|
ما على الدنيا عتب
السلام عليكم ورحمة الله وبركاته فكرت كثير في اني اكتب روايتي الاولى واول مره اتشجع واخذ قرار نهائي باني اكتبها هي جاهزه في بالي من سنتين لكن للحين ماكتبتها الحروف بايدكم انتوا راح تخلونها تكمل روايتي يغلب عليها الواقع وقليل جدا من الخيال ، والخيال اكثر فالاحداث لا الشخصيات وهي شخصيه كثير بالنسبه لي لاني دخلت فيها جزء من روحي ومن اشخاص غالين على قلبي ولو اني كنت متردده كثير في ان انزلها فمنتدى ليلاس لانه اكثر منتدى يظم اكبر وابدع الكاتبات واللي لايمكن كتابتي المتواضعه ان تجاريهم لكن اتمنى من كل قلبي انها تنال اعجابكم واي نقد منكم اتقبله برحابه صدر اليكم حبايبي روايتي الاولى ( ماعلى الدنيا عتب ، كل مافيها اماني ) بسم الله الرحمن الرحيم ... .. البارت الثالث http://www.liilas.com/vb3/t178343-2.html ... ... نزلت من سيارتها الجديده ((بورش كييان)) مبسوطه حيل وهي اطالع اللي فتح لها الباب ويبتسم لها والحب باين من عيونه قال لها : نورتي بيتج يالغاليه ابتسمت بخجل : النور نورك ماتخيل شقد اشتقت لبيتنا رد : والبيت وراعي البيت وكل زاويه وركن فيه موب بس اشتاقوا الا ترحمي عليهم من الشوق لخطواتج وطلتج فيه قالت : بسم الله عليك ياحبيبي لاتقول كذا ابتسم لها وفي خاطره يقول الحمدلله رجعت تقولي حبيبي الله يديم هالكلمه ويديم رضاها علي مسك يدها ودخلوا لبيتهم طبعا كان كل شي غير الاثاث والصبغ والورق من غير الورد اللي كان مالي المكان ابتسمت ولمته الله لايحرمني منك حبيبي بس ليه تكلف على عمرك مو كفايه السياره قال انا لو اقعد طول عمري اجيب واسوي لج ماوفيتج فخاطرها الحمدلله ياربي دعائي جاب فايده وتغير الله يثبته يارب ولايغيره علي قال : يالله حبيبتي خل نصعد فوق عندي لج مفاجه دخلت قسم غرفه النوم وكان مغمض عينها قال يالله بطليهم هي افتحت عينها على غفرت نومها اللي ماعرفتها انصدمت من اللي تشوفه كان حاط فكل ركن وزاويه ومعلق ع السرير calendar كانت الصفحه على شهر 6 شهر زواجهم وقال لها : انشالله تكون كل ايامنا الجايه مثل ذاك الشهر لان كان احلى شهر فحياتي يوم خذتج ونورتي دنيتي هي نزلت دموعها ماقدرت تتكلم متفاجه خايفه انها فحلم مو مصدقه قالت بضحك بس مسويه زعلانه : يعني تفاول علي تبيني بس شهر ؟ (ملاحظه الحركه من فلم سويت نوفمبر وهو الفلم المفضل لها وهو كان عارف هالشي وسواه عشانها ) هو يوم شاف الدموع فعينها خاف انها فهمته غلط رد بارتباك وبسرعه : بسم الله عليج ياروح قلبي انتي انا بس كان قصدي اسوي شي تحبينه مثل ما كنتي دايما تقولين ليه ماتبحني وتسوي لي زي الفلم ووو . . قطع كلامه لمتها له وهي تقول حبيبي شفيك كنت امزح معاك بس ههههههه فديتك والله تصدق احس اني في حلم ومابي اصحى منه رد : عجل ليه يارروحي هالدموع ليه تعورين قلبي فيها وانتي تدرين ماحبها ولا استحمل اشوفها فعيونج هي : هذي دموع الفرح حبيبي قال : الله يديم علينا الفرح يارب بس بدون الدموع قربت منه وقالت : امين وفلحظه ماحست بالارض قالت وهي تصارخ وبضحك لا ارجوك نزلني ماحب اخاف ارجووك نزلني لا اطيح هو : انزلج ها راح ارويج الحين شلون تمزحين معاي مره ثانيه وتقعد تترجاه ينزلها وهي تضحك وهو متجاهلها تماما ماصار يسمع الا صوت ضحتكها اللي يعشقها قلبه ويقلب موازينه . . . صباح اليوم التالي قامت نوف من النوم وتناظر الغرفه بنعاس وناسيه انها رجعت بيت زوجها قالت فخاطرها الحمدلله يعني ماكنت احلم قامت غسلت وصلت الفجر يوم خلصت تقرا اذكارها مسحت على بطنها وخنقتها العبره متعوده 9 شهور تمسح عليه يارب لك الحمد والشكر على كل حال ورغم كل شعور اكيد اللي صار لي خيره والحمدلله ان زوجي رجع لي احسن من الاول ويارب انك تعوضني خيرا من مافقدت قامت تدور عليه لقت باقمت ورد رزو بنفجي لونها المفضل قالت فديته للحين متذكر وشافت النوت اللي ع الورد روحي صباح الخير اسمحيلي اضطريت اطلع بدري بس حبيت اقولك اني احبك ابتسمت توها تبي تتصل الا هو يكلم ردت الو : يامرحبا في ذمتي الله يلعن الدوام اللي خذاني منج الحين اروح استقيل ضحكت نوف وقالت : فديتك حبيبي الورد يجنن لا والله مايجنن الا انتي ويا هالضحكه نوف : ههههههه فديتك والله .. هو : وبعدين ؟ نوف : خلاص حبيبي بس لايكون بتاخر رد : لاحبيبتي انشالله بعد الظهر انا عندج لاحاتين انتي نامي وارتاحي وبس طيب حبيبي باي قال : نوف نوف : لبيه هو : مشتاق لج من الحين نوف : وانا والله اكثر سكر الجوال وهو شاق الحلج مستانس ناسي ان فالدوام والشباب يطالعونه باستغراب وهو ولا همه يحس انه رجع لشهر العسل اللي ماقدر يتهنى فيه وكان ربي عطاه فرصه ثانيه يعوضها عنه شال من باله طاري الماضي لانه يكرهه ويكره نفسه فيه ورجع للشغل نوف للحين فيها النعاس رجعت نامت وماحست الا وتليفونها يرن والدنيا مظلمه ردت ع الفون بصوت مبحوح الو .. امها : هلا حبيبتي نوف شفيج وقفتي قلبي اكلمج من الصبح ماتردين نوف : هلا يمه كنت نايمه فديتج كم الساعه امها : صرنا المغرب قومي البس لايجيج حد وانتي للحين نايمه نوف كانت منسدحه وفزت : المغرب وانا ماصليت !! طيب يمه بكلمج بعدين امها سكرت منها وهي تدعي لبنتها الوحيده يارب لاتحرمني سعادتها نوف بعد سكرت امها شافت مسج منه : جيت ولقيتج نايمه مثل الملاك ماحبيت اصحيج رحت لمجلس عمي اذا صحيتي دقي لي واجيج طاير من الشوق ابتسمت للمسج وماردت عليه قالت خل اجهز واكشخ عقب اكلمه صلت ولبست الفستان اللي شراه لها فشهر العسل كان لونه وردي غامج يوصل لين تحت الركبه ووكان ماسك ع كتف واحد وله حزام كان مخصر جسمها كانت مليانه شوي بس يتم جسمها حلو لكن طولها عادي وكانت قاصه شعرها لين الاكتاف وصابغته اشقر اللي يناسب مع لونها الحنطي وحاطه مكياج خفيف لان ملامحها ناعمها وماتحتاج مكياج وهي اصلا ماتحب تكثر منه خلصت وجات تبي تنزل تشوف ترتيب البيت وهي تنزل دق جرس الباب قالت : معقوله يكون جا لا كان دخل على طول ، انشالله ماتكون حماتي وانا ماجهزت شي صعدت لغرفتها وكلمت الشغاله تفتح الباب نوف وهي اطل من فوق شافت وحده شابه طويله ماتعرفها اول مره تشوفها واستغربت ان هالبنت كانت جايبه معاها ورد نوف نزلت تستقبلها البنت يوم شافتها ابتسمت ورحبت كانت بيضا حيل وطويله وشعرها اسود يوصل لين الركبه لكن نوف ماعجبها شكلها كانت واجد متمكيجه اوفر ولابسه قصير حيل لين فوق الركبه وبالنسبه انها ولامره شافتها ماحبت جراتها وقالت فخاطرها شلون تدخل بيت الناس كذا نوف سلمت بيدها وابتسمت مجامله : مرحبا بج الشيخه اسمحيلي ماعرفتج البنت ردت : انتي ماتعرفيني بس انا اعرفك عدل وقلت لازم من واجبي اجي ابارك لك نوف : تضايقت من نبرتها وقالت مشكوره كلج ذوق بس ماكملت كلمتها لان جوالها رن اعتذرت وصعدت الا هو يتصل نوف : هلا حبيبي هو : صح النوم يا اميره ردت : صح بدنك من زمان قايمه بس حبيت ارتب كل شي قبل لا اتصل لك هو : ليش ياروحي انا مابي شي بس ابيج انتي نوف : فديتك ماسويت شي بس لاتجي عندي وحده الحين هو باستغراب : وحده ! منهي نوف بعفويه : ماعرف هو باستغراب مايل للعصبيه : شلون ماتعرفين ؟ نوف : ماشفت الا هي داشه علي بورد وتقول جيت ابارك لج وانها تعرفني مادري هو : وانتي اي حد بيجي ماتعرفينه بدخلينه نوف : شسوي حبيبي اطردها عيب الحين بنزل بشوفها يمكن من صحبات خواتك او امك وجايه تبارك هو مارتاح للموضوع ابدا لكن ماحب يكبره : طيب وكلميني عقب نوف : انشالله هو سكر منها وقلبه قارصه مو مرتاح طلع من المجلس وركب سيارته وراح للبيت نوف وهي نازله اسفه الشيخه تاخرت عليج و .. سكتت وهي تشوف المكان فاضي وين راحت نادت الشغاله وقالت : وين هاي مدام الشغاله ردت انها ماتعرف بس عطتها هالظرف وراحت نوف مسكت الظرف كان داخله جوال استغربت وفي شاشته كانت نوته مكتوب عليها مبروك عليك !! نوف افتحت الجوال وكان فيه رسايل حب وغرام وعـشق ومكالمات كلها كانت من شخص واحد لكن اكثر منظر كسرها كان صوره اللي فالجوال كانت من ايام شهر العسل نوف رمت الجوال وحست ان الدنيا ادور فيها خلاص رمت نفسها ع السرير وهي تبكي بقوه وتحس بكهربا شلت جسمها كامل تبكي وقلبها محروق طول هالوقت كان زواجي منه كذبه ماصدق ليه ياربي بعد هذا كله ليه نوف مانتبهت ان الجوال اللي رمته فالصاله طيح ابجوره وانكسرت على البساط ولا حتى حست غير بان حد نزع روحها بعد ماعذبها هو قرب من بيتهم كل ماله ويحس بضيقه وضاق صدره اكثر واسرع بسيارته يوم شاف الدخان طالع من احد البيوت فالشارع وفجاه سمع نغمه مسج جواله الا يشوف رقم يعرفه عدل كره الرقم وايامه وصاحبه كان مكتوب ( الحين ارتحت يوم حرقت قلبك مثل ماحرقت لي قلبي ) هو خلاص ماعاد يشوف طريقه يوم قرب من البيت وهو يشوف المطافي وصلوا بوصوله نزل من السياره بنص الشارع ويصارخ لا لا نووووووووف مسكوه رجال ياشيخ استهد بالله مافينا نخليك تدخل وهو يشوف رجال الاطفاء مالين المكان ويصرخ باعلى صوته خلوني خلوني احتررق لكن مايحترق قلبي مايحترق قلبي عليها نوف نووووووووووووف خلاص ماعاد قدر يتحمل من كثر ماهو قاوم ايادي الرجال اللي ماسكين عليه طاح وفقد وعيه ماعاد يحس بشي من كثر الالم وانتهى البارت الاول من الروايه اتمنى ان تنال رضاكم وردودكم اللي راح تمشيها روايتي مثل السياره وردكم البنزين فلا تحرمونا منها (( ملاحظه لا احلل ولا ابيح نقل روايتي او نسخها الى غير منتدى غير ليلاس)) اختكم فالله ( قلب رياني ) |
الجزا الثاني
السلام عليكم ورحمه الله وبركاته نظرا لطلب من احدى العضوات اني انزل البارت بمواعيد راح تكون يوم الاثنين والاربعاء باذن الله ويمكن تزيد او تتغير اذا شفت اقبال على الروايه وانشالله اني اكلمها معاكم اليكم الجزا الثاني ( مـا عـلـى الدنـيـا عـتـب ، كـل ما فيـها امـاني ) ( للتوضيح اللي صار فالبارت الاول كان لمحه مستقبليه عن احداث الروايه والحين نرجع ٤ سنين لورى من بدايت الحكايه ) بسم الله الرحمن الرحيم في دوحت الخير فدار التميمي حمد وتحديدا في منطقه الريان بفله بو راكان نوف صحت من النوم تعبانه من السهر على مشروع لماده بما انه اخر الفصل ومابقى على نهايته شي شافت الساعه عدت المحاظره الاولى نوف بتافف لازم يعني محد في هالبيت يساعد الثاني ويقومه قامت غسلت وفتحت اللاب توب على صفحه الفيس بوك على امل ان يكون في شي وصلها منه لكن خاب ظنها سكرته ونزلت على طول بدون ماتشوف حد من اهلها ووطلعت كانت تسوق سيارتها فشوارع المدينه التعليميه مابقى شي وتغادرها مابقى الا اقل من شهر وتذكرت اول مره دخلتها من ٨ شهور تقريبا : نوف طايره من الفرحه وتلم ابوها ع السياره الي شاريها لها سياره هديه بمناسبت نجاحها فالثانويه بنتسبه ٩٣٪ وبما انها كانت شاطره ومتفوقه حصلت على بعثه من المجلس الاعلى للتعليم و بقبول في جامعه كارنيجي ميلون في قطر طبعا نوف كانت تعرف تسوق ابوها معلمها وكانت دايم تسوق لما اتروح لمزرعتهم لكن للحين ماخذت اليسن وترجت ابوها انها تسوق سيارتها فيومها الاول وبما انها بنته الغاليه ودلوعته مارفض لها طلب مع رفض من اخوانها بس هو سكتهم عشانها نوف توها تدخل من بوابه المدينه التعليميه مستانسه ماحست الا بهتزاز فالسياره خلها توقف وتنزل معصبه فهد : نزل بسرعه وهو يشوف سيارته اللي دعمت بسيارتها وخربتها شكلها من ورى تماما نوف بعصبيه : عَمي انت ماتشوف !! الحين ايش اقول لابوي من اول يوم اسوق يصير لي حادث نوف خلاص واصله حدها وخنقتها العبره بس مانزلت دموعها فهد قرب منها ومنزل راسه ماشافها منحرج انا اسف اختي الغلط مني انا كنت مسرع لو تعطيني رقم الوالد اتكلم معاه واتفاهم معاه و و نوف لفت عليه بعصبيه وقاطعت كلامه مشكور مابي منك شي يكفي اللي سويته ركبت سيارتها وكملت طريقها فهد فخاطره صج ماتستحي وش تبغيني اسوي بعد احبها على راسها ركب سيراته هو بعد معصب انها عكرت مزاجه وحرك نوف صحت من خيالها على صوت طق فدريشت السياره هيفا : هي نوفو صاري لي ساعه انطرج احترقت فالشمس يالله لاتاخرينا عن المحاظره نوف : شفتيه ؟ حظر هيفا : لا ماشفته ولا ابي اشوفه الحين انا ماهمني الا البروجكت ترى والله لانكبج واسويه بنفسي نوف بضيقه : خلاص هيفا سوي اللي تبين هيفا حست بضيقتها : نوف حبيبتي امزح معاج تدرين مالي غنا عنج نوف ابستمت : ادري يالله مشينا نرجع لفله ابو راكان الشغاله استلمت بطاقت عرس وراحت عطتها لام نوف ( هند ) نوف كانت توها داخله من الباب باست امها على راسها وطاحت فحضنها حاسه بضيقه انها ماشافته وانقعطت عن اخباره ومع هم شوقها له والامتحانات تحس خلاص ماعاد تقدر تستحمل اي شي ثاني امها مسحت على شعرها وقالت حبيبتي توقعي من راح يتزوج بعد اسبوعين نوف ردت ومالها خلق : مين ؟ امها : اختج ساره نوف وبضحكه خمل : ياشيخه اختي مره وحده !! اي اخت يمه وانا لو اشوفها فالشارع ماعرفها امها حزنت بس ماعجبها كلام بنتها : نوف حرام تقولين جذي هذي مهما كان اختج المفروض تقولين الله يوفجها هذا موب كلام وعيب اختج العوده ترى الظفر مايطلع من لحلم نوف : روحي قولي هالكلام لهم يمه ان موب حارني الا ابوي سوا لهم كل شي مصروف وسيارات والي يبونه وللحين مقاطعينه ولا يسالون وانا متاكده انه مايدري حتى انها بتزوج امها : اسكتي لايسمعج الحين الا اكيد يدري مهما كان هاي بنته وانتي بلا حجي فاظي تراج بتروحين غصبن عليج نوف اذا رحتي بروح امها انا ماقدر اروح حبيبتي لانهم ماطرشوا لي دعوه نوف بعصبيه بعد مايطرشون لج وتبيني اروح هذا اللي ناقص امها : اذا تبين ارضى عليج بتروحين نوف بضيقه طيب يمه منا لين يوم العرس بفكر عن اذنج بروح اريح شوي نوف صعدت غرفتها وهي ضايقه حيل زاد عليها زواج اختها اللي ماشافتها من سنين اخر مره يوم كان عمرها ١٠ سنوات والحين نوف صارت ١٨ ولا تدري عنهم فتحت اللاب توب كانها تبي تزيد هم ع اللي فيها وكالعاده صار له شهرين مابين ولا ارسل ولاشي سكرته وحاولت تنام لكن ماقدرت تفكر فيه ليش انقطع عنها ليش ماعاد ارسل وينك يافهد لو تدري شقد اشتقت لك ورجعت بذاكرتها لين اول يوم دوام بعد ما نتهى اليوم راحت لسيارتها وشافت نوته مكتوب عليها ( للحين اصر اني اعوضش هذا رقمي اذا بغيتي وانا اتكلف بالتصليح واسف مره ثانيه ) نوف عفست الورقه ورمتها فالشارع ركبت السياره ورجعت البيت وهي ماتدري ان فهد كان يراقبها من بعيد واستانس انها ماخذت الرقم قال لوانها خفيفه كان ماصدقت على الله بس شكلها عاقله وضاق اكثر لما شاف شقد تضررت سيارتها من الحادث بس حمد ربه ان ماصار فيها شي فالبيت بعد مارجعت نوف ساكته وشوي وتصيح وهي تسمع صراخ حمد اخوها : شفت يبه هذي اخرت الدلع من اولها الاخت مسويه حادث نوف بعصبيه : انا ماسويت شي هو اللي دعمني طرف ثالث تدخل لما سمع صراخهم راكان : لو سمحت انت وياها مافي حشيمه لابوي اللي واقف قدامكم يوم ان اصواتكم وصلت نهايت الشارع حمد نزل راسه : السموحه يبه لكن هي طلعتني من طوري ابوها خلاص من اليوم ورايح مايوديج الا احد اخوانج او السايق اذا ماقدروا نوف راحت لغرفتها وتصيح حسبي الله عليه ماخلاني اتهنى راكان دخل عليها وحضنها وحبها على راسها : ليه حبيبتي نوفي تصيحين المفروض تستانسين ماراح يوديج الا انا نوف ابتسمت له : فديتك ياخوي ادري انك ماكنت راضي اني اسوق وانا خلاص لو ماتبي ماراح اسوق كلش بس ماتزعل مني راكان : وانا اقدر ازعل من حبيبت قلبي الا بتسوقين وانا بنفسي بوديج مدرست السواقه وبطلع لج ليسن وعلى ماتاخذينه بتكون سيارتج صالحه بعد شتبين اكثر بس اشوف ابتسامتج اللي اعشقها نوف لمت راكان بقوه وباسته على خشمه : الله لايحرمني منك يالغالي جعلك بعد بعض الناس وهي اطالع حمد اللي كان مار عليهم رايح لغرفته حمد سمع كلامهم وقال فخاطره صج عايله اتجيب الضغط مر الاسبوع الاخير على نوف كانه شهر وانتهى دوامها وتضايقت حيل الحين باي حجه تقول لاهلها انها ترجع الجامعه عشان تشوفه موب مصدقه انها خلاص ماراح تشوفه كل يوم تعودت عليه تعودت على انها تكلمه يوميا تعلقت فيه روحها مع انها ماعاشت معاه الا شهور لكنها حست انها كانت حياه كامله ماحست بحياتها الا يوم عرفته حتى ربعها قطعتهم ماصار فدنيتها غير فهد اهلها لاحظوا تغير لهجتها صارت حتى تتكلم نفسه لكنها فسرت انها من وحده من صحباتها وسمتها فهده ضحكت وهي تذكر عصبيت فهد يوم قالت له فهد : عجل انا ياللي ماتستحين مسميتني باسم بنيه نوف وهي تضحك ايش تبيني اقول لاهلي يعني فهد : والله مدري قولي لهم هذي لهجتي ليه مستغربين من حكيي نوف : انت تدري ان امي حضريه وابوي مايتكلم بدوي ( مع ان ابو نوف من عايله بدويه معروفه ) فهد : ليه وشقومكم على لهجتكم مهيب معجبتكم نوف : الا معجبتني ونص وانا ماعرفتها الا منك محد في بيتنا يتكلم كذاا فهد : زين قلتي كذا ماقلتي ( جي ) يا انش فاقعه كبدي بذا الكلمه نوف وهي تضحك : طيب فهود اكلمك بعدين راح انزل اساعد امي بشغله فهد : بعدي ع الجيده اي الله الله فيها خلش مره سنعه نوف بضحك : سنعه من جابتني يالله باي اشوفك بكره سكرت المحادثه طبعا كانت تكلمه بسكايب صوت بدون فيديو ولا وصلوا لهالمرحله كل كلامهم كان سوالف عاديه لا اكثر ولا اقل فالبدايه كانت بالجات بعدين تطورت مع صوت وكانت اغلبها عن الجامعه وصعبوتها والاساتذه اللي مروا على فهد لانه كان اخر سنه له ونوف توها بسنتها الاولى بس جمعهم كلاس واحد وبدايه كانوا يتقاسمون البروجكت والواجبات وبعدها صار الحديث عن شخصي اكثر عن الاهل والاشياء المفضله لكل واحد والكل لاحظ تغير نوف في كم شهر كانها صارت انسانه ثانيه بس هم عجبهم التغير فماعلقوا اول تغيير كان باللهجه بعدها فنوع الاغاني كانت ماتسمع الا اجنبي لكن بعد فهد عشقت محمد عبده وصارت مزعجه البيت باغانيه اللي ماتسكر من غرفتها ٢٤ ساعه واكثر شي عجبهم انها ماصارت تحط مكياج ابدا لانه كان يقول انه يكره البنت ويحتقرها اللي تجي فمكان دراسه او عمل او مختلط بالاصح وتمكيج وتكشخ بعباتها ومكياجها حتى عباياتها الملونه رمتها وماصارت تلبس الا اسود فاسود عشانه مع ان ما قد طلب منها ولا كان يقصد الطلب فكلامه لكن هي حبت تكون مثل ماهو يحب كان تاثير فهد كبير عليها مع انها عرفته في فتره صغيره وكان اول واحد تتجرا تكلمه وماتوقعت تندفع وتعلق فيه لهالدرجه نوف قطع افكارها صوت رنت جوالها ردت : هلا يبه ابوها : هلا حبيبتي مبروك الخلاص نوف بضيقه : الله يبارك فيك فديتك ابوها : وينج للحين ماطلعتي نوف : لا فديتك انطر رفيقتي اسلمها اغراضها واطلع ابوها : طيب محتاجه فلوس عشان تسوقين لعرس اختج نوف زاد ضيقتها شنو اختي اللي ذبحوني فيها وانا ماعرفها : لا يبه يمكن ماروح ابوها : طيب عجل اذا رجعتي البيت مري علي اعطيج تشترين لها هديه واذا بغيتي لج شي مره وحده نوف : عرفت قصد ابوها يعني هذا امر انها تروح ومافي خيار ثاني نوف بدون تعليق : انشالله سكرت منه وتنهدت بضيق استغفر الله ياربي الله يعدي هالايام على خير وينك يافهد كلمه منك تقدر تزيل جبال من همومي وينك رحت عني لاحس ولا خبر وينك تعبت انتظرك ليتك تحس فيني وانتهى الجزء الثاني ايش صار لفهد وايش خلاه يختفي نوف ويقطع عنها كله راح يتبين فالجزا الثالث في يوم عرس ساره اخت نوف اترقب ردودكم واراكم وانتقاداتكم بفارغ الصبر اختكم فالله ( قلب رياني ) |
السلام عليكم والرحمه شكل الروايه ماعجبتكم لاني اشوف مشاهدين لكن بدون ردور لكن مالومكم لان بالنسبه للروايات المبدعه لكتبات ليلاس هي قليله كثير لكن اشكركم ع المرور |
مساء الخير
ياهلا ومسهلا باهل قطر عيني عليكم باردة العنابي حاضر بقوه وش دعوى يالريانيه والله مارين ومتابعين وعاجبنا وانشألله بنرد بس نحتري تتضح الصوره قصتك حلوه وغصب الواحد يبي يعرف وش اللي صار وش بيصير فهد ونوف الله يستر منكم اولها دلع واخرها ولع باين ان نوف مدلعه بس فهد بيتحمل دلعها هي الي في البدايه نوف بس هو زوجها بس من فهد ولا غيره عرفنا انها كانت حامل ومات اوسقطت حملها احترق البيت بس وش صار لها من الي جت لها ننتظرك |
هذا الرد كان على القصه قبل الحذف والحين طالبت بردودي ورجعت وقلت بحطها ثانيه والشكر موصول لحنون اللي ردت لي ردودي حبايبي..هخهخه
السلام عليكم.. يامرحباا مليااار بقطر واهل قطر هلا وغلا بريحه الحبايب.. منوره قلبوووو.. حياتس الله بليلاس اللي فيه احلى ناس.. ولنا الشرف ان روايتس الاولى ياقلب رياني تكون بمنتدانا وبعد حصريا اكيد انه مايخفى عليتس ليلاس ولا قراء القصص هنا .. وباذن الله بتلقين صدى طيب للقصه عند القراء بس انتي بعد خليتس معنا وويانا وعطينا التزام واخذي ردود بقمه الروعه باذن الله..بس لاتستعجلين اللقراء بالردود ترى انتي للحين كاتبه جديده وغير معروفه وكل ماكنتي ملتزمه كل ما انعرف اسمتس واشتهرتي اكثر.. وباذن الله تكملين القصه على خير وما نلقاها بيوم بقسم غير المكتمل .. وحياتس الله مره ثانيه بين اهلتس بليلاس .. للحين ماقريت البارت بس من شفت علم قطر فز قلبي وقلت لازم ارحب قبل اقرأ البارت... |
السلام عليكم.. عدنا بعد قرااءه البارت.. اكشن على طووول يااقلبوو كذا مانقدر ياااعسل.. الحين نوف صدق ماتت؟؟؟ ما اعتقد يمكن تشوهت بالحريق ويمكن مافيها الا العافيه ؟ بس هذي اللي تسببت بكل شي بيذبحها زوج نوف..هل هي زوجه ثانيه او متزوجه الرجال مسيار وهي حبته بس هو يحب نوف وبالاخير اختار نوف..؟؟ نوف باين انها كانت حامل ويمكن مات ولدها؟؟ وكان فيه مشكله بينها وبين زوجها ..وسبب المشكله يمكن هالحرمه اللي جت نوف ببيتها؟ عموما تونا باول القصه ونبي نعرف وش صار على البنيه لايكون ماتت؟ لان لو ماتت بزوجها مستحييييييل يسامح نفسه لانه بيكون السبب بالي صار لها حتى لو كان مو بشكل مباشر ..ولو حصل وماتت بيذبحها هذيك الحرمه.. على فكره الحرمه شكلها مو قطريه..؟ لااااايكون سعوديه؟؟ ام رجل نوف شكلها مو تمام هي ونوف لان نوف لما فكرت ان اللي جايتها عمتها تخرعت وعلى طول فكرت انها ماسوت شي..الا لو كانت حبوووبه وطيبه اقدم اعتذاري لهاا..هخهخهخه بانتظار البارت الجاي بكل شووووووق اذا الله احيانا فلا تطولين علينا.. وياليت يااقلبي تحددين مواعيد الاجزاء .. وبعد ياليت يكون بالاسبوع اكثر من جزء>>فيس يتشرط على طوووووووووووول..هخهخهخه دمتي بود |
الجزا الثالث
السلام عليكم والرحمه اشكركم حبايبي ع الرد الحلو والله حمستوني اني اكتب البارت الثالث ويارب اكمل الروايه كلها معاكم واسمحوا لي اذا تاخرت عليكم فالبارت بس للحين ماقدر احدد مواعيد معينه ليه لين تكثر الردود وحبيت اشكر حبيبتي زارا اللي ردت علي مرتين تسلمين حبيبتي ولاننحرم من طلتك اليكم الجزا الثالث بسم الله الرحمن الرحيم الجزء الثالث يوم عرس ساره في فندق شارتون الدوحه نوف تدور على باركينق لسيارتها ومن وراها تسمع صوت هرنات وسيارات شباب يصارخون وهي فخاطرها الحمدلله والشكر شكل المعرس وصل نزلت نوف من السياره وهي واقفه بعيد ماقدرت تدخل من كثر الشباب اللي ع الباب قربت شوي تبي تشوف زوج اختها بفضول حتى ماتعرف اسمه من الضيقه ماشافت البطاقه بس خذت كرت الدعوه وهي تضحك بطنازه والله الدنيا غريبه بنت تحتاج كرت دعوه دخول حق عرست اختها نوف قربت اكثر وشافت شاب طويل ونحيف واجد لونه لا ابيض لا اسمر بين وبين ومسوي سكسوه وشكله مبسوط وهو يدخل الفندق نوف دخلت وارهم وهي تشوف الشباب ملو اللوبي باصوات الضحك نوف متعوده ع الشباب درست معاهم وهذا طبعهم فما اهتمت وهي تمشي رايحه للقاعه سمعت واحد منهم يقول والله شعليك يا فهود خلاص ودعت ايام العزوبيه خلف الله علينا لاتودعنا معاها نوف وقفت بدون شعور التفت وشافت اللي واقف بثوبه الابيض وبشته الاسود بين ربعه يضحك لتعليقاتهم نفس الضحكه اللي كانت تضحك لتعليقها هي وسوالفها نوف ماستوعبت اللي تشوفه عند البوابه كان ظلام ماشافته عدل لكن حتى لو ماتشوفه تقدر ترسم ملامحه اللي مثبته فعيونها ولا نستها نوف تحس الدنيا تدور حواليها ماعاد تقدر تستحمل خلاص موب مصدقه مصدومه تحس انها بحلم تمشي لسيارتها اول مادخلت فصخت نقابها اللي حست انه يخنقها وهي تسوق وماتشوف شي دمعوعها مضببه على عينها وصلت البيت وراحت لغرفتها ولاكلمت حد بس انسدحت ع السرير في حاله سكون الدنيا كلها بعيونها بيضا ماتشوف شي غير البياض ماتحس بشي وكانها بس تنطر اللحظه اللي بتقوم فيها من النوم ويكون هذا كله حلم قطعت سكونها الشغاله اللي نادتها عشان ابوها يبيها نوف نزلت تشوف ابوها اللي كان توه راجع من العرس مع حمد وباين عليه معصب شوي نوف لبيه يبه تبيني ابوها بعصبيه : ليه ماتردين ع الجوال اكلمج ابيج تدخلين معانا يوم دخلنا لاختج انا واخوانج كنا نبي صوره مع بعض وانتي ماتردين نوف : يبه انا ماقدرت ادخل العرس رحت ويوم وصلت حسيت بتعب ورجعت ابوها بعصبيه اكثر : وش التعب اللي فيج انشالله لو انه وحده من ربعج كان ارتزيتي اول وحده وهذي اختج ولا تروحين وش بيقولون الناس عليج نوف بعضبيه : يقولون اللي يقولونه ماهمني انا ماعندي خوات ولا اعرفها ولاتهمني حتى امي ماعزمنتها لو انها تستحي كان . . ماكملت كلامها لان جاها صفعه خلت خدها يحمر من قوتها نوف كان هالصفعه وعتها واستوعبت انها ماكانت تحلم وانها شافت فهد اللي من شهرين ماتدري عنه وتوها تشوفه اليوم فعرس اختها وهو المعرس نوف ماسمعت ابوها ماصارت تسمع حد ابوها صراخه شل البيت بس هي ماسمعته كان يقول انه ماعرف يربيها وان غرقها بالدلع وخلاها على كيفها لين ماكسرت كلمته لانها ماحضرت العرس هو فداخله حزن لان اول مره يمد يده عليها عمره ماسواها بس الغلط غلط ومثل ماهي بنته ساره بنته قبلها طلع منهم ونوف طاحت من طولها وانفجرت بكا كانها تنطره يطلع عشان اطيح حمد اول مره يعوره قلبه على نوف نزل ع الارض وشلها لكن ماخلته لانها لمته وقعدت تصيح بقهر وبالم كانها طفل فقدت والديها في لحظه وضاعت عنهم كذا كانت نوف كذا كان احساسها يوم لمحت فهد حمد اول مره نوف تلمه عوره قلبه زياده هو يحسب عشان ابوها ضربها واول مره يعصب عليها كذا ، حمد يبوس راس اخته خلاص نوفي بسج صياح قطعتي قلبي ترا مايسوى هذا كله عشان عرس نوف تكلم وهي تشهق من الصياح قهرني ياحمد قهرني كسر قلبي تعرف شلون كسره ماتوقعت ان حد بيشاركني فيه ماتوقعت حد ياخذه مني وانا اللي احبه اكثر من روحي ليه يسوي فيني كذا ليه هان عليه حمد ماعلق حزن لان فهم ان اخته منقهره من تصرف ابوها وعلى باله انها غيره بنت تبي حنان ابوها لها بس وماتبي احد يشاركها فيه وهاي شي طبيعي لان من نوف صغيره كانت عند ابوها اميره محد يقول لها شي وطلباتها اوامر حتى امها ما دلعتها كثر ابوها على انها بنتها الوحيده وحتى امها كانت تغار من حبه لنوف ، حمد : ماعليه هو بس عصب شوي وبكره انشالله بيرضى وبيرجع يدلعج اذا انتي الحين شاكه بغلاج عجل احنا وشو الله يرحمنا برحمته مالنا شي فالدنيا الله عوضنا بامي نوف خف بكاها شوي وحمدت ربها ان حمد فسر كلامها على ان ابوها اااه ياحمد ليتك تدري بالقهر اللي فيني اختي اللي كلكم لمتوني عليها اختي اللي ابوي ظربني اول مره فحياتي عشانها هي اللي ذبحتني بدون ماتدري هي اللي خذت روحي مني ليته اي حد فالدنيا اي حد الا هي يعني انا بصير خالت عيالك يافهد خالتهم انا اللي كنت انام واحلم على امل فيوم من الايام اكون امهم ليه تسوي فيني كذا ليه قلوا بنات الدوحه مالقيت الا هي وانا يافهد هنت عليك كنت لعبه بايدك تتسلى فيها ويون خلصت منها رميتها كنت تسوى عيوني وانا عندك ماسوى شي !! نوف نامت فحضن اخوها بدون ماتحس من كثر الالم من كثر الحزن غفت عشان تنسى عشان ماتستوعب اكثر اللي صار عشان تكذب الفكره اللي ذحبتها وهي حيه فكره ان فهد صار لشخص ثاني شخص مايسوى حبها له ومن هالشخص اختها !!! راكان توه داخل البيت شاف المنظر وانصدم على طول صرخ شفيهاا نووف حمد اشر عليه بايده ان يقصر صوته حمد بهمس اسكتت توها نايمه عقب صياح ونياح احمد ربك ماكنت موجود راكان بصدمه اكبر ليش شفيها حد قالها شي فالعرس لايكون ضايقوها بشي ولا حمد رد عليه : لا لا محد قال لها شي لانها ماحظرت اصلا وابوك عصب وصفقها على وجهها وهي انهارت مسكينه اول مره احسها طفله تكسر الخاطر لو شفتها والله تعور القلب الله يسامح ابوك واجد كبر الموضوع انا اصلا ماكنت راضي انها تروح وامي موب معاها بس شقول اوامر الوالد وهذا اللي جانا منها راكان بحزن على اخته : زين هي ليش ماحظرت وقصرت الشر بس بعد ماتوصل ان ابوي يظربها عمره ماسواها حمد ادري بس شكله عصب لانها راحت وارجعت بدون ماتدخل ولا تسلم راكان دنق وحبها على راسها ومسح دمعه كانت نازله على خدها فديتها مادري شلون هان عليه حمد الحين انا شسوي اقعد كذا طول الليل ماقدر اتحرك اخاف تقوم وتقلبها مناحه مره ثانيه راكان ضحك على شكله لا يالاخ الحنون خلك كذا طول الليل انا تعبان وبروح انام وراي دوام بكره حمد بعصبيه راكان بلا سخافه تعال شلها عني وبعدين تعال انت ليش تاخرت وماطلعت معانا راكان : تعرف اخو العروس الثانيه اللي خذت فهد هذا واحد من ربعي من زمان ماشفته من ايام الدراسه قعدت معاه وخذتنا السوالف وحلف علي ماطلع لين ماتعشى حمد : تصدق مارتحت لفهد عكس فيصل اخوه يوم اخطبوا ساره على بالي هو اللي متقدم زين انه كان فيصل راكان : تعرف فهد كان يدرس مع نوف وتوه متخرج من شهرين ببعثه لبريطانيا يكمل ماجستير مشالله عليه موب مثلك احسن منك حمد : وخير يعني اشتتغل مع ابوي احسن لي وش ابي فالدراسه وبعدين قلت لك مارتحت له كلش كان يدرس معاي فالثانويه ولاعمره دخل قلبي راكان : على قولتك فيصل اخوه مشالله ماعليه كلام والحمدلله انه هو اللي خذا ساره يالله تصبح على خير حمد بهمس وهو يبي يصارخ راكان تعااااال لاتخليني كذا عورني ظهررري راكااااان حرام عليك موب هذي اختك وبنتك الغاليه تعاالللل راكان بضحك وهو داخل غرفته لا اليوم هي اختك وبنتك الغاليه يالاخ الحنون والله وطلع لك مشاعر ياحمد هههه سكر الباب وهو يضحك على شكل اخوه ونوف نايمه كانها ملاك ماتحس بشي ولا سمعت كلامهم مر اسبوع على عرس ساره ومن ذاك اليوم ونوف حابسه روحها فالغرفه وموب راضيه تطلع ولا تاكل ولاشي امها تضايقت لحال بنتها الكل مفسر انه زعل على موقف ابوها هند : يابو راكان ترى نوف وايد تعبانه وماراح ترضى تنزل او تاكل الا لما انت تكلمها وانت الله يهداك كان لازم تظربها وانت تدري انها ماتحمل شي منك بو راكان : خلها تستاهل هاي نتيجه الدلع عجل عرس اختها الوحيده ووماتحظره والله ماعاد تحظر عرس احد من ربعها عشان تهون من الدلع والله لو تشوفوين فرحت ساره يوم شافتنا يكفي حزنها ان امها الله يرحمها ماكانت معاها فاهم يوم بحياتها وبعد اختها ماشفتي حزنها يوم ماشافتها معانا اول وحده اسالت عنها نوف هند : ماعليه يابو راكان هذا انت ماقصرت يكفي انك اللي دافع كل شي والعرس كله عليك بو راكان : طبعا بيكون علي ولا نسيتي انها بنتي انا لو ادفع اللي وراي ودوني ماراح اعوض ساره كان خاطري اشوفها مع نوف مثل الخوات كان خاطري اشوفها فبيتنا بس الله يسامح اللي حرمني منها هند : طيب وبنتك اللي فوق تبي تذبح روحها عاقبهاا احرمها من الاعراس كيفك بس لاتخليها جذي تعور القلب ماسمعوا الا صوت نوف : انا اسفه يبه حقك علي استاهل اللي جاني منك انا بنفسي بروح لساره لبيتها وابارك لها واعتذر اني ماحضرت العرس امها انصدمت بس ماعلقت ابوها استانس واجد ولمها وحبها على راسها بعدي اي هذي بنتي الي اعرفها متى مابغيتي انا اوديج بنفسي نوف شرايك انروح اليوم ابوها استانس زياده : حلو خير البر عاجله امها حست ان فيه شي تعرف بنتها عدل اذا كان وراها شي ومارتاحت بس ماحبت تدخل وتقولها شي تخاف ابوها يعصب نوف صعدت غرفتها والبست احلا لبس عندها كان فستان كارلي ميلون مشمشي وكان فيه كرستال سلفر ع الاكتاب وقصير شوي وخلت شعرها ستريت كان بني طبيعي واصل لين نهايه ظهرها وحطت ميك اب اوفر بس حلو مكبرها ومحليها اول مره ولبست عباه مفتوحه ولما طلعت من غرفتها حمد شافها وقال الله الله وش هالزين على وين يا اميره نوف بدون نفس : بروح بيت اختي ساره مع ابوي ابارك لها حمد : باستغراب معقوله لاماصدق وش الطاري نوف : ولاشي اختي ولازم علي وواجب حمد : زين طيب الله يكملج بعقلج نوف مادرت عليه نزلت : امها يوم شافتها قالت مشالله وش كلها الزين حتى فالعرس ماكشختي كل هالكشخه نوف بدون ماتبتسم انتوا شفيكم علي شي غريب اني اكشخ واروح لاختي امها باطنازه لا ابدا حبيبتي مافيها شي نوف ماردت حبتها علـي راسها وطلعت مع ابوها وهي في بالها شي وبتسويه وماهمها وش بيصير اذا شافت اختها بتقولها كل شي عن فهد لازم تعرف حقيقت زوجها اللي باع اختها بتقول لها انه كان يكلمها وانها كانت تحبه وخذلها وهي فقلبها اللي نكسر مستحيل تسامح فهد وبتخرب حياته من اولها مثل مانهى حياتها بزواجه من اختها وانتهى الجزء الثالث توقعون شنو بيكون ردت فعل ساره اللي من ٨ سنين ماشافت اختها ونوف هل بتشوف فهد مره ثانيه وش بيكون موقفها لو درت ان موب هو اللي تزوج ساره ؟ |
تغلق لتاخيررررررررررررر
|
| الساعة الآن 08:44 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية