حلم ودي يتحقق
 

ودي اشارككم باحد احلامي اللي اتمنى من الله انه يحققلياه
اسمحولي ابدي الحلم وكنت اشوفه كقصة
كان ياما كان في سابق العصر والمستقبل الات
كنت اكلم انسانة اعزها من كل قلبي خلتني بمدة بسيطة اتعلق بالمنتدى واتحراها
انسانة كثر تواضعها وبياض قلبها ما مر علي حبيت اعزمها على اكلة ببياض روحها ودقيت اعزمها
انا:السلام على احلى صديقة
هي:.......
انا:طيبة طاب حالج وانتي شلونج طيبة انشاء الله
هي:.......
انا:وانا والله مشتاقتلج اكثر عشان جذي بعزمج عالغدا باجر كان ودي اسويلج ذبيحة بس مثلج عارف انا بالمطبخ على قدي بس بسويلج اكلة احبها والكل مدح لي فيها
هي:......
انا: يسلملي قلبج ياقلبي وناطرتج على احر من الجمر
سكرت معاها وطلعت على اللحام على طول خذيت كيلوين لحم غنم بعظم
وعقب طلعت عالجمعية جبت اللي بحتاجه وعقب رديت البيت
كنت ناوية اسويلها شاكرية فاول شي لازم اروب
وطريقة الروب كالتالي:
علبة روب,4كوب حليب بودرة,2كوب ماء
واخلط الكل بخلاط العصير عشان الحليب ما يستنذل معاي ويكلكع
واحطة بحافظة بلاستيكية محكمة الغطاء او بانية بايركس واغطيها بنايلون واحفظها بمكان دافي عشان تتروب عدل واذا صادف وكان شتاء ومطبخي فيه فتحة للتكييف فعاد اسخن الفرن تسخين بسيط ويكون من الشعلة العلوية مو السفلى عشان تجنب اي حادث مؤسف ممكن يواجه الروب نخلي الفرن بحرارة 50 درجة تقريبا ونطفي النار وبعدين نحط ترويبتنا بالفرن على طول لمدة ليلة كاملة انا احب الحف الروب لا يستبرد بقماش قطني بس لو ما عندج ترى مو ضروري بس قلتها لقافة اللي تعرفني بتفهم هالشي
نمت وقمت الصبح نشيطة وبعد ماخلصت اشغالي دشيت المطبخ طلعت الروبة وياسلام كانت متماسكة
وماخذة شكل الانية يعني الشغل كان صح
اخذت اللحم وحطيته بجدر بماي بارد وخليته يغلي وحظرت بهالوقت ماء مغلي عشان انا اول غلوة من ماي اللحم اتخلص منها بمجرد ما تتكون طبقه الزبد البني نشيل اللحم ونحطه بالماء المغلي وضروري يكون مغلي عشان لوكان المي بارد اللحم بيشد وانا مابي اتفشل مع صديقتي احط مع اللحم المطيبات وابعد عن الملح
واللي اهي عبارة عن(5حبات هيل مفتوحين,5حبات مسمار قرنفل,3ورقات غار)
ونخلي اللحم لين يستوي عالاخر براحته كثر ما ياخذ والاغلب من ساعة ونص لساعتين
والحين نسوي سلطة خفيفة وبما انا ببلاد الشام بسوي تبولة وهي عبارة عن
(شدتين بقدونس مفرومين,2ملعقة كبيرة نعناع ناشف,ملعقة برغل منقوعة بعصير ليمونة,3ملاعق زيت زيتون,حبة طماط مفرومة صغير,ملح حسب الرغبة)
خلطت السلطة وا حطيت الملح بخليه لوقت التقديم
اللحم بعد يبيله شوي خل اسوي عصيري المفضل الافوجادو بالمنجا ومقاديره
(حبة افوجادو,3علب عصير منجا نوعية ممتازة,رشة فستق للزينة)
احط الافوجادو المقشر بالخلاط مع المنجا واخليهم لينين يندمجون عدل واحطهم بالثلاجة لين وقت التقديم ارش الفستق على وجه العصير بعد ما اصبه بكاسة حلوة
اللحم استوى اطفي النار وصار وقت تطبيق الشاكرية نحط بخلاط العصير(ياهو فايدني هالخلاط)
كمية من الترويبة مع 3معالق كبيرة نشا وملعقة كبيرة طحين ابيض ومكعب ماجي واحد وبيضة (البيضة ضرورية جدا عشان تتماسك الشاكريةوطعمها ابدا موظاهر بهالاكلة) اخلطهم عدل واحطهم بالجدر اللي بطبخ فيه واخلط الترويبة الباجية من غير اضافات واحطها مع بعض بنفس الجدر ونحطها عالنار ونقعد عندها ونقلب باستمرار مع الوقت بتثقل فنصير نزيدها من مرقة اللحم اللي سويناها بالبداية
ونستمر باضافة ماي اللحم لين نحس القوام اصبح تمام مثل قوام الكريمة نضيف اللحم والملح ولازم اضوق لااتفشل عند صديقتي واخلية لين يستوي ويتمازج وينسجم عدل وما ننسى ماي اللحم جمبنا على طول اول ماتثقل زدناها وبعد ما ضبطت لازم نسويلها قلية على قولة الشوام (3 فصوص ثوم مدقوق تنحمس على النار بالزيت النباتي اول ما تشقر نحطها عالشاكرية لو تحمر الثوم بيخرب لون وطعم الشاكرية )
وسويت جمبها عيش بشعرية واهو انسب شي بالنسبة لهالاكلة
خلصت وتسبحت وتكشخت وتعطرت وبخرت البيت لشيخة الزين والسنع كله
ظبطت العصير وحضرت الطاولة وما بقى غير الحلوة تشرف
هااا الطيب عند ذكره الباب يطق فتحتلها وخذيتها بحظني وقتلها: نورتي
قالت: النور نورس يانموره جايبتلج حلا الحليب المحموس معاي
طقيت على جبهتي وقلت نسيت الحلا مو قايلتلج فاشلة بالمطبخ فاشلة مع مرتبة الشرف


والحين عرفتوا ضيفتي اكيد فهي اشهر من نار على علم
حبيبتي وصديقتي الوحيدة اللي دخلت قلبي بوقت قياسي واختي اللي تبنتني وشجعتني والسبب الاساسي باني اغامر هالمغامرة
واشارك بهالمشاركة المتواضعة واللي اتمنى تعجبها وتكون عبرتلها عن امتناني العميق لدعمها الصادق لي
ام رنوش اجبج فى الله اتمنى ربي يرزقنا ببيتين متجاورين بالفردوس الاعلى......ملازم نمورة

السلام. عليكم وانا. ليش. ماعزمتين.

شكله. غريب. مشكوره. نموره. بداية موفقه.

الله يسلملي قلبج بنوتة
بس والله حبيت تكون الشغلة خاصة بالبداية
وانتي سبقتيني ناوية على عزيمة بس لما اتسنع شوي عشان ما تفشل
انتي اول المعازيم

الله الله يا نمورة طعم الشاكريه يجنن
وش اقول بس عن نموره وكرمها وذوقها

والله عاجزه عن الشكر يا قلبي
وامييين يارب نتلاقى في الدنيا قبل الاخره

بالنسبه لي الشاكريه جديده بس اقرب شي لها اتوقع المنسف بس بدون رز ^^
احلى تقييم للعزومه والطبخه واكييد الاسلوب الروعه يا ام السنع ياملازم نموره

ياقلبي ياام رنوش الحمدلله انها عجبتج
وهذا اقل شي اقدمه لج
وامييين يارب ووعد لو التقينا لاكلج الشاكرية
اهي فيها شوي من المنسف
لكن الشاكرية اكلة سورية والمنسف اكلة اردنية بحتة
ووربي يسلملي قلبج........ملازم نمورة