|
عمري ما عرفت للعشق طاري..الا يوم سكنت عيونس بقلبي يا بنيه
السلام عليكم اخباركم هذي اول روايه لي..روايتي تتميز بانها تتسم بطابع حياتي روايه بدويه اتمنى ان تنال استحسانكم وتكون مميزه في نظركم طبعا راح تكون هالروايه تتكلم عن بعض الوقائع اللي شهدتها وراح اذكر بعض الشخصيات اللي مرت علي وطبعا راح ابهرها بقليل من الخيال وراح تكون باللهجه اللي اتكلم بها راح انقلكم لعالمي وكل ما يمر على مسامعي ما راح اطول عليكم واكيد ما احلل لاحد ينقلها دون ذكر اسمي عليها ((سليليه)) اللي ما يعرف للهجه يقلب حرف السين كاف <<للمعلوميه فقط واتقبل النقد البناء فقط بسم الله ... البارت الثاني http://www.liilas.com/vb3/t178910-2.html البارت الثالث http://www.liilas.com/vb3/t178910-3.html ... عمري ما عرفت للعشق طاري....الا يوم سكنت عيونس بقلبي يا بنيه البـــــــــــارت الاول في الجنوب في محافظة السليل بالتحديد (فديت اهلي) جالسين ثلاثتهم في الصاله وقف وهو مقهور من افكارهم:وش هالكلام انتم صاحين طالعوا بعضهم وسكتوا كمل وهو يعطيهم ظهره:انا ما ابغى اخذها ولا ابغى اتورط معاها وانتم تقولون ولد عمها وما ادري وشو زفرت وهي تعبانه من اخوها اللي مو راضي يقتنع:يا وليد هذي بنت عمك وانت اولى فيها من الغريب ولازم تاخذها قبل لا ياخذها هو ... وبعدين ليه الغريب ياخذها ويربي بنتها وانت موجود وليد وهو يطالعها وبقهر:وشو اخذها قبل لا ياخذها ليه هي جائزه...هذي حياه ...ارتباط مو لعبه من يربحها اول وبعدين انا ما ابغى اتزوج وحده متزوجه قبلي ولا مستعد اتحمل مسئولية بنتها..واللي ابغى اخذها لازم اكون احبها مو متورط فيها وقفت وهي خلاص واصله حدها منه وبصوت حاد:اسمع عاد يا وليد احنا بدو ما عندنا لا حب ولا خرابيط ولا عندنا هالعلوم وانت عارف ان هالخرابيط وعلوم الاجانب محد بيايدك فيها...طالعت اخوها الجالس وهي تكمل:ذياب تكلم قول شي ذياب بصرامه وهو يطالع وليد:مثل ما قالت غزيل...من متى احنا نحب ونسوي هالحركات الماصخه ...من متى احنا نقلد الغرب في خرابيطهم...اعقل واترك عنك هالجنان وقلة العقل واخذ بنت عمك وحط بنتها تحت جناحك كأنها بنتك ابرك لك ولا تجيب لنفسك عوار الراس طالعهم وبتعجب من كلامهم:انا ما ادري انتم كيف تفكرون اقول لكم ما ابغاها تقولون رب بنتها ...ولا انتم تبغون اكون مثلكم غزيل بصرامه:واحنا وش فينا ان شاء الله وليد:انا اقول لكم وش فيكم...كمل وهو يأشر على غزيل :انتي اعرستي بعد ما تخرجتي من الثانوي ولا خلوس تكملين دراسه و بدون حتى ما ياخذون شورس في المعرس وعادي الامر عندس اصلا ما ادري كيف تقبلتي الموضوع كمل وهو يأشر على ذياب اللي يطالعه بهدوء:وانت متزوج ثلاث حريم وكلهم ما عرفت اسمائهم الا يوم الملكه وحتى انك خطبتهم عن طاري السمعه والاصل والفصل ...مو عارف كيف تقبلت هالعيشه كمل وهو يأشر على نفسه:انا مو أله مثلكم ينفذ وبس انا غير غزيل بجمود:احنا واقعيين وعارفين عاداتنا وتقاليدنا وماشين عليها ومتقبلينها ذياب وهو يوقف: احنا عارفين طبيعة حياتنا ومهيئين نفسنا عليها وعايشينا احسن عيشه والحمد لله وليد وهو يحاول اخر محاوله مع اخوانه:يا ناس افهموني كيف برتبط بوحده متزوجه قبلي ولا عندها بنت بعد هذا اول شي ..وثاني شي احسها ما تناسبني لا من ناحية التفكير ولا العلم ولا في امل نتلاقي في نقطه انا وياها كيف تبغوني اتزوجها...انتوا بأي منطق قاعدين تتكلمون ....بأي عقليه تفكرون ذياب وهو يأشر على راسه :بمنطق العقل ...بمنطق التقاليد...بالمنطق اللي عشنا عليه من سنين وعاشوا عليه اباءنا واجدادنا من قبلنا وليد وهو يحس ان ما في امل ان اخوانه يفهمونه هز راسه بيأس وطلع من المكان وهو يحس انه لا يمكن يتلاقى مع اخوانه في نقطه وحده من ناحية التفكير مهما حاول غزيل وهي تلف على ذياب وتجلس: اخوك ذا بيجيب لنا المشاكل ذياب وهو الثاني يجلس والمسبح بيده:ما عليس منه مسيره بيرضى...خليه يصدق نفسه هاليومين وبعدها اذا جاء وقت الجد وعرف ان ما قدامه خيارات غير الرضى بيفهم ويرضى بالمقسوم له غزيل هزت راسها بموافقه على كلام ذياب دام الصمت لثواني قبل لا تتكلم غزيل:وش اخبار حريمك ذياب اللي زفر وبكره: وش هالطاري...دوري سيره عدله مثل الناس الواحد يقدر يحكي فيها ابتسمت بطنازه وهي ترد عليه:والله مدري من اللي متحمل من هم ولا انت طالعها بطرف عينه وبوجه خالي من التعابير: وش قصدس لفت غزيل وجهها:عارف وش قصدي انت اللي كارفهن ومخليهن كأنهم خدم عندك هذا غير انك نار عليهن طالعته وهي تكمل:نفسي افهم انت ليه متزوجهن وانت ما تطيق وحده منهن ذياب وهو ياشر على نفسه:والله عاد انا واحد متخلف ومن العصور الحجريه واحب زوجاتي اذا دخلت البيت اشوفهن صافات قدامي ويخدمني ويركضن ورى رضاي وسالفة الحب هذي ما هي من علومي ولا اعرف لها طريق غزيل هزت راسها بعدم رضى وسكتت ذياب وهو يطالعها:خلي الحب لها الرخمه اللي ماخذس غزيل وهي توقف وتعقد حواجبها وبعصبيه:ذياب حدك عاد كله ولا ابو محمد هذا تاج راسي ذياب وهو يوقف وبابتسامه خفيفه:لا تعصبين تراني امزح غزيل وهي تعطيه ظهرها:الا ابو محمد ما تدوس له على طرف حتى لو مزح ذياب وهو يقرب ويبوس راسها:بو محمد على راسي بس لا تزعلين تدرين اني ما اقوى على زعلس غزيل طالعته بطرف عينها وما ردت عليه ذياب بابتسامه:يله عاد لا تشيلين بالخاطر واضحكي ترى ما راح اطلع من بيتس الا وانتي ضاحكه غزيل وهي ما تقدر تزعل من اخوها:هههه ربي ما يحرمني منك ...كملت وهي تمسك يده: الا وين رايح تغدى عندي ذياب وهو يبوس راس غزيل:بيت عامر ان شاء الله وانا بروح لها العلل عندي وبتغدى مع شايبنا وعجوزنا غزيل بابتسامه:طيب على راحتك ذياب:توصين على شي غزيل: سلامتك بس وصل سلامي لاهلي ذياب :يوصل ان شاء الله والله يسلمس يله فمان الله غزيل وهي تشوف ذياب يطلع:بحفظ الله تنهدت وهي ترجع وتجلس في مكانها وتتذكر كلام وليد وبهمس:صدقت يا اخوي والله ان معاك حق بس ما اقدر اقول انك صادق...ما ابغى اشجعك على شي انا عارفه زين انك ما راح تفوز فيه ...كملت وهي تغمض عيونها:الحمد لله ان الله رزقني بعبدالله الحنون واللي يداري خاطري ولا لو كان واحد ثاني كان ما ادري وش بيصير فيني (ذياب/عمره 30 سنه متزوج ثلاث حريم شخصيه متمسكه بالتقاليد عقليته رجعيه نوعا ما وراح نكتشف شخصيته اكثر من خلال احداث الروايه غزيل/اخت ذياب عمرها 25سنه متزوجه شخصيه واقعيه قويه حنونه بس صارمه في بعض الامور كلمتها مسموعه وليد/ اخو ذياب عمره 22 اخر سنه بالجامعه قسم حاسب ألي شخصيه رافضه كل الافكار والامور المعقده اللي في عائلته يؤمن بالحب ويكره التقاليد اللي تجبر الانسان على امور هو ما يبغاها ) وقفت وهي تطالع ولدها وبعصبيه:وش قلت يا حمود حمود وهو يطالع امه:قلت خلنا ننسى هالثار اللي بكانا سنين...خلنا ننسى هالثار اللي عقدنا في حياتنا وكرهنا في عيشتنا ام حمود وهي تتفل على ولدها:تفو عليك منت برجال ...تبغى ابوك دمه يروح هدر ..تبغى دموعنا اللي ما نشفت لهالوقت نزولها يكون على الفاضي يا حمود...يا حيف على التربيه وتعب السنين وانا انتظر واحسب الدقيق والثواني للوقت اللي تبردون فيه ناري حمود وهو يضغط على يده بقهر من كلام امه:انا رجال يا يمه وافديس بروحي بعد بس ما لي حق ازهق روح بني ادم مو من حق أي احد ياخذ الروح غير رب العالمين طالعته امه وهي تهز راسها بخيبه ودموع القهر تتسلل لعيونها كان متابع لهم من اول ما بدوا الكلام وبعد ما شاف امه تطالع اخوه بخيبه وقهر وألم وقف :اذا انت مو قد انك تاخذ بثار ابوي انا باخذ بثاره ...اذا انت عادي عندك تشوف دموع امي تنزل طول هالسنين فانا مو عادي عندي ودم ابوي وروحه اللي طلعت من جسمه والقهر والحرمان اللي حسينا فيه ما راح يروح على الفاضي....كمل بقهر والحقد مالي عيونه:مثل ما حسينا بيحسون ومثل ما انحرقت قلبونا راح تنحرق قلوبهم وازود ام حمود مسحت دموعها وبصوت متحشرج من الغصه:كفو يا ولدي برد حرتي يا علي ولا تخلي الناس يقولون ما وراء راشد رجال قرب من امه وباس راسها وهو يطالع اخوه:يخسي ويعقب احد يجيب طاري ابوي بالشينه وانا راسي يشم الهواء هز حمود راسه وهو مو موافق امه واخوه على اللي يقولونه ...حس انه مقهور من امه واخوه اللي مو راضين يتنازلون ويعيشون بسلام حتى بعد كل اللي خسروه وحسوا فيه طلع حمود من المكان ومشت ام حمود وعلي ماسك يدها ويمشي معاها فضى المكان وبقت هي جالسه وكأنها انسانه خفيه محد ملاحظها....دموعها تنزل على خدها وتنطق بهمس:يا ربي متى نخلص من سالفة هالثار متى...ما عاد قلبي يقوى على فراق احد...ما عاد يقوى على لوعة الحرقه...ما عاد يقوى وقفت وبدت تسحب رجولها متوجه لغرفة اختها الوحيده اللي تفهمها وتسمع لها في هالبيت (راشد /رجال توفى من سنين وراح نعرف عنه اكثر بالروايه عائشه/ عمرها 45 سنه ارمله وتركض وراء الانتقام والثار من اللي خذوا زوجها منها حمود/عمره 24 سنه موظف في بنك انسان عقله يوزن بلد وطيب وقلبه كبير ورافض افكار امه وعمره ما اتفق مع امه في شي علي/ عمره 22سنه اخر سنه له بالجامعه قسم تربيه انسان طيب بس في شي ينغص عليه حياته وراح نعرف وش هو ونعرف عنه اكثر من خلال الاحداث ميعاد/عمرها 20 سنه بنت حبوبه وقلبها طيب قسم E وتطالع الله وتطالع اخوانها وتحاتيهم طول الوقت ) جالسه قدام المرايه وتمشط شعرها الاسود الطويل وبصوت رايق: يا وجودي على اللي غاب ما له عوايد......غيبته عن عيون اللي يحبه غريبه زاد همي وهو قاسي بفرقاه زايد....زاد لوعات قلبي كل يوم يغيبه قاطعها صوت الجوال...رفعت جوالها وردت وهي راسمه احلى ابتسامه:هلا وغلا بعموش :ههههه هلا فيس حبيبتي اخبارس يا مهره مهره:طيبه يطيب حالس..اخبارس انتي واخبار ابو اذاني ردت عليها وهي تشهق:حرام عليس ولدي ابو اذاني اقول لا تخليني اجيس وافرمس مهره:ههههههههه تعالي واتحداس اذا قدرتي علي يا عمشاء عمشاء بصوت زعل:ما ينقدر عليس انتي رجال ما قدروا عليس بقدر عليس انا مهره: ههههه فديت الزعلانين انا...قولي لي وش اخبارس وش احوالس وعلومس عمشاء وهي تتنهد:والله الحمد لله من الله بخير مهره بصوت جاد واختفت منه الضحكه:ومن الناس عمشاء بصوت خافت:نحمد الله مهره بهجوم وشك:عجوز النار مطفشتس مسويه لس شي عمشاء وهي توطي صوتها اكثر : لا ما سوت شي مهره بحده:مدامس وطيتي صوتس اجل مسويه شي عمشاء بطيبه:لا والله ما سوت شي بس زي العاده طراطيش كلام مهره بقهر:ليتني مكانس كان طلعت عيونها عمشاء بزعل:مهره لا تقولين عنها هالكلام مهره بقهر اكبر:يا ربي وتدافعين عنها بعد عمشاء: ايه بدافع عنها...علشان خالد ادافع عنها وعن أي احد مهره تنهدت :يا ذا الخالد مدري وش كثر بتتحملين علشانه عمشاء بحنيه وحب:خالد يا مهره عوضني عن كل شي وما تسوي امه شي الا يدافع عني ويحفظ لي حقي ودائما يعتبرني انا وهو واحد كافي انه ياخذ ما بخاطري ويداري دمعتي مهره سكتت وهي مو عارفه وش ترد على اختها عمشاء:شفتي حتى انتي سكتي كيف ما تبغيني اصبر...وبعدين خالتي احسن من خالي وحرمته مهره اللي تذكرت خالها وحرمته وبكره:في هذي صدقتي عمشاء:هههههه شفتي ان معاي حق مهره بقلة حيله:الله يعين عمشاء وهي تسمع ولدها يصيح:اقول يا مهره انا بصك الخط الحين لان فيصل يبكي وبرجع اتصل فيس وقت ثاني مهره:ماشي وبوسي لي ابو اذاني عمشاء بزعل مصطنع:يله فارقي مهره:ههههههههه مع السلامه صكت الخط وتوها موقفه الا شافته داخل عليها وهو شايله وبخوف:وش فيه جلس وولده في حظنه:لقيته يتضارب مع عيال جيرانا هالسكون عمشاء توها بتتكلم الا قاطعها ولدها اللي يمسح دموعه:والله كفختهم...خليتهم ينحاشون عمشاء وهي تطالع ولدها وتمسح دموعه:طيب ليه تصيح يوم انك مكفخهم فيصل وهو يحط يده على راسه:اخر ولد ملعون فقعني بحصاه صغيره عمشاء وهي تلمس مكان الضربه:حسبي الله عليهم من بزارين فيصل بمهايط:اصلا كلهم صاروا يصيحون كفختهم تكفيخ عمشاء طالعت زوجها وهي فيها الضحكه خالد وهو يطالع ولده اللي كل ملابسه غبره:والله يا خوفي العكس ههههههه عمشاء وهي تضرب كتف زوجها:حرام عليك هههه فيصل وهو يبعد عن ابوه وفيه الصيحه:تقصد اني اكذب والله صدق كفختهم مثل ما قالت لي خالتي مهره عمشاء وهي تمسك ولدها من يده:مهره قايله لك تكفخهم فيصل:ايه قالت لي كفخهم وخلك رجال تطق ما تنطق خالد وهو يضرب يديه في بعضها:لا بالله كدينا خير مدام مهره في السالفه عمشاء وهي ماسكه ضحكتها:روح يا يمه غير ثيابك فيصل:ان شاء الله اول ما طلع فيصل من الغرفه حطت يدها على فمها:هههههههههه خالد وهو يطالعها وفيه الضحكه:ايه اضحكي هذي علوم اختس بسببها الولد يهايط على العيال وهم يفقعون له راسه عمشاء:ههههههههه خالد:ويا ما بنشوف من علوم مدام مهره خالته عمشاء وهي تحط يدها على بطنها:هههه الله يقطع سوالفها خالد بابتسامه:الا ما قلت لي كلمتيها عمشاء وضحكتها تختفي:ايه كلمتها خالد هو عاقد حواجبه:فيها شي عمشاء وهي تنزل عيونها:لا ما فيها الا العافيه خالد وهو يمسك دقنها ويرفع وجهها:اجل وش فيس نزلتي عيونس عمشاء وهي تتنهد:ولا شي خالد :تكذبين علي وانا ما تعودت منس على الكذب عمشاء وهي تتدارك موقفها:لا والله مو بالقصد بس...كملت وعيونها كلها خوف:انا خايفه عليك خالد وهو يعقد حواجبه باستغراب:خايفه علي من وشو عمشاء والدموع بدت تتجمع في عيونها وبصوت باكي:والله خايفه عليك لا يصير فيك شي والله اموت خالد وهو ياخذها بحضنه: بسم عليس جعل يومي قبل يومس وش له لزوم هالكلام ما في شي يخوف عمشاء :خايفه يسوون لك شي خالد وهو يبوس راسها وفهم وش تقصد:ما يصير الا اللي ربي كاتبه والله الحافظ عمشاء:والنعم بالله ...بس انا ما لي غيرك خالد وهو يبعدها ويمسح دموعها:وانا ما لي غير هالعيون اللي تذبحني وعسى ربي ما يحرمني من مناظرها عمشاء وخدودها تحمر:يا حبك لتغيير المواضيع خالد وهو يغمز لها:ليه ما تحبين هالمواضيع عمشاء وهي توقف:خلني اروح لولدي المهايطي احسن قبل لا يجي هو لنا خالد وهو يغمز لها مره ثانيه:ايه روحي له ما يصلح يجي هو عمشاء بإحراج:يووووه منك راحت وهي تسمع صوت ضحكات خالد اللي ترسم الابتسامه على وجهها وتزيد دقات قلبها خوف عليه (عمشاء/عمرها 27 سنه شخصيه مسالمه وطيبه وحنونه بس دائما الخوف محتل حياتها وراح نعرف سبب هالخوف من خلال احداث الروايه) خالد زوج عمشاء /عمره 28 سنه وهذا راح اخلي الروايه هي اللي تبين كل شي عنه) مهره اخت عمشاء /عمرها 24 سنه شخصيتها قويه وربت نفسها بنفسها والثقه والقوه عامود اساس في حياتها) فيصل ولد عمشاء/بزر يسمع كلام خالته مهره ويتورط عمره 6 سنوات) في بيت كبير يتألف من دورين جالسه في المطبخ وتأشر للخدامه:اغسلي هالخيار والطماط علشان نسويهم سلطه مع الغداء دخلوا عليها وكل وحده تنافخ وتتأفف ورموا شناطهم في الأرض..طالعتهم وباستغراب:وش بلاكن تنافخن طالعت امها وبضيق:مره ثانيه يمه لا تخلين وليدوه يجيبنا من المدرسه كملت اختها اللي تهوي على نفسها وتحرك مريولها:اووووف متنا حر خسنا وإحنا نستناه طالعتهم وجلست على الكرسي :احمدن ربكن ان في احد يجيبكن واتركن عنكن التأفف جلست على الكرسي وبعصبيه:و الله لو اننا جايين للبيت مشي كان اصرف لنا جلست جنبها اختها:ايه والله صادقه اختي ...طبخنا في هالحر..ساعه منقعنا في الشمس...الناس راحوا بيوتهم وإحنا كأننا طرارات واقفات عند باب المدرسه طالعتهن وبحده:اقول يا نوفه اتركني عنس انتي ونوف الكذب الزايد ترى كل اللي تأخرها ربع ساعه....وقصة انكن تمشن من المدرسه للبيت انسوها ولا يسمعكم ابوكم او ذياب تحكن بها السالفه ترى والله يذبحونكم نوفه وهي تأشر على نفسها وعلى اختها:والله حرام مو كل مره تلطعونا في الشمس طيب مو فاضين تجيبونا حطوا لنا سواق طالعتها امها وشهقت وهي تحط يدها على صدرها:سواق هذا اللي ناقص تركبين انتي واختس مع رجال غريب نوف:وش اخبارس يا يمه على هالافكار نص البنات حاطات سواق او يروحن مشي لبيوتهم كملت اختها:ايه صادقه اختي الام وهي تطالع وراهم:هذا أبوكن جاء قولو له اقتراحاتكم طالعوا بعض والتفتوا على ابوهم اللي دخل:السلام عليكم قاموا من مكانهم وباسوا راسه:وعليكم السلام طالع زوجته وباستغراب:وشو عندكم..وانا جاي سمعت سالفة اقتراحات ام ذياب وهي تطالع بناتها اللي مبين عليهن الخوف:اسأل بناتك يا ابو ذياب طالع بناته:وش عندكن طالعوا بعض وسكتوا طالعهم بتركيز وبشك :وش فيكن ما تردن...صاير شي نوفه:لا يبه مو صاير شي... بس كنت اقول لامي ان وليد كل مره يتأخر علينا ونموت بها الحر نوف وهي ترسم البراءه على وجهها:والله يا يبه اننا خسنا وعفنا وفي الأخير يصارخ علينا يوم ركبنا معه طالعهم وهو عاقد حواجبه:يصارخ عليكم !..ليه انتن وش قايلات له نوفه:والله ما قلنا شي بس سألناه ليه تأخر نوف برجاء:يبه شوف لنا حل مو كل مره تضرب روسنا الشمس ابو ذياب:خلاص انا بأكد عليه وعلى أي احد يجيبكن من المدرسه ما يتأخر عليكن...ها كذا زين نوف:يا بعد عمري زين ونص نوفه:يبه من الحين وقبل لا انسى ترى نبغى أغراض من المكتبه ابو ذياب:ما عليه يا نوف اذا جاء المغرب ذكريني وانا اوديس او اخلي احد من اخوانس يوديس طالعوا بعض وسكتوا وهم مستغربين طالعهم وحس ان فيهم شي:وش فيكم نوف وهي تأشر على نفسها:يبه انا نوف ..كملت وهي تأشر على اختها:وهذي نوفه ام ذياب وهي تحط شيلتها على عيونها:هههههههههههه ابو ذياب بتصريفه:اني داري انها نوفه وبعدين انا وش قلت ...قلت نوفه نوف وهي تطالع اختها وفيها الضحكه لانها تدري ان ابوها تلخبط:لا يبه قلت نوف ابو ذياب وهو يطالعها بحده:انتي تكذبيني ياللي ما تستحين ام ذياب زاد ضحكها نوف وهي تحس بخوف من نظرات ابوها:لا اخسي صح أنت قلت نوفه بس انا الظاهر ما سمعت زين ابو ذياب وهو يلف وجهه:يله روحن غرفكن وبدلن وانزلن تغدن نوف ونوفه وهم فيهم الضحكه:ان شاء الله شلوا شناطهم وطلعوا من المطبخ اول ما طلعوا طالع زوجته:وانتي لازم تضحكين ام ذياب وهي تمسح عيونها:وانت متى تفرق بين نوفه ونوف ابو ذياب وهو يشيل الغتره من فوق راسه :ما ظنتي في يوم بقدر افرق ..الا انتي وشلون تفرقين بينهم وهم نسخه من بعض ام ذياب وهي توقف:انا امهن كيف ما اعرف من هي نوفه ومن هي نوف ابو ذياب وهو يهز راسه:سبحان الله محد يفرق بينهن الا انتي وذياب...كمل وهو بيطلع من المطبخ:انا بطلع اريح واذا زهبتو الغداء نادوني ام ذياب:ان شاء الله طلع ابو ذياب وبعد دقايق دخل المطبخ:السلام عليكم ام ذياب وهي تطالع ولدها:وعليكم السلام...انت مو كنت عند غزيل يا ذياب ذياب وهو يجلس على كرسي من الكراسي اللي حول الطاوله:الا كنت عندها بس جيت اتغدى ام ذياب:انا حسبتك بتتغدى عندها ذياب:لا بتغدى هنا...كمل وهو يتلفت:الا وين الشعب ام ذياب وهي مستغربه:أي شعب قصدك اخوانك ذياب:لا يمه اقصد حريمي هالعلل ام ذياب وهي تستغفر:استغفر الله..حرام عليك يا وليدي وش علله ذياب وهو متجاهل نقد امه له:ليه ما نزلوا يساعدونس هالرفلات ام ذياب بحنيه:حرام عليك تظلمهن هم وين والرفاله وين ما شاء الله عليهن سنعات كل وحده تقول الزود عندي ذياب بعصبيه:ويوم ان كل وحده تقول الزود عندي ليه مخلينس انتي اللي تطبخين ام ذياب بكذب:انا اللي ابغى اطبخ مو كل مره هن اللي يطبخن ذياب وهو يوقف وهو عارف ان امه تغطي على حركات حريمه:وهم وش وراهم ما غير يأكلن ويرقدن خلهم يشتغلون في البيت و يحللون النعمه اللي يطفحنها ام ذياب وهي توقف وبعصبيه:ذياب وش هالكلام ..حاسدهن على النعمه ذياب وهو يحاول يتمالك اعصابه:ما نيب حاسدهن يا يمه بس اضيق لا شفتس تكرفين وهم ثلاث حريم وجالسات ما يسوون شي عطى امه ظهره بيطلع من المطبخ ام ذياب:وين رايح ذياب:بروح اشوف وش عندهن ما نزلوا يساعدونس ام ذياب بطيبه:يا ولدي ارفق عليهن..شوي شوي عليهن طلع ذيب وصعد الدرج وقبل لا يلف لجهة جناحه سمع صوتها واستغرب...قرب وطق الباب وسمع صوتها:تفضل فتح الباب وطل براسه:مهوي وش تسوين رسمت احلى ابتسامه وعدلت نظارتها:اذاكر طالع الساعه اللي بغرفتها وباستغراب:انتي ما رحتي الكليه اليوم مها وهي تحضن الكتاب اللي بين يديها:الا رحت وتوني راجعه قبل ربع ساعه ذياب بتعجب:وتذاكرين مها وهي مستغربه من تفاجأ اخوها:ايه ليه فيها شي؟ ذياب:وانا اخوس اخبر اللي يجي من الكليه ولا من مدرسه يبغى يرتاح او يتغدى او ينام ماهوب يمسك كتاب ويذاكر لبكره وهو توه جاي مها بابتسامه:لا يا اخوي انا ما اقدر ارتاح وبكره وراي امتحان لازم ابدا من الحين ذياب وهو يهز راسه:الله يوفقس بس لا تضغطين على نفسس مها:ان شاء الله قبل لا يصك الباب وقفه صوتها:ذياب فتح الباب:عيون ذياب مها وهي تعدل نظارتها وبخجل:يا اخوي عندي درسين في مادة الاحصاء مو فاهمه فيهم شي فـ... قاطعها ذياب اللي يعرف ان اخته خجوله بزياده وتستحي تطلب منه شي:على قهوة العصر جيبي كتابس وانا اشوفهم لس واذا عرفت شرحت لس مها براحه وابتسامه خجوله:لا خلا ولا عدم منك ذياب بابتسامه:ولا منس طلع وصك الباب والتفت على اللي صاعد الدرج كان مبين انه سرحان ومو بالدنيا ذياب :متعب طالعه وتوه ينتبه على وجود احد في المكان:هلا ذياب بشك:فيك شي متعب وهو ينزل غترته من على راسه:لا ما فيني الا العافيه ذياب:اجل وش فيك مسرح وعقلك مو معك متعب وهو يتنهد:ولا شي كمل مشى لغرفته وما عطى مجال لذياب يقول له شي ذياب وهو يشوف متعب يدخل لغرفته زفر بضيق وهو يتذكر حال اخوه والحال اللي وصل له من بعد الحادث وبهمس:الحمد لله على كل حال تذكر حريمه وكمل مشي لجهة جناحه وهو ناوي لهن على نيه قشرا (ابو ذياب/عمره 57 سنه شخصيه متمسكه بالعادات والتقاليد ربى عياله على اسس وعادات ما يحب ان احد يتجاوزها ام ذياب/عمرها 55 سنه شخصيه مطيعه حنونه ومسالمه ألزم ما عليها بيتها وعيالها متعب/عمره 27 سنه شخصيه منعزله وهاديه وماله علاقه بأحد ورح نعرف السبب من خلال احداث الروايه ويشتغل موظف في الجمعيه الخيريه مها/عمرها 21 سنه شخصيه هاديه وخجوله ودافوره تدرس قسم رياضيات ثالث سنه لها ..كان لها احلام كثيره بس تبخرت وراح نعرف السبب من خلال احداث الروايه نوف ونوفه/توام عمرهم 18 سنه ثالث ثنوي شخصيتهم متقاربه من جهه ومتباعده من جهه اخرى الكل يلقى صعوبه في التفريق بين الثنتين وراح نتعرف اكثر عليهم من خلال احداث الروايه ) نهاية البــــــارت الاول وان شاء الله يعجبكم البارت الاول ولو في تفاعل نزلت البارت الثاني بسرعه |
الـــــــــــسلام عليكم..
ياااهلا والله أني صاادقه بأهل الجنوووب ^^ حبيت الشخصيااات كثييير والحوارات وبعد الاحداث أكثر. مــــهره/ من صفاتها وحركاتها باين لها دوور كبيير بالروايه. ذياب/ يااقلبي مره وحده 3 علل أقصد زوجاات ليش من داعي عليه. وليد/ متحمسسه لسالفته مع بنت عمه شكلها علوووم بتصير بينهم^^ خالد/ مافهمت وش زوجته خايفه منه!! سلووو يعطيك العاافيه أختي على البارت اللي يعتبر عيينه صغنوونه وبإنتظار الباقي.. |
السلام عليكم ورحمة الله وبركاته
باحيالله اهل السليل........ ديرة السليل سقاها السيل ديرة طرب لسليليه مااااااودي اااامدحتس بالحيل تنغرين بس ابقولتس وانا والله صادقه انتي مبدعه بمعنى الكلمه :wah: من الحين انا حاجزه عندتس بالصف الاول يلبى السين واهل السين سوسو روايتك بتناقشين فيها موضوع كبير انتي قده الثار اللي ضيع اجيال واجيال . وللاسف للحين ناس ينفخون جمره لا رمد سوسو اهنيك على الاسلوب حسيت اني متربعه بين ذياب و غزيل وهم يسولفون بغيت ا شارك خفت يمردغني الاخ ذياب يروع ذياب عسى القوم تااااااخذك عمرك 30 وحريمك 3 عسى عيالك ماهم 33 مدامك ماسك رقم 3 اللي بعمرك ياتوه معرس ياتوه خاطب بالكثير عنده بزر بس مدامك منت مستانس يا رجال اكيد هالزواجات ماهي من خاطرك وشكل سوسو بتزوجك وحده تنسيك الاول والتالي وليد الله يكون بعونك صراحه هالزيجه ظلم لك توك ابو22 وطالب وينك وين العرس خالد وعمشاء كناري الحب بس ليه فرق العمر بينهم سنه وحده ياخوفي ان ام حمود تبي راس خالد بدل راس رجلها راشد مهره تعجبيني ياشيخه روحي والالب دعيلتس بس ياخوفي يامهره عند الرجال تطير الميم وتصيرين هره مغمضه حمود ياليت كل الرجال مثلك كان ماتيتموا بزران وترملت بنات الف الف الف شكر على هالمتعه سوسو بس الله الله بالانتظام ولا ولااااا صبرت والشكوى على الله |
اقتباس:
هلا فيس يا غلاي تسلمين وعسى هالمحبه دوم وتزيد مع كل بارت انزله ههههههههه الا من داعي عليهن هن مو هو الله يعافيس والبارت صغينون لاني بالبدايه وراح تكون اول ثلاث بارتات صغينونه لانها البدايه وتعريف بالشخصيات وبعدها راح اطوله ولا يهمس منورتني والله |
اقتباس:
الله يحيس ويبقيس لعين ترجيس يارب هههههه لبى عمرس والله تعليقس حمسني وفرحني واسعدني بشكل لا يوصف انا حبيت اركز على الثار لانه لحد الحين موجود بالسليل وقاعد يلعب في شبابها حتى بعد كل هالسنين وهالتطور من عيوني وان شاء الله منتظمه وراح احدد يوم او يومين انزل فيهم ولا يهمس والله كل حرف كتبتيه ترك اثر حلو عندي منورتني وعسى نورس ما ينطفي في هالروايه ابد ههههههههه يمردغس علشان انا امردغه |
بدايه رااائعه غلاتي
اثار من العادات السيه التي لم تختفي في بعض المناطق روايه بدايتها مشوقه بنتظارك غلاتي |
عمري ما عرفت للعشق طاري..الا يوم سكنت عيونس بقلبي يا بنيه البــــــــــارت الثــــــــاني فتح باب جناحه وعيونه تتفحص المكان صك الباب وبعصبيه: منيره– هيا - سميه ما سمع حس لوحده فيهم فرجع صرخ بعصبيه:منيره وصمخ ان شاء الله طلعت منيره وهي بجلال الصلاه وبرعب:سم يالغالي وقفت قدامه وصدرها يرتفع ويهبط من الخوف قرب منها وصرخ:وين ضرايرس...وين الباقيات منيره وهي تبلع ريقها:هههيا تسبح ولدها وووسميه تكلم بلهجه كلها عصبيه:انثبري هنا لحد ما ارجع منيره بخوف اشرت براسها بطيب وهي ترجف في مكانها توجه لقسم هيا..فتح الباب وشافها تمشط شعر ولدها وبصراخ:ساعه اناديس ما تسمعين هيا طاح من يدها المشط وبخوف:ووالله ممما سمعتك ذياب وهو يرفع اصبع يده بتهديد:دقيقه لو ما القاس بالصاله بيصير لس شي ما يعجبس ضرب الباب بعده وتوجه لقسم سميه فتح الباب وشافها توها بتطلع ...حطت يدها على قلبها من الخوف لما طلع بوجهها:بسم الله خوفتني مسك يدها وسحبها وراه بدون ما يقول لها شي ترك سميه جنب منيره وهيا وبعصبيه:الحين يوم كل وحده منكم ما عندها شي ليه تاركات امي تطبخ وتكرف...مو انا قايل لكم ما تخلون امي تمد يدها على شي في المطبخ هيا وهي تبلع ريقها:ااانا كنت اسبح... قاطعها :بلا اعذار بايخه وبعدين ما جاس وقت تسبحين الولد الا هالحين كان نزلتي تطبخين بدل امي ولاحقه على سباح الولد طالع منيره:وانتي وش كنتي تسوين ها ... منيره وهي ترفع الجلال بين يدها وبخوف:اااانا كككنت اااصلي ووالله اني كنت ناويه انزل يعني اساعدها.. ذياب وهو يحط يده وراء ظهره وبطنازه:لا والله ...كمل بجديه:يعني تفكرين تنزلين لما تكون خلصت طباخ ..ليه ما طبختي قبل الصلاه ولما ياذن تصلين وترجعين تكملين طباخ منيره بلعت ريقها ونزلت عيونها وما عرفت وش ترد عليه ذياب وهو يطالع سميه:وانتي وش عذرس قولي ...مو كلكم طالعين لي باعذار بايخه ما لها أي معنى سميه وهي تكتف يديها:انا كنت اكلم عمتي ذياب بصرامه:سميه ما تقدرين تاجلين مكالمتس ..يعني تخلين امي تكرف علشان مكالمه سميه:لا بس... قاطعها ذياب:بس ما ابغى اسمع ولا كلمه من وحده فيكن رفع اصبعه وهو يكمل:اسمعن عاد...والله ثم والله وهذاني حلفت لو يجي يوم واشوف امي تطبخ وتنظف وانتن قاعدات لا شغله ولا مشغله بيصير لكن شيء ماهوب طيب ولا راح يعجبكن...فاهمات شافهم يطالعون بعض ولا ردوا فصرخ:فاهمات ولا لا هيا ومنيره وسميه اللي لفت وجهها:فاهمين طالعهم بعصبيه قبل لا يعطيهم ظهره ويطلع ضارب الباب وراه بقوه خلاهم يفزون من قوتها اول ما طلع ذياب جلست منيره على الكنب بجلالها ويدها على قلبها:يا ويلي بغيت اموت من الخوف هيا وهي تجلس جنبها وتحط يدها على صدرها :ايه والله بغت تجيني ذبحه صدريه اما سميه فقعدت تتحلف في ذياب في داخلها وبزعل لفت رايحه لغرفتها هيا وهي تكش على سميه:مالت عليها مسويه فيها اني زعلانه..زعل جدي ان شاء الله اللي راح ولا رجع منيره:وش عليس منها هيا بقهر وهي تاشر على جنبها:باطه كبدي يا اختي وقاهرتني منيره وهي توقف:الحمد لله ووش فيه قاهرتس ان شاء الله هيا وهي توقف جنبها:وش له يفضلها علينا منيره :هو مقصر عليس بشي هيا:لا منيره:مو كل شي يلبيه لس هيا:الا منيره:اجل خلصنا مو مخلينا معتازين شي وكل شي نطلبه يلبيه لنا وش نبغى اكثر من كذا هيا وهي تميل بوزها:نبغى شوي من الدلع اللي يدلعه لها منيره وهي تعطي هيا ظهرها:الله يخلف عليس أي دلع انتي تدرين ان ذياب ما يعرف يدلع ولا هم يحزنون فاتركي عنس هالاشياء اللي تتخيلينها دخلت منيره غرفتها وبقت هيا اللي ما عجبها كلام منيره ولا اهتمت له ثواني الا طلع ولد هيا يركض:يمه يمه هيا:وصمه وش فيك يا فلاح فلاح:يمه مزنه طاحت من فوق السرير...كمل وهو يحط يده على راسه:على راسها شهقت هيا وهي تركض للقسم المخصص لها:بنتي ..يمه بنتي ركضت هيا وبقى فلاح اللي يطالع امه ويضحك على طريقه ركضها (منيره زوجة ذياب الاولى /شخصيه طيبه ومسالمه ودينه واسنع حريم ذياب بس شكلها اقرب لحريم اول عيالها/ خلف عمره 8سنوات,نوره7سنوات هيا زوجة ذياب الثانيه /شخصيه ملقوفه وسوسه وغيوره وراح نعرفها اكثر من خلال الروايه عيالها/فلاح عمره5 سنوات,مزنه عمرها سنتين سميه زوجة ذياب الثالثه/شخصيه تختلف عن منيره وهيا ..تهتم بنفسها وتملك من الجمال والعلم الشي الكثير هاديه وما عندها عيال وراح نعرفها اكثر من خلال احداث الروايه ) :اهئ اهئ ااااااااا اهئ اهئ ااااااااهئ وقفت وصارت تجي وتروح فيها:خلاص يا حبيبتي خلاص يا قلب امس انتي...صارت تطالعها وهي تكمل بتعب:وش فيس يا ماما وش له هالصياح دخلت عليها اختها اللي مبين انها هي بعد كانت تصيح...طالعتها وبخوف:ميعاد وش فيس انتي بعد شافتها تجلس على طرف سريرها وساكته صارت تهز بنتها بين يدينها وهي تقرب وتجلس جنب اختها:وش فيس ..انتي كنتي تصيحين.. حست انها ما عاد تقدر تمسك عبرتها اكثر فحطت راسها على صدر اختها وصارت تبكي طالعت بنتها واختها اللي صاروا ثنتينهم يصيحون:يا ربي وش فيكن انتن الثنتين حاوطت اختها من كتوفها وهي تبوس راسها:وش فيس يا حبيبتي في شي يوجعس هزت راسها بلا رجعت سالتها وهي مو عارفه وش في اختها:احد من اخواني مزعلس رجعت هزت راسها بلا بتعب وبصوت كله يأس:اجل وش فيس رفعت راسها وهي تمسح دموعها:انتي اللي وش فيها بنتس وقفت وهي تجاوبها:والله مدري شكلها جويعه ..كملت وهي تعطيها اياها:خليها معس بروح اسوي لها الرضاعه بسرعه وارجع مسكت بنت اختها وهي تبتسم لها..وش كثر تحبها.. تحس انه بوجودها يصير البيت له حس...على كثر ما هي زعلانه على اختها على كثر ما هي فرحانه بوجودها لان هي الوحيده اللي تفهمها وتسمع لها رجعت وهي شايله في يدها الرضاعه وخذت بنتها وجلست وهي تعطيها الرضاعه تربعت على السرير وهي تقابلها وترجع شعرها على وراء:يله وهذي بنتي وسكتت ...قولي لي وش فيس يا قلب اختس ميعاد وملامح الحزن ترجع لوجهها:ما فيني شي بس يا نوره احس اني متضايقه ومغموته نوره وهي تحط يدها على يد اختها:بسم الله عليس من وشو مغموته ميعاد وهي تنسدح وتحط راسها على طرف رجل نوره:من سالفة هالثار نوره تنهد وسكتت وهي تمسح بيدها على شعر اختها ميعاد وعيونها تمتلي دموع:خايفه يصير شي لواحد من اخواني...امي تحرض حمود وعلي وما تفكر الا بالثار ما تفكر انها ممكن تخسر واحد فيهم مو كافي خسرنا ابوي نوره :الله يصلحها امي المفروض ترضى بكتبت ربي بس وش نقول ميعاد وهي ترفع راسها:حمود ما يسمع لها بس علي يسمع لها ودايما يقول انا باخذ حق ابوي مو حكموا على الرجال بالقصاص ليه الحين بعد يبغون يذبحون احد من عياله نوره بحكمه:لا تفكرين بكل هذا يا حبيبتي لان احنا ما بيدنا شي غير قلة الحيله ولو الله كاتب ان في شي بيصير اجل راح يصير ولو ما كتب الله ما راح يصير وما عليس من الكلام اللي تسمعينه..كملت وهي تمسح دموع ميعاد:(( قل لن يصيبنا الا ما كتب الله لنا هو مولانا و على الله فليتوكل المؤمنون)) ميعاد:والنعم بالله نوره وهي تمسح على شعرها:واذا حسيتي باي غم او كتمه او خوف قولي هالدعاء[ يا علي يا عظيم فرج عني ما أهمني وتوَل أمري بلطفك وتداركني برحمتك وكرمك إنك على كل شيء قدير, يا مسهل الصعب الشديد ويا ملين كل قاسي عنيد ويا منجز الأمرين الوعد والوعيد بك ادفع ما أطيق ومالا أطيق ولا حول ولا قوة إلا بالله القوي العزيز] ميعاد بابتسامه وهي ترجع تنسدح على رجل نوره:الله يخليس لي ولا يحرمني منس....كملت وهي تغمض عيونها:اقري لي قران يا نوره كل ما اسمعس تقرين احس براحه عجيبه نوره وهي تمسح على شعرها وتبتسم من دعوة ميعاد لها و تطالع بنتها اللي نامت وبصوت خاشع ومرتل بدت تقرا بعض من ايات كتاب الله العزيز وميعاد تحس بالراحه مع قرايه نوره وصوتها اللي كله خشوع (نوره اخت ميعاد وحمود وعلي/شخصيه طيبه وفي حالها وارمله وراح نعرف عن حياتها اكثر من خلال احداث الروايه بنتها فاطمه عمرها سنه وتشبه ابوها كثير ) واقفه في المطبخ وعند الفرن وغطت الغداء وبضيق:اوووووف وش ذا الحر لفت لما سمعت صوتها المزعج:ما خلص الغداء ساعه وانتي تحوسين فيه ...ما صارت متنا جوع طالعتها وحطت يدها على خصرها وبقوات عين:احلفي بس ..اذا جيت طباخه عند ابو اللي خلفوس ذاك الوقت قولي اخلصي واغسلي ...كملت وهي تاشر على نفسها:ترى انا لما اتفضل واطبخ ترى هذا كرم مني مو معناته اني شغاله عندكم طالعتها بقهر وعيونها بتطلع من مكانها ولفت وطلعت من المطبخ لقت زوجها قاعد في الصاله ..جلست جنبه وبقهر:هالبنت بتجيب اجلي وجع يوجعها لسانها اطول منها الله ياخذها طالعها:وش فيس بعد يا رجساء رجساء وهي تلف عليه:بنت اختك يا صالح اقولها اخلصي علينا بالغداء قامت كلتني بقشوري لف وجهه وهو يطالع اخبار القناه الاولى:احسن محد قال لس داحريها وانتي عارفه قوات عينها رجساء بقهر:هذا بدال ما تقوم وتعطيها كفين يعدلون وجها تقول هالكلام صالح وهو يطالع زوجته:اعطيها كفين علشان ما عاد نذوق منها ولا ريال واقعد احوس ادور على شغل ونتورط وما نقدر ندفع لا اجار البيت ولا الكهرب والماء..هذا الحل برايس رجساء وهي تضرب يديها ببعض:وان شاء الله لمتى بنقعد على منتها صالح:اقول لا تكثرين هرج وخليس بعيده عن البنت وفكينا من عوار الراس ترى من وراها ماكلين شاربين ومرتاحين من عوار الراس وكل ست شهور اجار البيت يندفع لفت وجهها وسكتت وهي مقهوره من كلام صالح ثواني الا دخلت الصاله وهي شايله السفره فرشتها وهي تعطي خالها ومرت خالها نظرات كره وقرف وطلعت ورجعت بصحن الغداء وحطته وبدون نفس:يله الغداء ...كملت بهمس:جعله ما يظهر ان شاء الله صالح وهو يقوم:يله يله الغداء جلس على السفره وهو ياشر لمهره:تعالي تغدي مهره وهي بتطلع :مالي نفس رجساء:عشتوا بنت الامير ...الا صدق وين الماء ليه ما جبتيه مهره وهي تطالعها من طرف عينها:قلت لس مانيب شغاله واللي يبغى شي يدل المطبخ طلعت وهي تاركه وراها رجساء اللي تغلي من الداخل صالح وهو يطالع زوجته وفي يده لقمة الرز:قومي بسرعه جيبي الماء وتعالي اكلي رجساء وهي تقول وبقهر:زين بد صالح ياكل بفجع وهو حتى ما فكر يستنى رجساء تجي دخلت غرفتها وبقرف:اووووف ريحتي بصل وخياس فتحت دولابها وطلعت لها قميص وقبل لا تطلع من الغرفه علشان تروح الحمام اكرمكم الله رن جوالها مسكت جوالها وهي تشوف الشاشه تنور باسم((نور حياتي)) فتحت الخط وبابتسامه وتغير 180 درجه:هلا وغلا ومرحبا ومسهلا بعمشه عمشاء:هههههههه يا حظي من قدي على هالترحيب مهره:هو في اغلى منس يا قمر اخبارس عمشاء:الحمد لله بخير ...اخبارس انتي وعلومس مهره:تمام وعال العال والحمد لله عمشاء وهي تتذكر ولدها وتتغير نبرة صوتها:مهروه وش انتي معلمه ولدي مهره باستغراب والابتسامه تختفي:ما علمته شي عمشاء:احلفي بس ..اليوم رايح لعيال جيرانا يهايط عليهم ورجع وراسه مفقوعه ومورمه مهره:هههههههههه كفو والله هههههههه عمشاء وهي تشهق:بعد كفو على وشو مهره:ما توقعته بيسمع الكلام عمشاء:هههههه حرام عليس فيه الصيحه ومسوي نفسه قوي قدامنا مهره:ههههههه فديته حبيب خالته عمشه وهي تتذكر:الا صدق بغيت انسى انا ليه متصله عليس مهره وضحكتها تختفي:وش عندس عمشه:في عرس لولد عم خالد وش رايس تجين معاي مهره وهي تفك البوكله اللي في نهاية شعرها المسوط:لا مالي نفس تدرين اني ما احب الاعراس عمشاء:لا عاد تكفين مهوره انا ما احب اروح اعراس لحالي وطبعا لو ما رحتي انتي معاي بكون مع خالتي اللي ما تدانيني بعيشة الله مهره وهي تاخذ شباصه وتلف شعرها على شكل كفر وتمسكه بالشباصه:اممممم خلاص بروح وامري لله عمشاء:يا بعد عمري يا مهوره مهره وهي تجلس:بس ترى ما عندي ثياب عمشاء:ما عليس ثوب العرس خليه علي انا اعرف مقياسس وانا بجيب لس ثوب مهره:مدام كذا خلاص عمشاء:خلاص الحين انا بصكر وبرجع اتصل فيس مره ثانيه مهره:ماشي يا روحي عمشاء:يله حبيبتي مع السلامه مهره:بحفظ الله صكرت الخط ووقفت والابتسامه مرسومه على وجهها وهي تهمس لنفسها:يله اروح للعرس احسن من اني اقعد مقابله هالعلل طلعت وصكت الباب وما نست تقفل باب غرفتها لانها ما تثق لا بخالها ولا بزوجته (صالح خال مهره وعمشاء/شخصيه طماعه واتكاليه وخبيثه ومو شايفه خير ابد هو الوحيد الباقي لمهره وعمشاء من اهل امها رجساء زوجة صالح/ شخصيه خبيثه وحاقده وتكره اخت صالح وبناتها عمشاء ومهره وما عندها عيال ) غيرت مريولها وجلس على سريرها مقابل اختها وبصوت كله ضحك:شفتي شكل ابوي يا نوفه لما حس انه غلط هههههههه نوفه وهي تضحك:حرام عليس يا نوف ههههههه نوف:المسكين ما يفرق انا من وانتي من نوفه:ما الومه انا لما اشوفس احس اني شايفه نفسي بالمرايه نوف وهي تضرب يديها في بعض:اخ يالقهر نوفه وهي مستغربه:وش فيس نوف:انا مقهوره الكل ما يقدر يفرق وش معنى ذياب اللي يفرق بينا نوفه بحيره:ايه والله اصلا نفسي اعرف هو كيف يقدر يفرق بينا نوف وهي تهز كتوفها:والله حتى انا نفسي اعرف بس مدري كيف يقدر يفرق بينا نوفه وهي تضرب نوف برجلها:انا المقهوره لان هالشبه يورطني في المدرسه نوف وهي تحط يدها على رجلها:ههههههه نوفه:والله قهر واللي يقهر اكثر لما يسالون المدرسه اللي شافتني حاضره الدرس من اللي كانت بالحصه تقول ...كملت وهي تقلد المدرسه:ما ادري أي وحده كلهم نفس الشي عندي نوف:هههههههه لا واذا سالوا اللي شافتني منحاشه تقول مدري هي أي وحده فيهم نوفه:حرام يعاقبوني معاس نوف:اخت على الفاضي حللي الاخوه قاطع سوالفهم طقت الباب انفتح الباب وطلت وهي تطالعهم:يله يا بناتي حطينا الغداء نوف:ان شاء الله يمه الحين جايين ام ذياب:مو تتاخرون ترى ابوكم وذياب يستنون نوفه:لا يمه ما راح نتاخر الحين نازلين صكت ام ذياب الباب ومشت باتجاه غرفة حبيبة قلبها وقبل لا تفتحه سمعت صوتها زي العاده ابتسمت وهي تفتح الباب بعد ما طقته شافتها واقفه قدام الصبوره اللي شراها ذياب لها علشان تساعدها على المذاكره وفاتحه كتابها وشكلها تفكر حطت الكتاب على الطاوله الصغيره وهي تكتب بالقلم وتكلم نفسها ومو منتبه لوجود امها من الاساس:اها فهمت يعني علشان احسب احصاء معدل مدخول الشركه استخدم التقسيم بعد ما اروح الجذر ابتسمت وبصوت حنون:ما تعبتي يا بنتي طالعت امها وحطت القلم على الطاوله:يمه من متى انتي هنا ام ذياب:من زمان بس انتي مو حاسه باحد قربت وبخجل وهي تبوس يد امها:اسفه يمه والله ما انتبهت ام ذياب:الله يوفقس يارب...كملت وهي تحظن يدين بنتها بين كفوف يدها:يله حبيبتي اخذي استراحه من هالدراسه وانزلي تغدي مها:من عيوني الحين انزل ام ذياب:مو اطلع وترجعين لدروسس وما تنزلين مها وهي تضحك وتعدل نظارتها:لا يمه ان شاء الله انزل ام ذياب :طيب طلعت وصكت الباب وراها راحت امها ومسكت الكتاب وخذت القلم وقبل لا تصك الكتاب شهقت وبفرحه:فهمتها ياربي كيف ما فهمت الطريقه من الاول رجعت فتحت الكتاب وتوجهت للصبوره وهي تمسح اللي كتبته وترجع تكتب من جديد ومثل ما توقعت امها نست سالفة الغداء نهائيا قربت من غرفته وطقت الباب وفتحته وشافته منسدح على سريره وحاط يدها على عيونه اول ما رفع عيونها وشافها تعدل وجلس دخلت :يمه متعب يله انزل حطينا الغداء متعب بهدوء:مالي نفس ام ذياب وهي تجلس على طرف السرير:ليه يا وليدي في شي يوجعك متعب :لا يالغاليه بس مالي خاطر ام ذياب:مو زين تنام بدون اكل متعب:والله مو جويع ولو جعت باكل أي شي ام ذياب:الا ببقي لك شوي من الغداء ومتى ما جعت اكله متعب:ان شاء الله اشرت براسها وهي تعبانه من حال ولدها طلعت وصكت الباب وراها وهي تتنهد بحرقة قلب رجع متعب ينسدح والافكار ترجع له وصور الحداث تنرسم قدامه نهاية البارت |
هلا ومسهلا سوسو مدام اني لا حمستس بتكتبين وتبدعين
ابشري بسعدتس وانا اختس ماوراي شي عمري ما عرفت للعشق طاري..الا يوم سكنت عيونس بقلبي يا بنيه بيت هالشعر من اللي بيقوله ومن هي البنت لو اني حاسه ان مهره]هي البطله ياني كرهت هالخال كره ومرته ازود اسم رجساء عندنا بس حنا ننطقه رجسه بالها ماهو بالالف ذياب ودي اعرف ليش ماخذ ثلاث والتاليه وسميه هي الغاليه !!!! امحق غلاءهذاهي خرشت مع الباقي ....بس شكلها راده بالجميع نوره وميعاد وحمود كلهم معارضين امهم شكل علي اللي بيطيع امه ويدور الثار من جديد الله يستر مهره مع انك ماوصفتيها حيل بس من التلميح انها مزيونه يارب بهالعرس تخطب وتفتك من هالخال عسى ما خال هو نجسته اقصد رجسته بس هو يمكن ما يوافق من يكد عليه ننتظرك يالغاليه |
سليليه حياس الله معانا في ليلاس
اعجبني جدا اسلوبس وشخصياتس. بالنسبه لقضية الثار بكل صراحه. ما توقعت انها موجوده عندنا في مجتمعنا الله يكفينا. الشر حابه. اقرأ عن هالموضوع من خلالس يا ترى منهو اللي. قتل. يكون. ابو مهره وعمشا. والا. ابو زوج عمشا. وزوجها هو اللي خايفه عليه نوف ونوفه. التوأم عندي. اولاد اختي توأم ما. اقدر افرق بينهم الله يصلحهم. واختي. تضحك علي. تقول. واضح الفرق. شلون ما تفرقين بينهم متابعه ان شا الله معاس دعماً لحرف السين خخخهه موفقه يارب |
اقتباس:
مرورس الاروع غناتي معاس حق ان شاء الله ما اتاخر منورتني |
البارت الثالث يوم الخميس باذن الله
|
سلام عليكم
ادري المفروض البارت يكون الخميس بس شديت الرحال لبيت جدي وانشغلت برمضان والتجهيز وهالعلوم واعتذر عن التاخير على الساعه 12 البارت يكون نازل باذن الله |
البـــارت الثـــالث فارشين سفرة الغداء وجالسين عليها وينتظرون طالعت بناتها التوأم واشرت لهم:وحده منكن تروح تناديها نوف اللي ما فهمت:من تقصدين؟ ام ذياب:من اقصد يعني مهوي نوفه وهي توقف:انا بروح اناديها ابو ذياب وهو يطالع ام ذياب:انتي ناديتيها ام ذياب:يا ويلي ايه مناديتها بس شكلها نست الغداء ذياب بابتسامه:الله يوفقها اينشتاين العايله ام ذياب وهي تضربه وبمزح:قل ما شاء الله على بنيتي لا تتحرول علي ذياب:ههههه ما شاء الله مانيب ناضلها نوف:اصلا لو بتنضلها ما تقدر عندها درع حمايه شهقت ام ذياب وهي تضرب نوف:قولي ما شاء الله...كملت وهي تطالعهم:اعنبو داركم وش فيكم على البنت اذكروا الله التفتوا وهم يشوفون نوفه نازله ووراها مها جلست مها جنب امها اللي تكلمت:الله يهديس يا بنتي وش فيس ما نزلتي واخرتي الكل عن الغداء مها وهي تعدل نظارتها وباحراج:اسفه والله نسيت ابو ذياب بمحبه لبنته:لا تهاوشينها هذي مهوي عين السيح لو تنطرنا شهر كامل مستعدين ننتظر ابتسمت وهي تنزل عيونها من مدح ابوها لها نوف اللي جنب نوفه همست:ايه هي مهوي الحبيبه الغاليه واحنا خرفان الحوش نوفه:هههههههههه التفتوا كلهم للي نازل من الدرج ويطالعهم:السلام عليكم الكل:وعليكم السلام ام ذياب وهي توخر لولدها علشان يجلس جنبها:تعال تغدى وانا امك وليد وهو يعدل غترته:لا يمه مالي نفس بالعافيه عليكم ابو ذياب:وين بتروح ..في احد يطلع الظهر وليد وهو يتنهد ويطالع ذياب:بطلع الشباب مزهبين الغداء بالاستراحه ابو ذياب اشر براسه:طيب طلع وليد بعد ما رمى نظره لذياب اللي سوى نفسه ما شافه من الاساس ام ذياب وهي تقرب من ابو ذياب الخس والجرجير:اقول يا مهوي تروحين معاي مها وهي تطالع امها:لوين ام ذياب:في عرس لعايلة الخلفان وبروح له وش رايس تجين معاي مها اللي ما تحب الاجتماعات:لا يمه ما ابغى ام ذياب:ليه ما تبغين تروحين ...كله حابسه نفسس في هالبيت لا طلعه ولا دخله مها:لا يمه هالفتره كلها امتحانات ما ابغى اروح نوف:انا ونوفه بروح طالعتهم ام ذياب بطرف عينها:اقول اقعدن بس بشوف غزيل يمكن تروح معي نوف بضيق:وليه ما تاخذينا معاس يا يمه ام ذياب:اخر مره خذيتكن معاي فشلتني قعدتن تضحكن على الحرمه ولبسها وسمعتكم وانا اللي طاح وجهي نوف وهي تلف وجهها:محد قال لها تلبس شي ما يناسب سنها ولا وحده اكبر من جدتي تلبس ثوب كله خيوط وين اصرفها ذي نوفه اللي ما قدرت تمسك نفسها:ههههههههههه....ام ذياب طالعتهم وسكتت نوف اللي حست ان امها ما راح تاخذتهم طالعت ابوها:يبه تكفى قل لامي تاخذنا معاها والله ملل ابو ذياب اللي ما يرضى على زعل بناته:اخذيهم معاس ام ذياب:بس.. قاطعها ابو ذياب:خلاص بيقعدن عاقلات ...طالع بناته:صح نوفه ونوفه:ايه ام ذياب وهي تطالعهم:باخذهم ونشوف طالعت نوف اختها وهي تبتسم بنذاله وحست نوفه ان ابتسامة اختها وراها شي طلعت من الحمام اكرمكم الله وهي لافه راسها بالفوطه...حاسه انها بعد هالحمام صارت احسن وانعش وقفت وهي تطالع زوجة خالها رجساء اللي شايله صحن الغداء وهي تناظرها بنظرات كلها كره ابتسمت في وجهها وهي تطالعها من فوق لتحت ولفت وهي تغني: يا هواي ويا جنوني يا من تساوي عيوني ما اقدر احيى العمر دونك وانته ما تقدر بدوني رجساء وهي تدخل المطبخ وبقهر:جعل الجن يدخلس وافتك منس يا بعيده اما عند مهره بعد ما فتحت باب غرفتها ودخلت صكرت الباب وراها...جلست على كرسي التسريحه وهي تفك الفوطه عن شعرها...مسكت المشط وبدت تمشط شعرها وهي تشوف نفسها في المرايه بعد ما مشطت شعرها رجعته على وراء ومسكته بشباصه وقفت ومشت لحد ما وصلت لسريرها وانسدحت عليه...غمضت عيونها وهي تتذكر اليوم اللي فقدت فيه امها وابوها...تنهدت من قلب ...كل ما تتذكر انها فقدتهم تحس بضيق ...في كل سنه وفي نفس اليوم اللي توفوا فيه تذكرهم وتحس كانهم متوفين من فتره بسيطه....تذكرت اول ما جات لبيت خالها هي وعمشاء ...بدت تمر عليها الذكريات وكانها شريط قدامها....فتحت عيونها على صوت طق الباب قامت من سريرها ومشت لحد الباب وفتحته وتغيرت ملامح وجهها اول ما شافتها:خير يا مرت خالي رجساء:ومن وين بيجي الخير وانتي رحتي غرفتس وما جيتي تكملين باقي شغلس مهره وهي ترفع واحد من حواجبها:ووشو شغلي ان شاء الله رجساء :المواعين حقت الغداء من بيغسلها ولا تفكرين ان المواعين بتنظف بالحالها مهره وهي تطالع يدين رجساء:ما اشوف في يديس حناء ...كملت وهي تاشر على نفسها:انا طبخت في هالحر وانتي كنتي جالسه تتابعين المسلسل ومكيف الصاله يهفهف على راسس والحين دورس اغسلي المواعين رجساء:بس... قاطعتها مهره:الكلام اللي عندي قلته وخلصت رجساء طالعتها بعصبيه ومشت والغل والحقد في قلبها يزيد مهره وهي تطالعها وهي رايحه:متى افتك منس وارتاح...الخبله تحسب كل طير ينوكل لحمه...تفكرني زي عموش تكرفني وانا ساكته ما درت الخبله اني مهره اللي ما قدر عليها خالها علشان هي تقدر علي.....صكت الباب وهي تكمل:يارب فكني منهم ومن غثاهم يارب نزل من سيارته ووقف قدام الصرافه ..دخل يده في جيبه وطلع بوكه وطلع منها بطاقة الصراف دخل البطاقه وبعد ثواني:يووووه يا ليل وهذي عطلانه بعد...مالي الا اروح للبنك واسحب من عندهم الفلوس ابرك لي خذا بطاقته من الصرافه ودخلها في بوكه ورجع لسيارته بعد ربع ساعه وقف قدام باب البنك ونزل من سيارته ودخل البنك بعد ما انتظر يجي دوره وقف قدام الموظف ...اشر له الموظف يجلس ...جلس وطلع بطاقته ومدها للموظف واول ما جات عينه في عين الموظف حس بان كل خليه من جسمه تصلبت... ظل الموظف يناظره وهو يحس بان ضربات قلبه زادت...هو...ايه هو نزل الموظف نظره بعد ما خذا بطاقته ...نزل عيونه على الاسم المكتوب على اللوحه اللي قدام الطاوله((حمود راشد)) سمع حمود يسال:ايداع ولا سحب همس بهدوء:سحب حمود بجمود:المبلغ على نفس الهدوء:3000 ريال مد له اوراق وقعها وبعد ثواني سلمه الفلوس ...وقف ومشى بدون حتى ما يلتفت لوراء ظلت نظرات حمود عليه وهو يهمس:خالد ...ابتسم بسخريه وهو يكمل:من يصدق انه جاء عندي برجوله ...كمل وهو يتذكر اخوه علي:الله يستر رجع نده على الرجال اللي كان ينتظر دوره بعد خالد وفكره مشغول بخالد حس انه مخنوق..صار له ساعه من طلع من البيت ولا يدري وين يروح... وقف السياره لما حس انه مو عارف وين يروح ...وقف قدام استراحة عائلتهم وفتح الباب ونزل ...اول ما فتح الباب نزل وهو يتسند على باب السياره وبعد ما حط رجله الثانيه على الارض خذا عصاته اللي ما صار يقدر يمشي بدونها وصك الباب مشى وهو يتسند على عصاه لحد ما وصل لباب الاستراحه ودخلها اول ما دخلها ووصل للمدخل الداخلي للاستراحه ..فتح الباب ودخل للصاله وتفاجا بوجود علي همس وهو مستغرب وجوده لان في هالوقت ما يكون في الاستراحه احد:انت هنا علي اللي كان منسدح على الكنب اللي بالصاله:متعب هذا انت ....تعدل وهو يجلس ويكمل:ايه هنا ما لي خلق احد قلت اجي مدام الاستراحه فاضيه جلس متعب جنبه وهو يسمعه يقول:وانت وش اللي خلاك تجي هنا متعب:ولا شي طفشان قلت اجي هنا استنى الباقين يجون علي هز راسه وسكت وهو عارف ان متعب يكذب وزي عادته ما يقول لاحد اللي داخله متعب وهو يسند عصاه جنبه:وش عندك ما لك خلق احد علي وهو يتنهد:ضايقن صدري واحس انه شاب نار متعب بملل:لا تقول بسبت هالثار علي وهو يتعدل ويصير مواجه متعب:ايه في غير هالسالفه متعب وهو يلف وجهه:وانت ما طفشت من هالسالفه الرجال قصوه من سنين طويله وقبروه والدود كلاه وانت جاي تركض ورى شي منتهي من الاساس علي بقهر:ما الومك يوم تقول هالكلام تنام وتقوم وابوك قدام عيونك مو انا اللي انام واقوم على صوت صياح امي من قهر ما فيها متعب وهو يتنهد:مجنون من ينفخ في قربه مخرومه علي:وشـ...قاطعهم دخول وليد اللي مبين انه ضايق هو الثاني:انتوا هنا علي:ليه ضايقه فيك الدنيا انت بعد وليد وهو يجلس ويزفر:لا ...كمل في خاطره: وش اقول ايه ضايقه فيني الدنيا واختك السبب ..اهلي ناشبين لي بسبتها دخل وهو يهمس:السلام جلس وهو يسمع الكل يرد:وعليكم السلام متعب:اخبارك يا حمود حمود:الحمد لله..وش علومك انت متعب:بخير وعافيه ولله الحمد شافت اخوه اللي لاف وجهه وصاد عنه واطلق تنهيده ...توجهت كل الانظار لذياب اللي سلم وردوا السلام وجلس جنب حمود لاحظ ذياب علامات الضيق على الكل...عرف سبب ضيقة اخوانه بس استغرب من ضيقة علي وقرب لحمود وهمس له:وش فيه اخوك عاقد النونه ونفسه بخشمه تنهد حمود وهو يرد عليه بنفس الهمس:هو في سالفه غيرها ذياب:لا تقول سالفة الثار حمود:ايه ذياب:والله ان اخوك ما عليه شرها سالفه انطوت صفحتها من سنين وهو يبغى يفتح الدفتر من جديد حمو وهو يتنهد:انا قلت له بس دائما ما يسمع الا كلام امي ذياب :مدام دخلت خالتي بالسالفه اجل كدو خير سكت حمود وحس بان ما عندي أي كلام ممكن يرد به على ذياب...تذكر خالد اللي شافه اليوم بالبنك ما ينكر بانه يحس بكره له بس كل ما يتذكر انه فقد ابوه مثله يحس ان الموضوع انتهى والمفروض يشيله من باله نهائيا نزل من الدرج وهو يركض وفي يده لعبته الطياره وبصوت عالي:واطير انا بالناس ووراي الاشرار وانا الف يمين بالطياره صار يتحرك ويركض وعيونه على لعبة الطياره اللي رافعها فوق وبدون ما ينتبه ضرب المزهريه اللي جنب السلم وطاحت وانكسرت التفت بخوف لصوت الصراخ اللي وراه:وكسر يكسر راسك ...وين عيونك فيه ..اعنبوا دارك عيون كبر عيون البقره ولا تشوف...كسرت لي المزهريه كسر الله راسك طالعها وبخوف:والله ما شفتها قربت وهي تمسك يده وتضربه:ما شفتها ها انا بوريك علشان مره ثانيه تبقق عيونك وتشوف وانت تركض مثل الثور في المكان امتلت عيون فيصل بالدموع وبصوت باكي:والله العظيم يا جدتي اني ما شفتها والله العظيم رجعت ضربته على راسه وبصوت مرتفع وعصبيه:اصلا وش منزلك تلعب هنا ليه ما طلعت تلعب برا طلعت من المطبخ واتسعت عيونها وهي تشوف ام خالد ماسكه ولدها وتضربه وولدها يصيح....قربت منهم بسرعه وبعدت يد ام خالد عن ولدها وخذتها في حظنها:وش فيس عليه وش مسوي علشان تطقينه ام خالد:ولدس ما تربى زين كسر لي المزهريه كسر الله راسه ان شاء الله عمشاء:لا تدعين عليه مو زين تدعين عليه ام خالد اللي ناويه على الشر:ما بقى الا هذي تجي تعلميني السنع ووش اللي المفروض اقوله عمشاء اللي تعرف ام زوجها تبغى تسوي لها مشكله استغفرت ربها وبهدوء:لا والله يا خالتي حشى لله مو هذا قصدي واذا على المزهريه اوعدس ما عاد اخلي ولدي يلعب في الصاله وانا الحين بكنس اللي كسره واول ما اروح السوق اجيب بدالها ام خالد وهي تطالعها بكره:من قال اني ابغاس تشترين بدالها قطيعه تقطعس انتي وولدس مشت عمشاء وصعدت الدرج وهي تبغى تنهي النقاش علشان لا تكبر الهوشه بينهم ام خالد:ايه اسفهيني ..اصلا وين يلقى الولد التربيه السنعه اذا انتي ما لقيتي من يربيس حسبي الله عليس وعلى ولدس وعلى اللي دلنا عليس يوم اغبر يوم خذاس ولدي التفتت لصوت الباب اللي انفتح ودخل منه خالد وتغير وجهها 180 درجه وهي ترحب بولدها:هلا وغلا بولدي خالد وهو يبوس راس امه:هلا فيس ام خالد:احط لك الغداء وانا امك خالد:يا ليت يا يمه ترى ميت جوع ام خالد وهو تروح للمطبخ:ثواني بس مشى بيصعد الدرج ووقف لما شاف المزهريه المكسوره والمتناثره على الارض ....شاف الخدامه تقرب من المزهريه ومعاها مكنسه اشر لها تقرب ولما قربت همس لها:من كسر المزهريه الخدامه:هزا بيبي فيصل كسر خالد تنهد وعرف ان امه اكيد سوت مشكله لولده وزوجته اللي في كل مره لازم يجيها طشار من لسان امه...اشر للخدامه تكمل كنس وصعد الدرج لغرفته اول ما قرب لقى باب الغرفه مصايف ...سمع صوت ولده:أي يمه يعورني عمشاء وهي حاطه ولدها في حظنها وتبوس مكان الطق اللي جاه من جدته:بسم الله عليك .. فيصل وهو يطالع امه وعاقد حواجبه بزعل:انا ما احب جدتي كله تطقني وتصرخ علي عمشاء وهي تمثل انها متفاجاه وتشهق:يووووه ما يصلح عيب يا حبيبي هالكلام...جدتك تحبك فيصل:اجل ليش تطقني عمشاء بابتسامه: لأنها عصبيه...يعني الحين انت مثلا يعني لو كنت معصب وطقيت صديقك معناتها ما تحبه فيصل هز راسه بلا عمشاء وهي تمسح دموعه:زي جدتك تطقك لانها معصبه بس هي تحبك واااااااجد فيصل وهي يضحك:وانا احبس انتي واجد عمشاء بضحكه:وانا بعد احبك يا نور عيون امك واااااجد فتح الباب وعلى وجهه مرسومه الابتسامه:الله الله وش هالحب كلكم واجد وانا لي الله عمشاء:هههههههه اللي يتسمعون علينا ما نحبهم خالد وهو يجلس جنب عمشاء ويطالع فيصل:شفت امك ما تحبني فيصل وهو يطالع امه:انا ابغاها تحبني انا اكثر منك وانت رح لامك تحبك خالد وهو يمسكه من اذنه:بعد طرده عيني عينك عمشاء:هههههههه خل ولدي ...خلاص احنا نحبك اكثر شي صح فيصل وهو يضحك:ايه عمشاء:يله حبيبي روح غسل يديك علشان نتغدى فيصل وهو ينزل من حضن امه:طيب... طلع فيصل والتفتت عمشاء على خالد اللي تكلم:عسى ما جاء في خاطرس عمشاء اللي ما تبغى تضيقه:ما فهمت خالد وهو ينزل غترته ويحطها على السرير بعد ما دخلها في العقال:قالت لي الخدامه ان امي هاوشتكم علشان المزهريه عمشاء وهي تاخذ غترته وتعلقها في العلاقه:لا عادي انا متعوده على خالتي وقف خالد وصار مقابلها:ويلوموني في حبي لس عمشاء:هههههه من يلومك خالد وهو يبوس خدها:العذال عسى ربي يقهرهم فوق قهرهم عمشاء وهي تبعد وبخجل وتوتر:اقول خالد وضحكته تكبر:بدينا بالتصريفات كل ما نستحي نصرف ها... عمشاء ووجها يحمر:هههه لا والله ما اصرفك خالد وهو يكتف يدينه :قولي عمشاء بجديه:سحبت لي الفلوس لاني العصر ابغى اروح السوق ما عاد في وقت وما عاد بقى شي على العرس خالد وهو يدخل يده في جيبه ويطلع بوكه ويفتحه:ايه سحبتهم طلع من بوكه 3000 ومدها لها عمشاء :لا 3000 واجد عطني بس 1500 خالد وهو يحط الفلوس في يدها:خليهم معاس احسن عمشاء بابتسامه:ربي ما يحرمني منك خالد وهو يبوس راسها:ولا منس....فتحت عمشاء الدرج وحطت الفلوس :غير ثيابك علشان نتغدى خالد وهو يتوجه للحمام اكرمكم الله:زين...وقف خالد قبل لا يدخل الحمام اكرمكم الله وظل يناظر عمشاء وكأن في خاطره شي بس متردد يقوله قربت عمشاء وبشك:وش فيك خالد وهو يطالعها :ها لا ولا شي....مشى وحس بيدها تمسك يده:لا انت فيك شي قول لي وش فيك خالد وهو يطالعها لحظات قبل لا يتنهد عمشاء من سمعة تنهيدته حست ان فعلا في شي طالعها لحظات قبل لا يقول:ما تصدقين من شفت اليوم لما رحت البنك عمشاء وهي تحس ان الخوف بدا يدب في قلبها:من خالد :حمود عمشاء وهي تعقد حواجبها:من حمود؟ خالد:حمود راشد ال نادر اسعت عيونها وهي تشهق:يا ويلي عليك خالد اللي تحسف لانه قالها: لا تخافين ما صار شي عمشاء:وين شفته فيه خالد وهو يمسك يد عمشاء ويمشي معاها ويجلس على الكنب اللي في زاوية الغرفه:شفته في البنك هو يشتغل هناك عمشاء:وش وداك للبنك كان سحبت من الصرافه خالد:الصرافه عطلانه فرحت اسحب من البنك ما حبيت انس تنطرين واتاخر عليس بالفلوس عمشاء بخوف:وما قال لك شي ...تدري عاد لا تروح هالبنك ابد خالد بهدوء:لا ما قال لي شي ...واذا على البنك كيف ما اروح له وفلوسي فيه عمشاء بضيق:افتح لك حساب في أي بنك ثاني...كملت بصوت كله رجاء:تكفى يا خالد لا عاد تروح هالبنك اليوم ما قال ولا سوى لك شي بس بعدين الله يستر ...لا تخليني اوسوس وطمني وقل لي انك ما راح تروح له خالد وهو يحاوط كتوفها بيده:ان شاء الله خلاص ما راح اروح له وراح افتح في بنك ثاني بس انتي لا توسوسين ما في الا العافيه تمسكت بثوبه بخوف من انها تفقد هالحظن وهالحنان اللي حست بانها تملك الدنيا لما تكون فيه بصوت يملاه الضحك:فطومه ...صارت تصفق لها:هنا شوف هنا طالعت اختها وبزعل:نوره شوفي بنتس صار لي ساعه اناديها وهي مو معبرتني نوره:هههههه البنت ما تفهم ...مدت لها لعبه تطلع صوت:اشري لها بها اللعبه يمكن تطالعس مسكت ميعاد اللعبه وهي تحركها في الهواء:فطومه شوفي خاله طالعتها فاطمه وهي تاشر بيدها انها تبغى اللعبه:انا ميعاد وهي تقرب وتقبص خدودها:يا لبى هالخدود فديت عيون حبيبة خالتها نوره اللي شافت بنتها فيها الصيحه:حرام عليس خليها ترى بتبكي ميعاد بضحك:وش اسوي خدود بنتس تجنن دخل عليهم :السلام عليكم نوره وميعاد:وعليكم السلام قرب وشال فاطمه:يا لبى قلبهم اللي جالسين في الصاله ومحلين الجلسه ميعاد:شف ذا واحنا ما عاد لنا كرت نوره:هههههه مدام المدح لبنتي ما راح اعترض حمود وهو يرمي فاطمه في الهواء ويرجع يمسكها:حبيبة خالها هوووبا...باس خدها لما شافها تضحك له ورجع نزلها على الارض وهو يعدل غترته اللي بتطيح من على راسه وقف وهو ياشر لنوره:تعالي ابغاس شوي وقفت نوره وهي تطالع ميعاد:انتبهي لها ميعاد:طيب راحت وراء حمود اللي دخل المقلط وشغل انوراه ودخلت وراه وجلست جنبه:امرني يا اخوي حمود:ما يامر عليس عدوا بس بغيتس في سالفه نوره:وش هي حمود وهو يتنحنح وبهدوء:اليوم جاني سالم...نوره لفت وجهها والضيق منتشر على ملامحها حمود:الرجال يقول... قاطعته نوره:لا حمود:بس يا اختي... رجعت قاطعته نوره وبضيق:قلت لك لا يا حمود وخلصنا ... حمود:اسمعيني نوره وهي توقف:خلاص يا اخوي وش فيك قلت لا انا ما ابغى احد بعد ابو فاطمه حمود بهدوء:انتي اذكري الله واجلسي نوره هي تجلس:لا اله الا الله حمود:يا اختي محد دايم لاحد وبعدين الموت حق علينا والواحد يستمر بحياته مهما صار...فكري بفطوم كيف بتربينها نوره:مو عجزانه عن بنتي حمود:يا نوره فكري بعقلس فطوم بكره لما تكبر ما تبغ يكون عندها ابو حالها حال باقي البنات ...ما راح تحس انها ناقصه نوره وهي تطالع حمود :وسالم راح يكون ابوها ...لا والله ما يحل محل عبدالعزيز حمود:نا ما قلت يحل محله بس... نوره:حمود ان كان لي غلاه عندك لا عاد تفتح معي هالموضوع مره ثانيه حمود سكت وهو يتنهد نوره وهي توقف:لا سالم ولا وليد ولا غيرهم كلامي واضح يا اخوي حمود اشر براسه بايه....طلعت نوره من المقلط تاركته يفكر فيها وفي بنتها وفي بنتها نزلت من الدرج ودخلت المطبخ شافت اختها جالسه على الكرسي وفي يدها كاس شاهي شافت هياء تطبخ المرقوقه واول ما شافتها طالعتها بنظرات كره لفت وجهها وهي تمشي وتجلس جنب اختها:انتي هنا وانا ادورس نوفه وهي تطالع اختها:انا قلت لس بنزل اشرب شاهي نوف وهي تطالع هياء همست لاختها:وما لقيتي تشربين الا عند هالعله نوفه بتعاطف:حرام عليس والله الحرمه طيبه وانا ما شفت منها شر نوف وهي تطالع هياء اللي تخصها بنظرات كلها كره:هذي سوسه وحيه تلدغ من تحت لتحت طالعتها نوف وابتسمت بطيبه لهياء اللي ردت لها الابتسامه:يمكن نذله معاس بس معاي حبوبه نوف وهي توقف:انتي تبغين تبطين كبدي ولا وش سالفتس نوفه:ههههه لا والله اقول الحق مشت نوف وقبل لا تطلع:امحق حق تعرفينه طلعت من المطبخ ومشت لحد الصاله ولقت امها وغزيل جالسين ويسولفون:لا ما اصدق غزوله عندنا غزيل اللي وقفت تسلم عليها:ليه اول مره اجيكم نوف:لا بس في العاده صوت ولدس يصدح في المكان دلاله على وجودس غزيل:ههه بسم الله على ولدي من عيونس لا تصكينه بعين نوف وهي تجلس:الا هو وينه ما اشوفه غزيل:مع ابوه وبيجيبه معاه لا جاء ام ذياب:ليه عبدالله ما دخل غزيل:عنده كم شغله انا موصيته بها وبعدها بيجي ام ذياب:زين ...قلتي له ان العشاء عندنا واننا مسوين مرقوقه غزيل:هههه ايه يمه قلت له ام ذياب وهي تمد تصب فنجان لبنتها:تقهوي يا بنتي غزيل وهي تاخذ منها الصينيه والترمس حقت القهوه:هاتي عنس انا بصب مدت ام ذياب لها الترمس:اخذي صبت غزيل لامها فنجان قهوه:سمي ام ذياب:سم الله عدوس مسكت غزيل الفنجان الثاني وصبت لها وطالعت نوف اللي ما تحب القهوه:تبغين اصب لس شاهي نوف اشرت براسها لا ام ذياب:الا صدق يا بنتي وش صار على العرس اللي قلت لس عليه بتروحين معاي نوف وهي تطالع امها:مو قلتي بتاخذينا انا ونوفه ولا هونتي ام ذياب:لا ما هونت بس لو تروح غزيل معانا ابرك بعد غزيل:من هو عرسه ذا ام ذياب:هووو هماني قلت لس ..هذا عرس بنت صيته غزيل وهي تعقد حواجبها:من صيته ما عرفتها ام ذياب :يا ويلي وشلون ما عرفتها ...صيته اللي عندها ثلاث بنات....تذكرين يوم رحنا لتمامة بنت عايشه الزلال غزيل:ايه ام ذياب:اللي كانت جالسه جنب فوزيه هذا عرس بنتها غزيل اللي تذكرت:يا حليلها والله ما توقعت ان عندها بنات يصلحون لزواج شكلها توها صغيره ام ذياب :لا وين صغيره الحرمه عمرها صاك 45 بس لانها قزمه وضعيفه ما يبين عليها...كملت وهي تمسك فنجالها:ها بتروحين غزيل:والله ما ادري يا يمه بشوف وبعلمس ام ذياب:زين بس علميني بدري دخل عليهم:السلام عليكم الكل :وعليكم السلام ذياب وهو يشوف غزيل:اوووه ام محمد عندنا غزيل وهي توقف تسلم عليه:وش بلاكم ما تبغوني اجيكم ذياب وهو يبوس راسها:الا نبغاس ونص شافوا ابو ذياب داخل الصاله وراء ذياب:السلام عليكم الكل:وعليكم السلام باست غزيل راس ابوها ويده:وش اخبارك يا يبه عساك طيب. ابو ذياب وهو يجلس جنب ام ذياب:بخير والحمد لله...انتي وش اخبارس بشريني عن علومس غزيل:والله الحمد لله بخير وعلومي طيبه ولله الحمد ابو ذياب:الحمد لله تلفت ابو ذياب وباستغراب:وين حميد ما اسمع له حس غزيل:مع عبدالله عندهم مشوار وبعدها بيجون دخل الصاله يركض واخوه يلحقه:يبه يبه شفه ذياب وهو ياخذ ولده في حظنه:خلف وش فيك على اخوك خلف وهو ياشر على اخوه:يبه يقول لي يا حمار...ما يحترمني وانا اكبر منه ذياب وهو يعقد حواجبه وبصوت بانت فيه الشده:فلاح انت قايل لاخوك يا حمار فلاح:هو قال انت ما تفهم ذياب وهو ينزل العقال من راسه وبتهديد:شوف انت وياه لو القى احد منكم يقل ادبه او ما يحترم الثاني بلشط هالعقال على ظهوركم سامعين فلاح وخلف:سامعين اشر ابو ذياب لنوره اللي واقفه عند الباب:تعالي يا حبيبة جدس ركضت نوره وجلست جنب جدها وهي تتنعم بحنانه اللي يخصها به دون الباقين غزيل وهي تشوف ذياب وعياله اللي جنبه:ما تسلمون على عمه قام خلف من مكانه وسلم عليها وبعده فلاح اللي اشر له ذياب يسلم غزيل:جعلني ما افقد هالوجيه ابد دخلت نوفه اللي سلمت على غزيل من قبل وركض لها فلاح وجلس جنبها ام ذياب:نوفه وين مهوي ما ناقصنا الا هي روحي ناديها لا تفوتها هالجمعه الزينه نوفه:نسيتي يا يمه انها تدرس واذا عندها امتحان ما تطلع من غرفتها غزيل بصوت ضاحك:لبى قلب هالمهوي احس في الاخير بتطلع عالمه ولا فيها حاله نفسيه ام ذياب:بسم الله على بنتي فالس ما قبلناه خبله مره وحده الكل:ههههههههههه غزيل وهي تهمس لامها:يمه وين متعب اخر مره جيت ما شفته والحين بعد ام ذياب بتنهيده:خليها على الله غزيل:صاير شي ام ذياب وهي تطالع زوجها وعيالها:بعدين اقولس دخلت عليهم وبهدوء:السلام الكل:وعليكم السلام جلست جنب ذياب اللي اشر لها تجلس جنبه:اخبارس يا غزيل غزيل وهي تطالع سميه وتلف وجهها وبدون نفس:من الله بخير نوف همست لنوفه:شوفي لعانة غزيل الحين بتبين نوفه:انتي وغزيل مدري ليه تكرهون حريم ذياب نوفه:لانهم نذلات وخبيثات هزت نوفه راسها ولفت تسمع سوالف ابوها وامها دخلت عليهم وهي تعدل نظارتها:السلام الكل :وعليكم السلام ام ذياب وهي تطالع غزيل وذياب:ظلموتها هذي البنت طلعت من غرفتها مها وهي تجلس على الكنب جنب عيال ذياب:وش فيكم ام ذياب:يقولون حابسه نفسس علشان الدراسه وما راح تطلعين منها حتى لو ناديناس مها وهي تضحك:مو لها الدرجه فلاح وهي يطالع مها:عمه ابغى اجرب نظاراتس ذياب وهو يطالعه:لا ما يصلح بتعورك عيونك مها وهي تحس ان فلاح زعل طالعت ذياب وبابتسامه:لا عادي هذي مو طبيه بس حقت الدراسه...كملت وهي تفصخها وتلبسها فلاح:طالعني اشوفك فلاح وهو يضحك:وجهس كبير مها:ههههه.. فلاح وهو يطالع خلف:خلف شوف شكلي صار خلف يضحك على شكل فلاح وهو يضحك معاه وجلس على الارض يشوف نفسه في انعكاس وجهه على ترمس الشاهي دخلت الخدامه والكل سكت وهم يسمعونها تقول:بابا عبدالله عند باب طالعها ابو ذياب ووقف وهو يبعد نوره عن حضنه:بروح ادخله ...انتي فتحتي له الباب الخدامه اشرت براسها بايه وقف ذياب :وانا بروح اشوفه بعد وقفت مها وهي تمد كتابها حق الاحصاء اللي تو ذياب يلاحظه في يدها:ذياب متى بتشرح لي طالعها ذياب واشر لها:تعالي اشرح لس الحين في المقلط وبعدها اروح لعبدالله ام ذياب:يوووه ما يصير تخلي ابوك مع الرجال لحاله...الا رح لعبدالله ولاحق على مهوي ودروسها مسك ذياب يد مها وهو يطالع من الصاله:الا عبدالله اللي ينتظري وهو مو غريب البيت بيته وبشرح لمهوي اللي وقتها من ذهب مها ابتسمت بمحبه وحست انها طايره بمحبة ذياب اللي خصها بها غير كل خواتها نوف وهي تطالع نوفه:قلت لس اننا خرفان الحوش ما صدقتي نوفه:هههههههههههههه بعد ما طلع ذياب حست سميه بانها ما لها مكان بينهم فطلعت لجناحها عندها منيره وهياء احسن من غزيل ونوف اللي تدري انهم ما يحبونها ولا هي تحبهم وعمرهم ما توافقوا في شي دخل عليهم وهو يركض:جدتي ام ذياب وهي تفتح يديها:يا عيون وقلبي جدتك جلس في حظن ام ذياب اللي صار تبوسه وتمسح على شعره نوف :توك ذكرتنا يا حميد بعد ما شبعت فرفره مع ابوك توك تجينا محمد:لا ما نسيتكم بس رحت شوي ورجعت لكم بسرعه نوفه:هههههه حرام عليس اخرتها الولد بيتعقد بسبتس نوف بنذاله:خليني اجننه شوي...اشرت وهي تكمل:تعال سلم ولا ما تبغى تسلم علينا قام من مكانه وسلم على نوفه ولما قرب من نوف سحبت خده بقوه وباسته محمد:احح عورتيني نوف وهي تقلده:اححح خكري انت تقول احد محمد اللي زعل:يمه شوفيها تقول عني خكري غزيل :نوف اتركي ولدي لا تهبلين به نوف:ههههههه خليني اجننه شوي وقفت نوف وهي تاشر للبزران:تبغون تلعبون عيال ذياب وولد غزيل:ايه...ايه نوف وهي تاشر بيدها:يله وراي طلعت وطلعوا البزران كلهم وراها ووراهم نوفه غزيل:ههههه نفسي اعرف وش اللي يحببهم فيها مع انها تعذبهم ام ذياب:من خيبتهم ما لقوا الا نوف يحبونها غزيل:هههههههههه...طالعت امها وبجديه:المكان فضى قولي لي وش فيه متعب ام ذياب وهي تتنهد:اسمعي سمعت طق على الباب قامت وفتحت الباب وبضيق:خير ارتسمت الضحكه على وجهها وهي تهمس:عموش عمشاء:يمه منس من.خير مره وحده قربت منها وحظنتها:يا حبيبتي ادخلي عمشاء وهي تدخل:هههههه وش فيس فتحتي الباب وكانس بتخوضين حرب مهره بصوت ضاحك:وش اسوي زوجة خالي بتجنني عمشاء:الصراحه رحمتها يوم حسيت بالكارثه اللي بتجيها من وراس مهره:مو لها الدرجه ترى هي العن مني عمشاء وهي تجلس على السرير بعد ما فسخت عبايتها:ما علينا اتركينا من مرت خالي ...اليوم رحت السوق وما رجعت الا بعد ما شريت لس هالثوب فتحت عمشاء الكيسه اللي شايلتها وطلعت من الكيسه ثوب احمر وعطته لمهره مهره وهي ترفع الثوب:الله يا عموش يجنن عمشاء:الحمد لله انه عجبس عمشاء وهي تحطه على جسمها:مو كانه ضيق عمشاء:لا ما راح يكون ضيق وحتى لو طلع ضيق راح اوديه الخياط يعدله..بس انتي لازم تجربينه الحين عمشاء:طيب الحين اروح اجربه عمشاء:بسرعه ترى خالد كلها ربع ساعه ويرجع ياخذني مهره:وليه مستعجله عمشاء:ما اقدر اطول وراي اشياء اسويها فروحي البسيه وخليني اشوفه عليس مهره وهي تمشي:طيب راحت مهره تجرب الثوب وتركت وراها عمشه اللي بدت تسترجع الذكريات اللي انحفرت براسها وبالتحديد في هالغرفه اللي كانت تنام فيها هي ومهره دخل لجناحه والهدوء عام اليوم يحس انه طول بالاستراحه وبالسهر مع عيال عمه راشد وزوج اخته غزيل مر من قسم هيا وسمع صياح بنتها مزنه كمل مشي لحد ما وصل لقسم سميه اللي اليوم هو دورها فتح الباب ولقى النور مطفى ...كلم نفسه باستغراب:ما لها بالعاده ترقد الا لما اجي فتح النور وصك الباب وراه قرب وشافها منسدحه على السرير ومغمضه عيونها جلس على طرف السرير وهو يحط غترته:ادري انس ما رقدتي فما له داعي التمثيل تكملت وعيونها لحد الحين مغمضه:انا ما امثل بس ما ابغى اكلمك حست بحركته لما قام من السرير وحست بصوت خطواته لحد ما وقف الصوت قريب منها...فتحت عيونها على وسعها وهي تشهق لما سحبها ذياب بقوه لحد ما جلسها وجلس قدامها:الحين نتكلم سميه وقلبها يرقع:انت مجنون...الناس تجلس خلق الله كذا ذياب وعلى شفايفه طرف ابتسامه:يمكن مجنون لفت سميه وجهها وهي ساكته وحواجبها معقوده ذياب:الغلا ليه ماخذ بخاطره سميه وهي تتكلم بنبرة زعل:يعني ما تدري...اليوم غسلت شراعي مع اني قلت لك اني... قاطعتها ذياب بجديه:هذا مو عذر يعني يعجبس ان امي تكرف سميه نزلت عيونها ليديها اللي بحظنها:لا ...بس والله ما طرا على بالي لا الغداء ولا أي شي كل اللي كنت افكر فيه مكالمتي لعمتي...كملت وهي تطالع ذياب:انت تدري ان عمتي تعبانه وهي اللي بقت لي من ريحة ابوي وبعد ما قعدت اترجى بنتها سمحت لي اكلمها...ادري هذا مو عذر بس والله ما كان في بالي الا عمتي ظل ساكت ...مد يده ومسح الدمعه اللي نزلت على خد سميه...قرب منها وخذاها في حظنه وخاطره مكسورعليها:خلاص ما صار شي سميه بصوت باكي:انا والله... ذياب وهو يقاطعها ويشد يديه حولها:قلنا خلاص سميه سكتت وظلت مستقره بحظنه دقايق قبل لا يبعدها ويرجع يمسح دموعها:قومي غسلي وجهس يله اشرت براسها وابعدت الغطا وقامت تغسل وجهها تنهد وهو يشوف سميه تدخل الحمام اكرمكم الله وقف يفسخ ثوبه وهو يتذكر الكلام اللي قالته اخته غزيل في اخر مره زارته:اعدل يا اخوي ترى الكل ملاحظ الفرق في التعامل بين الثلاث غمضت عيونه وهو يهمس:والله احاول ما ابين بس مو ذنبي اذا الغلا زايد عند وحده دون الباقيات نهاية البارت |
اعتذر مره ثانيه للتاخير بس من جد صعب اني اكتب وفي بيت مليان وفي رمضان
وما راح احط مواعيد محدده لاني صعب التزم بس اول ما اخلص البارت انزله واحاول ما اتاخر ان شاء الله وقراءه ممتعه |
كل عام والجميع بخير اللهم تقبل صيامنا وقيامنا سلمت يمينك يالسليليه ولا عدمناك عجبني بروايتك روح الحياة العائليه اللي فقدناها من زمان الاكل مع بعض الجلسه مع بعض الزيارات ..تواصل الاهل ..اللحين الرسميه هي الطاغيه اللي مستغربته ليه ذياب ماخذ ثلاث وهذا ابوه بس واحده ولا حب للغثاء ولا ااااايحب وسميه ماهان عليها زعلها راح يراضيها والباقيات تعداهن حتى السلام ماسلم ماحب الرجال اللي ما يعدل .....واذا ما يقوى ,,,,لا يعرس بس يغبن بنات خلق الله خالد مدري خايفه عليه وعمشاء قلبها حاس بس تبيه يبعد عن علي وحمود بس الحذر ما يمنع القدر الله يستر مهره اليوم بردت قلبي برجساء يمل الرفسه اللي ترفسه بنت يتيمه مالها والي ومستقويه عليها ما تخاف العقوبه لو انهم بحاله رديه لا ولد ولا تلد ننتظرك ومعذوره رمضان وقت ضيق |
تغلق لتاخير
|
| الساعة الآن 02:15 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية