|
رد: خريف الحب / للكاتبة خياله،،والخيل عشقي
التاسعه مساءً أتزوجها!!! نطقها مازن بصدمه وطالع أخوه وهو يكررها/ أتزوج جوري!! تبغاني أتزوج جوري!! رد خالد ببساطه/قلتلك الشغله كلها يوم واحد وتطلقها وبعد ماتخلص عدتها هرجعها وكل شي هيرجع زي ماكان. هز رأسه بعدم تصديق/أنتا أكيد موطبيعي أكيد صار لعقلك شي.. أنتا سامع نفسك ياخالد! وقف قدامه بثقه/أنا في كامل قوايا العقليه ومتأكد من اللي قلته ليكم ذي الطريقه الوحيده اللي هرجع فيها جوري و-- قاطعه مازن بشحوب/ليكم!! أنتا قلت لجوري على جنانك ذا. رد بهدوء/أكيد قلتلها مو لازم أرتب معاها وأفهمها إن الهرجه كلها ع-- حس مازن بصداع مفاجئ وما عاد سمع كلام أخوه ومسك رأسه بقوه وكله ندم لإنه أصر يعرف من أخوه السبب اللي خلاه يروح لبيت جوري ويتصرف معاها بذا الشكل .. غمض عيونه بقهر وهو يفكر في جوري.. علشان كذا كانت بتتهرب منه طول المده اللي فاتت! علشان كذا حاولت تتجنبه من يوم مارجع من السفر ورفضت حتى يطلعوا مشوار سوا ! هي حتى رفضت تشوفه على باب البيت كذا مره بحجة إن عبدالرحمن مو موجود!! وهو صدقها بكل غباء!! ماجاء في باله ولا لثانيه ذا الفيلم اللي صار! بس بعد اللي سمعه من خالد عذرها ومايقدر يلومها.. أكيد صارت قرفانه منه وخلاص كرهته ومو طايقه تشوفه!! يتزوجها!! كيف يتزوجها وهي كانت أمه الثانيه والأخت اللي كل أخ بيتمناها! كانت أستاذته والوحيده اللي شجعته يسافر ويحقق حلمه.. جوري كانت كاتمة أسراراه.. صديقته المقربه و-- مو تصدق إنها زوجتك من جد ذا بس عالورق يعني مايكون بينكم خلوه ولا رح تلمسها و-- إلتفت لأخوه اللي طلعه من أفكاره بكلامه اللي صدمه وهجم عليهم بدون تردد وفي ثواني كانوا مشتبكين في صراع عنيف . ، ، ، ، ، العاشره صباحاً تسلم يدك ياخوله الفستان شكله يجنن وإن شاء الله المقاس يطلع مزبوط. ردت أم رشيد بثقه/الله يسلمك، خوله مقاساتها وحده ومافيها تعديل وإن شاء الله هيزبط لاتقلقي. الزبونه/طيب والقطعة اللي جبتها اليوم متى تخلص أنتي عارفه إجازه والزواجات كثيره. راجعت خوله دفترها اللي مسجله عليه مواعيد التسليم وكمية الطلبات اللي عندها وبتفكير/أسبوعين وتخلص بإذن الله. ردت بإعتراض/لا ياخوله مره كثير قدميها شويه . خوله بشرح/معليش بس أنا عندي إلتزامات تانيه بس أخلص منها هبدأ في حقتك بإذن الله.. إتنهدت بإستسلام/طيب مو مشكله بصراحه خياطتك ماتتعوض وتستاهل نستناها.. ظلت عندها عشر دقايق وبعد ودعتها وخرجت ودخل عليهم رشيد وهي جالسه تحسب مصاريفهم وتشوف اللي لهم وعليهم وبإهتمام/ها إن شاء الله زبط الشهر ذا كمان؟ رفعت رأسها وإبتسمت بفرح/ الحمدلله خير ونعمه إذا أستمرينا عالحال ذا بنخص نسدد ديون أبويا بسرعه أكبر وبيرتاح في قبره. رد بتفكير/الله يرحمه ويغفر له، أنا بفكر أشتغل دوامين لين تخلص الإجازه والفلوس اللي بتجيني بتنفع مع اللي معاكي. سألته أمه بحنان/بس كذا مايكون تعب عليك! رد بإبتسامه/ولدك رجال ويسلك في الحديد أنتي بس أدعيلي . تركت خوله الورقه والقلم من يدها وسألته بحيره/إلا يارشيد مافكرت في اللي دلك عالشغل دا قصدي ماعرفت هوا مين! حك خده بتفكير/أنا لما قريت الرساله وعرفت إنهم طالبين حراس أمن سعوديين في مول** قلت ذا شكله واحد طفشان من عيال الحاره وبيتونس على رأسي بس رجعت فكرت وقلت ياولد يارشيد روح جرب قبلوك خير وبركه ماقبلوك منتا خسران-- قاطعته خوله ويدها على صدرها/الحمدلله اللي جعل في وجهك القبول على قول أبله جوري وأنقبلت، بصراحه الألفين اللي بتأخدها جاتنا نجده. رد بإستغراب/نجده ماأختلفنا بس أنا لذحين مو فاهم الهرجه ياخوله، أولاً أنا أصغر واحد في حراس الأمن اللي هناك جسماً وعمراً وغير كذا طالب وكله كوم ولما قلت للمدير إني أبغى إجازه علشان الإمتحانات كوم ثاني! سألته بإهتمام /وليه إن شاء الله ماكل العالم بتطلب إجازه جات عليك أنتا؟ رد بإستنكار/أنتي صاحيه! إجازة أيه اللي أخذها وأنا كان مالي غير أسبوعين متعين ولا مفكره أخوكي معاه دكتوراه في الطب ولا الهندسه ومحد يقدر يستغنى عنه؟ ردت أمه بإبتسامه/إن شاء الله يارب يوفقك ويفتح عليك وأشوفك في أعلى المناصب يارشيد وتعين وتعاون الناس المحتاجه وتفرجها عليهم زي ماربي فرجها علينا. رد بتفكير/الله كريم بس أنا أتوقعته بيهزئني أو يطردني يقوم هوا يوافق عالإجازه وكمان يمشيلي راتب! ذي اللي مابلعتها بالمره. سرحت بأفكارها وفكرت في داليا ومراد اللي مافهمت لذحين كيف جوري عرفت حقيقتهم وكيف فكتها من شرهم كل اللي قالته لها هو إنها تنساهم وتشطبهم من ذاكرتها نهائياً ووعدتها إنهم مارح يقربوا منها بعد كذا، في البدايه خافت وألفت أفلام رعب وعاشتها بس لما شافت داليا قطعت إتصالاتها وأختفت اتأكدت من كلام جوري وأطمنت بس ذحين خوفها أتحول لرشيد بعد ماأقنعها بكلامه وبخوف/رشيد حبيبي لايكون المدير دا سكته بطاله وبيجرك معاه فيها! رد بدفاع/لا والله الرجال أخلاق ومحترم وكل صلاة معانا جماعه وماسمعت أو شفت عليه شي. ردت بإصرار/أسمع كلامي وأفهمه لازم ما تأمنله بالسرعه دي، خليك مفتح ونبيه ولا تروح معاه أي مشاوير برا الشغل ولا تأخد منه شي لا أكل ولا شرب إلا وهوا مقفول ومختوم كمان و-- قاطعها بإستغراب/خير إن شاء الله شايفه فيلم أكشن أمس ولا أيشبك! ردت بمراره/رشيد حبيبي المظاهر خداعه والناس صاروا بألف وجه وجه ومو كل من سمعك كلمه حلوه وطبطب عليك صار يحبك، أحنا ناس على قدنا ومالنا ظهر علشان كدا أنتبه لنفسك وفكر ألف مره قبل ماتوثق في أحد الله يرضى عليك. كلمته أمه بتأييد/أختك معاها حق يارشيد خليك واعي ومفتح وأنتبه لنفسك أحنا مالنا رجال غيرك أنتا سندنا وعزوتنا من بعد الله . هز رأسه بموافقه/أبشري ياأمي وإن شاء الله ربي بيستر علينا أنتي بس أدعيلنا.. يلا أنا بروح أتصل عالمدير وأشوف إذا هيرضى على حكاية الدوامين. راح وأمه بتدعيله إن الله يسهل أموره ويحفظه بدون ماتنتبه لخوله اللي صارت فريسه لمخاوفها الجديده على أخوها وعلى نفسهم. ، ، |
رد: خريف الحب / للكاتبة خياله،،والخيل عشقي
صنعاء، الثانيه والنصف ظهراً حيا الله أخي نور البيت، أتفضل إلتفت لأخته وأخذ منها كأسة الشاي/سلمتي، جوري ماقالت لش إيحين هترجع! ردت بإبتسامه / الصبح حاكتني من بيت المنذر الظاهر بتودعهم وقدي هتجي قريب سأله علي بهدوء/وأنت ليش مستعجل على رجعتها! طالعه أبوه بحده/ليش مستعجل! مش هي قالت بتكمل السنه وترجع وهيذا قد كملت السنه والحمدلله نجحت هي وعيالها ماعد باقي لجلستها! ردت أم معاذ بتنهيده/كان باقي حقها المحل و الحمدلله -- قاطعها بضيق/ وهذا والكل ليش تفعله وهي داريه إنها كم شهر وراجعه، ضيعت فلوسها على الفاضي. علي بإبتسامه/أنت داري إنها من زمان نفسها فيه ولما لقت الفرصه سوته وهي داريه إنه لفتره. أبو علي /كان صبرت لما ترجع وتفتحه هانا بدل حقها الجنان. دخل معاذ وصب له كاسة شاي وبإبتسامه/والله ياخال مش أنت غبي من بنتك ويباسة رأسها هي حتى مارضيت تشل مننا ريال وحلفت محد يساعدها وسارت باعت كل ذهبها وفعلت اللي في رأسها. رد علي بتصحيح/مش كله، حق عرسها واللي كان خالد يشتريه لها بس لكن اللي مننا معاها لذحين. أم معاذ بحسره/قصدها هكذا بتنساه ولاكإنها أتزوجت ولاكيف! معاذ بضحكه/يمه الله يحفظك اللي يسمعك يقول كانت تشوفه والقبله سوا والله ولا في حسها منه ولاقد شفت وحده فرحت بطلاقها مثل بنتك كان عندها عيد. أبوعلي بضيق/ولأي حين هتجلس معيده وفارحه بنفسها. علي بهدوء/كم ماجلست خلوها براحتها وهي أخبر بنفسها. أبوعلي بحده/علي لا تقع قليل عقل مثل أختك وتصدقها في حقها الجنان الله يرضى عليك المره مالها إلا زوجها. وقف وباس رأس أبوه وعمته وبهدوء/ يبه اللي فيها مش جنان وقلة عقل.. أنا ذحين مسافر وإن شاء الله بعد مارجع نتفاهم أنتوا بس خلولها حالها ولاتكلموها في شي.. نشوفكم على خير سلم على معاذ ووصاه على جوري وبعد ماأستودعوه الله وراح إلتفت لهم معاذ بإبتسامه/وأنا شوري لكم مثل شور علي خلوه يجي وهي والكل تجي بالسلامه وبعدها يحلها الله. شرب شايه بهدوء وهو منتبه لنظرات الضيق وعدم الرضى اللي إتبادلتها أمه وخاله. ، ، ، ، ، جده، السابعه مساء طلعت من الحمام ووقفت قدام المرايه تتأمل صدرها بقرف وعدم رضى! من يوم ماتركت بيتها وجات بيت أبوها وهي ملاحظه شكله المتغير.. صدرها اليمين كان أكبر بشكل ملحوظ وبشرته أقسى ولونها متغير، أخذت ماء ورد من التسريحه ومسحت صدرها بضيق/أعوذ بالله من عيون الناس قل أعوذ برب الفلق.. خلاص الناس صارت عيونهم حاره ومايعرفوا يصلوا عالنبي لما يشوفوا وحده حلوه! مستكثرين عليا إني محافظه على جمالي وشبابي مع إن أولادي أكبر مني! ولا علشان الزفت عبدالفتاح سايبني زي بيت الوقف خلاص المفروض ألبس أسود وأعتزل الحياة باللي فيها! و-- قطعت كلامها لما رن جوالها وردت بضيق/هلا خلود. خلود/السلام عليكم كيفك ماما وحشتيني. جلست قدام التسريحه/وعليكم ماشي حالي وأنتي كمان وحشتيني.. أخوانك عاملين أيه! ردت بهدوء/الحمدلله بيسألوا عنك وعلشان كدا قلت نجيكي لليوم من زما-- قاطعتها بسرعه/لا بلاش اليوم خليها بعد يومين. خلود بإستغراب/إشمعنى بعد يومين! ردت بإبتسامه/اليوم رايحه زواج وبكره معزومه على عصريه. خلود بتنهيده/ أمممممم طيب تتهني يارب عموماً لماتفضي وتلقي وقت فاضي كلميني سألتها بإشمئزاز/إلا أبوكي والعجوزه اللي متزوجها أيش عاملين معاكم! لا تكون بتسويلك شغل الخالات وممسكتك شغل البيت وهي حاطه رجل على رجل.. لاتخليها تركب عليكي كفايه أبوكي . خلود بضيق / ماما الله يهديكي ماله داعي دا الكلام وقلتلك إنها في حالها ومو مقصره معانا .. يلا أنا مشغوله تبغي مني شي. ردت بتكشيره/أزعلي يختي أزعلي والله موعارفه مين أمك أنا ولا هيا.. يلا سلام. قفلت وبقرف/مالت عليكم كلكم أنا أستاهل اللي سألت.. نسيت بنتها في ثواني وطالعت صدرها للمره االأخيره وكملت لبسها وكل تفكيرها في العين اللي صابتها /لازم أشرب وراء ندى الحربايه أكيد هيا اللي طاقتني عين وإدا مانفع بروح لشيخ يقرأ عليا قبل مايجيبوا أجلي بعيونهم. ، ، |
رد: خريف الحب / للكاتبة خياله،،والخيل عشقي
الرياض، العاشرة والنصف مساءً
وبالعافيه جده وماما ندى فكوهم وصوتهم واصل للشارع. ردت بهدوء/ياسمين أنتي خذي أخوانك غرفتك وخلوكم هناك ومالكم صلاح بأي ش--- قاطعتها بتوتر/ماما أفهميني بابا شكله مره معصب وبيضارب دبان وجهو وعمو مازن ساب البيت وراح وجده ماوقفت بكاء من وقت مضاربتهم.. ماما حاسه الجو مره مكهرب ومو مريح أرجعي وخلينا نروح بيتنا أحنا مانبغى نجلس هنا.. ضغطت على جبينها بقوه وبتنهيده/طيب أيش رأيك تباتوا في بيت عمك مؤيد وأنا هكلمه يجي ياخذكم؟ ياسمين بضيق/يعني مارح ترجعي ولاهتقوليلي ليه رحتي فجأه وسبتينا و-- قاطعتها بحده/ياسمين لاتضغطي عليا أكثر من كذا ترى ماني ناقصه... سكتت للحظات وهي حاسه بالندم من إنفجارها المفاجئ واللي كان من نصيب بنتها، أخذت نفس عميق وبتبرير/ أنا عن جد ماكنت حابه أسيبكم بس هيا جات كذا.. غمضت عيونها بقوه لما سمعت صوت ياسمين الباكي اللي زاد قهرها وندمها على حدتها معاها وبحنان/ياسمينتي خلاص لاتبكي ياماما أنا أسفه ماكان قصدي أحتد عليكي بذا الشكل خلاص سامحيني ياروحي. ردت ببكاء/أنا اللي أسفه لإني.. طفشتك بكلامي أنا .. عارفه إنك مارح تسيبينا لله أكيد.. في شي صار وعلشان كدا أنتي رحتي ... مع جدو مساعد وعلشان كدا بابا ..وعمو أتخاصموا.. ردت بحنان/لا ياعمري أنتي أنا ماطفشت منك ولا هطفش في يوم، بس جدك مساعد تعبان شويه وكان يبغاني معاه ذي اليومين.. هيا يومين بس وإن شاء الله راجعه وبعدها خير.. خير بإذن الله أنتي بس بطلي بكاء أنتي عارفه إني ماأستحمل دموعك ذي ياماما.. خلاص يابنتي الله يحفظك خلاص. سكتت للحظات قبل ماترد بتنهيده/خلاص بطلت مافيا شي بس أنتي وحشتيني ونادين ونادر هنا طفشوني ويبغوا يكلموكي. ردت بإبتسامه/طيب ياروحي هاتي المفاعيص اللي جنبك أكلمهم وروحي غسلي وجهك وحطي شوية عطر وأنتعشي كذا وأستئذني من ماما ندى وهيا هتتفاهم مع أبوكي وجهزي غيار ليكي ولأخوانك على ماكلم عمك يجي ياخذكم تغيروا جو وتباتوا عنده.. أتفقنا. ردت عليها بموافقه وأعطتها نادر ونادين اللي كلموها لفتره قبل ماتقفل وتتصل لمؤيد اللي هلا وسهل ومامانع.. قفلت معاه وراحت هيا كمان تغسل وجهها وترش من عطرها المفضل بكثافه.. لطالما كانت ذي الطريقه فعاله بالنسبه ليها علشان تنتعش وتجدد نشاطها وتزودها بالقوه حتى وإن كانت قوه غير ملحوظه بس كانت دائماً بتعطيها دعم وبترفع روحها المعنويه والإيجابيه لأعلى مستوى واليومين الجايه هيا محتاجه للإيجابيه ذي بشكل ملح ومكثف علشان تقدر تواجه أبوها وجدها بكره! امس بعد العصر راحت المستشفى مع أبوها مساعد وثريا بعد ماراح عبدالرحمن لشغله مع بدر وأبوه اللي اتفاجأت وبوجوده معاهم وبإنه طلع صاحب العزومه! وبعد ما أخيراً أبوها أتطمن عليها وعلى صحتها أصر إنها ترجع معاهم عالرياض خاصة بعد مارفضت تحكي له عن اللي صار بينها وبين خالد وعن معنى كلامه اللي سمعه وقتها.. أصر على سفرها معاه لإنه مو واثق في خالد وقال إنه ممكن يكرر حركته معاها في غياب عبدالرحمن.. وقتها جلست مع نفسها وفكرت في أخوها اللي أكيد هيوصله خبر عن اللي صار من الجيران اللي ماهيقصروا وهيزيدوا عليه تفاصيل من خيالهم الخصب ووقتها الله لوحده العالم أيش اللي ممكن يسوي عبدالرحمن ! إذا كان أخوها ترك خالد في حاله طول الفتره اللي فاتت فذا كان بسبب وعده لها وبسبب عيالها اللي عاملهم خاطر وحاسبه عليهم أب زي ماقال بس إذا عرف باللي سواه اليوم فمهما أترجته أو حلفته مارح يسمعها ذي المره وعلشان كذا لازم تبعده عن الحاره ذي اليومين بس.. عيالها!! كيف تسافر وتسيبهم وراها! حست بقلبها أنكسر نصين وحست بعجزها وقلة حيلتها قدام خالد.. ذي المره كان صريح وواضح رجوعها ليه مقابل عيالها! بس هي حسمت أمرها وقررت.. عيالها مارح يصير عليهم شيئ حتى وإن كانوا بعيد عنها عالأقل هتكون مطمنه عليهم وهي عارفه إنهم مع أبوهم وأخوانهم.. لكن أخوها هو اللي هيكون موضع خوفها وقلقها الدايم إذا صار وأتواجه مع خالد.. زفرت بضيق من خالد اللي نغص عليها حياتها ورافض يتخلى عنها وعن أوهامه اللي هتوديه في داهيه.. خالد اللي أكيد ماعبرها وحكى لمازن على كل شيئ.. أكيد حكى له ولا ليه أتضاربوا بذيك الطريقه اللي حكتها ياسمين! همست لنفسها بتعب /ليه ماتحل عني ومصر تخرب كل شي في حياتي ليه و-- رن جوالها بأسم رؤى وطلعها من أفكارها وأخذت نفس عميق وعدلت فستانها وشعرها وزادت روجها وهي بتتناسى كل شيئ قبل ماترسم إبتسامتها المزيفه على شفايفها وتخرج من غرفتها علشان تجلس مع البنات. إنتهى البارت اللهم أنت الملك لا إله إلا أنت ، أنت ربى وأنا عبدك ، ظلمت نفسى واعترفت بذنبى ، فاغفر لى ذنوبى جميعا إنه لا يغفر الذنوب إلا أنت ، واهدني لأحسن الأخلاق لا يهدي لأحسنها إلا أنت ، واصرف عني سيئها لا يصرف عني سيئها إلا أنت ، لبيك وسعديك والخير كله في يديك استغفرك ربي واتوب اليك ،،،،،،،،،،،،،،، السلام عليكم ورحمة الله وبركاته أسعد الله مسائكم بكل خير وسرور يا جميلاتي الغاليات.. يارب تكونوا بخير وصحه من الرحمن ويارب تكون أموركم بتسير من حسن لأحسن.. قد ماأقول وحشتوني وأشتقت لكم مارح أوصلكم شوقي.. وقد ماأشكركم على تفاعلكم المميز والجميل كجمال أرواحكم مارح أوفيكم حقكم .. عن جد تعليقاتكم ومشاركاتكم وصبركم باقات جمال ونقاء وتشجيع لامتناهي فشكراً بحجم السماء يا أخواتي العزيزات ويارب أكون عند حسن ظنكم. جميلاتي أتمنى إن البارت ينال إعجابكم وأعذروني عالقصور .. وحتى نلتقي دمتم لي ولإحبتكم بخير أختكم /خياله |
رد: خريف الحب / للكاتبة خياله،،والخيل عشقي
ما شاء الله روياتك جميله جدا والبارت ولا اروع دمتي مبدعه
|
رد: خريف الحب / للكاتبة خياله،،والخيل عشقي
فصل راااائع وعنجد خالد واحد بلا غهم وعديم نخوة وضمير كيف عاشت معو واتحملتو ما عم اعرف حاليا مساعد هو يفكر جديا بطلب الجد وسند يلي ح يعرض زواجه عليا كمساعدة اولا وبعدين بظن بتنكشف الامور فاطمة اخته لخالد اكيد معا مرض وغرورا صورلا انا حسد وعين اما عن ندى فهيدي وحدة هبلا وبلا عقل اصلا هية وخالد تنيناتون خانوا لجوري من قبل
اما عن رشيد فأنا بظن جوري هية لي سعيت بتشيغله وخيا عبد الرحمن هو وفيصل صاحبين الشركة ما بعتقد فيا فزع بس بضل الاحتياط واجب سلمت يمناك خيالة فصل روعة بانتظارك بإذن الله |
| الساعة الآن 12:32 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية