منتديات ليلاس

منتديات ليلاس (https://www.liilas.com/vb3/)
-   القصص المهجورة والغير مكتملة (https://www.liilas.com/vb3/f837/)
-   -   خريف الحب / للكاتبة خياله،،والخيل عشقي (https://www.liilas.com/vb3/t201458.html)

فيتامين سي 05-12-15 11:26 PM

رد: خريف الحب / للكاتبة خياله،،والخيل عشقي
 
اقتباس:

المشاركة الأصلية كتبت بواسطة bluemay (المشاركة 3578978)
إيش ذا الزين ؟!! >>> فيس عايش الجو لووول


روووعة فيتو

الأروع مشاركتك ياقلبي

يا رب تكملها على خير مبين عليها روعة

إن شاء الله تكملها

موقف الزواج ابدددددعت فيه وعيشتنا الجو بكل تفاصيله

ههههه الحمد لله إنه عجبك

بكررره خالد الخائن

الله يصبر جوري ...

مشكورة يا الغلااا خيالة

ولك ام جمال حبيبتي اللي بتجيبي الزين والحلو دائما

مع خالص الود

«اللهم أغفر لي هزلي وجدي، وخطئي وعمدي، وكل ذلك عندي»

العفو ياقلبي منوره المتصفح
وإن شاء الله كل يوم أنقل لكم بارت لحد مانوصل مع الكاتبه وبعد
كذا راح يكون النقل متزامن مع تنزيل الكاتبه للبارتات
ولعيونك حبيبتي راح أنقل كم فصل زياده اليوم وأكمل الباقي بكره

فيتامين سي 05-12-15 11:32 PM

رد: خريف الحب / للكاتبة خياله،،والخيل عشقي
 
سبحان الله وبحمده،،سبحان الله العظيم

-----------------

الورقه السادسه

ولا يبقى معنا الا صدى أصواتهم وضجيج اشتياق مؤلم..
تبا لهكذا رحيل ..لا يترك لنا الا ..لملمات حنين لهم.

-------------------

صحيت على صوت مزعج،مدت يدها بكسل وقفلت المنبه،رمت بطانيتها على جنب ووقفت تصحي اختها شيماء/شيماء يلا صلاة الفجر ..قومي ،بنتأخر عالمدرسه..
مسكت خصله من شعرها ومررتها على وجه شيماء بشقاوه وهي مبتسمه،عادت حركتها بأزعاج اكبر وصارت تحط شعرها في خشمها واذنها لحد مابدأت شيماء تتحرك بضيق وتبعد الشعر عن وجهها / خلااااص بس شويه،، روحي انتي خلصي وقوميني.
جوري بأصرار/ لا.. قومي قدامي، كل يوم تأخريني.. اليوم اول حصه ابله نجاة والله ما اتأخر بسببك.
شيماء وهي نايمه/ اذا اتأخرت اسبقيني.
جوري عصبت/قلت الف مره نمشي سوا،ويلا قومي ،بروح اتوضأ واذا جيت وانتي نايمه بقومك بكاسة ماء على راسك..
سابتها وخرجت،وشيماء قامت وهي تكلم نفسها/ لو ماكان برد كنت نمت وطز فيكي، لكن مجنونه تسويها..
راحت جوري اتوضت ورتبت امورها ومرت صحت امها وابوها، وهي خارجه من غرفتهم قابلت ناديه وبابتسامه/صباح الخير..
ناديه وهي تتثاوب/صباح النور والنشاط والحيويه..
جوري/هههههههه ،باين النشاط والحيويه..
اذا معاذ صحي خليه يصحي نور انا اتأخرت، ولسا بتضارب مع شيماء..انتي صاحيه؟..
هزت ناديه راسها وراحت..
ابتسمت جوري لما رجعت الغرفه ومالقت شيماء،فرشت سجادتها وصلت الفجر، بعد ماخلصت صلاه لبست جزمه سبورت وجاكت برد ولفت على شعرها شال صوف وطلعت عالحوش ، لفحها الهواء البارد اول ماخرجت،الشمس لسا ماشرقت والدنيا شبه مظلمه ،ابتسمت واخذت شهيق عميق وهي مستمتعه بريحة الأرض المختلطه بريحة المطر وشذى اشجار البرتقال والليمون والورد اللي في حوشهم..كانت تعشق ذي الأجواء اللي خلتها عاده صباحيه لها..
حوشهم كان كبير مره يتوسطه بيت كبير من دورين بينما الدور الثالث لسا ماكتمل،يعني في جزء خلفي للحوش يساعدها انها تجري براحتها حوالين البيت،والجزء الامامي كان من الجانبين مزروع بأنواع مختلفه من الاشجار بينما في الوسط مرصوف كممر للسياره..
شدت الجاكيت عليها وبدأت تمشي بشويش وهي تردد اذكار الصباح، سرعت وتيرة مشيتها تدريجيا وجريت اربع مرات حول البيت،بس وقفت على جنب لما سمعت صوت عبدالرحمن اخوها/طريق ياولد طريق ..
مدت راسها باستغراب علشان تشوف وضربت جبهتها بخفه"ياربي عالغباء، كيف نسيت انه في ناس عندنا"
كان ابو معاذ واولاده وابو خالد وخالد في الحوش.
ابو معاذ بضحكه/اي طريق.. محد غريب .
عبالرحمن بمجامله/ ايووه… ههههه نسيت.
خالد يشوفهم بملل"ياصباح الظرافه"
ابو معاذبصوت عالي/ جوري… جوري.. تعالي سلمي على عمك محمد.
التفت ابو خالد باستغراب /وينها جوري.. وايش مطلعها في ذا البرد.
معاذ وهو يتممطط/وحده فاضيه ماوراها عمل.
ابومعاذ/خلاص شفتك ..تعالي.. جوري.
عبدالرحمن بضيق/ انت داري انها ماحتجي، خلاص لاتتعب نفسك.. ودخل مع اخوانه.
ابو معاذ/ هذا يامحمد ،جوري كل يوم تخرج الفجر تعمل لها كم لفه في الحوش.. يعني رياضه على قولها وتسقي الزرع وكذا.
ابو خالد بأعجاب/ماشاء الله عليها.. بس شوف كيف زرعكم حلو واخضر ..طلع منها.
خالد يدور بعيونه يمكن يلمحها وبأستهزاء"مابها شي طلعت تعرف الرياضه"
ابو خالد / لكن مو برد عليها.
ابو معاذ /لا ماعليك، هي تحب ذا الجو ويعجبها.. ودخلوا كلهم..
جوري اتضايقت من ابوها ليش مصم انها تسلم، ولأنها ماتقدر تكمل جري وتسقي الزرع لان المجلس يطل عالحوش وبتنكشف قدامه،فدخلت البيت وشالت اللي عليها وراحت المطبخ،لقت امها وام خالد في وجهها وماقدرت ترجع..
ام معاذ/تعالي لاتستحي.. محد غريب.
دخلت وباست راس امها وام خالد وبأحراج/صباح الخير..
ام خالد بحب/ صباح الجوري حبيبتي.. خلصتي مشيك..
رفعت راسها باستغراب لأم خالد اللي تابعت/امك قالت لي انك تمشي كل يوم وتجهزي القهوه لأبوكي.
هزت راسها بموافقه" ماشاء الله مسرع اعطتها التقرير" وبصوت هادي/ خلاص يمه روحوا وانا بجيب لكم القهوه ،وقهوة أبي بحطها عند الباب وياخذوها..
ام خالد / دخليها انتي،محد عنده طلعوا يناموا..
جوري بفرحه/والله… قصدييي… طيب .
ام معاذ/ اصلا اذا جوري ماودت القهوه واتقهوت مع ابوها مايرتاح .
وطلعوا وسابوها سوت القهوه وجهزت التمر والبيتي فور والكعك المالح ووزعته للرجال والحريم ، وصلت لامها وام خالد القهوه..
-------------------
اخذت الصينيه وراحت لأبوها عالمجلس ودخلت بحماس/صباحك أنا يا أحلى صلوح في الدنيا..
حطت الصينيه وجلست قدامه وباست راسه ويده وبمرح/ وحشتني من أمس لليوم..
ابو خالد يدق ولده اللي مبقق عيونه عليها ما كان شايف وجهها لأنه وراها،كانت لابسه بيجامه شتويه موف وكمها طويل وبنطلونها اسود وشعرها فاكته وواصل لنص ظهرها.
ابو معاذ بأبتسامه/ اهدي شويه، ياصباح النور والسرور .
صبت القهوه ومدتها لأبوها وبعتاب / كنت ناويه اعاقبك واحرمك مني ومن قهوتي اليوم،بس ماهنت عليا..
ابو معاذ بضحكه/اووووف ست الكل زعلانه علينا.. ايش سويت؟
جوري بضيق/ لا والله.. يعني ماتعرف، ايش فيك اول ..جوري ..جوري ..جوري، كأنك تجرب اسمي، فهمني بس ليش تناديني هااا.
ابو خالد كان معجب باسلوبها وأشر لخالد بنظره معناها شفت اختياري،وخالد هز راسه وهو مستني متى تلف وجهها"ماتلفي وجهك وتخلصيني،مع البطانيه اللي لابستها جسمك موباين شكله ،بس شكلك قصيره مره، بس شعرك حلو، باقي الوجه الله يستر"
ابو معاذ/ بس،ذا اللي مزعلك.. ناديتك تسلمي على عمك محمد..
جوري باستهبال وهي تشبك يدينها وتمدها قدامها بحب/ حبيبي عم محمد والله فقدته…وبشوفه واسلم عليه ..
وتابعت بجد / بس مو بالبيجامه وبشعري.. خلاص عيب صرت كبيره.
ابو معاذ بزعل/اصلا عيب عليكي،ماجيتي ولا سلمتي وفضحتيني قدامهم، ايش يقولوا عليكي.. ماتعرف الأدب ..
جوري باست راسه وبضيق/ آسفه يبه.. لاتزعل الله يخليك، بس انا كم مره قلت لك انا ماعدت صغيره، لا تقول لي اسلم ..يا اخي والله استحي…
هنا خالد ماقدر يمسك نفسه على كلمة (يا اخي).. هههههههههههههههههه ههههههههههه
نطت جوري بخوف/ بسم الله.. عبدالرحمن ياحمار خوفت….. سكتت وتنحت لما لفت وجهها وشافت خالد وابوه قدامها.. ابو خالد كان مبتسم.. اما خالد كان مركز عيونه عليها بقوه لدرجه خوفتها منه،رجعت وراء وصدمت في ابوها اللي وقف وراها لفت عليه واتخبت وراء ظهره وهي تبكي/ والله ماشفتهم. ماكنت ادري.. والله مانتبهت.
صارت تسحب ابوها معاها لجهة الباب ولما وصلت فكت ابوها وطلعت تجري..
خالد جلس وهو مصدوم وفي نفسه" اكيد يمزحوا.. ذا اكيد مقلب.. ذي.. ذي زوجتي"
ابو خالد بزعل/ الله يصلحك ياصالح.. ياريتك قلت لها اننا هنا ..شوفها خافت وقلبها وقف.
ابو معاذ بضيق / انا نسيت انها بتجيب القهوه، وقلت اكيد مابتدخل وانتوا هنا.. وشكلها نسيت انكم موجودين..
ابو خالد برجاء/بالله عليك روح شوفها وراضيها.
ابو معاذ/ طيب انتوا اتقهووا ،وانا راجع. مرت عليهم 5 دقائق وهم ساكتين قبل مايتكلم ابو خالد/ها ياخالد.. ايش رأيك في زوجتك.. عجبتك؟
خالد وهو شاد على اسنانه/ انت متأكد ان ذي زوجتي..
ابو خالد باستغراب/كيف متأكد! زوجتك جوري.. وذي جوري.
خالد بعصبيه/ ابويا لاتجنني الله يخليك.. أكيد انت غلطان.. مو معقول ذي زوجتي..
ابو خالد بحده/ايه هوا اللي غلط.. ومتأكد..
خالد مسك راسه بقوة/ ابويا ذي طفله.. طفله
كيف زوجتي.. ذي اختها الصغيره، ذي عمرها كم 12 سنه؟
ابو خالد بهدوء/باقي لها 7شهور وتتم 14سنه .
خالد بأستهزاء/يعني عمرها 13..وحتى اذا 14سنه.. برضها طفله.. بزره.. ابويا أنا عمري 23 سنه.. يعني اقل شي اتزوج وحده عمرها 18،19 مو.. مو… ذي.
ابو خالد بأقناع/يا ولدي البنت زي ماشفت جميله وشخصيتها حلوه، وعمرها مناسب ليك.. وإذا على عمرها بتكبر .
خالد بضيق/ ابويا انا مو صغير، انا داير وعارف بنات، ولما انت اصريت عالزواج قلت اوكي اتزوج وانبسط مع وحده قدي، مو تجيبوا لي طفله، ذي ..ذي ايش اسوي بيها.. اربيها؟
ابو خالد بتفهم/لاتقول طفله.. ذي زوجتك، وايوه تربيها على يدك وتكبر قدام عينك وتتعود على طبعك.. وانت شايفها كيف طبعها واخلاقها حلوه..شوف كيف مهتمه بأبوها ومايقدر يستغني عنها،وانت كمان كلها فتره وتتعلق فيها..
خالد بحده/خلاص يخليها جنبه لايورطني فيها..
ابو خالد بعصبيه/هنرجع نعيد كلام امس، خلاص البنت صارت زوجتك..
خالد بضيق/ والمعنى.
ابو خالد وهو يأخذ نفس/المعنى تصلي عالنبي وتروق..
خالد / عليه الصلاة والسلام.
ابو خالد بأقناع/انت مو شفت البنت.. ايش رأيك فيها..
خالد/مررره صغيره..
ابو خالد/ياحبيبي ركز معايا.. سيبك من عمرها.. انا قلت رأيك فيها.
خالد بملل/رأيي من أي ناحيه.
ابو خالد وصل حده/يا أخي رأيك فيها كبنت.. كأنثى..
ابتسم خالد وهو يتذكر كلمتها (يا أخي)/ ما دام فيها يا أخي ههههههههه البنت حلوه، مع اني ماركزت كثير ..
ابو خالد بغمزه/ما ركزززت.. ابدا ..بس اكلت البنت بعيونك…
خالد بصدمه/ أنا…متى.. هاااا… لا لا ،انت فاهم غلط.. كل الحكايه اني امس لما وصلنا وحكى لأبوه اللي صار…
ابو خالد بمكر/ايووه قول كذا… وامس عامل زعلان ..وماشفت العروسه.. اتاريك شايفها شوفه شرعيه من بدري ومزبط امورك..
خالد وهو يضحك/ههههههههه اي شوفه واي بطيخ.. اقلك البنت اول ماشافتني فكت البزابيز وهات يادموع.. فكرتني ب لبنى وحزنت عليها،كنت بعطيها فلوس علشان تسكت… ولا كمان اقول لها حبيبتي هههههههه قطع ضحكته فجأه وهو مستغرب/هيا ليه بكيت وخافت لما شافتنا..
ابو خالد/ عادي ..انا عارفها مررره خجوله وتستحي…
خالد/لا مو عادي.. يعني اذا مستحيه منا عادي بس هيا اتخبت وراء ابوها وسحبته معاها لين الباب ..علشان ..لانشوفها؟..لا يكون.. لايكون ماتدري اني زوجها..
ابو خالد بأرتباك/هاا.. مدري.. يمكن.. خلاص ابوها بيتفاهم معاها… عادي..
خالد بعصبيه/ ايش عادي.. كيف تتزوج بدون ماتدري..
ابو خالد/ياحبيبي عادي الشيخ هنا مايسأل العروسه ابوها وكيلها وهوا يزوجها..
خالد بضيق/ ابويا انا مالي شغل مين وكيلها.. انا كلامي واضح.. هيا تدري اني زوجها.. تدري انه امس ملكتنا..
ابو خالد باستسلام/لا ماتدري.. الملكه صارت فجأه، وهيا كانت نايمه ومالحقوا يكلموها..
خالد/انتوا كيف تسووا كذا، ياربي منكم.. اتاري البنت خافت.. الله يستر بس.
ابو خالد/ خلاص عمك صالح بيحلها ..

فيتامين سي 05-12-15 11:34 PM

رد: خريف الحب / للكاتبة خياله،،والخيل عشقي
 

تابع.. الورقه السادسه
-----------


لذكرياتهم.. رائحة.. تستفز حنيني.. لأبكي

دخلت جوري الغرفه وقفلت الباب، جلست في زواية غرفتها تبكي بصدمه من اللي صار كيف ماحست بوجودهم، والأهم كيف ابوها مانبهها ولا قال لها تخرج كيف سمح لهم يشوفوها بذاك الشكل .. رفعت راسها للباب اللي مابطل دق من وقت مادخلت وصوت شيماء المستفز يطلب منها تفتح الباب علشان تتجهز للمدرسه، مسحت دموعها وفتحت الباب ودخلت شيماء بسخافتها المعتاده وشكاويها الكثيره اللي ماتخلص، اكتفت جوري بالسكوت وهي تشغل نفسها بتجهيز نفسها وشنطتها وهي حاس بالضيق.
دق الباب وفتحت شيماء دخل ابو معاذ/شيماء مافي مدرسه اليوم ،اخرجي وقفلي الباب.
بحلقت فيه وهي مو مصدقه اول مره ابوها يغيبهم من المدرسه،ماكذبت خبر وعلى طول رجعت اغراضها وخرجت من الغرفه.
التفت لجوري وشافها تلبس البالطو (العبايه)
ابو معاذ بعتاب/ ماسمعتيني لما قلت لأختك مافي مدرسه اليوم؟
ردت بصوت مبحوح/ اول حصه عندي اختبار ولازم اروح.. مقدر أغيب.
سحب الشنطه من يدها وبهدوء/ انا بستئذن لك، وبترجع تختبرك يوم ثاني،اجلسي بكلمك.
جلست جنبه بهدوء غير مسبوق،عيونها عالأرض وماسكه دموعها لاتنزل قدامه، شبكت ايدينها في حضنها وهي عارفه هيكلمها في اي موضوع.
ابو معاذ / انتي زعلانه مني .
خانتها شجاعتها معاه، لأول مره تسكت بوجوده وماتعرف ترد عليه، كيف تقول له انها زعلانه منه وشايله في خاطرها، كيف تسأله وتعاتبه وهو ابوها،حبيبها وتاج راسها،زعلانه منه كيف هانت عليه تنكشف بذاك الشكل قدام رجال مو محارمها، حتى لو كان يعتبر ابو خالد مثل اخوه ومصر عليها انها ماتغطي منه بحجة انها صغيره ،بس ما توصل انه يشوفها من دون حجاب وزياده على كذا معاه رجال ثاني،هو نسي انهم موجودين ،ولا ايش الحكايه بالضبط ، كيف اتهاون في ذا الشي وهو اللي مربيهم الأخلاق وتعاليم الدين ،وماعمره سمح بأي تقصير في امور الشرع ..
زفرت بقهر وهي كاتمه كل اللي تفكر فيه داخلها ،ماقدرت تنطق ،حاسه لسانها عالق في حلقها ورافض يتحرك وينطق.
ابوها كان جالس يتأملها بصمت وهو عارف في ايش تفكر، لما شاف خوفها ودموعها لما اتفاجأت بوجودهم انكسر قلبه عليها ،بس هي اللي جبرته يسوي كذا..
كانت كل ماجاء موضوع الزواج ترد بكل بساطه" ليه افلت (اترك) اهلي واخواني واروح اتزوج وابعد عنهم وماقدر اشوفهم ولا اكلمهم الا كل فين وفين، انا مرتاحه ومبسوطه بحياتي كذا ،وإذا… إذا بتزوج هيكون بعدين يعني 25,30.
حس بصدقها لما شافها كيف متعلقه بيه وبأمها وأخوانها،حياتها من البيت للمدرسه، زيارات خارج البيت نادره إلا للمقربين ومن باب صلتها للرحم فقط،ورغم صداقاتها وعلاقاتها القويه بصديقاتها وبنات جيرانهم إلا إنها حصرتها في مقابلتهم في المدرسه او في مقابلتهم في مناسبات الزواج بحكم أنهم في حاره وحده، حتى خروجها للسوق نادر، وإذا خرجت ماتخرج إلا معاهم..
اتذكر لما كانت في الإبتدائيه واتزوجت وداد وعلياء ،كيف اتعلقت بمعاذ وعبدالرحمن وكانت ترافقهم في كل خرجاتهم وصارت تتصرف مثلهم، وفي يوم طلبت منه يشتريلها جزمة رياضه لأنهم ماخلوها تلعب معاهم كره علشان لاتوجع رجولها، ولما اشتراها صار كل مارجع البيت يشوفها تلعب كره ،ولما سألها ليه قالت علشان يوافقوا يلعبوها معاهم، وفعلا جلست وراهم لحد ماوافق معاذ وصارت تلعب في فريقه كل مره، والعاب غيرها اتعلمتها بس علشان تقدر تلعب مع أخوانها..
حبها واتعلق فيها اكثر من كل اولاده لأنها كانت قويه وتتحمل وإذا حبت تتعلم شي مافي شي يمنعها مهما كان صعب عليها ، كانت وردة البيت وبهجته بضحكتها الرنانه وابتسامتها اللي ماتفارقها ابدا ..حنونه وحساسه وفي نفس الوقت الواحد يقدر يعتمد عليها وهو مطمن ، بس لما لاحظ أنها رافضه موضوع الزواج وتعلقها بهم زاد قرر أنه إذا اتقدم لها اللي يناسبها بيزوجها بدون مايسألها ،مالقي غير ذا الحل لأنه واثق من رفضها، كان مخطط يقول لها بهدوء على زواجها ويفهمها الاسباب اللي خلته يسوي كذا ،كان بيقنعها بهدوء لأنه عارفها عاقله وتفهم إذا احد فهمها،بس دخلتها عليه خربت كل اللي كان ناوي يسويه..
رفع وجهها بيده وبحب/انتي تحسبي أني بخليكي تكشفي عند رجال غرب ..
شوفي ياجوري انتي كبرتي وماعدتي صغيره، والبنت لما تكبر وتصير حلوه مثلك ..كل الناس تتسابق عليها علشان يخطبوها ..
عقدت حواجبها بأستغراب وخوف من كلامه.
ابو معاذ/ انتي عارفه أن عمك محمد يحبك؟ وانتي تحبيه؟صح..
هزت راسها بموافقه..
تابع كلامه/ ولأنه يحبك خطبك لأبنه خالد… ذاك اللي كان شفتيه قبل شويه.. وأنا وافقت وامس كانت ملكتكم.. يعني.. أمس انتي اتزوجتي خالد..
فتحت عيونها بصدمه وبصوت مرتجف/ كيييف ..اتزووجت... أنا.. أنا كنت نايمه... كيييف..
مسك كتوفها بحنيه/ يعني عقدنا لكم بس، علشان كذا هو شافك بدون حجاب هو وعمك محمد، خالد زوجك يعني عادي.. والزواج بنخليه على راحتك..
" أكيد يمزح معي، كيف اتزوجت وأنا مدري، كيف صار زوجي.،كيف" هزت راسها بعدم تصديق وبصوت باكي/ مالي دخل ..لا تقول أتزوجت، من قالك أني بتزوج، قله يروح.. مالي دخل.. مالي دخل..
نزلوا دموعها بغزاره لما حضنها أبوها وصارت تبكي بصوت عالي وتشهق وهي تردد نفس الكلام ..مابتزوج.. قله يروح..
حاول يهديها ويفهمها بس ماعطته فرصه ببكاها اللي قطع قلبه، أول مره يشوفها تبكي كذا ، عمره ماشافها تبكي حتى لما كانت تتضارب مع معاذ ويوجعها بلعبه القاسي، كانت تمسك نفسها علشان لا يضحكوا عليها ويقولوا إنها ضعيفه وماتعرف تلعب معاهم، تضحك وتبتسم وتنكت طول الوقت..
زاد بكاها وحس بضيقه في صدره وهو شايفها مو قادره تتنفس وصارت تشهق بقوه… صرخ بصوت عالي ينادي زوجته وناديه اللي جوا يجروا من صراخه..
أم معاذ بخوف/ ايش فيه مالك ب… سكتت لما شافت جوري وهي تشاهق ووجهها احمر…
جرت ناديه تجيب مويا وطلبت من شيماء تنادي عبدالرحمن..
ام معاذ حضنت جوري وهي تبكي/ بسم الله عليكي.. بسم الله.. خلاص ياأمي صلي على النبي.. ايش فيكي..
دخل عبدالرحمن بسرعه واول ما شاف وجهها فتح درج وطلع منه كيس ورق، جلس جنب جوري وهو يسحبها من حضن امه سندها على ابوه وفتح الكيس وحطه عند فمها وبأمر/ خذي نفس بعمق… .يلا ...شهيييييق… زفييييير ، جوري.. لاتخافي ...يلا حبيبتي.. اتنفسي.. رفعت عيونها لوجهه وصارت تتنفس مثل ماقال لها كانت انفاسها متقطعه وشهيقها عالي ،مسك يدها وحطها عالكيس تمسكه وخلاها توطي راسها وتنحني شويه لقدام وهي تتنفس داخل الكيس، أشر لأمه والبنات يخرجوا لأنه عارف أنها ماتحب أحد يشوفها بذي الحاله،التفت لأبوه وشاف وجهه مسود من الزعل على حالة جوري وبصوت واطي/ يبه لاتقلق..مافيهاشي.. ذحين تهدى وترتاح.
هز راسه بصمت وخرج من الغرفه.
قفل معاذ الباب وفتح شباك الغرفه ، جلس وراء جوري وسند ظهرها على صدره وجلس يمسح شعرها ويقرأ عليها لحد ما انتظمت أنفاسها ورجع وجهها للونه الطبيعي.
شربها مويا وبعدت عنه بأنكسار وخجل مسكها من يدها وضمها لصدره وبحنان/ أبي قلك؟
هزت راسها وهي تضمه بقوه بدون ماتعلق..
بعدها عنه بشويش وبأبتسامه/ايش رأيك نروح لأحلام؟
هزت راسها بموافقه سريعه خلته يضحك عليها،ضربته على كتفه بقوه وبعصبيه/ انقلع
مسك يدها ولفها وراء ظهرها بشويش وبتهديد/ قد كلامك.. هيا دوري أحد يوصلك لأختك..
فكت يدها ودارت بجسمها عسكه وصارت هي لافه يده وراه ويدها الثانيه تشد أذنه وببرود/ لاتوصلني،ذحين أتصل على خالي ويجي بنفسه يوصلني..
فك نفسه منها بسهوله وشالها على كتفه وخرج الصاله وهي تضربه وتشد شعره علشان ينزلها لقي أم معاذ وأم خالد في الصاله استحى منها ونزل راسه الأرض وهو يكتف ايدين جوري/يمه شوفي بنتك.. قلت لها بوصلها بيت خالي قامت تضربني قليلة الأدب ..
شهقت جوري/كذااااب لاتصدقيه، جالس يذلني عالروحه.
ابتسمت براحه وهي تشوف جوري رجعت لطبيعتها، هي خرجت من عندها ومتأكده إنها هتكون بخير لأن عبدالرحمن معاها.. بس لما شافت ضحكتها ارتاحت واطمنت..
ام معاذ/ خلاص نزلها ياكذاب.. بنتي مؤدبه ماتمد يدها على أخوها الكبير..
ضحك ونزلها/الله أكبر يامؤدبه.. من متى..
عدلت بيجامتها وهي مستحيه من أم خالد وبصوت واطي/ يمه ..بروح عند أحلام.. ممكن..
ام معاذ/ كلميها اول يمكن قد راحت المدرسه.
هزت راسها وراحت تتصل..
عبدالرحمن/ كيف حالك ياخاله.. كيف صحتك ..
أم خالد/ الحمدلله.. بخير ياولدي.. أنت كيفك.. وكيف دراستك..
عبدالرحمن/ الله يسلمك ويعافيكي.. الحمد لله ماشي الحال ،ذي آخر سنه ادعي لنا..
ام خالد/ الله يوفقك ويسهل أمرك.
عبدالرحمن/اللهم آميين.. يمه بروح اكلم أبي قولي لجوري تلبس وتخرج..
دخل عبدالرحمن المجلس وراح لأبوه/ يبه.. بوصل جوري بيت خالي وبنتأخر ..لا تنتظرونا عالغداء..
ارتاح ابو معاذ وفي نفسه" الحمد لله، مادام بتروح لأحلام يعني هي بخير" وبتساؤل/ هي بخير ذحين؟
فهم عبدالرحمن إنه يقصد جوري وهز له راسه بأبتسامه مطمنه.. وأخذ مفتاح السياره وخرج..

فيتامين سي 05-12-15 11:35 PM

رد: خريف الحب / للكاتبة خياله،،والخيل عشقي
 

سمراء الوجه... بيضاء القلب… بعيون بنيه جميله… وكلام يقطر بالعسل… ..
هذه هي (أحلامي)
-----------------

دفت الباب ودخلت بجنونها المعتادوصارت تدق ابواب الغرف بقوه وبصوت عالي/ يانااااس، ياعاااااااالم….. قومووووووووووا وين الفطوووووور .. وين الخبز الحاررررر… جيعااااااااانه….. قوموااااااااااااا…. صبببااح القهوووووه… صببااح النشاط… .. صبببببباح الجوووووووورري…
انفتح باب وخرج رجال في الخمسينات اسمر وقصير مسك اذانيها الاثنين وشدهم في الجهات/يالله صباح خير… يالله صباح الرضى… الناس تدق الباب…. تسلم…. وبعدها تطلب أكل ونفكرررر نأكلك ولا لا…

مدت يدها لبطنه وهي تدغدغه بقوه وهي تضحك لحد ماتركها و بضحك/ هههههههههه بس ياهبلا... كم مره اقلك لاتسوي كذا…. هههههههه… يابنت بس ..استحي..
جوري بفلسفه / عمرك شفت احد يستئذن وهو داخل بيته؟
حست بيد سحبتها بقوه وبعدتها، التفتت لقت رجال طول بعرض معصب و لابس بدله ميري والمسدس على خصره ..
جوري بغيظ/ انت ايش جابك، ليش تحشر نفسك يا بارد.. يامستفز..ويدك مره ثانيه لاتمدها ،احسن لك..
+++/والله كلام عجيب ..البيت بيت أبونا والغرب يطردونا.. ويدي امدها بمزاجي.. الله يرحم ايام الضرب بالشباشب.. هههههههههه.
شهقت يقوه/الله أكبر… غرب مره وحده ياعلي…
التفتت للحرمه الحامل اللي جنبه وجالسه تضحك، وبقهر/ وانتي فرحانه وتضحكي ياست بشاير ، عداكي البارد وصرتي مثله ماعندك أحساس ولا مشاعر بأخوانك المسلمين.
ماقدر علي يمسك نفسه اكثر من كذا وفك ضحك عليها/ هههههههههههه اخوانك المسلمين.. انتي من وين تجيبي ذا الكلام.
بعدين مالك دخل في بشورتي… مو كفايه انك هتولديها قبل وقتها بجنانك وهبالتك ذي.. واستحي على وجهك واحترميني، لاافرغ فيك المسدس والحقه بالرشاش
جوري بتريقه/ ياماما… بالله عليك.. خوفتني صراحه، اشوفك صدقت نفسك بالميري اللي انت لابسه..
والتفتت للرجال الاسمر وبتهديد/ شوف ياخال ،أنا هسوي نفسي ماسمعت شي.. علشانك بس، بس لو عادها صدقني ابلغ عليه واقول انه يستغل منصبه في تهديد وترويع أمن المواطنين الابرياء.. الا هل بلغت اللهم فأشهد.. والوجه من الوجه أبيض..
علي فتح عيونه / اعووذ بالله منك ..انتي ايش ؟راضعه مع ابليس… جالسه تخططي وتهددي في بيتي.. وين البراءه اللي بتضحكي بيها علينا ..نفسي المحها بس.
ابو علي/ الله يعيننا على هداركم(الكلام الكثير). وانت كل ماجتمعت أنت وهي خلاص ماعد تسكتوا ابدا، قسما ولا طباين.
جوري بمسكنه/ راضيه ضميرك ياخال،يرضيك يقلي غرب ،أنا صرت غرب، ويطردني من بيتي ،هذا وانت موجود ..وبعد عينك لاقدر الله والله يطولي في عمرك ..ايش بيسوي فيا..
سحبها ابو علي وحط ذراعه على كتفها وهو يلفها لولده/ محد غريب غيره والبيت بيتك انتي ،هو الخارج وانتي الداخله، ايش تشتي (تبغي) زياده.
علي بقهر / ياعيباه ياابو علي،تهزئني وتطردني وأنابالبدله، وعلشان ربع المتر اللي راضعه مع ابليس.
دخلت حرمه جميله في الاربعينات ومعاها بنت لها نفس الجمال،جرت عليها جوري وهي تضمها وتبوس راسها،والتفتت للبنت ورمت نفسها في حضنها وهي تضمها بقوه/ أحلامي.. والله فقدتك ياقلبي…
واشرت على علي بعصبيه/ ليش ماقلتي لي أن الشي ذا موجود عندكم..
وراحت للحرمه وبتحرييش/ شوفي يمه.. ولدك جالس يعيد ويزيد ومصمم .. من الصبح يغلط عليكي وانا محترمه أن مرته جنبه ولارديت عليه..
شهق علي/ نعممممم، ماعاد الا هي تغلطيني في أمي عيني عينك، ياظالمه.
التفت عالبقيه/ أحد فيكم سمعني غلطت ولا جبت سيرة أمي من أصله..
جوري بدفاع/ الله يجعلني مظلومه ولايجعلني ظالمه.. .انا مفتريه ولا أنت، من الصبح وأنت تقول راضعه مع إبليس ،قال ولا ماقال ياخال..
ضحك ابو علي وهو فاهم قصدها وبتأكيد/ والله أنه قال وأنا أشهد..
جوري بشماته/ هههههههه الحمد لله… ابوك وشهد عليك ماجبت شي من عندي..
علي بملل وهو يشوف ساعته/ يا الله خراجك من ذي الأذيه.. وين الغلط.. لاتكوني راضعه معاه صدق..
جوري بأنتصار/ والله أنا مدري إذا راضعه معاه او لا لكن اسأل أمي إذا هي رضعته معي ذا كلام ثاني… هاا يمه إبليس ولدك ولا لا…
ام علي بمسايره/والله يابنتي علمي علمك، لكن مادام علي قال.. خلاص هو صادق.
علي التفت علىجوري وهي تطله لها لسانها بتشفي وهو توه يستوعب اللي صار ويفهم لعبة جوري ،قام يبوس راس امه ويدها/ انا فداكي يمه لاتزعلي ، الله يخليكي، والله ماقصدت كلامها..
والتفت لجوري اللي جرت عالمجلس لأخوها عبدالرحمن وبصراخ/ عبادييييي الحقني..
اتخبت وراه وهي تشوف علي جاي وراها. علي بعصبيه/ خرجها بسرعه ..بتنجلد اليوم بتنجلد مافيها كلام.
عبدالرحمن وهو فاطس ضحك لأنه سامع كل شي من اول مادخلت ،وقف قدام علي وهو يدفه لايمسك جوري/ههههههههههه والله ماتلمسها وأنا حلفت.. ههههههههههههه ،بالله عليك ماتستحي تضحك عليك وأنت زي الاهبل داعس ولا انت داري بالدنيا ..
علي بنرفزه/ اقلك فكني عليها والل…
حط عبدالرحمن يده على فمه يمنعه من الحلف/ والله ماتلمسها، لاتحلف، انا يلا سمعتها تضحك وانت عادك تشتي(تبغى) ترجعها تبكي .
علي استغرب ونسي السالفه/ ليش تبكي.
استحت جوري/ آسفه ..والله كنت امزح.. حتى أمي مازعلت أنا غمزت لها بس نقهرك.
وخرجت برا الغرفه.

فيتامين سي 05-12-15 11:37 PM

رد: خريف الحب / للكاتبة خياله،،والخيل عشقي
 
عائله ابو علي(عبدالله) خال جوري
ام علي(ورده) امها بالرضاعه
(الاولاد) علي، وزوجته بشاير
عبدالملك. احلام. مروان

رجعت جوري عند امها والبنات اللي يحطوا الفطور..
بشايربفرح/الف مبروك.. متى العرس..
ام علي/ على ايش مستعجله.. البنت عادها امس ملكت..
بشاير/ مش مستعجله بس اشتي اعرف هتسكن معاه في جده ولا بتجلس عندنا. .
سوت نفسها ماسمعت وشغلت نفسها بتوزيع كاسات الشاي..
أحلام/ جوجو.. جبتي الملخصات معك..
جوري بسرعه/ ايووه ..تمام أنك ذكرتيني..
أحلام/تعالي غرفتي علشان تأخذي باقي الواجبات وتشرحي لي فقره مافهمتها..
وقفت أحلام وسحبت جوري معاها وراحوا غرفتها وقفلوا الباب..
ضمتها جوري بأمتنان/ فديت اللي تحس فيني، وتنقذني من الأحراج..
أحلام بعتاب/ تحسبي أني صدقت الجنان اللي سويتيه مع علي،بس قلت بشوف آخرتها معك..
جوري وهي لسا في حضنها/ عاد هو اللي جاء في وجهي.. كنت حاسه بضيقه ومكتومه، وارتحت شويه بعد ماجننته، بس بعد كلام بشاير،رجعت ضيقتي أكبر من أول.
مسحت على شعرها بحب/ قلت لك آخرتك بتتزوجي، والبنت مالها غير بيت زوجها،بس انتي الله يهديكي ركبتي رأسك واقنعتي نفسك أنك بتجلسي بدون زواج،والأن شوفي النتيجه، منتي متقبله زواجك وزعلانه.
بعدت جوري عنها بقوه ووقفت وصارت تدور في الغرفه وبخنقه/ كيف اتقبله وأبي زوجني بدون مايقول، زوجني وأنا فعلا نايمه في العسل..أنا عارفه أنه ماشاور وداد وعلياء في زواجهم.. لكن قلهم قبلها،اعطاهم خبر، واتقبلوا الموضوع،عملوا خطبه.. ومدري ايش حصلهم ..المهم كانوا فرحانات.. لكن أنا حرمني حتى من أني اعرف.. نمت وقمت لقيت نفسي متزوجه.. كيف اتقبل قولي لي.. ليش يحسسني أني ثقيله عليهم.. خلاص البيت مايوسعني، ولا جننتهم أني ماأشبه أخواتي.. طيب أنا ربي خلقني كذا ..مرجوجه ولساني طويل وما أقر في مكان.. ليش لازم اكون مثل وداد هاديه ومالي حس ولا اكون مثل علياءاحب الخرجات والزيارات.. ههههههههه ولا مثل شيماء مايعجبني شي ودلوعه.. هم ربي خلقهم كذا.. دلوعات وحساسات...
أحلام بصدمه/ انت من قلك ذا الكلام الفاضي، من قال انك مثقله عليهم ولا متضايقين منك لأنك مش باقي أخواتك.. والله خالي صالح لو سمعك لايزعل منك..
جوري ببكى/ كلهم يقولوا أني مش مثل البنات.. معاذ دايما يصيح عليا لأني بلعب مع العيال كره، ولما يشوفني العب بالاثقال حق عبدالرحمن يأخذها مني، حتى لما كنت العب واتسابق معاهم يضحك عليا ويقول أني مش بنت.. ليش ماتكوني رقيقه ودلوعه مثلهم..
مسكتها أحلام/ بلا هباله.. انتي عارفه انه يمزح معك، حتى علي شوفي كيف بتتضاربي معه،لكن والله انه يحبك ويقول أنك احسن وحده في البنات، وحلف إذا بشاير ولدت بنت هيسميها جوري علشان تطلع مثلك..
تابعت بهدوء واقناع/ والله ذي كلها اوهام في راسك لأنك زعلانه من خالي بس.
جوري وهي تمسح دموعها/ حتى لو كان صح ومش اوهام، انابسوي الحاجات اللي احبها،مادام ماتضرني ولا تضر أحد ولا بسوي غلط، ليش لازم اغير نفسي علشان اكون مثلهم..
أحلام/ اصلا محد بيسمح لك تغيري نفسك لأن الكل يحبك مثل منتي، لأنك جوري ومحد شبهك، ولا أحد يقدر يجي ربعك..
جوري بضيق/ طيب خلينا من الكلام الفاضي ، ذحين ايش اسوي..زواج مابتزوج.. انا بجلس هنا معاكم.. كيف اروح معاهم جده.. وانتوا بتكونوا هنا.. كيف بعيش وانا بعيده عنكم… وانتي كيف بتعيشي بدوني..
رجعت تبكي بقهر وبكت أختها معاها وتابعت من بين دموعها/ انا بسافر بلاد ثانيه غير اليمن.. مابشوفكم ولا اكلمكم،وهناك الهواء غير والناس غير،الشوارع والبيوت كلها غير.. مابتزوج.. مابتزوج..
ضمتها أحلام بقوه وهي حاسه فيها.. كيف ماتحس وهي اختها.. اتقاسموا كل شي من يوم ماانولدت جوري.. اتقاسمت معها حليب أمهاواتقاسمت معها المها وحزنها وفرحها.. حتى عماها اتقاسمته معاها ورفضت تخليها لحالها في ظلامها..
( أحلام صار لها حادث بعمر السنتين ودخلت في غيبوبه لمدة خمس شهور، ووقتها انولدت جوري، فقررت أم جوري أنها تخلي أم أحلام ترضعها كتعويض عن غياب أحلام وعلشان تساعدها تتخطى محنتها وفقدها لبنتها، اللي للأسف الحادث أثر عليها وافقدها البصر)
حست جوري براحه بعد ماتكلمت مع أحلام وطلعت شويه من اللي داخلها.. كانت متأكده انها بترتاح إذا شافتها وذا اللي صار..
أحلام بمزح/ سبحان الله أنتي ماتبكي طول السنه، كأنك تجمعي دموعك ولما تبكي مره تغرقينا..
جوري بأبتسامه/ اتخيليني ابكي مثل شيماء
صاحت أحلام / لااااا تقولي، الله يحفظك غرقيني مره في السنه ولا تغثيني كل خمس دقايق.. لا صدق شيماء كيف عايشه طبيعي كذا..
جوري/ هههههههههه والله يختي ذا سلاحها السري.. كل ماصار شي قامت توون وكل شي يجيها، لكن عبادي فديت قلبه.. ممشيها عالصراط.. يوووه نسيت..
فتحت شنطتها وطلعت اوراق ودفاتر وبهدوء/ شوفي ياحلوه… الدفاتر كملتها، سلميها بكره علشان اتأخرت وابله نور مارصدت درجتك.. وطبعت ملخصات علم النفس والنصوص والأحياء،ذاكري منها للأختبارت الشهريه،طبعا الاسئله المهمه كالعاده عل…
قاطعتها أحلام بصوت عالي/عليها ورده أنتي حفظتها..
جوري باستهبال/ معكي اين ماكنتي…. ههههههههه
أحلام بصدق/ شكرا حبيبتي، اكيد اصابعك وجعتك من الطباعه ، انتي لو تسمعي كلامي وتخليني اعطيها احد من المعهد يطبعها… .
قاطعتها جوري بحزم/ لا تخليني أحلف ..أن دريت أنك أعطيتي كتبك لأحد لساني مايخاطب لسانك طول عمري يعني حاسدتني عالراحه والسعاده اللي احسها لما أقدر اسوي لك شي..
أحلام بضيق/ والله مو قصدي.. بس أنتي بتتعبي معي ،انتي مستوعبه أنك بتدرسي كتب لمرحله غير مرحلتك.. بتكتبي لي واجباتي كل اسبوع،وتلخصي لي المواد وفوق ذا كله تطبعيها بالأله الكاتبه.. غير مذاكرتك وشغل البيت.. والله حرام عليكي نفسك.. شوفي كيف جسمك جلد على عظم..
شهقت جوري/ ذي اسمها رشاقه.. لياقه.. مرونه.. مش جلد على عظم.. وذي الألعاب و التمارين اللي بسويها ايش فايدتها.. انا بتجهز للأولمبيات.. ومحد مركز... بعدين إذا اشتكيت وتعبت بوقف من حالي… تمام ..
أحلام بضحك / تمام يا أولمبيات..
كملوا ضحكهم وسواليفهم بعد مانضموا للبقيه وبعد الغداء وداهم علي الملاهي بعد ماحكى له عبدالرحمن اللي صار فحب يغير نفسية جوري اللي فعلا نست أو تناست ،علشان تنبسط في يومها ..

انتهى البارت


لا إله إلا أنت.. سبحانك أني كنت من الظالمين



الساعة الآن 08:29 PM.

Powered by vBulletin® Version 3.8.11
Copyright ©2000 - 2022, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية