|
الظنون الحايره
الظنون الحايره
قصه بسيطه ولأول مره اجرب نفسي بالكتابه صديقه عزيزه عرضت علي الفكره حبيت انزلها لكم بمناسبة اول يوم من الاجازه واهداء مني لكل بنات منتديات ليلاس الغاليات بسم الله الرحمن الرحيم اللهم دبرنا فأنا لا نحسن التدبير رتبت الغدابا المقلط وانا في بالي واحد من الجيران توفى الله يرحمه وترك وراه اربع زوجات واموال طائله كل يوم الوليد يقول ماما عيال جيرانا بعد ما توفى ابوهم تغيرت اخلاقهم ومستواهم الدراسي ويصرفون صرف غير لما كان ابوهم عايش وكل الطلاب مستغربين منهم ومعاهم سيارات وهم صغار وكل يوم با الطلعه يركبون الطلاب معاهم ويفحطون اولادي رجعوا من المدرسه وابوهم والكل دايخ مايشوف الطريق يبي بس ياكل وينام خصوص انها فترة دراسه وجلسنا على وجبة الغداءوكنت مجتهده ان اقدم سفره لزوجي مكفاءه له على تعبه في شغله واولادي على تعبهم با المذاكره تبارك الله تناولنا وجبة الغداء واخذ زوجي يناظر لي نظرات غريبه دريت ان وراه بلا قلت خير وش عندك اليوم ما انت طبيعي ابد .. قال سلامتك لكن بقولك موضوع مشغلني قلت خير عسى ماشر لايكون احد من اهلك فيه شي قال لا الكل بخيرلكن انا قررت اتزوج انتي وش رايك ما ادري كيف بلعت الصدمه وقلت الحمدلله زواجك ولا موتك الزواج فيه رجعه وبتبقى على الاقل لعيالك لكن الموت الفراق الطويل الي مامنه رجعه قال جزاك الله خير والله شلت همك قلت لا سلامتك من الهم لاتشيل همي عيالي ضحكو ا على كلام ابوهم وانا اشوف الصدق بعيونه قالوا يمه انتي مصدقه ترى ابوي يمزح رد ابوهم عليهم انتو وش دخلكم امكم وراضيه وش محرق رزكم نفضوا عيالي ايديهم من الاكل وقاموا وانا ما صدقت ابو الوليدخلص من الغداوانااقوم ادور مكان ما ابي احد يشوفني فيه لا زوجي ولا اولادي واطلع لغرفتي واجلس قدام المرايه اكلم نفسي وش الي انا سويته علشان تكون المكافاءه زواج زوجي علي يجيب على راسي حرمه تشاركني بكل صغيره وكبيره طيب انا وش قصرت فيه ضحيت بدراستي استحملت صعوبات وظيفته من كثر غيابه في شغله انسى مرات حتى اني متزوجه لو ما اشوف عيالي قدامي غير الامراض الي صابتني من كثر ما انا ضاغطه على نفسي ما ابي احد يقول اني قصرت في تربية عيالي او حقوق بيتي وفوق هذا شماتة العذال يعني كل الصبر الي صبرته ماله اي قيمه او اعتبار لا وما شاء الله عليه شايل همي لو شايل همي ما كانت المكافاءه حرمه... خطب وحدد موعد الزواج ومن كانت الخطيبه!؟ صديقتي صديقة الطفوله والعذر انها مسكينه وخلاص فاتها القطار انها تتزوج رجل لم يسبق له الزواج وصديقتي احسن من غيرها بنكون مثل الخوات >>طيب انا وش ذنبي واذا كانت صديقتي يعني مافي با الدنيا الا زوجي انا يحل مشكلتهاتطلب ربها يرزقها بعيد عن حياتي تفرش سجادتها وتطلب الرزاق سبحانه تم الزواج واهل ابو الوليد ما سكين العصا من النص وتشجيع وانا كبيره وفاهمه والي تزوجها ابو الو ليد مسكينه تبغى الستر ما راح يجي منها شر مثل ما نسمع عن الزوجات الثانيات ومشاكلهن وجات ليلة العرس وابو الوليد ما شاء الله عطاني الحريه بكيفي اطلع معاهم للحفل والا اجلس جهزت مثل ماجهزو المعازيم القريبين وقررت اروح للعرس لكن في آخر لحظه تراجعت وش بيقولون عني الناس يااما مسكينه وضعيفه ,, والا مجنونه جايه لعرس زوجها,, يعني ماراح اسلم من الكلام في جميع الاحوال قررت اسد ها الباب واجلس عند خواتي والحمدلله والشكر واذا تزوج لاهو اول الناس ولا اخرها طلعت لأهلي والعالم كلهم طلعوا للعرس واناو خواتي سوالف وضحك ماهمني العرس لكن مع صلاة المغرب مدري وش صارلي شكلها حمى مره احس الجو حار اقول شغلوا المكيف مره اقول بردطفوه وغطوني يمكن شاربه شي بارد سبب لي حمى>>ماهي حمى عرس ابو الوليد طلعت بصلي العشاء ورحت وسكرت الباب علي يوم بغيت اطلع كفخني الباب بغى يكسر يدي نسيت اني مسكره الباب>>بالي ماهو مشغول بعرس ابو الوليد الحمدلله والشكر كلها حرمه يعني وش بتسوي بتاكلني طلعت من الغرفه وخواتي سوالف وضحك يبون يخففون عني وانا اضحك معاهم صابني نوبة ضحك غريبه قامت تصب دموعي بشكل جنوني ابي اوقف ها الدموع ماهي راضيه توقف بسم الله وش فيني وش صار لي >>ماهي دموع قهر تضحيه مالها عدد ولا خوف ان ابو الوليد ينسى ام الوليد وعيالها الحمدلله والشكر كلها حرمه وبعدين اكثر الرجال السعوديين عندهم التعدد عادي والعدل يسود كل بيوت المعددين وانا بهواجيسي نادتني اختي قالت عمي يبغاك واطلع عليه وانا اشجع نفسي لا ابكي قدامه عمي هذا من اقل خلق الله كلام اذا جلس بمجلس يقعد ويقوم بصمته يشكك الي حوله انه ابكم سلمت عليه وجلست اقهويه قال ورى ماتقهوين قلت بس ياعمي احس حلقي ناشف ولا اقدر ابلع شي ناظر وجهي وقال وانا عمتس حلقتس ماهو ناشف هذا غصة القهرالي فيتس والله يا بنتي لو يجيتس شي محد فاقدتس الا بنتك ها الضعيفه لا عندها اخت تشكي لها وخالاتها وعماتها كلن مشغول بحياته ما الها الا الله ثم انتي قليل من الرجال وانا عمتس يعدل في اول زواجه على ام عياله وبعض الحريم ماعندهن صبر بلحظة زعل تتركه لو كان لها منه مية ولد ولا يروح بينهم الا العيال وان شاء الله انتس ما تشوفين من ابو الوليد الا الي يسرخاطرتس وانتبهي لعيالتس وبنتس ولا تتركينهم وتقعدين تراقبين الحرمه وتصير شغلتس الشاغل ما انتي مستفيده غير الغبينه وتهملين عيالتس ما ودي اضيقها عليتس ولا هو انتي الي تحتاجين وصاه ياالله يا ام الوليد ان عاد دوام ليلي وسحبت عليه علشانتس وطلع من عندي عمي , قمت لغرفتي القديمه في بيت ابوي وانا افكر في كلام عمي لقيت كل كلامه حقيقي عمي قليل هرج لكن اذا تكلم كلامه يترك اثر سنين مايروح عمي صادق عيالي رياجيل مالحقهم ضيم وقهر بيدافعون عن انفسهم لكن بنتي وحيده لو بتشوف ما تكره من بتشكي له غيري ابي اناااام بسم الله وش بلا النوم ماجاني دخلت امي لغرفتي وهي تضحك علي كانت هي والوالد الو حيدين الي حاضرين العرس من اقاربي سألتني وش فيك جالسه با الحالك قلت ابد ادور النوم عيا لا يجي اليوم زعلان علي دخل ابوي ورى امي يقول وين الشيخه ام الوليد اليوم كل الرجال يمدحونها با العرس يقولون انها ما شاء الله عليها بنت الرجال سمحت لأبو الوليد با العرس وقالت له اعرس عادي اهم شي انك على راس عيالك والحمدلله انك حي ونشوفك .. وحرمه ما تاكل حرمه وانا ابوتس>>صادق يا بوي حرمه ما تاكل حرمه لكن حرمه تشرد حرمه وتضيع عوايل عيالهم شباب يطردونهم ابائهم والسبب انهم ماتحملوا وجود زوجة اب تدخل بكل امور حياتهم حتى فسحة المدرسه لازم تمر على زوجة الاب وتوافق عليها؟! بنات مثل الورد يرميهم ابوهم بحلوق شياب يبي الفكه علشان يصفى له الجو البنات صاكات عليه وعليها... والا مصير عيال جارنا الحريم تقاسموا الورث وكل وحده تتفاخرانهاما تقصر على عيالها ماديآ والنتيجه اولادهم صارو متسيبين ولا في من يردعهم عن شي ابوي وامي كملوا السهره عندي ضحك وتعليق الي صلاة الفجر وانا ماغير اتلفت بينهم الدموع الي من بعد المغرب وهي تصب مدري وش بلاها ماعاد توقف وابوي يقول وش بلا عيونك قلت مدري كنت اضحك مع البنات ومن كثر ما ضحكت دموعي ماعاد توقف قال قومي تعوذي الشيطان وصلي ودموعك هذي لا يشوفها احد بيقولون الناس بنت آلـــ.... تبكي على رجالها يوم تزوج عيب وانا ابوتس قمت تعوذت من الشيطان وصليت وقفت دموعي من بعدما خلاص صرت ما اقدر اسكرهن من كثر ماصبوا دموع وطلعت لحوش بيت اهلي اناظر في مكان كان ابوي وابو الوليد يجلسون فيه قابلت المكان وانا اتذكر جلستهم وسوالفهم دايم اجي اهلي ولا عمري التفت للمكان هذا اليوم شكل المكان احسه غير ياترى وش الي غيرك؟! طلع علي طلال ولدي قال وش عندك هنا قلت ولا شي بس بجلس هنا بشوف شروق الشمس قلت غريبه تأخرتو با العرس قال يمه نسيتي احنا اهل المعرس لازم نطلع آخر الناس والله يمه لوتشوفين ابوي كاشخ والشيبات الي انتي خابرتهن اختفن تصدقين صاير شكله فللللله بغيت ما اعرف ابوي قلت طلال ابوك قالك شي قال لا والله بس شكله مستانس جماعتنا يرفعون له والله انك ذيب ومن ها الكلام واذا قالهم ابوي ورى ما تصيرون ذيابه مثلي قعدت خششهم تلون ويدورون الاعذار صدق يمه بعض ناس مدري وش يحسون فيه ما ادري كيف تجيهم الجراءه على ها السوالف قلت وش سوالفه طلال قال يمه يقعدون يمدحون با التعدد ورجولة المعدد واذا قلت له ورى ما تجرب طلع لك الف عذر حتى لو يبرر انه خايف من حرمته عادي اهم شي يتملص من الموضوع ما ادري ها العقده ودي القى لها حل جذري اذا انا ماني قد التعدد ماله داعي احرض غيري علي شي ما اقدر اسويه .. سألته اخوانك وش سوو قال عبادي تعرفينه ما يخلي شي بقلبه رزح له كم واحد من الجماعه الي يرفعون لأبوي ابو مهند يقول لأبوي مبروك انااشهد انك رجال وسويتها رد عليه عبادي الله يبارك فيك الشهر الجاي يا ابومهند ان شاء الله انك مكان ابوي نبارك لك بعرسك الثاني ولو تشوفين وجه ابو مهند و كل ما شاف له واحد يبارك لأبوي ومستانس غثه بنغزه اهون كلمه يقولها عقبال ما تصير رجال مثل ابوي حتى ابوي تضايق منه وكل شوي يخزه ابوي بعيونه >>هذا اول الخير يا ابو الوليد وفيصل وسعوديمه حاله خاصه طلال وش فيهم اخوانك بسم الله عليهم قال يمه سلامتك لكن فيصل تعرفينه عالم ثاني ماهو مع الناس قلبه وعقله مع السياره الي وعده ابوي بيشتريها له الناس بوادي وهو بوادي من بدى العرس لين انتهى وهو على سالفه وحده كل ما مريت من جنبه ما اسمع الا سيارتي وسيارتي الي يسمعه يقول واقفه عند الباب >>الله يستر يا فيصل يا ولدي ان وعدابوك لك تصبيره لين يخلص العرس ثم يسحب عليك, وسعود يمه بغى يتناشب مع ولد اخو العروس لولا سترالله مع انهم اصدقاء وزملاءبا المدرسه .. قلت يا طلال سعود ما يغلط على احد اكيد ان هذاك متعرض له قال اكيد يستظرف هو وجهه يقول لسعود ابوك محظوظ يوم تزوج عمتي بصراحه لو يدور الدنيا ما يلقى مثلها قاله سعود الظاهر ان عمتك دارت الدنيا ما لقت يا فراس غير ابوي خساره عمتك وصلت متأخره ابوي لقى الي لو يدور الدنيا ما يلقى مثلها أمـــــــــــــي والوليد تعرفينه يرزرز عمره هو ونظارته مره قدام ابوي ومره وراه فرحان ان ابوي ساكت عنه ما كرشه ومعطيه وجه مدري متى ها الولد يعقل تخيلي يمه اليوم اول مره انتبه للوليد انه صار طول ابوي بسم الله عليه.. يمه وين الجوري عماتي يسألون عنها ليش ماجات معنا يقولون لايكون امك رفضت تخليها تجي صراحه امك ما معها حق وانت وش رديت ! قلت لهم امي ام ديمقراطيه ما تضغط على احد ياحبي لك يا طلال الجوري هي الي مارضت تروح وزعلانه علي قال ليش وش مزعلها سندريلا >>وهذا الي قاطع قلبي يا طلال يكون مصير بنتي مصير سندريلالكن بدون امير تقول انتي سبب زواج ابوي انا كم مره اسمعك تمدحين ابوي عند صديقتك وهذا هي اخذته قال يمه تدرين ان الجوري معاها حق ترى الزوجه الي تمدح في زوجها عند الحريم مثل الي توصف الحريم عند زوجها قلت طيب وش تبيني اقول يا طلال يعني اسب ابوك عند الحريم وش بيقولون عني الناس كل انسان فيه عيوب ومزايا بغيت الناس ما يشوفون مني ومن اهل بيتي الا الزين يعني هذا ذنب يا طلال قال والله ما ادري انتي ادرى وهذا شي مقدر ومكتوب مدحتي والا ذميتي يمكن لو كنتي حاطه في ابوي عيوب الدنيا تجي وحده فضوليه وتاخذ ابوي علشان بس تعرف ها الانسان صاحب العيوب ترى فيه ناس تعشق العيوب مثل ما تعشق المزايا ويصورون لأنفسهم انهم عندهم قدره خارقه على تصليح ها العيوب والمضحك انهم ينصدمون با الواقع ويرضون بها العيوب ويمشون حياتهم بعدها طلع ورجع قال مامي التفت له وقلت خيروش بعد عندك يا فيلسوف قال لا سلامتك يا باب الجنه >>لقب دايم طلال يحب يناديني فيه لكن عيونك وش فيها قلت ما ادري شكل عرق منشد ماغير تدمع وها الدمع ماهو راضي يوقف رد وقال الي فيك يمه من زواج ابوي قلت انا بنت ابوي دموعي تصب علشان ابوك اخذ حرمه كلها حرمه لا قامت ولا قعدت واذا ما اعجبني الوضع ما علي منه ومنها بيت ضمني صغيره ماهو عاجز عني كبيره بيضفني انا والمرابح <<المرابح عيالي من زمان ابوك وهومعيشني برعب ها الزواج خلاص وقوع البلا ولا انتظاره قال يمه لا تكفين الله يخلي لنا ابوي ورجع يسألني الا هو ما كلمك ولا ارسلك قلت لا من طلعت ما كلم ولا انا دقيت عليه طلع من عندي دايخ يبي ينام لحقته كنت بقوله اذا صحيت من النوم كلم ابوك تطمن عليه سمعته قبل ادخل الغرفه يردد ابيات دايم اسمعهامنه لكن ما عمرها لفتت انتباهي مثل ها المره اعوذ بالله اليوم وش فيني صايره كل شي ادقق فيه ! نسيتني علمني وشلون ابنساك في هالزمن نسيان الأحباب عادي وشلون لأمرت علي البال ذكراك وطيفك سرق مني لذيذ الرقادي وشلون لاقالوا لي الناس وش جاك من كنت في لذة منامك تنادي شلون أعيش اللي بقالي بلياك لامن غدينا كل واحد بوادي لو قلت أداوى جرحي اللي تباطاك ماكل جرح يفيد فيه الضمادي أعلنت حبك لين كلٍ تمناك غلطه وغيري من خطاي استفادي لولي مثل قلبك تمنيت فرقاك واكيد قبلك بالجفا صرت بادي حلوه عذاريبك وحلوه مزاياك حتى بيوم فرا قنا كنت هادي وكن الليالي ودها تكسب رضاك وآنا يطول مع الليالي جهادي في ذمتي ماهي غريبة خطاياك مبطي وقلبك لو تنبهت غادي سهله علي من كان مثلك وشرواك مثل الثياب يغيرون المبادي. علمني اكره ذكرياتك وطرياك وانسى من الليلة صدوق الودادي ولاني بقايل عقبها وين ابلقاك راضي ولو إن جروح قلبي جدادي وإلا القصايد جعلها من فداياك لبستها مبطي ثياب الحدادي باكر علي المخطي يدورون الأفلاك ونشوف من يصعب عليه البعادي ورجعت قبل اكلمه صادق يا طلال أعلنت حبك لين كلٍ تمناك غلطه وغيري من خطاي استفادي مر كم يوم على زواج ابو الوليدواكيد اهله فرحانين ولدهم عريس جديدوصلحوا عشا كبير ولازم اكون اول المعزومين طلعت للعشا واستقبلوني اهله وخواته بسم الله عليهم يا حياتي مصلحين تورته للعرسان حاطين حرفه وحرف العروس <<مدري وش يحسن فيه لكن الي قهرني وين حروف عيالي العشا والعزيمه والضيوف ونظرات الحريم مابين مشفق وشامت ومترقب لردة فعلي حتى ام العروس ما سلمنا من ارآهاالحكيمه تقول والله بها الزمان قليل من الرجال الي يجمع حرمتين ام العيال اذا اعرس رجالهاعليها تقعدفي بيتها وتخلي الرجال يتشبب ويشوف حياته وش تبي فيه ازين لها تنسحب من حياته برضاها بدال ماتطلع غصب عنها<<مدري كيف طلعت ها الحكمه من فمها وعيالي با الجهه المقابله كل شوي اسمعهم ينادون يمه تعالي شوفي ابوي يمه ابوي يقول توني عرفت قيمة امكم يمه شوفي يمه اسمعي يمه تعالي يمه يمه يمه... والعروس والمعازيم يسمعون لقافة عيالي وانا سارحه بعالمي ماني مع العالم بموت قهر تدرون وش الي قهرني ليش التورته مافيها حروف عيالي >>ليش مالهم حق يفرحون بعرس ابوهم مرت الايام وزوجة ابوالوليد جات في بيتي وانا وهي ما بين شد وجذب لكن انا ما علي منها كلها حرمه كل الحفر الي تحفرها لي اطمرها واعدي وهي تطيح فيها الا مره كانت تكلم تيلفون وعبادي ولدي يمزح معاها قطع الخط عليها وهي تكلم اهلها>>ذنب الي تاخذ واحد عنده عيال ودعت عليه دعوه تهد الحيل وانا اسمع واقوم عليها واثور عليها مثل البركان <<عبادي طفل وابوه مدلعه ليش ها الحقد عليه وانفجر بوجها اخذتي ابو الوليد ما قلنا شي التورته عليها حرفك وحرفه عسى مالتس حرف لا انتي ولا الي فرحوا بجيتك على قلبي ما قلنا شي كل يوم حافره حفره مالها قرار تبين تطيحيني فيها ما قلنا شي الحين تدعين على ولدي وانا اسمع انا اوريك اليوم يا ذابح يا مذبوح والحقها وهي تركض طيران لغرفتها ما عاد اشوف شي قدام عيوني الا اني بنهيها من الدنيا واطلع على الدرج وراها وسكرت الباب با المفتاح واضرب الباب ابي اكسره وكفخ با الباب حتى البيت صار يهتز كنه زلزال فجاءه لا اله الا الله ما شفت الا صوت صراخ ابو الوليد الي طيرني من الارض فوق راسي يصحيني من النوم و جنبي صينية الغداء واتلفت بسم الله وين انا قال وين انتي؟؟!!!!! في بيتك وين بتكونين يعني طلعت وانتي وعيالك جالسين على الغداء ورجعت وانتم نايمين اعو ذبالله وش ها النوم حتى الصلاه راحت عليكم اظلمت الدنيا , وانا منخرسه واناظر وراه وهو يلتفت وش بلاتس قلت لا بس شكلي حلمت حلم يخرع قال خير يا ام الحلوم وش حلمتس ها المره ثعابين والا حريم قلت مدري نسيت الحلم بس ياربي لك الحمد انه حلم ياربي لك الحمد انه حلم قال والله وجهتس ماهو وجه الي ناسي حلمه لكن لاتفسرينه ثم يزيد هبالتس كلها من نومة المغرب عندتس خبر ان النوم الي يجي بين المغرب والعشاء يجيب الخبال وبعدين انا ماقلت لك على الغدا بطلع البر موسم طيور جهزوا عدتي وطلعي واحد من الشوازن حقتي بدون رصاص بجرب رصاص جديد توني ماخذه من ابومهند قلت الله يكفينا شر ها الرجال واقوم واحمد ربي انه حلم واصحي عيالي يصلون ويذاكرون قلت له انتبه من انفلونزا الطيور لا تقول خلاص ماعاد فيه والله الدنيا تخوف قال وانتي انتبهي من انفلونزا الحريم ترى يصيب الحرمه بعقلها يبي لنا يوم ناخذك للمستشفى نتأكد من سلامتك هذا وجهي اذا انتي منتي حلمانه اني معرس والا ماهذا حالتس لايكون بعد حلمانه في ابو مهندانه مدور لي حرمه لا با لله الي راح ملح من دعاويتس قلت لا ليتها وقفت على ابو مهند قال دافع البلا حريم ناقصات عقل انتبهي لوراعينتس لاتخليني احقق حلمتس ويمكن اذا كان الصيد وافر ارجع تطبخينه والا لتس راي ثاني ترى ابو مهند قريب وده يعرس ويبي له خوي قلت لا و ش خويه الله يعافيك عقب ما صرت شايب بتدور الحريم والحين الشباب ماهم لاقين حريم علشان الشيبان لا بالله اطبخهن ولو تبي اطبخ معاهن قعود ما قلت شي وما يحتاج جب طيورك بريشهن وانا ازينهن قال ابشري بس تكفين ام الوليد اذا جيتي تنتفين الطيور تخيلي انهم حرمه ماخذها عليتس قلت اعوذ بالله الله اعلم انك تجي ما تلقى منهن شي الجلد مصلوخ والعظم مدقوق قال ما قولك انكن ناقصات عقل الانسان ماله عن الي ربي مقدره عليه الركن السادس من اركان الايمان ,الايمان با القدر خيره وشره> وانا اقول بنفسي ياربي تسامحني وتكفيني شر من فيه شروياربي انك ما تعرس يا شايبي ولا تجي حرمه تدعي على عيالي والا يصلحون لك تورته عليها حرف اسمك واسمها وعيالي لا . كلمه اخيره قبل انزل الروايه عرضتهاعلى ام الشهد ونودي وشجعوني انزلهاالله يسعدهم نودي هي الي نسقت لي الخط والا انا والله امشي بالبركه مامتي زارا ذكرت با المقلط اني بنزل قصه وتوقعت انها عن التعدد الله يحفظ لها عقلها وقلبها وانا والله ما حتى لمحت عن شي الغاليه ضمني بين الاهداب صاحبة الفكره والقصيده من اختيارها الكلمات مااضنهاا بتوفي شكري لها بس شكري راح يكون بالدعاء لهاولكم بالسعادة دنيا واخرة الله يحقق لها مبتغاها ويحقق لكم مبتغاكم طيف الأحباب سبحانك اللهم استغفرك واتوب اليك اللهم انا نستغفرك من كل ذنبآفعلناه في سواد الليل او بياض النهار في ملأ او خلاء تـــــمـــــت |
السلام عليكم
يازينك وزين قصتك والله منورة القصص كلهها الطويلة والقصيرة تدرين كلش كلش اتأثرت من الدموع التي لا تتوقف وحقدت على كل من حضر الزواج حتى العم الصامت الذي يواسي ابنة اخيه هم حقدت عليه والابو والام هم حقدت عليهم اشلون ينطيهم كلبهم يرحون لزواج رجل بتهم والله شنو عيب و واجب لا والله يولي العيب وما اريد الواجب الي يحرق قلب بنتييي الحمد لله طلع حلم والله يكفيج شر الشريكة وشر ابو مهند وشر كل من فاتهة قطر الزواج الله يسهل عليهن بعيد عن المتزوجين اما والدة العروس الحكيم هذا خبال مو عقل اشلون حجي هاي لأن هي ام الثانية لو هي ام الاولى كان شفتي الخبال على اصوله تدرين والله ضحكت على ام الوليد الي بالقصة من هواشت العروس لانها غلطت على عبادي وطلعت سالفة الكيكة الي بيهة حروف العرسان فقط هههههههههههههه حسيت الموضوع كلش مأثر بيه ههههههههههههه تعدد الزوجات رغبة لدى كل الازواج هذا لاشك فيه ولكن ليس الجميع لديهم رغبة في تحقيقه حتى من يشجع له ام الوليد والله العظيم كلش كلش استمتعت لا تنحرميني من هاي المتعة انتظرك بشوق بالتوفيق عزيزتي |
آلسلام عليكمـ..
. . . سآحة وجع...\ جيتك وبي " لفحة ظما " وأقفيت ~ وكبدي ناشفه ! اصعب كلام , أصعب خبر , | صرخه | عقب صمت ٍ طويل مثل الهدوء اللي سبق لحظة :: هبوب العاصفه :: وإنتي بـ متناول يدي ... تبدين مـــــثل [ المستحيل ] في عشرتك ( صوت العقل ) يقتل / طموح العاصفه , الحب ماهو كل شي ,, إليا وقف ( حـظٍ بخيل ) قلوبنا مثل " العسل " بس الظروف مخالفه لا للندم .. لا للعتب .. أو شي من هذا الـــــقبيل وانتي ماجا منك " خطا " حتى تقولي | آســـفه | من غير ليه .. استسلمي .. واستلهمي صبرٍ جميل ولا تسأليني وش جرى .. ؟ مالك بطول السالفه , قولي لهم يا عزوتي ماعــابنا موت النخيل .. اللي " يوافيها الأجـل " وتموت لكن واقفه , . . . آم الوليد..., لآتقولين فكرة ضمضم..آنتي من صغتي كل شي ولآ تنسبين شي لـغيركـ..ي مبدعه.., . . . وين ودانا حرفكـ ..؟ لـعنوان آخذ من الجمال شي كبير..؟ آو لـوجع يخص جانب كل انثى فينا..تشوف زوجها ملكها لوحدها وهذا حق لها..وفجئه..تأتي شريكه لها بكل شي...! . . . آيه يآ طلال ويآ فيصل ويآ الجوري..ويآ عبودي..! وين حروفنا على الكيكه...وينها ي آبوي...! [على كثر ~ [ زلّآتي . . . . . . وكثر القسآ واللين ! ‘ ‘ ‘ والله ما أوجعتك كثر منت | توجعنّي ..! . . . الـعجوز والحكمه..! آيه والله صدقتي ي الكبيره...بس خذيها مني كلمه...الي ماله اولي ماله تآلي..! . . . تدرين ي ام الوليد مافي اقسى من ان يجيك زوجك ببرود فجئه ويقول ترى تزوجت عليك..! كذا ببساطه وكأنه شي بسيط وآنتهى وماعليك فقط الا تتقبلينه..! آنا عآصرت آخوات آعرفهم معرفه عزيزه من محيطي.. ان قالت لهم هذي الكلمه بـهذي البساطه...والمنتظر منهم تقبل والا آلجدار لـروسهم=( في منهم تقبل..ومشت حياته...بتقبل الـشريكه الثانيه لـهمـ.. وفي منهمـ...بمثل بساطته في نطق هذي الجمله وحروفها البارده..حطته ورقه مشقوقه بكتاب...ومشت وتركت له كل شي... . . . آم الوليد.. مبدعه والحروف هنا من عصآرة وجع...آذا هذه بدايتك مآشاء الله تبارك الله...فـ ...كيف البقيه..=) . . . همسه لـ طيوف\آذا موحصريه لـ لـيلاس..فـ ..آسمحي لي بـنقلها ب الجوار.., . . . |
اول شي ماشاء الله تبارك الله
ثاني شي وه الحمد لله انه حلم حررررام عليس مشدوده لين ما صحاها ابو الوليييد ههههههه والله ابدعتي وللحق جيتي على الجرح تدرين احيانامن كثر ما يمزح ويقول انه بيتزوج احيانا وذاتا الفتره الاخيره احسه يقولها صادق وبكل بروود ابي اتزوج ووتراني بس اقولها من باب العلم بالشي مواستئذااان وانا اسكت واقول بقلبي ياربي لا تكتبها علي فجأه يقلبها مزح ومدري هو يجيبها مزحه برزحه والا ايش اعجبني هالبيت أعلنت حبك لين كلٍ تمناك غلطه وغيري من خطاي استفادي ان مدحناه فتحنا عيون خلق الله وان ذمينااه بعد فتحنا بيبان مسكره طيب وش السواة !!!! طيف استمتعت بقراءة كل حرف واكيد منتظرين جديدس |
أم الوليد ... نورتي منتدى " قصص من وحي قلم الأعضاء " إبداع و رب البيت إبداع أسلوب سلس يشد الواحد الصراحة كنت منصدمة حيل و وشوي بدعي على أبو الوليد بس ربج ستر و طلع حلم ... دايما أسمع " الشريكة تحر لو هي بــ القبر " و دايما الرجال عندهم شيء سهل لو قالوا بتزوج عليج أن ثرتي و رفضتي قاموا و لا عقدوا و ان رضيتي و مشيتي السالفة ما صدقوا على الله من ثاني دقيقة و هم كاتبين الكتاب و بما انج رضيتي فلازم تسكتين على طول و ينوكل حقج و حق عيالج ... و المصيبة الأكبر لما الكل يسوي نفسه يواسي و لا يمدح برجاحة عقلج و انتي من داخل شابة نار و اللي يكسر الظهر اكثر العيال لما يشوفون ابوهم راح لمرأة ثانية بيحسون بالنقص و ان امهم مالها داعي فــ أم الوليد كفاج ربي شر الشريكة و جعل عيون أبو الوليد ما تشوف غيرج و جعل قلبه ما يسكنه غيرج و بــ الأخير لا تحرمينا من هالإبداع .. .. .. |
هلا وغلا ومرحبا بطيوفه
اخييييرا شافت النور والله ماتدرين كيف استمتعت بقراءتها وكاني اقراها لاول مره جاني تكه بعدها تخيلته صدق وتخيلت هالشي حاصل لكل وحده فينا كان يطق فينا عرق بسم الله علينا من جد طيوفه اسلوبك جدا مشوق وكلماتك رائعه وسلسه رحمت دموعك هالي ماوقفت وضحكت على سالفه الكيكة فاضين لك يصفون اسم عيالك صارت سبوره هههههههه لكن بردتي قلبي يوم قمتي عليها كفو وانتي بنت ابوك واحلى شي يوم صحيتي من النوم وصار حلم وزوجك عارفك وعارف حلومك هههههه جعلك ماتذوقين حرتها ولا انا قبلك وكل من يعز علينا مبدعه طيوفه وننتظر جديدك يالغالية |
الله يخلي لك زوجك ويحفظ عيالك ويفرحك فيهم ياارب
والحمد لله انه طلع حـــــــــلم .. الا قووولي كاابوس فضيع : على قد فرحتي بقصتك الآولى على قد مااضاق خلقي من الاحداث بالبدايه بس اللي صدمني اكثر رد ام الوليد لما قالها الخبر بكل بروود وكانه يقول خبر عااادي قالت زواجك ولا موتك..!!!!؟؟؟؟؟؟؟ اصلا من يتزوج ثااانيه يعتبر الرجل من اعداد الموتى لعياله وامهم .. والله عندي يموت وهو بنظرهم مخلص وله هيبته ولايعيش وهو فاقد احترامه وخاين العشره طبعا اتكلم عن ( البعض) وهم الأغلبيه : كفو والله ام الوليد .. لما جبتي الاولي والتالي على راسهاا .. جعل راسها اللي ماني قاايله والا الكيكه اللي ماعليها حرووف خخخخخ.. بدعتي طييووفه من جد : ارجع واقووول اشوه انه حلـــــــــــــــــم والاكان صاارت علوووم : استمتعت حيل بمتابعه حروفك .. فلاتحرمينا من جديدك ود لاينضــــــــــــــــــــــب |
حراام عليش ام الوليد
والله وانا اقرا خليتيني اظن ان السالفه حقيقيه وانتي بتقولينها بس في النهايه انصدمت بس الحمدلله انصدمنااااا ولااا انه حقيقه وروحي يا ام الوليد يا جعل ابو الوليد ما يعرف غيرش من الحريم ويا جعل عيالش ما يتولاهم غيرش ولا يغير عليش مشكله كبيره التعدد .. والله يكون بعون الحريم اللي على راسهم حريم هههههههههههه اول ما قريت انه بيعرس طرت علي شخصية مناير ههههههههه حسيتها بتسوي سواتها موفقه بس بصراااحه تصلحين كاتبه اسلووبش في السرد يهبل |
السلام عليكم ورحمه الله
ابدعتي يا ام الوليد ما شاء الله عليك والله انه طاح قلبي يوم قلتي انه تزوج عليك وقلتي ياعمري والله انه الضره تحر لو هي بالقبر بس اشوى انه حلم لاعاد تنامين المغرب عشان ماتحلمين هالاحلام المزعجه بس كبرتي بعيني يوم قلتي زواجك ولا موتك ياقلبي لهالدرجه تحبينه ولا ترضين عليه وانا معك وين العدل بين الزوجتين المفروض اساميكم كلكم في الكيكه تسسسسسلم الايادي جعلنا ماننحرم وياربي يخلي لك زوجك وعيالك ويخليك لهم ولا يغير ربي عليكم نعمته |
اقتباس:
هلا وغلا ام احمد والله النور نورك والله هي محاوله بسيطه وتدرين كتبتها وبعدين تحسفت حذفتها لكن رجعتها من المحذوفات ما توقعت انها بتعجبكم ام احمد با النسبه لأبو ام الوليد بطلة القصه ترى الرجال ماعندهم ذيك الحرقه الي تكون بقلوب النساء وحقيقه سألت ابوي الله يحفظه قلت لو زوجي تزوج علي بتحضر زواجه قال اول الحاضرين ليه وش فيها اذا تزوج الرجال المقتدر ولا يقصر على بنتك ماهو مسوي غلط عكس الحريم يكون ردت فعلهم نابعه من احساس وخوف داخلي وام العروس كلا مها المشكله في الأنانيه الي نحس فيها اتجاه الاشخاص الي يخصونا هي المهم عندها بنتها وزوجته الاولى اكيد لوما وجود عيب ما تزوج عليها وهذي من النظرات القاصره الي كروه الحريم فيها التعدد خوف من ان زوجها ما تزوج عليها الا لوجود عيب يعلم الله ام احمد انه اسعدني مرورك والحمدلله يوم اعجبتكم شخابيطي بتشوفوني كل ما مرني موقف بنيت لكم عليها اقصوصه صغيره اسأل الله لك السعاده با الدارين |
اقتباس:
هلا وغلا بضمضومه لا تقولين كذا ماهو مسألت انسب شي لغيري با العكس يمكن نسيت بعض سوالفنا الي تخزنت براسي وانزلت على الكيبورد من لايشكر الناس لا يشكر الله وهذي الي يذبح ضمضم انك فجاءه تلقين نفسك على الهامش بحياة انسان انتي خليتيه محور حياتك والعذر الشرع حلل تعترضين على الشرع بغيت من حكاية الكيكه والحروف ان بعض الناس ماهو بس يلغون زوجة المعددلا حتى اولاده يلغون وجودهم حكمة العجوزضمضم طبع الاناني وياليت والله الي ماله اول ماله تالي الرجل يوم يفاتح زوجته بموضوع انه راغب انه يعددهو ماوصل الي ها المرحله الا هو بايع ومخلص يعني موافقتها تحصيل حاصل خصوص اذا مافي عذر لتعدد <<وجهة نظر تحتمل الصح والغلط ردود افعال الحريم مختلفه با اختلافهم والله اعرف وحده شخصيآ تحلف بالله يوم قالها زوجها بتزوج تقول اقدر اني اوقف زواجه لكن قلت مبروك ماهو حب فيك ابيك تعرف بس قدري والي يومك الزوجه الثانيه عنده وجاب عليهم الثالثه والاولى نفسها زوجته وهي تقول والله ماعادله في قلبي مثقال ذره الا انه مجرد ظل راجل ولا ظل حيطه وبطاقة صراف مفتوحه الابداع والله ضمضم هو وجود في متصفحي |
اقتباس:
يا هلا وغلا ام رنا صادقه ام رنا ياليت واحدهم يستغفر كثر ما يقول ابي اعرس وبعضهم يجرب بنفسه كلمة ابي اعرس يمكن الحرمه تقول روح اعرس ثم عاد يخبي ها الكلمه لو قت عازه يمكن يحتاجها عساه ما يحتاجها صادقه هم والله صارو لاينشكون ولا ينبكون متورطه متورطه معهم صنف الرجال مالهم الا انك تستعينين با السميع العليم يصلح حالك معهم والله انا الي استمعت بمروك العذب |
اقتباس:
................ هلا ومرحبا با الصبوحه منوره القصه وهذي حقيقه مثل ما قلت انه الزوج اذا صارح زوجته انه يبي يتزوج معناته خلاص اتخذ القرار وانتهى وحاصل حاصل الزواج اخبار الزوجه برغبته مجرد فقط انه ما يبي يبين للمجتمع انه خاين وحط زوجته اما م الأمر الواقع وانه الزوجه كان عندها علم مسبق بزواجه والتعدد غالبآ ما يكونو الاولاد هم الضحيه اذا كان الاب بايع والام ما عندها صبر والا الزوجه الثانيه مثلها مثلك يعني بحالة التعدد الزوجه مافي قدامهاالا الصبروالصمت الله يسلم قلبك صبوحه على ها الدعوه الحلوى وابو الوليد الحمدلله ما استعجلتي الله يخليه لعياله وبنته والشي الوحيد الي ما تقدرين تحكمين عليه با الرجل قلبه الله لايورينا حرة الزوجه الثانيه مرورك جدآ اسعدني |
اقتباس:
هلا ومرحبا ام الشهد والله يوم قلت لك اني بنزل قصه ترى كانت بسلة المحذوفات لكن كلامي لك زلة لسان والحمدلله ما كنت مفرغه سلة المحذوفات والله اتوقع مافي زوجه الا ومر على اذنهاكلمة ودي اعرس من زوجها الكيكه رمز على بداية بعدالاب عن الاولاد والدموع زميلة اختي امها تطلقت وكان لها ولد بعد طلاقها الولد اخذه ابوه وسافر من كثر ما بكت على ولدها انقطع الدمع وصار بداله دم ينزل من عيونها ام شهد القصه لازم يكون في اخرها حلم اجباري علشان تختم الاحداث وهو بس ابو الوليد الي عارف حلومي اخت ابو الوليد تقول اذا تزوج احد من معارفنا تدرين ما اشيل الا همك واقول اليوم ام الو ليد ماهي نايمه ليلها من التفكير اسعدني مرورك واذا جات في بالي فكره جديده ما راح اتردد اني انزلها |
يااااااااااااااااا ربــــــــــــــــــــي لك الف الحمد والشكر انه حلم.. >>فيس يسجد شكر..
ياااااااا انااااااااااااااااااااا كــــــــــــــرهت ابو الوليد وابغضته بغض.. يالهوووووووووووووووووووووي والله صرت ادعي عليه ان ربي ماااااايوفقه>فيس داخل جووو.. بس ام الوليد تدرين وش احلى شي ومت عليه من الضحك ومازلت فااطسه عليه من الضحك؟؟ الكيكه ام حرووووووووووووف.هههههههههههههههههه.. تروح السوالف وترجع والكيكه سالفتها سالفه..ههههههههههههههههههههههههه والله العظيم روعه يا ام الوليد تجنن ..وفيها خفة دم تجنن.. بس بقولتس شفتي طلال هذاا انا تمنيت انه قداااااامي واخنقه.. وتبريت منه كحفيد ..اجل مستانس على زواج ابوه على باب الجنه وماخذ السالفه سعه صدر.. بس الرهيب عبودي هذاا حفيد له مكانه خاصه بقلبي..هوو وسعوودي جعلي والله ما ابكيه ابـعــــــــــــــــــدي حفيدي الغالي موووري ولد اخو ام حرف شغله ..>>فيس فخور بحفيده.. وانقهرت مررررره مررره من ابوتس وامتس ..ياااااااااااا دبل تسبدي من هالمواجيب اللي تحر القلب.. والله ما احضر ولا يشوفون رقعه وجهي واجلس على سجادتي واصلي وادعي ربي انه ينصر بنتي عليهم مهوووب قلبي فضيخ ورايحه اووجب الناس جعلهم ان شااء الله مايتوجبون ولا ياخذون مني مباركه.. ام الوليد والله استمتعت فيها مره.. وبعدين ابي اعرف ليش كل الذكور بالشعب السعودي يموتون على هالطاري.؟. تدرين والله بابا لما يقول لماما خلاص بسووي لتس تقاعد ونجدد الشباااب.. احس اني بطير بالسماااااء من كثر ما انا محروقه مقهوووره واذا قعدت ارادده مثل سعود واقول مستحيل تلقى مثل هالزين كله والسناعه والجمال والخ..الخ.....قالت ماما خليه خليه يحلي ريقه بهالسوالف ..المشكله اني انقهرررررر اكثر منها ولوو مهوب ابوي كان خنقته صدق>>تعتقدون ان هذا عقوق..ههههههه ام الوليدطيووفه بانتظااااااار الابداع القادم بقوووووه,,والله تجنن.. وبالنسبه لكلامتس هذاااا اقتباس:
بالتوفيق يااقلبي. |
اقتباس:
ياحلو هالدهوة اعجبتني والله بحطها بقائمة الدعاوي من بؤك لباب السما يازارا |
طيف ,,, رووووعه ,,, تسلم ايدج على هالإبدااااع ,,,:55: من أول حرف ,, الى أخر حرف ,, استمتاع فاق الوصف ,,, ضحكتني سااالفة الكيكه ,, وحروووف عيااالج ,, بس بردتي قلبي فيها ,,, يوووم هديتي عليها ,,, وطلع انج ذاااخره لها كل بلاوييها ,, ومانسيتي لها شي ,, ليتها يووم انا ركضت ,, زلقت وتكسرررت قوايمها الأررربع >>> حشى ذبيحه ,, هههههههه ترى شوفي ام الوليد ,, كل رجااال يفكر في الزواج والتعدد ,, ولما يتكلموون ,, تراهم يشوووفون ردة الفعل ,, جااانج متسيهله في الموضوووع والا شاااده فيه ؟؟ لذلك ,, عليكم بالشد ياحريم ,, أقصد الشد في الكلام في هالموضوووع ,, موشي ثاااني ,, أدري ساااعااات تشطحووون ,,,خخخخخخخ ,, ووالله لو تشدوووون كل مافيكم ماغيرتوا رايهم في هالموضوع ,,, والهدايه من رب العالمين .. :lol: سالفتج طيف وسؤالج للوالد الله يحفظه ويخليه لكم ,, ذكرتني ,, باخوي ,, مرة سألته عن هالموضوع ,, وقلت له لو زوجي سواها والا فكر ,, ايش وجهة نظرك ؟؟ قال لي وبكل برووود ,, واخووي هذا جااد فيه كلامه ومايمزح ,, قال هذا حقه !!!!! مساكين احنا ,, ماأدري لمن نرررد الراااس اذا صااار ماصااار ,,, الله المستعااان ,, أخيرا ,, طيف ,,, الحمدلله انه حلم ,,, وحاسبي من نومة المسيان ,, أول مرة أدري انها تجيب الخبال من ابو الوليد ,, زين طلعنا بفايده من القصه ,, هههههه امزززح ,, والله كلها ,, على بعضها قمة ,,, والحلووفيها الروح الفكاهيه اللي فيها ,, مع انو الموضوووع يغم ,, خخخخخخ تحياااتي لج غلاااي ,,, |
اقتباس:
رد ام الوليد احيان في صدمه يكون ردت فعلك غير المتوقع منك وهذا كان رد ام الوليدالي كانت عارفه ان الرجل طابخ الطبخه ومخلص وكثير من الرجال برودهم با اخبار زوجاتهم برغبتهم با التعددالمبرر له الشرع حلل اربع تعترضين على شرع !!!!!! كثير من المعددين تشتتوا اولادهم وانحرفوا والله اعلم لو مات ابوهم يمكن كان حالهم احسن من حياته ردت فعل ام الوليد على الزوجه الثانيه يمكن مثل ما يقولون الشعره الي قصمت ظهر البعير يعني بمجرد ما دعت على ولدها انفجرت احب الليل احيان الاحلام بعد ما تصحى منها تكون سبب في تغيير اشياء كثيره بحياتك الله يجزاك خير على الدعوه الحلوى مروك والله هو المتعه |
اقتباس:
والتعدد الي كره الحريم هي شوفت بعض المعددين الي من يوم يتزوج يسحب على ام عياله ولا كأن مر عليه يوم واحد معها ومناير كانت نموذج لزوجات كثير وانا اعرف وحده شخصيآ مقاربه كثير لشخصية مناير وكانت زوجه ثانيه وفتره من الزمن زوجها ترك زوجته الاولى لكن ما طول ورجع لأم اولاده ربما كان السبب اسلوبها خلى زوجها يعرف قدر زوجته ام الاولى مشكوره على ها الدعوه مرورك اسعدني |
اقتباس:
هلا وغلا عبق المسأله ماهي مسألة حب والحب ماهو كل البيوت مبنيه على حب والا كان شفتي ثلاث ارباع المجتمع منهدمه بيوتهم كانهم يدورن ها الحب البيت اذا ما انبنى على مخافة الله والاحترام المتبادل بيكون ماله اساس بأي لحظه راح ينهار والحب انصح البنات لا يبنون عليه آمال بعدين ينصدمون ردت فعل ام الوليد هي عارفه زوجها انه قرروخلص والا ما جا بكل سهوله قال بتزوج وازنت الامر بما ان الزواج حاصل حاصل فتقول كلمه يتذكرها منها انها شاريه زوجها وبيتها واتوقع انها فضلت حياته مع زواجه افضل من موته وبقاءها زوجه وحيده بيكون ظل لها ومربي لأولادها والكيكه با الرغم اني حاطته رمز انها اولا خطوه بتهميش عيالها الا انه في بعض عوايل اذا تزوج ولدهم يساهمون معه في هدم بيته الاول ويصير ون احزاب ناس مع الزوجه الاولى وناس مع الثانيه واكثر خراب بيوت المعددين يكون بسبب ها التدخلات الخارجيه اسعدني مرورك عبوقه |
ماشاء الله قلت لك مشروووووووووووع كاتبه ام الوليد عقبال مانشوف الزوري امنا الروؤم
اسلوب رائع وبسيط بعيد عن التكلف هههههههههههههههه بس بجد ضحكت صدق الا قال الايخاف من العفريت يطلع له حمدالله ماهوب انا الا عند هالهوس اول شئ ناقشتي قضيه اكره الحديث عنها الا ممكن اذا انفتح الحوار فيها اترك المجلس بكبره احط عندها مليون خط احمر لاني اعتبر النقاش فيها حوار عقيم كسب ذنوب على الفاضي لكن اعجبتني رجاحة العقل ظله ولا موته حضور الاهل اقول ممكن يحضرون الرجال غصب لن العواطف حاطينه بالرف على جنب حتى لوتعاطفو مع بنتهم تظل الاصول اصول وصدق ماكل من اعرس عليها رجلها تعتبر مقصره يكون احيان هوعينه فرغه مايملها الاالتراب لكن شئ يقهرني اذا صرتي بعز المررض ويجي مثل مايقولون يحرث والله كبرتي وعجزتي خلى ابوفلان يتجدد شبابه عجزتي عجز الله ركن العدووو كلمه اخيره الا يرزق بنات المسلمين بعيد عنا ويسخر لنا ازواجنا وذرياتنا لكن عندي سووووووووووعال وتفاعلو ليش أدم دوما يستمتع بذكر الزوجه الثانيه وانهم لازم يطبقون سنة محمد صلى الله عليه وسلم حبكت تطبيق السنه هل هو ارضاء للغروره جعله الكسر |
اقتباس:
هلا وغلا مامتي زارانورتي المتصفح والله ابو الوليد نموذج لكثير من رجالنا الشرقيين الي متمسكين بكامة الشرع حلل وناسين ان بعد الشرع يقول اذا لم تستطيعواولن تستطيعوا الكيكه كانت عندي رمز واحيان الواحدمن هول المصيبه الي تجيه يفكر بشي تافه ما يهم الكثيرين مثل الحين الزوج اذا تزوج على حرمته الزوجه تترك زوجها وتمسك الكل ماهو زوجك سبب المشكله من اولها الناس مجرد جمهور متفرج با النسبه لطلال نموذج لشباب كثير خواتهم والا امهاتهم اذا كانو بها الموقف يكون الامر عادي يمر عليه مرور الكرام لأنه ما يشوف ضرر محسوس محد فاتح القلوب وشايف وش هي ضامه سعودنوعيته كثير مر علي الولد الي يتربى مع بنات يجي رده جاهز وكل شي عنده خلفيه عنه ماهو اي شي يفوته ابوام الوليد وامها نموذج لعوايل كثير يهون موقف ابوها وامها عن واحد من الجيران متزوج بنات عم شوفي كيف اذا عمك جايب بنته على قلبك انا والله الي استمعت بردك وعسى ابوك ما يشوف غير امك والرجال اذا بغى العرس با العون ما شاور يحزم امره وينفذ اللهم انا نعوذ بك من غبن الرجال اسعدني مرورك مامتي |
طيف الاحباب
ماشاء الله عليك الكلام طالع من القلب لدرجة أني قلت الشئ هذا حقيقي وبجد تعاطفت مع أم الوليد اشوى أنه كان حلم وبالذات الكيكه لازم أسم العيال حرام عليك عرسان وش هقوتك مشكورة بجد أستمتعت |
طيوفه حسيت بغصة القهر من اول مابديت اقرا
الحمدلله انه حلم اما الرجال ياحبهم لها الموضوع ياسلام كل واحد يشجع الثاني والحجه انه سنه طيب وينك عن باقي السنن والشرع حلل اربع وهما للاسف ماخذينه متعه الا من رحم ربي يمكن بنضرهم شي مباح لهم يستمتعون فيه مثل ما نستمتع بلبس الذهب والحرير ناسين شرط العدل وانه يمكن يجي يوم القيامه وشقه مايل اما بالنسبه للاب ماستغربت الصراحه في اباء هما زوجو رجال بناتهم خطبله وزوجه لاكن اش تتوقعين منه اذا هو متزوج على امها ام الوليد ااسلوب مميز بروح فكاهيه مابكاني ضحكا هو رايح للقنص ولا على باله تصدقين يام الوليد ان المراءه احيانا انها هي تنبه زوجها لها الشيء بذكرها للمميزات غيرها من النساء جنون النسا ء يظهر عند ذكر مصطلح الزوجه الثانيه وخط احمر لا مجال للنقاش فيه اما عند الرجال فهو محور للنقاش الساخن فى كل مجلس دمت بود |
اقتباس:
احيان الانسان يكبت يكبت وبعدين يجي الانفجار على شي بسيط وردت فعل عنيفه غير المتوقعه منه وهذا الي حصل مع ام الوليد ما انفجرت بوجه زوجها يوم قال بتزوج تراكمت حتى وصل الموضوع ولدها وجابت الاول والتالي ونظرت الرجال لموضوع التعدد مختلفه تمامآعنا ترى هم كل واحد يرفع لثاني ويبي من يشجعه والحرمه الي تتزوج معدد اذا ما كانت هي عارضه نفسها عليها والله ماله ذنب ندعي عليها الذنب ذنب الزوج الأناني ولا حفظ العشره مع ام عياله حسبي الله على كل واحد يغبن زوجته بدون سبب سواء زوجي او غيره ونومة المغرب منهي عنها اسعدني مرورك هاله والنقاش معاك ممتع |
اقتباس:
فعلن من الاشياء الي النقاش فيها عقيم مسألة التعدد والله في ازواج معذورين اذا عددو وفي ناس والله اول من يظلمون انفسهم هم ويقلبون حياتهم فوق تحت يتمنون انهم ما اقدمو على ها الخطوه سواء الرجل اوالمراءه مسألة ان الزوجه مقصره دائم هذي الوتر الي يعزف عليه الزوج وبعده تجي الزوجه الثانيه تصير كورال له ترددمواله سؤالك انا اقولك جوابه الرجال دايم يقولون الحرمه لا تسألها عن عمرها تراها بتكذب عليك وهم عندهم عقده اكبر من عقدة الحريم يفكر اذا تزوج انه رجع شباب والا ما لقى من يقبل فيه الا انه شخص مرغوب فيه مرورك اسعدني والبنات الله يرزقهم بعيد عن الي سبق لهم الزواج يا كثر سنن عن الرسول متجاهلينا الرجال ولا امسكو ا الا با التعدد وهم اكثرهم ابعد ما يكونون عن العدل مرورك اسعدني هتونه |
اقتباس:
مافي احد يكتب عن التعدد وحرقته مثل الحريم والكيكه على الاقل اهله راعو شعور ام عياله لكن الجمل لا طاح كثرت سكاكينه اسعدني مرورك قمم الاعالي |
مساء الزهور
ام الوليد والله وطلعتي مانتي بسهله اسم الله عليك اذا هذي البدايه فانت لك مستقبل باهر بالكتابه وخذيها من قارئه ماتعرف عدد الكتب والروايات الي قرٍأتها بداية موفقه طيف بالكتابه وبالاحساس لدرجة اني عشت مع ام الوليد الحدث والوجع من جد عيشتيني قهر الزوجه والم الاولاد ودفاعهم عن امهم خصوصا طلال وعبادي فديتهم اما اخطر شي لما بتنتف الطيور وتدق عظمها وماتبقي منها شي وكشفه لطريقة تفكيرها بصراحه هذا ابسط شي ممكن تفرغ فيه قهرها هذا غير كلامها مع نفسها ومحاولة اقناع الذات بان هالشي ماراح يضرها وفترة وبتعدي على خير فعلا لما نعيش واقع مانحبه نحاول نهون على انفسنا بالكذب وان كنا رافضينه جملة وتفصيلا بانتظار محاولاتك الثانيه طيف وموفقه باذن الله |
طيوووووووووووووفه اتعــــــــــــــــب وانا اقول رآآآآآآآآآآآآآآآآئعه ماشاء الله تبارك الله أسلوب رائع وسلس وقريب للقلب حييييل بسيط بوصف المشاعر اللي ممكن تعيشها أي وحده تمر بهالموقف الله يجبر قلب كل من مرت فيه ويبعده عن كل وحده ماتبي تمر فيه حبيت انك بعز المصيبه وضحتي ان ردات الفعل تختلف يعني وحده ممكن تصارخ وتقلب الدنيا فوق تحت ووحده تسكت وتبلع الموس ووحده تخضع بدون اي رد فعل بلحظه المصيبه لكن بعدين يبان يعني من طريقه ردة فعل ام الوليد حبيت انك جبتي كل واحد من عيال ابو الوليد وردة فعله على زواج ابوهم وحبيت ايضا حب الام المعروف يعني تقبلت كلللل شي إلا ان وحده غريبه تدعي على ولدها هنا غريزة الام تتفوووق بكثير عن غريزه الزوجه صدق من قال الضره مره الله لا يذوقها ولا لمتزوجه يارب لان مستحيل وحده وإن سمحت لزوجها يتزوج تكون راضيه لو واحد بالميه طيووفه تسلم اناملك يالغلا على القصه الرائعه واسلوبك الاروع ماشاء الله تبارك الله وبعدين لاشكر على واجب ماسويت شي فديتك ^_^ السموحه كان خاطري ارد اول وحده لكن قدر الله وماشاء فعل بالتوفيق الدائم |
اقتباس:
موضوع التعدد كل زوجه اولى تحسه بغصه منه حتى لو الامر ما يعنيها عكس الزوجه الثانيه تلقين تشجيع ماهو طبيعي كلمة الشرع حلل هذا السيف الي مسلطه الزوج والزوجه الثانيه على الزوجه الاولى ليش هي بتعترض على شرع الله طيب ربي حلل التعددولو تقولين لزوجه الثانيه وش رايك با الثالثه قومة الدنيا ولاقعدتها>>كلامي عن شي شفته ما سمعته والرجال دائمآاغلب حديثهم عن التعددوالمشكله ان اكثر الي يفتحون باب الحوار عن التعدد من الرجال الي ما يقدرون يفتحون الموضوع قدام زوجاتهم شاطر يهايط با المجالس والا في بيته يعرف وش يجيه فعلن كثير اباء زوجو رجال بناتهم احيان تكون بنته مريضه او ما تنجب واحيان هو عارف ان زوج بنته متزوج متزوج فيختار له ناس يحس ان بنته ما راح تعاني مع بنتهم ماهو شرط يكون متزوج على امها والله الزواج بسبب معذور الرجال فيه لكن متزوج كذا بس مجرد نزوه هو الي يغبن حقيقه والوصف والله يا ما بيوت انهدمت بسبت هالوصف الحرمه ما تحاسب على كلامها والرجال يسجل وراها هي تقول وتنسى وهو يطبع براسه الكلام اسعدني مرورك عزوزه دمتي بحفظ الرحمن |
اقتباس:
هلا وغلا هموسه الله يسلم قلبك وربي شهاده اعتز فيها من قارئه مميزه انتي جربي اشتغلي شغله وانتي مقهوره من شي شوفي كيف بتنجزين شغلك الاولاد دائمآ ردت فعلهم تكون اقل من البنات يا قرادة حظ الي تتزوج واحد عنده بنات والله لايطلعونها من جلدها ماهو من بيت ابوهم واذا ابتلى الانسان وهو ماله حيله يضطر دائم انه يهون الامر على نفسه والا بيموت طبع الانسان دائم يبحث للحلول مع نفسه لنفسه حتى لو هي حلول خاطئه المهم انه ما يكسر نفسه اسعدني مرورك هموسه تسلمين انتي والي دعوك |
اقتباس:
هلا وغلا بنودي مشكوره على التنسيق اي والله نودي الله يعين الي يمر في ها التجربه وخصوص الانسانه الي توقف كل شي بحياته لزوجها واطفالها ويكون هذا الجزاء لها عقوبة موت بطيئ لهابدون ذنب ردت فعل ام الوليد كانت عارفه ان الموضوع منتهي وعارفه شخصية زوجها يعني كل الي بتسويه من ثوره بيرجع على راسها تمسكت با الاهم الي هم اولادها وتركت المهم الي هو زوجه يخوض التجربه ردت فعل الأولاد بما انها قصه قصيره حبيت اختصر واوصل الفكره الاساسيه انا بقولك عن موقف لعبد الله ولدي بماان موضوع الزوجه الثانيه كثير يتكررالحديث عنه فقلت له مره عبادي لو ابوك يتزوج علي وش بتسوي قال شوفي يمه انتي وش رايك ودك والا لا قلت والله يا ولدي من يبي له عله يحطها على قلبه قال اجل هي حل من اثنين للي بتاخذ ابوي اما انها طلقه من مسدس ابوي ابومحاله الي ما يحتاج بس اضغط على الزناد والرصاصه تشوف شغلها والا ما يحتاج الوليد توه عليمي سواقه اذا شفتها تمشي بأي مكان ارسله عليها والسياره تشوف شغلها وهي وحظها شفتي يمه كيف الموضوع بسيط قلت اي والله بسيط شروع بقتل لا بالله ما قصرت والا عيالي الباقين يكرهون افتح ها السيره قدامهم الأم من خوفها من التعدد نابع من خوفها على حياة عيالها ومستقبلهم كيف وهي تسمع احد يدعي عليهم اللهم اصلح نياتنا وذرياتنا اسعدني مرورك نودي والله يعدي مناسباتكم على خير |
واااااااااااي ام الوليد ماشاء الله روايتك روعه شوقتيني اني امتظر منك روايه طويله حقا استمتعت
|
اقتباس:
الله يسلمك احلام اما روايه طويله ما اتوقع اكره الزم نفسي بشي اخاف ما اقدر اكمل اسعدني مرورك لطوف |
تستاهلين البيرق والنوماس ياام الوليد
تصدقين انشديت مع القصه وصدقت لدرجه ان قلب وقف واقول معقوله سواها؟ معقوله سواها؟ وهي متضايقه وهالفتره بعيده انا عنها اعاتب نفسي واعاتب ابو الوليد تضايقت من كثر ماصدقت روووووووووووووووووووعه شوي وقليل بحقج والاحلى انج دخلتي بتفاصيل التفاصيل اللي تغيب عن كاتبات واجد والاحلى الاسلوب المطعم بالفكاهه برغم ان الموضوع حساس حيل انا بصراحه شدتني السندريلا يوم تقول انتي السبه حسيت البنت كبرت ههههه فديتها والله يالبا الحلم اللي عيشني برعب وتضايقت منه عشانج مااتصور هالشي يصير كان انا باجي واخذ حقج من ابو الوليد هههههه نبي بالقصص الطويله قصه وحلم احلا لانج الاحلا |
يمـــــــه طيوف والله اني منصدمه حتى قعدت اقرأ القصه ع‘ـلى امي وانا منقهره
واستانست انها حلم بــــس مبدعه مبدعه مبدعه احس كأني فـِ?ـيْ مجلس واحد يقص علي قصه يعني كان اسلوبك مرررررررره قريب للقلب اتحفينا دايم |
اقتباس:
والله الرجال ما ينضمنون والاحلام ساعات نقعد تحت ثأثيرها سنين موضوع التعدد شائك والحديث فيه يطول ولازم النهايه تكون حلم والا بتكون روايه بلا نهايه اسعدني مرورك الغرنوق |
اقتباس:
يا كبر حظي كان ام غنج تسمع قصتي واكيد اني كتبتها من قلبي والا ما وصلت قلوبكم اسعدني مرورك غنوجه |
اعوذ بالله
برى وبعيد عنا وعنك طيوووووف والله القصه تعور القلب لو تخيلناها حعلك ماتذوقينها واقع يارب ياكريم الله يسعدك طيوف قلم جرئ ودخل اسوار محضوره بخياله مع نفسه وكتابتك عن نفسك كانت قريبه للقلب لاعدمنا قلمك |
السلام عليكم ورحمة الله وبركاته
مرحبا طيف ....... كاتبة واعدة ..... ذات اسلوب شيق ....... وكلمة سلسة ...... اتمنى لكي الاستمرار ... وبعد القطرة يأتي الغيث ...... الحمدالله انه حلم .........كثير من السيدات لاتريد ان يتزوج عليها زوجها او تشاركها فيه اي احد ........ ولكن عندما يقع المحظور فهي تكون بين نارين ... نار الاولاد ومستقبلهم ونار كرامتها وعزة نفسها وكبريائها ... فاذا استسلمت للامر وقالت اولادي اولي ان يعيشوا بين والدين قيل انها ضعيفة ومستكانة ويجوز لها الشفقة ولكن عدم الاخذ برايها مرة اخرى .... وممكن اولادها يحملوها ذنب زواج والدهم عليها ....... واذا اخذت موقف ودامعت عن نفسها قيل عنها انها قوية عين وانانية ولا تحب اولادها .... ولا تريد ان تضحي من اجلهم ... وايضا اولادها يحملونها ذنب تشريدهم بين والدين منفصلين ... فالزوجة الاولى في كل الحالتين مهانة وهي السبب مهما كان ... اما الزوج المزواج فلا غبار عليه لان الشرع حلل اربع ( شماعة من يريد التعدد ) صحيح ربنا عزوجل حلل واباح ولكن يحب استئذان الزوجة الاولى اولا واذا وافقت ...... وان يكون هناك سبب قوي من اجل هذا التعدد ولا يوجد مجال اخر او حل اخر الا الزواج ........ ولكن ماذا نقول فنحن مجتمع اباح للرجل بفعل كل شيئ .... ووجد الشماعة التي يعلق عليها اخطاءوه وهي المرأة .... فالمرأة هي التي تبني وهي التي تهدم ...... |
اقتباس:
اي والله برى وبعيد الله يسلم روحك وحرقة زواج الرجل على زوجته مضاعفه خصوص اذا حست نفسها ما تستحق بعد صبرها يكون هذا جزاها والله صغيره با العمر والا كبيره اسعدني مرورك |
اقتباس:
هلا وغلا من اكبر عوامل ضياع الاسر في مجتمعنا ماهو زواج الزوج لا الرجل هو الي كره المرأه با التعدد الزوجه الثانيه من يوم وافقت انها تتزوج زوجك اعرفي انك ما هميتيها لكن الملامه على الرجل الي يفرط في ام اولاده ويخليها عرضه لشفقه او التشمت قبل فتره قرأت في منتدى كلام لزوجه ثانيه وجه لها سؤال قالت في جوابها انه في يوم ملكتها زوجها طلق زوجته الاولى وان الزوجه الاولى بعد زواجه من الثانيه اتصالات والعذر اطفاله يبون يكلمونه يعني انبنى بيت على انقاض بيت لا حول ولاقوة الا بالله وهذا ما ينفي انه فيه ازواج والله زوجاتهم مالهم حل الا انهم يتزوجون عليهم والا ولد الناس ماهو مجبور انه يعيش بعذاب معاها |
طيف الأحباب رائعة القصة ويني عنك صراحة
من زمان ادور على روايات بهالرقي وقصص قلمك رشيق جذاااب فكر منطلق ممليئ بكل ما هو جميل |
الحمدلله انه طلع حلم ياام الوليد
قصه جدا رائعه بالصدفه طيوف عرفت ان لك قصه عقبال ما اسمع بالروايه الثانيه :) .. |
رد: الظنون الحايره
ام الوليد
وقف قلبي أحسبه صدق يوم شكيتي أسامي عيالك يا ربي والله ان دموعي تصب يوم انك قاعدة تشوفين مكان رجلك وأبوك بالحوش وتاليته طلع حلم لا عاد تحلمين لا لا تنامين بعد الغداااااا ابد ابد الا ماشالله عليك كملتي غداك شوفي والله حلف يمين لو يعرس ابو خالد ويحطون خواته تورته بحروفه المعاريس وانا حاضره ان لها حلين يا بأقرب برميل زباله ولا احد يذوقه ولا اقوم وأقطعه واوزعه على الشغالات والسواويق هذا قدر راعيه الكيكه ممهونة الجدف وعجوز قريح ام النصايح اقول له جيتي وجباتي الله مدام انك عاقل وتعرفين المواجيب اجل رجيل بنتس الثانيه خويتنا فلأنه اسم وجسم غرنوق ربي حاليه بس الحظ المتعومس مال عليه والله انه يشرى جوابكم. ومطابنكم دام انك عارفه وداريه وخابره بعلوم الحريم ومن هي الداخله ومن هي الطالعة وبعدين تعالي ليه يجيبه لبيتي شوف وحر جوف هذا لا بقى بي جوف ما تقطع من اللهده والضيم بصقر يطير بهم اثنينهم يومي يجئ ويومه يذلف له وبكيفهم ماهو اراعي لهم قدامي ويتبوسمون وعاد الحريم والمكايد شهادات تخصص به ياربيه والله أني اول ما قريته اقول ما يالله على ام الوليد تسولف معنا وتضحك وجاري عليه ماجرى مجيبوتن على راسه مره ومن هي صديقته وتدمع عيني ياااارب لا تكتبه على غالي ولا صديق لا تزعلن مني حريم نمبر تو الله يوفقكن وادري انهم هم الي جوكن بس غصب ماااااقدر احب زوجه ثانيه ام الوليد الله يحرم بدنك عن النار ورجيلتس. من الثانيه وانا وكل من قلبه يرجف من هالطبينه والجاره |
رد: الظنون الحايره
تسلمن أم الوليد أسلوبك جداً رائع هههههه الله لايبلانا وأخرتها حلم
بس والله حرقتها تذبح بكيت لانها صارت لخالتي زوجها تزوجها عمرها ثلاثة عشر سنه و كافحة معها وكملت دراستها وتغربت معه وتحملت أم زوجه وعسرتها وجازها انه تزوج عليها وهي عمره ثلاثين سنه وهي والد و في الأربعين بعد وفي بيتها خطب بنت خالته واتفقوا علي العريس وهي تسمع كل شئ وكل هذا عشان جابت رابع بنت مع العلم انه مات لها ثلاث أولاد يعني بكيفها تختار عقول مدري ويش تقولين ومع هذا حضرت الفرح وباركت لزوجها وتتظاهر بالفرحه وحنا نهاوشها نقول لها لا تحرين نفسك وليش تحضرين تخيلو تقول أحبه وأحب كل شئ يحبه وتحملت وصابره وعرفنا أنها مغبونه وساكته لم جف حليبها من صدرها و فطمت بنتها ماكملت خمس شهور |
رد: الظنون الحايره
ترانيم الحين انسجمت مع القصه
وبعدين وش صااار كملي |
| الساعة الآن 07:51 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية