تايهة ام غلطانه لم اعد اعرف
 

السلام عليكم و رحمة الله و بركاته

حكايتي احيانا احسسسها بمنتهى البساطة
و أحيانا احسسسها معقدة و السبب في تعقيدها أنا

انا بنت عمري 24 سنة مخلصة جامعة و بشتغل استاذة من سنتين تقريبا

لما كنت بالجامعة امور الزواج كانت ما تهمني كثير ..كل الي يهمني دراستي

لكن كأي فتاة كنت احلم بفارس الأحلام الي مواصفاته ببالي خيالية

لكن بعد التخرج و بمرور الوقت صارت المواصفات الي ببالي تنقص
كل مرة استغني عن شئ

حتى اصبح طموحي الاقي انسان مثقف ، ابن عيلة ، لا يكون كبير بالسن كثيرا
و لديه عمل جيد
فقط لا غير

لا اظن انها مواصفات تعجيزية

لكن لحد الأن خلال السنتين الي فاتو صرت رافضة تقريبا 40 خاطب
الرقم يهولني .... ليش وصلت ها الرقم و ما لقيت الي ارتاح له

للعلم
كل مرة اصلي استخارة و اشاور و تطلع في شئ
لا ارفض من فراغ ابدا

لكن اكيد صار الكلام علي ..صارو يقولو اني دلووعة و بتستنى شئ خيالي و هيك حكي

خلال ها الفترة
او اكثر شوي
كان في شاب اتعرفت عليه في الجامعة
لم اتعرف عليه بغرض علاقة او شئ اخر ..كنت قد اريته حدوده و انه انا مش من النوع الي يعمل علاقات
قبل الزواج

فكانت علاقتنا كتير محترمة ... مع الوقت اتعودنا على بعض و صار يحكيلي عن بنات حاب يخطبهم
لانه شاب ملتزم و كان يدور على بنت الحلال
فكان يستشيرني و انا اعطيه رايي

الى يوم الي قال انه بده ياني انا
انصدمت الحقيقة لاني مثل البلهاء عمري ما انتبهت انه ممكن يكون له مشاعر خاصة الي
اضافة الى اني ما كنت اقدر اشوفه اكثر من صديق

طبعا رفضت و ماما و خالتي و كل الي يعرفو بالحكاية بهدلوني عليه
لحتى صرت افكر مرة تانية
ليش انا رفضت ؟؟


بعد مدة هو ما يأس و رجع و طلب مني مرة تانية افكر بعرضه

انا اعطيت لنفسي فرصة و بعدين وافقت بشرط ما يجي يخطبني لحتى يكون اتحصل على عمل

هو صار بدو يحكيني بالتلفون و بدو يجي نلبس خواتم لانه حاسس اني ممكن اضيع منه

و انا بأجل و ما احكي معه على التلفون ابدا
و يبعثلي مساجات يقلي فيهم انه بيحبني

بسس انا ما بفرح بها المساجات ما بعرف ليش
و بتمنى انه يوقف و يتعامل معي مثل ما كان يتعامل لما كان صديقي

لحتى يوم حكيت معه و قلتله في شئ لازم تعرفه

لازم نكون صريحين مع بعض

انا لما اخترتك اخترتك بعقلي مش بقلبي و اذا بدك حب لازم تصبر علي
اصلا انا ما بؤمن بالحب قبل الزواج

هو انصدم و صار يفكر و مش عارف واش يحكي و بعدين قال انه رح يستنى
مهما اخذ الامر من وقت رح يستنى اليوم الي بيدخل فيه لقلبي

و هلا عم استنى الوقت الي يحصل فيه على عمل لحتى ما يعترض ها الشئ مع شروط اهلي

لحتى يجي و نلبس الخواتم

في نفس الوقت قلبي مقبوض و انا عارفة انه مش رح احب قبل الزواج
و انه مهما كان اختياري رح اختار شخص بعقلي في كل الاحوال

هلا انا غلطانه بحقه ؟؟
لازم يعني يكون القلب اله دور بالاختيار ؟
ولا العقل وحده يكفي
هذا الخوف عادي ؟؟ و رح ينتهي !!

غلطانة لاني ما بحب اسمع منه كلام غزل ؟؟
و هل هذا الشئ رح يتغير بعدين ؟؟

ممكن يظهر لكم الامر عادي و مش مشكلة ابدا

بس متعبني التفكير و خايفة من قراري
لانه هاذي حياه ..مش قرار ممكن الواحد يغيره باي لحظة


آآآآآسفة طولت بالحكي
بس فشيت خلقي شوي

قرار حياة يحتاج صلاة استخارة ودعاء استخارة

إذا مكتوب لك راح تتسهل الامور و إذا لسه قلبك مقبوض معناه الله ما كتب لحد الآن

************

بما يخص علاقتك معاه ، ما اعتقد ان اقدر انصحك لأن انا ببساطة فاشلة 1000000% بتقييم الحب او علاقات الارتباط المناسبة

يعني اسوء منك

ما املك إلا الدعاء لك بالتوفيق، إن كان الامر بصالحك

وإن شاء الله نسمع آراء البقية و يفيدونك اكثر مني

اختي الغاليه انتي تفكيرك سليم و انا من مؤيدي العقلانيه في الحب لأنها هي دائما اللي تؤدي لقرارات صائبه
و لكن بالله عليكي انا اري هذا الشخص مناسب جدا اقبليه و فوضي امرك إلي الله
و حسنا فعلتي فالحب بعد الزواج سيأتي إن شاء الله
لا يزال امامك عمر ف 24 عام ليس بالعمر الطويل
ارجو من الله ان يوفقك و يسعدك معه
و ياريت لو تعجلي بالخير
و السلام عليكم و رحمه الله و بركاته

غاليتي ماريا ..

دائما مستمعي العقل لا يندموا .. الحب يأتي مع العشره .. المهم هو التقبل

والأهم هو صلاة الأستخارة ..والدعاء

((( اللَّهُمَّ إنِّي أَسْتَخِيرُكَ بِعِلْمِكَ , وَأَسْتَقْدِرُكَ بِقُدْرَتِكَ , وَأَسْأَلُكَ مِنْ فَضْلِكَ الْعَظِيمِ فَإِنَّكَ تَقْدِرُ وَلا أَقْدِرُ , وَتَعْلَمُ وَلا أَعْلَمُ , وَأَنْتَ عَلامُ الْغُيُوبِ , اللَّهُمَّ إنْ كُنْتَ تَعْلَمُ أَنَّ هَذَا الزواج خَيْرٌ لِي فِي دِينِي وَمَعَاشِي وَعَاقِبَةِ أَمْرِي أَوْ قَالَ : عَاجِلِ أَمْرِي وَآجِلِهِ , فَاقْدُرْهُ لِي وَيَسِّرْهُ لِي ثُمَّ بَارِكْ لِي فِيهِ , اللَّهُمَّ وَإِنْ كُنْتَ تَعْلَمُ أَنَّ هَذَا الزواج شَرٌّ لِي فِي دِينِي وَمَعَاشِي وَعَاقِبَةِ أَمْرِي أَوْ قَالَ : عَاجِلِ أَمْرِي وَآجِلِهِ , فَاصْرِفْهُ عَنِّي وَاصْرِفْنِي عَنْهُ وَاقْدُرْ لِي الْخَيْرَ حَيْثُ كَانَ ثُمَّ ارْضِنِي بِهِ . ) وَفِي رواية ( ثُمَّ رَضِّنِي بِهِ( رَوَاهُ الْبُخَارِيُّ (1166) ))


ووكلي أمرك لله .. ولا تقلقي ..

أتمنى لكي التوفيق ..