الله أكبر،الله أكبر ،الله أكبر.. لا إله إلا الله،،
الله أكبر ،الله أكبر ولله الحمد….

الله أكبر عدد من نوى الحج وأتى،الله أكبر عددمن كبر في بيتك وصلى،الله أكبر عدد من ضم يده ودعى…
-------------
الورقه العاشره

مرت سنة على بطلتنا بحلوها ومرها..
(جوري)
مرت عليا سنه.. كنت أعاني فيها من أعتداء خالد الهمجي، الكوابيس كانت ماتفارقني.. لكن استمراري في جلساتي مع الدكتوره بشرى جابت نتيجه وفي خلال شهرين من الحادث ،رجعت لي ثقتي بنفسي ورجع صوتي ،وأصبحت الكوابيس تجيني بين فترات متباعده..
رجعت الفرحه لبيتنا من جديد، واتحسنت نفسية أبي وأمي اللي تدهورت بسبب مرضي الغريب ،وحاولت أرجع جوري القديمه علشان اطمنهم وأريح بالهم،وعلشان أتناسى اللي صار..
لكن كيف أتناسى واللي أسمه خالد يحاول يكلمني بإستمرار ،وكأنه مصر أني ما أنسى، حاولت اتهربت منه بكل الوسائل.. تعبانه ،مستحيه،نايمه، مشغوله.. جربت كل شي، وفي الأخير مالقيت غير عمي حبيبي يفهمه إن إتصاله غير مرحب فيه،و فهم وبطل يتصل، وأنا أوهمت أهلي إني بكلمه من فترة للثانية..
لكن أنا ماأرتحت.. كيف ارتاح ،وأنا عارفه إني نهاية المطاف هتزوج نفس الشخص اللي صرت أشوفه شيطان في ثوب إنسان.. كنت أتظاهر قدام أهلي بالهدوء وفي داخلي براكين من الخوف والغضب والقهر.. حاسه نفسي محاصره من كل الجهات.. ماقدرت اقول اللي بداخلي لأحد.. ولا قدرت أتقبل اللي سواها وأتقبله كإنسان أساسا..
وبعد طول عذاب لجأت للدكتوره بشرى، هي الوحيده اللي أقدر أكلمها بحكم عملها كدكتوره نفسية أولا.. وبحكم علاقتنا الطويلة واللي خلتها مقربه مني لدرجه كبيره ثانيا،ومع ذالك ماقدرت أحكيلها اللي صار بالضبط.. كل اللي قلته أني رافضه الزواج عامة والشيطان اللي أسمه خالد خاصة..
لكن أعتقد أن وحده بخبرتها وذكائها ربطت بين اللي صار لي وبين رفضي التام ليه.. لإنها بدأت تشرح لي عن العلاقة الطبيعية بين أي زوجين،وإنه بيكون بينهم أحتكاك جسدي وذا شي عادي وحتمي على كلامها..
طبعا الكلام ذا ماناسبني ولا حبيته ولا اتقبلته.. لكن هي ما يئست وحاولت معي كذا مره لحد ما فهمت نوعا ما إن اللي سواه طبيعي وعادي ،لكن ذا ما غير من نظرتي وشعوري ليه في كل الحالات..
بعد اللي حصل اتغيرت أشياء كثيره في حياتي ، أهمها إلتحاق عبدالرحمن بالمعسكر ، وذا الشيئ نتج عنه فراغ كبير داخلي ،خاصة إني كنت محتاجه لوجوده جنبي ذي الفتره،ومع ذلك كان حريص يقضي كل إجازاته معي وكان يسوي لي كل اللي نفسي فيه..
وأحلام كمان كانت زياراتها مكثفه ، وتحاول تعوضني غيابه لإنها عارفه إني متأثره ببعده..
اتغيرت حاجات كثير فيني،حسيت إني كبرت وتفكيري أتغير،صح إني لازلت العب واضحك وأمارس حياتي بشكلها العادي،لكن صرت أهتم بجلستي مع أخواتي وداد وعلياء وناديه لما يجتمعوا،أحاول أسمع كلامهم وأفهم كيف عايشين مع أزواجهم، وأستغربت لما شفت كل وحده تمدح زوجها وتحكي عن حبها وأحساسها وشكلهم فرحانين.. طيب ليه أنا ماحسيت بذي الأشياء ليه كل ما أتذكر ذا الإنسان حس بكره ونفور وخوف،وين الحب والمشاعر الحلوه اللي يقولوا عنها،والشيئ الثاني اللي شدني في كلامهم كان عن وحده نعرفها اتطلقت من زوجها.. وكيف حياتها بعد الطلاق اتغيرت للأسوء،لإن الناس ماخلتها في حالها وكل واحد طلع كلام عن سبب طلاقها وكلام كثير ماله أساس من الصحه لإني أعرفها ولايمكن تكون مثل ماقالوا عليها الناس..
كلام البنات خلاني أفكر في حالي ،إذا طلبت الطلاق مصيري بيكون مثلها والناس هتتكلم عليا وهشوف نظراتهم اللي كلها ظلم وإتهام وين ماكنت.. طيب إذا أنا ما اهتميت أهلي كيف بيكون موقفهم ،كيف هيواجهوا الناس.. هيسكتوا ويتحملوا كل الكلام اللي هيسمعوه عليا…
احترت وأصبح عندي خيارين أحلاهم مر.. لجأت للدكتوره بشرى اللي صدمتني بكلامها وإني إذا فكرت في الطلاق فلازم استعد للأعظم،لإن مجتمعنا مايؤمن بالطلاق كحل،وإنه مهما كان سبب الطلاق فاللوم بيكون من نصيب الزوجة مهما كانت بريئه ومالها ذنب في الطلاق..
وذا خلاني افكر بجدية في زواجي وفي أمكانية نجاحه،إذا مش علشاني فعلشان أهلي..


(خالد)
ماأقدر أوصف لكم مقدار فرحتي لما عرفت إن جوري إتحسنت وصوتها رجع،أحساسي بالذنب أختفى وحل محله شعور بالرضى ،أخيرا هرتاح وأكلمها وأعتذر لها ونشوف نهاية زواجنا ذا.. حاولت أكلمها أكثر من مره وعلى فترات متباعده ومختلفه ،بس كان الرد نفسه في كل مره ،مجرد أعذار،وفي كل مره كان عبدالرحمن هو الي يكلمني مهما كان اللي رد عليا كان يرجع هوا ويبلغني بذا الكلام،لحد مافهمت إنه يصرفني ،واللي أكد لي ذا الشيئ كلام أبويا لما طلب مني إني ماأكلم جوري وأعطيها وقت علشان ترتاح نفسيا وتتقبلني كزوج..
أنا محد بيجلطني غير أبويا ذا.. حسسني إنها بنته وأنا الغريب،شايلها على كفوف الراحه وكل يوم والثاني مكالمات وضحك معاها ،حسيت هوا اللي زوجها مو أنا..
ومافي غير جوري سوت ،جوري عملت ،جوري قالت.. والله ودي أخنقها ذي الإنسانه..

--------------

(أبو خالد)
الحمد لله ،اخيرا رجعت جوري لطبيعتها اتحسنت صحتها،ورجعت تتكلم معايا عالتلفون ، رجعت ضحكتها وسواليفها المجنونه، والأهم إنها طلبت مني أقول لخالد يوقف إتصالاته لإنها مارح ترد عليه،وفي نفس الوقت ماتبغى تلفت إنتباه أهلها لرفضها لمكالماته،وذا الشيئ خوفني على طبيعة زواجهم وكيف بيكون..
لكن بعد فتره فاجأتني لما قالت أحدد موعد الزواج مع أبوها.. كنت متخيل إنها بتأجله لبعد تخرجها من الثانوية،وكنت رح أوافق بدون تردد..
والحمد لله اتطمنت وحسيت إن أمورهم هتكون بخير إن شاء الله ..
واخيرا كلمت صالح وحددنا الزواج في العطلة الصيفيه….

--------------

(أبو معاذ)
كيف اوصف لكم أحساسي وأنا أشوف جوري وهي تموت قدامي ،بدون مايكون بيدي شيئ اسويه لها،فجأه تطيح علينا وتدخل في غيبوبة، حسيت بالعجز وقلة الحيله ،أيش اللي حصل وخلاها بذي الحاله.. حسيت روحي راحت مني ،صار البيت فاضي ومافيه حس، أصبح بارد ومافيه حياه ،وكأن كل شيئ فيه دخل في غيبوبة بدخول جوري فيها ،أصبح كل شيئ ماله طعم ..الأكل ،الكلام،حتى النوم ،كله مثل بعض،كل واحد فينا يتحرك بدون أحساس ،وصرنا ننتظر موعد الزيارة بفارغ الصبر علشان بس نشوفها ونطمن عليها ونعوض غيابها،وأكثر واحد حس بغيبتها كان عبدالرحمن اللي رفض يخليها لوحدها، وأصبح ظلها اللي مايفارقها..
مرت علينا ثلاث أيام كأنها تلاث شهور ، والحمد لله اللذي استجاب لدعائنا،وقامت بالسلامه ..
علشان نتفاجأ بإنها ماتتكلم،حكمتك يارب،لكن أحتسبنا وقلنا قدر ولطف ،المهم إنها فاقت من الغيبوبة،وعرفنا إنها شافت سارق فوق الجدار وهو فجعها،بلغنا الشرطه وحاولنا نمسكه لكن مالقينا شيئ..
والحمد لله بعد فتره أتحسنت صحتها ورجعت مثل أول تنور علينا البيت بضحكتها وصوتها اللي كان لنا مثل الحياة، ورجعت لدراستها ولحقت السنه ونجحت، لكن بعدها حسيتها اتغيرت شوية يمكن بسبب غياب عبدالرحمن اللي ماتعودت عليه ..
والحمد لله بعدها درست وقدمت أختبارات صف ثالث إعدادي ومازلنا منتظرين نتيجتها..
ولما كلمني أبو خالد على موعد الزواج حرصت ذي المره إني ما أكرر غلطي،ورحت شاورتها وأنا مقرر أسوي اللي تقول عليه مهما كان،لكن فاجأتني لما قالت أتفقوا أنتوا وحددوا وأعطوني خبر بالموعد..
وفعلا اتفقنا إن الزواج يكون في العطلة الصيفية بعد ماتطلع نتيجة الأختبارات..

(جوري)
اخيرا طلعت نتيجتي وأتخرجت من المرحلة الإعداديه بتفوق،وطبعا أهلي جهزوا لي حفلة كبيره بمناسبة النجاح..
وبدأت التجهيزات لزواجي، اللي ماكنت متحمسه له وأعطيت لوداد وعلياء الضوء الأخضر علشان يتكفلوا بكل شيئ،فكانوا يروحوا السوق ويشتروا لي لوازم الزواج بداية من الذهب والملابس حتى العطور والمكياج وفستان الزواج،كانوا يوروني الأغراض وهم كلهم فرحه وحماس لموعد الزواج،بينما أنا كنت أتفرج على كل شيئ ببرود وعدم إهتمام ،كنت أوافقهم على كل شيئ وأبين لهم إن كل حاجه عاجبتني، مع إني مدري أيش اللي اشتروا، ومحد كان مركز ومنتبه غير عبدالرحمن اللي حاول كذا مره إني أعترف له بشكوك في باله ،لكني أصريت على موقفي ، والله لو عرف باللي حصل خالد بيموت لامحاله، وبصراحه مش مستغنيه عن أخي أبدا،
ومرت الأيام وأنا أدعي ربي يسهل أموري،ووصلنا لساعة الصفر…..

--------------

(عبدالرحمن)
كنت مضطر إني أبعد عن جوري لمدة سنه بكاملها بسبب إلتحاقي بمعسكر الجيش لتأدية الخدمة العسكرية الإلزامية بعد الإنتهاء من المرحلة الثانوية،بس ذا مامنع إني اقضي كل أجازاتي اللي كنت أنزلها من المعسكر معها ، وأحاول أعوضها عن غيابي باقي الأيام ، وكنت ماأخلي شيئ في نفسها لعب كره ، تمارين ، خروج للمكتبات وشراء الروايات،وفي الأخير ضحكتني لما طلبت مني أعلمها السواقه ،رغم رفض معاذ الشديد للفكره ، لكن أبي وافق وماكان بيد معاذ شيئ ،ومع ذلك جوري قامت تترجاه علشان يوافق وقالت له إن ربي مابيوفقها ولا هتتعلم لإنه رافض ،وجلست يومين ترفض تروح معي للتمرين ،وفي الأخير معاذ الغبي حزن عليها ووافق، ورجع هو يحاول يقنعها تتعلم وهي تتدلع عليه، هههههههههههههه والله إنها تحفه، وبعدها كنت أخذها للمزارع البعيدة علشان نأخذ راحتنا وتتدرب ، وكالعاده كانت أكثر من جيده في السواقه ،ومع كل المغامرات والأكشن اللي كنا نسويه ماقدرت تقنعني إنها فرحانه،كنت المح حزن في عيونها، وحتى في ضحكتها كان في تصنع وأحسها مش من قلبها ،شيئ تحاول تخبيه من وقت مرضها، ورفضت تقوله حتى لي ولأحلام، رغم محاولاتي الكثيره معها..
لكن اللي أنا متأكد منه هو إن خالد له يد في الموضوع..
من وقت ما فاقت والفت لنا كذبة السارق اللي ما دخلت رأسي،لحد ماشفتها كيف تتهرب من زيارته لها في المستشفى وبعدها مكالماته اللي كانت ترفض تستقبلها ،وفي كل مره تطلب مني أكلمه وأقول له أي عذر علشان لاتكلمه،وطلبها الأغرب إني ما الفت إنتباه أبي والباقين لتصرفها،واللي أكد لي إنقطاعه المفاجئ عن الإتصال، رغم إنها مفهمه اللي في البيت إنه بيكلمها من فتره للثانيه وبيطمن عليها، بصراحه حاس نفسي أكره ذا الآدمي ،ومش مرتاح لزواجه منها، وكنت منتظر في أي لحظه إنها تطلب الطلاق، بس شكلها شافت الموضوع من زاوية ثانيه،لإني اتفاجأت لما حددوا موعد الزواج وفهمت إنها موافقه، وماعد بيدي شيئ غير أني ادعي لها بالتوفيق..

قراءةممتعة لكم
وغدا اكمل نقل كم بارت زياده إن شاء الله