|
سؤال دائما يراودني
السلام عليكم ورحمة الله وبركاته مساء الخزامى ورائحتها بعد امطار ربيعية سؤال دايما يراودني ؟ ودائما اراه امامي في كل عائلة من الاب والام او الاخوان وفي اكثر المدارس ومن اكثر المدرسين والمدرسات السؤال هو لماذا دائما نشجع ونهدي الطالب الكسلان عكس الناجح المتفوق الذي دايما نسئله لماذا لاتذاكر لاخاك وتساعده بواجباته اي نحمله طاقه زياده عن قدرته الكسلان اذا زادت درجات الشهر هذا لك الهدية الفلانية او لو شاركت المعلمة تهديها هدية لاتقولوا تشجيع او محاولة لرفع مستواه طيب انا بكون معاكم والمتفوق جاوب شارك تفوق يمكن اكثر بس نزل درجة او ربما مانزل ماراح يلاقي اهتمام او تشجيع بقدر مايلاقي المهمل لذا تلاقي اكثر اطفالنا يفضلوا انهم كسالى على انهم متفوقين بدون تشجيع طبعا القاعدة ليست عامة ولكل قاعدة شواذ ولكن الاكثرية هكذا الاهتمام والتشجيع للمهمل بعكس المتفوق وهو يظن بنفسه اقصد المسئول سواء اب او ام او اخت او اخ او معلم او معلمة او الخ انه يفعل العكس اتمنى تفاعلكم بعد التفكير بما تفعل لاطفالك وانصاف المتفوق حتى لاينزل مستواه ولايمنع ذلك من تشجيع المهمل كلامي السابق بعد دراسه وعن مراقبة دقيقة وليس من فراغ اختكم اوركيد |
للاسف اوركيد كلامك صحيح تلاقي الكسلان مثلا لجاب بالتسعين اوه انت شاطر
والمتفوق يجيب اعلى منها ومايلاقي شيء ولو نزل مستواه درجه وحده بالرغم انه مازال متفوق يلاقي هوشه ووووووووووكلام سوا من المدرسين او الاهل لدرجة سارو يقولو انا دايما نسبتي عاليه وملاقي شيء وفلان اول مره يجيب هالنسبه وكرموه وسوله حفله قمة التحطيم صراحه ليه من شجعه حتى لونزل مستواه شوي اكيد في سبب ليه مايكون فيه تكريم وتشجيع مستمر بالنسبه للاطفال هديه بسيطه توفي بالغرض اتذكر كانت فيه مدرسه عامله حركه حلوه وهي تجميع نقاط كل ماشاركت اكثر تزيد النقاط وكل نهاية اسبوع فيه فايز حلوه هالحركه اعجبتني تخلق جو للتنافس بين الكل |
وعليكم السلام ورحمة الله وبركاته مساؤك أوركيد يا أوركيد مساؤك كادي مشكلتنا أننا نسير بالمقلوب ونظن أن هذا المتفوق ليس بحاجة للاهتمام والتشجيع كغيره خصوصاً إذا كان من هو أقل منه مستوى في نفس مرحلته وبنفس عمره وبينهم صلة قرابة ما هذا إن لم يكن شقيقه والأدهى والأمر كما قلتي أننا قد نعاقب المتفوق لو نزلت درجاته لسبب ما ولا يمكن أن نفعلها مع الكسول مهما بلغ به الأمر ولم نسأل أنفسنا قبل أن نعاقبه لم نزلت درجاته ألا يمكن أن يكون السبب نحن فالتفرقة التي نمارسها بحقه قد تجعله يتأثر ويبدأ بإهمال دروسه ليلفت نظرنا إليه أن اعلموا أنني هنا وليس فقط ابنكم الآخر وأنني بحاجة لكم كما هو أيضاً نعم الشعور بالغيرة يخلق التفوق أحياناً ولكنه قد يؤدي لنتائج عكسية على المتفوق ذاته قد تودي به إلى مالا يحمد عقباه وحينها نبحث عمن نلوم ونلقي عليه بتبعات المشكلة ونتناسى أن البشر مشاعر وأحاسيس قبل أن يكونوا عقولاً تفكر المفترض أننا إذا أردنا تشجيع المهمل الكسول لنحفزه على الاهتمام والتحصيل الجيد أن نشجع المتفوق بالمقابل على تفوقه ونميزه لذلك ونبين للجميع أنه تميز لأنه يستحق هذا التميز عن جدارة وأنه كلما تفوق أكثر نال أكثر حتى يكون دافعاً له لبذل المزيد وعدم التراجع في حال رأى تشجيعنا للآخرين أكثر منه وأن لا نقارنه بغيره من المتفوقين حين ينزل مستواه قليلاً فهذا قد يقتل الطموح في نفسه ولا نقارنه بمن هو أقل منه مستوى حين يرتفع مستوى ذلك الأقل وينزل مستواه بل نبحث في الأسباب أولاً لكي نعالجها قبل أن تستفحل ألا يمكن أن نكون نحن سببها!!!!!!!!! نحن من نرسم مستقبل أبنائنا ونحافظ عليه فهل نكون معول هدم؟؟؟؟؟؟؟؟ أتمنى أن لا غاليتي شكراً لك على هذا الطرح الراقي المميز دمت بألف خير |
يسعد مساءك اوركيييد كلام سليم وتساؤل في محله
وبتكلم عن اسلوبي مع اولادي الاول شاطر والثاني اقل منه مستوى امدح المتفوق بس امدح اللي اقل اذا تفوق اكثر واطالب الشاطر يذاكر لاخوه واكافئ على الجهد مع اخوه واتمنى اني منصفه معهم الاثنييين شكرا اوركييييد موضوع مهم وبتابع ردود البنات للاستفاده |
ياحلوين أنا معلمة مرحله ابتدائية وكلامكم جزء منه صحيح بالنسبة لي أنا دائما أميز الطالبة المتفوقه لتحفيز الاخريات حتى يحاولون تقليدها أما بالنسبة لتشجيع الطالبة الكسلانه إذا أتقنت فهذا شي طبيعي حتى تتشجع وتذاكر لان هدف العملية التعليمية هو اكساب الطالبه مهارات معينه تفيدها فلما تذاكر ولو شوي نفرح ان مستواها في تطور ونحاول نرغبها في المدرسه أضيفي الى ذلك ان الطالبه الكسلانه دائما تحد من تقدم غيرها من الطالبات يعني المعلومه اللي تستوعبها الشاطره في دقيقتين تستوعبها الكسلانه اليوم الثاني وطبعا مستحيل اطلع من الحصه قبل ماتوصلها المعلومه ولو شوي فهذا طبعا يحبط الطالبه الشاطره لانها فهمت وخلصت وتقعد تنتظر غيرها يستوعب وننتقل لمعلومه أخرى لكن مع التشجيع المستمر والهدايا يتطور مستوى الفصل بشكل عام
أما الطالبه المهملة والمتهاونه لايمكن ارحمها لان فيه فرق بين بطيئة الفهم والمهملة دمتم برعاية الله |
مساءكم نور ورحمة من رب العباد اراده / كلامك مكمل لكلامي وكلانا نسعى الى رقي مجتمعنا الى الافضل ورقي الشعوب بشبابه ام رنا / اشتقنا لك وللونك المميز حبيبتي افتقتدك وعملك مع ابناءك قريب من الصح ولكن ارى ان تتركي الاقل امتياز يعتمد على نفسه اكثر مع الشد عليه بالمدح وبالتشجيع بدون تفرقه بين الاخوين حفظهم الله لك علة قلب / نحن نتكلم عن الطالب المهمل الذي يتخذ اهماله سبب لابتزاز محبة وغيرة اخوانه منه وتشجيع اكثر من والديه ومعلميه وليس بطي الفهم خلقة شكرا لمروركم وردودكم التي اثرت الموضوع اختكم اوركيد |
هههههههههههههههه روروه بصراحه ضحكتيني
اذا كل مره بنميز المتفوق راح يصير تبلد عند الكسلان والمتفوقين دايم ماخذين حقوقهم مافيها شي اذا فرحنا في الكسلان اذا جاب درجه عاليه من باب التشجيع >> نعمه انه فكر يجتهد خخخ انا مااقول نهمل المتفوق بس اقلها اذا تفوق الكسلان نشجعه ونبين فرحتنا فيه ونكافئه عشان يتحسن ونمسك المتفوق بيننا ونقوله انت اشطر وافضل وووووو بس هالمره بنشجع اخوك عشان يصير زيك وتصيرون كلكم متفوقين لازم الكسلان يحس انه ابدع وانه افضل عشان يستمر ( انا عني عشت حياة التفوق والفرحه والمكافئه وعشت حياة الكسل والتهزيء والمحفزات ) رورو افتكر ايام المدرسه كانوا الاداره اذا بيسوون جدول حق الاختبارات يستشيرون المتفوقات والله انه قهر لانها تحطه صعب ويتناسب مع مجهودها ويروحون فيها الكسلانات افتكر ايامها اعترضت مع البنات وقلت من حق الكسلانه تسويه بمزاجها وعلى حسب استطاعتها حنا شاطرين مانحتاج بنمشي على اي جدول وبصراحه رحت استشرتم واخذت آرائهم وسويت الي يبغونه |
سلام رورو الموضوع متشعب يعني لو كافنا المتفوق يكون على جهده المبذول هم هكذا المبدعون لا يلتفت لهم الا بعد فوات الاوان لكن انا اشوفها صعب انه نساوي بينهم المهمل يبتز الاخرين بالاهمال والمتفوق لا نحقق الاشباع من المدح ويجب على المهمل المقاربه ولا التساوي لان هذه يحكمها امور كثير كشوخ كلامك كنت اعاني منه كان المتفوقات ياخذون حقهم وزياده وهم اقل منك فهما لكن هم يذاكرون انا كنت افهم اكثر لكن مااذكر رورو شكرا على الموضوع |
وعليكم السلام ورحمة الله وبركاته
صباح النور والسرور صباح الورد للجميع راح اتكلم عن نفسي وتعاملي مع التلاميذ بالصف طبعا عدد التلاميذ عندي 20 فيه مجموعه كبيره متفوقه اقدر اقول 15 طالب مستواهم امتياز ولله الحمد امم طبعا ادرسهم قرآن كريم ولغه عربيه في نهاية كل سوره من الحفظ او كل شهر من تدريس اللغه العربيه احضر هدايا على عدد التلاميذ الشاطر والي مشي حالك طبعا يكون حافز لهم واقول بكره فيه تسميع للسوره كامله والا فيه املاء واحدد لهم ثلاث او اربع اسطر من القطعه وبكذا الاقي حتى الطلاب الضعاف يحاولوا انهم يحفظوا بشكل ممتاز اسمع للتلاميذ وكل واحد ياخذ جائزته نجي للتلاميذ الضعفاء اعطيهم فرصه للحفظ والتسميع في اليوم التالي وكمان لا مانع من فرصه ثانيه وثالثه لان الهدف هو الحفظ والارتقاء بمستوى الطالب وفي النهايه الاقي ان هناك رغبه حقيقيه منهم لا خذ الجائزه طبعا انا لا ابخل عليهم واحاول اني اساعدهم واشجعهم خلال الثلاث محاولات وفي النهايه امنحهم الجائزه بعد ما اطلع كبودهم هههههه ما فيه شيء الا بعد تعب ومجهود والطريقه ناااجحه بكذا ما هضمنا حق المتفوق وشجعنا البقيه ويمكن تطبيق هذا بالبيت بين الاولاد وبس هههه الف شكر اوركيدا موضوع جميل جدا ربي يسعد ايامك انتي ومن تحبين ربي يحفظك ويرعاك |
موضوع رائع اوركيد
والله صادقه الشاطر من عيالي الله يحفظهم مريح قلبي الله يوفقه والي يبغاه انفذه له لكن الكسلان هو الي يذبحني واوجه كل طاقتي له يشغلني معه وانسى غيره ترى الام وحده يعني وش تنتبه وش تخلي والعائله يكون فيها متفوق وفيها مستواه الي وسط وفيها الي عدم وكلهم تحت مسؤلية الأم غالبآ والتوفيق من الله |
صباحكم ريح خزامى فواح في واحة ممطرة الموضوع انفهم بعدة جهات انا اقصد ان الكسلان المهمل ياخذ وقت واهتمام من العائله وتشجيع وهدايا اكثر من الشاطر لان امه وابوه ضامنينه حتى فيه اوقات يدخل بشهادته او تقريره وعيونهم رايحه على المهمل بدون تشجيع للمتفوق هو صحيح يحصل هدايا مثل ما قلتوا لكن مومثل المهمل الاهتمام والدعوى والحرص عليه اكبر فينسي في خضم ذلك المتفوق الذي ربما ياتي بشهادته وينسى ان يسال عنه لانه على قولة طيوفه مريح قلبي الله يريح قلبها عليهم كلهم بالصحه والتفوق ولو حصل المهمل تفوق بسيط تلاقي الاعمام والاخوال والخوات والكل يهديه والمتفوق يقال له مو اول مره انت دايم كذا بنتعب نهديك هنا عندنا هالقاعده قاعدة تدمير نفسية الطفل المتفوق ولا اقول اهملوا المهمل الكسلان لا ولكن يكون هناك توازن مدح للمتفوق مع تشجيع للمهمل لمحاولته للوصول لاخيه شكرا لمروركم واعتذر للتاخر بالردود والله يوفق الجميع في اختباراتهم |
| الساعة الآن 04:16 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية