منتديات ليلاس - الحظوظ العاثرة بقلمي / ضمني بين الاهداب

صباح الخيرات .. وصباح الاقلام العريقة ... ياهلا بضمضم وبقلمها .. مع اني عاتبة على حالي اني ماشفت النور الي طالع من القسم بوجود ذرة بقلمك المميز ..
من زمان عن متابعة الروايات منقطعة بشكل كبير .. لكن شغفي بكتاباتك وحبي لكمية الافكار الي تطرحيها بيخليني اخصص وقت لمتابعة عثراتك وواثقة انها رواية من العيار الثقيل وتحمل الكثير .. عظم الله اجرك غاليتي الله يرحمها ويجعل مثواها الجنة واخر الاحزان يارب

ندخل على الشخصيات والاحداث .. مازلنا بالبداية ولسى ماتعمقنا اكثر بالشخصيات .. للان مااقدر احكم على الشخصيات لاننا ماعرفنا الا اليسير منها لكن بحاول اعلق من خلال البارتين الي نزلتيهم

بندر وعقاب والعنود

ثلاث شخصيات يربطهم دم واحد .. لكن الثلاثة جرحو بعض جرح كبير مااقدر الوم اي احد فيهم .. لان الي صار ماكان محسوب له ولا مخطط له ..

بندر وعقاب القطاعة مستحيل يكون سببها العنود بس .. لان واضح من شخصية عقاب انه موشخص سطحي او ماعنده قدرات يفخر فيها اي اب زوج لبنته .. بس واضح ان من البداية الكل كان نظره على بندر ويقارن بين الاخوان والاهتمام لبندر والتهميش لعقاب .. وواضح ان النفود من الناس الي عرفت عقاب الحقيقي والا المعزة من عقاب ماجات من شئ عابر ..
اعتقد بين الرجاجيل وبالمجالس مايشوفو الا بندر وعقاب كان مهمش .. كثرة المقارنات وعدم الاحتواء وواضح التباعد بين الاخوان مابينهم احتواء هو سبب القطاعة ..

لان لو الحب بينهم عميق مستحيل اي حرمة تفرق بين الاخوان لو الروح معلقة فيها بيكون في تضحية مثل مانشوف بين الاخوان المتقاربين ..

العم ظلم بنته واختار الشخص الي بنظره افضل وسيرته بين الرجاجيل فخر وصيت عالي .. بس لو انه فكر اكثر او عرف عقاب على حقيقته وعنده بعد نظر يمكن اعطاه بدون تردد

العنود ماعرفناها الا من خلال مشهد واحد ولا عرفنا لو هي عايفة عقاب اساسا او عادي تتزوجه لو ابوها اختاره .. على الاقل بتضمن القلب يكون لها عكس بندر الي ماوحدة ملكت قلبه غير النفوذ بس
لكن ماحبيت طلاق بندر وظلمه للعنود لانه كان قادر من الاول يتصرف وينهي الموضوع بدل مايطلق بنت عمه ويشتت بنته بكل برود

اكيد عقاب عرف بالطلاق لانه يتابع كل اخبار اخوه ..لكن الشرخ بينهم كبير وله اسباب اعتقد بتتوضح مع الايام الجاية .. ولابد من ذكريات للماضي بين الاخين تعرفنا اسرار ماعرفناها

غتار
لكل شخصية من اسمها نصيب .. اكثر ولد مقرب لقلب بندر .. واعتقد انه اكثر ولد يعرف اوجاع ابوه لذلك يهمه ان سمعة ابوه مايخالطها اي غبار من اي شخص .. للان شخصيته ماظهر منها الا القشور .. لكن متأكدة انه بيغير الكثير بذكائه وغموضه وقوة شخصيته وبيفاجئ الكثير .. وواضح ان عقاب يحمل له مشاعر خاصة بس للان ماظهر منها اي شئ واضح من اهتمامه بتتبع اخباره بس هو يكابر هالفترة والايام الجاية بيكون فيها الكثير

غيام وورد ووهج

غيام مااعتقد الي بينه وبين وهج حب لانه الحب مايجي من مكالمات بس هو حتى مع العشرة مو بالضرورة يجي لكن انا مع اهله برفض وهج لان البنت الي تختار الطريق الغلط هي الي تجني على حالها وياليت البنات يفهموها .. رب العباد ماحرم شئ الا لحكمة .. هي مستسهلة سالفة المكالمات ورفع الكلفة بينها وبين واجد مابينهم رابط سنين وهي تعصي ربها مافكرت بسمعتها ولا بالعواقب ولا بردة فعل عائلة لها صيتها مثل البندر ؟

وغيام مهما كانت ثقته بس هل هو متأكد انه يحبها مو مجرد تعود ويمكن لانها احتوته او اعطته شئ هو فاقده ببيته ولا ليه شاب بيتجه لهالطريق وهو ببيت فيه الاحترام والاهتمام بالدين والقيم

وعنده ام كتلة حنان لاهي سطحية ولا غرتها المظاهر مثل البعض الي من الطبقات المخملية .. لكن التباعد بين الاخوان واضح ولانه اصغرهم واضح انه ماحد كان فاهمه نفس حالة عمه عقاب .. وحتى تصرفاته يمكن لانه يبي اهتمام ابوه اكثر او انه يثبت شئ لاهله ..

وهج واضح انها مستغلة طيبته وماعندها خجل انها كل شوي مدخلته بمشاكل اخوها .. ياليت مايحكم على ورد الي جاته بالحلال ورضى اهله وواضح من كلام امه انها متربية صح وبيتهم محتويها غير البنت الي الفراغ خلاها تستسهل الحرام وتدور العاطفة برة

لكن هالصدفة الي جمعت ورد وغيام وان كان مومتقبلها الان لكن بيشكر ربه عليها بعدين ووهج لو تترك هالطريق رترجع لعقلها بيجيها نصيب يسعدها بس ننتظر القادم لانه اكيد في اشياء ماظهرت

حاكم ونورة

الطريقة الي جمعت الاثنين متقاربة مع الزيجات الثانية وان كانت كل زراجة لها ظروفها من زواج بندر بالعنود لزواج اولاده حكم وغيام .. ويمكن للبقية نفس النصيب

مااعتقد حكم طلق نورة ولا بيطلقها بعد مافكت الشاش اكيد حصل الكثير وغير المتوقع .. الا اذا النصيب له كلام ثاني بحياة حكم ..

فخر

اعتقد هالبنت لها من اسمها الكثير والكثير .. مابتكون فخر عقاب بس لكنها فخر البندر كلهم شخصيتها جميلة فيها من القوة والحنان ورجاحة العقل الكثير .. تقاربها مع فارس غير عن تقارب عيال بندر .. فخر مع فارس بينهم رابط عميق واضح ان كل واحد يفهم الثاني من غير مايتكلم .. ياترى مين سعيد الحظ الي بيتزوجها هل غتار مثل توقع الاغلبية او شخصية مازالت في حقيبة ضمضم .. ويليق بالفخر

المهر

هالبنت ماتوضحت من شخصيتها الكثير .. ولا مشاعرها وقربها من اخوانها او حتى من ابوها .. وكيف عيشتها وتربيتها وهل لها اخوان من امها .. بس اعتقد المهر لها شخصية ماتختلف عن اخوانها لانها تحمل دم البندر من الام والاب .. ياترى هل بيكون لها دور في حل خلافات الماضي لانها بنت العنود لان مااعتقد كون امها العنود بيكون عبث او شئ عابر وخصوصا لو ملامحها تحمل ملامح العنود .......

فارس ووعد

الجرح الي بقلبه غير الكثير من تفكيره .. لكن طالما ماطلق بنت خالته يعني بينهم نصيب وحياة مختلفة عن السطحية الي كانت عليها واكيد الصفعات الغير متوقعة دائما توعي الانسان الغافل وتخليه يعيد حساباته .. يمكن قرار فارس بالانفصال وسفره وموت ابوها وتصرفات عمها خلتها تفهم تفاهة تفكيرها

لو موضوع فارس انتهى مع بنت خالته وكلا مشى بطريقه بحط انو بنت العنود بيحطها عقاب براسه طالما هو مااخذ البنت بياخذ البنت لولده بس مااعتقد المشاعر الي بقلب فارس ماتت والا كان طلق ومااهتم بزعل امه لانه بتنسى لو كل واحد راح بنصيبه .. بس حياتهم بتكون غائمة وفيها ردات فعل كثيرة

بس هذا تعليقي الحالي لاننا لسى بالبداية .. ننتظر القادم الي بيحمل الكثير وظهور باقي الشخصيات حتى وان كانت فرعية لكن لها دور ولو بسيط في الاحداث

يعطيك الف عافية