(مؤيد)
خرج لاف المنشفة على خصره وطالع في اللي نايمة عالسرير..جلس جنبها وقرب شعره المبلول من وجهها بنذالة،دفته بقهر/بايخ..ليه تصحيني كذا..
مؤيد بضحكة/مزاجي كذا..ليه أنا صاحي وأنتي نايمة.. بطتي يلاا قومي..
فاطمة بدلع/ميدو حبيبي..بس شوييييية.. حرام عليك أمس ماخليتني أنام..
ورجعت أتغطت مرة ثانية..رفع اللحاف وأنسدح جنبها وصار يبوسها في وجهها بشويش،وبهمس/أغيب يومين وأجي تستقبليني بالأحمر وتبغي تنامي..مع نفسك.. ورجع يبوسها بقوة أكبر وهي ماسكة ضحكتها ومسوية معصبة منه/ يعني كيف يعني..ماألبس وأتشيك..خلاص مرة ثانية بتلقاني بلبس المطبخ عقابا ليك..
شهق بصدمة/حرام عليكي..مو كفاية مستنيكي 23 سنه.. كمان بتعاقبيني..
طالعت فيه بنص عين وبغيض/23سنه يابكاش.. يانصاب.. ليه حبيتني وأنت في اللفة..
سحبها لصدره وضمها بقوة وبضحكة/أنقزي اللفة اللي مزعلتك لإنها أووفر شوية..لا كثير.. طيب من أولى إبتدائي لذحين كم سنة..أأممممم 18سنة يامفترية.. بعداً وولوعة وفراق قلبت أم كلثوم ومو عاجبك..
باسته في خده برقة/ميدو عن جد حبيتني، من الإبتدائي؟..
طالع في عيونها وأتنهد/والله مدري أيش أسمه ذاك..بس اللي أعرفه أني لما شفتك خارجة من بيتكم أول يوم لينا في المدرسة وأنتي ماسكه علي أخوكي ولابسة مريولك وشرايطك طايرة مع ظفايرك.. طليت في مازن وقلت له ،شوف ذيك البنت بتصير عروستي.. ومن يومها أتنيلت على عيني وحبيتك..
قرصته في كتفه/أتنيلت.. هااا.
شد شعرها بخفة/أكيد..لأني كنت متعذب وأنتي مو دارية عني..نسيتي فلوسي اللي صرفتها عليكي،نسيتي أيام البطاطس وعصير التوت ..وإيس كريم عزوز لما كنت أكله وأبقي لك اللبانه..ولا لما كنت أحرسك وما أخلي أحد يضربك ويسويلك شيئ..
ضحكت من قلبها،وبقرف/كيف أنسى اللبانه وأنت كنت تحطها في فمك وبعدين تطلعها ليا على أساس نظفتها من الإيس كريم.. ووووعع..وأية حراسة حبيبي إلا كنت خانقني ومانعني ألعب مع عيال الحارة..
طالع فيها بقهر/ذحين لبانتي صارت وووعع، وأنا اللي كنت أحرم نفسي منها لإنك كنتي تصجيني ويقلدها..الله يحليك مودي لبانه.. والعيال كانوا يشدوا شعرك ياهبلا ويقطعوه وأنتي تتنحي وتبكي..فعلاً زي البسس تأكل وتنكر..روحي خسارة إنك حبي الأول، بس ملحوقة.. شكلي بسوي زي خالد وأتزوج..
أستغرب لما سكتت رفع رأسه واتفاجأ بوجهها المصدوم ودموعها اللي تنزل على خدها.. مسك وجهها بأيديه،وبهمس/حبيبتي ليه تبكي..
شهقت ببكاء/لو حبيت وحدة غيري هموت، إذا تبغى تقتلني سويها يامؤيد..
باس شفايفها بوسة طويلة ومسح دموعها وضمها بقوة/هموت قبل ماأسويها..أنا أحبببببببك يامجنونة.. أنتي حلمي اللي أستنيته سنين علشان يتحقق..كل شيئ عشته كان علشانك..حياتي ودراستي وشغلي..كنت أشوفك فيهم..أنا قلبي ليكي وبس.. وماصدقت إني أتقدمت وأهلك وافقوا..أنا أحببببببببببك،تفهمي ذا الشيئ.
ضمته بقوة وهي تحمد ربها اللي رزقها بمؤيد وكان من نصيبها.. وراحوا في عالم الحب..

(جوري)

خرجت الحوش وردت عالجوال بفرح/السلام عليكم.. مرحبا ألف..
علي/وعليكم السلام والرحمة..مرحبا مليوووون..كيفك ياروح الروح.
جوري بإبتسامة/أكيد بشاير جنبك ياحبك في النكادة.. بخير ياقلبي جعلك بخير..أنت كيفك حبيبي وحشتني.
علي/الحمد لله في أحسن حال نسأل عنك وعن عيالك.. كيف الدنيا معك ومع العيال.
جوري بهدوء/كلهم بخير ياقلبي.. كيف أمي وخالي والعيال..
علي بضحكة/الله يعينك على نفسك..كيف أمي تقولي لها أمي وأبي تقولي له خالي،وهو أبوكي..
حكت رأسها بغباوة/ياأخي ألف مرة أقلك أتعودت..مدري كيف والله هيا مسكت معايا كذا هيا أمي وهوا خالي..ه ههههههه..ماعلينا كيف سميتي،إن شاء الله مو معذبها زي ماكنت معذبني..
علي/ وعبودي ليش ماتسألي عليه ..بس سميتك،لو تدري إني نزلتها من فوق الخزان قبل يومين ،ذكرتني بك ياجنية..
جوري/ عبودي عربجي طالع لأبوة ،هذا الشبل من ذاك الأسد ،لكن هيا... ههههههههه.. يلااا الظاهر عرقي دساس دام فيها تسلق خزانات..ههههههههه..يلااا تسليكم في غيابي.
علي/والله إنها بتسلينا،وبعدين أمي وأمك وأحلام وعبادي مايخلوا أحد يمسكها.. تشوفيها قدها مثل إبليس تسوي الشيئ ولاهمها أحد..
جوري/بسم الله عليها..بس لاتدلعها مرره ، بترجع تتعبكم..ترى مو كل الصغار عاقلين زيي.
علي/هههههههههههههههه..من عاقل؟ أنتي.. الكلام ذا على غيري يا روحي،مش عليا.
شهقت/أفااا..ذي فكرتك عني،يلا مقبوله.
علي/خذي أختك وأختصري لا تخسروني..
جوري بتريقة/والعقيد راح والعقيد جاء.. وأنت مطفر.. هههههههههههه،يلااا فدايا.
علي/وإن شاء الله عميد عما قريب..
جوري بفرحة/ألف مبرووووك، تستاهل حبيبي..لكل مجتهداً نصيب..بالتوفيق يارب.
علي/الله يبارك فيكي..يلا أنتبهي لنفسك وسلمي عالعيال وزوجك.. مع السلامة.
جوري/أستودعتك الله..
أحلام/السلام عليكم..وحشتييييييييني.
جوري/وعليكم السلام ورحمة الله وبركاته وأنتي كمان واحشتني.. كيفك يا عمري.
أحلام/الحمدلله بخير..لكن فقدتك..متى تجي عندنا.
أتنهدت وبهدوء/قريب إن شاء الله،أنتي أدعي ربنا يسهل ويجمعنا على خير..وبعدين ليه مستعجله..على شقاكي..
أحلام بحزن/مالك دخل،تعالي بس وأنا راضية تلفي بي صنعاء كلها..
جوري بمرح/لااا ياشيخه، ومن اللي كانت رح تبكي لما رحنا (باب اليمن-سوق شعبي)
أحلام/والله أنتي اللي مجنونة..من العصر لبعد العشاء وأحنا نلف برجولنا..وماخليتي عربية بطاطس وحلويات وعصير الا أكلتي منها..
ضحكت جوري بفرح/يا الله ماأحلى ذاك اليوم.. هههههههههههههههه فاكرة لما ماأنتبهت لباب المحل القزاز وخبطت فيه وكنت بطيح.. هههههههههههه، ولا لما أتزحلقت في الرصيف وخبطت في الرجال وعبادي هزئني... هههههههههههه.
أحلام/هههههههههههه فاكرة لما أشتريتي البطاطس ورشيتي عليه (البسباس-فلفل مجفف مطحون مع ثوم وزعتر وملح)بيدك، وبعدها مسحتي عيونك هههههههههههههههه، وجلستي ساعة تصيحي،وعبادي غسل وجهك بالنقاب ب3قوارير ماء وسط الشارع هههههههههههه.
جوري/أأحح ،وربي أتعذبت.. بعدها3أيام وعيوني مغطية..
أتنهدت وتابعت بحنين/ كان يوم جميييييل، شوفي كم ذكرى حلوة فيه..تعيشي عليها عمر بحاله..الله يعيدها أيام ،بس بدون فلفل..هههههههههههههههه.
علي بصراخ/طيب ياكلبة،أنا غلطان اللي أتصلت..
جوري بلكاعة/أوووبس،نسيت ماأقلك عندي رصيد دولي مجاني،خلاص راحت عليك.. بكلم عبادي فيه..
علي بقهر/أيووه عبادي حبيبك ماتخسريه، صدقيني لأضرب سميتك بسيطة.
طلعت لسانها كأنه شايفها/أأممممممممم.. أتحداك.. ههههههههههههه..خلاص حقك عليا علولي..
علي/علوا إبليسك.. قولي آمييين،يلاا مع السلامة.
جوري/ الله معاكم..
قفلت وأتنهدت بحب ، وأنصدمت بندى اللي متنحه فيها/لا إله إلا الله..مين ذا اللي ضحكك كذا..
جوري بفرح/أخواني جعلني مابكيهم..بعدين سلامات اللي يسمعك يقول ماده البوز عندك..
ندى/لااااا..أنتي أصلا زي الهبلا على طول تضحكي..بس لما تكلمي أهلك،ضحكتك تصير غير..يعني أحسها من قلبك..
لفت جوري الهرجه وبعصبية/أيووه قلتي لي هبلا ..تصدقي فكرتيني بأبلة كانت تدرسني في اليمن ،كانت تقول ليه مبتسمة طول اليوم زي الهبلا؟ أنتي ملبوسة..
ندى هزت كتفها/الحمد لله يعني مو أول وحده أقول..بعدين كم مرة أقلك لاتقعدي تدوري وتحوسي وأنتي ماسكة الجوال... خيلتيني يختي..أثبتي مكانك..
طالعتها بنص عين/يعني ماتبغيني أضحك.. ولاتبغيني أمشي وأنا أتكلم..ماتبغيني ما أتنفس بالمرة!!
ندى بضحكه/أيش رأيك تجربي ونشوف.
قربت منها جوري وكتفتها من ظهرها بسهولة لإن ندى أقصر منها، ونادت الأولاد بصراخ، خرج قصي أول واحد وهو خايف/ماما أيش فيه؟
سكت وضحك لما شافها ماسكة ندى وهي تدف جوري بخوف/جوري بلا هبالتك فكيني..
ضحكت بشر/نييييههههااااااهههههااااييي..
والله ووأعتي ولاحدش سمى عليكي يا أوطه..قصي لي المويا بسرعة.
التفتت لياسمين/جيبي حلبة التزلج ،نادر.. جيب الفيري من المطبخ.. نادين.. خليكي بعيد
وبصراخ/جنوووود...إنتشاااااااارر.
ندى بصراخ/جوري لاااا..مويا لااااا دوبي مخلصة إستشوار.. خالد دحين جاي حلفت-----
غطت فمها بسرعة/معليش ياحلوة لاتحلفيني..بعدين خلاص هتضحكي عليه طول عمرك.. ههههههههعععععععع،خليه يشوف شعرك على حقيقته.. نييههههااااهههههااااايييي .
مسكت لي المويا اللي يغسلوا فيه الحوش وفي دقيقة كانت ندى متروشه وهيا تصيح بدلع..والأولاد يرشوا عليها الشامبو..
وجوري تصرخ بمرح/دش مجاني بخدمة مميزة..تعالي لنا كل يوم..
فكت ندى بعد ماشافت العيال جابوا حلبة التزلج اللي كان عبارة عن مشمع بلاستيك سميك فرشوه في الحوش ورشته جوري بالمويا والفيري..صاروا يتزحلقوا عليه بحماس وأصواتهم طالعه..
ألتفتت لندى/تعالي ياروح طنط أتزحلئي معانا.
اتأففت بغيض/جوري حلي عني.. وربي زعلانه منك..
غمزت للأولاد وبنبرة تعجب/الحلوة زعلانه.. أفااا ذحين أراضيكي..
جريت مع الأولاد وسحبوها للمشمع ورجعوا يرشوها وسط صراخها.
خرجت أم خالد وصارت تتفرج عليهم وتضحك..راحت لها جوري ومسكت يدها برجاء/يمممممه تعالي جربي معانا..
شهقت أم خالد/فارقي هناك لا تخليني أقوم لك..
جوري بضحكه/هههههههه يمه والله تنبسطي..لاتخافي بسويلك زي نادين.. أشرت على بنت ندى اللي عمرها 3سنين وهيا جالسه عالمشمع وياسمين تدفها لقصي وقصي يدفها بالعكس وهيا تتزحلق ومبسوطة..
ضربتها أم خالد على يدها/ذا الناقص..الله يكفيني هبلك ياذي البنت،روحي العبي وأنا أتفرج عليكم وأعالج كسوركم..
جوري بثقة/أفاا عليكي يمممه..بنتك متزلجة متمرسة..إن شاء الله تجي على كدمات بس،
المهم إذا أتحمستي لاتستحي صفري بس تلقي نفسك في قلب الحدث..
ورجعت تجري وتتزحلق وتوازن نفسها علشان ماتطيح وسط تشيجع الأولاد وندى اللي إندمجت معاهم بعد ماخرب شعرها، وضاع برستيجها..وبعد شوية أنفتح الباب ودخل خالد بعصبية/صوتكم واصل لبرا.. ماتعرفوا تلعبوا بشويش.
رشته جوري بالمويا وبتحدي/إذا لعبت بشويش بنلعب زيك..ورينا شطارتك..فسخ ثوبه ودخل معاهم وبعد دقيقة كان صوته أعلى منهم..





أنتهى البارت


وحتى الورقة القادمة دمتم بخير.



سبحان الله وبحمدة.. سبحان الله العظيم.

السلام عليكم ورحمة الله وبركاته..

مساء الخير عالحلوين.. كيفكم، وحشتوني..


بالنسبة لأسئلتكم ..كل شيئ بيوضح في الورقات القادمة ،لإن مثل ماقلت لكم في مقدمة الرواية ...الرواية بتنتقل من الحاضر للماضي..

يعني لا تشيلوا هم.. بتعرفوا كيف تم لقاء خالد بندى ،وكيف تطورت علاقتها بجوري..وبنتعرف على لطيفه وليلى بشكل أكبر..

وبتدخل شخصيات جديدة وأحداث بتغير مجرى حياة بطلتنا...

مشكورين على سعة بالكم ومتابعتكم وتشجيعكم..

دمتم بخير..

،


حسبي الله لاإله إلا هو ،عليه توكلت وهو رب العرش العظيم..

-------------------

الورقة التاسعة عشر

ثلاثة هدايا مجانية تقدمها للناس: أذن صاغية لمن يود أن تسمعه،كلمة شكر لمن أعطاك بإخلاص،إبتسامة بسيطة لكل من حولك..

عائلة أبو محمد (عبدالفتاح زوج لطيفه47سنة.. محمد 18سنة،خلود 14سنة،لؤي8سنوات)

(لطيفه)
دخلت ماسكه جوالها وبغرور/مره ماعندها ذووق،شفتي لبسها كإنها جايبته من أبو عشرة..لاستايل ولا لون--------حتى بيتها مافيه ذوق ولاتناسق-----------من جد ربي معطيهم فلووس عالفاضي..

هز رأسه بيأس من عادة زوجته اللي ماتبطلها..جايه من عزومة عشاء وكالعادة ماعجبها شيئ وماخلت كلمة حش ماقالتها في حق أصحاب العزومة..
قفلت الجوال وطالعت فيه/أنت هنا!
طالع في ساعتة اللي عدت 12بعد نص الليل ،وبتريقة/لا..هناك..الحمدلله على السلامة.. كان قعدتي كمان.
فسخت عبايتها وجلست قدام التسريحة تعدل شعرها ومكياجهاوبملل/بلييييز لا تبدأ..تراني قرفانه وتعبانه ومو متحمله محاضراتك البايخة..
عبد الفتاح بهدوء/ومدام إنك تعبانه على قولك ليه ماترتاحي في بيتك وتنتبهي لعيالك.. بلاش زوجك حذفته من اللسته..
ألتفتت له بحدة/عبدالفتاح لو سمحت..بيتي أحسن بيت وأولادي موناقصهم شيئ..وأنت مو مخلي شيئ في نفسك.. سهر مع أصحابك وسفر وأستراحات وماحاسبتك على شيئ،فلا تجي دحين وتصدع رأسي وتعمل فيها الأب المثالي..
ضرب عالطاولة بقوةووقف بغضب/بيتك أحسن بيت بفضل الشغالات..وأولادك فحدث ولا حرج..واحد مفحط سنتين في تاني ثانوي وبنتك ماتدري وين الله حاطها،والثالث قرب يجيه توحد من كثر أهمالك..وأنا لو لاقي حرمه في بيتي كان أنطقيت وأترزعت عندها..بس وينها الحرمه..وينها الزوجة.. وهيا مو فاضيه حياتها كلها حفلات وعزايم وحش في فلانه وعلانه..
لطيفه بعصبية/أيوووه...علق عليا كل شيئ، أنت ولدك فاشل أنا أعمل أيه..وبنتك دلووعه ولاتحمد ربها كل طلباتها مجابه،وولدك أنت السبب في اللي هوا فيه،محاصرهم عالطالعة والنازلة أستجواب ومحاضرات.. بطل أسلوبك القديم دا تراك قربت عالخمسين.. يعني اللي اتربيت عليه خلاص حبيبي راحت عليه..وحفلاتي مالك علاقة فيها..مو مستعده أضيع حياتي وأنا دافنه نفسي علشان ألبي طلباتك ياسي السيد..
مسح وجهه بقهر/أنتي أيه يا شيخه.. أحساس معدوم، قلب مافي..متى تفهمي متى تعقلي تراكي سكيتي الأربعين ، بطلي شغل المراهقة اللي أنتي فيه-------
قاطعته بغرور/المراهقة اللي مو عاجبتك.. أنت حفيت على ما وافقت عليك..ولا نسيت إنك كنت....ولا بلاش لا تزعل.
طالع فيها بإبتسامة غريبة/لا مانسيت.. ولانسيت جميل أبوكي اللي وافق عليا ،رغم إني كنت شغال عنده..مو ذا اللي تبي تقوليه..
طلعت لها ملابس علشان تغير وطالعت فيه بإستهزاء/حلو إن الواحد يعرف قيمة نفسه.
هز رأسه بموافقة وبهدوء/مو هذا اللي صبرني طول السنين اللي فاتت..جميل أبوكي.. الرجال الطيب اللي رباني وأعتبرني زي ولده،ووقف جنبي وساعدني لحد ما أستقليت وكونت شغل خاص فيا..سنين وأنا أجامل غيري على حساب نفسي وكرامتي.. بس في النهاية كل شيئ وله حدود يالطيفه، خليكي فاكره..
لطيفه بلامبالاة/ تجامل مين..وكرامة أيه اللي بتتكلم عنها.. أيش بتسوي يعني.
لبس ثوب وأخذ أغراضه وبهدوء/لاتأخذي في بالك..أنتي خليكي في عالمك وأنتبهي شيئ يفوتك..
وخرج وقفل الباب،شمقت بقرف/عكرت مودي بلا في شكلك.. بركه ريحتني من وجهك العكر..
غيرت ملابسها ومسكت جوالها ورجعت تتصل وتكمل باقي التقرير لصديقاتها..



خلاص حبيبتي أرحمي نفسك..وراكي قومه من بدري ..

رفعت ظهرها من فوق مكينة الخياطة وهي حاسه فيه مقسوم نصين ،شافت أمها اللي سانده نفسها عالجدار بتعب،وقفت بسرعة وساعدتها تجلس وبعتاب/أمي ليه طلعتي من غرفتك..ليه مازهمتيني واجيكي ياقلبي
مسحت شعرها بحنان/هلكتي نفسك ياخوله بالخياطة دي ..شوفي الساعة كم صارت.
شافت الساعة المعلقة في الجدار المتأكل بصدمة وهي تشوفها عدت1بعد نص الليل "معقولة من 9 لدحين وأنا أخيط..ومستغربه ليه مو حاسه بضهري" طالعت في أمها بإبتسامة/مو تعبانه ياأمي،بعدين لازم أخلص الليلة علشان أسلمها بكره وأستلم الفلوس.
أم خوله/الله يرزقك برزقنا يا بنتي..بس أنتي هلكانه من الفجر،عالأقل نامي لك ساعتين علشان تعرفي تصحي أخوانك ..
غطت فمها واتثأبت بتعب/يلا دحين بنام، ماتبغي تأكلي شيئ حبيبتي.
هزت رأسها بلا ووقفت معاها ووصلتها لغرفتها اللي باين إنها أتجددت من فترة.. جدرانها باللون الأبيض والأزرق البحري.. وفيها سريرين بتصميم أمريكي بسيط بالخشب البني الفاتح ودولاب وتسريحة صغيرة بنفس اللون..نيمت أمها على سريرها وغطتها باللحاف الأزرق الثقيل/نامي وأرتاحي ولاتشغلي بالك..كل شيئ هيكون كويس.
غمضت أمها عيونها بتعب وهي تدعي لها بهمس،باست رأسها وطفت النور وطلعت بهدوء..رجعت لمكينتها ولمت أغراضها ورتبتها وحطت الفساتين اللي خلصت خياطتها في علاقات وغطتها بأكياس نايلون من الغبار ،طفت النور وراحت تتطمن على أخوانها ولحفتهم وشيكت عالباب واتأكدت إنه مقفول،ورجعت لغرفة أمها ضبطت المنبة على صلاة الفجر ورمت نفسها عالسرير الثاني ونامت في ثواني من التعب.

(جوري)

رتبت ملابسها وعلقتها،مدت يدها بتردد للعلبة المستطيلة في دولابها ،نزلتها بهدوء وقفلت باب غرفتها بالمفتاح،جلست عالأرض جنب السرير وحطت العلبة قدامها وفتحتها وبدأت تطلع منها رسائل مرتبة على شكل مجموعات مربوطة بشرايط.. فكت أول مجموعة وأخذت منها رسالة وكان الخط فيها سيئ والحروف ناقصة بشكل واضح و تدل على عمر كاتبها،إبتسمت وبدأت تقرأ المكتوب ( بسم الله.. حبيبه أميره يقوت ،كف حالك.. أنا اميره زهره الجبل ..وين انتي..يوم ويوم اجي بيت جدو وادور عليك.. مالقاك.. ماما قالت روحي بعيد..اميره الجبل زعلناه من اميره يقوت... محد يلعب معي..بيان تضربن..صلوحي ميلعب بس يكبي..اميره الجبل سوسو..)حطت الرسالة وأتذكرت سوسن بنت وداد ،هذي كانت أول رساله تكتبها لها بعد ماسافرت.. واتذكرت لما كانت تتصل عليها وداد وتكلمها سوسن وهيا زعلانه لإنها ماكانت تلقاها لما تروح بيت جدها..قالتها تجي لإنها لقيت مكان جديد تتخبئ فيه لما يلعبوا الغميضة.. وإنها أشترتلها سيف جديد علشان سيف الأميرة ياقوت أنكسر..وإنها طفشانه بيان بنت علياء تضربها وصالح ولد معاذ على طول يبكي و ما يعرف يلعب..
أخذت رسالة ثانية(خالتي الحبيبة.. وحشتيني،أنا نجحت للصف الرابع..وماما سوت لي حفلة بس أنا كنت زعلانه لإنك ماجيتي..شجرة الجوري بسقيها كل مارحت بيت جدو بجلس في الحوش وأتذكر أيامنا الجميلة..أميرة ياقوت تعالي وبس سفر .. سوسو،أميرة الجبل) مسحت دموعها وضحكت على لقب الأميرة ياقوت اللي سمتها بيه سوسن زي فيلم الكرتون اللي كانوا يتابعوه..أخذت رسالة من مجموعة ثانية كانت من نادية(السلام عليكم..حبيبتي جوري.. وحشتيييني ووحشتي البيت اللي فضي علينا من يوم سفرك..حتى الحوش فقد جريك فيه..وشجرة التين صارت وحيدة.. كلنا فقدناكي..عمي فقد قهوتك وجلستك معاه،وعمتي على طول بتتكلم عنك..حتى صلوحي أوقات كثيرة يبكي ويروح غرفتك يدور عليكي..معاذ على طول يتذكر نقاركم وصياحكم،وأنا حاسه بملل ووحشة بدونك.. وعبدالرحمن مدري كيف عامل في غربته كل شيئ أتغير في غيابك، لكن اللي مطمنا إنك مرتاحة ومبسوطة مع خالد ،وإنك هناك وسط أهلك..مدام أنتي بخير يكفينا نشوفك في الأجازة ونسمع صوتك من فترة الثانية-----
ماقدرت تكمل الرسالة وضمتها لصدرها وهي تشهق ببكاء مكتوم "آآآه،بخير ..أنا بخير ..بخير مادام أنتوا مرتاحين ومو شاغلين بالكم عليا..رح أكون بخير ومارح أخوفكم عليا أبداً..كفاية الغالي اللي أتعذب ومرض بسببي" أتذكرت مكالمتها لهم لما خبرتهم بزواج خالد،أتذكرت زعل أبوها.. صدمة أمها..غضب معاذ..كره عبدالرحمن.. بكاء أخواتها.. رد فعلهم الأول هيج مشاعر الحنين والشوق لهم وحسسها ببعد المسافة بينهم، حسسها بضعفها وحاجتها لهم،كانت محتاجة حضنهم ، محتاجة تفضفض لهم وتحكي لهم سنين عاشتها وهي حية ميتة.. أهتمامهم،خوفهم ،لهفتهم،قهرهم عليها، أسئلتهم ربطت لسانها وماعرفت ترد عليهم..أنتي بخير؟..لاتزعلي..طز فيه.. هنجي نأخذك وخليه يتزوج 10حريم.. أما رد فعلهم الثاني فحطم باقي حصون القوة اللي فيها..ليه أتزوج.. وكيف..أيش نقصتي عليه.. ليش ماقال لهم..والأهم ليش ماكلمتينا من البداية.. وليش جالسة معاه للأن.. أسئلة كثيرة مالقت لها جواب مقنع يريحهم على الأقل من وجهة نظرهم..ولما أستوعبوا الخبر بعد يومين من الإتصالات قرر أبوها إنه بيجي وبيأخذها لحد مايتفاهموا مع خالد ويعرفوا أيش الحكاية..لكنها صدمتهم ببرودها وحزمها..قالتها بكل وضوح..أنا كنت موافقة ورحت خطبتها ليه وحضرت زواجه،وأشترطت عليه سكنها معايا..كل شيئ تم برضايا وعلمي..وإنها ماهتسافر معاهم علشان كذا لا يجوا ويتعبوا نفسهم.. وإنها بخير ومرتاحه ورح تزورهم في أقرب فرصة..كلامها كان حاسم وغير قابل للنقاش، قفلت عليهم أي طريق للنقاش معاها خاصة بعد ماوضحت لهم أقتناعها التام بزواجه وإنه حقه والشرع حلل له أربع،و ما دام إنه قايم بواجباته ومو مقصر عليها بشيئ فمالها حق تزعل أوتطلب الطلاق..وماكان قدامهم أمام أصرارها غير إنهم يرضخوا للأمر الواقع رغم إنهم زعلوا منها وعليها،أبوها كان حاقد على خالد وحاس بالذنب والندم لإن خالد كان أختياره اللي عمره ما شك في صحته. كلمها معاذ وعلي بحميه وصارحوها إنه بيكون لهم كلام مع خالد وهي أعطتهم الضوء الأخضر ،قالت لهم أنتوا أهلي ولكم الحق تدافعوا عني وتبينوا له إني لي عزوه وسند،بس بدون ماتقطعوا معاه طريق الود والرحم..
وفعلا أخذ خالد نصيبه وزيادة من اللوم والعتاب وكلام عن إنه ماصان الأمانه ولا عمل بأقل واجباتها اللي تتمثل في إنه كان المفروض يعطيهم خبر علشان ماتكون جوري لوحدها في ذا الموقف،خاصة إنها معاه في غربة ،وإنه بحركته ذي لغى وجودهم وما أحترمهم وأفتكر إنها مالها أهل يسألوا عليها..وكلام كثير في الصميم .. وفي الأخير وصلوا له معلومة مهمة وهي إنها لو جات في أي وقت تشكي منه فلا يحلم إنه يشوف ظفرها أو طرف شعرها..
أستمرت في قراءة مقتطفات من رسايلها ..وأتذكرت سفرها بعد زواج خالد وكيف أستقبلوها بالدموع والأحضان ومشاعر الحزن والشفقة على حالها..وكيف أستقبلتهم هي بالإبتسامات وصوت ضحكتها الرنان اللي مافارقتها طول الشهرين اللي قضتها معاهم.. اتذكرت حماسها ولعبها ومزحها وجنونها مع كل واحد فيهم وكيف بينت للكل راحتها وعدم أهتمامها ،كيف وصلت للكل فكرة أنا بخير ومبسوطة وسعيدة في حياتي ومافي أي شيئ أتغير فيا بزواج خالد..أنا باقية نفسي المجنونة..المرحة.. القوية.. الخجولة..وأهم شيئ أنا الأم اللي هتحافظ على بيتها وأولادها من التشتت والضياع..واجهت نظرات الإتهام والشفقة في عيون الناس ..وكلامهم الصريح والمبطن بألف تلميح وتلميح بوجهه مبتسم وقلب بارد ، ومازادوها غير قوة وقناعة باللي عملته، وكان ردها الدائم..حقه الشرعي، ولا أنا أول وحدة زوجها يتزوج عليها ولا تكون أخر وحده.. ورغم إنهاكانت جوري المرحة إلا إن الكل لاحظ تغيرها.. صارت أقوى من قبل وتفكيرها نضج وصارت تفكر بطريقة ماتعودوا عليها ..ما عادت جوري الطفلة الخجولة واللي تكتفي بالصمت في وجود الأغراب..خجلها غلفه البرود..وصمتها اتغلف بالحدة.. كانت جوري ووحدها تشبها ..
رن جوالها وصحاها من ذكرياتها المفرحة المبكية،شافت جوالها ينور بأسم توأم روحي ، فكت الخط وبحب/السلام عليكم ورحمة الله وبركاته..هلابقلبي وحياتي وعمري.
عبدالرحمن بحب مماثل/وعليكم السلام ورحمة الله وبركاته..أهلين بشمسي وقمري وكل ورودي. وحشتييييييني ياقردتي.
شهقت جوري/الله أكبر..طيرتني لسابع سماء وخسفتني لسابع أرض في ثواني.. طيب أستنى شوية.
عبدالرحمن/هههههههههههه علشان رأسك لايكبر ،تعرفي التوازن مطلوب..كيفك حبيبتي..
جوري بضحكة/الحمد لله حبيبي في أحسن حال..توك على بالي حبيبي كنت أفكر فيكم..
عبدالرحمن بجدية/قسم أني في الشركة.. وفجأة وبدون مقدمات حسيت بقلبي يرفس ويخبط وينطنط.. قلت بس ذي أكيد أنتي محتاجتني ...تعرفي توارد الأفكار معاكي مضبوط عالعالي.
جوري بإبتسامة/والله ماكذبت..بس ماصار توارد أفكار ذا اللي كله خبط ورفس ونطنطه..من جد قردة.. ههههههههه..كيف غنى وكيف حبيبة عمتها..وحشوووني.
عبدالرحمن بهيام/ياقلبي قلبااااه على غناتي بخير وتسلم عليكي..وحبيبتك تجنن وجننتنا معاها..
جوري/ربي يسعدها والله لايحرمكم من بعض..وسلامة قلبك ياعنترة،أيش سوت فيك عبلة؟
عبدالرحمن/زعلانة مني،وخرجت وهي ماده البوز وقالبة صورتها..
جوري بإستغراب/أوووف لذي الدرجة.. أيش عامل،غنى عاقلة ومافي منها و ما تزعل منك لله.. قول وأشجيني أيش عملت؟
عبدالرحمن بجدية/وربي ما عملت شيئ..هيا بس كبرت الموضوع وسوت قصة حزينة.
جوري بقلق/عبادي أخلص عليا وقول،أيش صار..
عبدالرحمن/أنتي هبلا! أقلك مافي شيئ..كل الموضوع إني مسافر 3شهور عندي شغل وهي أول ماسمعت ركبوها الجن وطولتها وهي قصيرة.
جوري بهدوء/وأيش الشغل ذا..تبع الشركة؟
عبدالرحمن/لااا..شغل خاص.
جوري بمرح/وعلى وين العزم إن شاء الله.. عبدالرحمن بلكاعة/حزري فزري أنا وين مسافر؟

(ندى)

قامت من النوم بكسل وغسلت وجهها وغيرت ملابسها بشورت أسود لفوق الركبة وتيشرت أصفر ولبست فلات أصفر وأستشورت شعرها القصير وطلعت الصالة لقت أمها جالسة تأكل بنتها نادين..ونادر يتفرج على سبيس تون..
جلست جنب أمها/صباح الخير مامي.
أم ندى/ أي صباح حبيبتي..قرب الظهر..كل ذا نوم..
رجعت رأسها عالكنب وغمضت عيونها/وربي فيا نوووم.. خليني أعوض شوية..
أم ندى بضحكة/ووول عليكي.. بسك نوم ماجلست معاكي غير ساعة لما جيتي أمس.
فتحت عيونها ونادت الشغالة/نينا..جيبي النسكافية.. ماما كم الساعة.
أم ندى وهي تمسح وجهه نادين/11حبيبتي، كلي شيئ مع النسكافية على مايجهز الغداء.
هزت رأسها برفض/بعدين مارح أتغدى..
التفتت لنادر/يلا حبيبي قوم أتروش علشان صلاة الجمعة.
نادر/أتروشت ياماما وأتوضيت ،بس باقي البس الثوب لما يجي جدي.
دخل أبو ندى وسلم عليهم وردو السلام، جلس أبو ندى جنب نادر وحط ذراعه على كتف نادر/مرحبا بالشيخ نادر..
باس نادر رأسه وفخم صوته/مرحبا ألف، ماعليك زود.
ضحكوا على كلامه اللي أكبر منه،ابوندى بفخر/تسلم ياشيخ..والله إنك بيضت الوجه أمس..
ألتفت لندى/ولدك رجال ماشاء الله ،ماشفتوه أمس في المجلس كيف سلم عالضيوف وقهواهم وناداهم للعشاء..والله وعرفتي تربيه..الله يحفظه.
ندى بضحكة/آمييين،بس والله ياباباحكاية القهوة دي متكفل فيها قصي حبيبي مايقصر هوا اللي معلمه.
أبوندى/والله قصي ماشاء الله عليه رجال من ظهر رجال..والله ماكإن عمره 11سنه.. الواحد يعتمد عليه وهوا مطمن.
أم ندى بإعجاب/والله تربية جوري ما عليها كلام..حتى بنتها ماشاء الله أدب وجمال وست بيت..عيني عليهم بارده.
أبو ندى بإستهبال/شوفي أمك ياندى بدل ماتمدح زوجك وتقول خالد ربى ،تمدح ضرتك..
ندى بإبتسامة/ماما ماكذبت..خالد الله يعينه يدور رزقنا،يلاا نشوفه أخر الأسبوع زي الخلق..وجوري أختي مو ضرتي،وهي اللي قاعدة عليهم تربيهم وتعلمهم..حتى قصي هيا اللي تعلمه وتدخله مجلس الرجال وترسله كل المشاوير مع أبوه وعمانه،حتى لما سافرنا عند أهلها،ماكنا نشوفه على طول مع الرجال مع إني كنت أخاصمها وأقولها صغير لاتعقديه..بس كانت تقول خليه يتعلم ويصير رجال،مو صاير له شيئ..وطلع كلامها صح..دحين نعتمد على قصي الله يحميه في كل مشاويرنا وطلباتنا، ودحين مستلمه نادر ومخليته يلازم قصي زي ظله.. هههههههههه،صاير نسخة أخوة ربي يسعدهم.
ألتفت أبو ندى لنادر/تحب ماما جوري وياسمين وقصي..ولا ماما ندى ونادين!!
نادر بإبتسامة/أحبهم كلهم زي بعض..
أبو ندى/لا ماينفع ،لازم تحب أحد أكثر من الثاني..
هز رأسه برفض/لااا..أحبهم كلهم..ماماتي يقولوا لازم نحب كلنا زي بعض..
ضحك عليه/أيش ماماتي ذي.
نادر بملل/جدي أنت ماتعرف..ماما ندى وماما جوري.
أبو ندى/الله يخليكم لبعض ويحنن قلوبكم على بعض..
ألتفت لندى/والله أنا ذي البنت حبيتها من يوم ماجات تخطبك لزوجها..قلت معقولة في حرمة كذا،كنت شاك فيها بس لما كلمتني أرتحت لكلامها وحسيتها ماعندها شغل الضراير وكيدهم،ولما صليت إستخارة أرتحت وأتوكلت على الله ووافقت..والحمد لله صار لك سنين معاها وماجاكي منها غير كل خير،رغم إن أمك ماكانت حابتها أبداً،ولا تنكري.
ضحكت أم ندى بإحراج/كنت خايفة على ندى منها مهما كان ذي ضرتها،غير كلام لطيفه اللي خوفني ،بس مع العشرة عرفت إني ظلمتها..
ندى/والله يا بابا حتى أنا كنت ظالمتها وأسويلها حركات مالها داعي،بس دا كله من زن ماما ولطيفه وليلى..هما اللي كانوا يبلفوني ويحرشوني عليها،بس لما عشت معاها وعرفتها عرفت إن ربي عوضني بيها عن الأخوان اللي ربي ما كتبهم ليا.
أم ندى/والله أنا ماأنسى وقفتها مع ندى وكيف شالتها على ظهرها وأسعفتها للطوارئ. وبعدها طول فترة حملها أهتمت بيها وبصحتها وكإنها أمها مو أختها..حتى أنا تعاملني بأدب وأحترام ولاكإني كنت أدقها بالهرج وأحرجها قدام الناس كل ما أجتمعنا.. وتعامل عيال ندى زي عيالها وماتفرق بينهم حتى في الحب،والحمد لله اللي مسخرهم لبعض،والله يحميهم من العين ويكفيهم شر الناس.
ندى بصدق/آآمين،من جد ماما أدعيلنا..وربي صرت أخاف من الناس لمايسألونا.. كيف وليه وأيش السر..حسبي الله عليهم.
قام أبو ندى ونادر علشان الصلاة وسابهم يرجعوا ذكرياتهم ..
---------------
(ليلى)
رفعت الخط وبعصبية/وينك يازفته..قدامك خمس دقائق ياسماح ورح أمشي.
سماح بدلع/حبيبة قلبي شوفيني قدامك.
قفلت ليلى الخط ورفعت رأسها وشافت صحبتها سماح جاية وريحة عطرها سابقتها وأنتبهت للرجال اللي ماسك يدها وجاي معاها،قربت منها وباست خدها بدلع/هااااااي ياحلوة.
نزلت سماح طرحتها على كتفها والتفتت للي معاها/ودي ياسيدي حلا صحبتي الأنتيم.. حلا..أعرفك على أوسم رجال في جدة.. زياد.
طالع فيها زياد بنظرة تفحصية بداية من لثمتها الشفافة ونظارتها الشمسية اللي غطت عيونها،لعبايتها الكتف المطرزة اللي طالعة منها يدها المصبوغة بالمناكير الأحمر وأكسسواراتها الشيك..مد يده بإعجاب/هلا والله بالحلا كله.
طالعت فيه من فوق لتحت وطنشت يده الممدوده ولفت لسماح ببرود/ماقلتي لي إنك جايبه معاكي محرم.
حس بحرج من حركتها ونزل يده وجلس عالطاولة،ضحكت سماح بسماجه/حلوووه محرم.. من وين جبتيها دي،بعدين هيا جات كدا فجأة كلمني في أخر لحظة وقلت له يجي..بروح ازبط الميك آب،أطلبوا لي إسبريسو ياحلوين.
ألتفت لها زياد وهو كاتم عصبيتة/إذا وجودي مضايقك بروح طاولة ثانية.
ردت بلامبالاة/وأنا مالي ومالك علشان تضايقني ولا لا،أنت جاي مع سماح روح قلها دا الكلام..
جاهم الجرسون يأخذ طلبهم،وبعد ماراح وقف زياد وراح طاولة جنبها بدون ماتلتفت له ،مسكت جوالها وأتصلت على وحده من البنات وقعدت تتكلم معاها وتضحك بدلع وزياد حاقد منها لإنها أهانته بحركتها،بس اللي مصبره إن سماح قالت إنها فوق الحلوة..جاتهم سماح وأستغربت لما شافته في طاولة لوحده،سألت ليلى/حلا أنتي طيرتي زياد هناك.
قفلت الجوال وببرود/لا طيرته ولا كلمته،هوا اللي راح..بعدين مارح تبطلي حركاتك دي، قلت لك تبي تطلعي مع أحد لاتورطيني معاكي أنا وحده متزوجة.
سماح بوقاحة/أنا كمان متزوجة أيش دخل دي في دي..دي كلها تسالي ياقلبي..
ليلى/حبيبتي أنا أتسلى عالفون بس ،لكن طلعات والكلام دا لا،لاتقروشيني معاكي.
سماح بشويش/دحين هوا غلط عليكي، ضايقك بشيئ،ترى زياد جنتل مان وفري فاني.
ليلى بملل/والمطلوب..جيبي من الأخر.
سماح/كلميه يجي،عالأقل يشرب معانا القهوة. .وبعدهاإزا ماحبيتيه همشيه..أوكي.
ليلى بغرور/تبي تكلميه يجي براحتك،لكن أنا أنسي يا ماما،كفاية وافقت يقعد معانا.
راحت سماح وكلمته ولحظات وجاء جلس معاهم.


(مؤيد)
رفس الباب برجله ودخل وهو شايل فاطمة ويصرخ بإستهبال/أمي..ماما..يأم خالد..
جات أم خالد وجوري وندى والأولاد مفجوعين من صراخه،جريت عليه جوري لماشافت فاطمة في حضنه/فطوم حبيبتي، أيش بها.
خبت فاطمة رأسها صدرة وهي تخبط فيه.
مؤيد بفرح/حامل ..بطتي حامل..حامل.
أتنهدت جوري براحة واتلموا عليهم يباركوا لهم..نزل فاطمة جنبه وباس رأس أمه ويدها وهي تمسح دموعها وتبارك له ولفاطمة، باركت لهم ندى والأولاد ،أستغرب مؤيد جوري اللي طنشتهم وماباركت لهم وراحت المطبخ ونادت الأولاد..طالع في فاطمة وبهمس/هيا زعلت؟
إبتسمت فاطمةوهزت كتفها بمدري.
وفجأة أنطفت الأنوار وخرجت جوري شايلة كيكة والأولاد ماسكين شعلات نارية صغيرة ،قربوا من مؤيد وفاطمة وفرقعت لهم ندى الطراطيع اللي كلها ورق ملون وسط فرح و صراخ الأولاد وإستغراب مؤيد من الكيكة كانت نصها بالفانيليا والفواكة والنص الثاني بالشوكولاته ومكتوب فيها (ألف مبروك m&f)طالع فيها مؤيد/بسم الله ..أيش عرفك دوبنا راجعين من المستشفى.
شغلوا الأنوار وجوري ضمت فاطمة وبفرحة/ألف مليون تريليون مبرووووك. مدت يدها لمؤيد وقبل مايسلم عليها سحبت يدها وضربته على رأسه/آآآي ،يابنت اللذينا.. ليه كذا.
طلعت لسانها تنرفزه/علشان تبطل هبل ياسخيف ياسامج..بيجيك ولد ولا بنت وبدل ماتعقل جاي تجلطنا..خوفتنا يابايخ.
فرك رأسه مكان ضربتها/يدك زي المرزبه ماشاء الله ..كيف عرفتي ومتى جهزتوا كل ذا.
حركت حواجبها/أدري من أمس ياطيب، اليوم راحت علشان تتأكد.
أتخصر وألتفت لفاطمة/ياخاينة تقولي لها قبلي..كلهم عرفوا قبلي.
هزت رأسها بنفي وبإرتباك/لا وربي ما كلمت أحد..
شدت جوري أذنه/بلاغباوه..لاتسويلها سالفة محد كان عارف غيري لإني اللي جبت لها جهاز تحليل الحمل أمس وقلنا اليوم تتأكد.
والكيكة عملتها ومحد شافها غير دوبهم.
طالع فيها بقهر/جوري أحترميني قدام ولدي..هزيتي صورتي قدامه،كل شوية تلطشيني،والقهر ماأقدر أمد يدي..ولا كان فقعت وجهك..
فكوا عليه ضحك وهومسوي زعلان وطايح أكل في الكيكة، وجوري تنرفزه/خليني أعوض قلة أدبك ومدة يدك عليازمان،صدق اللي قال الدنيا دوارة..بعدين أنت كيف زعلان! وشغال لغ.
مؤيد بزعل/ترى كنت ألعب معاكي ،يالطيف قلبك أسود..وتراها مو طعمه بس حرام تترمي ،أدري محد بيرضى يأكلها غيري.
وألتفت لأمه وفاطمة وبقهر/والله مدري أيش وضعي بينكم،لا أم تدافع عني ولا زوجة.. زوجك ينضرب وانتي شغالة ضحك كأنك مبسوطة..لو ولدي مو في بطنك كنت وريتك شغلك مزبوط.
ندى بلكاعة/والله فاطمة صديقة صدوقة.. يعني أنسى تقلب على جوري علشانك..
حط الشوكة من يده وطالع فيها/ترى أنا أعرفك من قبلها..أشتغلت لك بودي جارد وحارس عمارة ومرسال رايح جاي لبيتكم.. يعني اتمرمطت وطلعت عيني علشان،تجي وتسوي فيها وفية ليها بنحرك في نص الصالة و أيتم ولدي قبل لا يتولد.
قرصته أمه في فخذه بقوة/أعوذ بالله من لسانك..لاتفاول وأذكر الله.
جوري جلست عالأرض ومسكت بطنها من كثر الضحك/هههههههههههه ياربي كذا كثير هههههههههههه،ماشاء الله عليك ،أنت عادي وطبيعي،أنا لو مكانك أختفي..أطير... ههههههه.
حقد منها وقام لعندها وهيا تضحك ومطنشته وفجأة صاحت ونطت واقفة وبصدمة/ياحيواااااااان ،وربي ماأعديها ليك..
طالعوا فيها ووجهها وجلال صلاتها كله مويا وهو واقف عند باب الصالة وماسك جك المويا ويحركه قدامها بنرفزه/هههههههههاااااااااااااااااي، أديها ميه تديك طراوه..وربي ذحين بس أرتحت..نعيماً ياأختي..حمام الهناء.
جوري بضحكة/الله ينعم عليك ،قد الحركة ذي؟
مؤيد يرقص حواجبه/قدها وأنا أبو محمد.. أنتي بنت أمك لو قدرتي تمسكيني.
جلست جنب فاطمة اللي أعطتها مناديل ومسحت وجهها وبتهديد/وليه مستعجل ياحبيبي..الأيام قدامنا وأدينا بنتسلى..وأنا وأنت قاعدين هنروح فين من بعض.
أم خالد/تراكم كبرتوا..منتي بنت ال15.. وأنت ياعبيط تراك سكيت 23 منت بزر ،أستحي على طولك..ماتكلمي زوجك يختي.
فاطمة بضحكة/والله ياعمة أخوان ويختلصوا مع بعض..من يوم ماعرفتهم وهما زي البس والفار،أنا حامل وأخاف عاللي في بطني،موناقصه جنانهم .
مؤيد بتفكير/والله كنت ناوي تعشوني على شرف الخبر السعيد،بس الأجواء ما تساعد.. علشان كذا مضطر أعشي نفسي وحرمي المصون..وأشوفكم على خير..
حط الجك عالأرض وطالع فيهم/بطتي مضطر أتخلى عنك وأسبقك للسيارة لإني ما أضمن المتوحشة اللي جنبك لو دخلت يمكن ماأطلع قطعة وحدة..فالحقيني على برا، ولاتنسي تجيبي معاكي كيكتي.
ياسمين/كيكتك مع نفسك..تراك ماكل نصها.
عض على شفايفه بقهر/أنقلعي ياسنفوره مو باقي غيرك يا ربع المتر..أختي حبيبتي سوتها ليا ،أيش دخل أهلك..وربي يابطتي لو ماجبتي الكيكة إنك.. إنك بشوفلك حل بعدين..سلام ياماماتي.
سابهم وطلع وسط ضحكهم ،حطت جوري الكيكة في حافظة وودعت فاطمة..





أنتهى البارت


دمتم بالخير..



اللهم صل علي سيدنا محمداً وعلى آل سيدنا محمد الطيبين الطاهرين

حسبي الله لا إله إلا هو..عليه توكلت وهو رب العرش العظيم
-----------------

الورقة العشرون

نعاني،نتألم من الداخل ونخفي الكثير من أحزاننا..من أجل أن نبرهن بأننا نتحمل.. ونحن عكس ذلك!!



(ياسمين)

أبا ورق عنب وتويكس.
ياسمين/طيب فهمت،هوا نفس الطلب كل يوم يارؤى.
رؤى/يمكن تنسي مع زحمة البنات.
سلوى/ياسمين دفي البنات وأزنقي نفسك بينهم ،خلصينا.
ياسمين بطفش/خدوا الفلوس وأطلعوا من رأسي.. بستناكم في مكانا.
سابتهم وراحت تحت الدرج وفرشت شرشفهم اللي حاطينه هناك..وأول ماقعدت جاتها بنت قاصه شعرها بوي ومشمرة أكمام قميصها ورافعه مريولها ورابطته عند الخصر وتحته جينز..طالعت فيها ياسمين بتوتر ولفت تشوف صحباتها،جلست البنت قدامها وهي تتأملها بإبتسامة وبصوت خشن/صباحك قشطة ياقشطة.
أرتبكت وحاولت تبين طبيعية/صباح النور.. هلا عبير.
كشرت عبير/عبووود.. عبود ياحلوةمالحقتي تنسي يا ياسمينتي.
ياسمين/أنا مو ياسمينة حد.
عبير/عازمك عالفطور..تعالي..
ياسمين بإبتسامة/شكراً،البنات جايين ومعاهم الفطور.
رؤي/هلا هلا عبير،اتفضلي معانا.
عبير/يالله صباح خير..قلنا عبووود.. أنتوا ماتفهموا .
سلوى/عبود حمود،براحتك روقينا بس وأقعدي أفطري.
كشرت بوجهها/لا شكراً..لينا فطور ياحلوة غمزت لياسمين وراحت..البنات طالعوا في ياسمين اللي لونها أنخطف،رؤى/ما عليكي منها ذي وحده فاصلة.
سلوى بقلق/لازم نتصرف..ماينفع نسيبها كذا.
ياسمين برجفة/بنات والله خايفة منها، شوفوا كيف تطل فيا،وربي مو طبيعية.
سلوى/المشكلة حاطتك في بالها الحيوانة.
رؤى بملل/ترى أديتوها أكبر من حجمها،أيش هتسوي يعني.
ياسمين بحدة/أقلك نظراتها ماتريح،وليها فترة تحاول تقرب مني وتقلي معجبة ومدري أيش شكله..
رؤى/ياهووو..تراها موضة وطالعين فيها.. قلك معجبة وأحبك والهبل دا..يعني هتخاويكي من جد.
سلوى بعصبية/وربي محد أهبل غيرك..أنتي فاكره إنها تمزح ،تراها من جد مسوية حبيبه وتعجب بالبنات وتخاويهم.
ياسمين بتفكير/كيف حبيبه وتخاويهم،أيش بيعملوا يعني.
عصبت منها سلوى/يعني مفكره نفسها ولد وتتعرف على بنات وتعاكسهم وحركات قلة أدب،فهمتي ياهبلا منك ليها.
ضحكت رؤى وشهقت ياسمين بخوف/أنتي من جدك ولاتمزحي..
رؤى/هههههههههه،يختي أنتي عليكي هرج، مدري من وين تجيبيه..أيش الهرج المفقع دا.
سلوى بتأفف/فقعوا دماغك ياشيخة..وربي مو هرج شفتها بعيني ورح أخليكم تشوفوا اليوم..
ياسمين برفض/مابا أشوف شيئ،خلوها تحل عني وبس..دي باين عليها مجنونة،أهلها كيف سايبينها كدا.
سلوى/أيش أقول بس،شكلهم مو دارين عن جدها.. المشكلة مو فيها بس،شفت غيرها كم وحدة بنفس الهرجة..أيش بجدهم البنات انهبلوا فجأة وقلبوا عيال كذا.
رؤى تأكل ولا على بالها/قلتلكم ماصدقتوني، ترى من جد موضة..كل يوم والتاني تجيني وحدة تقلي أنا بويا وأسمي مدري أيه..وربي عاهات.
ياسمين بقلق/بس كدا غلط،هما بنات كيف يتصرفوا زي الأولاد ،وأيش حكاية معجبة وأحبك وتخاويني دي..هما بيوصلوا لأية بالضبط..أيش يبغوا.
قاطعهم صوت الجرس اللي رن وأعلن نهاية الفسحة.. وقفت سلوى بتصميم/دحين أوريكم أيش يبغوا ،ورح تفهموا كلامي..
ياسمين بخوف/سلوى الله يسعدك مالنا وما لهم،بطريقتهم..
رؤى بحماس/لا لا خلينا نشوف،أبعرف أيش هرجتهم دول.
سلوى/أستنوا بس لما تفضى الساحة،وأول ماتشوفوا الأبلات دخلوا،جري عالحمامات بس بهدوء علشان ماينتبهوا علينا،دن..
رؤى وياسمين/دن.
وبعد دقائق فضيت الساحة ودخلوا المعلمات واتسحبوا البنات عالحمامات بهدوء..سحبتهم سلوى واتخبوا وراء جدار بحيث يكشفوا الحمامات ومايبانوا..وبعد لحظات شافوا عبير ومعاها كم بنت وكانوا ب-----------
غطت ياسمين فمها بصدمة من اللي شافته وطالعت في رؤى اللي ما كانت أقل صدمة منها،سحبتهم سلوى وطلعوا برا ومشيوا ناحية فصلهم بخطوات مهزوزة. سلوى بأسف/ياسمين وربي ماكنت أدري..أول مرة أشوفها معاهم..
هزت ياسمين رأسها بصمت ودخلوا الفصل وبالها مع اللي شافته.

(خالد)
مرت كم سنة على زواجي والحمد لله مو حاس بأي ندم على قراري..معرفتي بندى وزواجي منها أحلى شيئ صار في حياتي. كل شيئ فيها يجذبني شكلها،دلعها،حبها ليا،أعتمادها عليا في كل شيئ،والأهم غيرتها..ومع إنه بتجمعها علاقة قوية مع جوري وصاروا زي، لا صاروا فعلا أخوات.. يحبوا بعض ويخافوا على بعض ،وكل اللي يشوفهم لايمكن يجي في باله إنهم ضراير.. حتى ذي الكلمة مايحبوها.. ورغم كل ذا إلا إنها بتغير بشكل مو طبيعي من شيئ أسمه جوري..أي شيئ يتعلق بيها بيوصلها لدرجة الجنون،مجرد إني أنادي جوري أو أجيب سيرتها يخلي عداد الغيرة عندها يوصل لآخر حد..رغم إن علاقتي بجوري جداً عادية بل وأكثر من عادية..يعني هيا معقدة ومو معقدة.. كيف أفهمكم..يعني صح أنا أعشق شيئ أسمه ندى،لكن في نفس الوقت جوري ليها وضع خاص،كنت متخيل إن حياتنا بتتعقد بعد زواجي لفترة معينة ،عالأقل لحد ماتتقبل وجود ندى بينا خاصة إنها كفشتني في مواقف محرجة،بس صدمتني بإنها عدت الموضوع بعد ماسمعتني كلمتين لا أكثر..تدروا أحلى شيئ فيها واللي يعجبني بقوة إنها دايماً عندها القدرة على الفصل بين اللي بيصير في حياتها وبين واجباتها تجاة غيرها ..سواءً مع أهلي أو معايا..أكيد فهمتوا قصدي..وأنا بصراحة مرتاح في وضعي معاها،يعني مهما كنت أحب ندى وأشوفها في عيني أحلى وحده..فجوري للأمانة أنثى جدا جميلة وزوجتي وأنا رجال ليا متطلبات واحتياجات..والحمد لله تقدروا تقولوا عن علاقتنا إنها صداقة أكثر منها زواج،هيا بالنسبة ليا زوجة وصديقة أقدر أعتمد عليها في أصعب الظروف وأنا واثق من قدرتها على حل الأمور بطريقة مثالية..أخت مافي منها سواءً ليا أولأخواني بنت بارة بأمي.. وفي نفس الوقت أم مثالية حنونة وحازمة..لما شفتها كيف تعامل الأولاد ولاتفرق بينهم وتربيهم وتعلمهم مع بعض بنفس الطريقة، وكيف صاروا على قلب واحد وماعندهم عقدة حرمة الأب ولا حكاية ذا أخويا وذا شقيقي.. فهمت اللي كانت تقصده بكلامها وقت ماشرطت عليا أسكن ندى معاها..بصراحة أوقات بخاف أحسد نفسي على حياتي ،كل اللي أعرفهم ومتزوجين أثنين طالعة عينهم وبسمع منهم هروج تشيب الرأس من مقالب الحريم وشغل الضراير..بس ربنا وفقني بحرمتين مافي منهم..ندى حب حياتي ونصي الثاني، وجوري رغم إني مو عارف المسمى اللي ممكن أطلقه عليها..إلا إني متأكد إنها شيئ مهم وثابت في حياتي زي ما قالت عليا مرة..يمكن أكون أناني في تفكيري وأكون ظالمها،بس مشاعري مو بيدي..كل اللي أقدر أعمله إني أعدل بينهم في الحقوق والواجبات.
والحمد لله حياتنا ماشية كأحسن مايكون.


(سارة)
مسكت جوالها وأتصلت للمرة الثالثة ومازال الجوال مغلق ..رمت جوالها بقهر وهي تتوعد لسعد زوجها بأبشع عقاب.. صار له يومين برا البيت وماجاها أي خبر عنه،كل اللي قاله عنده مهمة ومارح يقدر يكلمها لحد مايخلصها ونفس الكلام اللي يقوله لها قبل كل مهمة يطلعها واللي مايريحها أبداً..راحت تشوف ولدها عبدالله اللي كمل السنتين ولقته نايم..رجعت تصحح دفاتر البنات وهيا تحاول تشغل نفسها وتنسى الضيقة اللي حاسه فيها،وبعد ثالث دفتر سابتها عالطاولة لإنها ماكانت شايفة اللي بتصححه..راحت أتوضت وصلت ركعتين وهي تدعي له وتستودعه الله.
------------------
(مازن)

Mazin..you have to take the request table 8
(مازن عليك أن تأخذ طلب طاولة 8)
مازن/ok Marc.
راح لحد الطاولة وبإبتسامة/ Hello, I Mazen and I'm in charge of the service tonight
(مرحباً،أنا مازن وأنا المسؤل عن خدمتكم الليلة)
أخذ طلب أفراد الطاولة الأربعة بأدب وسهر على راحتهم لحد ماخلصت سهرتهم ودفعوا الحساب وبقشيش كبير لمازن وطلعوا..
أتوجه لمارك بتعب/ This was the last table for me tonight
(كانت هذة أخر طاولة لي لهذة الليلة)
حط مارك يده على كتف مازن بإبتسامة وبعربية مكسرة/.ياتيك افيه هبيبي ..
مازن بضحكة/الله يعافيك، ههههههههههه..يجي منك.. I'm going to sleep.. good night
(سأذهب لأنام.. تصبح على خير)
مارك/good night
سلمه حساب الليلة وراح غير ملابسة في غرفة الموظفين وقفل خزانتة وطلع..
ركب السيارة وهو يتثأب.. شاف ساعته 2بعد نص الليل ،اليوم الشغل كان كثير يادوب ذاكر 3ساعات قبل مايجي المطعم ومن وقتها وهو يلف على الطاولات لحد ذحين ..مسك جوالة وأتصل على كذا رقم ومحد رد..أتصل لأخر رقم وبعد كم رنة يأس وكان بيقفل قبل مايجيه صوت كله نوم/السلام عليكم..هلا مازن.
مازن بإحراج/وعليكم السلام والرحمة..معليش جوجو.. أزعجتك.
جوري/لا حبيبي عادي..فيك شيئ،ليه متصل ؟
مازن يتمغط/دوبي مخلص دوام..وخفت أنام وأنا أسوق..قلت أكلمكم ،بس خالد ومؤيد الكلاب محد فيهم عبرني ورد..قلت أجرب وأكلمك..قروشتك؟
ضحكت جوري/وربي إنك طيب تبغى مؤيد وخالد يصحو من رنة جوال..خير إن شاء الله..ولا ماقروشتني خلاص صرنا قرب الفجر..يعني كسبت أجر وصحيتني.. بعدين كيف تكلمني وأنت تسوق،بتأخذ مخالفة.
مازن/حاط إسبيكر،خلاص أتعودت على نظام البلد.
جوري/أحسن علشان تركز عالطريق..أنت كيف صحتك ودراستك..طمني.
مازن/الحمد لله دراستي كويسة وببيض وجهكم إن شاء الله..بس وحشتني كبستك.
ضحكت جوري/الله يفتح عليك ويسهل دربك،ولاحق عالكبسة إن شاء الله يادكتور.
أتنهد مازن/يارب الله يسمع منك..
جوري/الله كريم ياأخي..أنت حافظ عالصلاة ،وأنتبه على نفسك من عيال الحرام ،حلفتك بالله يامازن حاول تلقى شقة بأسرع وقت إن شاء الله خرابه.. المهم أبعد عنهم ذول ماوراهم خير.
مازن/أنا مالي و مالهم،يادوب بجي أنام،بس برضه بحاول أطلع منهم.
جوري بهدوء/أدري إن وقتك يادوب مابين الجامعة وشغلك،بس لاتنسى إنك بتقروشهم عالطالعه والنازله ،يعني ماهيرتاحوا غير لما يسحبوك لدائرتهم وتصير زيهم ومافي أحد أحسن من أحد .
هز رأسة بموافقة/إن شاء الله،خلاص لاتشيلي هم..يلا خسرتيني،بقشيش الليلة هيروح في الفاتورة بسببك.
شهقت بقوة/والله أسفة.. خلاص أستودعتك الله ،السلام عليكم.
قفلت بسرعة وهو يضحك عليها..هز رأسه بهم وهو طالع الشقة اللي متشاركها مع ثلاثة عرب.. أول ماجاء لندن كان ساكن مع عائلة أنجليزية يأجروا غرف في بيتهم للطلاب وكان مرتاح لإن الإيجار كان معقول والبيت قريب من الجامعة،لكن قبل سنتين توفى صاحب البيت وقامت زوجتة ببيع البيت وأضطر إنه يدور سكن ثاني ،وللأسف مالقي غير سكنه الحالي ،ومن أول يوم سكن معاهم وهو يشوف أنواع المسخرة ،شرب وبنات ورقص،في البداية سكت عنهم وحاول ينصحهم وبعدها أتخاصم معاهم وأتفقوا تكون الشقة للسكن وأي تخبيص يخلوه برا وصار يتجنبهم ويادوب يقابلهم في الدخله والخرجه..هانت باقي له سنة وكم شهر ويتخرج ويرجع المملكة الحبيبة..