي زهره..اسعدني مرورك
لا ارى قراء.. ولكن لدي امل بعد هذا الجزء ان اعود.. لارى مايسعدني.. |
(الفصل الرابع)
جمانه: بدور ليش ماقلتِ لي انك متصله عليه من جوالي ؟؟؟!! بدور: هاه من اللي قاله..انا قايله لخالد امسح الرقم مو رقمي.. هو دق عليك؟ جمانه: ياليته كلمني. بدور: جمانه أمانه وش صاير؟؟؟ جمانه: ماجد الحيوان بدور: مين هو؟ جمانه: ماجد اخو نوره ولد جيراننا سابقا بدور : الضابط جمانه: أيــــووووه بدور: وش دخله؟ جمانه: انتي اللي قولي لي وش دخله هو قالي في ذاك اليوم في الليل شاف رقمي في جوال خالد وشاف الرسايل ويقول انه خويي.. بدور: طيب انتي وش قلتي ؟؟ جمانه: اصلن ماخلاني اقول شئ... بدور هذي غلطتك الله يرحم والديك دبري عمرك بدور: وش تبيني اسوي اكلمه واقول انا خوية خالد صاحيه!! جمانه: بدور ماجد ها ماهو صاحي وانت عارفه انه رفيق فهد الروح بالروح يمكن يقوله بدور: طيب وش دخل فهد انكري.! جمانه: صاحيه انتي انكر مكالمات ورسايل شايفها؟؟! بدور: طيب ليه ماتقولين ان وحده صديقتك خذت جوالك وهي اللي اتصلت فيه ؟؟! جمانه: اسمعي اسئلي الثور خالد وشلون جواله طاح بيد ماجد وردي علي خلاص انتظرك ok. بدور: ان شاء الله جمانه: يالله فيصل اخوي يدق علي .. ......................................... الساعه 11:00 جمانه في غرفه فيصل اخوها جمانه: هاه وش قلت؟ فيصل: انا اقول ماله داعي انا وانتي نحاكي ابوي المفروض صاحب الشأن هو اللي يكلمه . جمانه: فيصل انت عارف فهد لو قال لابوي ورفض ابوي يمكن يعصب ويسوي شئ ماله داعي وبعدين انا وانت يقدر وجهت نظرنا يعني كن احنا اللي مانبغاه يعيش معنا بالبيت مو هو!!. فيصل: ماشي جمانه والله عشانك انتي بس نفسي اشوفك يوم مهتمه بموضوع خاص لك كل شي لأخوانك. جمانه: قلتها اخوانك .. لانكم كل شئ بحياتي فيصل : خلاص الصبح ان شاء الله جمانه قامت وحبت راسه: مشكور اخوي وتصبح على خير فيصل : وانتي من اهله . يوم وصلت للباب التفت عليه جمانه: فيصل. فيصل: هلا جمانه: وش اخبار فاتن ؟! فيصل : على نفس الحال.. جمانه : يالله مع السلامه . بدور تكلم خالد.......... بدور: ابي افهم يا خالد جوالك طاح بيد مين؟؟؟ خالد: مدري بس يمكن الضابط اللي كلم اهلي.! بدور: بس اسمه ماجد؟؟ خالد: اكبر همي انا وش اسمه . بدور: خالد تكفى البنت متوهقه الحين كله بسبتي . خالد: طيب انتي تقولين هو ولد جيرانهم يعني وش دخله؟؟ بدور: حلوه وش دخله . يمكن يقول لاخوانها !. انا قلت لها تقوله اني وحده من صديقاتها ماخذه الجوال. خالد: مستحيل يصدق بيتوقع انها تتستر. بدور: طيب والعمل؟ خالد: تبين اروح اشرح له الموضوع ؟.بدور انا شاريك وانا عند كلمتي باذن الله قريبا بأخطبك يعني كل شئ في السليم بدور:صاحي انت يبي يعرف اني بنت خالتها تو ماولع زود وعلم عيال خالتي .. مجنون ننكب انفسنا؟؟ خالد: انتي اصبري ونشووف وش بسوي وبعدها نتصرف .. بدور: هذا الكلام مر عليه ست ايام بس يمكن سكوت ماجد عشان خطبه اخته ثم يتفرغ!.. خالد: شوفي لو بيسوي شئ كان سوى على الاقل منع زواج اخته .. بدور: مستحيل ماجد هذا يحب فهد اكثر من اخته حتى ..يالله ياربي تسترها ...................................... جمانه فتحت جوالها ثالث مرره اليوم تمسح سجل المكالمات ارقام كثيره غريبه تجيها .. فتحت الرسائل وارسلت رساله ل(بدر) [اذا كنت صاحي ابا اكلمك من الثابت] ثواني وجتها رساله [انا صاحي وفي انتظارك] جمانه: الو بدر: هلا. هلا بج عيوني..وش اللي صاير مكلمه من الثابت؟؟ جمانه: بدر مدري خايفه بدر: لا تقولين من مجود, يخسي الا هو .. جمانه: ربك يستر انا كلمت بدور للحين ماردت . وفيه ارقام غريبه تجي ع الجوال مااستبعد ماجد لو لقاه انتظار والا مشغول بهالوقت عادي ممكن يسوي أي شئ ...اّخ بس ... جمانه: بدر وش صار في موضوعك..؟ بدر: مايبشر ... كل مافتحت باب تسكر واحد العن منه .. جمانه..؟ بدا يتغيير صوت بدر كنه طفل حارمينه من شئ ....جمانه..... جمانه: نعم بدر بدر: جمانه انتي تعنين لي شئ كبير جمانه انا............ جمانه: لاتكمل تبي تقول انا احبك انا اموت فيك وبعدين يابدر يابدر صار لنا سنه وحنا على هالحال قلت لك من البدايه حالي وحالك مايصلحون, يابدر انت الرجال المفروض تتخذ موقف صار لنا الحين شهر ومانتكلم الا في موضوع شلون نفترق صدقني ماراح تسوي شئ وهذا حالك .. تدري اتخذ قرار ومن هاللحظه هذي .! بدر: جمانه انتي تعذبيني من جهه واهلي من جهه. جمانه: ممكن سؤال وتجاوبني بكل صراحه وبعقل؟؟ بدر: ان شاء الله جمانه: اهلك هم اهلك من 23 سنه وماقصروا عليك بشئ وخايفين على مصلحتك .. وانا ما عرفتني الا من سنه .. من أهم فيهم ؟؟ بدر بعد سبع ثواني.. بدر: جمانه اهلي على عيني وراسي بس يزوجوني وحده مااحبها مااقدر جمانه: اقول تستهبل احبها وما احبها ترى انت بالسعوديه وعارف مجتمعنا مااحنا برا عشان تقول هالحكي.. ولا تقول ما تحبها مع العشره ممكن تحبها! بدر: جمانه حرام عليك احياناً احس انك تكرهيني ماتحبيني جالسه تقنعين فيني اني اتزوج ليه ؟ جمانه: بدر لازم تتخذ قرارك وبشده وتبرهن لي انك تغليني وماتحمل لي في قلبك غير محبه اخويه .بدر صدقني لو عندي احتمال3% ان اهلي يوافقون عليك لو تقدمت لي مره ثانيه ابقولك ماعليه نصبر لكن خلاص ابوي عطاك كلمه وقال البنت(متكلم عليها) محجوزه يعني سياره وانا اعرف ان مافيه شئ افهمها يا بدر . انا ماني من ثوبك وانت مو من ثوبي بس يالله جربنا ووما ضبط وش تبيني اسوي؟؟ _في هاللحظه فرت دمعه من عينها صاحت من قلبها _ بدر:جمانه ماعاش من يبجيج . قولي لي وش يريحج وانا اسويه.. جمانه: وافق على كلام اهلك وافتح صفحه جديده في حياتك وان شاء الله بتكون حلوه. بدر: بس جمانه صعب ..راح تكونين في قلبي جمانه: قالوها كثير من قبلك وعاشوا .. بدر: يعني هذا رايج ماتغيرينه ؟ جمانه: لا لمصلحتك اولا ولمصلحتي ثانيا .. بدر: مااقول الا حسبي الله ونعم الوكيل والله يرزقج على قدر نيتج جمانه: اسمع بدر اول خطوه تمسح ارقامي من موبايلك . كل شئ متعلق فيني رسائل أي شئ ارسلته لك بدر: ليه؟ خلي لو على الاقل ذكرى..! جمانه: الذكرى في القلب ومن قال نبغى ذكرى اللحين وعشان مايكون في لحظه ضعف منك ترجع تتصل .. بدر: طيب انا حافظ الرقم؟ جمانه: انساه . على العموم انا احتمال اغير الرقم عشان المذكور اللي مايتسمى . بس صدقني بتبين غلاتي وحبك لي اذا ما شفت منك أي شئ لا اتصال ولا رساله ..ok.. بدر:............ جمانه: بدر ابغاك توعدني. بدر: حرام عليج. جمانه: حرام عليك انت.. انا اللي فيني كافيني ريحني يابدر. بدر: ماعاش من يتعبج وماعاش من يرد لج طلب واوعدج وعد رجال ان كل اللي تبينه بيصير تبغيني اتزوج عشان ارضي اهلي تبغيني اجيب عيال تبغين اكوون سعيد تبغيني مااسئل فيك ((وكل ماله صوته يعلا ويتقطع من الصياح) وش بعد تبغين ياجمانه تبغيني اكرهج لا والف لا لو ساح دمي كله ماكرهتج يابنت الناس... لكن راح نفترق اذا كانت هذي رغبتك بس بشرط توعديني وعد ؟ جمانه: اوعدك . بدر: لو صار لج أي شئ وضاقت بك الدنيا تذكري ان فيه واحد مستعد يضحي بحياته عشانج . جمانه: .........(دموع) بدر: ارحميني وذبحيني يالله ياربي ريحيني من حياتي. جمانه: بدر الله يخليك لعين ترجيك يالله مع السلامه وبدون ماتسمع شئ قفلت.. ....................................... شريط حياتها يدور قدامها من عمرها ثمان سنين بموت امها انطفت كل شمعه حنان كل حب اهي محتاجته عطته هي اخوانها حاولت تحتوي وليد اللي ماله ذنب بأي شئ صار كل شئ بالنسبه لها .. ابوها بحكم عمله بالسفاره غايب طول ايام الاسبوع ممكن يومين ثلاثه في البيت وبس لاصدار الاوامر اذا حاولوا يفتحون معاه موضوع ماعنده وقت مو فاضي تبون فلوس خذ وغيره ماعندي.. الوحيده اللي ممكن تناقشه هي جمانه ممكن لانها بنت يرحمها او عشان تربيتها لاخوانها تشفع لها تذكرت الحادث اللي صار لها مع وليد بالخبر كانت رايحه للشرقيه مع ابوها وكان ابوها عنده شغل واصرت تروح معه على الاقل تقرب بينه وبين وليد . طلعت بالليل هي ووليد مع السواق بيجيبون عشاء وهم بالطريق طلع عليهم واحد بالخط .. تذكرت كل شئ قوه الخبطه صراخ وليد تكسر الجزاز . الرصيف اللي طلعوا فوقه ماتحس باي شئ .. الدنيا تدور.. نور يولع ويطفى .. صحت هي موجوده في السياره بس معاها واحد تحاول تعرفه بس ماتقدر بعد جهد تكلمت جمانه : وليد وينه ؟ رد عليها الغريب : اسف اختي والله ما كان قصدي الخطأ على سواقكم.. جمانه: وليد اخوي وينه ؟ الغريب: لاتخافين في سياره الاسعاف مافيه الا العافيه جمانه: طيب خلاص بطلع اشوفه فجأه!! تسمع اصوات وكلام واجد ماعاد تقدر تستوعب شفت رجال على وجوههم بلاستيك معهم ادوات قص شئ بس اخر شئ تذكره _صحت الساعه 4:00 الفجر تطالع بالمستشفى مفارش بيضاء تكلمت: ياهو ياللي هنا. كلمتها الممرضه بس مااستوعبت أي شئ الا ان رجلها اليمين مكسورة .ووليد اخوها بخير وبرا المستشفى .. -الساعه 7:00 جاها الدكتور وشرح لها حالتها بعد ماطلع بخمس دقايق دق الباب __تنحنح رجال__ توقعته ابوها بس احتياطي غطت وجهها بالطرحه الغريب نفسه: حمدلله على السلامه اختي جمانه انا بدر فلان الفلاني . انا اللي دعمتكم امس انا آسف حبيت اجي واعتذر بنفسي انا كلمت ابوج ووليد اخوج بخير.. السماح اختي رجلك كانت داخل كرسي السياره واضطر الدفاع المدني يقطع الحديد انشاء الله انتي بخير؟ جمانه:................ بدر: اختي هذا كرتي اذا احتجتي لأي خدمه انا موجود على الاقل خليني اكفر عن ذنبي في كسر رجلك .. جمانه:.......... حط الكرت على الطاوله .وقال لها : مع السلامه خذت الكرت وحطته تحت المخده ماتدري ليه حاولت ترميه بس قالت بعدين.. بعدها جاها ابوها وفهد وفيصل جو للشرقيه مخصوص نست السالفه بس تذكرتها بعدها انضرب الباب ودخلت الممرضه بوكيه ورد ابيض كبير توقعت مباشره انه واحد من اخوانها بس كلهم انكروه طالعت الكرت(الحمدلله على السلامه ياجمانه ..B..) قال ابوها: مشاء الله بدور لحقت عليك حتى هنا مشت السالفه لحد مادقت على بدور تسلم عليها شكرتها جمانه ع الورد بس بدور انكرته في اللحظه هذي عرفت انها من بدر Bاجل مين.. رجعت وطلعت الكرت وخذت رقم جواله وارسلت له رساله (الورد ينتظرك في المستشفى ارجع خذه. ارواح الناس ماتنشرى بالورد) نست في ذيك اللحظه كل الم بس مقهوره منه بعد ماراحت الرساله شكت واذا ماكان هو ,بس الخط خط رجال كبير وحوسه وماهو خط واحد من اخوانها لكنها تأكدت لما سألت الممرضه عن الي جايب الورد قالت مواصفات بدر طويل ومليان ابيض لابس نظارات طبية -صار بينهم رسائل في الشهر الاول يسألها عن رجلها وصحتها في البدايه ماردت عليه بس عقب اعجبها كلامه يرسلها خواطر يطلب رايها فيه الى ماصارت تكلمه بعد ست شهور اتخذوا قرار في الحب وقرر يتقدم لها فاتح ابوه في الموضوع وامه لقا معارضه قويه بس بعد المحاوله وافقوا وتقدم وصار اللي صار اولاً: مو من الديره ثانياً: شغله في المباحث خلا الأمل يروح لأن ابوها واخوانها ماراح يقتنعون فيه طالعت الساعه 2:30 من كثر الدموع اللي نزلتها حست انها غسلت روحها كأن روحها طلعت ورجعت وحده ثانيه (لحظه الفراق صعبه لما يوخذ منك شئ غالي وبرضاك تحس باحساس غريب كأن احد ماسك قلبك مدخل اصابعك في ضلوعك وقاعد يشد وانت ادافع عنه بالشهاق تبغى روحك تطلع بس ماتطلع) ............................... الغرفه هدوء ظلام .. فجأة هيفاء هيفاء هيفاء نمتي؟ رفعت رأسها من على المخده تطالع اختها المتخلفه هيفاء: عمى ان شاء الله حتى لو ماكنت نايمه شوي شوي طقي الباب ...خير... نهى: اقول هيفوه حاولي بكره نروح بيت خالي علي هيفاء نصفها نوم : منهو خالي؟ نهى: الحمدلله اقول خالي خال امي علي ابو فيصل هيفاء: ليه نهى : الله يرحم والديك أنتي عارفه ميلاد مساعد بكره!. هيفاء: وإذا؟ نهى : يرحم امك تقول واذا هذا مساعد مسطرتي البلاستيكية ابغا اسوي له مفاجئه <<هذا الاسم عشان مساعد نحيف مررره هيفاء : مفاجأة يشوف وجهك الا مفاجعه. نهى:تكفين واخدمك في المستقبل. هيفاء : اطلعي بسرعه من الغرفه لا ولع فيك بــــــســـــررررررررعـــه نهى: اعوذ بالله الناس مايعرفون يتفاهمون اذا قومتهم من النوم ..أحلام سعيدة.. هيفاء: عمى ان شاء الله طيرت النوم من عيني قالت ايش قالت مساعد .. [هيفء ونهى ومنى ومازن عيال وداد بنت خاله جمانه هيفاء كبر جمانه في أولى جامعة ونهى عندها 16 سنه أولى ثانوي ومنى 14 سنه ومازن صغير 4 سنوات ] .ـــــــــــــــــــــــــــــــــــــــــــــــــ ــــــــــــــــــ في الاستراحه مع اخوياه.. [راكان اخو نوره 23 سنه ]. راكان: هاه وش قلتوا شباب .؟ سعد: الاسبوع هذا صعبه خلوها الاسبوع الجاي راكان: انا عن نفسي هالاسبوع مقدر ملكه اختي الخميس الجاي وظيفتي صعبه وانا توي متعين . دقايق ورن جواله وطلع برا يرد راكان: هلا ماجد ليه مانمت؟ ماجد: قلي كلمت خويك ؟ راكان: سكران انت اكلم خوي في هالليل ثانياً بكره أنا ماعندي دوام ثالثا يحلها رب العالمين ماجد : ثانياً وشو؟؟ راكان : ولا شئ نام وحط ببطنك رمان شتوي . ماجد: يالله باي. .............................. -الجوال يهز طالعت واوهـ هيوفه جمانه بصوت مبحوح رايح فيها : هلا هيوفه. هيفاء: بسم الله وش فيك نايمه؟ جمانه: لا بس منسدحه . هيفاء: امانه جمانه فيك شئ؟ اهي قالت والا ماقالت وتنخرط الاخت بالصياح . وقالت وش صار . السالفه هيفاء: ياجمانه انتي عارفه من زمان ان هذا بيصير وانتي نفسك قبل اسبوعين قايله اني اللي بتخذ الخطوه وبجبره انه يتركني . طيب الحين سويتي اللي تبغين . ليش الصياح هذا كله؟ جمانه: اهـ ياهيفاء الحكي غير والفعل غير هيفاء: يالله فكيها نكد وقولي لي وش صار على موضوع ماجد؟ جمانه: ولا شئ كلمت خالتك المصون وقلت لها تشوف خطيبها المزعوم ودقت بعد بس مالي خلق اكلم احد بس ارسلت مسج تقول ان خالد يقول ان جوالي كان مع الضابط اللي اتصل على اهلي . بمعنى ان الجوال كان بيد ماجد يالله قولي لي وشلون هالمتخلف بيستوعب . هو انا فاضيه له؟.. هيفاء: مدري صراحه بس لازم تقولين له الحقيقه .. جمانه: أي حقيقه وهو مو راضي يسمع اقوله هذا اخو صديقه بنت خالتي متفتح ومايبغى يتزوج وحده الا لازم يعرفها ويكون معها مشاعر واخته عرضت على صديقتها الموضوع وبنت خالتي ماشاء الله وافقت تبغى تتفتح معه اقول صاحيه انتي والا مهبوله ؟؟؟ هيفاء: انتي وش عليك برئي نفسك وبس.. جمانه: انتي على بالك بيصدق هالحكي هذااصلاً مطلعينه من السبعينات متحجر يعني لو اقوله هالحكي مافيه امل يستوعب وزياده ممكن يقول لعيال خالتي لا شيلي الفكرة هذي وقفلي الموضوع لاني حامت كبدي. هيفاء: فيه موضوع حلو ممكن؟؟ غموض |
(الفصل الخامس)
هيفاء: فيه موضوع حلو ممكن؟؟ جمانه: هاتي؟! هيفاء: بكره ميلاد مساعد اخوك. جمانه: وانتي من متى تهتمين بمساعد ؟ وبعدين وش عرفك ؟ هيفاء: المتخلفه اختي نهى مصحيتني من النوم عشان تقول نروح لكم عشان تحتفل معه . جمانه: يلعن ام البزران اذا كبروا اقول هيفاء لازم تخلون اختك تتغطى عن اخوي تراها اول ثانوي ماهي صغيرة !. هيفاء: اياني اسمع هالحكي على لسانك تسمعك امي وتغطيني بعد عن عيال عمي . جمانه: تبين الصراحه بنت خالتي مش ولابد في التربيه.. هيه انتي في الجامعة يعني خلاص ؟! هيفاء: شفتي هذي ميزه القصر يخلي الوحده صغيره مهما كبرت, ولا فيه اخوان يتحكمون وبعدين انتي وش حارق رزك ؟ جمانه: يعني بتجون بكره ؟؟ هيفاء انا ضايق خلقي ابي احد اسولف معاه.. ليش ماتجين عندي بكره؟ هيفاء: اسمعي انا في بالي خطه بس ماراح انفذها الا اذا كان اخوك فيصل مو فيه هو وابوك وش رايك؟ جمانه: ماشي العصر مافيه احد اكيد ابوي بيسافر وفيصل مستحيل يجلس العصر في البيت بكره جمعه .. هيفاء: خلاص اتفقنا جمانه: على ايش اتفقتي انتي ووجهك ؟ هيفاء: بكره العصر تعرفين جمانه: سوي اللي تبغين يالله هيوفه راسي مصدع ودي أنام قبل الفجر شوي.. هيفاء : يالله مع السلامة .. ------------------------------------------------------------ يوم الجمعه . الساعه 11:00 جمانه في سريرها حست بأحد واقف فوق راسها فتحت عيونها . شافت وليد جمانه: هلا وش فيك؟ وليد: ولاشئ ماشفتك قبل أنام قلت أشوفك قبل أروح للصلاة. جمانه: احبك وليدوه . إسمع انتبه لنفسك وارجع البيت بسرعه تسمع وليد: أي آوامر ثانيه ؟ على فكره فليبينو قالت لي وش تبون للغداء وقلت لها بخاري . ماشي.! جمانه: ماشي بس أول ماترجعون من الصلاة صحني خلاص وليد: خلاص وباس على راسها وطلع . ...................................... الساعه 11:30 في بيت وداد ام هيفاء نهى : يعني خلاص نرووح !. هيفاء: بس بعد العصر لأني قلت لأمي جمانه عندها صديقاتها وبنروح لها .. نهى: واااااو ميمي كل سنه وأنت بخير هيفاء : اللهم لك الحمد تقول قطوه ميمي أقول مسطره بلاستيك وغاليه عليه نهى: أقول احسن من المسطول اللي مادرا عنك اللي بيفتح بيت المقدس . تدرين اذا جاء ميلاده خلي هديته مجسم بيت المقدس والا علم وصوره شارون والثاني خويه ونحرقهم يمكن يستوعب أو يحس بالمشاعر اللي مالها داعي. هيفاء: احد طلب رايك في الموضوع الحين .. ممكن تقلبين وجهك .لا أهون عن الروحه - في هاللحظه دخلت امهم ام هيفاء: ها صحيتوا؟ نهى: من زمان ام هيفاء: ترى عمك خالد بيجي بعد الصلاه هو وعياله هيفاء : اهم شئ عياله ترى اثنين لك الحمد نهى: فيهم الخير وهي تطق رجل هيفاء [خالد هذا عم البنات له ولدين زياد عمره 23 سنه اخذ الثنويه والحقها بدورات حاسب متابع جيد للأخبار مايفوت أخبار الجزيرة كنه واحد ينتظر الحلقه الاخيره عليه أفكار غريبه محب للقراءه جاد أكثر من الازم بعده جوري 17 سنه ] ...................... بعد الغدا في بيت ابو فيصل عند غرفة ابو فيصل(علي) جمانه وفيصل.. طق الباب فيصل وأستأذن ودخلوا ابو فيصل جالس على السرير ممدد رجوله ويشرب شاهي ابو فيصل : هلا ابوي ادخلوا جمانه: لاتكون يابوي مشغول؟ ابو فيصل: عندك شئ انتي واخوك . جايين بهدوء وفي غرفتي . ماابي مقدمات اذا كان موضوعك الاول من الحين (لا) جمانه تطالع فيصل شافت وجهه تغيير (ياخوي حاسه فيك. دكتور بهيبتك ارواح عالم بين يديك وناس يتمنون رضاك لكن مكسور.. ابسط حق من حقوقك مرفوض..ومن اللي رافضه ابوك ) فيصل: لا يبه الموضوع متعلق بفهد..! علي: خير فهد فيه شئ محتاج شئ؟؟. جمانه: لا يا ابوي مافيه الا سلامتك بس بالنسبه لسكنه معنا بالبيت !. علي: ليه هو مايبي؟ جمانه: يالغالي مو هو بس انا واخواني بعد مانبي انت عارف يابوي بنت الناس ماهي ملزمه تجلس في بيتها متغطيه اربع وعشرين ساعه . علي: اقول ابوي انا يوم قلت له يسكن معنا عشان البيت كبير وبدال الغرفتين بعطيه جناح كامل مستقل بس على الاقل صوت اخوكم في البيت , وبعدين اخوكم ماله الا سنتين متوظف على الاقل لين يكون نفسه , ولو راح هو بيروح فيصل ومساعد ووليد بعد عمر. فيصل: مااختلفنا يابوي بس الوقت الراهن انا موجود ومساعد رجال ووليد كم سنه ويكبر يعني احس إنا بنحرج البنت . تبغاها طول الوقت بجلالها . ابو فيصل: وهذي رغبت فهد والا رغبتكم؟ جمانه: وش تفرق؟ ابو فيصل: تفرق اذا كان هو ليه ماقال لا يوم قلت له جمانه قامت ومسكت راس ابوها وحبته على راسه بقووه علي: اقول وصلتي للمخ .. وش عندك؟ جمانه: ابوي انت عارف فهد مستحيل يرفض لك طلب وبصراحه حسيت انه ماهو حريص لأنو بصراحه مو حلوه حرمته ياتجلس بروحها يا معنا على السفره متغطيه ومستحيل فهد يبي ياكل هو وياها لوحدهم وأخوانه تحت. علي: رسالتك وصلت . أنا موافق. والسكن علي بعد.. فيصل: ابوي بعد اذنك اذا مافيه احراج بس انت غرقت فهد المهر والشبكه والزواج كلها عليك . بس سكنه خله لي . ابغى اعطيه هديه زواجه فله من الفلل اللي عندي واذا ماعجبته اعطيه قيمتها ويتصرف .. وش رأيك؟؟ علي: بس فللك استثمار والا فيه وحده قريبه؟ جمانه: انحلت ندور وحده في الحي حقنا ونشتريها . علي: ماشي انا موافق.. وربي يشهد مو تفريط في ولدي الا لمصلحته وعشان هالعيون اللي قدامي . قامت جمانه وباست ابوها على راسه جمانه: مشكور يا أغلى وأحلى وأروع أب في الدنيا^-^ ابو فيصل: بس بس كافي لواته الا كان فيه موضوع ثاني,, فيصل: يعطيك العافيه ابوي ماتقصر . يالله أنا ماشي تأمرون شئ .. جوجو بغيتي شئ ؟ جمانه+علي: مع السلامه علي: اقول ابوي ماحاكيتي أخوك مالينتي راسه ؟ جمانه: المسأله مسأله وقت وهو مب صغير عشان اقنعه غصب ياابوي فيصل موب وليد والا مساعد عظامتهم طريه . فيصل انكسر فيه عظم يبيله وقت عشان يتجبر . علي: بصراحه بغيت افاتحه في الموضوع اكثر من مره بس اتذكر كلامك واتردد مدري ليه؟ جمانه: لا تدري الحديد الى الحين حامي يعني ممكن نفقد فيصل على الاقل مادامه تقبل الرفض وماقاوم وطلع عن شورك... هذي ردة فعل حلوه لكن لو تجبره على الزواج وهو موراضي خوفي تمسك معه طول العمر ومايتزوج خله الى ما يطلب هو بنفسه .بعدين انا قلت لك شخصيا متكفله فيه . علي: بس يابنيتي أخوك فوق الثلاثين .!. جمانه: قول ان شاء الله كلها سنه سنتين ويجيك يقول ( يا ابتي العزيز انكحني ) هههههه بس انت طول بالك.. ....................................... في بيت ابو هيفاء .. ابو هيفاء: حيا الله أخوي وشلونكم وش احوالكم ؟ خالد: بخير ونعمه طيبين ابو هيفاء: والعيال خالد: ماعليهم ابشرك زياد تم تعيينه في القطاع الصحي ابو هيفاء: ماشاءالله.. الله يوفقه مع اني وانا عمك اشوف دراسته في الجامعه اولى .. خالد: أقنعه عنيد وراسه يابس .. زياد: يا ابوي الغالي ويا عمي العزيز انا رغبتي ليست متوجهه للدراسه . الشهاده اللي تقولون عنها ديكور لا اكثر ولا اقل . ثلاث ارباع خريجي الجامعات عقولهم فاضيه الله واكبر ياهالمناهج كلها كذب في كذب . ابو هيفاء: وانت درستها عشان تحكم عليها ؟؟ تقول المواد العلميه ماعليه خلها على جنب طيب عندك اللغه الدين التاريخ؟ زياد: عمي وقف عند التاريخ سؤال واحد ؟من واحنا برابع ابتدائي واحنا ندري معركه عين جالوت وأبطالها قطز والظاهر بيبرس فهاالوقت دخلوا البنات يسلمون على عمهم هيفاء يقال بدايه البلوغ لافه طرحه على راسها ونهى داخله ببرموده جينز ومنى وبنت خالد الجوري. هيفاء: حياالله عمر تو مانور البيت .. سلموا على عمهم وجلسوا {اللي يطالع هيفاء من اول وهله يحس انها صغيرة .. قصيره وناعمه.. بشرتها خمريه كنها بشره طفل شعرها ناعم قاصته بوي] سألها ابوها : وش فيك لا بسه طرحه وين على الله؟ انحرجت وماردت مبـــــــــــــــاشــــــــــره ردت ام لسانين .. نهى: امي قالت لها خلاص كبرتي لازم تتغطين عن زياد . زيادمات من الضحك : وش دعوى خالتي حفظتها خلاص .. والله مافيه أمل هيوف تكبر .. هيفاء: الله واكبر يالرجال ترى اذكر قريب يوم امك تعلمك الحمام .. زياد: عمي ماتحس انها تغلط ؟..! هيفاء: اصلن انا ابغى اتغطى عنك عشان افتك بس بالتدريج عشان ماتنصدم .. خالد: اقول ما تلاحظون انكم مصختوها ..! في اللحظه هذي قطت منى منى: انا سمعت بيبرس وقطز قبل شوي . تذكرون التاريخ ؟؟ ابوهيفاء: ايه ترى ماكملتلي وجهة نظرك .؟ زياد: عمي ماهي وجهة نظر انا اقول درسناهم على انهم شخصيات عظيمه ابطال وشئ وبعدين نقراء عنهم في مراجع ثانيه ولا يمثلونهم في مسلسلات على ان هذا قتل الثاني .. وين التاريخ اللي تقول؟؟ منى ونهى وجوري طلعوا .. خالد: اقول اخوي النقاش معه عقيم لا تتعب نفسك .. هيفاء: عمي ترى زياد صادق لو وقفت على كل الاحداث التاريخيه حروب ومجازرومعادات وغيرها في المناهج شئ وفي الكتب الخارجيه شئ وعند بعض المؤرخين وعلماء التاريخ شئ ثاني. ابو هيفاء: على عيني ماقلنا شئ بس مو معقول تعم النظريه هذي على كل العلوم . زياد: مافيه فرق هذا التاريخ شاهد والمجال العلمي شاهد الهندسه والحساب لما تجي تدرسها يدرسونك اياها بنظريات غربيه وهي بالاصل عربيه .. خالد: قل لا اله إلا الله وفضها سيره زياد التفت على هيقاء: كيفها الدراسه؟ هيفاء: دزني وادزك زياد: اقول لايسمعونك العمام بيقولون تأثيري عليك . على العموم انتي حابه الحاسب وراح ينفعك في حياتك العاديه بغض النظر عن العامه.. ماقلت لك ...عن... اقول ورا مانطلع برا شوي ..! هيفاء.k زياد: يالله عمي استأذن ابو هيفاء: وراك عجل تغد زياد: خيرك دايم بس الوالده عند جداني ودي اجيبها تأمر على شئ ابوي.؟ خالد: سلامتك ولاتجينا سرعه .. زياد وهو يمشي: تعاملني كني ابو 17 عندك . خالد: انشاء الله ابو 80 ابخاف عليك كم ولد عندي !. ابو هيفاء : الله يخليه لك انشاء الله هو واخته وتشوف ذريته . خالد: امين بس لو يغسل مخه من هالخرابيط .! طلعت هيفاء ورا زياد في الحوش لف شوي للحديقه مشت وراه عارف انها وراه . لف بسرعه وتقدم كأنه بيطق فيها ورجع بسرعه ( حركه حرق اعصاب) هيفاء: يمه وش فيك؟ زياد: اجل تبين تتغطين عني اجل . مسويه فيها امك توها تنتبه ؟ هيفاء: تنتبه لايش؟ زياد: انك كبرتي ..؟ هيفاء: كبيرة غصب اللي جابوك المهم وش تبي تقول زياد: ايه ذكرتيني هو موضووع حلوو مرره هيفاء: خير انشاء الله زياد: هو خير مادام امك ناويه تغطيك عني فأنا مضطر اخذ قرار واغير وجهة نظرهم فيني هيفاء: انت وش تقول؟؟ زياد: اقول ان اهلي واهلك يشوفون انك منتي صغيرة وانا صح كبرت بس يلعبون على انفسهم ويحسون انك انتي مثل اختي.. تدور بيننا نقاشات حاده نختلف في وجهات النظر بس تظلين أنتي الوحيدة فهالدنيا فاهمتني !!.!! هيفاء: بعد انت يازياد تظل ولد عمي .. زياد: وبناء على ماتم ذكره وفي ظل الاوضاع السياسيه ومعتقلات غوانتانامو قررت التالي ابشيل فكره تغطيك عني من راس امك نهائيا هيفاء: صاحي انت والا ...... زياد : هيه ماعلموك في المدرسه اذا تكلم الرجال ماتقاطعينه. هيفاء: آمر .. بس قالوا اذا تكلم اللي اكبر منك مو بس الرجال .. زياد: هذا اولا , ثانياً انتي الحين في الجامعه يعني كلها ثلاث سنوات وتخلصين , ثالثاً انا صدر تعيني في الشؤون الطبيه . هيفاء: والله.. الله يبشرك بالخير الف الف مبروووك ليش ماعلمتني من بدري .. هيفاء تتكلم على نياتها وبعفويه .. زياد يطالعها: اقول هيفاء من قلبك فرحانه عشاني؟؟ هيفاء تطالعه طاحت عينها بعينه اول مره تشوف زياد بهالصوره .. صحيح هي تحبه وممكن تفكر فيه بس كله أحلام بنات يعني ماعندها شئ اصلا تبني عليه تشوف انه ولد عمها دايم عندهم بالساعات يجلسون يتناقشون قضايا الامه والمشاكل .. عقلياتهم متقاربه بس فكرها عمره ماراح بعيد .. زياد: هيفاء لهالدرجه سؤالي صعب؟؟ هيفاء: لامو صعب بس غريب كيف ماافرح عادي انت من زمان تدور وظيفه وكم دوره اخذتها يعني .. مهتمين لك .. زياد: واذا قلت لك ان الوظيفه هذي برا الرياض .! هيفاء: وشلون يعني برا الرياض ؟؟ زياد: أول شئ باخذ دوره والدوره هذي فجده من 3شهور بعدين ينزل تعييني في الشؤون الطبيه التابع للرياض هيفاء:............. زياد: وش فيك ؟ هيفاء: ولاشئ الله يوفقك ويردك سالم لهلك.. زياد: بس اهلي ؟ هيفاء وهي تضحك وترتجف ماصارت اليوم مرتاحه لزياد زياد مو طبيعي اليوم هيفاء:على حسب ان كان عندك احد غالي ماندري عنه ؟؟ زياد: هيفاء بلا عباطه انتي فاهمه قصدي انا ولد عمك صح بس مابي افرض نفسي عليك بالغصب .. انا شاريك بالعربي يعني مثل الروايات المترجمه - هــــــل تقبلــــــــيــن الــــــزواااج بي.. غموض |
(الفصل السادس)
- هــــــل تقبلــــــــيــن الــــــزواااج بي. هيفاء لا يستهبل يستخف دمه بس قاعد يطالعها بجد لا والله جد لسانها من الخوف تعلق ماصار ينزل ماردت زياد: براحتك فكري ماابغى الجواب الحين هيفاء: انت صادق والا تستهبل ؟؟؟! زياد ابتسم : هيفاء شايفتني كل يوم خاطب وحده.. كل مافي الموضوع ..ماكنت ابي أباغتك وانا ماعندي وظيفه ولا بعد كونت نفسي وممكن اظلمك معاي .. بس يوم قالت لي امي عن اللي خاطبك ورديتوه بغيت اموت خفت المره الثانيه ماتردون ..هيفاء انا ابغى القرار منك انتي... ماابي احد من الكبار يضغط عليك القرار قرارك هيفاء: بس لازم اهلي يعرفون؟!. زياد: إن شاء الله بيعرفون اذا عطيتيني الضوء الاخضر بعد ماتاخذين راحتك في التفكير وبعدين قدامك وقت الى ماتخلص الدوره حقتي .. بس ممكن تعطيني امل هيفاء: كيف؟ زياد: يعني انا اللي اعلمك كيف؟ هيفاء.kبفكر زياد: يلوموني فيها . على العموم انا رايح اجيب الوالده لا يطلعون الحين وتصير كارثه تسونامي .. يالله مع السلامه هيفاء : مع السلامه يوم وصل آخر الحوش عند باب الشارع التفت شافها واقفه وسرحانه صرخ بأعلى صوته: فكرررررررري لا تنسيييييييييييين ضحكت ودخلت . ................................ في بيت ابو فيصل.. نزلت جمانه تحت .. شافت وليد ومساعد عند التلفزيوون جمانه: وليد . وليد: سمي . جمانه: سم الله عدوك . مساعد: انا صح؟ جمانه: وعدوين اللي جنبك اصبر علي ماكملت .. فهد وينه؟ مساعد: مر عليه نسيبه يقول مشوار.! جمانه بخاطرها.. مشوار الظهر! معقووله ماجد يسويها مااتوقع ان شاء الله نسى السالفه ..يارب.. خذت التلفون ودقت على فهد فهد كان مع ماجد ماشين على طريق الخرج يبون محل تصليح سيارات راكان اخوه هناك يبي يطلعها . رن تلفون فهد : عن اذنك ماجد ماجد كأن احد عطاه كف على وجهه ماهو ناسي السالفه ليش ذكرها؟ فهد: هلا . مين جوجو جمانه: هلا بك وبس يالنذل خليتنا ولا كن الموضوع يهمك . فهد: ليش اهتم مادام انتي ماسكه الموضوع ماعمر موضوع خاب بيدك . جمانه: لا إله الا الله . فهد : لا تقفلين محتاجلك . ها جوجو بشري؟؟ جمانه: كله تمام واافق فهد: أتحدى بكل سهوله جمانه: لا أول شئ يأخذ ويعطي ثم حكى فيصل مع إنه بغى يقلبها على فيصل . فهد: ليه؟ جمانه: يحسب إنا جايين عشان موضوعه . فهد: وصار شئ لا تقولين عصب عليه؟ جمانه: لا اصلن تداركنا الموضوع . وعلى فكره لا تشيل هم السكن الفله من فيصل هديه زواج واعتبرها مأثثه مني .. فهد: جمانه لايكون قايله لفيصل شئ جمانه: لا والله انا نفسي انصدمت يوم قالها . يا شيخ فيصل الله معطيه لا صرف ولاعيال خايف على ايش؟ فهد: الله يعطيك العافيه وأردها لك انشاء الله ياأعظم إخت جمانهk اتركك مع خويك الحين فهد..ok.. مع السلامه ................. فهد : واااااااااااهـ هم وانزاح .. ماجد: خير فهد: خير بوجهك . ياشيخ تذكر موضووع ابوي والسكن ...الخ . ماجد: ايه كلمته , أنا اعرف انك ما تبي ترتاح , وأخوانك ماراح يأخذون راحتهم بس هذي رغبة ابوك . وقلت لك ترى نوره أختي موافقه على السكن يعني لاتشيل هم . فهد: اقول خلاص . أنا يوم قلت لجمانه الموضوع قالت لي أكلم ابوي واشرح له وجهة نظري بس استصعبتها بعد ماقلت لابوي إنشاء الله ارجع في كلمتي .. قالت خلاص انا بكلمه بصفتي انا وأخواني مانبي تسكن انت معنا .. ماجد: وكلمته؟؟ فهد: الله الله أختي أخت رجال . اقسم بالله البنت هذي لو تقولها أي شئ عشان أخوانك وأبوك سويه سوته لو تخسر عادي . وآخر شئ تفكر فيه نفسها. ماجد في نفسه بخاطره اسمع عنك وأصدق أشوف افعالك وأتعجب .إنتي وش من البنات؟؟ حتى الدفاع عن نفسها مادافعت ما بررت . شكل البنت واثقه , ياخوفي أنا اللي غلطان في الرقم . عاد وشلون ابرقعها؟؟ ــــــــــــــــــــــــــــــــــــــــــــــ في بيت الخاله العنود .. قبل آذان العصر بــ 10 دقائق . يرن التلفون .. ردت بدور : هلا نهى : هلا بأحلى خاله في الدنيا بأحلى مدرسة كيمياء درستني بحياتي وممكن ترسبني . بدور: قاصره. مالي خلقكك نهى : عندك أحد معه سياره . بدور: ايه السواق . نهى: لا قصدي واحد من خوالي محمد أي شئ بدور: ليه؟ نهى : خاله تكفين قولي تم . بدور: بدينا في اللي ما ينفع , هاه تم . نهى : اليوم ميلاد صديق عزيز علي من ايام الطفوله كنا بالروضه سواء وبالاجازات سوا وطلعات البر سوا ولعب الكوره سوا بدور: تتكلمين عربي والا افتح وجهك ! نهى : خلاص اسمعي مساعد ولد خالي المسطره مثل ماتسمونه بدور: هو صديقك ومن متى التطور تعرفين ميلاده ؟؟ نهى: ماهو تطور ولا حب على قوله اختي الخبله هذا اسمه انسجام اخوي غير مباشر صح ماهو اخوي من امي وابوي بمعنى والله العظيم قصدي شريف . بدور: والمطلوب؟ نهى: المطلوب أيتها الخاله انك تروحين معنا لبيت خالي ترا مافيه أحد الا مساعد ووليد خالي والعيال الكبار مب فيه بدور: وبعدين ؟ نهى: قلتي بعدين انا ابغاك تمرين انتي وتأخذينا عشاان امي مستحيل تخلينا نروح بدون مناسبه ونمر نأخذ حلويات .. عشان ناخذ الطلب .. بدور: انتي لاعبتها صح . ترته وحركات ماتبين شموع وبالونات؟؟ نهى: والله اذا كانت اشكالهم غريبه o.k لان اللي عندي تقليديات بدور : عمى إنشاء الله على هالبنت المشكله اني مااقدر ارد لك طلب .. نهى: يعني موافقه ؟؟ بدور: واذا ماوافقت نهى : بكل حزن .. العوض على الله اتصل بالمحل واقولهم وصلوا الطلب للمنزل المذكور ومايصير فيه إحتفال بدور: وش احتفاله اخت جمانه عندها خبر؟ نهى: ايه من زمان بدور: خلاص اجهزوا انتم على مااغير ملابسي وعلى مااظن ان محمد فيه ولد عبدالمحسن نهى: أن كان بعد فيه خليه يجي ترى الحفله فله !. بدور: اقول انقلعي لا اقول لأمك الحين . نهى: خلاص استاذه بدور احبها ياناس هالخاله . مع السلامة قفلت بدور ومباشره دقت على جمانه وقالت لها عن نهى وماتت جمانه من الضحك جمانه: من جدك اللي تقولينه .؟ بدور: والله هالخبله مدري وش بتسوي! جمانه: ياشيخه انشاء الله تجيب ديجيه خليها تعيش مراهقتها ليه نحرمها ؟ بدور: أهم شئ مراهقتها . اكيد انتم فاضين مو مرتبطين جمانه: عيب عليك . حتى لو مرتبطين البيت بيتكم , بس فيه نقطه مهمه اغفلتها الاخت نهى ممكن مساعد يطلع برا البيت . بدور: يعني يسويها ؟؟ جمانه: لا اليوم جمعه مااعتقد بس احتياطي أباأحاول امسكه بدور k يالله مع السلامة ........................................... في بيت الخاله العنود ... - بدور تلبس عبايتها : يالله محمد.. سعد .. تأخرنا كانت واقفه عند الدرج كان عبدالملك نازل , بصوته الجهوري عبدالملك : خير اللهم اجعله خير . وين على الله؟ بدور: ماشيه لبيت خالي وخرطت له سالفه نهى عبدالملك: طيب عيال خالي في البيت؟ بدور: لا مافيه الا مساعد ووليد عبدالملك: طيب خلاص انا بمر على بنات وداد وأنتي روحي مع العيال . بدور: ليه؟ عبدالملك: ليه بعد تبين تروحين بمحمد بكم مشوار ترى توه صغير . امشوا يالله بيت خالي مافيه خطر.. بدور: ملوك أخوي ترى وداد ماتدري عن شئ انت عارف الانغلاق اللي ماله داعي حقها .. عبدالملك: خوفها على بناتها انغلاق!!. بدور: انت عارف إن البنات يروحون مع السواق كل صبح للمدرسه . واذا كان مشوار ثاني لا , قلي وش الفرق ؟ .. اذا بيروحون بيت خالي و بدور معهم عادي واذا خلاص مارحت يعني لا . انا ابي افهم يعني وش الفرق ؟؟؟ عبدالملك: شئ طبيعي بناتها حرص لا اكثر كرامه نفسيه يمكن بعدين انت خالتهم وكبيره وتعرفين مصلحتهم.. _ الساعه 4:00 العصر عبد الملك : بسرعه انتم وهالاغراض ليه ماخذين بيتكم كله؟؟! نهى: خالي تصدق لو اني داريه انك بتجي تأخذنا كان ركبت قدام بس قهررررر . هيفاء: من سبق لبق. عبدالملك: با افهم الحين أنتم وش مروحكم .؟ نهى: خالي لف من هنا عشان نمر المحل.. عبدالملك: وانتي مقتنعه من اللي تسوينه انتي ماتدرين ان الاحتفال بأعياد الميلاد من مظاهر الكفار يعني تشبه .. هيفاء: ايها الخال العزيز ترى هذا مو احتفال على قولتك احنا مشتهين نجتمع وذكرنا مولد مساعد بالصدفه يعني مو مكررينه كل سنه عشان تكون عيد الشغله كلها هبال . نهى: عااشت اختي مع ان هالحكي كله حكي جمانه .. عبدالملك: على طاريها هي موافقه . مااعرف ان جمانه خفيفه عقل ..؟! نهى: خالي ترى بديت تذب!! هيفاء: ترى جمانه ماتدري كلنا بنجي وبس.. نهى: ياخالي ماقلت لك وش سوت له هيفاء هديه ؟! عبدالملك: ليه فيه هدايا بعد .. حركاات سعوود .. وصل عند المحل شااف صوره واحد (شنعه)(شيفه) صغير يعني 5-6 سنين ومكتووب "كل العمر قدامك" ضحك على هبال نهى وختار كم قطعه جاتوه وخذ كرت وكتب عليه (الى ابن الخال : مسااعد . كم جاءت الفرصه اليك فوقفت عند الباب فردها بَواب (سوف ولعل وعسى ) فأغتنم ماتبقى من عمرك د. عبدالملك) .................................. .................................... الساعه 5:00 في بيت ابو فيصل .. هيفاء تركض شوي وتطيح رايحه بسرعه للمطبخ تدور جمانه هيفاء: جمانوه حرام عليك وينك من الظهر وانا اتصل ..؟ جمانه: بسم الله عليك! وش صاير؟؟ هيفاء: جوجو انا ماني مستوعبه .كل شئ كل شئ واوهـ زياد ياجمانه زياد جمانه: وش بعد إحلو زياده والا خفف الشنب بدور تقول انهم عندكم الظهر _ في هاللحظه دخلت نهى نهى: هلا جمانه جمانه: هلابك نهى: وش تسوون بالمطبخ؟ هيفاء: نرقص وش شايفه ؟ جمانه: لا بس ابجهز قهوه دخلت منى : ليه وين حبيبة وليد؟ جمانه: بعد انتي يامنى كنا نقول منى عاقله .. انا احب اسوي القهوه بروحي .! نهى: سنعه بنت خالي . جعلها للرجل اللي مدري بس اهم شئ رجال هيفاء: ممكن تاخذين اختك برا ابي جمانه في موضوع .. نهى: لا والله وش الموضوع ؟ هيفاء: اغتنمي الفرصه مساعد مو فيه روحي حطي هديته في الغرفه بسرعه .. طلعوا نهى ومنى جمانه: اقول ترى بدور برا خل نروح هيفاء: لاموفاضيه تكلم خطيبها المزعوم جمانه: تصدقين على كلامها بيتقدم قريب ! هيفاء: هيه انتي دبري حالي مالي دخل في احد زيااد زياااد قااالي هل ترضين بي زووج ؟؟ جمانه: اقول خفه الدم مالاقت عليك وعليه :. خل نروح بس عند بدور. هيفاء: قسم بالله العظيم انه طلب مني !. جمانه: متى؟؟ هيفاء: اليوم وقالت لها السالفه .. جمنه: حركاات ياهو . طيب وش صار . وانتي عاد تبغينه ؟ هيفاء حمرت خدودها : صح زياد ولد عمي يعجبني هو يقولون عله وماله الارأيه بس طيب وحنون و نظراته حلوه..يعجبني جمانه: لا تقوليم لي وسيم اذبحك؟ هيفاء: وسيم غصب عن اللي جابوك جمانه: حشى تراك ذابحتني بصوره . هيفاء: اقول ما ينفع الحكي الحين بالليل اكلمك خالتي بدور تنادي . طلعوا جمانه وهيفاء للصاله عند بدور ... بدور: وينكم؟ هيفاء: نجيب القهوة... هااللحظه انفتح الباب . ودخل مساعد مساعد: واو مين عندنا؟ جمانه: هلا , وين كنت نزلت بعد الصلاة ماشفت احد ؟ وليد وينه ؟ مساعد: بصراحه كنت في المسجد وليد جاء معي والحين هو مع محمد وسعد . الا صديقاتي نهى ومنى وينهم ؟ بدور: اقول سعودي ترى انت بثاني ثنوي تراك رجال..! مساعد:طيب شفتي صوتي تغير طلع لي شنب ؟؟ جمانه: الشنب باين .. بدور : العبره في الطول [مساعد يعتبر ولد مراهق طويل طويل بزياده ونحيف وبشكل مفرط وجهه بشوش لما يضحك ماتشوف عيونه بس ملامحه على بعض حلوه ابيضاني ينقال عنه مملوح عنده عقده من شعره لانه خشن] مساعد: انا طالع فوق ابغير ؟ جمانه: ليه ؟ مساعد : عشان نلعب كوره .. هيفاء طقت كتف جمانه : عطليه. جمانه: لازم الحين خلها بعد المغرب احسن . مساعد وهو يطلع الدرج الوحده ثلاث من طول الرجلين : الحين بعد المغرب وش المشكله؟؟ هيفاء: لا بصراحه عطلتيه .. بدور: الحقوا البنات وينهم . جمانه: اصلن ليه اعطله وش المشكله؟؟ فجأاااااااااااااااااة .. بصوت عالي جاي من فوق يماااااااااااااااااااااااااااااااااااااااااااااااا ااااااااااااااااااااااااااااااااااه وااااو صوت واحد طايح .. ماسكه الكهرباء .. شايف ميت .. بدور : من مساعد ؟؟ جمانه ويدها على قلبها : بسم الله الرحمن الرحيم عليه ركضت بسررعه للدرج .. غموض |
(الجزء السابع)
غرفة مساعد قريبه للدرج . دخلت وراها هيفاء ثم بدور جمانه: مساعد وش فيك ؟ شافت مساعد جالس على طرف السرير وميت من الضحك ومنى واقفه عند باب الحمام والغرفة مليانه بالونات ونهى عند الدولاب وهي فاتحته . نهى: فاتكم نص عمركم .. بدور: وش سويتي انتي واياها.. وراكم تصارخون ؟؟. جمانه: مساعد يكفي ضحك خلاص على آذان المغرب الحين!. نهى: الحين يوم مساعد جاء ليش ماقلتوا لي ؟؟ جمانه: وليه نقولك ؟؟! بدور: هي قالت لي انها تبي تسوي مفاجئه لمساعد في غرفته ؟؟1 نهى: طلعت انا ومنى ok ونفخنا البالونات وإحنا... ثم رجعت نوبة الضحك مره ثانيه وتمسح دموعها.. وإحنا موجودين سمعت صوت مساعد خلاص مافيه نحشه الصوت يقرب على طول منى دخلت الحمام ولا النذله قفلت الباب مباشره وين اروح ؟ دخلت الدولاب . هيفاء: وبعدين؟؟ مساعد: كلي تبن ياحيوانه بغيت اروح فيها تخيلوا داخل غرفة مظلمه بسررعه بسررعه احس ان فيه كور في الأرض بس ماعليه فتحت الدولاب أطالع في عيون بشريه تناظرني فجأه صرخت بوجهي خلاص مت من الرووعه ولا من زين الوجه مدخله وجهها من بين الثياب ماطلعت الا عيونها وخشتها هي والمعلاق اللي فيها.. نهى: احمد ربك هذا جزاتي . مساعد: على ويش؟؟! نهى اشرت على عشان تنزل تجيب التورته . مساعد يطالع وجيههم مستغرب!! مساعد: عسى ماشر مطولين وبعدين وش البالونات هذي ؟؟! هيفاء: شوي وتعرف.. مساعد: اقول ابروح العب كوره يالله بلبس . جمانه-تحاكي هيفاء- : انتم وش ناويين عليه؟؟ نهى حطت يدها على كتف جمانه وهي تهمس في اذنها : يالحبيبه ممكن تسكتين منى راحت تجيب الكيكه. جمانه: لا مصدقين بقوه..! راحت لغرفتها وخذت جوالها اتصلت على وليد وقالت له يطلع هو وسعد ومحمد . وصلوا بعد ما جت منى حطوا الكيكة على الطاوله وقاالوا يالله مسااااعد مــســـاااعـــــد يطــــــااااالـــع الكيكه فيها صوره واحـــد دقق . في هاللحظه فتحت بدور المسجل جايبه معها اغنيه عبدالكريم عبدالقادر .. ..........اهني اليوم بك عشانك من مواليدهــ............. مساعد: واااااااااااو صورتي وانا صغير. نهى: وانت شيفه والله .. مساعد: لا يالحماره من وين جبتيها ؟؟ نهى: سهله من جوال جمانه مساعد يطالع جمانه: انتي داريه؟؟ جمانه/ هزت راسها ..لا.. كلهم باركوا له مع انهم اول مرره يسوونها بس حركه العيال رقصوا بدور رقصت بحسب انها خالة العيال وكبيره . هيفاء: يالله ياحلوين الحين فقرة الهدايا هديتي أنا ابغاك يامساعد تفتحها قدامنا اول بعدين تشوفهاok مساعد: ok طلعت علبه خشب فخمه طويله كأنها علبه قلم بس طويل وعطته مساعد ووجهت فتحت العلبه لهم . هيفاء: يالله واحد اثنين ثلاثه فتح العلبه . طالع الوجيه كلها ميته ضحك بسرعه لف العلبه طالع مساعد: ياحيوانه ياللي ماتستحين بسرعه سحب المسطره (مسطره بلاستيك الطويله) ولحق هيفاء : ماراح اقول ابكسرها عليك لانها ماتنكسر لكن بقول ابعفطها عليك . سعد: اموت واعرف من وين شرتها اصلا انقرضت هالمساطر...!.! منى: لاعند بقاله عماني. بدور: يالله بنات ترى اذن .! وليد: جمانه انا بروح بعد الصلاه مع العيال نبي نلعب كوره موافقه ؟؟ جمانه: موافقه بس بشرط؟! وليد: وشو ؟ جمانه: بكره دراسه . ترجعوا من بدري عشان تسبح وتشوف دروسك .. وليد: موافق. جمانه: وخذ الجوال ولاتنسى .. وانتبه لنفسك خلاص..؟ وليد جاء بسرعه وحضنها وباسها على خدها : خلاص على امرك وطلع . نهى: انا مدري الولد هذا متى بيبطل حركاته هذي ؟؟ بصراحه ما تعجبني متصيغر روحه؟؟!! جمانه: غايره نهى: ووع وش قالولك محرومه من الحنان ؟؟ جمانه: شفتي قلتيها محرومة من الحنان ..! نهى حست انها قالت شئ ماله داعي . جمانه مرره حساسه وخاصه لوليد . نهى: جوجو والله مو قصدي شئ . جمانه: عادي ماقلتي الا الحق يالله بس خل نشيل هالحوسه كل وحده تنزل تاخذ معها شئ والباقي بخلي الشغالات يضفونه أهم شئ الكيك . - مساعد دخل الحمام يغير ملابسه وكلهم نزلوا عشان يصلون . بقى جمانه في الغرفه شافت شئ محطوط ع رف السرير استغربت علبه مربعه لونها بيج مباشره فتحتها . شكلها هديه جوا العلبه العلبه ورد مجفف مغرق دهن عود وفيه علبه نيكل ثقيله مليانه شوكلاتات أشكالها غريبه بعدين علبه صغيره نيكل مبطنه بمخمل بيج فيها سلسله ومعاها تعليقه استغربت التعليقه هذي شفتها من قبل وين ووووويــــــــــــن؟؟ فاللحظه هذي طلع مسااعد . شافها واقفه معها العلبه مساعد: لا تكون هديه منك جمانه: اصلن انا مادريت ولاكان جبت لك . مساعد: ماتقصرين . جمانه: مساعد ترى انا فتحت الهديه وشفت وش فيها والعلبه في يدها والكرت ما قريته . مساعد: من مين . وجهه مخطوف. جمانه: مدري انت اقرا الكرت وشوف عطت جمانه العلبه له وطالعها شــــاف الــــســلســــــــه انـــــــــصــــــــــعــــــــــــــق. جمانه: مساعد انا اليوم فرحانه مدري ليه هو لأنك كملت 18 سنه هو لاني شايفتك مبسووط بس ونزلت دمعه من عينها مساعد ماتخيلت انك في يوم من الايام تبي تخفي عني شئ .. مساعد: جمانه وش فيك اقسم بالله مااخفيت عنك شئ وانتي عارفه ..! وخذت السلسه وسحبتها .. جمانه: وهذ وشي هذ ي ملك نهى ومااعتقد ان فيه احد يعطي ش يخصه لأي احد ..صـح .. مساعد ساكت ومنزل راسه : جمانه والله مابينا شئ وخذي الكرت اقريه جمانه: وليه ماتقراه انت ؟؟ جاء جنبها وفتح الكرت وقرا بصوت عالي ( مساعد كل عام وانت بخير ) التفت جمانه عليه وحضنته . جمانه: مساعد انت كبير خلاص لازم تغطى نهى عندك وهي تضحك . مساعد: ليه جمانه توني صغير..! جمانه: يعني نهى تعنيلك شئ؟؟! مساعد: كلهم بنات بنت خالتي..! جمانه: اقول ليه هيفاء عطتك تعليقتها . مساعد: لا عطتني مسطرتها . ضحكت هي وياه ومشت تبي تنزل التفت عليه جمانه: مساعد !. مساعد: سمي؟؟! جمانه: ترى كل الحوسه هذي والكيكه من نهى لا تنسى تشكرها مساعد: شفوي والا تحريري؟؟ جمانه: اللي يرحك يالله لاتتأخرون بكره دوامات .. ........................................... الساعه 9:10 ماجد: ترة الوالد ملزم وانا بصراحه مالي خلق خلاص انزل وتعشى ..مع السلامه . فهد: بس انت عارف ابوي مهب في البيت يعني الأصول اتعشا مع أخواني . ماجد: يااخي اعتبره بروفه لقبل العرس . فهد: أقول ماجد وش رايك ؟أفاتح ابوك في موضوع العرس . ماجد: أي موضوع؟؟! فهد: يعني الأمور الأساسيه متى الملكه العرس المهر.....الخ ... ماجد : على باله تلقى ابوك مدبر أموره لأن ابوي عقب ماقلتله انك موافق ومرتاح قال على بركة الله ونشوف ابو فيصل. فهد:ok. وطلع جواله وهم نازلين من السياره. دق على جمانه . فهد: الو . جمانه: آهلين . فهد: هلا كيفك؟ جمانه: تمام وين الناس ؟ فهد: يا شيخه تو إحنا راجعين ولزم علينا ابو ماجد العشاء . وبصراحة مضطر أوافق يمكن اللي في بالي مسويه العشاء .. صح.. جمانه: على حسب معلوماتي تعرف تطبخ .. فهد: وش الإزعاج عندك؟ جمانه: عندي البنات بدور وبنات وداد. فهد: حلو عندك أحد.. أنا بس حبيت أخبرك اني ماني متعشي معاكم .. ماشي.. جمانه: ماشي ياحلو . سلم لي على نوره. فهد: مره عاد بشوفها . جمانه: ماشي يالله مع السلامه .. ............................................ نهى : يووهـ نسيت ملوكي معطيني هديه لمساعد .. التلفون يرن : ... مرحبا .. جمانة / اهلين دكتور .. عبد الملك : هلا بك كيف الحفله تمام .. جمانة : تمام تصدق .. جيب سيرة القط يجي ينط عبد الملك : أ فا والله يا بنت الخال ..ليه ..؟ جمانة : نحكي فيك .. عبد الملك : بالزينه ولا .. جمانه : ما عاش من يحكي في ولد خالي أقص لسانه ..قل مره ... عبد الملك : اجل .. جمانة : مافيه شي بس البنات يقولون انك انت الي جبتهم وجبت الكيكة ونهى تقول انك ديمقراطي.. وبدورتقول ليه ما تتزوج .. وبدور تشر على رقبتها تقولها بذبحك خربتي كل شئ .. وهيفاء تقول..تصدق مدري بس تقريبا هذا الموجز. عبد الملك:حشا هذا الموجز اجل التحقيق وشوو؟؟ جمانه:مضروبx6 أقول دكتور دريت عن فهد اخوي.. عبد الملك:ماشاء الله الف مبروك قالت لي امي.. هو موجود في البيت ابغى ابارك له.. جمانه:لا بيتعشى عند انسابه.. عبدالملك:ماشاء الله مالحق..كلها خطبه جمانه:عقبالك عبدالملك:الا انتي ياجمانه كافي امي واخواتي وابوي جمانه:استهبل ياخي.. جعلك ان شاء الله ماتعرس عمرك كله وتكمل وتاخد البروفسور ..قل اّمين.. عبدالملك:اّميـــــــن جمانه:بس تعال لاتقول انك تبي تاخذها في نفس التخصص عبدالملك:وش المشكله جمانه:مافيه مشكله..العلوم السياسيه حلوه بس المجال قدامك اوسع بمعنى الماجستير والدكتوراه كافي في السياسه عبدالملك:يعني حياتي كلها مرتبطه في العلوم هذي ليه ابحر بمجال مو مجالي جمانه:من قال ما عندك الا مجال السياسه عندك التاريخ ..اربط كل مجال بالسياسه والعصور التاريخيه فاتحه ابوابها.. والعصر الحديث اكبر باب... عبدالملك:وجه نظر جيده ورأي شخص اعتز فيه جمانه:لاتعتز بالشخص اعتز بالرأي او وجه النظر.. ليه انت من متى وجه النظر والراي على حسب الاشخاص؟؟ عبدالملك: ماعلينا ..من يوم دقت وداد وقالت شف ان كان البنات خالصين جبهم جمانه:احلى تصريفه في الوجود بس هذا يسمى عجز.. دقيقه عبدالملك.. وسالت البنات اذا حالصين وعطت السماعه بدور.. عشر دقايق وراحوا.. عطت نهى الكرت لجمانه وقالت ترى الكرت والجاتوه من خالي.. جمانه:الله يستر من الاهتمام بالشكليات الاجتماعيه ودعتهم عند الباب اّخر من طلع هيفاء هيفاء:ها جمانه لاتنامين قبل لاتكلميني خلاص يالله باي ثم رجعت مره ثانيه.. هيفاء:اقول جمانه:الله يرجك هاااه.. هيفاء:ماكلم بدر هزت راسها بالنفي هيفاء:ولا ارسل مسجات جمانه:لا هيفاء:حاسه فيك بس يالله لعل الحفله سوت جو.. جمانه:الله يخليكم لي..مع السلامه _________________________________ اتصل فيصل بعد ربع ساعه واعتذر عن العشاء لانه رايح مع واحد من ربعه بمزرعه برى الرياض راحت وخذت كرت عبدالملك وقرته.. جمانه...(وهـ ياعبدالملك كلامك كبير على مساعد) جمانه بالنسبه لها عبدالملك...مرجع تحب تستشيره في كل شي من كانت صغيره وخصوصا بعد وفاه امها راحوا هي ووليد عند خالتها وجلسوا فتره..كان اقرب شخص لها عبدالملك.. كانت ام تسع سنين وهو كان عمره19سنه بس هو يسولف معاها ويلعبون سوى ممكن لانه يرحمها لانها بنت بين عيال وزياده يتم.. عمره ماحسسها بغير انه اخوها وسندها حتى لوهي تضايق تكلمه بدون ماتقوله وش سبب ضيقتها..بس تفضفض.. وهو يفهم لها ولا يطلب منها تقوله وش سبب ضيقتها..اهم شي ترتاح هي.. عدد اخوانها4وهو الخامس.. -تقدر وجه نظره في المراءه وتحترمها راحت للمطبخ وقالت لهم يجهزون العشاء لها ومساعد ووليد... الساعه11:30 مساعد:يالله تصبحون على خير وراي مذاكره جمانه:شف فوق التلفون كرت لك.. مساعد:وش قصه الكروت اليوم وليد:انا ابطلع اتسبح.. جمانه:ذاكرت؟؟ وليد:ايه..كل واجباتي حليتها يوم الاربعاء بس ابراجع طلعوا كلهم فوق..جلست جمانه عند التلفون شوي واتصلت هيفاء هيفاء:هلا جوجو غريبه رديتوا؟؟ جمانه:يمكن عشان الوقت مناسب هيفاء:اتصلت قبل شوي..انتظار جمانه:ياشين اللقافه اكلم ابوي هيفاء:طيب ع طاري ابوك وش اسوي في موضوعي؟؟ جمانه:انا وش مطلوب مني بالضبط؟؟ هيفاء:قولي بس موافقه والا لا؟؟ جمانه:خلاص انا موافقه اتزوجه..هههههههههههاااي هيفاء:من هو؟؟؟؟ جمانه:زيااااااد هيفاء:وجع ان شاء الله والله لو ابقى من الرجال الاهو ماخليتك تاخذينه جمانه:بالعربي ..ريحيني انت تبينه بس مسويه فيها هيفاء:انت تشوفين كذا جمانه:هيفاء بكون معك جاده معك..ترى هذا مو جزمه فستان عشان تاخذين رايي او راي غيري..هذي حياتك انت..وقرري هيفاء:طيب ساعديني وشلون؟؟ جمانه:مو كنتي تقولين لو تقدم لي زياد والله ما ارفضه؟ هيفاء:بس الدعوه هبال جمانه:بس قلتي ايه يعني عقلك الباطن مستجيب بس متردده خايفه من انك تضررين بس تدرين وشلون خلي كل شي رسمي وبعدين استخيري وبصراحه..اهم شي مشاعره هو تجاهك مادام شاريك ع قولته.. ماراح يظلمك..صدقيني ويظل زياد حبوب وطيب وباله وسيع هيفاء:طيب ودراستي؟؟ جمانه:هذي هي المشكله ..اذا خطب بشكل رسمي قولي لابوك انك تبغين تكملين دراستك لاتقولين ثلاث اربع قولي سنه..سنه ونص سنتين..وبعدين ابوك اهم شي عنده الدراسه هيفاء:تصدقين احسن لي واحسن له ع الاقل حتى هو يستقر في وظيفته ويكون نفسه.. جمانه:عاد لازم تتغطين عنه.. هيفاء:اكيد حتى اخواتي بغطيهم بعد طيب شوفي اذا.... جمانه:هيفاء عيوني صكيتي راسي اثقلي هيفاء:طيب اذا سالني الحين..اقول ايه والا لا جمانه:ابذبحك انا الحين..قولي اللي يريحك..وتبين رايي قولي(لااااا) هيفاء:ماعليه مردوده اذا جيتي في يوم تاخذين رايي..تشوفين شغلك.. جمانه:ماقلت لك حدث مهم هيفاء:وشوووووو؟؟ غموض |
يا اخت غموض لا تهملي الهم سوف يكون لك قراء باذن الله المهم ان تثابري وتكملي
جيد ان الجزء طويل |
مشكوره اختي زهره ع التشجيع..
ولكن.. سانتظر..بعد البارت العاشر ان لم يكن هناك قراء.. فلن اكمل.. |
(الفصل الثامن)
جمانه:انت عارفه ان نهى جايبه هديه لمساعد؟ هيفاء:الـــــ.....ه ماقالت لي..وشي؟؟ جمانه:المهم لاتقولين لها شي..خلاص؟ هيفاء:عسى ماشر مااقولها..امي والا ابوي خايفه منها جمانه:انا اللي قلت لك..وانا ماابيها تدري ممكن؟ هيفاء:ممكن..بس وشي الهديه؟؟ جمانه:علبه شكولاته..وتذكرين تعليقتها الذهب الرمادي والاورنج هيفاء:ايه تلبسها هي دايم جمانه:هي هيفاء:وشي اللي هي؟؟ جمانه:هي الهديه هيفاء:عسى ماشر..خير ان شاء الله اخوك مختاج..عشان يبيعها..؟؟ جمانه:ركزي شوي..من اللي يهدي شي يحبه ويستخدمه دايم..؟ هيفاء:اختي الخبله..بس ليه؟ جمانه:ذابحتك الليله..وش هالغباء هيفاء:عرفت مساعد ونهى بينهم شي..صح؟ جمانه:هذا الظاهربس الباطن ماندري هيفاء:وانتي وشلون دريتي؟؟ جمانه:شفت العلبه في غرفه مساعد..وسالته؟ وشكله مادرى اصلاً ..وفتح الكرت قدامي..تبي تقولين وش في الكرت عارفه (كل عام وانت بخير..نهى) هيفاء:عجب..!!بس ماسالتيه وش بينهم؟ جمانه:لا هيفاء:ليه؟ جمانه:انا لو سالته ممكن يقول أي شي اوينكر وانا ماابي احسسه انه مسوي شي غلط ابغى هو من نفسه يقول لي كل شي لانه بصراحه مو من عوايده يخفي شي بس صدقيني كله كم يوم ويجي يقول كل شي اذا حس اني ماني مهتمه.. هيفاء:يجيب الله مطر.. جمانه:اقول ابطلع اشوف اخوانيok..اشوفك بكرى على خير الساعه11:59 عند باب بيت ابو فيصل ماجد:احلى الوعد الخميس..على الملكه..الااقول تبي تجي؟؟ فهد:ماضنيت يمكن ارسل ابوي يكفي...ياثقل دمك... ماجد: ترى بهون فهد: طيب تتوقع يخلي ابوك الملكه في البيت والا الاستراحه؟ ماجد: ع حسب علمي ان الرجال في الاستراحه..والحريم في البيت.. فهد:وانا.؟ ماجد:لا انت في بيت اهلك..اقول اقلب وجهك زين...... -دخل فهد البيت شاف جمانه طالعه الدرج فهد:مساء الورد جمانه:بدري شوف كم الساعه؟؟ فهد:اليوم جمعه..وش صار؟ جمانه:بس بكرى عندك دوام فهد:ليه مانمتي الى الحين؟ جمانه:انتظر حضرتك تشرف..هابشر كيف العشاء؟؟ فهد:تتوقعين هي مسويته.. -صار يمشي هو واياها الى غرفته جمانه:مدري بس اشوف جوالي ثلاث مرات متصله فهد:وليش مارديتي ع مرت اخوك؟ جمانه:وع مالاق..كان الجوال فوق والحين الوقت متاخر..ماعلينا..ابوي يقول انه اتفق مع ابو نوره على كل شي..صدق؟؟ فهد:يااااه وحددنا موعد الملكه؟ جمانه:ليش السرعه؟ فهد:وش سرعته..ترى ملكه عشان ادفع والبنت تتجهز..عاد شوفي كم يبي وقت..وبصراحه جمانه:ايه.. فهديتكلم وهو يفسخ ثوبه يرميه.... فهد:عشان اقدر اكلمها جمانه:ابوك يالولد اخوي صار يعرف..بس تبي رايي فهد:هاه جمانه:طالع نفسك في المرايه فهد:اجننن..وش فيني جمانه:فهد لازم تنحف شوي..اقسم بالله البنت بتستاحش فهد:ليه قالت لك شي جمانه:لابكره ابشوفها اكيد في الكليه (فهد شكلاً سمين بس سمنته كويسه يعني مو ....كرشه...سمنته متوزعه ومشدود شوي وزنه تقريبا90كيلو..بس مملوح ..ووجه طويل سكسوكه وعيونه كبار وسود..شعره حلو واذا حط عليه جل يطلع كيرلي<ياسر القحطاني>) فهد جالس يطالع نفسه بالمرايه متحمس... فهد:اقول جمانه ترى ماقلتي لي تفاصيل اللقاء المثير حق ابوي في ها اللحظه..فيصل واقف عند الباب.. فيصل:مساء الخير.. (قالها وشكله رايح فيها الشماغ ع الكتف والعقال باليد) فهد+جمانه:هلا تو الناس فيصل:وش عندك واقف قدام المرايه..متزاين جسمك؟ فهد:احترم نفسك..وش فيه جسمي طالبيني اعرض ازياء بس رفضت.. فيصل:معلوم اللي طالبك إيفانز وطقته.. جمانه:تعشيت؟ فيصل:الحمد لله..يالله تصبحون على خير جمانه:يالله فهد تصبح على خير -طلعوا جمانه وفيصل من غرفه فهد فيصل:وش الاخبار؟ جمانه:الامن مستتب فيصل:كيف اخواني...ناموا..؟ جمانه:ايه على مااظن..بكرى مدارس..انت متى دوامك فيصل:كالعاده..سبع..سبع ونص ثمان جمانه:عندك عمليات بكرى.. فيصل:لا السبت مافيه بس الاحد عندي ثنتين جمانه:الله يعينك يالله تصبح على خير -دخلت جمانه على وليد جمانه بصوت واطي:وليد..وليد -تاكدت انه نايم غطته وباسته ع راسه وطلعت مرت على غرفة مساعد وشافت النور مشغل طفته وراحت غرفتها بعد يوم كامل من المعاناااه.. وش مسوي يابدر...اضحك مع الناس في النهار.. واصيح على فرقاك في الليل.. طالعت الحوال.. -اّه يابدر كملت 24ساعه ونفذت وعدك.. قلت ان مرت24 ساعه مااتصلت فانا سيطرت على نفسي -من جد يابدر سيطرت..وانا ماراح اضعف -فتحت الرسايل ..ومسحت كل رسايله -تذكرت اول ماتعرفت عليه يرسل في اليوم رسالتين بعد الفجر (صباح الخير)وبعد المغرب (مساء الخير)... واذا جت الساعه 12مااتصلت فيه يزعل..ليه تمرين على اخوانك كلهم قبل لاتنامين وانا لا.. بس اذا تزوجنا تبي تنسين هالسالفه..في هاللحظه دمعت عيونها ]عندما احسب عمري ربما.. اشتاق شيئا من شذاكم... ربما.. (ابكي)..لأني لااراكم. انما في العمر يوم.. هو عندي كل عمري..عندما احسست اني. عشت كل العمر نجماً في سماكم اخبروني بعد هذا.. كيف اعطي القلب يوما لسواكم...... [ --------------------------------------------------- يوم السبت..الساعة 6:00 صباحاً.. في بيت أم هيفاء.. وداد: يا الله المدرسة يا بنات..يا الله دخلت على نهى ثم منى.. ثم هيفاء.. أم هيفاء:هيفاء أمي يا الله.. هيفاء: خير يمه وين نبي نروح؟! أم هيفاء: السوق.. يا الله الدوام.. هيفاء:يا الله قمت قمت.. أم هيفاء:يا الله ترى خالتك بدور بتروح معكم مروها خالك عبد المحسن مو فيه.. نهى: يمه مريولي ماكوي وش رأيك ما روح أغاب؟ أم هيفاء: غابت شمس العدو .. عطيه الخدامة تكويه.. نهى: مسكينة يمكن نايمة.. أم هيفاء نزلت يدها تبي تفصخ الشبشب..ونهى ماتشوف إلا غبارها.. ********************* ..في بيت بو فيصل.. جمانة: يا الله يا مساعد خلصت يد كمل أنت اليد الثانية.. مساعد: واو جمانة الله يخليك أبنام شوي إلى ما تخلصين من اليد الثانية.. قامت جمانة وسحبت المخدة من تحت راسه.. جمانة: أقول ترى دلعتك أكثر من اللازم .. يا الله مساعد: ترى إذا قالوا ليه ما قصصت أظافرك ولا ليه ما حلقت شعرك.. أبقول أختي.. جمانة:ما يخالف إذا كان ذاك المملوح مدرس الرياضيات.. مساعد: وش دراك عنه؟ جمانة:أنت ذاك اليوم موريني اياه في السوبر ماركت نسيت؟ مساعد:أهب عليها ذاكرة!. جمانة: يا الله لا يكثر.. وليد تحت يستناك.. رجعت جمانة لغرفتها تكمل لبسها.. ****************** .. في بيت أبو ماجد.. أم ماجد:خلصتي يا نوره؟ نوره: إن شاء الله.. راحت روان؟ أم ماجد: إيه من ساعة.. والله يا بنيتي لو إنك تروحين معها أحسن من روحتها بروحها.. نوره: يمه وش هالحاله ترى على طول من بيتنا لبيت ساره أختي تضف بنتها معاها يعني ما فيه خلوة.. أم ماجد:الله يهديك ترى راكان تحت يفطر لا تتأخرين.. نزلت نوره بعد ما خلصت.. نوره: صباح الخير.. راكان: هلا هلا صباح النور.. وين الناس؟! نوره:أنت مشكلتك تخلي العالم غلط وأنت الصح..وين الناس إلا أنت وينك تطلع من الصبح وترجع والناس نايمه.. راكان:خلاص هانت كلها شهور وأفتك من هالمشوار.. نوره: وجع إن شاء الله .. مالت عليك.. وطلعوا كلهم بعد الفطور.. ***************** ..في السيارة.. هيفاء جالسة جنب نهى.. هيفاء: وش أخبار أختي ؟ نهى: ما عندي سلف.. هيفاء:والله لو أموت من الجوع وأتشرد ما طلبت منك.. نهى : وغيره..مو من العادة هالتلزق من الصبح.. هيفاء: نهى لا يكثر أمس يوم كنتي فأخر الصالة جاء مساعد وقالك شيء..وش قال؟ نهى:متى؟! هيفاء: بلا حركات دلاخة؟ ترى أنا سامعة.. نهى:طيب مدام سامعة ليش تسألين؟! هيفاء: لا بس ههههه..أطمئن على مستقبل أختي.. نهى:هي هي انتي ..ما تضحك ليه تسألين؟ هيفاء: أحول .. خلاص لا تقولين.. نهى: إلا بقول عناد.. يقول شكراً على الحفلة.. هيفاء: حركة ولد خالي يعرف السنع وش معنا معك أنت وأنا ما شكرني على الهدية؟ في هاللحظة وقفوا عند بيت جدانهم خذوا خالتهم بدور.. هيفاء: هلا صباح الخير خالة.. بدور: هلا صباح النور.. وش أخباركم؟ هيفاء: تمام.. عسى ما شر وين خالي عبد المحسن ؟ بدور:عنده هالأسبوع دورة في جدة.. نهى:أحلى.. وهند زوجته من يوديها؟ بدور: تقول أخوها.. هيفاء: كان جت معنا أنت وياها نفس المدرسة.. بدور: طيب بس العيال.. وبصراحة كيفها لو تبي كان قالت.. وهم عند باب المدرسة.. بعد ما نزلوا ما بقى في السيارة إلا هيفاء رجعت نهى بسرعة وخبطت على شباك هيفاء..فتحت هيفاء بسرعة.. هيفاء:عمى إن شاء الله وش تبين؟ نهى: لا يفوتك الهمر الأسود ركزي في اللي داخله.. وراحت بسرعة ودخلت المدرسة.. هيفاء: الحمد لله والشكر.. بنت الأيه أمداها تشوفه الحمد لله السواق ما يفهم عربي ولا ماجلس في الديرة ولا يوم.. ******************************* الساعة..8:00 .. جوال فيصل يرن للمرة 30.. فيصل:هلا..(وثلاثة أرباع الصوت نوم). فاتن:وينك ثلاثين مره أتصل كل هذا نوم! فيصل:هلا عيوني بصراحة ما حسيت بشيء ليه كم الساعة؟ فاتن:ثمان بسرعة لأن الكشوفات تستناك.. فيصل:ok يا الله عشان ألحق.. فاتن:يا الله مع السلامة.. *********** [ فاتن هذي كانت تدرس مع فيصل كانت قبل دفعته بثلاث سنوات .. بنت هادية ومحترمة بعد تخرجها طبقت عنده . قوت علاقتهم ببعض.. فيصل إنجذب لها لهدؤها وشخصيتها..إشتغلت معه في نفس المستشفى مساعد جراح..شخصيتها قوية كانت تبدي رأيها بصراحة تطرح فكرتها بكل جرأة وما تهتم إن كان اللي قدامها مسؤلها في العمل أو مديرها.. إذا اتخذت قرار ما تتراجع عنه ..لا يمكن يثنيها عن قرارها إلا……….فيصل… قبل أربع سنوات..لما كان أبو 29سنة اتخذ قرار إنه بيتزوج..خلاص ضمن الوظيفة واستقر .. والأهم إنه لقا وحدة فاهمته وفاهمها..لغة التخاطب بينهم وحدة لغة طبية بحته..طريقة التفكير..نمط الحياة.. السلوكيات.. أهدافهم متوافقة..قرر وفاتح خالته (العنود) ورحبت بقوة..وطلب تروح تشوفها هي وجمانة..وفعلا راحوا يشوفونها هذا كله بدون علم أبوه... -خالته مدحت في البنت..وقرر يفاتح أبوه بالموضوع .. بس الحظ ما حالفه ************* جمانة ونورة في كفتيريا الكلية... نوره:بس هذي كل السالفة يعني الخميس الملكة.. جمانة:طيب وأنت ليش متضايقة؟ نورة:حرام عليك أنتي عارفة إني ما جهزت روحي ولا شيء.. جمانة:ترى الملكة عائلية يعني لا تتحمسين كلها دخلت سوق , فستان حلو , وكوفيرة تسويلك ماكياج وتسريحة ومع السلامة.. نوره:وش همك اليد اللي في النار مو مثل اللي في الموية.. جمانة:على طاري الموية ترى فهد احم احم .. قايل اسألي نورة إذا بالك شيء معين شبكة.. نورة استحت.. جمانة:أموت أنا على الحياء.. يا الله بس نوره: على ذوقه..أكيد بصير حلو.. جمانة:لا عز الله مالبستيه .. اسمعي عندي اقتراح وش رايك أنت تختاريتنها وتعطيني خبر.. نوره:لا خير شينة.. جمانة:وش شينة إحمدي ربك ما خذتك أنتي وياه وتختارونها سوى نورة: بصراحة ما بعد قررت وش أشتري.. وسارة أختي مستحيل تطلع أيام الاسبوع وشكلي ما فيه إلا أنا اوهو.. جمانة:أنت حاولي من اليوم إلا يمكن تحتاجين تعديل بنقص شيء.. نورة: طيب جمانة فيها شيء لو رحت أنا وياك للسوق.. جمانة: لا مافيها شيء بس أهلك يمكن يقولون أني أنا من أهل المعرس والمفروض ما اعرف شيء عن العروس..يعني برتوكولات اجتماعية.. هيفاء: هاي.. نورة: هلا حيا الله من جانا .. هيفاء: إن شاء الله معزومين يوم الخميس ترى أنا أختهم من الرضاع.. نورة تطالع جمانة: صدق.. جمانة: ايه صدق راضعة مع مساعد وهي عجوز أم سنة.. نورة: يعني أنت أخت فهد..؟! هيفاء: من دواعي سروري طبعا..ليه ماعجبتك أكون اخت رجلك .. عاد على بالك أبكون مثل جمانة لا انا بوريك نجوم الليل في المغرب..ههههاااااي نورة استأذنت لمحاضرتها..نورة تخصصها حاسب وهيفاء تخصصها أحياء, وجمانة تعليم خاص.. هيفاء:تعالي ما قلت لك سألت نهى الحماره عن مساعد.....0 جمانه:وش أنا قايله لك . هيفاء:هاه ما قلت لها شيء عنك سألتها عن مساعد يوم يحاكيها أمس ..قلت لها وش قالك..؟؟ جمانه:وبعدين.. هيفاء: تقول انه قال:شكرا على الحفله.. جمانه:طيب وش المشكله انا اللي قايلة له.. هيفاء:وش قايله له؟ جمانه:انا قلت له اشكر نهى لان هي اللي مسويه الحفله.. هيفاء:صفقولها ايوا الله علميه على الطبايع الشينه .. جمانه:كم مرة اقول لك لاتتدخلين في تربيتي لاخواني.. هيفاء:يمه خفت.. يالله بس تاخرنا على محاضرتنا.. *************** ((في شركة الاتصالات)) الساعه:12..الظهر.. جوال راكان..يرن..يطالع جوله:هوهو وش تبي هالنشبه هالوقت.. راكان:هلا وغلا....بالغلا كله.. غلا:هلابك....وينك لسا ع الموعد... فاللحظة هذي تذكر انه معطي موعد ولا..ناسي هذا اذا ماكان معطي موعد ثاني .. راكان:لا أفا عليك وأنا اقدر ...بس انك واثقه إن كل شىء تمام...... غلا:ولا يهمك ..... راكان:خلاص على الساعة ..1.. أبكون حول الجامعة ماشي غلا:ok راكان:يا الله غلا مضطر أقفل الحين أنا في الدوام وهو يقفل شاف جواله الثاني يأشر راكان: هلا والله بخوي العزيز وش يبي هالوقت؟! تذكر...اوهو أكيد بيقول لا تنسى الرقم.. بس ما راح أرد..قام بسرعة وراح لواحد من أخوياه راكان: هلا صلوح كيفك..؟؟ صالح:هلا بك..تمام راكان:صالح باختصار أبغاك في خدمة إنسانية.. صالح:خير؟!! راكان:معي رقم أبغى بيانات كاملة عن فاتورته صادر ووارد.. صالح: أف أف..ياحركه أنت.. من متى الولد جاد؟! راكان: يخسون كلهم ما بقى الاهم أكون جاد مع هالأشكال ..ها تقدر؟؟! صالح:راكان تدري صعبة..ولازم أدري لمين..؟ راكان:شوف من الناحية هذي اطمئن الشغلة لحضرة الرائد ماجد..وتسالني ليش؟؟هي فاتورة خويه مو خويه وبس إلا حبيبه.. يبغى يسويله حركة .. أنا ما أدري صراحة وش السبب..اللي أعرفه أنك لو قدر الله صارشي لا أنت في السالفه ولاشي.. أنا من اللحظة هذي اللي سربت البيانات وش رايك؟ صالح: مدري بصراحة.. الشغلة فيها مبادئ؟! راكان: أقول روح وين المبادئ.. تبي تأخذها المبادئ معنا لجدة الأسبوع الجاي؟ صالح:تخسي إلا هي.. أقول كم الرقم بس كم؟؟ راكان:أعتمد!! صالح: أفا عليك..أول ما أخلصها أجيبها وأعطيك خبر.. راكان:ماشي أستأذن الحين .. عندي صيدة.. صالح: يا ابن الذين ولا تقول صديقي معي في القطة أخذه معي.. راكان:إن شاء الله .. بس بعد ما شوف ترى إلا الآن والشغلة ظلام.. غموض |
غموض اكملي الاجزاء
ولا يهمك شي |
(الفصل التاسع)
راكان:إن شاء الله .. بس بعد ما شوف ترى إلا الآن والشغلة ظلام.. صالح: يا الله موفقين.. وإن لقيتوا أحد بالدرب لا مانع تعرضه علي.... [راكان .. 23سنة النقيض لماجد.. شخصية مرحة..حبوب ..خدوم.. كثير النسيان..الخارجي منه عكس الداخلي..راكان يعد منحل سلوكياً.. صاحب علاقات..سفر.. يشرب على الخفيف إذا توفرت له,لكن مو إدمان..صحبته جدا سيئة .. وهي أكبر مؤثر عليه..حبوب كثير مع أهله وأخواته .. نادرا ما كانوا يشكون فيه..كل شغلاته بالدس.. باستثناء ماجد يدري عن أشياء ..لكن على حسب مزاجه يمشيها.. راكان شاب وسيم طويل وجسمه عريض شوي.. يشبه محمود بو شهري.. النقيض منه ماجد.. ماجد شخصيته جادة بقوة مع أهله وأخواته..جدا صارم..يمكن لأنه الكبير ومتحمل المسؤلية .. ما ترتاح لما تشوفه وهذا يمكن لطبيعة عمله..ما يرتاح إلا لربعه المقربين .. يمكن يفك الرسمية معهم..لكن داخله كويس..أخلاقه حلوة الجانب الديني عنده طيب.. أكبر عيب فيه..إذا عصب ما عنده..يمه ارحميني.. ومستحيل يتنازل عن شيء يبغاه.. [طويل وعريض بزيادة..جسمه معضل اكثر من الازم..وزنه 92كيلو.. وجهه طويل وملامحه حادة ..كله على بعضه..تحس فيه رجولة طاغية...] **************** ..في بيت أبو هيفاء.. العصر هيفاء: وجع يكفي سكري..كل هذا حكي!! نهى: يا الله روان بدت العيون تطلع..بس اسمعي لا تنسين بكرى الفطور عليكم.. هيفاء:من متى والأخت تماشي روان؟! نهى:مو خلاص بقينا نسايب؟! هيفاء:نسايب في عينك..أنت وش دخلك..أنا أخت فهد.. أنت وش تبين؟ نهى:أنت أخت فهد وأنا أختك.. محلولة.. هيفاء:وش عندك معها وش قصة المزيون؟(وهي تضحك) نهى:وجع إن شاء الله قاعدة تسمعين.. هيفاء:والله ما دام فيها زيون..ليه لا؟ نهى:هاه تعالي ما شفتيه الصبح؟! هيفاء: منهو؟ نهى:ما قلتلك أبو همر أسود.. هيفاء:ما بقى إلا هي اناظر سيارات الأوادم.. نهى:هذا من يوم الإربعاء واحنا شايفينه وحدة من البنات سقطت عنده.. يوم الأربعاء أصلا يذبح والا اليوم لابس ثوب.. لابس ذيك المرة جينز زيتي فيه دقات بيج..وتيشيرت مشمشي وعليه كتابات بيج وزيتي ..والجزمة أنا أموت وأعرف من وين شراها,ولا وشلون لبسها..لونها مشمشي فاتح وفيها بيج.. هيفاء: تصدقين يمكن حقة أخته!.. نهى:هذي ما فيها كلام..بس و لو يظل مملوح تدرين من يشبه.. هيفاء:يا الله لحقتي تشبهينه وتفصفصين لبسه؟!! نهى:من ناحية الشبه روان تقول أنه يشبه عبد القادر الهدهود بس هو أطول منه.. هيفاء:كل هالهبال وفي النهاية عبد القادر الهدهود ..توقعت تقولين سعد خضر..عبد الرب إدريس.. نهى:الشرهه مو عليك الشرهه على اللي يكلمك.. (نهى وهي تكمل حكيها أكتشفت أن هيفاء ردت على جوالها وعطت أختها ركبة..عادي موقف يتكرر كثير..) هيفاء: فاتك ما شفتي وجه نهى عصبت.. جمانة:أما أنها تعصب.. شوي وترجع.. هيفاء:طايحة لي هي وروان معجبهم واحد عند المدرسة.. يا الله بدينا من الحين ..ولا تقولين وش بينها وبينه.. ماكو شيء .. والله ما فيه أمل.. جمانة: انتبهي لها.. وبعدين وش روان .. لا تقولين اخت اللي ما يتسمى؟؟ هيفاء:أبشرك .. إلا على طاريه ما كلم؟! جمانة: واو.. لا تقولين ويتصل الحين.. وبعدين نهى في ثالث وش دخلها فيها.. هيفاء: ما أدري بس أنت تعرفين نفس المدرسة.. جمانة: تبين الصدق.. دق أخوها اللي نافش ريشه بدري.مسمعني خطبة في الشرف والأخلاق . إح بس.. ............................... فهد وهو نازل من الدرج يشر لجمانه مفولة.. جمانة: هيفاء.. فهد أخوي هنا مضطرة أقفل اسمع صوتك في وقت لاحق.. هيفاء: شكراً على التصريفة.. جمانة:وع.. مسوية زعلة..أزعلي وبعدين ترضين؟ يا الله مع السلامة.. هيفاء: مع السلامة.. ********************* فهد: ها جمانة فاضية؟! جمنة:خير!! فهد:وش رايك نروح للسوق عشان الشبكة؟!! جمانة:أحلى وش ذا الحرص..! فهد: مو مسألة حرص..بس أبوي دق علي وقال رح وخذ خالتك معك.. جمانة:ماشي..بس تبي رايي مو اليوم ..أولاً: ما عطينا خالتي خبر.ثانياً:على الأقل البنت ما بعد قررت وش تلبس عشان ناخذ الشيء اللي يمشي معه.. ثالثاً: والأهم أنا مالي خلق الحين وليد عنده امتحان.. فهد:هو ..أهم شيء..الرابع:..أعرفك أختي إذا ما اشتهيتي شيء طلعتي مليون سبب.. جمانة:بس أسبابي ما هي مقنعة؟! فهد:من ناحية اللبس ما أدري وش دخله في السالفة؟ الدعوة كلها ذهب وألماس ماله علاقة..! جمانة:يا لبي عمرك ما راح تفهم..بس ما عليه أفهمك الحين الذهب ألوان..يعني لو كانت بتلبس نحاسي..أشتريلها أصفر.. فهد:وع الأصفر.. جمانة:أحد طلب رايك.. وبعدين أصفر اللحين مو الأول..وغير كذا إن كان فتحت الصدر كبيرة خذنا طقم كبير وإن كانت صغيرة فهد:مستحيل ناخذ لها طقم صغير.. جمانة:ما قلت صغير.. بقول ناعم.. فهد:أصلاً هي نعومة..يصلح لها واحد ناعم عشان ما يجرحها.. جمانة:وش الناعم اللي ما يجرحها الطقم ولا الرجال؟ فهد:الحمد لله أنا ناعم ولا يمكن أني أجرحها..تصدقين أمس حلمت فيها.. جمانة:والله .. وش قالت لك؟ فهد وهو يضحك:تقول أنحف يا فهد أرجوك.. جمانة:كثرلي منها..بس تصدق شكل عندها قابلية للسمنة.. فهد: ما بقى إلا هي.مستحيل تسمن أبفطرها وأغديها واعشيها أندومي .. ولا تسمن..جمانة ممكن سؤال يعني مجرد سؤال.. نورة شعرها إلى لوين؟ جمانة:يقولون أنك شايفها ومحلم فيها..! فهد:كثريلي من الشوفة ..ماجد أخوها ما ترك لي مجال ثم بصراحة أنا مستحي يالله شفت الطلة بس.. جمانة:على العموم شعرها تقريبا تحت كتوفها بشوي إلى هنا..وأشرتله.. فهد:وبعدين.. جمانة:وش بعدين؟ فهد:ناعم خشن..لا يكون مثل شعر مساعد؟! جمانة:أقول اسكت لا يسمعك..لا شعرها ناعم وسط مو كثير ولا شوي وفاتح شوي..انتبهت لعيونها؟ فهد:يعني مو سود صح! جمانة:إيه بني على عسلي.. فهد:بيضاء صح؟ جمانة:وش فيك شكلك من جد ما شفتها.. فهد:لا بس أبغى أسمع منك.. جمانة:أصلا أنا قلت ولاّ غيري قال نظرتك انت لها شيء ثاني ..ممكن تكون بالنسبة لي عادية..وبالنسبة لك ملكة جمال..وعلى فكرة ترى أقرب وحدة تشبه لها لمياء طارق..رسمت وجهها كذا دائري..عيونها كبار.. فهد:لا والله بعد تشبهين حرمتي هاه .. ترى حرمتي محد يشبّهها باحد.. جمانة:إن شاء الله لا تنفخ ولا دور لك أحد يروح معك السوق.. فهد:إن شاء الله عمتي ..بس عشان الحاجة.. ************************* يوم الاثنين ..بعد صلاة المغرب.. .. في سيارة فهد... جمانة:الو.. هيفاء:هلا ..وينك ساعة عشان الواحد يلقاك؟ جمانة:أعصابك وش صاير؟ هيفاء:قولي وش ما صار..جمانة الحقي علي زياد عندنا في البيت! جمانة:طيب وش المشكلة؟ هيفاء:أقول عندنا ..تقول وش المشكلة؟هيه أكيد بيسألني وش أقول؟ جمانة:قوليله نعم.. هيفاء:وش نعم..وراك تحكين بالقطارة؟ جمانة:أنا في السيارة ..ومعي خالتي وفهد رايحين للسوق تبين شيء على الدرب هيفاء:احلى رايحين تشترون الشبكة والدبل ؟صح! جمانة:صح. هيفاء:والعصر وين كنت؟ جمانة:هي هي كنت مع نورة في السوق..ممكن تفارقين لأنا وصلنا.. هيفاء:ما عليه..بس الأحداث بالتفصيل بعدين..ماشي؟! جمانة:ماشي ..يالله باي... ***************** دخلوا وخالتهم كذا محل أختارت جمانة طقم حلو يمشي مع الفستان اللي شرته نورة للملكة..باقي الدبل ..دخلت هي وفهد.. فهد:يالله يا جمانه تأخرنا شكل خالتي تعبت اختاري أي شيء.. جمانة:فهد هذي دبلتك أنت يعني أنت اللي تختارها؟ فهد:جمانه أنت تعرفين ذوقي يعني البنت ماله داعي يغمى عليها!! جمانة:لو سمحت (تكلم صاحب المحل)ممكن تطلع لنا دبل حلوه رجالي ونسائي فهد:كأني ما مليت عينك؟..قولي لي وأنا أحاكي الرجال.! جمانة:وليه ما مليت عينك ولا تشك فيني؟! فهد:ما عاش من يقوله وأنت أخت فهد.. بس شكليات قدام الرجال.. جمانة:هاهاها ما تضحك ..يالله شف واللي يعجبك فيهم أبعطيك رايي فيه.. طلع أول وحدة كبيرة مرة والشغل فيها كثير وملونه.. جمانة:فهد ترى هذي دبله يعني تلبس دايم فأحسن تكون هاديه.. فهد:قايل لك ما أعرف بس أنتي؟؟ جمانة:حاول مرة ثانيه؟ فهد:هذي هاديه ترى!! جمانة:قله يطلعها.. فهد:أحلى أختي سوت لي حساب.. الدبله مره ناعمة جايه فصوص ألماس لفتين وبينهم فصوص في الوسط لونها بني على عسلي.. طلبوا الكتابة عليها..وقالوا يمرون عليهم بعدين عشان يستلمونهم ************************* في بيت الخالة العنود....الساعة9:00 عبد الملك:حيا الله الوالده من قدها اليوم مع المعرس تختار له مع إن يمه ما ظنيت أنك شفتي إلا إضاءة المحلات.. أم عبد المحسن:وراه شايفني عميه ترى إذا اشتهيت شفت.. بدور:الله يا يمه..لو أني قايله روحي مع السوق كان مارحتي؟! أم عبد المحسن:والله ما أروح لولا غلات عيال أختي وما ودي أكسر باخطره يوم طلبني..والله يعطيني العمر لين أشوف وليد معرس.. عبد الملك:وتشوفين عياله.. أم عبد المحسن:يا وليدي ويشهد علي ربي أني وأنا في السوق وفي المحلات ما بين عيوني إلا أنت..قول آمين ؟!إن الله يلين هالراس غصب عليك واشوف عيالك..قول آمين عبد الملك:اللي كاتبه الله فيه الخير.. أم عبد المحسن:يا وليدي ليتك تريحني.. عبد الملك:يا يمه وش اريحك فيه لهالدرجه وجودي في البيت مضايقك؟! أم عبد المحسن:ما فيه أم في هالدنيا تتضايق من ضناها .. ولا فيه أم تشوف ولدها يشيب قدام عينها وما تهنى بشبابه.. عبد الملك:يمه يعني التهني بالشباب هو الزواج في نظرك؟؟ بدور:أقول عبد الملك تبطي أمي تعرف وجهة نظرك.. أم عبد المحسن:عمى إن شاء الله وش تقول أختك؟؟ تحسبيني خرفت ولا خرفت!! عبد الملك:لا يمه بسم الله عليك ..بس يمه صدقيني هالمره بس .. أم عبد المحسن:كل مره تقول نفس الشيء صدقيني هالمره بس إذا بغيت العرس أنت أول وحدة تدري ..حفظت هالحكي..بس أخاف إذا بغيته تجي تقوله على قبري ..(وكأنها خنقتها العبره).. (ولدها مو صغير تعدا الثلاثين .. وفهد أصغر منه تشوفه يتزوج ..وما فيه أي سبب مقنع يخليه يرفض.. عبد الملك:يمه لا تضيقين صدرك ..اللي كاتبه الله بيصير..على العموم أنا طالع تامرون بشيء أمه + بدور:لا سلامتك.. طلع من البيت وصدره ضايق..آه يا يمه ليتك تدرين وتريحيني..على الأقل يخف هالثقل اللي في صدري كل ما جبتي هالطاري.. ركب سيارته وشغل بدون وجهه.. غموض |
(الفصل العاشر)
عبدالملك قليل ما يفكر في هالموضوع لأنه شايله من راسه من زمان ولا يمكن أحد يناقشه فيه إلا أمه ونهاية المناقشه ,بالنسبة لأمه متعلقه بالأمل, وبالنسبة له شيء مستحيل الحدوث.. جربي يا مشاعري أن تثوري *** ربما اهتز في يديك مصيري ربما نامت الحروف على عينيك *** حتى يصوغها تفكيري جربي يا مشاعري فصراعي *** مع النفس يهفو إلى تدميري ترغب النفس ألف شيء وشيء *** ويصد النفس اللجوج ضميري يتعب العاقل الأريب مع النفس ** إذا صانها عن التزوير (د.العشماوي) قالها عبد الملك وتنهد بقوة..الله يجعل فيه الخير ..الحمد لله.. ****************** يوم الثلاثاء...العصر في بيت الخالة العنود... العنود: حيا الله من جانا ..ترى صار لك أكثر من أسبوع ما جيتي بيتنا.. بدور:اللي يسمعك يمه يقول سنه ترى أسبوع لا وأمس شايفتها.. جمانه: يا شين الغيره؟ إلا أنت وش أخبارك وين غايصه؟!! بدور:في شقا الدنيا.. جمانه: كيف المدرسة والبنات؟ بدور:المدرسة ما فيها خلاف..إلا البلوه بنت أختي نهى أحيانا ودي أتبرى منها.. العنود:الحمد لله والشكر ما ملح المدرسة إلا هي.. جمانه: إلا وداد ما هي جايه؟ بدور:ما أدري بس هند مرت عبد المحسن تبي تجي.. قامت خالتها العنود وطلعت.. بدور: ما قلتلك يا جمانه ..تطورت الأحداث بعدك جمانه:بشري إن شاء الله خير؟؟ بدور:لا خير خالد فاتح أهله بالموضوع.. وتقريبا موافقين.. جمانه:الحمد لله..الله يجعل فيه الخير.. بدور:وريم أخته قالت شوفي الوقت المناسب لهلك عشان أجي أنا وأمي وأخواتي..بس بصراحة ما أدري ؟!! جمانه:وش ما تدرين لا تقولين يوم جاء وقت الجد تهونين!! بدور:مو مسألة أهون بس أخاف أهلي ما يوافقون..أخاف.. جمانه:بدور لا تخلين تجربتك الأولى في الزواج تأثر عليك..ولا تقارنين مهما صار ولا ترى بتتعبين.. بدور:إنت عارفه أنه سبق له الزواج ؟ جمانه:إيه قلتيلي.. وفشل بسبب عدم حبه لها.. بدور:طيب أنتي مقتنعه بها الشيء؟؟ جمانه:بدور أنت بالأول مقتنعه بطريقة إختياره لشريكة حياته ووافقتيه الرأي وصار لك أشهر وأنت تكلمينه..أنت قلتي بنفسك أنك فهمتيه وعرفتي وش يحب وش يكره ,وعرفت طبيعة مزاجه,وعمله..كل هذا مؤشر لبداية حياة قائمة على الفهم ..والأهم من هذا أنه يحترمك.. بدور:بس أخاف يقول بكره..ما حبيتك.. جمانه:الحب مو مهم المهم الاحترام وبعد الاحترام أكيد بيجي الحب .. طيب أنت تحبينه؟؟ بدور:بصراحة ما أدري ..على قولتك احترمه.. أقدر أشياء كثيرة تعجبني فيه على الأقل مو مثل عبد الله.. جمانه:هذا أكبر غلط ..قلتلك لا تقارنين وعبد الله شيء وراح..وأنت اللحين في خالد.. وبيني وبينك خلي الأمور تمشي طبيعي..ومشاعرك تبي تتشكل ,وتشوفين النتيجة.. ..جت هند زوجت عبد المحسن وبنتها شوق ..وجالسين يتقهون وفجأة .......: يالنذلين..جالسين يتقهون ولا قالوا لي ..بس هين طبيت عليكم.. بدور:وجع قولي السلام عليكم.. نهى:وعليكم السلام..ها ها ها..وراحت لجدتها وحبت راسها وسلمت على مرت خالها وتبتسم..**..وتطالعها جمانه وتقول في نفسها وش فيها البنت استخفت.. هند : وين أمك وأخواتك ؟ نهى:ليه مرت خالي ما أكفي؟!! بدور:لا حشى..عن عشر أنتي.. العنود:وين أمك؟ نهى: لا أنا جايه لحالي أمي وأخواتي في السوق.. جمانه:عاد مفوته روحت السوق وجايه هنا!! نهى: بيني وبينك اشتقت لجداني..وعندي بكرى امتحان تي تي اهئ اهو ..ومن اللي بيذاكرولي.. بدور:ياهو..يالله يالله مستحملتك في المدرسه ..قولي بعد ذاكريلي؟؟ نهى: أحول ..ترى حيا الله كيمياء ..ما قلت أشرحي لي التفاعلات النوويه.. الجدة: ما يخالف يا بنتي ذاكري لها وعطيها من الأسئلة شوي مو كلها..<<على نياتها هند: أخاف هذا اللي تبيه؟ نهى: بصراحة أنتم تطعنون في شرفي ترى!! وبعد صلاة المغرب بشوي ..ولبست جمانه عبايتها.. نهى:جو جو.. جمانه:عسى ما شر؟ نهى:ما قلتلك عن أبو همر.. جمانه:يا هو قالتلي عنه هيفاء.. نهى:أكيد معجبه أختي فيه بس حامض على بوزها.. جمانه:هيه أنت من جد مصدقه عمرك .. عن الهبال.. نهى:وش هباله ترى أنا مهبوله شكلا..بس عاد الدعوة طق حنك بس.. جمانه:وش الألفاظ السوقيه هذي عيب أركدي.. نهى:ما قلتلك لا تسمعني خالتي بدور..عندنا زواج بكره في المدرسة.. جمانه:وش زواجه.. نهى:ذكريني أوريك البطاقة وحده من البنات عربجيه تبي تتزوج صديقتها ويسون زفه.. شي كذا يعني.. جمانه:جد!! يعني البنت شاذه؟؟ نهى:هي أنت ترى ما قلت لهيفاء كله عشان تبي تقلب السالفه جد..الدعوة هبال ووسعة صدر.. جمانه:بس ولو..يعني لو تنكشفون في المدرسة وأنتي معهم..راح يقولون عليك أي شيء.. نهى:لا تخافين علي هم من ثالث ثانوي مو معي في الصف..وغير كذا حاسبه حساب خالتي في المدرسه لا توصين حريص.. جمانه:أقول يالله..فيصل يتصل تلقينه عند الباب..وين خالتي؟؟ خاله ..خاله.. العنود: هلا يمه..هو ماشيه ؟؟ جمانه:ما عليش خالتي ..أبوي بيجي اليوم عاد لازم نصير في البيت.. العنود:إيه يمه لازم..بس عاد كان ودنا تعشين معنا.. جمانه: مره ثانيه خالتي.. وطلعت.. وفي الحوش.. عبد الملك:حيا الله بنت الخاله.. جمانه:هلا..الله يحيك وش أخبارك يا دكتور؟ عبد الملك:أتنفس..أكل ..أشرب وأنام جمانه:نعمه..ما يحصلها غيرك.. عبد الملك:الحمد لله..وراك ماشيه بدري!! جمانه:عارف مدارس والوالد ..لا حقين على الجيات.. عبد الملك:الله المستعان..إذن الدرب سالك فيصل في انتظارك..لأنه رفض الدخول..يبدو مستعجلاً.. جمانه:وش فيك قلبت ترى بالبيت حنا مو بالجامعه..يالله دكتور نشوفك على خير..مع السلامه.. عبد الملك:مع السلامه.. -طلعت جمانه وركبت السياره.. جمانه:حيا الله أخي الفاضل تأخرنا عليك؟ فيصل:إلا توني جاي.. جمانه:كيف يومك؟ فيصل:الحمد لله.. جمانه:شفت عبد الملك؟ فيصل:إيه..سلمت عليه ولزم علي أدخل..بس اعتذرت,,هذي ميزة أحبها في عبد الملك ما ينشب ويلزم..عنده الكلمة ما تكثر كثير.. جمانه: شكله مو على بعضه قابلته تو في الحوش وسلمت عليه.. فيصل: ليه وش فيه؟؟ جمانه:ما فيه شي بس كنه متكدر خلقه!! فيصل:الله أكبر يا عبد الملك اللي 24ساعة يضحك..عادي أحسه طبيعي بس يمكن ضغط عمل ولا شي متعبه.. جمانه:جايز..جاء أبوي؟ فيصل:الظاهر..لأن السواق مو في البيت فيمكن راح يجيبه من المطار.. ولا كان دق علي أبوي.. جمانه:كيف مرضاك؟! فيصل:ما مات أحد إلى الآن..أنا ما قلت لك عن أم فاتن؟ جمانه:خير عسى ما شر؟ فيصل:أمس نعبت فجأة وودوها للمستشفى لحقو عليها ولا ّ كانت بدايات جلطة.. جمانه:أفا.. وكيفها الحين؟؟ فيصل: الحين تحت السيطرة..بس أنت عارفه عندها سكر وضغط وزيادة عندها صمام منسد ومحتاجة جراحة عاجله.. جمانه:وأكيد أنت اللي بتسويها ؟ فيصل:ما أصبت هالمره..هي ما هي عندنا في المستشفى..في مستشفى ثاني.. جمانه:وفاتن ؟؟ فيصل:فاتن عندها..ما خذه إجازة ..معاها مرافق.. جمانه:أكيد تعبانة فيصل:أمها بعد وما لها إلا هي..اخوانها كلهم في جدة وكل واحد لاهي مع حرمته.. جمانه:الله يخليها لها إن شاء الله وتقوم بالسلامة..طيب ليش ما تسوي لها العملية؟ فيصل..طالعها من طرف عينه..:أنا لو أموت ما سوي عمليه لأحد أعرفه..ولا عمليه في القلب بعد..وتخص مين (فاتن) لو صار شي لها أنا ما راح أسامح نفسي.. جمانه:بس هذا قدرها.. فيصل:عارف وأنا ما راح أرده..بس اقدر أرتاح أنه ما أكون أنا سبب ظاهري..يكون أحسن.. جمانه:تتوقع لو أكلمها اسلم عليها عادي!! فيصل:عادي إيه..وبتكسبين فيها أجر.. تخففين عليها شوي أعصابها مره تعبانة.. جمانه:أبشوف.. بعد العشاء الساعة ..10:00 جمانه في غرفت وليد نايمه معه على سريره تسولف معه قبل لا ينام.. جمانه:اليوم خالتي تقو وين وليد ليه ما جاء؟ وليد:يا حبي لها خالتي..قلت لها إني في الحلقة؟ جمانه:إيه هي تدري أصلاً..بس تسأل كيف المدرسة؟ وليد:تمام..بعد بكرى عندنا مجلس أباء.. جمانه:بكره بكره....... وليد:إيه الأربعاء.. جمانه:ومن بيروح معك!! وليد:لازم يعني.. موكل مره جمانه:ليش ما قلت لبوي هالمره أبوي موجود المره اللي فاتت راح فيصل.. وليد:مثل كل مره يقول خل فيصل ولا فهد..أنا أقول ماله داعي.. جمانه:جلست ..ليه مسوي شي تخاف ندري؟ وليد:حتى لو مسوي شي ما راح أخبيه عنك. جمانه:أجل.. وليد:بس ولا شي.. جمانهk..يالله تصبح على خير... وطلعت.. نزلت تحت لقت أبوها عند التلفزيون.. جمانه: يعطيك العافي أبوي.. أبو فيصل:يعافيك ربي..ناموا أخوانك؟ جمانه:إيه ناموا..أقول أبوي.. أبو فيصل:لبيه.. جمانه:وليد بكرى عنده مجلس أباء في المدرسة.. أبو فيصل:طيب أخوانه موجودين.. جمانه:أخوانه يبه قلتها.. أبو فيصل:أنا وأنا أبوك ما أذكر أني رحت يوم لمدرسة واحد من عيالي ..والحمد لله كلهم رجاجيل وشهادات..وش معنا هذا؟ جمانه:يبه وليد غيرهم على الأقل إحنا كلنا عشنا مع أمي فترة..يبه وليد ما يعرف وش معنى الأم.. أبو فيصل:أنتي ما قصرت ..لوك أمه ما سوتي اللي تسوينه.. جمانه:يبه..ترى وليد ما طلب مني أني أقولك هو نفسه يقول مابي أحد يروح معي ..لأنه عارف أن أخواني بيروحون بس بالغصب مو عن رضا..هذا وراه مستشفى ومراجعين ..و ذا عنده عملاء وحاله ..يبه هذا ضناك..إذا رحت تروح برضا خاطرك.. أبو فيصل:مادام ما قال أجل وش له الروحه؟؟ جمانه:يبه روحتك أنت المدرسة..وشوفته لك تحسسه أشياء كثيرة..تخيل أن كل طالب أبوه موجود ..لما يطالع ما راح يشوف أبوه..يبه ترى وليد طفل إلى الآن..فما أبيك تقتل طفولته..وتخليه يتم الأب وأبوه موجود.. ثم قامت جمانه على جيت فهد..فهد حس الجو متكهرب وابوه معقد حواجبه وجمانه محمره من التعصيب.. فهد:هلا مساء الخير.. أبو فيصل:مساء النور هلا أبوي..تعال..فاضي بكره الصبح؟ جمانه ما سكة نفسها كل هالوقت ..على بالها إن النقاش معه يجيب نتيجه..بس شكله ما فيه أمل.. تأففت جمانه.. جمانه:خلاص ماله داعي أحد يروح..أصلا هو غني عنكم ..صارت تتكلم وترفع صوتها من القهر.. جمانه:أحب أقول شي واحد يبه..فهد مو محروم من حنان الأب وعطف الأم بس..أنت اللي محروم من الأبوه..طلعت فوق معصبه.. ****************************************** عندما تطالب بحقك..تجد الشجاعة لأنه حقك,, وعندما تطالب لحق غيرك..تخونك الشجاعه,, وليد..أحبك.. -بعد ربع ساعة باب غرفتها ينطق..ما ردت.. فهد:جمانه أنا فهد ممكن أدخل؟ وراحت جمانه وفتحت الباب.. فهد:جمانه أنا فهد ممكن أدخل؟؟ راحت جمانه وفتحت له الباب.. فهد:ساعة الواحد عند الباب وش دعوى..جمانة....وأنت أخت فهد تصيحين؟********!***! جمانه:ليه شايفني أصيح؟؟ فهد:لا بس عيونك حمر.. .. جمانه أبي أفهم وش صاير؟ جمانه:كان سألت أبوك!! فهد:مدام فيها أبوك.. ليه؟؟ الوالد توه جاي ما لحق يسوي شي.. جمانه:فهد..أنا مالي خلق أتكلم مع أحد في أي موضوع راسي مصدع ووراي دوام ..ممكن!! فهد:جمانه صدق ..وش صاير أبوي طلع ولا عبرني حتى!! جمانه:فهد...صدقني بكره أقولك .. فهد: ليه موالحين؟؟ جمانه:لأني معصبه وما أبغى أغلط على أبوي..وما فيه أي حل ممكن أنت تقدمه..فممكن تخليني بروحي؟؟ فهد:عارف إنها إذا عصبت ..خلاص البعد عنها يرحنا ويرحك ..خلاص براحتك..تصبحين على خير... وطلع.. ************************** يوم الأربعاء..الساعة8:15 في غرفة فيصل.. جمانه:يالله فيصل ترى إتأخرت.. فيصل:ها..شوي بس شوي.. جمانه:استح على وجهك هذا وأنت نايم بدري ..قوم يالله شف جوالك يرن.. فيصل:إن كانت فاتن ردي عليها أبا أقوم يالله.. غموض |
تقفل القصهـ لتوقف الكاتبهـ لمدهـ تزيد عن 3 اشهر
واتمنى العودهـ لها بسلامهـ ^_^ |
| الساعة الآن 05:41 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية