اسمحيلي ام نواف تليقفت بس حبيت اساعد
رد الكاتبه واعتذارها عند الجيران السلام عليكم ورحمة الله وبركاته سبحان الله .. انت تريد وانا اريد والله يفعل ما يريد .. الكهربا طافيه بالمنطقه فماكو نت في بيتنا لأنه احنا وايرلس !!!! واللاب توب خلص شحنه !!! شي غريب فعلاً سبحان الله الأيام اللي فاتت الكهربا ماشيه طبيعي !!! بس اليوم قدر الله انه تطفي !!!.... والله انه البارت كان على وشك النزول .. بشوف متى الكهربا ترد .. علشان اقدر افتح لاب توبي وانزله حدي متأزمه طول الليل سهرانه على التصحيح والمراجعه وحاشني احباط مو طبيعي من سالفة الكهربا كنت ابي اشوف ردود افعالكم على البارت .. بس قاعده اصبر روحي بأنه الخيره فيما اختاره الله .. داشه من موبايلي ابلغكم واطلع ..جد اسفه بس مو بيدي |
يعطيك العافيه ام رنوش توني بحط الاقتباس
|
كلام الكاتبه قبل البارت
لسلام عليكم ورحمة الله وبركاته . البارت بإذن الله ألحيـــــــــن نازل .. أهو عبــاره عن 200 صفحــــه بالورد ..فطـــــــــــــويــــــــــــــــــــل وااااااااااااااااايد وإجتهدت وتعبـــــت عليــــــــــــه وايد .. وأنا أراجعه أمس مع أمي ..قالت لي : ليـــــــش ما تقطعيــــــنه ؟!! على بارتات لأنه وايد طويل !! :S_043: قلـــت لهــــا : أبـــــــــــدا البنات نطروا وايد , ويستاهــــــــلون ..:S_004: بنات البارت طويل , فكل وحده تقسمــــــه بالطريقه اللي تعجبـــها ..أتمنى إنكم تستمتعون بقراءته مثـل ما إستمتعت بكتابته .. كلمه أخيـره قبـل لا ينزل البارت .. حبايبي ..لأحد يرد عقـب ردي هذا إلا لما يشوف علامة إتنهاء البارت علشان ما تتقطع الأقسام أحبكـــــــــــــم وايد ***68*** |
تفضلو البارت
اقتباس:
|
[Q ]
[COLOR="Red "]التــــــابع ...[/COLOR] من كم يوم مضوا ( ليلة عرس نور ) : إختهــا قاعده تدخــل بالصاله بكل هيبة ..وشموخ العروس .. هب السعد هبايبه الأرياحِ ...يا شاريه العباد والصلاحِ يا نور يا علج والسعاده فالج .. وهبوب ريحج من ولي العالِ . هب السعد هبايبه الأرياحِ ..يا شاريه العباد والصلاحِ وشبهت نور والصباح حين إنجلا . ولا القمر بو أربعه وأثمان . هب السعد هبايبه الأرياح .. يا شاريه العباد والصلاحِ . يا مهرة عند الأجواد ربوها .. بيت رفيع ومركز عالي . هب السعد هبايبه الأرياح .. يا شاريه العباد والصلاحِ . حافظي على أخوانج يا النور جمله ..عوضتهم بالواحد الوحدانِ هب السعد هبايبه الأرياح .. يا شاريه العباد والصلاحِ شبهتها غرتها هوى سهيل بازج .. قطن يديد ما هوا الميزانِ هب السعد هبايبه الأرياح .. يا شاريه العباد والصلاح ما قدرت غير إنها تنسى زعلهم ..وتتأثـــر .. أختهــا الصغيره قاعده تتزوج ..! وعلشان ما تبجي جدام أختهـا وتشوفهــا , طلعت للحمــام ..كانت قاعده تعدل مكياجهـا ..وحاولت تتمالك نفســــها ..! لما دخــلوا حرمتيـــن .. الأولى قالت " ما شاء الله تبارك الرحمـن العروســـه ملح الدنيــا " الثانيــه " إي ما شاء الله , حتى المعرس يقولون عنه حــلو " إبتسمــــت الأولى .. وبعدهـا قالت " حتى أمهـا ما شاء الله جميله " قالت الثانيـه " إي ما كأنهـا أمهـا كأنها إختهـا " عقدت الأولى حاجبهـا وقالت " العروسه عندهـا خوات " هـزت المرأه الثانيه راسهـا وإهي تقـول " إي كأني سمعت إنه عندهـا إخت وحده ..أكبــر منهـا بوايد..! كأنهم قالوا لي إنها طافت سن الزواج ! " قالت المرأه الأولى " ليش العروسه جم عمرهـا ؟! " إطلعت بهاللحظه لولوه من الحمـام ..! طافت سن الزواج !! يعني عانس ! الحاضر : لولوه : ما أحد يدري إنه إبراهيم يحبـها .. أهو واعدهــا إنه بيتقدم لهـا , وحزتهــا لما إيي ..راح تبيــن لهم من اللي عدت سن الزواج !!!! صقـر : الهوا حلو ..! ما يشابه مزاجه ..لي متى يعني بيظلون جذي ..!! المفروض كل شي يكون محلول .. شنو ناقصهم ..؟! الحب موجود من الطرفين !!!! طق على الحاجز الموجود بالبرنده بقوه .. من مساعه يقول لروحـه إصبـر , وأهو مو قادر يصبر أكثر .. بدا يحس إنها تبي منه أشياء وايد يلقى صعوبه بإنه يسويهــا ..! فأهو ما يتصور روحـه يروح لهـا ويقـول ( ترى على فكره أنا أحبج !!! ) أو يروح يتكلم وبس ..! يكره الكلام !! وبالحالات اللي يضطر فيـها للكلام , يحس مايعرف يعبر عن روحـه بطريقه سليمـه ..! بنفس الوقت : رزان : " هههههههههههههههههههههه " كانت محاوطه جسم فجـر بقوه ..! وقالت بصوت عالي " أســرع " وفجـر ماخذه راحتهــا بالجت سكي ! ..طبعاً أثنينهم لابسين ملابس السباحه الإسلاميه الواسعه , والساتره ..مع الحجاب ! وماخذين راحتهم خاصه إنه الشباب مو موجوديـــــن .. كانت فجـــر قاعده تتوجـــــه , للشاطئ .., ولما قربت .. جت موجــه , وبسرعة الجت سكي الكبيـــــــــــره , قلــــــــــــبتهم بطريقـــــــــه مفاجئـــه .. خلت البنات اللي كانوا قاعدين على الشاطئ يصـــــــــرخون ..! صقر اللي كان على البرنده البعيــده عن تجمـــع البنات , لف وجهه لجهتهم ..لكنه بعديــن تجاهــلهم ..ظناً منه إنه الصراخ طبيعي ..حماس بنات ..! خاصه إنه مو قاعد يشوف شي من مكــانه ..! فجـــر ..بعد ما غمـــرها الماي قدرت تطـــــــلع بصعوبــه ..!! وراحت للجت ..وأقلبــــــــــته .. بعديـــــــن إستوعبت إنه رزان مو موجـوده !!! بدت تتلفت .. ما كان للبنـــــــــت أثـــــــــــــر ..! أصـــــــــــرخت " رزان " البنــــــات كانوا ساكتين بعدما شافوا فجــر تطــلع .. لكن لما صرخــــت إختـــرعوا .. وردوا يصــــــرخون .. "وين رزان ؟! " " إشصايـــــــر ؟!! " " أبيــــــــــــه " وإهني صقــــــــــر حس لما سمع صرختهم بنبرة الخوف .. فنـــــــــزل بســرعه .. و زيـــنه اللي كانت قاعده تنــزل الدرج بالشاليه علشان تتريق ..طلعت من البرنده لجهــــة البحـــر ..!!! شافت صقـــــــر يركض لجهة البنــات , وتصــروعـــت ..! وراحت وراه ..! صراخ البنات كان عباره عن تعبير للخوف .. حتى منيـره اللي كانت تتريق إطلعت للبرنده ..بس ما لحقتهم ...! فجر كانت قاعده تنادي رزان ..وتبحث عنهــا بعيونهــــا .. وبدى خيالها يصور لهـا أسوأ الصور ..إنه البنت ماتت , ولا صار لهــا شي .. بهاللحظه طلعت فيها رزان للأعلى كأنها قاعده تقاوم , وقدرت تاخذ نفس وبعدهــا ردت إنزلت .. فأهم طاحوا بمكان عميق .. غزير الماي ..لكن قرب اليال ..! صقـر وصــل للبنـــــــات , وقال بقســــــــــــوه " شصايــــــــــــــر ؟!! شالـ ..." إلتفتت لما سمع صــرخة فجــــــــــر .. وإستوعــــــــــــب اللي صار .. خاصه إنه رزان قاعده تطلع وترد تنــــــزل بالبحـــر .. صقــر على طول فصخ نعاله ..وطب بإهدومه .. رزان كانت خايفــــــــه , فإهي قادره تطلع للأعلى , تحس روحهـــا تغرق ..! بتمـــــــــــوت هذا كان إحساسهــــا ..! مر شريط حيــاتها كله جدامهــا من الخوف .. كانت تبي تصـــــــــرخ بس ما يمديـها تتكلم إلا تنـزل تحت الماي .. فجـــــــر كانت متعلقه على الجت سكي , وخايفه تقـــــــــرب من رزان .. مو عارفه شنو تســـــــــوي .. قاعده تضعف .. فكانت تبجي ..وتصـــــــرخ .. رزان تعرف تسبح , ما تدري ليش مو قاعده تسبح ..! حتى البنات اللي كانوا على اليال كانوا خايفين ..! وقفوا مكـــــــــانهم بخــوف ..! زيـــنه كانت جامده ..كانت تشوف حبيبهــــــــا اللي طب وحســـــت بتموت من الخرعــــه .. كانت بتطب وراه ..! لما شافته يطب , ويسبح بكل قوه وسرعه .. صقـر لما قـــــــرب من مكــــــــــان رزان غاص للأسفـــل , وطلعهـــا ..للأعلى ..واهو ماسكها من جهة ظهــرها , علشان ما تقاومــــه , وتحاول تتعلق فيــه , ويغرقون أثنيـــــــــــنهم .. فجـــــر كانت قاعده تبجي لما ألحيــــن ومتعلقه على الجت سكي .. الكل اللي كان على اليال كان قاعد يراقب المشهــد .. لما وصـل صقـر للجهــه اللي فيها الماي رق ..على طول شالهــــا .. ونقــلها على اليال ..وحطهـا على الأرض .. دانه اللي كان عندهــا خبره بالإسعافات الأوليــه على طول قربت من صديقتهـــا .. وعملت الأسعافات الأوليه ..واللي أدت إلى خروج الماي من فم رزان ..وإهي تكح .. والكل إرتاح ..وتنفس الصعداء .. صقـر شاف دانــه , وقال بحرص " ناخذها الطبيب ؟!! " هـزت راسهـا بالإيجاب , وإهي تقــول " أظن أحسن علشان نتأكد ..! " وأضافت " لازم نقول لأهلــها ؟! " إهني قالت رزان بصوت مخنوق " ما له داعي " زيــنه كانت تشـــــــــوف تبادل الكلام وإهي تحس بداخلهــــا غضب ..! بعد ما إنتهى الخطـــــر اللي كان مهدد حياة رزان , بغت تمــــــــــوت من الغيره ..! خاصه إنه رزان كانت بحضن صقــر , وخاصه وإهي تشــوف حرص وقلق صقـر ..! تدري إن تفكيــــــــــرها مو منطقي , وإنه كان لازم يشيلهــا علشان ينقذهـــا ..! بس مو قادره تتحكـــــــــــم بالغيـــره اللي بداخلــها ..! خاصه وإهي تسمعــه يصر ياخذ رزان للمستشفى وإهي ترفض .. شالحركات !! ويـــــــــــــع شالدلع والمصاخه شنو مافي داعي تروح الطبيب ؟!!..ولا اهو.. يعني أنا البطــــــــل !! إللي لازم ينقذهـــــــــــا ..الكل يعرف يسبح .. ولا السالفه طقت بمزاجه !! طبعاً ما يقدر يترك حبيبة القلب تعاني ..! ما قدر يتمالك نفســــه .. رمى روحـه رمي بالبحـــــــــر ..! صقـر رد إلتفت على البحـــر من غير إنتباه لزينه .. كان حاس بالغضب من إهمالهم .. كان المفروض يلبسون سترة النجاة ..! وصــرخ بفجـر اللي لما ألحين بالبحـــــــــر " فجــــــــــــر ..شــــــــــــلونج ؟! " وكمـــــــــل يصرخ " تحتاجين مساعده " فجر كانت خلال هالفتره قدرت تركب على الجت .. لكن بعدهــا ترجف من اللي صار.. بس ردت " لا ما أحتاج ..كاني ألحين راح أرد " إلتفت وإنتبه لمــــــــــــــرته .. اللي كانت تشــــــــوفه بنظــره غاضبـــه .. وغيـــــظ .. هالأيام هالنظرات دايماً تكون من نصيبـــــه ..! بالله شنو سوى ألحين .. ما سوى شي ..! طبعاً ألحين أكيـد لقت لهـا شي جديد علشان تعصب .. عطته ظهــــرها ..وتركته وإهي رايحـــه للشاليــه ..! يا سلام .. أكيد في شي جديد ألحين على القائمه ..! وأهو مشى تارك نعاله على الرمل .. لكن ببطء وبهدوء .. فأهو يبي يروح للشالـيــــه .. يسبح , ويغير ملابســـه ..! وهالمره أهو اللي ماله خلق يتكلــــــــم .. لما وصــلوا للشــاليه ..كانت منيـــره واقفه لما ألحين بقلق ..وقالت " شصايــر ؟! " وشافت هدوم ولدهــــا المبلله بالميــاه ..وقالت " ليش هدومك كلهـا ماي ؟! " توه صقـر بيتكلم لما قالت زيــنه " لأنه صقــر رمى روحــه بالبحــر , لما رزان بغت تغرق ! " كانت قاعده تتكــلم كأنها قاعده تتطنـــز !! الشي اللي إستفـــــــــز صـقـــر لأقصى درجــــــــه .. منيــــــــره ما إنتبهـــــــت , وقالت بخوف " وإشلونهــــــا البنت ؟!!! بشـــــــــر عنهــــا ؟!! " توه بيتكلم للمره الثانيــه لما تدخــلت للمـــره الثانيـــه زيـــنه وقالت بنفس النبــره " لا ما فيها إلا العافيـــه بفضــل مجهودات صقـــر اللي أنقــــــــذ رزان .." منيــره ما كانت منتبـــــــــهه للهجة زينه , لأنه ما كان في بالهــا إلا إنها تتطمـــــــــن على بنت جيرانهم بالشــاليه , واللي يعدونهــــا وحده من بناتهم ..! خذت لفتهـــــــا , وإهي تقول " لازم أتطمـــــن عليهـــا , علويه أكيـد ألحين مخترعه على بنتهـــا " ما كانت قاعده توجـه هالكلام لأحد , وأطلعت .. لما طلعت قال صقــر بصوت بارد " هالأسلوب الإستفزازي .. عدليـــــــه " زيـــنه كانت ميــــــــته من الغيــــــــــره !! مو منطقيــــــــــه تدري ..! وتدري إنه هالتصرف كان لازم يســـــــويه , بس ما تقدر تقول هالشي لقلبهــــا .. اللي كان ميــــــــت من الحره. فإهي مو ناسيه إنه كان يبي يتزوج ذيج بيوم من الأيام ..وإحتمال لما ألحين يبي يتزوجهــا ! يمكن علشان جذي صقر ما كان قادر يوقف مكانه , كان لازم ينقذهـــا ..! تكتفـــــــت وقالت ببرود " مو عاجبــك إسلوبي ..يمكن تبيني أقلد لك أسلوب رزان ؟!! " صقــر كان متــوجــه للدري . وقال ببرود " زيـنه خلاص لا تعورين قلبي بخرابيطج !! " إحتـــــــــــــرت إنه قال لهـــا زيــــــــــنه ..! فأهو طول عمره يقولها زيــن ! حتى بعد ما قالت له لا تقولي كان يقولهـا زيــن ..! ولا علشان حبيبة القلب صارت إهي ألحين زيــنه ..! شافته يصعـــــــد .. إهي ما قدرت غيــر إنها تلحقـــه .. شافته يدخــل غرفتها ..اللي ناموا فيها أمس .. وإهي دخــلت وراه .. وقالت بغيظ " قلبـــك اللي فيــــــــــه رزان ؟!! " ردت تقـــــــــول له قلبــك اللي فيه رزان !!!!! يا هالرزان اللي امدششتها بكل حرف !! ما له خلق خرابيط !! وعوار قلب ودلع ماصخ !! قال بكل جمود " ما راح تفكيـــــــــني من هالطاري !! " كره إسم هالرزان .. حس إن سمع إسمهــا مره ثانيه.. بيزوع .. كل اهدومــــــه ماي , وتوه عامل مجهـــــــود بالبحـــر .., عطته نظره إستفزازيه ..وألحين قاعده تنرفزه بأسلوبهـــا .. فصخ بلوزتــــــه .. وإهي صدت على طول , ويهـــا أحمـــــــر .. بس ردت عليه بنبـره إستفزازيه " ليش مو إنت تحب هالطاري ؟!!!! " هذي اللي تبي تطلعه من طوره .. إلتفت عليـــها وقال بنرفـــــــــزه " مو إنتي توج تقولين ما تبيــــن تتكلميـــــــن معاي ...ألحين حلا لج الكلام ..!! " إهي تدري بهالشي .. غيــــــــرتها مو مخليتهـــــــا قادره تسكــــــــــــت .. قالت ببرود " أكيــــــــــد .. يحلا الكلام أدامه عن رزان " رزان مره ثانيـــــــــــــه .. الأسم بالوقت الحالي صار وقعه على إذنه مثـــل وقع صرير الأظافر على الحائط ..! رفع إيده بعصبيـــــــــــه , وقال " قسم بالله إن قلتي إسمهــا مره ثانيه ما راح يحصل لج طيــــــــــب " دخــل الحمـــــــام وإهي معطيــته ظهــرها .. الباب كان مفتوح .. وسمعت صوت الماي مال السبـــوح .. و زيـــــــــنه تكتــــــــــــــفت وإهي تغــــــــرز أظافرهـــــــاا بزندهـــــا .. ما كانت تدري شصاير فيهــــــــا ..! كانت مستفـــــــزه لأقصى درجـــه .. وعارفه إنها مو منطقيـــه , ومع هذا مو قادره توقف .. حارتها رزان .. حارتهــا .. وقالت " ليش ما ترضى عليـــــــــها ؟!! " يحس كأنه يقــــــــولها يميـــــــــــن ..تقوله شمال .. يقولهـــا فوق ..تقــــــــــوله تحت .. طلع من الحمام , بعد ما إغتســل بطريقه سريعه ..كان حاط فوطه حول خصره .. وهو ينشف راسه بالفوطه الثانيه مر جدامها .. وما قدرت تمنع نفسها من إنها تشوف جمال جسمه الرياضي .. إحمــــــــــــر وجهها حيـــل , و وخـــرت عينهـــــا عنه .. وقال بنرفزه " اللهم طولــــــــــج يا روح " زيــنه هالكلمــــــــه إستفزتهــــــــا أكثــــر !! خاصه إنه بان عليــــــــه التنـــــــــرفز ! طبعاً معاي لازم يتنــرفز .!! طلع تي شيرت ..و بنطلون تريننج , وقال بجمود " يــلا خلصي , قولي اللي عندج ؟!!! قولي أنا غلطت بشنو بالضبط إهني !!! إني طبيت البحـر وساعدتها ولا في سبب ثاني !! " ما لفت عليــــــــــه .. بس النبــــــره اللي بصوته دلت على الغضب البارد .. لكن إهي ما كانت بوضع يسمح بمرعاة هالشي .. بداخلها كانت تتوقع إنه ألحيــن بيقول لها ترى بأخطبهــا ..! " إنت اللي قول !! ما عندك خبــر تقــوله ..أدامنـا واقفيـــن ..يـــلا قول !! " شافته يمـر جدامهــا للمنظــــره .. صقـر اللي كان يوعظ نفسـه بالصبر ..كان صعب عليــه ألحين مع هالإستفزاز ! واللي منرفــزه إنها ما كانت حتى تحاول تتكلم معاه , وألحين .. قال ببرود " إنتي اللي قاعده تحاولين تستفزيني من صباح الله خيـر ..فخلصيني عندج شي قوليـه , ما عندج خلينا نتكلم عن مواضيع اهم أدام شكلج ودج تتكلمين !! " شافته وقالت بتعالي " أدري إنك تبي تخطبهـــا ..! " ويهه كان مصدوم !! شالطاري يخطب رزان !! بعدهــا إبتســم بسخـــريه .. إن ما ردهـا شي له , بتردهــا الغيره .. وأضافت بعصبيـــه " أنا أدري إنك تحبــها " بدت تخربط ..! مل من هالكلام .. شافهـا وقال بكل صرامه " أنا قلت لج إنها بحسبـة بنات خالتي ..لا تدخلينها بحياتنا غصب " تذكرت كلام أبوهـا إنه صقـر يحب وحده .. قالت بعصبيـــه " ليش إهي مو بحيـاتنا ..ولا لما ألحيــن مو راضي عليـك أبوها السلطان ..وما راح يزوجـــــك من بنته ست الحسن والجمـال ؟!!! عقب ما أنقذتها من الغرق ..يا الفارس المغوار ؟! " طريقتهــا بعرض فكـــرتها , خلته يعصب ..ويقول " خلاص ..أنا ما أدري إنتي من وين لج هالأفكار ...؟!! أنا ما غلطت لما أنقذتهــا ؟!..و رديــــت عليج وقلت لج إنها بحسبة بنات خالاتي ..خلااااااااااص إنتهيــــــــنا " الجـــــــــــو كان متـــــــــوتر .. ردت عليــه بعصبيــــه .." لاااا ما إنتهيـ ....." لما سمعوا صـوت طفـله خايفه " عمي صقـر ..." إلتفتوا أثنينهم بتفاجأ..وشافوا الطفله الصغيره اللي إدخلت عليـهم .. تغيرت ملامحــــــــــه بقدرة قادر .. وقال فجأه بكل رقة الدنيـــا " داليـــــــا شمقعدج ألحيـــــــن ؟!! " أهو يدري إنه هذا مو وقت قعدتها بالصبح ! يبلهم ساعه ولا ساعتين .. زينه كانت بعدهـا ترجف من اللي صار من لحظات ..تحس مو مستوعبــه اللي قاعد يصير حولهـا بصوره مناسبه .. صقــر ترك زيـــنه واقفــــه , وأكمــل طريجـه لداليــا و ونزل لمستواها .. وإبتســـــم للطفله بحنان .. وقال لها برقه ..بعد ما رفع إيده وداعب خدهــا " إشفيـــج حبــوبه ؟! " زيــنه رق قلبها لما سمعت هالنبره مره ثانيــه , ولما سمعت كلمة التحبب ..! دايما ً تتفاجأ من قدرة صقر على التواصـل مع الأطفـال .. من حنــانه ..وصـبره وسعة باله .. إهي ما عندهـا هالقدره ..فإهي خجـوله معاهم , وما تعرف تتعامل .. يا رب شكثـر تتمنى تشوف هالتصرف لهـا ..! خل يعتبرها طفله ..للحظه بس .. لما طاحت نظــرتها على داليـا حست بالشفقــــه تتفجـــــــر داخلـــــــها لدرجـات ما كانت تتخيلــــــــــها .... البنت كانت ضامـــه لعبــتها بقــوه لصدرهـــا ..! وتشـوف صقـر بنظــرات مثيـره للشفقـــه !! قالت داليـا بصوت منخفض " نوسه ما تبي تنام ؟! " صقـر كان يعرف إنه نوسـه إسم العروسه اللي بيـد داليــا ..! وكان متيـــقن إنه داليـا كانت قاعده تتكلم عن نفسـها ! وقال بإهتمام حنون " ليش نوســه ما تبي تنام ؟! " زيـنه كانت تشوف المشهد كأنها مسحــوره ! وتنقـل عيـنها بين ظهـر زوجهـا وبين وجـه الطفـله المعبـــر . لما سمعت صوت الطفـله يقـول " لأنها تبجي ..وايد ..حيـــــــل " زيـنه على هالكلمه عقدت حاجبـــها !! وصقـر حس بالقلق , لكن ما حاول يبين هالشي .. وقال بهدوء " أفااااااااااااااا وليش نوسـه تبجي ؟! " نزلت داليـــا عيونهـــا ..وشـفايها كانت ترجــف .. وقالت " نوســه تقول تبي بابا إبراهيـــم " زيــنه عقـب هالكلمــــــــه اخــــــــذت نفــس عميق أقرب للشهـقه .. وعيـونهــــــا غورقت بالدموع التلقائيـــــــه ..! الشفقـــــــه على الطفلتيـــــــــن غمر قلبـــها .. وعطت صقــر والبنت ظهــرها قبل ما تبجي جدام الطفــله الصغيره ..! وأول ما عطتهم ظهـرها نزلوا دموعهــا رحمه على الطفله المحـرومـه من أبوهـا .. والأب اللي قاعد يتعالج بالخـارج ..! صقـر عقب ما قالت داليـا هالكلمــــه , ما عرف شيقــــول !! تأثـــــــــر بشـــــــــــده ..! ما كان يظن إنه هذا اللي راح تقـوله هالطفـله الصغيره ..! إلتفت على اللعــــبه اللي كانت بيدهـــا وبدى يداعب اللعبه كأنها طفله حقيقيه ..ما كان قادر يقـول شي .. بعدها رد عيــونه على الطفـله الصغيره وقال " بابا إبراهيم مشغـــول ..بس اهو يحب نوســه ويحبج ويحب دلال ..و اهو ولهــــــــــان عليكــــم " شال الطفــــله وقال بحــب " إشرايج ألحيــن نشـرب عصــير ..وبالليـــل أنا وإنتي ودلال نتصـل على بابا إبراهيم " قالت بهمـس " ونوســـه ؟! " إبتســــم وقال بهدوء " ونوســه بعد " حاوطت رقبـة صقــر بإيدهــا وحطت راسهـــا على كتفــــه .. تحــرك صقـر , ولما مر بقــرب زوجتــه قال لظهـر زوجتـه بصوت جدي " بعديـن نتكلم عن كل شي ..لما تبرديــن وأنا أبرد .." هـزت راسهـا من غير كـــلام . ما كانت تقدر تتكـــلم لأنها تدري إنها راح تبجي ..تأثــرت حيــــل .. لأنها عارفه الأب وقيمتـــه , يا رب إحفظ لهم أبوهـــم .. من اللي إسمعتـــه وتعــــرفه وإهي واثقــه ومتأكده منه ...البنت تلقى عزهـا عند أبوهـا ..لا مات أبوهـا .. وما حبت تكمـل الفكره .. كلمة هالطفله الصغيره البريئه مؤلمـــــه بالحيـل ! وذكـــرتها بحـاجتــها لأبوهـا ..مع كل اللي سواه إلا يظـل أبوهـا الحبيــب , اللي ما راح يحبـها أحد مثـله . وقت الغروب : زينــــــــــه : لجأت لمكــــــــــانهــا السري .. متسنـــــــده على الطوفه البعيــــده ..تتأمـــــــــل الغروب !! المايــه بدت تيــــي ..وإهي قاعده تشــوفهـا تجي .. بس بعد اللي صار حست روحهــا مستنفده ..طاقتهــا ..عزمــها ..كل شي كلمـــا تتذكــــــــــر شلون قفز للبحــــر علشان ينقذ حبيبتـــــــــه تحس بغليــــان .. يمكــــــــن إهي مو منطقيــــــــــه , حاشهـــا جزء من الجنـــون !! لكن منظـر ذيك الحرمه بين ذراعيـــه ..تخليهــا ..! تخليــها تحترق بنيران جنونيه .. بس خــــــلاص ما تبيـــــــــه , تبي تقعــــــد عند منيــــره .. ولا شمعنـــــــــــــه رزان !!! شمعنــــه رزان اللي تصيــــــــــر لهــــا مواقف جذي معاه .. مواقف رومانسيــــــــــه ..كأنه بالأفلام !! مره دعمتـــه وطاحت على الأرض ..واهو حاول يساعدهـا . ومره إغرقت .. ومره وقفت تضحك معاه !! لو إهي جان ما صار شي من هذا لهـــــــا ..! كل شي يصير لرزان ولصقــر , كأنهم ثنائي .. أنا مرته !!!! أنا المفروض أغرق وأهو ينقذني ..! لما وصلت لهالفكره ..اضحكت على روحها بسخريه.. وتعوذت من إبليس إكتئاب ويأس وحــزن غامـــر روحــهــا .. إتحس كأنه هالغروب اللي قدامهــا يعبر عن غروب روحهـــا .. تعبــانه منـــــــــه .. فأهو قاعد يستفــزهــا وهي ما تبي تتكــلم معاه .. ما لهـا خلق .. تحس نفسـها مستنزفـــــــــــه ..من محاولتهـا الظهـور بعدم إهتمامهـا .. سمعت تطقطق على الخشب اللي إهي متسنده عليه بظهـــرهـا .. فـزت للحظـــه .. بعدها إسترخى جسمهـــا .. عيــونها بدت تركز على الفتحه الأماميـــــه ...تنتظر تشوف القادم .... ثواني مرت .. لما ظهـــر أمـــامهــــا ...صعــــد ..وإهي شافته يصعد ..! صقر كانت تدري إنه أهو .. ما توقعت غيره .. شافته بتعابير مسترخيه .. الجو العام يدعو للإسترخاء .. مرهقــــه ..هالصفـه ملازمه لها من أول ما إنتقلت لبيــته .. صقــر تأمــــل زوجتــه اللي متسنــــــــــــده على الحيطه البعيده ..ما جا لهــا إلا بعد ما هدى ..فأهو كان يدري إنها إهني من أول ما جت ..! لكن ما كان يقدر يتفاهــم معـاها من غير لا ينرفز عليـها ..كان غاضب منهـا , وإهي غاضبه .. وصارت وايد أشياء بينهم ..وتراكمت .. قال بصـوت جامد " أظن هديتي ...ألحين نقـدر نتفاهــــم " ردت عيــونها لوجهه وعلى تعابيـــرهــا إسترخاء مو طبيعي .. غلطان .. وخرت عيـنها عنـه . قالت بصوت منخفـض " ما طلع كل اللي بقلبي " إبتسم إبتســامه جانبيـــه ..! وقال بصوت صارم " بس علشان نكون واضحين مع بعض .. أنا ما قط تقدمت لهـا ..ما أدري منو قايل لج هالكلام , بس اللي قايل هالشي جذاب " ما تبي تتكلم عن هالموضوع ! ما صدقت تسترخي شويه .. تبي تبجي من التعب !! بجي الإرهاق .. غريب شلون بعد الإنفجار أثنينهم قاعدين يتناقشون بهدوء .. بس مع هذا قالت بكل صراحه " إهي قالت !! " تفاجأ وبان هالشي على ويهه بانت على ويهه الصدمه , وإهي شافت هالشي .. صقر ما توقع إنه رزان البنت اللي يعرفونها من الصغر على إنها خجوله ..تقول هالكلام ! غريب ليش تكذب !!! حس بغضب شديد من هالوقاحه ..ما كان ناقصه تصرفات مراهقـــه !! وبعدهـا قال بهدوء وبثقـه " يمكن فهمتيها غلط ..أو كانت قاعده تتغشمــر " لأنه ما يتصور إنه في وحده تطلع كلام مثـل هذا !! وما في سبب يخليها تكذب ..ولا في.. ؟!! زينه كانت تشوف ويهه , لكن ما في أي ردة فعل .. قالت زينه لما سكت " لأ أنا فاهمتهــا صح " بدت تحس إنه إحتمال تكون رزان كاذبه !! هــز راسه بعدم إهتمام ..وقال بهدوء وثقـــه " ما أدري شنو بينج وبينهـا علشان تقول هالكلام , بس أنا ما قط تقدمـت لهـا , وإذا تقدمت لهـا ما راح أستحي إني أقول ..فهالشي مو عيب ولا حرام ..حتى لو على قولتج إنرفضت !! " وخــرت ويهها عنـه .. تدري إنه ما راح يستحي إن كان متقدم !! فليش قاعد ينكــر ! بس إهي تذكر شكثر أهو كان معجب في رزان !! قالت بصوت غريب " إنت كنت معجب فيـها " لما ألحين هالشي اللي كان من سنين تذكره ..! هالشي اللي يتمنى إنه يمحيـه من ذاكرته .. ما كان يبي يتناقش بهالسالفه !! قال بهدوء " كان ..بس إعجاب عادي ..يمر فيـه أي واحد ..لما كبرت نسيــته " وأضاف " ما راح أتزوجهـا , ولا راح أتقدم لهـــا ..ولا أبيهـــا ...إرتحتي ؟! " غطت ويهها بإيدهــــــــــا .. رزان لهـا مليون عذر للكذب ! فأهم ما يواطنون بعض من زمان ! الثقه اللي قاعد يتكـــلم فيــها ..خلتها تصدقه ..ودهــا لو تسجل كلامه وتسمعه حق الخايسه اللي إسمها رزان .. بس يعني ألحين لازم تفكر بالبنات الباجي ..! منو اللي راح يتزوجهـا ؟!! بس على الأقل إطلعت رزان منهـــا ؟! يا رب شنو هالعذاب معاه !!! شنو هذا ؟! قال فجأه وبنبره غريبه " أنا كنت متقدم حق وحده أول , وإنرفضت من أبوهـا ..تبين تعرفيــــن منـــو ؟! " إرفعت راسهــا بطريقه مفاجـئه .. وقلبهـــــا يطق بتـــــــوتر وخــوف ..هالبنت أكيد اللي كان قايل لها عنهـا أبوهــا .. منو هذي اللي خلت صقر يتقدم لهــا !! قالت بمحاولة الظهور بمظهـر القويه " إهي وحده من البنات الموجوديـن ألحين بالشـاليـه ؟! " هز راسـه بالنفي ..وقال " تبيـني أقولج منــو ؟! " إهي ما تبي تسمـــــــع الأسم علشان ما تذبح هالإنسانه .. فقالت " وحده من بنــات عمك ..أو من بنات عماتك ؟؟!!! " هــز راســه بالنفــي .. خــــذت نفــس عمــــــــــيق ..! قال بهدوء " ألحيـــــــن أقـــــولج إسمهـــا ؟!!! " ما تبي تعـــرف .. ما تبي تعــــــرف أدامهــــــا مو من هذيــــــــــله فخــلاص معناتهـا إنه ما يشوفهــا .. ومعنــاتها إنه الخطبـه ما كانت عن حــــب .. وهذا اهم شي .. وكلامه معنــاته إنه مو خجـل يتكلم عن إنه خطب , وإنرد ..وهالشي يعزز من صحة كلامه .. هـزت راســـها بالنفــــــي .. وقالت " لأ " وأضافــــــت " لأ ما أبي أعـــــــــرف ..ما أبي أعرف هذي اللي كنت خاطبهـــا " أهو أساساً كانت متردد يقـولهــا !! متردد يقولهـا إنه أبوهـا أهو اللي ردهـــــــم .. ما يبي يخــرب شكـــل أبوهــا , مو علشان خالد ..! علشانهــا إهي ..! يدري إنهـا راح تنهـار إن عرفت عن أبوهـا !! أبوهــــا حرمهــا وحرمــــه من إنهم يكونون شريكيـــن بهالحيـاة .. خلق بينهم مشاكل ..وعذبهــــــــم . مو لشي غير إنه ما كان متصور إنه واحد مثــله ولد ناصر ..يتزوج من بنتـــه !! إهي كانت تحبـــه بذاك الوقــت وألحيــــن , كانت تعشــقه , وكان يعشقهــــا , يا ترى إن عرفت إن الخلاف ذاك اليوم كان بسبب الرفض شنو بيكون ردة فعلها .. الجنون اللي أصابه ذاك اليوم واللي خلاهـا تهــرب منـه للزواج من رجل ثاني ..كان بسبب إنه أبوهـا حرمهم من فرصة العمر .. يا ترى شلون راح تكون نفسيــتها .. أبوهـا بذاك الوقت ..كان يعاقبــه و ويعاقبــها. لكن الله ردهـــــــــم لبعــض , الله كاتبهم لبعض ..! يكره خالد من زمان ..وإكـــــــــــــــرهه أكثر , من أول ما عرف إنه زيـــــــــنه كانت تحبـــــــه , ومع هذا إرفضه , وزوجهــــــــــا من غيره .. إن إطلبت مره ثانيـه تعرف اهو لمنـو تقدم راح يقـولهـا ؟! بيجاوب ..ويمكن ما يجاوب ..بيترك هذا للزمــن .. قال بهدوء " خلاص ما راح نتكلم بهالموضوع " زيــنه توترت فجــأه ..بعد ما إنتهوا من هالموضوع , وشافته لما ألحين واقف ..! ليش واقف لما ألحين معاها !! وتوترت أكثـر لما إستوعبت المواضيـع الثانيـه اللي بينهم ..! ما تبي تتكــلم .. وما راح تتكلم عن إنه الأول بحيـاتهـا ..ولا عن إستسلامهــا له.. ما راح تقول ولا شي ! الرعب غمـرهــا ..لما شافته يدخــل لمكــانها السري .. وقالت " خلاص أوكي مصدقتك ..خلني بروحي لو سمحت " ما رد عليهــا ..أهو تركهـا المده الكافيـه لهم .. زيـنه كانت تشوف وجــوده بداخل هالمكان الخاص فيـها ..وبهالتصرف ..ما راح ترد تشــوف هالمكان خاص فيـــها .. ما تبي يرتبط هالمكان فيــه !! وفي جروحـــه .. وبكلامــــــــــــه القاسي .. الألم خانقــــها منــــــه ....! وقالت بصوت ميــــت ويآئس " لا تدخــــــــــــل ..." لكن دخـــــــــــل وفرض روحــــه على مكـــــــــــانها الخاص ..شافته بنظرة يأس ... أضافت " روح ...إطـــــــــــلع من مكـــــــاني " صقر ما رد عليــــها ودخــل أكثـــر ... وتســـــــــند على الحائط الجانبي ..بحيث يسد عليـها طريق الهـــرب إن كانت تبي تهرب .. ووجهه مقابل جهة البحــر , فإهي ما تشوف إلا شعـــره .. صقـر اليوم الفجـــر مكتشـــف شي له وقـــــــع القنبـــله عليــــه !! وإهي طول اليوم قاعده تتجنبــــــــه ..ومو راضيه تسمعه ..! تهــــربهـــا منــــه قاعد ينــــرفزه .. خلاص المفروض ألحين يكونون على احسـن وجـه ..! تغاضى عن الأسلوب ..و راح يتغاضى عن وايد أشيـاء ..مثل إنها تزوجت رفيـجه ..وإنها كانت مستعده تستمـر معاه .. قبل لا يتناقشون بهالموضوع مره ثانيه .. قال بهدوء "طلعتي حرتــــــــــج وألحيــن صار وقت التفاهـــم " إهي ما تبي تتفاهــم على شي .. خايفــــــــــه منـــه .. وشلون أصلاً تسامحــــــه ..؟!! على كل اللي سواه ..! لكن ما تقدر تروح , حتى وإن كانت تبي ..!!! صقـر صار بدايـة الغروب .. يالله شكثـــــــــر المكـــــــــــان حـــــــلووووو .. يساعد على الإستــرخاء .. قالت بعصبيــه يائســـــه " شتبي منـــــــــــي ؟!!! ما كفــــــــــاك اللي سويـــــــته , تبي تكســـرني ...تبي تحطمنــــــي أكثـــــر ؟!!!! خلاص خذيت كل شي منــــــــــي ..كل شي ...خلاص إتركني لحـــــــالي .." كان قاعد يسمــــــــــع ..! سكـــــــت ..! كانت بتسكـــــت عقب كلمتهـا الأخيـره لكن أضافت خاصه بعد ماحست إنه قاعد يسمعـــها .. وإنه قاعد ينصــت لهــا .. أضافت الكلام اللي قاعد يقرقع بقلبــهـا .. فأضــافت " شنو تبي منــــــــي أكثـــــر ..حتى الشي اللي ما تبيـــــــه خذيـــته علشان تكســـ...ـرني ..خذيته عقـب ما قلت ما تبيــــــــني .." إلتفـــــــــــت عليــــــها بصوره سريعــه .. وحط عيــنه بعيــونها ..سالفة إنه ما يبيـــها طالت أكثــر من اللازم .. وقال بكل إسترخاء وهدوء " أنا أبيــــــــج ..." سكتت للحظــــه ..! تشـــوفه بعدها كــرهت روحهــــــــا ليش تسكـــــــت ؟! ليش قاعده تسمــــــح له يسيطر عليها بكلامه ! قاطعتـــه بعصبيـــــــه " شنو عبالك إني فقــــــــــدت ذاكـــــــــرتي ؟!! إنت قلت ما أبيج ...إنت ..." هدوءه.. وطول باله تجاه إستفزازهـا !!! كان قمه بالجديه والإسترخاء ... صقـر كان يبي يوصـل لشي معاها ..هالكلمه الغبيه اللي قالها علشان ينتقم ..! علشان يجــرحهـا ألحين بدى ينال ثمارهــــا !!! رد بإسترخاء متظاهر " ما في داعي تذكريـني ..أنا ذاكـــر " وجهها على طول صـار أحمــر .. لأنهـا بعد ما نســت لما سلمت روحهــا له ..واهو رفض اللي عرضته !! ولا نســـــــت إنه خذاهـــا اليوم وإنها إستسلمت حتى وعقــب كلمــته .. حست نفسـها كأنهـا أداة ..لأنه قايـل لها سابقاً إنه ما يبيــها . هالشي يجــــــــرح ..يذبح .. أضاف صقـر " وذاكر شنو صار ذاك اليوم الظهــر لما ييت من الكراج لمرتي ..وتفاجأت إنهــا تشــوف ألـبـ ..." هالشي بعد ما تبي تذكـــره كلش .. هالشي اللي خرب عليــها كل شي ..تبي تنسى غلطتها الغبيه .. قاطعتــــه " لا تكمــــــل ..أنا حاولت أفســر لك ...." وأضافت بويه شاحب " أنا حاولت أفســر بس إنت ما تسمـــع ...وبعديـــن فواز ..فواز ..ما صار زوجـ .." فجأه إستوعبت شنو كانت تبي تقـول ..وإخجــلت تكمــل .. أستحـــــــــت .. وفجأه إستوعبت إهو شلون عرف إنه فــواز ما قط لمسهــا ..و زاد خجـلها قال لهــا بصــــــرامه قاسيـــه " حتى لو ما لمســــــــــج فأنا ما أبيج تنطقيـــن بإسمـــه .." ويهها إشتعـــــــــــل من كلامه الفظ .. ما يعرف يختار كلام يراعي فيـه خجـلها ..( حتى لو ما لمسج ) أما اهو فأضاف " فأنا ما نسيـت إنج إخترتيـه من بد الناس ..وكنتي تبين تقضين معاه حيـاتج " خجـلها خــلاها تسكت ..مثل ما يفعل الخجل عاده .. أصمتــــها إحــراجهــا .. إهي معصبــه عليـــه , وقدر يكــتم غضبــها بالخجــــل ... وبعدهـا قال بكل جديـه " ولا تنســين إني ما دريت إنه لمسج إلا أمس بالليـــل ..أنا ما كنت أعرف الغيب..تصوري صدمتي لما عرفت إنه زوجــتي الأرمـــــله ..." خجـــــــــــلها بغى يخنقــــــــها .. ما تدري شنو بيقــــــــول أكثـــر .. لكنــه مستحيـــل ..مستحيــــــل ...!!! إختيـــاره للكــــلام ..يغيظ...! قاطعتــــــــــه بإحـراج " خــلاص لا تكمـــل ...وصلت فكـــرتك " وبعدهـــا صدت عنـــه .. وإهي تغمض عيــنها بخجــل فظيــع .. بس ردت لها قســـوته ..! كلمة ...ما أبيج !! تعبــــانه منه ... صقر شاف تغيير ملامحهــــــــا ..من الخجـــــــل ..للألم ..ما يدري بشنو فكــرت ..؟! لكن أهو يدري إنه كان مثـل الدب المجــروح اللي كلما تكلمت معاه هب فيهـــا صد وشاف منظر البحـــر ..المايه قربت وايد ...صوت الأمواج الجميــل .. وايد أشيـاء إنقالت لأنه كان مجنون من الغيره .. ألحين لما يتذكـرها يحس إنه له عذر ..بس بدى يحس بقوتها .. قال بكل هدوء " ذاك اليوم كنت غيــــــــــــــران ..وأنا لما أغار ..هه ..إنتي شفتي أثـر غيرتي على ظهـري ..شفتي شنو سوت بظهـــري ..ذاك اليوم كنت حاس إنه هالزواج راح ينجـــح , إنه كل شي راح يصـــير تمام ..ذاك اليوم ..كنت حاس إني متزوج ..وسعيـــــــد ...فلما شفتج تشوفيــن الألبوم بغيت أجــــــــــن ..حسيــــــــــت ... " سكـــــت فأهو مو متعـــود إنه يتكـــلم عن أحاسيســـــــــه .. لكن يدري إنه لازم يكمــل .. لأنها قالت وعبرت عن مشاعرها .. تستاهل منه هالإعلان .. إهي كانت جامده تسمع كلامه ..ما تدري تقاطعـــــــه وتقــوله كفايه .. ما في مجـال للإنقاذ ولا تسكــــــــت .. " ما أبي أسمع ..." قاطعهـــــــا بقوه واهو يقول بصرامه " لازم تسمعيــن علشان تفهميـــــن اللي صار .. أنا مو من عادتي أشرح تصرفاتي ..وهالشي صعب علي ..فلا تقاطعيني وخليني أخلص " إسكتت زيــــنه لأنها فعلاً تحس بالفضول تسمـــع .. تنهــــــــد صقــر ..و أضاف .." حسيـــت مثــل اللي إنحذف من أعلى جبــــــــل ..لأسفـــــــــل الأرض ..هه .." بدى يطق راســـه بالخشــب اللي وراه واهو يذكر إحســاسه ذاك اليوم .. وأضاف " فواز كان مثـل الطيف الأسود اللي كاتم على نفســــي ..دايماً موجود بالظـــل ..دايماً كنت أتساءل عن علاقتج معاه ..سبب إختيارج له .. ليش فضلتيـه علي ..ولما قررت أتجاوز هالشي .." أختارته لأنه اهو اللي تقدم بذاك الوقت , وأبوها كان فرحان فيه , وإهي كانت تبي تعوض أبوها عن الفشله اللي فشلته إياها وفشلت روحها لما ركضت ورى صقر جدام الكل.. هـــز كتفــــه وعيـونه على الأمواج البعيده.. وساد الصمت فتره ..! وبعدهـا أضاف بصـوت فيـــه عمق " كأني أنخدعت مره ثانيــــه ..وعلى طول فكرت إنج.. تحبيــنه ..رحتي تشــــــوفين صورته .. إشتقتي له ..هذا اللي جا في بالي ..." زينه كانت تشــوفه مبهـــــــــــــوره .. قاعد يتكـــلم معاها .. قاعد يقــــــول .. قاعد يبرر تصرفاته .. وكمــــل " وتصير هذي المره الثانيــه اللي تتخليـــن فيها عني ..علشانه ..علشان رفيـــجي " غمض عيــــــــــنه .. كان يتجـــنب النظر لهـــا ..علشان يدري إن شافهــا ما راح يتكـــلم .. أما زيـــنه ..فما كانت متصــوره .. ولا بأشد أحلامهــــــــــا إنه هالأفكــار كانت تمـــر بعقــــــــــــــــله .. أفكـــاره لو مرت للحظــه بعقـــلها ..كانت راح تجـــــــــن من الحــرّه .. أضاف " فحاولت أثأر لكرامتي بالطريقه الوحيــده اللي أعرفهــا .. كلامي .." وكمــل " ذاك اليوم كان من أسوأ أيام حيــاتي .. جربي ...بثانيــــه ...تطيحين من قمه الأمل لحضيض اليأس ..رديــت للبيـــت وقت الفجـــر تعبان ...ومتوقع خلو البيت ..وتفاجأت فيج تنطــريني ..وما كان مني لما شفتج إلا إني أرد أبيـــــــــج وبقـــــــــــوه مع كل اللي ســــــــويتيه .. ولأني أدري إني ما كنت أقدر أقاومــــج ..وعلشان أدافع عن نفســــــــي وعن كرامتي ..جرحت كرامتــــج ..وقلت إني ما أبيـــج .. " كانت تسمع تفاصيل ذاك اليوم المؤلم .. واهو أضاف " أقولهــا بلساني ..وكل شي فيني يرد كذاب ..إنت تبيـــها بكل ما فيـــك ..وأنا أسف على هالشي " إلتفت عليــها وإلتقت عيـونهم .. وكمـل " لما قلتي لي ..عن حبــــــــج .. " حســـــــت بالخـجــل من ذكرى إعترافهـــا ..من إعلانهـــــــا بكل صراحـــــه بالحب والعشق .. عن إعلانهـا إنها كانت مخلصه له قلبيـاً طول الفتره الماضيــه .. وإشلون كان واقف مو مصدق شي من كـــلامهــا .. قال بحــــــــزم " لا تستحــــــــــين من هالكلمه ..هالكــــــــــــلمه ردت إرفعتني من أعماق اليأس ..إلى أعلى قمة الأمل ..خلتي أؤمن إنه هالزواج راح ينجــــــح " النبــــــــــره .. النبـــــــــــره الصادقــــــــــه ..خلتهــا ترفع راسهــــا .. تأثــــــــــرت من قوة نظـــــــــــرته , ومن صدقــها .. بس هالشي ما يمنـع خجـلهـا من إنهـا إعترفت بحب من طرف واحد .. وقالت بهدوء " ما كنت أظن إنك مصدق ؟!! " هــز كتفــــه .. وقال " كنت مصدق ..بس منصــدم ! " ليش قاعد يقـــول جذي ...خايفه !! تخاف منــــه !! .. مع كل كلامــه ما قال ولا كلمة حب .. ما تدري تأمن له ..ولا ما تقدر .. قالت بخشيه " ليش قاعد تقولي هالكلام ؟! " ما يصدق إنه بيقول هالكلمــه اللي قالهـا مليون مره .. ضحك بخفــه ..لأنه حاس هالكلمه صارت نكته !! بس أهو دايماً يقصدهـا , بكل لحظـــه لما يقولهـا . وألحين أكثـر مره .. لكن قال " لأني أبي هالزواج ينجح " تذكرت نظــرته لهــا .. إتهـاماته القاسيــه عن حبـها للفلـوس . وقالت " شلون ينجح وأنا تزوجــتك علشان فلــوسك ؟! " إنصدمـــت لما شافت على وجهه تعبيــر أقرب ما يكون للخجـل , واهو يقـول " وإنتي بينـــتي لي إني غلطــان ..قلت لج أنا مصدق " ما تنكـــر إنه قلـبهـا رفرف إنه ما قام يظن فيـها هالظن البشــــــــع .. لكن شافته بنظره جامده !! يبي هالزواج ينجح , ويبيهـــــــا تصدقـــــه ...وأهو يبي يتزوج علــيهـــا !! "ما راح ينجح هالزواج " بعد اللي قاله لهـا , وما تبي تحــاول .. شنو تنطـــــــــــر منه أكثـــر ..؟! قال لها عن أحاسيسه , وأفكاره ..واهو ما غلط بشي لما خلاها زوجــته بالفعل مو بس بالورق.. تبي تعاقبـه على هالشي يعني !! عقــد حاجبــه بغضب .. لكن حاول يسترخي " راح ينجح إذا إحنا نبي هالشي" ما يفهــــــم إنها ما راح تقــبل فيــــــه .. قالت " ما راح أحاول وأتنافس مع زوجتك الثانيــه " تنهـــــــــد !! هذا إهي السالفــــه !! إبتســــــــــم , وتبخـــر الغضب .. وإحساس السعاده اللي كان يحاول يكتمــه من أول ما إكتشف إنها ما كانت لغيـره من قبــل .. روح المرح إشتعلت فيــــه ! زينه شافت إبتســـــــــامته وتعســـرت ... قال لهــا بمرح " يمكن كان المفروض أوضح لج بطريقه أكثر مباشره .. ما راح أتزوج من وحده ثانيـــه..هذي كلمه ثانيه قلتهـا بوقت غضب .." شافهــا وقال بكل بساطه وبمزح " وحده بس تكفيني ..ويالله أقدر أخلص من مشاكلهــا " تجمدت بمكـــــــــــانها ..! ما تصدق إنه قاعد يشوفها بويه متسامح ..ما كأنه معيشـــــــها على أعصــابهـا وبعمق الألم طول الأيام اللي فاتت .. وألحين بكل بســـــــــاطه يقـــــــول إنه ما فكر يتزوج وحده ثانيــــــــه ..! هالأستفزازي ..الخايــــــــــــس .. كان يدري إنه ما راح يتزوج بس مخليــــــها على أعصــابهــا .. فجأة إنفجــرت بالبكــاء .. حرام عليــــــــــه هالإستفزازي .. حرام عليــــــــــه !! ما تصدق إنه كل هالمعاناة والتوتر , وقعدتهـــا على أعصــابهـــا ..وأخر شي حضـرته ما كان يبي يتزوج !! غطت ويهها بإيدهــــا .. أهو أختفـــــــــت إبتســامته على طول !! ورد توتــــــــــره بشـــــــــده ..! مو بس توتر ..إختـــرع .. بكاهـــــا كان مفاجئ !! و ذكره بذاك اليوم اللي تقدم لهـا فيـه على الشاطئ . اهو عنده موهبـه خاصه بهالموضوع الظاهر ..كله يبكيـها !! من كثر ما بكاها مو قادر يعدهم..! وعلى طول قـــرب , مســـــــــــك ذراعهــا وشدهــا لصدره .. طبعاً قاومـــت لثانيـــه .. بس بعدهـا إستسلمت .!! لأنهــــــــا تعبــانه !! قال بصدمـه " ليش ؟! ليش ؟! " آآآآآآآآآآآآآ .. " تعـ..ـبت منـــ آآآآآآآ ــك " تنهــــــــد .. يدري إنه أحيـاناً يكون قاسي عليــها ! ضمهـــــا أكثــر لصدره .. ومرر إيده على كتفهـــا بمواساة ..! وقال بهمس ومواساة " أدري ..أدري " إهي ما كانت تسمع غير صوت بكاهـا ..! بس تعبت منــــــــه !! " حرام عليـــــ آآآآآآآ ـــك ..حــــ..ـرام ..أذيتني " كانت لما ألحين خاشــه ويهها بإيدها ..وأهو ضامهــــا ! تقطع قلبــــــــه عليـها .. خاصه بعد ما عرف إنهـا تحبــــه , يدري إنه ألمهـا منـه مضاعف .. اهو ما كان يبي يســــــــوي فيـها جذي .. " آآآآآآآآآآآآآ ما تسـ..ـتعـ..ـمل من الكـ..ـلام ...إلا أقـ..ـساه ..ما تستعمل آآآآآآ من التصـ..ـرفات الا أكثـر شي يـ..ـجرحني .." ما قدرت تكمـــــــل , وإجتاحتـها نوبة بكاء ثانيــــه . تألم ..لما يشوف نفسه من وجهة نظرها يكره روحـه !! أهو يدري إنه قاسي معـاها ..!! بس اهو طبعــه جذي ! يضرب اللي يجــــــرحه بكل قســوه ..بالكلام ..بالتصرفات ! ضمهـــا بقوه لصدره ..طفلتــــــه ..أكثر وحده شحذ عليــها لسانــــه ..وبين قدرته بالتحطيم .. كان قاعد يقول لهـا بين كلمه والثانيه بصوت في مواساة " أدري .." "صح " "معاج حق " " أممم أه ه ه ه ه آآآآآآآآآآآ ..إهيء آآآآآآآآآآآآآآآآ " احبك ..أعشقك ..ما إكتفت بهالهدايــا .. عطتـــه أغلى وأثمن هديـــه ممكن ياخذهـا رجل من المرأه اللي يحبهــا . ويدري إنه صعب بالتعبيــر عن مشاعــره ! فيــــــه عيوب الدنيـا كلهــا .. لكن يعشقـــها , يعشقهـــــــــــا بجنون . يعشقـــــــــــها أكثــر من قدرته على التعبيــــــر .. صوت بكاهــــــا قاعد يذبحـــه , يا رب !!! تحول البكاء لشهقـــات متعبــــــه !! إستقــرت بحضـــنه .. وبعدت إيدهـا عن وجهها .. أجمــل منظـــر كان قبــالهــــا .. السما لونهــا أحمــر وبرتقالي ..والشمس قاعد تودعهــــــــــم .. والمايــــــــه وصــلت لي المكــان اللي اهـــــــــم فيه..! الجـــــــو لطيف ..فيه لسعة بروده .. لكن إهي بحضــــــــنه ..دايمـاً تنتهي بإنهـا تكون بحضنـــه ! وحــاولت تبتعـــد بتعـــــــب .. لكن صقـــر ضمهـــا أكثــر ..وإهي تعــبانه مالها خلق حتى تقاوم .. تنهـــــــد .. رفع إيده , ومســــك وجهها ..ورفعــــه عند صدره .. حاولت تقــاوم .. ما تبي يشوف وجهها وأثار الدموع .. لكن إيده كانت قمه بالإصرار ..رفع راســها له ..لكن عينها عاندت وظلت تشوف الأسفــل متجنبــــــــه عيونه .. مسح بإبهــامه أثار الدموع .. زمن إنه يخبي اللي في قلبـه واللي بعقـــله لازم يروح !! ضغط على نفســــــــه ..! على تردده المعتاد ..! وقال بهدوء مناسب لهالجـو " أنا أدري إني قاسي بإختيار الكلام .. و أدري إنه تصرفاتي تكون قاسيه ..أدري إني إنسان صعب ..أدري إني كلي عيـــوب " رفعت عيونها بتردد لعيــــونه .. عيونه كانت تلمع بطريقه غريبه مبهــره لهــا .. ما تصدق إنهــا قاعده تسمــــــع منه هالكلام ..! وأضاف " إستحملي ينوني ..قسوتي .. غيرتي ..إستحمليني .." شد على وجهها علشان يقدر الكلمـــه التاليــــــه , الإعتراف الأشد قـوه عليـــه .." لأني أحتاج إنه ننجح .." غمض عيـــــــونه وغمضت عيـــــــــــونها .. ونـزلت دمعــه ضاله من عيــن وحده من عيونها .. مو مستوعبـــه إنه قاعد يقولهـا هالكلام !! مو مصدقـه إنهـا قاعده تسمـع عن إحتيــاجه لهــا !! مو مصدقـه إنها قاعده تسمعــه يعترف بهالإحتياج .. داعب أنفــــــه بأنفهــــــا !! كرر الكلمه اللي كان يجد صعوبه في إنه يقولهـا ..وقال " أحتـــــــــاجـ..ـج " إلتقى معــــــــــاهــــــــــــا ..وإهي ما إبعدتـــــــه .. هالشي إيجابي ..صح ؟!!!! بس بعد فتره وخـرت بخجــــل وحيـاء ..كان وده يمنـــعها .. بس بعدها إستوعب إنه المكان مع إنه صاد إلا إنه مو مناسب .. وإهي نزلت عيــونها بإستحيـــاء .. وما مر بعقله غير فكرة إنه يعشقهــــــــــــا .. قال بهدوء " اللي يصير بينا طبيعي يصير بين أي زوجيــن " وصدت أكثـر عن عيــونه .. وأبعدت وجهها عنـــــــه ..وأهو سمح لهــا بهالشي .. بس خلاص ما يقدر على بعدهــا .. وقال بصرامه " أبي نفتح صفحه يديده " زينه تقدر تصده !! لكن وبعديــــن !! شراح تستفيــد ؟! إعتذر ..وندم ..وبرر .. وتكــــلم .. مو هذا اللي إنتي تبينه يا زيــنه إنه يتكلم !! قال إنه يحتاجج ..عرى نفسه جدامج .. بس ما قال لج أحبج ..ولا اعشقج مثل ما قلتي له .. بس إنتي ما قلتي هالشي علشان يرد يقولج نفس الكلام إذا ما كان يحبج ! واهم شي إنه عيــنه مو على رزان , ولا يفكر يتزوج ؟!! راحـــــــــــــه عميقــــــــــــه غمرتهــا لما إستوعب عقلهـــــــا هالحقائق !! بس تذكرت وعدهـا لمنــال .. عضت شفايفــها ..وإهي تحتاج لهالوقت ..تستوعب اللي قاعد يصيـر.. حيـاتها قاعده تسيــر بطريقه سريعــه غريبـــه ..! إضافه لحاجتها إنها تتفهم عدم إعلانه للحب لهـا !! رفعت عيونها له وقالت بصوت منخفض " انا متواعده مع البنات أنام معاهم بالشاليـه الرئيسي الليله ..فبنام معاهم الليله " شافت الإحباط بوجهه ..وبعدهـــا الغضب ..فقالت بهدوء وثقـه " أحتاج لوقت علشان أستوعب اللي قاعد يصيــر بحيــاتي " تحــرك من مكــانه , وعطاهــا ظهـــره !! توه كان يقـول لنفســه عن الصبـــر .. وألحين مو قادر يصبـر إنهـا تنام ليــله بعيــد عنه .. قال " ماشي ..ماشي إخذي الوقت اللي تبيــنه " واهو وده يقــــــــول ما أبي أعطيـج أي وقت ...!!!! وقال بجمود " نزلي ألحيــــن من هالمكــان ..المايــه يت .." ما تدري إن كان قرارهـا سليــم ولا لأ ..؟! بعد فتره صلاة المغرب : رزان : كانت مستلقيـــه على القنفه قبال التليفزيون . فعقب اللي صار اليوم الظهــر تحس مالها نفس تتحرك .. تجربه مخيفه .. ما قط هقت بيوم إنها بتخاف من البحـر .. كان النفـــس قاعد ينقــــــــطع منهـــا ..شافت الموت بعيــــونها .. لما حســت بذراع تحاوط جسمهـــا .. خافـــــــت ..ما تدري متى فقدت الوعي .. إفتحت عيونهـا و عرفت إنها كانت بذراع صقــــر .. صار ويهها أحمـــــــــر !! سمعت صوت أمهـا يقول " يا حـــــــــــــلاتج بالحجاب ..شالزين ..شالحلاة .. ..شلونج زينه ؟!! " تفاجأت ! زيـــنه !! إعتدلت بقعدتهــا ..وشافت الباب لما دخـلت زيــنه وإهي تقـول " حلت دنيـــاج خالتي ما قصرتي ..الحمدلله بخيــر إنتي شلونج ؟! " ردت أمهـا الرد المناسب ..وبعدهـا قالت " يا ليت تشكرين صقـر على اللي سواه اليوم لرزان ..لو ما أهو ..." زيــنه حطت إيدها على ذراع أم رزان وقالت بكل صرامه مخلوطه بحنان " ما عمل إلا الواجب .. المهم ألحين اشلون رزان ؟ " إبتسمت أم رزان وأشرت على بنتهـا وقالت " كاهي رزان ..الحمدلله أحسن .. تفضلي وأنا بخليكم مع بعض " رزان كانت قاعده تشوف اللي داخله عليـها وإهي حاسه إنه وراها شي , وتأكدت من هالموضوع .. لما إلتقت عينهـا بعين زيـنه .. اللي قربت كذا خطوه وقالت بجفاف " الحمدلله على السلامه " ما توقعت رزان إن زينه بتيي علشان تتحمدلها بالسلامه بس .. مع هذا ردت عليـها بهدوء " الله يسلمج " وكملــت " ما أظن إنج يايه تتحمديـن لي بالسلامه " زينه تكره هالإنسانه .. ما في مشاعر تقدر تعبر عن مدى كرهها للي أسمها رزان . فإهي لما ألحين تذكر الكف اللي تلقته منهــا .. وما نســـت الكذبه اللي خلتها تتعذب أيام ..! فقالت بكل هدوء " معاج حق .." وشافتها بقوه وإهي تضيف " أنا يايه أقولج إني قلت حق صقر عن كلامج " توسعــــــت عيون رزان بصدمـــــــه ..! كان ممكن هالمنظر يثير شفقة زينه , بس إهي كانت ميته من الغيره لدرجـــه كاتمه على نفســـــــــــها ...! وأضافت " وقال إنج كذابه ..ما تتصورين ردة فعله المصدومـه " رزان لما كذبت كذبتها ماهقــــــــــت هالنتيجــــــــــه .. وأكيد إنها ما تمنتهـــــــا ..! كانت تتمنى لو تمــــــــــــوت ألحين وبهاللحظــــــــه ! حســــــــت كأنها مخنوقه من الإحراج ..فإهي ما قط تصورت لما كذبت إنه كذبتها راح توصل للريال نفســه , ويسمعهـــا .. تخيلت شكلهـا ومنظــرها بعيــــــــونه ..! حســت بحراره ..الإحراج بجسمهــــــا كله ..! زينه كانت تشوف ردة فعل رزان بعيــن الرضا , إن كان عندهـا جزء من الشك إنه رزان كانت صادقه فإهي ألحين محت هالفكره كلياً ..! فواضح إنه رزان ما كانت تتمنى إنه توصل لصقـر الكذبه . قالت رزان بصوت مخنــوق وإهي بتبجي خاصه وإهي تشوف نظرة الإنتصار بعيـون زينـه " إنتي ..قليـــلة أدب ..إنتي ..طلعي بـــــــــــــرا ..طلعي من شاليهنا .. ماأبي أشوفج بالمره " زينه كانت تدري إنه كثر الدق يفج اللحام ..وإنه أي ريال إن شاف وحده قاطه روحهــا عليـــه , وتحبـه وتسوي له حركات إحتمال يميــل لهـا , خاصه إن كان معجب فيـها بيوم من الأيام ..مثل حالة صقر و رزان ..! يمكن الناس تشوف تصرفهـا قاسي .. فإهي تفضل تكون قاسيـه على إنها تفقد زوجهـا على وحده مثـل رزان .. قالت زينه بصرامه " أنا قليله أدب , ولا اللي تتلصق بريال ما يبيهـــا ..." أرفعت إيدهــا تسكت رزان وإهي تقـول بصرامه " راح أطلع , بس مو قبل لا تحطيـن في بالج إن ريلي خط أحمـــر ..إن قربتي منــه راح تندميـــــن .. اليوم صقـر بس اللي يدري عن كذبتج بس مستعده إنه الكل يدري ..أنا مينونه بهالسوالف ..تذكري هالشي " تحــركت .. و زيـنه طالعه شافت أم رزان عند باب الصاله , وقالت " توج يايه , مســـــــرع ..ما شربتي حتى عصيــر ؟!! " زيــنه اللي كان قلبـها يطق من جنون فعـــلتها .. إبتسمـــت بتوتر , وقالت " ما عليــــــــه خالتي ..وقت ثاني " وطلعــــــــت من شاليه رزان ..! تحس صوت قلبــها قاعد يطق بقســــــــــوه .. بس على الأقل بينت موقفهــــا حق رزان ..وقد أعذر من أنذر ..! كيفهــا ..إهي اللي بدت الشر ..! شكوووو تكذب ..! رزان كانت مصعوقه .. وين تودي ويهها ..! صقر يدري إنها كذبت وإنها تلصقت فيـــــه ..! أبيـــــــه ما تقدر تقعد إهني .. دخــلت أمهـا ..وعلى وجهها إبتسامه ..قالت رزان بلهفـــه وإهي على شفا البكاء " يمــه خلينا نرجع الكويت " شافتها أمهـا بنظرة إستغراب ..! توهــا ما كان فيهــا شي .. قالت بترجي .." يمـــه كارهه الشاليــــــــــه , عقب اللي صار الظهـــر كارهتــــــه حدي ..حاولت أعدي هالشي بس مو قادره حاسه إني مقموته ..وايد " رزان مع الخيالات اللي تصورتهــا بعقلهـــا ..بدت تبكي ..الموقف شديـــــــد وقوي خاصه على بنت سنعه وتعرف الأصول مثلها ! والمشكله إنها إهي اللي حطت روحــها فيـــه . رمـــــت روحهـا بحضن أمهـا , وإهي مو متصـوره نفسـها بالموقف اللي صار ..! التعاطف بان على ملامح أمهـا الرقيقه .. وقالت " يا حيــــــــاتي ..خلاص لا تبجيــــن ..إن شاء الله أقول لأبوج .. وأنا ومعاج نحدر للكويـــت " كمــلت رزان بكا .. خاصه إنها ما كذبت كذبتها إلا علشان تحر زينه ..فقط لا غير .. ألحين شنو بيفكر فيها إنها راميه روحـها عليه وبتخرب عليه زواجه.. الليـــــــله : شيلبا : خلاص توصلت لقرار .. راح تعيش عند ناصر , تبي تاخذ الجنسيه الكويتيه , وبعدها تطلب الطلاق ..! وبعدهـا تقدر تجيب أمهـا , وأهلها ..! بتكون وقتها كويتيه الجنسيه وما أحد يقدر يكلمهـا بطريقه مو زينه , أو يعاملها بأسلوب مو زين . راح يصير حالها من حال أهل البلد .. خاصه إنه صقر قال لها إنه راح يوقف معاها وما راح يخلي ناصر يطقهــا ! [COLOR="red"]يتبـــــــــــــع ... COLOR] E] |
الساعة الآن 01:15 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية