|
رد: رواية: جنون ثلاثي الأبعاد /بقلمي: روريبا
قالت وهي تتملص منه:تمام الحمدلله أنت كيفك
ابو سلطان وهو يبعد عنها ويتفحص تفاصيل وجهها,,يالله وش قد الشبه بينها وبين فهد كبير ,,يحس نفسه واقف يحاكي فهد قال بنبرة تملئها الحنان:بخير الحمدلله بعد عنها وجات لها ام سلطان بعد ماسلمت على عمها وضمتها بتمثيل الحب وهي تسألها عن أخبارها وكان رد سمارا البارد هو جوابها بعد ماسلموا عليها البنات وابو سلطان جالس يقول أسمائهم عشان تعرفها هي وابوه سلمت على الشباب بالكلام بس وابتسمت وهي تشوف سلطان اللي عرفته بسهولة لأن سلطان جسمه ضخم ورجولي وملامح الجمال والقوة بادية عليه عكس سامي المرح واللي جسمه متوسط وبعد على قدر من الجمال حطت رجل على رجل وهي تتفحص وجوههم الكريهة وماسكة نفسها بالقوة أساسآ هي تعودت مع الوقت أنها ماتبين مشاعرها ________ في الجهة الثانية الأبتسامة شاقه حلقها فرحآ ورضى عن شكلها النهائي لابسة فستان أسود بدون أكمام مصبوب على جسمها صب,,ويبين تفاصيله المغرية لفوق الركبة,,وبوسطة حزام عريض ذهبي يزين خصرها وشوز سوداء بكعب عالي,,وسلسة طويلة تتدلى من عنقها الطويل الجذاب وراسمه خط نحيل بالاي لاينر على خط رموشها العلوي ومكحلة عيونها بالأسود وشفائها مطلية باللون الأحمر الفاتن وشعرها بلفافات غجرية وخصل متمردة على وجهها رشت من عطرها الفاتن,,تعمدت تطلع بهالشكل المغري عشان تعلم سلطان ايش خسر نزلت تمشي الدرج,,تعمدت أنها تنزل الدرج بدلآ من الأصنصير,,عشان تسمع خطواتها الواثقة تحب هالصوت لأنه يحسسها بالأنتعاش نزلت وهي مره ترتب فستانها ومره شعرها ومره تطالع رجولها وهي تمشي >>مريضة هالبنت الكل توجه نظره لها وهي لسى ماتدري عن نفسها غاص قلب سلطان ببطنه,,هي نفسها نارا ماتغيرت,,هي حبه الوحيد واللي تكلل بالفشل يعرف أنها خاينة ولعابة,,بس يحبها وده يصفق نفسه كيف يحب وحده بقذارتها والمشكلة يعرف كل ألاعيبها ومع كذا يحبها وش يبي يعرف عنها بعد عشان يكرهها وش اللي بقى مايعرفه عنها واللي بيخليه يكرهها؟ هو شئ واحد ببال سلطان وبه بس راح يقرر يايستمر بحبها والا النسيان بيكون مصير هالحب "إذا قالت له أنها ماتحبه" هنا بس بيودع حبها للأبد >>وهذي مشكوك فيها رفعت وجهها وطالعتهم,,وأول مرة تحس بالخجل من أحد,,جمعت ايديها وراء ظهرها بخجل وقالت بصوت يابدوب ينسمع:مساء الخير سمارا رفعت حاجب وهي مبتسمة ))هذي من جدها مستحية(( ناظرت سلطان اللي يتبعها بعيونه وابتسمت تحب نظرات العشاق وماتتوقع بيوم تعيشها سلمت على عمها وهي تحس بالأشمئزاز من تمثيله وزوجتة اللي كان ودها جد تمسكها وتلفها بعبايتها مثل كيس الزبالة وترميها برى وبناتهم اللي مرره ماحبتهم >>ليه هي تحب أحد أساسآ وصلت لمبتغاها سلطان كان شكله متغير يعني صاير هادئ جدآ ويفتقد لحيويته القديمة,,ارتسمت أبتسامة تحدي على شفتيها وقالت بقوة:كيفك سامي سلطان ناظر سامي ورجع يناظرها رفع حاجب:سلطان-وكأنه يعاتب- شكلك ناسيتني نارا ابتسمت بنصر كانت متعمدة تقوله كذا قالت:سوري,,من زمان ماشفناكم عشان كذا اخربط بالأسماء-اعطته نظرة محتقرة ماقدرت تخفيها والتفتت لسامي- وأنت كيفك ياسامي سامي بخجل أول مره يكلم بنت فيس تو فيس كذا قال وهو يناظر الأرض:الحمد لله تمام مشت مبتعدة وجلست بجنب سمارا بشموخ سمارا همست لها:كيف الشعور نارا رفعت أكتافها بأستغراب:بأيش سمارا بتخابث:لاتسوين نفسك ماتعرفين اقصد لما شفتي سلطان نارا التفتت لها بسرعة وهي معصبة: كم مره قلتلك أني مااحبه مااحبه أنتي ماتفهمين سمارا:أنا سألت بس ,, أنتي ليش معصبة على فكرة عصبيتك ذي تأكد عكس كلامك أنتي لو جد ماتحبينه ماكان عصبتي من هالسؤال نارا بغيظ:قلتلك مليون مره اكرهه وأنتي مازلتي تعيدين هالسؤال,,هذا بنظرك مو سبب يخليني اعصب سمارا رفعت رأسها فوق بغرور وحطت رجل على رجل وقالت وهي مبتسمة: للحين مااقتنعت نارا استشاطت غضب وقهر,,تكره طبعهآ ذا تنرفز وهي ولاعلى بالها,,قالت بقلة حيلة وهي تبعد نظرها عنها:أحسن عمرك مااقتنعتي أن شاءالله سلطان عيونه مغروسة على نارا كل مافي الدنيا من قهر مكوم على قلبه,,مو معقولة تنساه بهالسرعة مو معقولة تنسى أيامهم الحلوة كان عنده أمل أنه يرجع ويلاقيها تنتظره أنانية عاشق تمتلكه تغيـرتـي وكـل شئ ـن تغير اظنـك عـن لضى شوقي كبـرتي,,, أنـا مانـي عـلى كيـفك مسـير أنـا الـربحـان وأنتـي اللـي خسـرتي,,, رن الجرس من جديد,,مشت الشغالة وفتحت الباب دخل بشموخ وهو يطالع البيت ببرود هالة من الغرور تعصف بكيانه دخلت من وراه زوجتة اللي ماكانت أحسن منه ومن بعده بنته اللي لابسة عباية كأنها فستان ولثمتها ماتستر الا انفها وفمها والقليل من وجهها وشفافة يعني وجودها مثل عدمه مشى متوجه لابوه وسلم عليه بكل أحترام وتواضع عكس لمادخل التفت للبنات اللي واقفات جنبه وقال بنوع من الذهول والسخرية والصدمة :اووه هذولي بنات فهد ؟ نارا رفعت حاجب وهمست لسمارا |
رد: رواية: جنون ثلاثي الأبعاد /بقلمي: روريبا
نارا:وبكل وقاحة يقول اسمه
سمارا وهي واصله حدها,,جالسين يتصرفون وكأنهم ماسووا شئ اي قلوب هذي اللي بصدورهم همست بنبرة قهر:لاتزيدينها علي أنا جد وصلت حدي سلموا ببرود كلماله يزيد لاتستغربي يادنيا ابتسمي فقط,,فهاهي تلميذتك تكبر أزلفت منصة التخرج,,ولبست عباءة الألم ,, وقبعت الظلم ,, وحذاء اللاضمير ,, مشيت مبتسمة بدرب الدموع وهاهو شوك الوجع يرمى بطريقي ,, وها أنا استلم شهادتي وقد كتب عليها ,, )تعيسة مع مرتبة الشرف( الكل ينظر لي وينتظر منى أن أقول كلمة بهذه المناسبة,, نطقت وأنا اوصف شعوري :أشعر بالوجع ,, والقليل من فقدان الضمير الآن وقد انتهت المراسم يادنيا قفي وأنظري لي أريدك فقط أن تجيبيني هل هذا فعلآ مااردتي أن تعلميني آياه ؟؟؟ ....بقلمي... جلسن وهن يطالعنهم وهم يسلموا على بعض بأشتياق الطيور على أشكالها تقع عاصفة من البرود تجتاح قلوب ناعمة ولخبطة ماضي وحاضر,,وقلق مستقبل قاموا يسلمون على عمهم ابوراكان اللي جاء وراء ابوجود شخوص كثيرة مرت عليهم وهن مو حاسات بشئ مايدرن من سلموا عليه ,,ومن بقى ماسلموا عليه جلسن بتثاقل بعد مامشى آخر شخص مر من عندهم وطالعوا وجوههم البغيظة وجوه كثيرة تختلف بالملامح,,ولكنها تتشارك بقسوة القلوب سمارا احس بدقات قلبي تزيد مرة عن مرة احس بقهر وانا اشوف جدي يتعرف على احفاده ويضحك عمري ماشفته فرحان مثل كذا معقولة كل ذا عشانهم بجنبه,,خوف مقلقني ويقلقني زيادة كل ما طالعت بوجه واحد من ذولى اللي يسمونهم اعمامي أخاف يقنعون جدي يرمينا أنا ونارا طبعآ,,ماهي صعبة على واحد يقتل أنه يشرد نارا تعبانة,,واحس بخوف ايوه خوف,,أخاف من شئ مااعرفه احس فيه شئ خطير بيصير,,احس بتعب من هالأحساس بتعب من كل شئ حولي انفتح الباب ودخل بخيلاء وعصاه الخشبية الفاخرة تحدث صوت متناغم جميل الكل وقف أحترام لحسن وصدمة الكل اللي يعرفون بعلاقة جراح واخوه المتوترة ماعدا نارا وسمارا دخل من بعده عزام وهالة من الهيبة والكبرياء تحظن جنابه كان مبتسم بأبتسامة جذابة لها معاني كثيرة أنا نفسي مااعرفها,,هالأنسان من كثر تناقضة صعب احد يفهم وش يبي وقفت نارا وهي تناظره بخوف ودقات قلبها مثل الطبل سمارا سحبتها وهي مصدومة:اجلسي وش فيك فضحتينا أول مره تشوفين واحد حلو نارا وبؤبؤ عينها اتسع بشكل فظيع همست:ياويلي ,,أنا انتهيت سمارا ,,انتهيت نهاية الفصل الرابع قراءة ممتعة تذكروا دائمآ أن انتقاداتكم محط أهتمامي |
رد: رواية: جنون ثلاثي الأبعاد /بقلمي: روريبا
الفصل الخامس
گـلـن على قـد هـمـہ تنفس ,,›› سمارا ناظرتها وهي ماهي فاهمة شئ :لا أنتي جد مو صاحية وش فيك نارا التفتت وراها وشافتهم قربوا كثير لفت رأسها على الجدار عشان مايشوف وجهها بتكون نهايتها إذا شافها طالعت سمارا فيها بأستغراب وقالت :أنتي ايش فيك,,قاعدة احاكيك نارا نارا بحركة سريعة وقفت ومشت وهي تناظر الأرض,,كانت بتروح لاي مكان المهم أنها ماتجلس هنا ويشوفها عزام أحتارت مااتدري وين تروح أذا بتطلع الدرج أكيد بتطول المسافة وبيشوفوها وإذا بتطلع الأصنصير لازم تلف وتكون الصالة اللي جالسين فيها عن يسارها وبيلاحظون حركتها وبسرعة الضوء لفت للباب الخارجي وطلعت للحديقة وراحت تمشي مبتعدة تحس أنها لازم تتعمق بالحديقة عشان إذا طلع مايشوفها مشت لغاية سور الحديقة,,الأنوار كانت خافتة شوي والمكان يملئه الهدوء جلست على مرجوحة من الخشب بشكل بيضاوي تتعلق بخيط طالع وكأنه من أغصان الأدغال بالمظلة الخشبية اللي مثبته بأعمدة ضخمة خشبية,,وملفوف عليها أغضان وكأنك داخل أدغال وتحت هالمظلة جلسة عبارة عن كراسي خشبية من نفس روح المكان وطاولة بعد نفسهم رمت نفسها بالمرجوحة وهي تحس بخوف عمرها ماحست بخوف نفس الحين هالشخص غريب نظراته,,تصرفاته له هيبة خاصة فيه,,عدلت المخدة اللي مسندة ظهرها عليها وجلست تسوي تمارين أسترخاء ___________ جراح سلم على اخوه ببرود رغم انه يحس بشوق غريب له,,كان راح يضمه بس علاقتهم أبدآ ماتسمح سلم على عزام اللي كان وراء جده بشوق وهو يردد:حي الله عزام,,وشلونك عزام وهو يبعد عنه ببرود:بخير وشلونك أنت جراح بأبتسامة:طيب الحمدلله -التفت لعلا وسلم عليها وهو مستغرب- هذي بنت سعود ؟ عزام ))تخسي تصير بنته,,هذي حسين كثير عليها(( سعود يصير ابو عزام حسن بأبتسامة:لا هذي بنت حسين,,حرمة عزام جراح رفع حواجبه بفرح: ماشاءالله عزام تزوج,,مبروك مبروك عزام بدون نفس:الله يبارك فيك -ناظر علا المستحية ومسك ايدها وسحبها وراه وجلسوا جنب حسن- سمارا راحت تسلم على حسن بعد مااشر لها جدها بعينه حسن وقف بسرعة وهو يسلم: ماشاءالله هذي نارا ولا سمارا سمارا بهدوء:سمارا حسن وهو يمسح على شعرها: ماشاءالله كبرت وصارت عروس سمارا اكتفت بأبتسامة ومشت لما تركها مسكها جراح من يدها وهي انحنت له جراح بهمس:وينها أختك,,وش فيها طلعت كذا سمارا بأستغراب:ماادري جراح وهو معصب:روحي ناديها تجي تسلم ع اخوي سمارا:أن شاءالله تتأرجح وهي مغمضة ومبتسمة على الهواء وهو يضرب بوجهها بلطف اطلقت ضحكة خفيفة وهي تحس نفسها بعالم ثاني وقفت سمارا قدامها وتخصرت وهي مبتسمة وصرخت:بوووو نارا فتحت عيونها بفجع وصرخت بصوت عالي:آااااااااا سمارا وهي تضحك:ليش كنتي توزعين أبتسامات آنسة نارا-بخبث-تتخيلين سلطان نارا حطت ايدها على صدرها بخوف :يخرب بيتك فجعتيني-ناظرت الجهة الثانية- جد عديمة ذوق سمارا وهي تجلس على اقرب كرسي: لاتغيرين السالفة ياام ذوق أنتي ,, ليش كنتي تضحكين نارا وهي تأشر على رأسها:كذا كيفي ,,جاء على بالي اضحك وضحكت-تكتفت-ممنوع سمارا وهي للحين مبتسمة:لا مو ممنوع اللي ممنوع جد اللي سويتيه,,جدي معصب حده لأنك انحشتي وقال روحي ناديها نارا بعدت خصل شعرها وراء اذنها بنعومة وقالت وهي لاويه فمها:ضروري سمارا وهي توقف وتحاول توقفها معها :ايوه ضروري ولاجدي ترى بيقوم الدنيا عليك ماسلمتي على اخوه نارا وهي توقف معها وعاقدة حواجبها :اللي يسمعك يقول اخوه ذا اوباما مو حسن -قالتها بأستخفاف- سمارا وهي للحين ماسكة ايدها وتمشي معها :ماقلتي لي ليش كنتي تضحكين نارا تأففت وسحبت ايدها ومشت قدامها وهي تسمع ضحكها فتحت الباب ودفته بقوة خلت الكل يناظر عديم الذوق ذا مين,,مااحد جاء بباله انها بنت لأنه تصرف دفش دخلت وهي معصبة من سمارا وقفت بأول الصالة وقالت بهدوء يناقض تصرفها: مساء الخير حسن نزل فنجان قهوتة ووقف وهو مبتسم وسلم عليها جراح فرك جبهتة وهو يتوعدها بداخله سلمت على حسن والتفتت لعزام عزام وقف وناظر وجهها وهو يحسه مو غريب عليه قال وهو عاقد حواجبه :أنا شفتك من قبل-مامداه يقولها الا ويتذكرها- آها أنتي البنت اللي شفتها بمطعم الxxxx صح؟ نارا بلعت ريقها وقالت وهي تخفي توترها :ايوه صح,,أ أنا شفتك لما كنت مع مندوب شركة الفارس-التفتت لجدها-تتذكر جدي لما وكلتني بمقابلته ؟ جراح مصدوم من اللي يصير قدامه ))الله يسود وجهك قولي آمين(( تنهد وقال بأبتسامة:اهاا,,أجل طلعتوا متقابلين هااه سمارا زمت شفائفها وهي تكتم ضحكتها نارا ابتسمت بتوتر وصافحت يده الممتدة لها وناظرت أبتسامته الخبيثة وبسرعة سحبت يدها وسلمت على علا بسرعة وراحت وجلست بمكانها بجنب سمارا ومسكت ايدها وهمست:احس ببرد سمارا ناظرت يد نارا اللي ممسكه بأيدها وكانت ترتجف واطلقت ضحكة ماقدرت تمسكها وبسرعة تمالكت نفسها وسكتت نارا طالعت عزام بنص عين وكان حاط رجل على رجل ويناظرها ونفس الأبتسامة مرسومة على شفاهه شالت عينها بسرعة وناظرت جدها وحسن وسوت نفسها تسمع كلامهم اللي اغلبه عن الشغل والعقارات طبعآ عزام ماصدق كذبة نارا أبدآ اغبى واحد بالعالم كله مستحيل يصدقها فكيف بواحد بذكاء عزام,,خصوصآ أنه شاف جلستهم وضحكهم اللي مستحيل يطلع من اثنين متقابلين عشان شغل ابتسم من قلبه ماكانت الجلسة هنا مملة مثل ماكان متوقع,,ناظر جراح ))وأخيرآ مسكت عليك شئ يا يالمثالي(( يكره جراح,,لأن جده دائم يحكيله عن مثالية جراح ومعاملة ابوه المختلفة لهم وعشانه يحب جده كره جراح ___________ |
رد: رواية: جنون ثلاثي الأبعاد /بقلمي: روريبا
بعيدآ عن هذا الترف
غرفة مهترية جدارها باللون البيج كان بالسابق أبيض ومع مرور الزمن صارت بهذا اللون الأرضية مبسوطة بفرشة أو موكيت آكل عليها الدهر,,ودولاب حديدي صغير جدآ كل وحده باسطة فراشها ومنسدحة عليه رسيل تناظر رنا وبهمس للعنود: نامت العنود ناظرت أختهم الصغرى رنا وبنفس الهمس :ايوه نامت رسيل رفعت غطاها وجلست: تدرين أن تركي صار مدير العنود رمقتها بنظرة:على بالي عندك سالفة أكيد ادري رسيل وهي تلعب بأصابعها بشعرها :وراتبه مرره كبير-بفرحة-بأطلبه يشريلي ملابس كثيرة,, وأنتي وش بتطلبينه بأول راتب العنود وهي تعدل مخدتها:ليه على بالك فانوس علاء الدين تتمنين على كيفك -وهي تنسدح-ترى احنا ورانا مصاريف علاج أمي وعلاج ابوي وأنتي تعرفين علاج ابوي كثر ايش يكلف,,واغراض البيت رسيل تكتفت:لاتهايطين كل هذي تكفيهم ألفين العنود وهي تتثاوب:وفاتورة المويه والكهرباء رسيل ميلت فمها:ومع كذا يبقى من الراتب كثير العنود وهي تعطيها ظهرها:طيب لاتقلقيننا ابي أنام ,,تصبحين ع خير رسيل وهي تتمدد على فراشها: تلاقي الخير ___________ الساعة12 مازالت السهرة مستمرة سمارا ناظرت ساعتها وهمست بأذن نارا :طولوا,, طفشت نارا وهي تناظر عزام وبهمس:أنا بعد زهقت ومليت -بقلة صبر- هذا وبعدين معه اقرفني,, من أول ماجلست وهو ماشال عينه عني سمارا وهي تناظر عزام:قصدك عزام نارا التفت لها بكامل جسمها وهي مبتسمة :ليه هو اسمه عزام سمارا رفعت حاجب:ماسمعتيهم من ثلاث ساعات وهم كل شوي ينادونه عزام وعزام نارا:وتلوميني مرعوبة-بأبتسامة- فديته هو واسمه سمارا رفعت رأسها فوق:الله يشفيك قولي آمين-ناظرتها-مو توك تشتكين من نظراته نارا اشرت لها يعني اسكتي ورجعت تناظره من اول ماجاء وهي تناظره عزام ناظر راكان اللي يناظر رجول علا اللي كاشفها فستانها الأصفر بوقاحة واول ماناظره اشر له برأسه بمعنى وش تبي راكان لف وجهه بسرعة وهو خائف من نظراته المخيفة همس بأذنها:ليش لابسة قصير علا بأستغراب:عادي أنا دايم ألبس قصير عزام يحس بدمه يغلي,,احتقن وجهه بالدم غمض عيونة وتنهد وهو يتمالك أعصاب فتح عيونه ومسك ايدها وقال بهمس وهو عاض على أسنانه:بس أنتي الحين مو ببيت أهلك ياآنسة,,هذولي ناس أغراب علا ناظرت ايده اللي بدت تطبع أثارها على بشرتها,,قالت بصوت خافت وهي تتألم :عزام خلاص-بتألم واضح-كسرت ايدي عزام طالع عزام حوله وكأنه للتو حس بالناس اللي حوله,,وترك ايدها وهو يقول :شغلك بالبيت همم علا طالعت آثار أصابعه على ايدها وقالت بصوت خافت:جد مريض حسن طالع بساعتة ووقف:يالله بالأذن أنا تأخرت جراح وقف وهو عاقد حواجبه:لا وين ,,بدري حسن وهو يتقدم له:لا والله يااخوي أنت تعرف أنا شايبن ماعاد اطيق السهر عزام بتدخل عشان مايلزم جراح: وبعدين أنت تعرف ياعمي حنا ورانا دوامات جراح وهو يصافح اخوه بأيدينه الثنتين :أجل لاتقاطعونا ,,عيدوها مرة ثانية حسن بأعتراض:لااا المره الثانية لنا عزام جلس يناظر ساعتة بقلة صبر,,مو متعود على السهر,,والشياب طولوا مشى وراء جده وهو يقول: تصبحون على خير الكل بأصوات متفرقة:تلاقي الخير نارا طالعتهم الين طلعوا والتفتت على سمارا :وهذولي متى بيروحون سمارا رفعت اكتافها:شكلهم ناوين ينامون عندنا نارا تكتفت وهي تسند ظهرها على الكرسي :مو ملاحظة أن تنكيتك كثر اليوم لهالدرجة مبسوطة فيهم سمارا بدلع:لا بس كل ماتذكرت مواقفك اللي ماتنحسدين عليها اليوم احس بشئ من الفرح-بخبث-الليلة كانت طويلة صح نارا وهي تتنفس الصعداء:الله وكيلك كأنها قرن -ناظرت أعمامها المتجمعين على جراح وجالسين يسولفون وزوجاتهم اللي جالسات يسولفون مع بعض وكل شوي يأشرون عليها هي وسمارا,,تعرف أن لبسهم سبب هالشئ ومع كذا ماحركت نظراتهم المحتقرة لها فيها ساكن,,من هم أصلا عشان تعطيهم وجه التفتت لسمارا-اووف شكلهم مطولين سمارا بلا مبالاة وهي تناظر أظافرها :ايش ورانا ,,ننتظرهم الين يذلفون نارا:انتظري وحدك أنا رايحة وقفت ومشت بغنج وطلعت الدرج متوجهة لغرفتها بالنسبة لها الحفلة خلصت سمارا فاتحة فمها وتناظرها بفجع ارمشت بسرعة وقالت بصوت خافت :هذي مجنونة,, كيف تفكر-ناظرت جدها اللي ناظرها وهي طالعه ورجع يكمل سوالفه- والله ليذبحها جدي وبعد مرور وقت طويل ممل بالنسبة لسمارا أنتهت العزومة ___________ مع إشراقة يوم جديد دبت الحياة في رياض مملكتنا الحبيبة من جديد نعم إنها فرصة ثانية لنجعل حياتنا أفضل وقفت السيارة وناظرت بوابة الجامعة تنهدت والتفتت لتركي:يالله سي يو تركي وقفها وهو يقول:لحظة أخذتي مصروفك رسيل وهي تعدل طرحتها على عيونها هزت رأسها وهي تصدر صوت بمعنى لا تركي مد ايده لجيبه وجلس يفتش ببوكه وطلع لها عشرين ريال:يالله دلعي نفسك فيها رسيل تأخذها بفرح هالمبلغ بالنسبة للي تعودت عليه كثير:ثنكيو يالله باي نزلت وعدلت عبايتها على راسها ومشت دخلت الجامعة ونزلت عبايتها ودخلتها بالدرج وجلست ترتب شعرها,,اخذت معها دفتر محاظراتها وهي تناظر الطالبات اللي لابسة فستان من أغلى الماركات,,واللي لابسة تنورة مع أفخم الأسواق,,واللي حاطة مكياج تحلم فيه اي بنت ناظرت نفسها,,لابسة تنورة سوداء طويلة وفيها فتحة من جنب لنص الساق وبلوزة بيج بكم نص تسكر من قدام بأزرار فاتحة أزرارها الأولى وتاركة شعرها المموج على طبيعتة,,ووجهها مثل ماهو حاطة روج بني وكحل بس هذي تنورتها اللي دائم تلبسها في الجامعة ماتغيرها |
رد: رواية: جنون ثلاثي الأبعاد /بقلمي: روريبا
ورغم بساطة لبسها الا أن جمالها
واضح,,عيونها بنية غامقة وواسعة ووجهها بيضاوي,,انفها نحيل وشفائفها صغيرة ولون بشرتها حنطي فاتح استعدت ليوم ممل كالعادة وطلعت برى وفجأة صدمت ببنت وانتشرت الدفاتر على الأرض رسيل انحنت وهي تلم دفاتر البنت بأحراج:سوري ماكان قصدي البنت انحنت تساعدها:لا عادي رسيل وقفت وهي حدها محرجة واعطتها دفاترها وقالت بأبتسامة:ماادري وش فيني اليوم مو مركزة بشئ بالمره البنت بأبتسامة طفولية:عندي وعندك خير رسيل ابتسمت وهي ساكتة,,أول مرة تتكلم مع بنت بمواضيع غير الدراسة بهالجامعة حتى نست كيف تكون صداقات البنت مدت ايدها:معك ريتال رسيل صافحتها:وأنا رسيل ريتال وهي تأشر على طاولة:وش رايك نجلس هنا رسيل كانت بترفض كالعادة,,بس خلاص طفح الكيل عندها,,طفشت من الوحدة قالت بتردد:اوكي راحوا وجلسوا يسولفون ,,رسيل لاحظة كشختها وساعتها الألماسة اللي تبرق مع أنعكاس الشمس عليها اللي تدل على ثراءها الفاحش هذي سعرها على الأقل2000 ريال حست نفسها توهقت معها يعني هذي آخر سنة لها كان بأستطاعتها تصبر وتكمل على نهجها السابق ___________ لا يـدري أحدنـا فـي اي أرض تـرمي به الأقـدار ,,,›› مسندة رأسها على الكرسي وتناظر السقف وهي تحرك الكرسي بخفة طفشت,,اليوم ماعندها شغل كثير ومو متعودة تجلس بدون شغل ولعت لمبة براسها,,وقفت وطلعت عبايتها من الدرج الذهبي ولبستها طلعت ووقفت عن سكرتيرتها :نورا أذا أحد سأل عني قولي له طلعت لشغلة ضرورية وماراح تطول نوره هزت رأسها: حاضر طال عمرك كملت مشي لحد ماوصلت لقسم شؤون الموظفين قالت بجفاف تعمدته,,هي كذا نهجها مع الموظفين عشان يعرفون أن وراهم ناس تفتش وتنبش:الأستاذ تركي موجود السكرتير وقف بخوف:ايوه طال عمرك سمارا هزت رأسها برسمية وراحت لمكتب تركي ودقت الباب ودخلت بعد ماسمعت صوته يأذن لها :صباح الخير تركي وقف وقال بأبتسامة:صباح النور,,تفضلي أستاذة سمارا سمارا سكرت الباب وراها ومشت متوجهة له وهي تقول:شفت نفسي فاضية قلت اجي اشوف شغل موظفنا الجديد تركي وهو يجلس ويرفع التيلفون :وش تشربين سمارا وهي تجلس على الكرسي الجانبي: قهوة تركي بصوت رجولي:جيب لنا اثنين قهوة سمارا حطت رجل على رجل وقالت برسمية :كيف شايف الشغل عندنا تركي وهي يسند ظهره على الكرسي: والله مااقدر احكم الحين,,بس احس نفسي بحب هالمكان سمارا رفعت حاجب العادة يرتجفون وهم يكلمونها بس هذا واثق بنفسه زيادة عن اللزوم بنظرها,,قالت وهي تجمع ايدينها وتحطها فوق ركبتها:همم اتوقع أنك عارف ايش هو سبب فصل المدير السابق صح تركي بلع ريقه من أولها تهديد ))ماعليه يابنت الكاسر,, بس لازم تعرفين أنه ماهو تركي اللي ينتهدد((قال بثقة :ايوه عارف,,نارا قالتلي سمارا هزت رأسها وقالت بأستخفاف: ايوه بسم الله على نارا ماتعرف شئ اسمه أسرار الشغل ,, اتمنى أنك ماتقتدي فيها والا بيكون مصيرك الفشل تركي وهو يخفي قهره بأبتسامة واثقة: وكيف حكمتي على نارا بالفشل؟ -قدم جسمه- أكبر دليل على نجاح نارا هو وجودي بهالشركة هي ناجحة لأنها قدمت لمؤسستكم شخص ناجح مثلي سمارا رفعت حاجب واخذت الملف اللي قدامه وقالت:يعجبوني الأشخاص الواثقين اتمنى يكون كلامك صح-وهي تقلب بالملف- لأن نجاحك يعني نجاح هالقسم وبالتالي نجاح المؤسسة تركي رجع سند ظهره على الكرسي ))وهذا دليل ثاني على أن نارا ناجحة لأنها هي اللي قالتلي أنك تحبين الواثقين(( سمارا رفعت نظرها له:اوكي,, أنا بعلمك على الشغل بنفسي,,عشاني مااثق باي واحد بهالقسم-ماقدرت تمسك ابتسامتها وهي تقول-ومااقدر احط واحد ناجح مثلك بيد واحد منهم تركي ضحك:ههههههههه هذا جد كرم منك شالت خصل شعرها المتمردة وراء أذنها وهي تحس بتوتر من ضحكتة,, كانت عبارة عن نغمات متناسقة يغلفها طابع رجولي جذاب,,قالت وهي تبعد هالأفكار عن رأسها :أوكي أجل يالله نبدأ شغل ___________ طلعت من الحمام وهي لابسة تنورة جينز قصيرة لتحت الركب,,وبلوزة خضراء بدي وعليها جاكيت أسود,,وقفت قدام المراية ورفعت شعرها كله ذيل حصان ماعاد تهتم بشكلها,لأنه وببساطة مايستاهل التفتت له وشافته جالس على السرير ببيجامتة,,استغربت أنه ماراح للشغل عمرها ماصارت ذي,,جاء ببالها أنه يمكن مريض عشان كذا ماراح,,هزت راسها تبعد هالأفكار من رأسها,,لازم تكون قد القرار اللي اخذته ماراح تسأله لوتشوف أعراض الجلطة عليه اخذت جوالها وطلعت من الغرفة وهي ساكتة عزام ناظرها وهي تطلع:غريبة العادة تتلزق وتتميلح رجع يناظر جواله اليوم ماراح للشغل لأنه تعبان,,مانام الا الساعة2 الفجر كله من هالشايب جراح,,دخل تويتر وكتب في خانة البحث )نارا الكاسر( طلع له حسابها,,دخله بسرعة وناظر صورتها كانت حاطة صورتها وهي حاطة يدها على خدها وتناظر على جنب بشكل مغري وملائكي وطبعآ هذي نارا يعني بدون حجاب ولاحتى عباية,,حاطة مكياج ناعم وشعرها بلفافات غجرية |
| الساعة الآن 12:21 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية