منتديات ليلاس - الملافظ سعد ::: أم شهوده ::: تدعوكم هنا لتعلم ( الذرابة )

‘,

السلام عليكم ..

اسعد الله مسائكم جميعآ ياليلاسيات~ http://www.vb.eqla3.com/images/smilies/rose.gif

عـاده بالمجالس سواء رجاليه او نسائيه نلاحظ بعضهم كلامه حلو .. .. يعرف يرد ويسولف ..
دائما ماتميل لهم القلوب وتحس انك ترتاح يوم تسولف له .. حتى الحريم الكبار اذا بغوا يمدحون بنت ..
يقولون "يازين كلامها" .

بين قوسين "الذرآبه"

انك تعرف ترد على كلمه موجهه لك بطريقه لبقه يعطيك الكثير من الاهميه

فيه مثل يقول "الملافظ سعد" .. وانتم تلاحظون لاشفنا احد علاقته كثيره وانسان اجتماعي
دائما ماتلقى كلامه حلو واسلوبه مع الناس يبين اهتمامه فيهم .. ودائما يقولون
"* فلان طلعه مع الناس لسانه*"

حتى هنا بالانترنت ماشاء الله بعض البنآت تحبين تقرين كلآمه وحتسيه وانت ماتعرفينهآ
.. بس لانهآ تعرف تنتقي كلامهآ وتحس ان كلامهآ موزون ومرتب ..

----\مدخل :
اتذكر يوم كنت صغيره كانت فيه كلمه تعقدني ماعرف ارد عليها .. اذا عطيت احد شي وقالي " عشتِ "
يااني اتنح مدري وش اقول .. الا ان سخر الله لي اخوي وسالته عنها ..
قام يضحك شوي بس جاوبني جواب كافي وعطاني محاضره عن "مهايط الكلام وكيف ترد عليه"

ياكثر مانسكت لاسمعنا كلمه جديده ونسال بعدهآ "وش يردوووون !" http://www.vb.eqla3.com/images/smilies/frown.gif

ماهو عيب انك ماتعرف ترد اليوم , العيب انك ماتعرف ترد عليها بكره وبعده وبعده : )

خاصه ان فيه بعض الكلمات ممكن اول مره نسمعها .. تكون من شخص من منطقه ثانيه وتختلف اللهجه
.. عشان كذا بعض المرات نكتفي بقول "الله يسلمك"
وانا اعتبرها مخرج من اي كلمه ماعرف وش يردون عليها

نبدآ نتعلم ------> ادري هذرتي وآجدهـ
1-
من الكلمات اللي كانت جديده علي واستفدت منها كلمه "لا تعبت" وهي كلمه تنقال اذا شفت احد قاعد يشتغل ويكرف

والا يشيل له اغراض http://www.vb.eqla3.com/images/smilies/biggrin.gif

فتقول له لاتعبت ويرد عليك "لا ندمت "

2-
بعد مثلا اذا احد سلم عليك وانت ماتقدر تقوم والا كنت جالس تقوله "عز الله مقامك " ويرد عليك "مقامك عزيز"

3-
طبعا من المعروف عندنا النساء ووكآد الرجآلانه عيب تقدم شي بيدك اليسار .. مثلا كاس مويا او اي غرض المفروض تعطيه باليمين
.. لكن بعض الاوقات تكون غصب تمد له باليسار او تنسى وكذا ..
فتقول للي انت مقدم له شي باليسار تقوله "شمالـ ن ماتشناك" وهو يرد عليك "شمالك يمين"
من باب التقدير والاحترام ..
4-
بعد فيه كلمه حجازيه اذا كنت عند ناس ورحت من عندهم يقولون لك "آنستنا" او "آنستونآ"

اول مره قالوها لي طبعا كلعاده الرد كان "الله يسلمك http://www.vb.eqla3.com/images/smilies/038.gif

لكن بعد ماسالت عنها صار ردها "انتوا الانس"

5-

فيه كلمة تنقال للي وصل لهم قريب من سفر , ( قرة عينك ) نرد بشوفة نبيّك .. http://www.vb.eqla3.com/images/smilies/004.gif

6-
اذا حدن قآلتس بعد العشاء بالعزايم " سفره دايمه" تقول له "هني وعافيه"

7-
من ضمن الأشياء اللي أعرفهن يقالن ----> اثرني طلعت ذربــه
مثلاً يقولك لبيه تقول لبيت حاج / أو لبى قلبك
سم / سم الله عدوك
والنعم / ماعليك زود
خطاك السو / خطاك اللاش
8-

انطــح فالكـ أو تفاول<<أي شاركنـا الطعـام

ومدري وش يردون عليها ... حنا نقعد ونبلع على طـول مهوب لازم نردhttp://www.vb.eqla3.com/images/smilies/grins.gif

أنعم الله عليــكم << تقولونها عقب ماتشبعون .. لراعي العزيمه اللي تو .. ويرد >> صحه وعافيـه
أكــرمكم الله << تقال اذا خلصت العزيمه وبغيتوا تسرون .. ويرد >> حياكـم الله
ثم خلاص اطلعوا وصكوا الباب .. خلصت العزيمـه
ايه صح نسيت صح النوووووم <<< كثير تنقآل لي <<< صح بدنك

9-
ادري ذي كلمآت بسيطه بس بعضنآمايعرفه
" ما تشوف شر " الرد " الشر ما يجيك "
اذا احد قلك على شي عندك " حلو "او شكلك حلوو الرد " تحلى أيامك "
اذا طاح شي وانكسر تقول " انكسر الشر "

زيّ أول ما كنت اعرف وش اقول لا قالوا : انعمْ الله عليكمْ http://www.vb.eqla3.com/images/smilies/Looking_anim.gif

!
بعديّنْ عرفت الرد وَ هو : ( فيه العافيه ) !

فيّه كلمه دايمْ لا دخل علينّا جدي وَ حنّا نتغدا يقولها بسّ مدري وشي هي !
لا تذكرتها جيّت وَ قلت لكمْ ..

ايّه تذكرتها , هيّ هنّهمْ وَ يردون عليّه بـ : اقرب منهمْ .http://www.vb.eqla3.com/images/smilies/biggrin.gif

. الظاهر انْ ما خاب ظني
وفيه :
* إذا كح واحد تقول له [ صحه ]
* إذا طاح شي تقول [ اسلَم ]
كفو ترد عليها "كفاك الشر" والا "كفوك الطيب"
/ إذا قال لك واحد ، [ لا هنت ] وش تقول له ؟
تقول ... ولا انـت

الكلمات كثير وردودهآ كثير

نبي نسمــع منكم الكلمات اللي تستخدمونهآ او سمعتوهآ وماتعرفون وش الرد عليها .. عشان نستفيد ونفيد

* الموضوع ارتجالي , اعذرونا على عدم ترتيب الافكار فيه وقلة المعلومات ~

ايه قبل اطلع اذا احد قالكم " عشت " ترى الرد " تعيش اياامك " <~ مانست للحين http://www.vb.eqla3.com/images/smilies/grins.gif

بقوول ختآمآ

يعني اللي ماعطاه ربي الجرأه في الحكي
اقلها يدخل على الناس بوجه بشوش ...

ويرد ردن سنع بعد هالتعب والتلوين http://forum-static.hawaaworld.com/i...s1/smile12.gif

تراه منقول بس اعجبني وعلى قولتها نص كلامي الله يسلمك ماعرف ارد عليهم

عطونا تجاربكم ياحلوين وذرابتكم