منتديات ليلاس - ياوقت مهلك تراني ماشي بمهلي

العطر شاذي وكل الناس شمّامـــــــــــــــــه
والعنبر العود من ساسي ومن أصـــــــــلي

يالشاعر اللي بعد ماجفّت أقلامـــــــــــــــــه
بالدم أصبح على بيض الورق يمــــــــــــلي

الياس روحه وقلبه فاقد أحلامــــــــــــــــــه
والفكر زاهي ولكن بالعنا مطلــــــــــــــــــي

الصمت يحكي ظروفه يشرح آلامـــــــــــــــه
والبوح يخفي جروحه لو بها يدلــــــــــــــي

يوم الليالي تحب الغدر بأيامـــــــــــــــــــــــه
يوم المواجع تحط الحمل في رحــــــــــــــلي

يوم البلا صابني تصويب بأســــــــــــــــهامه
مايعرف اني قبل ماصابني مبــــــــــــــــــــلي

القلب ماله بحمله كود المــــــــــــــــــــــــامه
الحمل حملي وغيري ماحمل حمـــــــــــــــلي

سهران ليلي عجزت أغفيه وانامــــــــــــــــه
مهدور دمعي وشي بداخلي يغلـــــــــــــــــــي

ضيّع دليله وهو تحته وقدامـــــــــــــــــــــــه
الهم باقي على كبده ومايجـــــــــــــــــــــــلي

حاول يعيد الخطا ويسيّر أقدامــــــــــــــــــــه
عيّت دروبي وعيّت بالخطا رجـــــــــــــــــلي

ماعاد له طلعتن ماعاد له قامـــــــــــــــــــــه
الغم بعدي ونوح الضايقه قبــــــــــــــــــــلي

دنياه ضاقت وعاش الضيق وأوهامـــــــــــه
ياضيق وش دخّلك وانا ولا دخـــــــــــــــــلي

الوقت مايمهل اللي مرّت أعوامــــــــــــــــه
ياوقت مهلك تراني ماشي بمهـــــــــــــــــلي

ياطير غرّد وصدّح حالي أنغامـــــــــــــــــــه
غنّى بفرحه وماهو بمبتلى مثـــــــــــــــــــلي

ياطير علّا بجوه والفضا حامـــــــــــــــــــــه
ياطير ذكّر صديقي لو نسى شكــــــــــــــــلي

قله ترى البعد والصدّات هدّامــــــــــــــــــه
حبل المواصل أشدّه وارتخى حـــــــــــــبلي

أقفى وروحي بعد ماراح منضــــــــــــــــامه
يجهل ويخطي وأنا مازلت في جــــــــــهلي

يامن قتلت الهوى فيك الهوى دامـــــــــــه
يبقى يحبك وحبك هو سبب قتــــــــــــــــلي

باب المشاعر أجمّع باقي احـــــــــــــطامه
دامه تحطم وش اللي يفعله قفــــــــــــــلي

يازهرتن عطرها ريحان وخزامـــــــــــــــه
فوحي بروض الهوى في داخلي واصلي