منتديات ليلاس

منتديات ليلاس (https://www.liilas.com/vb3/)
-   القصص المكتمله (https://www.liilas.com/vb3/f717/)
-   -   [قصة مكتملة] انكساري ، للكاتبة : أنشودة المطر .. (https://www.liilas.com/vb3/t170827.html)

♫ معزوفة حنين ♫ 25-12-11 08:34 PM


ام محمد:ايه انت ماعليك..بس ولدي هو اللي بيتعذب..ابو محمد انت ناسي وش سويييت..ناسي ليش ناصر ذبح محمد...انت السسبببب انت اللي المفرووض تموووت مو ولدي..ايه انت ..انت واختك الله لايرحمكم لادنيا ولا اخره..





مال بجسمه لقدام ومسك ذراعها بقوه وقال بتهديد

ابو محمد:من بكره تروحين وتتراجعين ولا بيصيرلك شيء ماشفتيه





ام محمد:ماعندي ولد ثاني علشان تحرمنياه

ابومحمد:وش تقصدين؟؟؟

ام محمد:يعني مو متراجعه..واعلى مابخيلك اركبه

ابو محمد:ان تنازلتي مارح تبقين بذمتي دقيقه وحده

ام محمد:من غير ماتقول..انا مستحيل اعيش معك..لاني كل ماشوفك اتذكر انك سبب موت ولدي...وخّر عنّي..وسحبت ايدها وطلعت لغرفتها تلم اغراضها...















0

0

0





















الصبـــــــــاح....

الثلاثـــــاء...









دخل على الشيخ وهو يسلّم..وجلس قباله..

الشيخ:كيف حالك ياناصر..

ابتسم بود للشيخ

ناصر:بخير زان حالك..

الشيخ:انا جاي بسألك..اقتنعت بكلامي..

ناصر:ياشيخ..قلتلك من قبل..اللي سويته ذنب عظيم..ويومي كله يروح بالصلاة والاستغفار لربي علشان يتوب عني..انا الليل مانامه ..مو سهل علي اني اذبح شخص واطلع روحه واحرمه من اهله..بس اللي صارلي شيء كبير..وماقدرت استحمل..

الشيخ:بس كان فيه الف طريقه وطريقه...ولا تنسى الكاظمين الغيظ..

ناصر:الشيطان يجري بابن ادم مجرى الدم..وانا تبت واستغفرت ربي..

الشيخ:الله يقبل توبتك..رحمة الله وسعت السماوات والارض..واوجه الخير كثيره..الابتسامه بس بوجه اخيك تاخذ عليها اجر..

وانا جاي لك اليوم ببشاره..

ارتسمت على شفايفه ابتسامه وبدى قلبه بالخفقان..بس سرعان ماختفت هالابتسامه وهو يستبعد هالخرافات اللي يفكر فيها..

وقال وهو يشوف الارض

ناصر:بشرني..

الشيخ:اهل القتيل تنازلو...وبتطلع بهاليومين..

هو يتخيل..او يحلم..هو سمع زين ولا يتهيأله..سكت..وهو يفكر باللي سمعه..

ابتسم الشيخ وعرف انه للحين مو مستوعب..

الشيخ:ناصر الله استجاب لدعواتك ودعوى اهلك..وبتطلع ان شاء الله..احمد ربك واسجدله سجود شكر..

رفع راسه له وشفايفه تهتز..

ناصر:ياشيخ...انت....شتقول؟؟؟

وقف الشيخ وضم ناصر اللي جالس وسلّم عليه وباركله...

ثواني استوعب ان اللي صار مو حلم..وخر على الارض واول ماتلامست جبهته وخشمه الارض خر بالبكاء وهو يحمد الله بصوت عالي ...





























**********************





























رمى السماعه وركض وهو يقول بصوت عالي..

ربي لك الحمد ربي لك الحمد ربي لك الحمد..

دخل مكتب اخوه وضمه وهو يقول

ناصر ناااصر ناااصر..



استبشر خير وضم اخوه اكثر وقال



ابو فيصل:وشفيك ياخوي الله يديم الفرحه عليك

ابو سليمان:ناااصر تنازلو بيطلع اتصلو ناصر نااااصر

ابو فيصل:الحمد الله الله يبشرك بالخير اهدى ياخوي اهدى ..



وحاول فيه لين خلاه يجلس..وعطاه كوب مويه يشرب..



شرب الكوب كله وقال وهو ينزله





ابو سليمان:حاس اني بحلم مو مصدق ..ناصر بيطلع..وتهجد صوته..وغطى وجهه بالشماغ..

ماقدر يتحمل الموقف وبكى ابوفيصل مع اخوه...




***************************



♫ معزوفة حنين ♫ 25-12-11 08:34 PM


الساعه العاشره والنصف صباحا..



منسدح على السرير ورافع راسه بالمخده ويطالع بالسقف...



استغربت وجوده بهالوقت..معقوله اخذ اجازه..وش فيه جالس كذا؟؟

لا يكون تعبان...





تقدمت منه وهي رافعه طرف جلابيتها بيدها..

ليلى:ماداومت اليوم..





غمّض عيونه..مايبي يشوف وجهها الكريه..

زياد:اداوم مااادوام انتي مالك شغل وضفي وجهك..





تفحصته بعيونها..وقالت بخوف

ليلى:انت تعبان..محتاج شيء





فتح عيونه وسحب المخده من تحت راسه وحذفها بالارض معصب

زياد:وبعديييييييين وبعدين وبعدين..كم مره قلتلك لا تفتحين فمك صوووتك يرفع الضغط..ضفي وجهك عني..





راحت عنه ودخلت غرفة الملابس..صارت متعوده على اسلوبه...



طلّعتلها تنوره بيضاء بورود رماديه وموف..طويله من اسبر وبلوزه بيضاء فراشه قطنيه وداخلها بدي رمادي..

لازم تطلع دامه موجود...اخذت شور سريع وتوضت..لبست لبسها وراحت للتسريحه تتزين..اكتفت بواقي الشمس كأساس..ووزعت البلاشر الوردي على خدودها وروج وردي رايق...حطت كحل داخلي ازرق..لبست عقد موف وحلق موف واساور بيضاء وموف ورماديه...لبست صندل كعب متوسط ابيض واخذت شنطتها ديور بيضاء..وسحبت عبايتها وطلعت..دخلت غرفة المكتب وفرشت سجادتها وصلت الضحى قبل لاتطلع..وطلعت جوالها وكتبتله((انا بروح لاهلي..اسفه للازعاج))

وتنهدت..

ليلى:مابيني وبينه الا جدار..وارسلّه مسجات..

طلعت من البيت وقالت للشغاله تبلّغ ام فراس...









ارتاح اول ماطلعت..وجودها يضايقه..مو قادر يسيطر على مشاعره...يحبها ويعشقها بس اذا كانت بعيده...

غصب عليه يتعامل معها بهالاسلوب..يحس نفسه مو هو اللي يتكلم...تنهد..وهو يقرى المسج..

اسفه للازعاج

اسفه للازعاج

اااه ياليلى لو تدرين بس باللي بقلبي..اهتزت اصابعه وكانت بتخونه وترسل مسج لها..قدر يسيطر على نفسه..

وش بتكتب يازياد؟؟...احبك واموت فيك...واذا جيتي ودّي اذبحك..شهالتناقض؟؟؟شلون بتصدقك؟؟؟..

رمى الجوال بعيد عنّه..





قام من سريره ودار بالغرفه..شالسواة مع ابوي؟؟؟

نوال..انا مابيها..مستحيل اخذها..لازم هي تتكلم..لازم هي تحل الموضوع..

طلع بسرعه من غرفته وراح لغرفتها..طق الباب..ولا ردت..

زياد:هذي شفيها..كل هذا نوم..طق الباب مره ثانيه..ولافتحت..عصّب ورجع لغرفته...















**************************

















طلع من الفندق مستعجل..المستشفى طالبينه ضروري..

كان ودّه يمر ناصر قبل لايرجع للرياض..بس مافي وقت..

كلّم المطار..وقالوله ان مافي رحله قبل اربع ساعات..

فيصل:اروح بالسياره احسن..مافيه وقت ومو من بعد الرياض..ثلاث اربع ساعات وانا فيها بأذن الله...

وقف عند محطه..وعبى بنزين..واشترى بيره بالتفاح وفطيرة جبن لوزين وعلبتين موية صحه وجالكسي..

وانطلق للرياض...



















*********************



















الساعه الثانيه ظهرا..



انتشر الخبر بين افراد العايله ..وطارو من الفرح..وقررو يتغدون عند ابوفيصل..

وبعده يسافرون جميع للشرقيه..ومحمد يبقى علشان الشركه ...

موعد رحلتهم الساعه اربع العصر..





جالسين بغرفة الجده..والكل متغطي عدا سلمى..



رفع عيونه لابوه وجواله بيده..



خالد:مقفل جواله..اكيد انه عند ناصر..

ابوفيصل:عند ناصر من الضحى لهالوقت..مو معقوله

محمد:يمكن نايم..او مقفل جواله بدون مايدري..

سليمان:دقو على الفندق طيب..

خالد:ماله داعي اذا وصلنا ندق عليه

ابوسليمان:حنا نبيه يستقبلنا ويعلمنا بالعلوم

خالد:طيب شسوي مارد علي..

محمد:انتم روحو وانا بدق على الفندق

خالد:انت عارف هو بأي فندق

محمد:ايه...الحين انتم روحو لاتفوتكم الطياره..





قامو كلهم وسلمو وطلعو وسط دعاء الجده وابتهالها لله ان يرجعهم سالمين...







شالت الغطاء عن وجهها وهي تقول



ليلى:وانا برجع لبيتي...واجيكم بكره ان شاء الله



الجده:اجلسي يابنيتي هذا حنا مستانسين ومبسوطين وين تبين



ليلى:جدتي انا عندكم من الصبح..تأخرت



عبير:ليلى مافيها شيء اجلسي..بتخلينا بيوم مثل هذا



ليلى:والله مااقدر..بحاول اجيكم الليله..وان ماقدرت بكره ان شاء الله...



الجده:هذا اللي تاخذ غريب..ومسكت سبحتها السوداء وبدت تسبح بصوت عالي وكأنها تقول لاحد يكلمني..





ابتسمت ام فيصل وهي تغمز لبنتها



ام فيصل:روحي يمه تراك ابطيتي على رجلك..

ليلى:يلا مع السلامه...

الكل الله يسلمك...





تمددت عبير وسلمى على الكنب المتصل كانو ورى بعض مايفصلهم الا مركى..

وميساء وام فيصل جلسو يسولفون..والجده لهت بالتسبيح...

















********************************



















بعد صلاة العصـــر..







نزلت ببجامتها الورديه النص كم وعليها صورة مكي ..

واول ماجلست رفعت السماعة وطلبت يجيبونلها كابتشينو..

كانت تستمع لحديثهم وهي بحالة ملل فظيعه..مافي شيء ضابط معها..

لا اهل..لا حبيب..لا زوج..لا سعاده..

كل شيء بحياتها لا..ورفعت عيونها لشموخ

شموخ:نوال انتي تعبانه...



نوال:لأ...واستقبلت كوب الكابتشينو وبدت ترشف منه ..





شموخ:ماما ماما شوفي

انتبهو للتلفزيون وطالعو بالبرنامج..



ام فراس:هذي البرامج اللي كتبو عنها والاتصالات قطعت ارقامها فيهم؟؟؟

شموخ:ايوه..طالعي ماما يسوي نفسه شيخ وهو مشعوذ..

ليلى:وشوفي الاتصالات كيف عليه..والله الناس متخلفين

ام فراس:غريبه..شلون ساحر وهو بالقران يتكلم

شموخ:القران واجهه لاغراضه الدنيئه..

ليلى: يبتدع شيء مو بالدين..وكل بدعه ضلاله..وبكذا يسحر الناس..



ام فراس:بس هذا بالقراان



شموخ:ايوه بالقران صح ..بس يخترع اشياء من عنده..يعني مثلا يقول اقرو سورة الكرسي خمسين مره قبل لاتنامي وتشوفي زوجك المستقبلي او اقري سورة البقره اربعين ليله وتحملين او تتوظفين او تتزوجين..هي صحيح بالقران بس الرسول ماجابها ولاقال عنها..

والشيطان وش مهمته نشر البدع والخرافات..فلما الناس تصدق هالاشياء وتسويها يكون انجز شيء عظيم وبالتالي يساعد الساحر بالسحر..او يخلط القران بالفاظ اخرى واستغاثات شيطانيه والناس ماتنتبه لها

ليلى:الساحر لازم يسوي شيء يغضب الله علشان الشيطان يساعده..والشيء في هذي الحاله هو البدعه..فهمتي خالتي



ام فراس:اعوذ بالله الله يكفينا شرهم..وليش يحطون مثل هالقنوات



ليلى:علشان الناس التافهين والجبناء...



شموخ:بعضهم مساكين مايدرون



ليلى:بس هالاشياء يكش منها جسمك بالفطره..مشكلة الناس انها تسوي نفسها جاهله..ولا كل شيء باين وواضح..



شموخ:الحين هذا ليه مايمسكونه هذا يجاهر بالسحر



ليلى:بلندن من بيمسكه..



شموخ:السحر مره انتشر..وصار اسهل من شربة الماء..تدرين وحده من صحباتي تقول ان اختها صارلها عشر سنين متزوجه ولا حملت والدكاتره يقولون مافيها شيء..وراحت لشيخ طلع فيها سحر..



ام فراس:من سحرها؟؟؟



شموخ:تقول وحده من صديقاتها



ليلى:وكيف عرفت؟؟؟



شموخ:الجني بسم الله علينا نطق

ليلى:والهبلا صدقت..

شموخ:ايه

ليلى:مو شرط يكون كلام الجني صدق..احيانا يبي يسوي مشاكل بين الاقارب قبل لايطلع..اساسا المشايخ المعترف فيهم ماعمرهم قالو من اللي سحر لانهم يدرون ان الجن يكذب...



ام فراس:الله يستر..حتى الشغالات ينخاف منهم..يقولون انهم يدرسونه دراسه ببلادهم



ليلى:وخلهم يدرسونه ماتقدر تسوي شيء وانا متحصنه..



ام فراس:بس الواحد يلهى وينسى



ليلى:اذا خايف على نفسه مارح يلهى وبعدين يكفيه قراية المعوذات ثلاث مرات..اذا مايبي يقرى باقي الاذكار..



شموخ:تاكلين سبع تمرات بالصبح واتحدى ساحر يقدر يسحرك..هذا يدل انهم اضعف من الضعف..بأكلة تمر مايقدرون يسوونلك شيء..



ليلى:الاذكار سهله ..اقريها وانتي تمشين وانتي تتمكيجين قبل الجامعه وانتي راكبه السياره ..ماتاخذ وقت بس على حسب التعود..

انا عن نفسي اقراها بعد صلاة الفجر وبعد المغرب..طبعا اقرى الاذكار الثانيه واحرص اني اقرى الكرسي بعد كل صلاة...

والله ماتاخذ مني ثواني..وبتحميني بعد الله سبحانه وتعالى من كل شر..



ام فراس:انا مره حضرت حلقه للفتاوى..اتصلت وحده وقالت للشيخ اني اعتمرت وماقدرت اشوف الكعبه..



شموخ:الكعبه بكبرها ماقدرت تشوفها؟؟؟



ليلى:انعمت يعني



ام فراس:لأ..تقول كل شيء اشوفه الا الكعبه...وسألها الشيخ قال انتي مسويه ذنب عظيم وشو؟؟؟

طبعا اول شي قالت ماسويت شيء وبعدين قالت سرقت..

شموخ:ايه وش قال

ام فراس:قال لأ..وقالت اكثر من ذنب..وكلها قال الشيخ لأ سويتي اعظم..لين قالت اني زنيت

شموخ:هيييء

ليلى:ايوه

ام فراس:قال لأ..سويتي اعظم..قالت سحرت وحده ودفنت سحرها بقبر واحد..قال الشيخ هذا هو اللي سويتيه..وهذا عقاب من الله..

ليلى:مشكلة الحريم تهاونهم..مايدرون ان اللي يجي ساحر بدون مايصدقه يعني بس حب استطلاع مثل اللي يقرون المستقبل وتقول مو مصدقتهم بس للمتعه..ماتقبل صلاتها اربعين..واللي تصدق هذي كافره تخرج من دائرة محمد...



















ضرب ايده بطاولة المكتب...ليش مايرد..ليش مقفل جواله هذا وقته يافيصل....لازم يلقالي حل....وليلى شفيها تأخرت..يااارب ارحمني من هالحال..



طلع من الغرفه وهو متضايق...ونزل تحت..







دخل عليهم بجنز ازرق وتيشرت سماوي وطالع بنوال لثواني وهو محتقرها..

كانت ترشف من الكابتشينو وقلبها يرجف...



جلس متعمد بجنبها..وهمس

زياد:بعد شوي ابيك بموضوع..والتفت عليهم...متى جيتي انتي..؟؟؟



بلعت ريقها بصعوبه..مو ناقصه فضايح عند اهله



ليلى:قبل صلاة العصر...

زياد:كان جلستي بعد..

شبّكت يدينها ببعض متوتره..بدى اسلوبه الحلو..

ليلى:تأخرت..علشان اهلي مسوين غدى ومجتمعين..لان ناصر ولد عمي بيطلع تنازلو عنّه..





رفع حاجب..وقال وهو قرفان



زياد:ولد عمّي...انا ماطلبت قصة حياتك..ولا ماتقدرين لازم تهذرين وتصجين راسي..افف انا شيجلسني بمكان انتي فيه....

وطلع برى البيت..



ماقدرت ترفع عيونها عن الارض...حمّر وجهها من الفشيله..حست ان صوتها راح..



شكلها بايخ ..وتحس الكل يضحك او شفقان عليها..انسحبت بسرعه وطلعت لجناحها..









التفتت شموخ على امها

شموخ:يمه عاجبك تصرفاته

ام فراس:بكيفه حنا مالنا دخل...نوال شفيك من جيتي وانتي ساكته

شموخ:هههههه ضيفة شرف

نوال:عن اذنكم..ونزلت الكوب على الطاوله وطلعت بسرعه ...



















***********************


♫ معزوفة حنين ♫ 25-12-11 08:34 PM



الساعه التاسعه مســاءًا











الجيران كلهم مجتمعين عندهم يباركون للجده..

كانت لابسه تنوره غجريه سوداء وبلوزه شيفون فراشه سوداء ومن تحت الصدر مشغول بتطريز خفيف وينربط من ورى ..وتاركه شعرها مفتوح..وروج فوشي وبلاشر فوشي وكحل اسود..كانت تحاول تكون طبيعيه ونضره..





اخذت قطعة الحلا مغصوبه..تحس بطنها امتلى وتخاف ترجّع بأي لحظه..

بلعتها بصعوبه..والتفتت على خالتها..



عبير:مافيني شيء صدقيني

همست علشان محد يسمعها

ام مؤيد:حالك ابدا مو عاجبني..وتراني صبرت عليك اذا مو هامتك صحتك انا يهمني..

عبير:خالتي بشويش الناس بدت تسمع..

ام مؤيد:الليله تروحين معي للبيت..بكلم جدتك

عبير:لا مااقدر ..ابوي مايرضى

ام مؤيد:مو قايل شيء..والتهت مع سواليف الحريم...

مدت ايدها واخذت الفنجان من ايد ميساء..

ام طلال:بشرينا ياميساء ماحملتي..



ابتسمت بحب

ميساء:ادعيلي ياخاله..



ام طلال:الله يرزقك بالذريه الصالحه...

الجده:ان شاء الله ربي يرزقه قريب..شصار على عرس طلال

ام طلال:والله مادري ياام راشد..راح لناصر اليوم وماعلمني وش اتفق مع مرته..

ام فيصل:الله يوفقه وييسرله يارب ويرزقه بالذريه الصالحه..

سلمى:خالتي قوليله يعلمنا متى بالضبط موعد العرس نبي نفصل ونتجهز..

ام طلال:عاد انتي ياسلمى اللي تقومين معي بالعرس..

سلمى:ابشري طلال مثل اخوي...







اجتاحها الاعصار وبدت تفقد التركيز..بلعت ريقها بصعوبه..ووقفت وهي تبتسم وطلعت بسرعه من غرفة جدتها..





وين تروح...تحت صعب..الكل ممكن يشوفها..خصوصا الخدامات اللي بكل مكان..

تحاملت على نفسها وحاولت تسرع من خطواتها..لازم اطلع فووق ..مابي احد يشوفني..موو وقته خلهم فرحانين بناصر...

يااربي متى اوصل للدرج متى.....

























ركن سيارته بالمواقف..ونزل وهو حامل شنطته بيد وباليد الثانيه البالطو..

كان مرهق وتعباااان..اربع ساعات وهو بالعمليات..الحاله طارئه والدكتور اللي مفروض يسوي العمليه جاه ظرف طارئ ومافيه غيره...

فتح الباب بشويش..راسه مصدع ومحتاج للراحه وماله خلق يشوف احد...























في غرفة ليلى

بصعوبه وقفت على كرسي التسريحه..واخيرا تحققت امنيتها..فتحت الدروج وطلعت كل شيء فيها..

كل شيء تتمناه وتتمنى تملكه..ومدت ايدها واخذت الروج وبدت تخط فيه شفايفها الرقيقه....





















في اخر درجه توصلها للدور الثاني..اجتاحها الدوار..تمسكت بالدرابزين..وهي تدعي ربها يلطف بحالها..



ماقدرت تسيطر على نفسها الدنيا حولها ظلام..

حمدت ربها انها بالدور الثاني على الاقل محد يشوفها..



دمعت عيونها غصب عنها...وجثت على ركبها اللي لامست الرخام السكري البارد والقاسي..



حاولت تتنفس..حالتها بدت تسوء..ركت راسها على الدرابزاين عل وعسى ..وثواني مسكت بطنها واحنت راسها للامام وبدت ترجع كل شيء اكلته...





خلاص ماعندها قدره ترفع راسها اكثر..ارخت راسها على الدرجه ...وغمضت عيونها..





يااارب ابي بس اشوف ناصر..يارب طول عمري لين اشوف نااصر...










عبيــــــر!!!!



♫ معزوفة حنين ♫ 25-12-11 08:37 PM


انصدم لما شاف وضعيتها رمى الشنطه والبالطو على الدرج وبسرعه راح لها..مسكها مع كتوفها وحاول يرفعها..بس هي ماتتجاوب معاه..



حاوط خصرها بيدينه وقدر يرفعها ..



فيصل:عبير شفيك؟؟؟



عبير:مو قاادره..تعبانه



ادرك انه يعورها وخصوصا انه ضاغط على بطنها..وبصعوبه قدر يحط يد تحت ظهرها ويد تحت ركبها وشالها...





بسرعه دخل جناحه..انتبه لحركة راسها وكأنها تبي تتقيأ.



.بسرعه دخل الحمام ..نزّل رجولها على الارض وخلاها ترخي كل جسدها عليه وهي واقفه وهو محاوط كتوفها زين ومثبتها..وباليد الثانيه ماسك شعرها وخلى وجهها على المغسله..





فيصل:لا تدخلينه طلعيه علشان مايضرك...حاولي حاولي..





كانت ترجع وهي تبكي..دقيقه مرت..حس انها خلاص انتهت..فتح المويه وبلل ايده وبدى يمسح وجهها ويخليها تتمضمض..



وبعد مانتهت..رجع شالها وطلع فيها للغرفه..نزلها على السرير بشويش..



فيصل:التكييف بارد..بروح اخففه



عبير:لا...انا..محتره



بسرعه راح للريموت وقصر التكييف..

فيصل:بيضرّك الهوى البارد....بروح اجيب الشنطه واكشف عليك..





عبير:لا لا..مايحتاج..مافيني شيء..ورفعت راسها بسرعه ورجعت نزلته بقوه..





خاف عليها وبسرعه جلس بجنبها ومسك وجهها..



فيصل:عبير شفيك..؟؟؟شتحسين فيه؟؟قوليلي وين الالم فيه..





تنفست بعمق..حست براحه..النوبه راحت تقريبا..فتحت عيونها والتقت بعيونه اللي تعشقها..



ابتسمت ابتسامه ذبلانه..



عبير:تطمن مافيني شيء



شال ايده عن وجهها



فيصل:عبير وجهك اصفر وعيونك مرهقه..وو..ونحفانه..انتي فيكي شيء..شكلك ابدا مو طبيعي..بروح اجيب الشنطه واكشف عليك..الكل كان يقولي انك مو طبيعيه والحين بس صدقت.



.كان بيوقف..بس مسكت ايده..



عبير:فيصل



هز راسه وكأنه يقول وشو



بلعت عبرتها وهي تحاول جاهده ماتنزل دموعها..وقالت وهي تحاول ترطب شفايفها الجافه..

عبير:مافيني شيء..ورفعت نفسها..



قال وهو مركز على عيونها



فيصل:شيء شفته بعيوني وتقولين مافيني شيء..اذا متضايقه مني بوديك للمستشفى..بس على هالحال مو تاركك..طالعي شكلك كيف صار..



كانت تتفحصه بعيونها..تبي تروي عيونها بشوفه..تبي تستمتع بكل لحظه باقيتلها بهالحياه..مو شيء حرام اللي اسويه..



مسحت دموعها اللي مو راضيه توقف..وقالت بشكل مفاجيء



عبير:انا..اسفه..



عقد حواجبه وضيق عيونه..هذي شفيها ..لايكون حرارتها مرتفعه..





مسحت خشمها بظاهر يدها مثل الاطفال وهي تحس الالم يقطع قلبها..وقالت وهي تركز بعيونه اللي ضاقت..





عبير:ليه تتزوجني وانت قلبك لوحده لوحده ثانيه..ليه اساسا تتزوج وانت عايش بماضيك..وليه انا بالذات؟؟؟

علشاني بنت عمك وبتحمل غصبا عني لاني بنت عم بس؟؟..ليه تظلمني معاك؟؟..ليه تعلق قلبي فيك وانت عمرك مارح تكون لي؟؟؟

ليه ماتزوجت اللي تحبها؟؟؟ورحمتني..وشهقت وغطت وجهها بيدينها واجهشت بالبكاء...





كان فاتح عيونه على الاخر..مصدوم بهالقنابل اللي انقذفت عليه..معقوله اللي اسمعه..

سكت..دقايق وهو يستمع لنحيبها..الصدمه الجمته..



مد ايده ولامس كتفها اللي يهتز



فيصل:عبير..





رفعت راسها ومسحت دموعها بسرعه وكأنها استوعبت اللي صار..ثنت رجولها علشان تنزلهم على الارض

حط ايده على ركبتها وكأنه يمنعها توقف..



طالعت فيه وقالت..





عبير:ادري اسفي جاء متأخر..وادري اني غلطانه..بس انا مااقتنعت اني غلطانه الاّ من فتره بسيطه..

مسحت دموعها اللي مو راضيه توقف ..وكمّلت وهي تطالع بحضنها...انا مو حارس على قلبك..والانسان مايقدر يتحكم بمشاعره..

الحب غصب عننا..مو بأيدنا..

مدت اصابعها وهي تحاول تمسح دموعها المنسابه..





يمكن انت زعلان مني للحين على اللي سويته فيك وبميساء وبخالد..بس هالشيء كان غصب عني..

زواجي منك كان غلطه..انا وافقت عليك..وماكنت ادري ان قلبك مو لي وعمره مارح يكون لي..



ويوم دريت..حاولت انهي هالزواج...بس ماقدرت ..ليلى وناصر خربو كل شيء...وقلت لنفسي عادي اتزوجك ومو شرط يكون بينا حب..



انا مارح احبك...بس من اول ليله..من اول ماحطيت ايدك على راسي..وقلبي تعلق فيك..مادري شلون..

وبديت اقنع نفسي بكلام خالد..لو ماتبيني اجل ليش تزوجتني ولو تبي ميساء كان تزوجتها..واقتنعت بهالكلام..



كان كل يوم يمر يزيد حبي لك..صرت متملكني..بس كان شكي بحبك لميساء يذبحني..كنت امووت من الغيره لمجرد التفكير انه فيه وحده شغلت بالك..

حتى لوكان هالشيء بالماضي..بس تأكدت شكوكي..وعرفت ان..ميساء..مو ماضي..كنت اتعذب وامووت كل ماشوف حركاتك اذا انذكر اسمها..



مسحت خشمها بظاهر يدها وكملت..

كنت اوهم نفسي انك تحبني..بس حتى الاوهام مو راضيه تقنعني..كرهت نفسي وكرهت ميساء..

كنت اسأل نفسي وشو اللي خلاك تحبها..وشو اللي فيها ومو فيني..صرت مو قادره اتعامل معاك..لاني مو عارفه وشلون اخليك تحبني انا كنت انقهر حتى من سديم كنت اغار منها....

و بليلة زواج خالد وميساء..ايقنت انه مافي امل املك قلبك..كنت ابكي بصمت وانا اشوفك كيف تتقلب بمنامك وكل شوي تقوم وتستغفر..كان قلبي يحترق..



حتى نسرين صدقتها لاني متأكده انك ماتحبني ..



بس خلاص ماعدت استحمل..اعصابي تلفت..مسحت خشمها ونزلت عيونها بالارض..



يمكن سويت هالمشكله انتقام من خالد لانه هو السبب..هو اللي اقنعني اخذك..وخلاني اتعذب..حتى لو ماكان يقصد..

وانتقام من ميساء..لانك تحبها..وانتقام منك لانك ماتحبني..



انا مو راضيه عن اللي سويته..لانه كان غصب عني..انا عارفه اني سببت شرخ بعلاقتك مع خالد..

بس انا اي

قاطعها هو يرفع ذقنها باصبيعينه..



أسلوبها وطريقتها بالكلام..تصريحها بحبها..دموعها..

خلّى قلبه ينبض غصب عنّه..قال وهو يتفحّص ملامح وجهها بعيونه..

فيصل:من قالك اني احب ميساء؟؟؟؟





ركزت بعيونه اللي تتفحص ملامحها..

عبير:انت من الاساس خاطبها..واستغربت يوم خطبتني..وسألت خالد وقال انها ماتعنيلك شيء..بس محمد..قريت مذكراته بدون مايدري..وكان كاتب كل شيء..انت تعشقها بس فيه سر هو مايعرفه..وهالسر هو اللي خلّاك تتركها...



حمد ربه بالسر..على الاقل محد قالها..



فيصل:وتحكمين علي وتخربين حياتنا علشان كلام مكتوب مو انا اللي كاتبه..





شبّكت يدينها ببعض وهي تفرك ابهام يدها اليمين باليسار..



عبير:كان واضح كل شيء..تصرفاتك تأكد كلامه..

فيصل:اكيد بتأكد كلامه لانه عقلك الباطن تشبع بهالفكره..وصرتي تركزين على حركاتي وتفسرينها مثل ماتبين ..





بعدت ايده اللي على ذقنها وقالت بانفعال





عبير:فيصل مايحتاج تبرر ..تصرفاتك بليلة زواجها كان وااضح..انا قلت هالكلام لاني بطلع شيء بقلبي..انا مابيك تحبني لاني احبك..كل انسان حر بمشاعره..





تعلقت عيونه بعيونها الذبلانه..وابتسم بحب..وقال وهو يلفظ انفاس حبه الاخيره لميساء...

فيصل:اولا ليلة زواجها كان ليلة زواج ليلى..وكنت شايل هم ليلى..بس انتي تفكيرك غلط..لانك مقتنعه بشيء غلط..

انتي تبيني بالغصب احبها..لو ابيها اخذتها على قولتك وشو اللي بيردني..عبير انتي دخلتي هنا.. واشر على قلبه... من اول ماطحتي قدامي تذكرين..وماسألتي نفسك ليش خطبتك بعدها..





وتنهد..ومسح دموعها برقه..عذبتيني معاك..





عبير:انا عذبتك؟؟؟



فيصل:وتسألين بعد...انا كل ليله قبل لاانام أسأل نفسي ليه تكرهيني..؟؟؟وكنت انام مقهور..



وضحك وهو يرجع شعرها المندّى لورى...هههه تدرين وصلت معي لدرجة الحقد عليك..



ركّزت بعيونه ثواني وبعدها صدّت عنه..



عبير:انت تحبني؟؟





مسك ذقنها بأصبعينه ولفها غصب عنه وخلاها تطالع بعيونه..



فيصل:وش تشوفين بعيوني..



نزّلت عيونها

عبير:ماافهم بالعيون..



فيصل:اكيد..لانك لوتفهمين كان عرفتي بمعزّتك عندي..





رفعت عيونها تلقائيّا له

عبير:شفت ..معزه..مو حب..



فيصل:مثل مانتي ماتفهمين بلغة العيون ..انا بعد ماافهم باللغة العربيه..

عبير:مافهمت

فيصل:اللي خابره ان الحب والمعزه والغلا كلهم معناهم واحد..اذا فيه فروق فأنا اجهل فيها..

قالت وهي تأشّر على راسها

عبير:تبي تاكل بعقلي حلاوه انت..





حركاتها الطفوليه..دموعها اللي مو راضيه تجف عن خدودها ..لمعة عيونها..

عيّشته بعالم ثاني..عالم مافيه الا هو وهي..



وقف وراح لطاوله قدام الاريكه فيه صينية شكولاته بلجيكي من النوع الفاخر..

اخذ حبتين ورجع لها..جلس بجنبها



فيصل:لمين الحلاوه الحلوووه..وصار يهزهم بيدينه..



اخذت حبّه وضمتها بيدها..وقالت وهي تبتسم ابتسامه صفراء..

عبير:فيصل..انت تحبني..



حاوط كتوفها بذراعه..وهمس بأذنها

فيصل:احبك..

نزّلت راسها على كتفه..وانسابت دموعها....























دخل البيت بسرعه فرح يوم شاف سيارته...كان متوقع يلقاه عند جدته بس خاب ظنه لما سمع صوت جارتهم ام طلال وكأنها بتمشي..

هرول بسرعه ووصل للصاله وصعد الدرج..شاف الشغاله تمسح الارضيه والشنطه مرميه بالارض وحتى البالطو

محمد:وين فيصل وليش اغراضه هنا..



الشغاله:انا مافي شوف..





تعداها وبسرعه راح لجناحه..شاف الباب مفتوح دخل على طول..وبآخر الممر وقف مصدوم..





فيصل وعبير مع بعض!!!

متى ووشلون؟؟؟





خاف يحسون عليه..وبسرعه وبدون صوت رجع وسكر الباب بدون صوت..



شاف الشغاله شايله الشنطه والبالطو..اشرلها تنزلهم عندها..





محمد:ههههه ماعندك وقت يافيصل رامي الشنطه بالدرج..الله يوفقكم ويسعدكم ويهنيكم...

ودار بظهره رايح لغرفته ياخذ شور

















انتهت من لمساتها الاخير وضحكت بصوت عالي على شكلها..ورددت بداخلها ..اكيد بينهبلون علي..

قفزت من الكرسي وطلعت برى الغرفه..

وقبل لاتنزل..شافتها الشغاله وضحكت..

الشغاله:اش هادا سديم

ابتسمت بقوه

سديم:حلوو سح..

الشغاله:روحي لمستر محمد خلي يشوف

سديم:خالي محمد جاء

الشغاله:ايوه هو في غرفه..

ركضت لمحمد والشغاله نزلت..وقبل لاتروح لغرفة محمد انتبهت للشنطه والبالطو..وبسرعه فتحت الباب بدون ماتطق...

















ابعدها عن صدره ومسح دموعها برقه..وهمس

فيصل:انسي مثل مانا ابي انسى..

وعيونها لازالت معلقه بعيونه..

عبير:فيصل

فيصل:عيونه

عبير:انا...انا..مابي ارجعلك..

غمّض عيونه ثواني ..مصدوم..وهز راسه وهو يكرر كلامها..

فيصل:مابي ارجعلك!!!



ووقفت بتطلع قبل لاتطلع روحها من الضيقه..

مسك ايده ومنعها..وقف

حاوط وجهها بيدينه



فيصل:ليش؟؟انتي ماتبيني ماتحبيني؟؟؟





كتمت شهقتها وهي تشوف نظراته له..ماتحملت..مسكت يدينه بيدينها وابعدتهم عن وجهها..

الدموع مغطيه وجهها وانفها احمر وكبير وشفايفها متوهجه..شعرها متبعثر ومندى بالماء وبالدموع..

عبير:والله احبك..بس مااقدر ارجعلك..سامحني..



حررت يدينها بس هو كان اسرع منها ومسكها وشد عليها..فيها شيء..مو طبيعيه..شلون تحبني وماتبيني..



فيصل:انتي زعلانه مني..؟؟؟قوليلي..





غمضت عيونها وتنفست بعمق..

عبير:لا مو زعلانه..بس ماينفع ارجعلك..وفتحت عيونها وهمست..اتركني..



ماتركها..كانو يطالعون ببعض..هي بدموعها..وهو بصدمته..





مرت دقايق وهم على هالحال..ماتحمّلت اكثر وانهارت وهي تضمه..



عبير:مااقدر مااقدر يافيصل...انا ايااام وبموووت...شتبي فيني..بعذبك معااااي...شتبي بوحده مريضه..شتبي بوحده ماتدري يمكن بأي لحظه تموووت..شتبي بوحده معها ورم..ورم..ورم..تعرف شمعنى ورم يادكتوووووور...شتبي فيني..انا مااابي اعذبك معااااااي ماااااااااابي ...

كانت تبكي وتتكلم..واصابعها انغرست بظهره من كثر ماهي شاده عليه..







العالم من حوله اسود..صمت..وهدوء...ماكان يسمع شيء..يحاول يستوعب كلامها...

كان تنفسه سريع وواضح..قال بهدوء عكس البراكين اللي بداخله..



فيصل:فيك...ورم؟؟







رفعت راسها له..ماكان يطالعها كان يطالع باللاشيء..

عبير:ايه ورم..سحبت ايده وخلتها تلمس مكان الورم تحت اذنها...



توه يستوعب..توه حس انه مو بكابوس..اول مالامست ايده الورم كش جسمه..

وكأن خلاياه تنبهه انه بواقع..وواقع مرير..



فيصل:من متى؟؟؟





رجعت تمسح دموعها

عبير:من زمان..فيصل الله يخليك مابي احد يدري..





سحب اييده وقال بعصبيه..

فيصل:من زماااااان..من زمااااااان...وكل هالوقت ساكته..ليه؟؟ماتفكرين الا بنفسك..مافكرتي فيني..ليه ماقلتيلي ليييييييه؟؟؟





عبير:مابي احد يتعذب معااي..اموت بسكات احسن..



فيصل:فالك ماقبلنااه..مابي اسمع هالطااري..انا بفهم شلون تفكرين انتي؟؟؟؟

عبير:فيصل

قال وهو لازال معصب..





فيصل:ماابي اسمع شيء...مااااابي اسمع شيء..انتي ..انتي..وعض شفايفه مقهور مايدري شيقول...





خافت يضربها..وبان عليها الخوف...تراجعت خطوتين لورى تبتعد عنّه..ودارت بظهرها تبي تهرب..





حسّت بأيده القويه تنغرس بعضدها..ولفّها بقوه...غمّضت عيونها وهي تصرخ برعب

عبير:يبااااااااااااااه....





ترك ايدها ومسك كتوفها وهو يهزها..

فيصل:عبير شفيييك؟؟؟





فتحت عيونها وبيدين ترجف تحاول تبعد يدينه..

عبير: والله لاقول ابوي..لاتضربني لاتضربني..





شد على كتوفها وسحبها بقوه وضمّها..

فيصل:الحين انا اضربك؟؟؟وباس راسها..


♫ معزوفة حنين ♫ 25-12-11 08:37 PM






ارتاحت شوي..وحاولت تبعد عنه بس ماقدرت..

عبير:مو غريبه عليك..انت سويتها قبل

فيصل:وانتي تدرين ليه سويتها...ومع ذلك اسف..



ارخت راسها على صدره وهي تسمع نبضات قلبه..



عبير:مابي ارجعلك..

زفر ومسح على شعرها..

فيصل:مااابي اسمع شيء..







دخلت الجناح وانصدمت باللي تشوفه..حبيب قلبها فيصل مع عبير...لمعت عيونها وقالت بحقد..





هييييييييييييييييييييء تسوووون عييييييييييب







انفزعو مع بعض والتفتو لمصدر الصوت..

فيصل:سديم !!!



سديم:عبير الدبااااا اتركي فيييسل..





طيرت عيونها..ليه تقول الدبا قدام فيصل..

عبير:من زينك يام كشه ..ولا من زين هالوجه لاعبه فيه انا اعلم سلمى اخليها تضربك..





تخصّرت

سديم:اصلا انتي غيووووره...وبسرعه راحت لفيصل و مسكت يدينه ..فييسل لي انا وببببببسسس..







مسكت راسها بيدينها ..الاعصار اجتاحها..وماصارت تشوف الا ظلام...

انتبه لها ..ابعد سديم ومسكها..





فيصل:عبير شفيك؟؟؟ومشّاها بشويش للسرير وخلاها تنسدح عليه..

طلعت منها ااه غصبا عنها..

فيصل:عبير تسمعيني ..وش تحسين فيه..ووين الالم..

فتحت عيونها وهي تغتصب ابتسامه..

عبير:خلاص راح التعب..





هز راسه بعدم اقتناع

فيصل:لا ماراح...شايفتني بزر ولا اعمى ماشوف..

مسكت ايده وقالت برجاء..

عبير:فيصل الله يخليك خلني على راحتي..



فيصل:عبير امشي معاي للمستشفى..

عبير:مو الحين..بعدين..مافين شيء الحين واالله..





فيصل:بس انا مو مرتاح..

قالت بضيقه

عبير:فييصل..





رفع ايدها وباسها..

فيصل:طيب على راحتك ياقلبي...









كانت تراقبهم ودموعها اربع اربع...

سديم:والله والله والله لاقول لامي الكبيره ياأبيـــــر الحماره الدبببا الشيييييينه

وطلعت وهي تركض..





ضحك من كل قلبه..

فيصل:ههههههه مااقول الا الله يعيني عليكم..





رفعت راسها من السرير وعدّلت جلستها

عبير:فيصل..خلاص اذا ماتبيني قول ..ماله داعي هالاسلوب انا مو راميه نفسي عليك وقلتلك بتتعب معاي وقلتلك مابي ارجعلك..



فيصل:وليه هالكلام؟؟شسويت؟؟



عبير:مو توّك قلت الله يعيني..



فيصل:انتي ليه تفسرين على مزاجك...انا متأكد انك داريه وش اقصد..انتي الظاهر ماتبيني وتتعذرين..قولي عادي..صرت متعوّد على رفضك..



وصد عنها..







مطّت بوزها وقالت بفك يرجف

عبير:شفت انك ماتبيني..



التفت عليها وصرخ..رفعت ضغطه..

فيصل:عبــــــــــير





ضمّت وجهها بيدينها وبكت..





نفخ هوى من فمّه..شلون ماقدر يمسك اعصابه..هي تعبانه..واكيد نفسيتها زفت..وتفسر اي حركه انها شفقه..







ضمّها بدون اي كلمه..وتركها على راحتها تبكي...







ارتاحت شوي..وهدت..رفعت راسها له





عبير:فيصل انت تحبني صدق؟؟؟





قال وهو يمسح اثار الدموع..ومبتسم..

فيصل:انا احب الارض اللي تمشين عليها..







ضمها وهو يداري دمعه ممكن تفضحه...ليه السعاده لحظات..ليه مكتوب عليه يعاني..ووشلون بيعيش من غيرها...

استنشق ريحة شعرها بقوه وكأنه يستمد الامل منها..وهمس بأذنها..مستحيل تتركيني..عبير مارح اخليك تروحين مني..




*****************************



الساعة الآن 11:20 PM.

Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية