|
تحايلت الجروح اللي تجيني من يدينك / خيب الله جرح ظنونك
. . بسم الله الرحمن الرحيم . . . بعيدًا عن رهبة البدايات .. وعن شعور الكتابة ! ولحظة المشاعر التي غرقتُ فيها حتى اصبحت حروف أمامكم تقرأ بأعينكم مجرد رواية .. الشخصيات ضرب من الخيال .. والقصص بعضها من الواقع وبعضها يلامس خيالي .. ان وقعت في قلبوبكم فـ لله الحمد.. وان لامست احرفي متواضعة ووقعت بين أيديكم فـ لله الشُكر.. اتيتُ برفقة تحايلت الجروح اللي تجيني من يدينك / خيب الله جرح ظنونك : : المقدمة : : تحتضن مخاوفها بداخل صدرها وكأنما احدى شخصيات في رواية مدفونه .. ما شعرت به الأمس كان صحيحًا.. حينما كانت تتصفح قراءة بعض الديوان لاحدى شاعرها المُفضل .. تجلس على طرف سريرها الابيض ذو مفرش بفراشات ورديًا.. ملامحها التي بدأت تتحدث عن مدى كمية الجرح الذي شوه وجهها بدموع قهرت روحها كانت مختلفة عن اخوتها الأربعة ربما لاسمرار بشرتها وطول شعرها الكثيف المجعد .. هي ليست بالجميلة ولا بالعادية هي متفردة كعادة جدتها وضحى مميزة عن أربعتهن.. نعم الحياة تبتسم لها من جديد.. بعد حرب اخضاتها وحدها .. ما زالت صامدة ندوب التي بقيت في روحها هي قوية .. واثبتت لنفسها بأنها قادرة على الصمود وثبات.. الهنوف .. 20 عام : : إن شوق قد طال هذا المرة .. السجن الذي يقع بكبده يأكل الصدأ روحه .. القبضان الحديدية وقبضة قيود فوق يديه.. التي سارت في ثنايا عروقه وبرزت حتى روحه المشوهة.. لا احد يعلم بأن غيابه ما كان الا سوى متهم بتهمة لا تعنيه ولا تمسه بأي صلة.. نعم تخلف عن عهده وعن امنيات التي لامست سحابة المستحيل ! عشرات السنين ضاعت من روحه وألمه عميق .. لا احد يعلم سوى ابن عمه خالد .. ذلك القاضي الذي أراد ان يجتهد ليأخذ براءة بعد ضياع وشتات ! كانت بعد حصيلة دراسة سنوات في القضاء و ذهاب إليه حتى يخرج ليلة مبشرًا بعودته لأرض وطنه ! لكن بقلب خالِ وقاسي .. قلب قد انهزم وجعل اليأس مرمى في طريقه. ! رجل قد هلك مستقبله أمامه لكن باب الماضي أراد أن يأخذه ولو بعد سنين كالعجاف! في عين اهله هو مغترب ومعتزم على اختراع .. كان لابد من اخذ فيه ببراءة الابتكار لكن قيد بقيود ظلام السجن .. القضية كانت اكبر من عمره واكبر من سنينه العشر .. جراح .. 32 عام : : |
رد: تحايلت الجروح اللي تجيني من يدينك / خيب الله جرح ظنونك
الفصل الأول : : " تعال نصوّر الذكرى عشان نعاند النسيان تعال نوقف الماضي بصورة نجتمع فيها " : : - الرياض - 4:00 Pm منزل متعب آل عقاب.. فتحت الباب على مصراعيه تقف فوق رأسها مُرتدية عباءتها .. ⁃ الهنوف بعدك للحين تقرأين.. ⁃ وش بغيتي نجلاء.. ⁃ وش بعد ماسمعتي بأبوي يقول من 3 العصر واحنا بسيارة الجمس .. ⁃ ماودي اروح .. بجلس هنا .. ⁃ تفوتين الجو.. واحنا من شهر نتنظر هالطلعة مع عماني .. يلا تعرفين ابوي مايقوى عليك انتي بذات.. ⁃ نجلاء تكفين انا بكلم ابوي بنفسي … ⁃ لا.. واذا على اللي في بالي بالك ابشرك موب جاي.. ⁃ وش دخلني فيه!!!! ⁃ علينا اخلصي أصايل و وصايف و العنود كلهم بسيارة.. نحتريك طال عمرك .. ⁃ يعني لازم وهي تبعد خصلتها عن عينيها.. لذلك همت نجلاء بمسك باب وتسحب عباءة مُعلقة فوق معدن.. لترميها على وجه اختها ⁃ افففف يعني مافي ديمقراطية بالموضوع لازم اروح .. ⁃ هنوووووف موب وقتك بروح اشوف امي اساعدها بالاغراض ماجيتي عاد تصرفي وقتها مع ابوي … ⁃ ياربي … على ذا حال .. خرجت نجلاء لتساعد والدتها بينما الهنوف رأت فستانها ربيعي بزهور بلون كراميل .. ⁃ والله ماودي بهالطلعة بكبرها .. يلا ياهنوف ماعندك معاذير ماتخرجين مير ياربي لا تخليني اصادفه.. خرجت من غرفتها بعد ان شدت خطواتها نحو مطبخ حتى تجد والدتها ممسكه بسلة القهوة والشاي .. اقتربت منها ⁃ عنك يُمَه.. ⁃ عسى الله يهديك يالهنوف اسري هاتي شنطة ابوك تلاقينه بتجوري.. ⁃ انا يمه افتح التجوري دون اخواتي.. ⁃ ايه يمه عجلي … نظرت لوالدتها بدهشة ⁃ سمي وابشري .. خرجت من مطبخ بإتجاه اليمين مع ممر طويل وضيق حتى تصل لنهاية وتمسك بمقبض الباب .. فتحت حتى تهب ريح من خلف الستائر ملونة بخطوط عريضة رفيعة ⁃ غريبة امي مخليه شباك مفتوح!! وش فيهم اليوم على عجالة عسى الله يكفينا شر هاليوم !! اقتربت من تجوري الذي كان فوق طاولة الخشبية معتق سمت بالرحمن وهي تضغط على احدى الأرقام التي كانت ترى ابيها يحفظها عن ظهر غيب من مميزاتها بأنها تمتلك عقل فطن .. ابتسمت وهي تجد بوابة تجوري قد فتحت .. سحبت حقيبة الجلدية اليدوية صغيرة .. اثناء سحبها لتجد ورقة قد سقطت ! ⁃ غريبة ابوي على حرصه مايترك ورق دون فايل.. وراه ذا شذ عنهم.. لتميل وتسحب ورق وفضول قد تغلب عليها .. فتحت ورق لتجد نفسها تقرأ سطور وصدمة تتسع بعينيها هل هي تتوهم وهي تقرأ اخر احرف من ورق .. جعدت ورق بيدها يُمنه وبهمس - وش ذا ؟ ⁃ يلا يالهنوف عجلي … ⁃ جايه يمه جايه … وش هالمصيبة هذي .. لا والله بقى برأسك يالهنوف بقى ياروحي.. خرجت وتناست التجوري مفتوح ! بعد ان اغلقت والدتها جميع مصابيح البيت خرجت مُدلفة بسيارة لتجلس في اخر مقاعد الخلفية فهي الابنة الخامسة .. ⁃ عسى ما ناقصكم شيء يأبوي.. لترد أصايل باحترام ووقار لوالدها ⁃ فديتك يابوي كل امورنا جاهزة.. ⁃ توكلنا على الله.. بقيت صامتة.. كانت معهم وروحها هائمة غارقة في صدمة حلتها للصمود .. ساعة كاملة استغرق مشوار .. حتى وصلوا لعطلة البر .. الذي كانت مخططة منذ شهر مع اعمامها .. لم تشعر الا بضربة على رأسها، لتتأوه وهي تنظر لعيون نجلاء من فوق نقاب ⁃ خير .. نجلاء بعدين معك… ⁃ الخير بوجهك .. وصلنا منذو مبطي ماغير حضرتك يالبرنسيية مانزلتي .. لا يكون ما انخلقتي لهالمكان شاعري.. ⁃ ياربي منك خلاص بنزل هاللحين .. ترجلت وهي تمسك بعبائتها .. تتأمل الرمل ناعم رفعت عينيها لترى مدى جمال سحاب منظر كان خلابًا يسحر .. ابتسمت ⁃ زين اللي طلعت.. ثم وجدت نفسها تسير بمحذاة اختها نجلاء .. حينما دخلت لخيمة النساء .. وجدت بنات اعمامها وزوجاهتن.. لتسلم عليهم .. ⁃ هلا .. هلا يالهنوف وشلونك ياخالتك.. لتردف بوجه خجول ⁃ بقى خالتي .. انا بخير جعلك بخير .. ⁃ بخير ياخالتك .. تبارك الرحمن كبرتي وحلويتي.. ⁃ تسلمين من ذوقك والله.. سلمت على جدتها ام سعود ⁃ حي حي بنيتي ضي عيوني.. ⁃ هلا بجديدة.. وشلونتس … ⁃ لوني زين .. أنتي يالمزيونه وشلونتس … ابتسمت لها بحُب ⁃ بخير ياروحي .. الله الله وش هالغوايش زينه.. مازانها الا يدينتس.. ⁃ يامحلتس يالهنوف.. ابتعدت لتجلس بجانب اختها أصايل ⁃ أصايل.. تدرين فيني نوم.. تأملت عيون اختها صغرى ولم يخفى عليها حزنها وهروبها ⁃ هنوف حبيبتي .. اتركي كل شيء وراء ظهرك.. الماضي راح بشره وخيره .. ⁃ مافكرت فيه أساسًا.. بعدين ماعليك فيني… انتي خلاص متأكدة موب ناقصك شيء.. ترى مابقى شيء … ⁃ يابعدي يخيتي مووب ناقصني شيء .. بعدين شقة مليانه مدرسات مثلي .. لا تخافين على اخيتك.. ⁃ ماعليك خوف أصايل.. الله يوفقك يا اجمل معلمة.. بنام لي شوي.. واذا بصوتها يعلو الحماس.. ⁃ الهنوف يلا.. يلا بنطعس شوي ونرجع مووب مطولين والله.. ⁃ لا لا دخيلك غلا.. مابي فيني نوم.. ⁃ هاللحين كل هالجو حلو وزين وتنامين قومي بس … ابتسمت أصايل بحنو ⁃ زين تسوين اخرجي الهنوف وغيري جو.. بس لا تبعدون يا غلا .. ⁃ ولا يهمك.. يلا نجلاء وغنى يحترونا.. ⁃ ياربي وش ذا رحلة اللي كلها غصب بغصب.. ⁃ اقول بس لا يكثر يحصلك تنعزمين من بنت شيخ غلا بنت فهد.. ⁃ والله انك مأخذه مقلب بنفسك .. بعدين منهو قال لك احب مغامرات… ⁃ بنت هاللحين وراه تفكير جدتي وضحى … تكفين الهنوف ماصدقت أخوي عبادي كلمته ووافق وعطاني مفتاح سيارته بلاه نكد ذا… نبي نستانس ونوسع صدورنا.. خرجتا من الخيمة باتجاه سيارة صعدت حتى تصبح رابعتهم لتجلس على مقعد الايسر خلف مقعد السائق .. ⁃ هلا والله كملت .. كملت .. ⁃ اففف غلا خلاص قلت لكم موب لازم اروح… غنى تنظر لها بطرف عينها ⁃ اي والله يكون احسن.. ⁃ ياربي غنووو خلاص … حشى طباين موب بنات عم.. ⁃ والله انا كافيه خيري بشري هي اللي جات تداحرني … ⁃ اخلصوا خل نطعس ونفلها.. نجلاء التي كانت تجلس بجانب غلا ⁃ شغلي اغنية راشد تكفين غلاوي … ⁃ ابشري ماطلبتي الا عزك… حركت سيارة غلا.. وظلت الهنوف تستند رأسها مثقلة بأفكار سوداوية على نافذة .. كانت صوت صراخهم وحماسهم يزديهم جنون مع صوت راشد الماجد .. وهي دمعة يتيمة سقطت على وجنتها .. حمدت الله بأن الغطاء يحجب رؤيتها.. ⁃ آه يابوي .. وش اللي سويته؟! ليه تجرحني بذا طريقة ليه يُبَه.. غلا التي حركت سيارة بسرعة متهورة وهي ترى رمال الكثيفة تصبح كموجات متناثرة بالهواء… ضحكات ⁃ والله العظيم حرفية سواقة غلاوي.. ⁃ افا عليك بنت عمي اعجبك… غنى و الهنوف .. ⁃ هذي كله مو معنا ظاهر عقلها بالحبيب الغايب… التفت لها بنظرة حادة ⁃ وش قصدك وش حبيب ماحبيب!!! ⁃ علينا الهنوف !!!! ⁃ عندك حكي قوليه بدون لف ودوران … ⁃ الحبيب اللي يقف لك بكل مرة عند بوابة الجامعة والا الاجازة اثرت عليك ولحقتي تنسين… الهنوف بغضب ⁃ احترمي نفسك… ولا تقلين ادبك علي… ⁃ اف اف .. ياشيخة كل بنات الجامعة يعرفونك فلا تتغابين علي.. قولي انك تحبينه وتكابرين مدري وش شايف فيك!!! ماعليك زود عنا … ⁃ وقفي … وقفلي فمك هالزفت اللي ينقط سم … ⁃ اي انكري … غلا ونجلاء اذا موب مصدقيني شوفوا صور وانتم احكموا …. اتسعت عيونها بصدمة وهي ترى صور كثيرة بين يدين ابنة عمها غنى … صور خادشة ⁃ مستحيل .. هذي مو انا والله العظيم مو انا … وقفي سيارة غلا.. اقولك وقفيها.. نجلاء بصدمة ⁃ غنى مستحيل هذي موب اختي بس ملامح اختي شلون !!!!!!!!!!! ⁃ عشان يوم اقول لكم تصدقوني … والحين لو سمحتي رجعينا للخيمة .. قبل ما نبعد وننسى مكانهم… غلا نظرت لعيون الهنوف عبر المرآة الأمامية العاكسة لنظرة الهنوف ضائعة … ⁃ خلاص بنرجع .. شيلي صور غنى وعطيناها … ⁃ لا.. صور هذي لازم توصل لعمي متعب عشان يعرف حقيقة بنته… مدلعة … نجلاء بحدة ⁃ احترمي نفسك غنى وهاتي صور اختي … هاتيه اقول لك .. ابتسمت غنى بخبث ⁃ تفضلي .. الله يعينك يالهنوف تحملي فعايل يدينك … صرخت بغضب وانهيار ⁃ فكي الباب اقول لك.. صدقوتوها.. حرام عليكم… والله العظيم لا ارمي نفسي.. بحقد - ايه وش عليه تبين تهربين من فضايحك مير لا تلاحقين على نفسك .. الخبر انتشر.. : : نجلاء.. 26 عام أصايل.. 30 عام غلا .. 22 عام غنى 23 عام : : في طرف الآخر بعد ان صادف وصوله لأرض الوطن .. كل ما يراه عينيه قد تغير واختلفت المباني و الطرق مزدهرة بالعمران الابراج شامخة .. استقبله خالد في المطار .. حتى يسكن في احدى شقق المفروشة بعد ان اخبره برحلة البر! باليوم التالي استعاد القيادة بعد ان كان مقيدًا تنهد واخذ بطريقه يتأمل شوراع الرياض مزدحمة تأمل الظرف البيج فوق المقعد جانبي بهم ⁃ الله يستر من تالي هالظرف.. بعدني تو وصلت !! امداهم يرسلون لي .. حينما اقترب من جلسة الخيام.. استعان بالله وفتح ظرف حتى عروقه التي ضربت برأسه تتفجر من الغضب !!! صورة وراء صورة موجعة لابعد عمق بقلبه وكأنما تلقى طعنة بخاصرته! ⁃ هين يالهنوف ! هين يابنت العم.. حاول يبتلع صدمته ! مسك بالصور والقاه بداخل ظرف ثم فتح درج الامامي ليرميه ويخرج من سيارته مغلق سيارته بمفتاح التحكم … حاول ان يبتسم ويمحي ما شاهده منذُ قليل… استقبله اعمامه بعد طول غياب … استقبال والده وابناء اعمامه بحضوره .. فهد بفرحة وعين تدمع - يافرحة ابوك .. حمدلله على سلامتك ياولدي .. اقبل عليه خافض جناحه مقبل يدينه ورأسه بلهفة وشوق - يأبوي والله اشتقت لك.. - يابوي انت.. علامك ياجراح.. وراه ابطيت … - شغل يأبوي تلاهي.. مير حمدلله هذاني عندك .. - حمدلله حمدلله… حضن ابن عمه ورفيقه .. ⁃ ياحي الله ولد العم .. يامرحبا يامرحبا.. ⁃ البقى ياخالد.. البقى يابو سعود.. ⁃ الله يحيك يابن العم نورت المكان وحمدلله على سلامتك.. ⁃ الله يسلمك ويحيك فيصل.. سلمتوا وش هالمكان اللي يفتح النفس… زين الاختيار والله.. ⁃ عاد ذا حركات عمك الناصر .. اقبل جدي محمد يحتريك … والله كل الوطن فرحانه برجعتك - تسلم يافيصل .. ماعليك زود.. اقترب منهم بداخل الخيمة التراثية بفراشها الاحمر ممتد والمصابيح معلقة ، ومكيف صحراوي … ورائحة بُن القهوة على الجمر منتشرة معطيه للمكان زهو هادئ وجميل.. ⁃ الله يعز شانك ياجدي وشلونك.. وشلون مغليك .. ⁃ ههههه بخير ياجعلك الخير كله… ⁃ هاه ياوليدي وش علومك وحمدلله على سلامتك.. عسى رفعت روسنا.. نظر لخالد ابن عمه ⁃ كل اموري طيبه اللهم لك الحمد.. انا بخير ويسلمك يارب .. سلم على كل اعمامه الاربع .. حمد و سعود و الناصر و متعب.. بعد ان ارتشف فنجانين من القهوة العربية.. واذا به مُستأذنًا ليسلم على اخواتهِ ووالدتهِ وجدتهِ. ⁃ درب .. درب … ⁃ يالله حيه.. يالله انك تبقيه.. اقرب يأمك… مابه احد غير حريم اعمامك.. ليدخل ويقبل جبينها ثم ضمها بلهفة ⁃ وشلونك يابعد تاج رأسي.. ⁃ بخير يانظر عيني .. ⁃ وشلونك يابنت العم .. وشلونك يا أصايل.. ابتسمت أصايل وبصوت ثقة واحترام ⁃ بخير عساك بخير.. ⁃ عساه دوم.. وشلونك ياوضحى العين.. ⁃ ماعاد به وضحى العين … ابك ياولد كم لك عني ما تسأل عن جديدتك.. ضحك بمحبة لها وهو يلثم يدها وبحنو ⁃ شغل ياجديده والا مايخالف اظل عندتس لين تملين من وجهي.. ⁃ وهو وجهك ينمل… ⁃ حبيبي يأخوي جراح والله نورتنا … غيبتك هالمرة طالت وبزود.. عشر سنين يأخوي.. جعلني مافقدك.. - الله يسلمك ونور نوركم يابتول.. ابتسم لها ⁃ ابشرك هالمرة بثبت بالرياض مابها رجوع .. والدته ابتسمت بفرحة ⁃ عسى الله يبشرك بالخير … حمدلله حمدلله اللي عيني شافتك قبل الله لا يأخذ امانته.. - بسم الله عليك جعله بعد عمرٍ طويل.. ⁃ لا لا هذي يبي لها احتفال يأخوي.. وينها غلا والله لا تبكي فرح… ثم مسحت دموعها بقفا يديها.. ⁃ ايه بالله.. ان غداك قالها ربي باكر عندي ياوليدي.. عسى تخرجت ورفعت روسنا.. ضحك بغصة ! وبقلب شامخ قد نُحر في آوانه ⁃ يازينتس يمه وضحى مابي كلايف.. انا اخترعت شيء كبير .. مير تعرفون الصبر وش عظيم من اجر.. - ايه ياولدي جزاه عند رب العالمين .. وانت صبرت ونلت مير ياوليدي وراه عيونك تقل مصيوبة حزن.. عرف بأن منظره حتى بعد ان هذب ذقنه وشعره لامع الاسود.. فعينيه بقايا اثار السجن تشهد به الهالات التي اسفل عينيه.. - ماعليه جديده خبرك عتيق .. سهر وتعب ايام بس حمدلله كلها عدت.. - ايه بالله حمدلله.. اللي عودت سالم غانم.. يا أم جراح اقربي قهوة لولدي خل يتقهوى معي.. ابتسمت بفرحة قلب الأم - ابشري عمتي.. سم ياقلب أمك.. ابتسم لهما بحُب.. - كثر الله خيركم.. مير ودي اخرج تحتاجون شيء … - سلامتك .. بينما بتول تتصل على اختها غلا حتى اجابت .. - خير !!!!! - جراح رجع… جراح ياغلا رجع.. لتبكي فرحة و خوفًا على المصيبة التي وقعت ! - صدق ! لا تمزحين معي الا هذا لا تمزحين معي.. - والله العظيم هذا هو جالس مع جدتي وضحى و امي.. - طيب .. بجيك الحين .. ثم اغلقت الخط ! بعد ان خرج منهم … استأذن من عيال عمه بالمشي ⁃ تراني مخاويك يا جراح ⁃ سموحة منك يافيصل ودي اختلي بروحي .. ⁃ على هواك.. ابتعد عن الخيّام.. وصور تداهم عقله بلا رحمة ولا هوادة … اخذ بسلاحه حتى اختلى في مكان خالِ سوى صوت صدى روحه شتات الذي يشعر فيه والجرح عميق منها! ⁃ من متى يالهنوف من متى وانتِ تخدعينا مير وربي مالك غير عقاب تعرفينه حق المعرفة… اتصال وحيد .. ⁃ بنت عمنا مفقوده.. الحق بنا.. خالد.. 35 عام فيصل 25 عام : : ⁃ اوقات العذر يزعل اكثر من الخطأ نفسه. - # انتهــى. ابعاد الجوهر . انتظر تعليقاتكم ♥♥🌚 |
رد: تحايلت الجروح اللي تجيني من يدينك / خيب الله جرح ظنونك
الفصل الثاني : : "ما كنت لك مخطيّ ولا ظالم ولا جارح" : : قبل ذلك بوقت .. ترجلت الهنوف وهي تمشي وتمسك بباب حتى تشد عباءة غنى وبكره - انت قد ذا الحكي والصور الوسخة منك.. ضحكت ببرود - لا تمدين يدك لا اكسرها لك.. انكري انك ماطلعتي معه… بجنون تصرخ بقهر وظلم - كيف تقوين على اتهامك الباطل … هالصور مو صوري يا خسيسة.. موب انا اللي اخون اهلي وقبلها ربي.. نجلاء تمسك باختها الغاضبة - بس الهنوف وش لعب الجهال ذا… وغلا الزمي حدودك … غلا تمسك بغنى - اففف منكم تخربون كل مرة طلعة لا اجتمعتوا… بعدين صدق الهنوف وش هالصور؟!!!!! وش هالكلام اللي تقولينه ..؟غنى ذا يعتير قذف لبنت عمك.. - انا اللي علي قلته واللحين رجعوني للخيمة .. - كلنا بنرجع بس نفهم وشلون وصلت الصور عندك.. - وصلت وانتهى الموضوع.. الخوف موب مني من اللي مقابلينها… ثم تركتهم وهي تعدل عباءتها وطرحتها مرمية لتلبسها وتصعد لسيارة لتجلس في مقعد - يلا… قلنا محنا مطولين والمغرب قريب… - والله ما ارجع معها … خلوني .. نجلاء قلت لك خليني حتى انتي موب واثقة في اختك !. بربكة - الهنوف .. بدمعة تختنق في محاجرها - خلاص اتركوني … والله ما اطلع معها لو رقابي تنقص…. - خلاص تعالي غلا … خل نرجع وعقب ارجعي لها.. زين اذا موب متواصلة معه بعد - حدك لهنا … قليلة ادب . ثم اقتربت منها حتى تضربها وتشد شعرها وبقايا انثى ممتلئة بالقهر والظلم - عسى الله يحرق قلبك مثل ماحرقتي قلبي…. - فكيني يالمريضة … اي من بعد خالتي ام جراح فسخت الخطوبة جراح اكيد شاف عليك شيء يالخاينة… - اسكتي… انطمي …. وش عرفك اساسا… بنت كنت بعمر 10 سنين مخطوبة من هالصغر .. - هههه قلتيها من وانتي صغير مسكين ولد عمي هج منك عشر سنين.. مل منك ومن تحمله المسؤولية.. غلا بقهر - انا ما اسمح لك تتكلمين عن اخوي بهذه طريقة… ولا يحق لك تتكلمين عن الهنوف بذا شكل.. - ليه كلام الحق يوجع صح.. نجلاء بقهر وغضب منهم - بس بس.. فضحتونا … - خليها تنقلع عن وجهي… واتركوني… حينها مشت غلا بسيارتها وتركوا الهنوف التي ظلت تمشي دون اتجاه .. - نجلاء خلاص يابنت ناس اقول لك برجع لها.. - ليتني ماسمعت لك ياغلا.. وقت قرب عالمغرب .. وش اقول لامي وش ابرر لها؟!!! وهل بتقتنع؟! : : - خالد!! - ايه ياجراح بنت عمي الهنوف صغيرة مفقودة … قلبه آلمه ! همس برباطة جأش - شلون ؟! - راحت مع اختك غلا واختي غنى .. وفقدوها.. - خلاص اجل .. لا احد يتحرك من مكانه انا بدورها وان لقيتها عطيتكم خبر … - تم خلنا على تواصل.. - ابشر ولا يهمك.. تأمل المكان الذي شارف على الغروب .. منظر مهيب وساحر للغاية … : : بعد ساعة 6:30 pm في البر ظلت تمشي وحيدة حتى تقف سيارة الونيت بالقرب منها … - اففف ياحلو مشيه صدق… الهنوف بخوف - لو سمحت يأخوي انا ضعت وضيعت مكان اهلي… همام - افا عليك نوصلك وين ما تبغين … وش رأيك يا مجيد.. - هاه.. اي.. - هاه يا عيال جاتكم غنيمة اليوم .. مجيد بخوف من ربه - يا شباب ذي ضايعة … خل نوصلها لأهلها ابرك لنا.. - تبينا نضيع غزال شارد… تعالي يا حلوة… لتصرخ بملء صوتها - ساعدونـي.. ساعدوني.. : : متعب بتوتر - وش اللي خلاها ماترجع معكم … وينها نجلاء وين بنات؟ - عمي صراحة بنتك غلطت …. حتى تقاطعها غلا بنظرة عتب قاسية لغنى - صراحة عمي نسيتها يوم عرفت برجعة اخوي جراح… - الله يهديكن.. ماعاد به جلوس… - ولا يهمك يأخوي كلنا بنسري.. والعيال يكفون و يوفون.. خالد يأبوك خذ بنات عمك متعب وزوجة عمك ووصلهم .. - ابشر على ذا الخشم .. - استهدى بالله يأخوك.. - الوقت تأخر يافهد وبنتي بعدها مابينت… - ان شاء الله ماعليها خوف.. استودعها الله.. : : صرختها كانت اشارة له .. ركض نحو صوت حتى يجدها تبكي بأنين هجمت بين اربعة ذئاب البشرية .. نزعت عن قلوبهم الرحمة ! انصدم من هيئتها مقلقة .. عباءتها ممزقة وشعرها مشعث! كان هذا انعكاس كاشف الذي بيده - من سوى فيك كذا … - يببببببببببه ابوي… ابي ابوي…. - اهِدي… الهنـووووووووف.. وهي بجنون تصرخ بهستريا - ابووووووووووي.. ابي ابوي … اخذ بشماغه يغطي شعرها - الهنوف ناظري فيني منهو اللي سوى فيك كذا انطقي…. - مدري ماعرفهم … لا تخليني جراح.. لا تخليني الله يخليك… بقهر منها يتصاعد بمعدته فارغة تثير الغثيان .. استفرغ - امشي … حسابك بعدين… امشي… اتصل على خالد .. حتى يصل الخبر لوالدها الكل تحرك لتنقلب الاجواء الهادئة الى شيء يكسيه العاصفة .. - ياعمي قل انها طيبه.. - طيّبه ياعمي .. مير ان ذيب هجم عليها وقتلته.. - كفو ياعمك والله انها لك يا جراح منذو مبطي.. - ياعمي… - اقبل بها ياعمك ولا تردني منحرج!!! حك رأسه - ياعمي الله يهديك بعدني ماجهزت نفسي… - كل امورك مجهزه حتى بدون مهر… كافي انك حميتها من الموت.. "ليت نعود أطفالاً لنعتبر ان الميتِ مُسافر" : : # انتهــى تعليقاتكم 🤝🤍🤍🤍 ابعاد الجوهر |
رد: تحايلت الجروح اللي تجيني من يدينك / خيب الله جرح ظنونك
حياك الله اخت ابعاد
ياالله وش هالحظ الشين يالهنوف الله يعينها على الجاي .. انتظر القادم .. |
رد: تحايلت الجروح اللي تجيني من يدينك / خيب الله جرح ظنونك
الفصل الثالث : : "ما معي قلبٍ يسامح .. ولا معك عذر يشّرف" : : بعد أن تقدم أمامها .. كانت تمشي بخطوات خائفة وشهقات تمزق قلبه، لكن يحاول ان يتغلب على حنيّة طبعه ⁃ اششش اسكتي.. هجم عليك ذيب وقتلته.. عزالله ان عرف مثل ماعرفت لا ينجلط ويموت من حينها.. ⁃ والله مالي ذنب… ⁃ اسكتي حسك لا اسمعه ولا يطال عندي … اقسم بالله للحين فيني صبر عليك … وارفضي برري اي عذر واقنعي فيه ابوك … لتصمت حينها وتبكي بأنين مكتوم … حينما وصلوا تلقاها والدها في احضانه لتبكي بصوت عالِ خائف ⁃ بسم الله عليك يأبوي.. بس بس حمدلله اللي الله نجاك من الذيب.. قبل رأسها .. ⁃ تسلم يمينك ياجراح .. عزالله انك قول وفعل.. ودام بنتي طيبه.. ليلة عشاك عندي.. دام المكان به ذيابة.. ⁃ تسلم ياعمي ابد ماسويت الا الواجب.. وكثر الله خيرك مابه داعي تكلف … ⁃ والله انك تقل تم.. ابتسم ⁃ تم على ذا الخشم.. ⁃ مابقى غيري انا وكل اعمامك اصريت عليهم يسرون توصلني بطريقك ياولدي.. ⁃ حياك ياعمي … تفضل .. التفت لبنته وبنبرة حنو ⁃ يلا يأبوي.. خل نسري مع جراح .. سيارتي تعطلت الله يعين ويساعد.. ⁃ ان شاء الله.. صعدت سيارة لتجلس خلف والدها .. لعل تشعر بالأمان مفقود ! كانت الاحاديث طوال الطريق بينه وبين والدِها تحدث عن غربته ! واصدقاء المهنة وكثير من الامور التي لم تشغل لها بالاً . حينما نظرت لانارة الحي ومنزلهم .. سريعًا ترجلت حتى ابيها يخبرها بصنع القهوة والشاي وان تلحقهم بها للمجلس الرجال .. صوت نجلاء ⁃ الهنوف.. لتتجاهلها كليًا وهي تمسك بالدلة وتضع البُن المحموس صباحًا من يدين والدِتها حصة .. ⁃ اكلمك هنوف ردي علي .. وش صار فيك وليه جايه كذا.. تلقيها ظهرها وهي تقترب لتأخذ الصينية وتوزع بعض فنجايل وصحن رطب.. دقائق لتفوح رائحة القهوة العربية عبر المطبخ والصالة لتشاهدها والدتها ⁃ الهنوف يمي.. نظرت لوالدتها بعتب قاسي.. ⁃ علامك يمه.. وراه ابطيتي وليه ماعودتي مع اختك… ⁃ عادي يمه بغيت اشم هواء ربي لوحدي وتهت بالبر.. وحمدلله هذاني قدامك طيبه وبعافية… ⁃ انتي شايفه نفسك بالمنظرة … شعرك منكوش وملابسك متمزقة وش فيك يابنت بطني… ⁃ هجم علي ذيب مير جراح قتله… ⁃ كفو عليه ولد عمي .. والله انه ذيبان.. نظرت بحده لاختها نجلاء التي ابتلعت بعض الكلام.. اخذت بصينية القهوة ثم مشت نحو المجلس.. طرقت الباب.. لتضعها ارضًا وغادرت.. سريعًا لغرفتها دخلت دورة المياه وهي تبكي.. فتحت مياه البانيو على اعلى درجة من البرودة لعل تطفئ من حريق قلبها .. تذكرت ملامسة احدى شباب حتى يصرخ عليهم مجيد بتركها … اخذت بسائل الاستحمام لتمسح بقايا آثارهم بجسدها ، شهقة ثم بُكاء .. حتى سمعت طرق الباب ⁃ حبيبتي الهنوف وش فيك ياعيون اختك.. ⁃ خليني أصايل … اتروش بس .. ⁃ انتظرك .. اخذت روبها وتركت شعرها مفتوح على طول ظهرها .. فتحت الباب حتى تجدها تجلس على طرف سريرها ⁃ أصايل الله يخليك مالي خلق اتكلم.. ⁃ طيب تعالي اجفف شعرك عالأقل واسوي لك جديلة اللي تحبينها.. استسلمت لها بعد ان ارتدت بجامة صوفية باللون الليلك.. اغمضت عينيها وبعض صور التي تتراكم على ذاكرتها مع سطور ورق التي رأتها عند تجوري والدها وخوفها من موقف الذي حصل معها بالبر … تحمد الله بانها اتى في وقت مناسب .. فذاك شاب الغريب بدأ ينصحهم وينبههم حتى غادروا سريعًا..بينما هو عندما وجدها نظراته كانت بمثابة رصاصة اغتيلت تحت يديه .. ⁃ وعسى عيني ماتنام الحين الا والهنوف قريرة العين… عسى ربي يحفظها… ⁃ أصايل .. ⁃ عيونها .. التفت حتى تلتقي بعين أصايل ⁃ وش هالاحمار ؟؟؟؟ الهنوف قولي فضفضي… ⁃ مقدر.. بس مقهوره مغبونه … ⁃ بسم الله عليك من القهر تراك خرعتيني زود… ⁃ مدري وش اقول… بس غنى… غنى تلعب معي لعبة وسخة… مدري وش فيها حاطتني دوبها بدوبي… ⁃ غنى بنت عمي الناصر .. ⁃ ايه .. هي ماغيرها تخيلي جايبه صور لي صور ماهي صوري … ⁃ شلون مافهمت ؟ نجلاء فتحت الباب لتدخل وتمشي لتمد ظرف لاختها كبيرة ⁃ اختك تلعب من ورانا.. ⁃ هييييييه حدك .. ⁃ شوفي يا أصايل هذي هي اخر العنقود تمقلي… شهقت أصايل بفزع ويدين ترجف ! ⁃ شلون كأنها انتي … حتى نفس شامة … ⁃ انتم ليه تكذبوني…. ⁃ اثبتي انك صادقة.. ⁃ والله ماهوب لي صور… انا ويني وين اخرج من محاضراتي للبيت … وش حاجتي العب بالحرام.. انا تربية امي حصة وابوي متعب مستحيل اخون ربي… ⁃ لا حول ولا قوة الا بالله… احرقي صور نجلاء لو احد شافها بالغلط بتكون مصيبة … : : في محل المجوهرات خالد بأمر ونبرة حادة ⁃ اسمعني زين الحين.. معزبك وصل.. مثل ما اتفقنا والحلال رجع لاصحابه.. ⁃ ماشي ياعمنا دا منى عيني المح دكتور البروفيسور جراح.. دا فنان اللي عمل كل تصاميم انا متشوق لمقابلته… ⁃ تسلم ياعصام ترى مثل ما يقولون السوق ربح وخساره انتبه من سرقات… ⁃ ولا يهمك ياعمنا خالد دا تصماميم محفوظة بقلب صندوق محدش يئدر يوصلها … ⁃ تسلم ياعصام تقدر تشوف شغلك بارك الله فيك.. بعد ساعة دخول جراح لمقر عمله .. جميع العمال قاموا بترحيبه .. وبعض باقات الورد لتهنئة.. ابتسم محييهم بمصافحة اليد.. حتى يتجه لمكتبه ⁃ حي الله ولد العم تو مانور المكان.. ⁃ الله يبقيك ياولد العم… كثر الله خيرك ياخالد عزالله انك كفيت ووفيت.. ⁃ ابد محل محلك واحنا واحد.. افضل قرار يوم تركت بيعة لي وهذا ورق عليك توقيعه وترجع الحقوق لاملاكها … ⁃ على شرط النص بالنص ندخل شراكة.. انت اشتغلت 10 سنين … ⁃ طلبك مرفوض ولا تحاول … هذا من ابسط حقوقك ياجراح.. ⁃ ماعندي غير ذا كلام ولا اقبل بغيره… ⁃ الله يهديك بس.. حتى الارباح موب ذاك زود.. ابتسم بأمل ⁃ بيزينها الله.. وذا ورق .. ليمزقه لنصفين ببتسامة ⁃ اكتب عندك .. وعقبها وقع… وبالفعل تم عقد شراكة محل المجواهرت .. بين الاثنان.. اخذ سماعة ⁃ عم اسماعيل قهوة مرة سادة ، وكلم معك عصام.. تسلم .. وش تشرب؟! ⁃ ماء.. اغلق سماعة الهاتف… ثم يدأ يمسك بالورق نظرتها كانت كفيلة بأن تلهمهُ بتصميم نادر الوجود.. ⁃ الله الله بدأت تسترجع قوتك جراح.. ابتسم بهم ⁃ لازم ارجع بقوة للسوق والا اكلوني الهوامير.. ⁃ الله يقويك.. يلا اجل استأذن عندي مشوار وخبرك المحكمة تنتظرني قضايا وش كثرها … ⁃ مرخوص يالغالي.. بعد ان انتهى من التصميم بالرضا .. نزل للمعمل وبدأ بصناعته يدويًا.. : : بعد يومين في منزل آل عقاب اجتمعت النسوة حول سور مع الاجواء باردة .. ⁃ الا عمتي سمعتي بالعلم .. ⁃ عساه خير ⁃ يقولون وحدتن من بنيات صار عليهن حادث وتوفت كل اللي معها .. مابقت غير هي.. ⁃ اي من بنته !!! ⁃ بنت سعاد العليشي… ⁃ لا إله الا الله.. وينها في.. مابقى الا اميمتها وابيها .. ⁃ اي الله عطاك عمرهم… بنيه هاللحين بالمستشفى… ⁃ ذي بنت حارتنا مقطوعتن من شجرة… ازهمي على ولدي فيصل خل يجي ويأخذني بلمها… غلا تهمس لنجلاء.. التي كانت ترتشف من بيالة شاي. ⁃ هذي من صدقها جدتي… وش ذنب فيصل!!! ⁃ يووووه غلا انا ادري قالوا لك داخله راسها واعرف وش تفكر فيه … ⁃ اففف نجلاء صاير دمك ثقيل… بعدين وين الهنوف وراه ماجت… ⁃ عندها بكره كويز … ⁃ الله يوفقها اي بنت عمي دافور مدري طالعتن على من… ⁃ وش قصدك ؟؟؟ ⁃ ابد ولا شيء…. : : في مكتب والدِها تجلس مقابلاً له … ⁃ هاه يأبوي وش ردك؟! ⁃ يُبـه عطني مهلة افكر.. ⁃ وش تفكيره بعد يأبوي ولد عمك غدا بروفسور كبير وفوق هذا عنده محل المجوهرات واحدن مصلي وخايفن ربه … يعني موب اللي تنضامين عنده.. ضحكت بغصة ⁃ على شرط.. ⁃ قولي يأبوي.. ⁃ انا من بنته!!!!!!! : : " نكتم جروح القلب لو كانت جبال ونصبر على الدنيا ونخفي وجعها .." # انتهــى ابعاد الجوهر |
| الساعة الآن 06:16 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية