ومضة / تغريدة خارج النص :

يا دافي الحس لو تشعر ببرد الجفاف ،،
ما كان عرّيت وصلك والقطاعة جليد

ما ألعن من يدين تقذير الحلوم النظاف ،،
الا يدينٍ تلوّح بالهجر يوم عيد

اللي لقى وصل لو يعرف حياة الكفاف ،،
إن كان شفته على قل المواصل سعيد

بقايا طلل :

على بقايا طيوفه أو بقايا طلل ،،
يا صاحبيَّ دخيل الله عشاني قِفا

بأملى عيوني ترى موقف رحيله جلل ،،
ولا تقولون لا فاضت عيوني أفا

أفا عليَّه إذا ما ابكي عشانه رحل ،،
وأفا عليه إن ذكرني واستمر الجفا

نار الجفا تبتدينا من شرارة زعل ،،
مير الكريم إن زعل / لا راق جوه عفا

هذا الشتاءْ الرابع اللي في غيابك يحل ،،
وأنا فغيابك فقدت الروح قبل الدفا

أقراك في ذكرياتي حلم كله أمل ،،
الين جفني إذا اشتاق لوصالك غفا

أيه أشعر بـ برد وأشواق وحنين وملل ،،
بعدك وجع موت / و وصالك علاج وشفا

أموتك غْياب وأحيابك حنين و وصل ،،
والموت دايم مصير اللي لافارق وفا

أنت الذي لو تغيب / تغيب لكن تظل ،،
اللي عطاني مدى للشعر ثم أختفى

يوم إن هالناس أكثرهم كباين هلل ،،
إذا عطيته هرج وإن ما عطيته طفا