منتديات ليلاس - ياعزيزي كلنا ثعالب

منقول من أحد المنتديات

(( يا عزيزي كلنا ثعالب )).... بهذه الجملة بدأ حواره معي كنت قد توقفت أمام أحد المقاهي وذلك لشعوري بالنعاس في شارع التحليه الشهير وعندما دخلت المقهى فوجئت بإحد الشباب فيه الكثير من الوسامة تبدو عليه الأناقة المفرطة يعطي رقم هاتفه إلى فتاة بدون أي إعتبار لإحد من الموجودين قائلا لها بصوت عالي.. على الساعه التاسعة والنصف.. فاتجهت نحو طاولته وسألته

ممكن أجلس معاك لو سمحت ؟

فقال .. يا أخي إسمع إذا تبغى تعطي نصايح فالجواب ...لا....وإذا تبغى تسولف وتتعرف حياك الله

ضحكت من إجابته التي تدل على الملل الشديد ولكن قلت مافي نصايح ولكن مجرد هروج وعلوم ومنكم نستفيد

فقال إتفضل
قلت هو فقط سؤال بسيط ليه يعني ترقيم وشغل و حركات... فين الإنترنت والبلوتوث يعني مانت ماشي على الموضه
فقال يا عزيزي... كلنا ثعالب... و كل ثعلب له طريقه وله هدف
فقلت أنا لي هدف ولكني لست ثعلب فأنا أصل لهدفي مباشرة
فقال لابد أن تقوم بإي حركه أو مناورة حتى تصل لهدفك

فقلت طيب يا ثعلب ما تخاف إن هذه البنت المسكينه تكتشف إنك ثعلب وساعتها. تعطيك على رأسك

فقال ما يهم...ألقى غيرها الفاضيات كثير وغير كده .مستحيل تكشفني (( لاحظوا الغرور في صوته))

فقلت وليه يا أخي مستحيل تكشفك إذا دخلت قصة حب حتقول تعال أخطبني قولي إيش ردك ساعتها ؟

فضحك ضحكة عاليه وقال باين عليك غشيم طبعا لازم قصة حب هل تتوقع أقول ..ألو... لو سمحتي ممكن أتسلى بشرفك شويه

رفع ضغطي ولكن مسكت أعصابي وقلت ما رديت علي يا فتك إيش عذرك لو قالت تعال أخطبني

ضحك مرة أخرى وقال .. أول عذر يا طويل العمر وأشهرهم عذر أكمل

فقلت تكمل إيه

فقال أكمل أي حاجه ... أكمل المدرسة ..أكمل الجامعه .أكمل المعهد .لسه ما توظفت ..أكمل الشقه المهر المهم أكمل أي حاجه ناقصه

فقلت إفرض يا ذكي.. قالت تعال أخطبني وكمل على مهلك كيف تصرفها.. قول

فقال ما قلت لك إنك غشيم ..أهلي...أهلي

فقلت سلامة أهلك

فقال ..لا.. أهلي غير موافقين لين أكمل

فقلت والله عذر .لكن إفرض قالت لك أهلك وليش أهلك إنت طفل إما إنت رجال ولا ما إنت رجال تعال أخطبني لو رجال ..قوللي لو إنت حريف كيف تفك من هذه

فقال أولا.. مافي بنت تقول كده.. ولو قالت بسيطه أقولها ..السكر

فقلت كمل كلامك سكر إيش

أقول.. أمي عندها السكر ما أقدر أزعلها أو أبويا عنده القلب والكلام الفاضي كثير..يا عمي إنت ما تشوف تمثليات

فقلت لا والله ما أتابع لكن في أعذار غير عذر أكمل

فقال.. ياعم الأعذاركثير بس أنا أعطيك أشهرها خذ مثلا.. إذا إنت ولد مدلع تقول لازم نتعرف على بعض أكثر مو معقول نتزوج على طول ...لازم نحب بعض

فقلت... الله يخرب بيتك هذا معناه كلام بالتلفون ومقابلات و..و..و

فقال طبعا .طيب أنا معطيها الرقم ليه

طيب غير عذر نعرف بعض فيه غيره

فقال يا أخي أنا قاموس أعذار وحجج عندك مثلا أعذار البدو
فقلت سبحان الله وهو فيه أعذار خاصة بالبدو

فقال طبعا .عمي

فقلت... يا أخي ترى قرفتني كمل كلامك.. مره أكمل وبعدين سكر وشويه أهلي والحين عمي وبعد شويه الخدامه

فقال.. عمي.. يعني أنا خاطبين لي بنت عمي ثم تنهد وقال بصوت رومانسي يحمل الأسى والحزن إنتي عارفه عاداتنا في الزواج يا منال..أعطيني فرصة وأنا حاتصرف

فقلت...لاحول ولا قوة إلا بالله ثم سألته طيب يا أخي ليه تتنقل من وحده لوحده وليه بنت وحده ما تكفي ؟

فقال.. يا أخي خلاص ما يصير لها طعم والجديد دائما له طعمه طيب عمرك شفت وحده تشتري فستان ولو غالي وما تلبس غيره يا أخي دا حتى المريول إلي هو الزي الرسمي حق البنات تلاقي عندها مريول ثاني كيف عاد بنت جديده وكلام جديد ومواعيد جديده

فقلت طيب فين الحب الأول والكلام الكبير إلي يقولوا عليه

فقال وقد غير من جلسته... شوف... اول فتاه لها سحر خاص وأول مكالمه وأول جواب لكن أعطيك مثال شفت الصياد إللي يصيد سمك تلقى أول سمكه صادها فرحان بيها وتلقاه حاطها قدامه طوال الرحله لكن أول ما يوصل هو بنفسه يحطها في النار وهو أول واحد يأكل منها والبنات زي كده الشباب يدوروا الحب ومع أول بنت أو شاب يقولوا هو هذا الحب لين العلاقة تبرد ويدوروا حب ثاني وثالث .وهكذا
فقلت يعني إنت تعترف إن مافي حب بين الشاب والفتاه
فقال.. أيوا يعني حاتسجني.. حتى عندكم في القرآن الله عزوجل يقول (( وجعلنا بينهم مودة ورحمه )) شايف مودة ورحمه مو حب ومقابلات... (( غريبه إن أمثاله يقرأوا القرآن ولاحظوا كلمة عندكم ))

فقلت يا أخي... طيب لما تجرحها أوتفضحها المسكينه إيش ذنبها

(( قال بكل إستهتار ))..يا عمي بكره هي تجرح وتفضح إسألني أنا...يعني فكر فيها.. لو البنت قالت للشاب أبغى أشوفك وأتعرف عليك تتوقع يقولها .. لا::أنا خايف على شرفك وسمعتك وفوق هذا كله تقوللي حب.. يا أخي إصحى ولا حتى في الأفلام...و كمان حتى لو إتزوجها حايجلس طول عمره يشك فيها كل ما رن التلفون كلما إنشغل الخط ..إذا كان أول ما يتعرف عليها لو لقى الخط مشغول يسألها مين شاغله.. كيف لما يتزوجها ؟

فقلت كلام منطقي ومعقول لكن ليه كل الشباب بدون إستثناء يحبوا يتكلموا عن البنات إلي يعرفوهم قدام بعض ..يعني يفضحوا نفسهم ويفضحوا معاهم البنات

فقال هذه مو فضايح.. يعني.. إنت لو إشتريت سياره جديده توريها لإصحابك وإلي يبني عماره يوريها لإصحابه وإلي يفوز بمسابقه يعلق الميداليه فرحان بيها وإلي في سننا ماله غير البنات يعني ولد صياد حق بنات لسانه حلو ووسيم ويطيح الطير زي ما يقولوا

فقلت لكن الواحد يفتخر بشي يملكه كيف تفتخر بإنسانه ما تملكها

فقال ..لا يا حبيبي..أنا أملكها ونص.. يعني أمها وأبوها يقولوا لها لا تكلمي أحد وتكلمني ويقولوا لا تخرجي مع أحد وتخرج معاي وأقدر أكلمها أي وقت وأشوفها أي وقت يبقى أملكها ونص ..يا أخي إذا كان ربنا يقولها لاتختلي بغريب وبتقابلني يعني عصت ربها عشاني كيف تقول ما أملكها ؟

(( رفع ضغطي بقوه لكن كلامه صح )) فقلت طيب إذا كنت تقابلها أي وقت وتشوفها أي وقت ليه تطلبوا صور وبعضكم يسجل عليهم وبعضكم يصور فيديو والعياذ بالله

فقال هذه يا حبيبي ضمان وإثبات محبه يعني لو كانت تحبك حاتعطيك صوره وإذا تحبك أكثر أعطيها تصوير بالباندا والمبتدئين يسجلوا بالتلفون المهم الإقناع

فقلت أي إقناع هذه أعراض وشرف وفضايح كيف تقنعها

فتبسم إبتسامة الثعلب وقال بإسلوب مسرحي رائع لدرجة أنني كدت أن أصدقه .هذه أخرتها إنتي ما تثقي في ولا في حبي هذه آخر مكالمه بيني وبينك صدقيني صورك أخذها علشان أحطها قدام عيني أنام وأملي عيني منها وعمري ما أطالع لوحده ثانيه... ولا خلينا نتصور سوى... يا غبيه مو إحنا حانتزوج حانتزوج وكلام كثير... ألف طريقه وطريقه المهم تعرف كيف تضرب على الجرح زي ما يقولوا

فقلت طيب ليه الصور والكلام الفاضي إذا كنت حاتسيبها تسيبها

فقال أول شي ودك تتأمل في ملامحها بعدين ضمانه علشان ما تلعب بذيلها يكون شي في يدك وصدقني إذا أعطتك صوره يعني ممكن تقابلك يعني ممكن تسوي أي شي تبغاه

فقلت طيب إفرض مثلا ما أعطتك لا صور ولا يحزنون

فقال... أهددها بتسجيل مكالمه أو إني أسيبها

فقلت وحتسيبها ؟

فقال ..طبعا ..لا . أنا صياد والصياد صبور وما يمل

فقلت هنا المشكلة طيب... والفضايح إلي بتصير.. البنات يعني ما يفكروا في الفضايح

فقال عارف إيش المشكله... إن كل واحده تقول مثلا... أنا واثقه من نفسي وحريصه أوسعد غير .أو أصابع يدك ما هي زي بعض .أو أحمد إبن ناس مستحيل يسوي كذا أو ماجد يحبني مره أنا لو غبت عنه يتجنن.. وكل وحده مستحيل تتخيل نفسها بطلة فضيحه مستقبلا وشوف بنفسك الإنترنت مليان فضايح وكلها بدت بقصة حب

فقلت طيب بعد الفضيحه إيش ذنب المسكينه إلي سلمتك قلبها وعرضها

فقال أولا... أنا بالذات مني حق هذه الحركات هذه حال الدنيا وما أحد ضربها على يدها وقال لها كلمي بالتلفون ولا كانت صبرت... لين يجيها نصيبها

سألته قائلا بصراحه لو فيه بنت تورطت بمكالمات وصور كيف ممكن تخرج من دوامة التهديد

فقال مبتسما... شكلك تبغى تعرف سر المهنة ...ولكن أقولك وخليها بيني وبينك علشان الشباب ما يزعلوا ... شوف ياعمي مايرد التهديد إلا التهديد ..يعني حتى الشاب ما يبغى فضايح.. يعني ممكن تقوله أنا أبلغ أبويا عنك وأخليه يبلغ الشرطه وأكل علقه واحده من أبي.. ولا أنذل لك طول عمري أو حتى تبلغ مديرة المدرسة أو الوكيله وصدقني صارت كثير والوكيلة تعرف كيف تكلم أبوه او تكلم مدير المدرسه أوالجامعه أو حتى تكلم الشرطة أو هيئة الأمر بالمعروف بينهم وبشكل رسمي.. بس سري... ومن غير حتى أهلها ما يعرفوا علشان المشاكل والفضايح وأحسن لها المديرة تعرف.. ولا أهلها وجيرانهم وأصحاب الإنترنت كلهم يعرفوا أو حتى تبلغ هيئة الأمر بالمعروف والنهي عن المنكر بنفسها بالتلفون وصدقني الشرطة وهيئة الأمر إسم يخوف اتخن شنب في الشباب

سألته... إنت ما تخاف أنشر هذا الكلام وسوقكم يوقف

فقال ضاحكا... يا عمي والله لو تنشره وتخلي كل بنت تقرأه في طابور الصباح يعني كم وحده حتبطل كلام ميه أو ألف المهم الباقي نصيبنا معشر الثعالب

نظرت إلى ساعتي إنها الثامنه وعشر دقائق ولملمت أغراضي وودعته

فقال على وين رايح.. تو الناس

فقلت خلاص صلاة العشاء

فقال.. لسه.. باقي على الأذآن عشرة دقائق

فقلت.. يا دوب أدور مسجد وألحق الصف الأول

فضحك ضحكة عالية جدا وقال... شوفت أنا قلت لك إنت تنظر في الساعه وتخطط تلحق الصف الأول علشان تصيد الأجر ..ما قلت لك يا عزيزي كلنا ثعالب

ضحكت مجاملة له وانصرفت وكلماته ترن في أذني ثم تسألت إن نشرت هذا الكلام كم فتاة ممكن تبطل مكالمات وكم فتاة تبقى من نصيب الثعالب......ثم تذكرت قوله تعالى (( من يشأ الله يضلله ومن يشأ يجعله على صراط مستقيم ))

.....

تحياتي لكم.....

علما بأنها حصلت...لأحد من الشباب...!