منتديات ليلاس - تَلاَحِين تتَرُڪهَا أۈتاَرُ الغَمَامْ ۈأحْلاَمْ تَمْضِۓ دُۈنمَا إلتِفَاتَہ !

منتديات ليلاس (https://www.liilas.com/vb3/)

- مدونتي (https://www.liilas.com/vb3/f646/)

كل عام وأنتم بخير
هالمرة ماحسيت بلذة العيد
وحسبي الله ونعم الوكيل
وأقول ربي اجعلها خيرة ويسر لي أمري
قبل كم شهر طلع اسمي في الوظائف التعليمية
طابقت الاوراق ثم سويت المقابلة وكانت ممتازة ولله الحمد بس كان اجباري اننا نرتب الرغبات التي تتبع للقصيم وكانت 11 رغبة ورتبتها حسب الاقرب لي ثم أتفاجا ان يعلن عن تعييني لاخر رغبة يعني من هالرغبات كلها يتم توجيهي للقطاع الاخير لااعلم هل الموضوع واسطات والا ماهو المقصود من هذا الوضع ولست انا وحدي في هذا الموضوع فالكثير يشتكي من خلال منتديات التربية والتعليم المهم رغم الصدمة وبعد هذا القطاع عني وكلت أمري لله وفي ليلة العيد وجهوني لاحدى القرى وقلت الحمدالله رغم ان القرية تبعد عن منزلي 150 ورتبت أموري رغم كثرة الشكوى في منتديات التربية ان التوجيه على اساس نقاط المفاضلة تم توجيه من نقاطهن اقل في القرى القريبة ومن نقطاهن عالية في قرى بعيدة وهذا الاشكال فقط في توجيه معلمات القصيم (بريدة )فقط
لاتفجأ يوم الخميس 5-10 الساعة 9 مساءا برسالة على جوالي بانه تم توجيهي لاحدى القرى البعيدة تبعد تقريبا237 عن منزلي والمباشرة يوم السبت 7-10 وربي بكيييييييت من القهر وش هالتلاعب يعني تعييني على اخر رغبة ثم التوجيه لقرية وارتب اموري على هذا الاساس ثم يبعدوني مرة ثانية ليش نتحمل اخطائهم بصراحة فكرت اني انسحب ومترددة وضعي صعب جدا ولعبوا بنفسيتي لعب بس اهلي يقولون تحملي على الاقل انتي احسن من غيرك لان وحدة من قريباتي في القصيم وعينوها في القطيف اللي يقهر وقت مقابلتي كانت جنبي وحدة من الشرقية وعينوها في القصيم ووحدة من صديقاتي بالرياض عينوها في بيشة يعني هي بالجنوب وزوجها بالرياض وحماتها من بيشة لاحد المراكز التابعة للرياض ابفهم ليه التشتت والعشوائية في التعيينات وحجتهم نقاط المفاضلة
حبيت افضفض من الغبن والقهر اللي فيني واعذروني على ركاكة الاسلوب ولاتنسونني من دعواتكم
اللهم يسر أمري وفرج همي

إبليس يحب العري....
دل آدم وحواء على الشجرة المحرمة
فسقط عنهما لباسهما!!!!
فطفقا يخصفان من ورق الجنة!
وإبليس اليوم ..ينزع عن بعض ذرية آدم
لباسهم ..بخديعة اسمها الجمال والأناقة !
ولاورق من الجنة يخصفانه ..للستر!

..مضاوي..

مساؤكم دعوة
بأن تكتب أمنياتكم
على سحب بيضاء
ولا تلبث إلا وتتمطركم

وماغير الأب حبيبا وماغير أبي أعشق

يابوي جعلك للبقا والمكاسيب....عمري بدونك يالذّرا ويـش أبـي بـه

أبسألك وش به غزا وجهك الشيب....والقلب لايـع والنواظـر شحيبـه

وش بك تحاتي لانوى الموت تغريب.....تخشى علينا بالليّالـي الكئيبـه

خذ دلّتك واركى على مسند الجيب.....وعطني شماغك بالبسه وأحتمي به

ونروّح لأرض ٍ بها العشب والطيب....وتسمع كلام ٍ يالغلا تحتفـي بـه

يابوي بنتك لاانحكى بالتّجاريب.....كل ٍ يشـق لهيبـه الصّيـت جيبـه

يابوي ماني من سوات المخاريب....اللّي تجيـب لعليَـة القـوم خيبـه

وماني من اللّي لامشت حفّها الرّيب.....أنا من اللّـي مايدنّـس حليبـه

مرفوع شاني عن غرام المكاتيب......وأكبر من انّني أرتضي بالحبيبـه

أنا غرامي لاابتدوا بالتّراحيب.....نفوس الأوادم فـي وجـودي رحيبـه

وان كان زيني فتنة ٍ للمصاويب......أحـط وجهـي بالحريـق ولهيبـه

زيني أبيعه وأشتري سمعه الطّيب.....اسم ٍ ينومس بالصّروح الذ ّهيبـه

وان كان عندي ( بالحلا) شي ٍ اصعيب.....عندي جدود ٍ مارضت بالغليبه

دموع القبايل فـي لقانـا مساكيب.....كـن المقابـر لاحضرنـا قريبـه

خضّبت لك كفّي من العز تخضيب.....ورفعت راسي للنّجـوم الصّعيبـه

والله لأسدّك بالفعول المصاليب......والله لأشيلـك بالرخـا والمصيبـه

طلع المعالي ماانحكم للشّواريب.....بنت ٍ وأناطح فـارس القـوم طيبـه

وياشيخي إبشر لوتدور الدّواليب......بنتك إلا منّه عوى الذّيب ( ذيبـه)

مما يلامسني

اللهم إشف والدي وألبسه لباس الصحة والعافية

الجسد

عند الأطباء أمراض والآم

عند الشعراء فتنة

عند التافهين مناطق محددة

الإنسانيون فقط يرونه ...مكرما مقدسا...

فسبحان من وزع رزق (السمو) بين عباده

..مضاوي..