منتديات ليلاس - مناقشه عن اجمل الروايات اللي قارينها واجمل الابطال

ايه رايكم يابنات لو كل بنوته هنا اتكلمت عن احلي واجمل الروايات اللي قارتها وكمان احلي الابطال اللي اثروا فيها وهي بتقرا الروايه انا هبدء بنفسي وهتكلم عن الروايات والابطال اللي عاجبونى وعن نفسي انا علشان الابطال يعجبونى لازم تكون احداث الروايه شدانى وعاجبنى كمان علشان الروايه تعجبنى لازم اكون حابه الابطال يعنى الاتنين مرتبطين ببعض بالنسبالي وعلي فكره انا لسه بداه قرايه روايات احلام من مده قريبه مش بقالي كتير بقراهم يعنى علشان كده الروايات اللي قريتها مش كتيره اوي كمان لسه مكتشفه سلسله روايات عبير دار النحاس وسلسله قلوب عبير ويالا انا هبدء بقي اتكلم عن الروايات
1- روايه القدر القاسي ودي من سلسله قلوب عبير روايه حلوه اوي وعاجبتنى جدا والبطله صعبت عليا اوي كمان البطل رغم انه كان قاسي في الاول الا انه من بعد جوازهم للمره التانيه مقدرتش اعمل حاجه غير ان انا اتعاطف معاه بصراحه
2- روايه مؤامره قاسيه ودي من سلسله عبير دار النحاس لسه مخلصها امبارح روايه حلوه اوي والبطل فيها قاسي جدا وعاجبتنى البطله كمان عنيده كده وليها شخصيه كمان والروايه كمان احداثها مشوقه وحلوه
الروايات اللي جايه دي كلها بقي من سلسله احلام
3- ليل المرايا روايه تجنن فظيعه بجد والبطل فيها فيها فظيع وشخصيته اثرت فيا جدا يمكن علشان كانت اول روايه اقراها البطل فيها مشوه الوجه كمان اتفاجئت بالموضوع ده لانه مش مكتوب في الملخص عاجبتنى حنيته علي البطله في اول الروايه كمان ظلمه ليها وقسوته عليها بعد الجواز مقدرتش ازعل منه فيها لانه ليه عذره رغم ان البطله كانت بتصعب عليا جدا كمان عاجبنى انه عمل عمليه التجميل علشان قال البطله من حقها تبص في شئ جميل عاجبنى كمان علشان نفسه لانه من حقه يكون ليه وجه جميل
4-الرجل السراب روايه حلوه عن نفسي عاجبتنى عاجبتنى حنيه البطل علي البطله رغم نرفزته عليها في بعض المواقف كمان شخصيه البطله كانت حلوه والروايه احداثها كانت جميله ونهايتها حلوه اوي
5- كذبه واحده تكفي روايه حلوه جدا والبطله فيها فظيعه تجنن بجد والمناورات اللي بينها وبين البطل تجنن روايه من اجمل الروايات بصراحه
6- غرباء علي الطريق روايه عاجبتنى جدا عاجبتنى فيها شخصيه البطل اوي عاجبنى تحمله المسؤليه وحفظه للسر حتى لو كان هيخسر البطله بسبب ده
7- بحر الهوي روايه تجنن فظيعه جدا وشخصيه البطل فيها فظيعه وصراعه بين وعده والواجب وبين حبه للبطله رغم ان شايفه ان خطيبته ماتستهلش الوعد ده لانها شخصيه انانيه ومش بتحب غير نفسها وخساره يضيع حبه بسبب واحده بالشخصيه دي
8-لن اكون لك روايه حلوه وكوميديه جدا والبطل رغم انه مغرور جدا بس شخصيته لذيذه والبطله كمان فظيعه اوي
9- نجمه الجراح روايه من احلي الروايات والبطل يجنن والبطله كمان علي فكره من الابطال اللي حاببونى في فكره البطل الاسبانى هو وجريج باركو بطل روايه بحر الهوي
10- لن نلتقي روايه حلوه اوي قاريتها من مده بس فاكرها عاجبنى فكره حب البطل للبطله حتى من كتر حبه فيها مش قادر يعاتبها علي هروبها منه وهي حامل زمان ومحاولتها للهرب بعد مالقاها حتى مش قادر يبقي قاسي معاها ودي كانت اول روايه اقراها البطل فيها حنين اوي كده من اول الروايه لحد النهايه البطله كمان كانت شخصيتها حلوه
11- الخائن روايه تجنن وعاجبتنى شخصيه البطل جدا وكانت اول روايه اقراها البطل فيها ايطالي وحابننى في الايطالين جدا وعاجبنى فكره ان البطل يكون ايطالي
من اكتر جنسيه الابطال اللي بحبها اسبانى وايطالي ويونانى وبحب البطله تكون انجيلزيه رغم ان لو شخصيه البطل عاجبتنى مش هتفرق جنسيته بس متهيالي اغلب الروايات بتكون جنسيه الابطال كده
حابه بجد ان الكل يشارك في الموضوع ويحكيلنا عن اكتر الروايات اللي بيحبها والابطال وليه واسفه لو طولت عليكوا