منتديات ليلاس - كانت أمي تقول ...

الله يرحم زمان أول...

كانت أمي ترددها ..نسمعها كثير بس ما نفهم معناها .. يعني شاللي تغيّر ؟!!
الله يرحم ؟!! يعني مات !! منو بالضبط اللي مات ؟؟!!
هذا كان بالضبط يتكرر مـن أمـي .. كانت تقول ما عـاد نسمع اليوم كلمة عيب ..
يا بنتي عيب .. يا وليدي عيب .. لفظ الكلمة توقف ......
اليوم الوحدة تفرح لما يَنْطِقْ ولدها حتى لو قال كلمة وسخه "وشنو يعني عادي " !! المهم كبر وصار أكبر ..
وين زمان أمي وين عيب ليش صار عادي !!!
يابنتي أدبي بنتك قولي لها والله عيب ..
أأأه يا عيب أمي .. عندها كان يعني لما البنت ترفع صوتها بحضرة أبوها أو أخوها ..
عيب لما تلبس في البيت لبس كان عادي بس كان عند أمي عيب ( ثوب ضيَّق ) وإلا فستان يوصل لتحت الركبة بكثير !!
كان عيب لمَّا تسمع كلمـة غريبـة يرفضها سمعهـا ؛؛
كانت تقول يا بنيِّتي عيب ربوا عيالكم ؛؛؛
آآآه يا عيب أمــي .. هذا كان أكبر عيب بزمان أول !!!
تقول أمي الله يرحم زمان أول ( لمـاا نلعب بالسِّكه ) ما علينا من الصْبَيَانْ كانوا والله يا بنيتي عِقَّـال ..
كان تفكيرهم نظيف .. هذا زمان أول !!
آآآه يا عيب أمـي ..الخدامـة اليوم ما تسلم والولد صرنا نخاف لباب البيت يوصل ...
الله يرحم زمان أول ...
عيب بنَيْتِكْ تقول هـ الكلمة ... وعيب ترد على أخوها الكبير...
عيب يا بَنَتْي ذا اللبس القصير ..عيب تضيييق الملابس ..
عيب يا بنتي طلعاتك كثيير ..
عيب تركبين مع السائق بروحك عيب ترفعين بالسوق صوتك ..
يمَّـه لا تلومين بناات اليوم يمَّـه ما سمعوا كلمة عيب .. العيب في الشيء الصغير يوصل لتحريم الفعل الكبير ...
تقول أمي ربي عيالك بَنَيْتي .. عيالك يمَّـه صخـره ملسـاا انقشي فيها كل ماتبين ..
والله يا بَنَيْتي بكره يكبر والله صدقيني ما ينسى ...
ربي طفلـك لـك.. بـكره يِـكْبَر .. بكره يَـذْكِر.. بـكره يا بَنَيْتي هو لـك يربي ولده !!!
يمَّـه شوفي عيال اليوم والله يا اميمتي عندهم أحسن خدم ..فيهم كفار ومسيح !!
من يصبح الطفل حتى يرقد وهي تغرس فيه حسن الخلق !!
لا تخافين عليه يمًّه !! صار يتعلم كثير وصار يا يمَّـه يتكلم أكثر ..
صار مثقف يعرف لغة الشارع يا يمَّـه..ولغة تلفزيون يمَّـه فاضح فيه ألف ملَّه وملَّـه ..
صار ما شا الله عليه يلقط بسرعة ..في كلمه جديدة بسرعة حفظها دايم تتكرر بكل لحظة والله عيب يا يمَّـه لـك أنطقها !!!!
الله يحلل عيب أول !! هذي ثقافة جديدة خليه يمَّـه يعيش عصره .. يعيش وقته ..
عادي لو كررها لأمَّــه .. وإلا إختـه ... بدال العيب ..يمَّـه صاار عادي ..!!!
فهمت الحين قصدك يمَّه بزمان أول .عرفت الحين يمَّـه من اللي مات..مات الحيــا يـا أميمتي بوجيـه البنات ..
ذا تضحك له وذاك عادي لو تكلمه .. يمَّـه عادي والله لو يمد لها برقمه ..
كله عادي .. صرنا ننسى معنى عيب !! شنو يعني عيب ؟!
هذا يسمونه يمَّـه تخلف ..
عيب يمَّـه .. صرتي إنتي اللي عيب !!!!!!
الله يرحم زمان أول ...

الله يرحمك يـ أم خالد .. ويرحم زمانك الأول ...
مع الاعتذار الشديد للبنات وطبعا لا يعمم على الكل فمازلنا بخير ولله الحمد والمنَّـه ؛؛