حصري.. تطبيقي لعيد أمي..
 

السلام عليكم ورحمة الله وبركاته
صباح / مساء
الخيييير والأعياااد

أدري إنه من زمان عن العيد بس يمكن تعرفون فيس الكسل حق القمري

أول شي بقول لكم طريقتنا بعيد الفطر بحائل..

بعد صلاة العيد وتقريباً الساعه 7 الصبح..

يطلعون رجال الحي بالشارع ويكون مفرووووش وتقوم كل عائله ويطلعون (عيدهم) بهالشارع..
وشووو عيدهم؟؟؟هذا ياطويلات العمر بحائل نسوي صبح العيد رز ولحم ياأما مفطح أو لحم مقطع ونحطه في صحن نسميه ( صينية العيد) وتكون الصينيه كبييييره ولها قاعده..
وطبعاً كل بيت بالحي يطلع عيييييد

المهم مالكم بالطويله..إختكم في الله <<<اللي هي أنا لي ثلاث سنين وأنا اللي أسوي العيد حقنا..وطبعاً صرت أطبق طريقة أمي في تزيين العيد..

وهذا هو عيدي...على فكره تراني صورته على السريييييع قبل يطلعون فيه..

حياااكم وسامحوني على القصور..

http://www.liilas.com/up/uploads/liilas_13173953272.jpg


http://www.liilas.com/up/uploads/liilas_13173953271.jpg




وبالنسبه للطريقه::
أولاً:المفطح:

1-نغسل المفطح ونضعها بالقدر المخصص لها..ونضع عليها الطماطم والبصل المقطع ويكون بكميه كبيره مناسبه لحجم المفطح..
2-نضع عليها البهارات<<أنا أمسح على أجزاء المفطح بالكركم..
وبعدين أضيف باقي البهارات..ماعدا الملح<أنا أخليه بآخر شي قبل أسكر النار على المفطح بساعه..
3-أضيف المويه على المفطح لين تتغطى..وأخليها تطبخ على النار..لين تنضج ..

ثانياً:القرصان:

1-ناخذ جزء من مرق المفطح بعد مانصفيه ..ونحطه بقدر متوسط ونضيف له قرع مقطع مكعبات..ونطبخه لين ينضج القرع<<ماياخذ وقت..
3-نجيب القرصان<<أنا أشتري القرصان الجاهز..وأبدأ أكسره لأجزاء صغير بدون الأطراف..أضع أول طبقه بقدر جديد وأحط فوقه من مرق القرع اللي سويته..وأضيف بصل أخضر مقطع صغير مضاف له ليمون أسود مطحون..ونكرر قرصان ومرق قرع وبصل لين تخلص الكميه..
وأضع القدر على نار هااااادئه..

ثالثاً الرز..

1- آخذ الكميه اللي تناسبني من الرز..وأغسله جيداً..

2- أضعه بقدر خااااص<<<ياكثر قدوووري..
وأزين الرز من مرق المفطح ..

أخيراً:التقديم:

1-أول شي أنكب الرز في صينية العيد.
2-آخذ المفطح وأصفيه بحذر وأضعه فوق الرز..
3-أضيف القرصان على جوانب الرز..
4-أزينه بالفلفل الأخضر وممكن شرايح ليمون..

وبس بالعافيه..:peace:

.. أراااائكم تهمننننني

في أمان الله..

قموووره ماشاء الله عيدكم مبارك وجعله سعيد دايم يارب

من بعد اذنس نقلته للاطباق الرئيسيه لانه جديد وياليت تتبعينه بالطريقه عشان كلنا نستفيد

ويا ماشاء الله حلو طبعكم وعيدكم للاسف افتقدت هالعاده الحلوه هنا بجده
اتذكرفي عرعر الله يذكر ايامها بالخير كنا صباح العيد ننتقل من بيت لبيت واغلب الناس تقدم المقلقل والا مفطح ورز ولحم طبعا مع حلاوة العيد


خمس نجوم مع الشكر

زاراااا منووووره ياقمر
وعيدكم مثل عيدنا تقريباً.
وكل عام وإنتي بخييير..بعد الزحمه
منوووره


أم رنوووو تسلمييين حبيبتي ومشكوره على التقييم
وتراني أضفت الطريقه لعيووونك ياااعسل...
نووورتي