|
جيران الهنا جيراني انا
قبل فترة مو بالبسيطه نقلت عن طريق عملي
لمدينه خارج الرياض ومن حسن حظي كان السكن متوفر بيت قديم للوالدة ورثته عن والدها الحقيقه البيت محاط من كل جهه بجيران والنعم فيهم صحيح اني ما أعرف اغلبهم بس الاكيد ماقصروا اول اسبوع مسكوني دورية ومن غدا لعشاء الله وكيلكم ماعاد قدرت امشي وبعدها كانوا يتعازموني أما على قهوة والاعلى سمره الين من شهر ونص اشترى شخص البيت المجاور لزم لبيتي طبعا الجيران تعازموه وانا في ذيك الفترة كنت مشغول بين الدوام ومشاوير اجددفي البيت الدور الثاني لاني اقترحت على الوالدة تأجره على زميل لي في العمل مصري وطبعا فاتتني الدوريه وكلمت على الوالد وعلمته قالي شل ذبيحة عليه ونفذت اللي قال ابوي ورحت لبيتهم وطلع لي الرجال وقال بنفس شينه وش تبي قلته العذر والسموحه ياجار انا فاتني واجبك وان شاء الله مافاتني الا الشر تصدقون قالي أخلص عطيته الذبيحه على فنجال قهوة ماعزمني عذرته وقلت يمكن مشغول قبل تقريبا اسبوع واجهتني مشكلة في DSL تصدقون يوم شفت المستخدمين انذهلت كانوا32مستخدم حطيت عليه رقم سري واتفاجأة اليوم الساعه اربع الفجر جار الهنا يطق الباب وبدون سلام ولا كلام يقولي ولدي عنده بحث افتح الماخوذ هذول جيراني جيران الهنا * ابي كل واحد يعلمنا وش أيجابيات الجيران وفي نفس الوقت سلبياتهم * مواقف مع جيران هنا ومواقف مع جيران بلاء ياليت تحكونا عنها * جيران كانوا لنا أهل ونقلوا عنا وش اهم ذكرياتنا عنهم خصوصا جيران الطفوله * وجيران فرحنا انهم نقلوا وافتكينا منهم ادري موضوعي ماله داعي بس ابيكم تحسون بمعاناتي |
هههههههههههههههههه
حلوه افتح الماخوذ بس والله مايستحي هالجار حتى الذبيحه ماشكرك عليها انا معاناة مع الجيييران لي عودة اذا فضيييت |
موضوع رائع
الجيران موضوع لكل شخص منا مواقف معه لي عوده بأذن الله بعد دوشت الامتحانات نسأل الله التوفيق |
ههههههههههههـ لا والله بالعكس موضوعك حلوو
وبالنسبه لـ جارك انا اشهد انه مايعرف السلوم :)..~ اجل افتح الماخوذ بدون سلام ولا كلام >>فيس يهز راسه ><"... حن جيرانا في بيتنا الاول كانوا خوالي وبيوت خالاتي يعني جيران الهنا :) وذا الحين بالبيت الجديد على يمينا جار عياله عقووبه ><" اول شي يطلعون الجبل الّي يطل على بيتنا ويتجسسون علينا اذا كنّا بالحوش والاب بكبره وعياله يجون جنب بابنا الّي صوبهم وبدون استئذان يشغلون رشاشاتهم وبنادقهم وايش عذرهم "الكلاب الّي بالجبل ازعجتهم" كثير من المرات يجيني ارق ومااقدر ادرس او ارقد من ازعاجم..يعني جيران بلا :).. يعطيك العافيه اخوي عـ الموضوع ...~ |
السلام عليكم
الحديث عن هالموضوع يطول المواقف كثييرة انا ساكنه بعماره فيها 8شقق والجيييران اشكال وانواع عندنا جاره كبيرة بالسن وساكنة لوحدها ومره جا ولدها الكبير عمره تقريبا 50وجلس عندها متخاصم مع مرته وحنا صرنا الضحية المهم مره من المرات دق علينا الساعة 2 ونصف تقريبا الظهر والناس توهم طالعين من الدوام ومستمر في الدق مما ازعجنا بشكل كبير وخفنا ان في العمارة شي بصراااحه وزوجي قام من النوم بيشوف وش السالفه وقال بلهجته الحجازية يابو فلان ادينا مفتاح الحوش الي لمك خاتمي طاح بحوشك انا غسلتوه ونظفته وخليته على الشباك وطاح بالحوش ,,,,, زوجي ارتفع ضغطه يعني ضاقت الاماكن تحطه بالشباك وقال حصل خير وعطاه المفتاح وخذ خاتمه المرصع بالاحجار الكريمة على قولته والمره الثانية نفس الضرب ورديت عليه نعم بنزره قال شرابي غسلته وطاح بالحوش حقكم قلت ابو فلان نايم بعدين ان شاء الله ولما زوجي شافه على هالحال مايستحي ولا يحترم وقت راحه الناس عطاه بالساخن وقال تراك ازعجتنا مره خاتم ومره شراب ماعندك الا هالشباك تنشر قشك فيه وعقبها تأدب وغير ان عيال الجيييران يستمرون بضرب الجرس ومافيه احد عند الباب بس عشاننا بالدور الارضي وغير المضاربات الي تحصل فيما بينهم ويجون يستفزعون بنا والادهى والامر كان ساكن واحد قدامنا وراعي شراااب عفانا الله واياكم منهم وتعالوا اسمعوا الضرب والضريب على مرته مسكينه وقدمنا عليه شكوى وطلع من العمارة كنت عايشه بخوف شديد وخاصه لما يسافر زوجي مره كنت عند اهلي وجمبهم عيال جيران اعوذ بالله شر منزل جو عند باب اهلي وضربوا ولدي وكان عمره 5سنوات بحجر على وجهه وجت الضربه عند عينه وصارت تخوف انتفخت ولونها تغييير ويروح ابوي ياجعله في جنااات النعيم ويمسك ولدهم ويضربه ضرب الا احفاده مايرضى عليهم والجار الله يهديه مسيب عياله بالشوارع ولا همه بقولكم سالفه غريبه جدا حصلت لامي الله يحفظها جنب بيت اهلي فيه شقق وكاان شباك امي يطل على هالشقق وتشوف الحوش حقهم وحنا ماشاء الله مجموعه من البنات واولاد الله يحفظهم بس كنا صغار فصارت امي تلاحظ حركه غير طبييعية في حوش الشقق من الساعة 2ليلا وتشوفهم يحفرون في هالحوش ولا تدري وش السالفة وبعد تقصي حست الامر مو طبيعي وناس مهوب صاحيين يطلعون من العمارة فشكت وبلغنا عنهم وصارت عصابة مخدارت وكان يضعون هالسموم تحت التراب الله يكفينا واياكم شرها وتم القبض عليهم والفكه من شراراهم الله لايردهم لكن فيه جيره بالمقابل تشترى جيرتهم بالذهب الله يحفظهم ويذكرهم بالخييير والا الان مستمرين معاهم رغم بعد المسافة لكن القلوب اجتمعت على المحبة والاخاء اما ذكرياات الطفولة لهم في القلب مكان كنا نجتمع معهم بالاعياااد ويوزعون علينا الحلوى والهدايا والبعض منهم يدرسون معنا في المدرسة ونسوي حفلة فيما بيننا وتجي عاد راعية العزيمة البنت الي معنا وتطق على كل بيت وتلزم علينا وهالكلام يكون الظهر وبعد العصر حنا مسنترين عندها وتعالو شوفوا الحفلة البسيطة فشافيش وحلويات بسيطه وان كشخت الوحده جابت ايسكريم بس كان لها طعم مميز ذكريات مؤلمة واخرى جميلة الله يرزقنا واياكم يالجيرة الصالحة اثار شجوني هذا الموضوع الرائع |
| الساعة الآن 01:04 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية