|
على فكره قبل مرحل ×× طرى لي شي بقولة ..
بسم الله الرحمن الرحيم هذي أولى رواياتي .. أرجو أن تنال إعجابكم وأتمنى من الجميع إبداء رأيه ــــــــــــــــــــــــــــ روايتي حقيقية عبارة عن أحداث بالواقع حدثت ومازالت تحدث طبعا لا تخلوا من الإضافات .. رومانسية، وجريئة بعض الشيء، ولا تخلوا من الأكشن تحتوي على مواقف محرجة، ومواقف مؤلمة، ومواقف أيضاً مضحكة، قصة عايشت بعض أحداثها.. أتمنى أن تعيشوها معي أثناء قراءتكم للرواية .. أعتذر للإطالة وأتمنى أن تعجبكم وتستمتعوا بها .. .. إليكم أولى باراتي .. ــــــــــــــــــــــــــــــــــــــــــــــــــ ** البارة الأولى ** قبل ست سنوات .. ***************** : يا لله يا بنات بسرعة راح يمسكنا .. : تعبت خلاص وقفوا خلوني أريح مو قادرة أكمل .. : لا كذا راح يمسكنا ألماسوه بسرعة .. ألماس : لا تـ ـعـ ـبت بنـ ـات كـ ـله مـ ـنكـ ـم ليتني ما رحت معكم وداد بس .. وداد : أنا قلت لك يا عبير لا تجيبيهم معنا أدري يخربون كل شيء .. عبير : ألماس ما يمدية يلحقنا اصبري شوي .. ألماس تكلم ريم : ليتني ما طاوعتك يا لخبله .. ريم ترد : شفيك الحمد لله والشكر عادي خلينا نحس بروح المغامرة شوي .. ألماس : أي مغامرة يا لخبله شوفي الرجال يلحقنا .. وداد : أحسن خليه يربي ولده زي الناس عشان ثاني مره يعرف إن مو كل الناس تسكت عن حقها .. عبير : إيه صادقة ودو موكل الناس سواسية .. وداد تلتفت على وارى وتقول : خلاص خلاص فقد أثرنا .. ألماس وهي ترمي ثقلها على الأرض : تعبت مو قادرة أتنفس كش علية سرعة .. ريم : ههههههههههههههههههههههه ألماس : وجعه تفهمين .. وداد : اسكتوا فضيحة وربي فضيحة .. عبير : ههههههههههههههههه .. شفيكم الحمدلله والشكر كل هذا خوف .. وداد تدق جبهتها وتقول : يوووووه نسيت غطا نواف بالحديقة ياربيييييه .. ألماس بخوف شوي : والحين وش العمل .. وداد : الحل يا ذكية نرجع ونجيبة ما فيه غيره .. ريم بتردد : وإذا هو للحين موجود وش نسوي .. عبير : هذا اللي ما حسبنا حسابه .. وداد : مو معقولة بيجلس لليل عند أذان المغرب بنروح نجيبة يكون يصلي أكيد .. عبير : فكرة حلوه .. وداد : طبعا أنتن ما تروحون معنا .. ريم : بالله تبون تتركونا بيفوتني وش بيصير .. عبير : أنتن خوافات وبتخربن كل شي .. وداد : ماتعرفن تتصرفن يعني تستسلمن بسرعة .. ألماس : أنا مابي أساسا أروح .. ريم : أف منك لا تخربين علينا ألماسوه .. ألماس : ألماسوه بعينك قولي آمين كم مره قلت لكم لا تقولون ألماسوه .. وداد : بدينا عز الله ما ينتهون إلا بكره .. عبير : وداد وش رايك ما بال يخلصن هالخبلات نروح نشوف الخبل الثاني .. وداد : ايه بالله يمديه رجع .. راحت وداد وعبير وتركوا ألماس وريم يتهاوشون على قولتهن بيزعلن ويتراضن .. ـــــــــــــــــــــــــــــــــــــــــــــــــــ : سعد شف هذي حديقة أكبر وأحلى من هذيك .. سعد : بس تقل بعيده وما أظن يقدرن البنات يا نايف يجن هنا .. نايف : محد بيدري مابنقول لأحد حنا والبنات بس .. سعد : ياخي الحديقة مسكره شف محاوطينة بسور .. نايف : شف فيه فتحه من الجنب .. سعد : أجل يالله نروح نبشرهن .. ـــــــــــــــــــــــــــــــــــــــــــــــــ وداد : عبير مافيه أحد بالحديقة يعني آمان خلينا نروح ناخذ الغطا ونرتاح .. عبير : طيب وإذا كان يراقب المكان بيصيدنا .. وداد : حنا صغار وهو مشيب منتهي وإذا صغير بالثلاثين منتهية صلاحيته .. عبير : يالله أجل .. راحن البنات وخذن الغطا بس وداد ماحبت تروح مندون ما تودعهم فقررت تزعجهم وتروح .. فخذت كم حصى ورمتها عليهم من ورى وهم كانوا بالحديقة فشافوا الحصى وعرفوا إن البنات رجعوا .. الأب عصب طلع يركض يبي يمسكنا بس حنا كنا أذكى رمينا الحصى وهربنا .. وداد إرتاحت وعبير ميتة ضحك على أشكالهم .. عبير : ههههههههههههه حرام عليكي مو كفاية اللي سويناه فيهم لو درى إنتي مين ما يسكت بيعلم أبوك .. وداد : ما يقدر يعلم لأن عياله هم اللي غلطوا علينا .. عبير : بهذي صادقة .. وداد : الحين نجي نلقى الخبلات متصالحات .. عبير : أكيد هذلن يزعلن ويتصالحن بس .. وصلن عبير ووداد عند ريم وألماس وبالفعل لقنهن متصالحات ريم : هاه وش صار قولولي .. عبير : أنا أقولك وش سوينا ( وقالت لها كل اللي صار ) ريم : قهر ليتني كنت معكم .. وداد شافت العيال جوا وقالت : أصصصصص لاتجيبون طاري للعيال أبد تفهمون .. البنات هزن روسهن بعلامة الفهم .. ــــــــــــــــــــــــــــــــــــــــــــــــــــــ هذي هي كانت الرواية .. أبي رايكم بالبداية عشان أقدر أكمل .. ــــــــــــــــــــــــــ تحياتي للجميع .. |
السلام عليكم ورحمة الله وبركاته
ياهلا فيك اختي وداد الروح شكل البدايه اكشن نستنى الاجزاء القادمه عشان تتضح الصوره |
مشكوووووره إختي نوف على مرورك الرائع .. وإنشاء الله التكملة بنزلها عماقريب بس بشوف ردود الفعل .. وإنشاء الله تعجبكم .. مني لك أطيب التمنيات .. |
كملي علشان تتضح الرؤية
|
هلابك إختي وقار الصمت .. شكرا على مرورك ولايهمك الحين أنزل البارات .. بس كنت حابة اشوف الردود .. تحياتي للجميع .. الــ وداد ــروح |
وهذي البارة الثانية عشان تتضح الصورة أكثر .. ××××××××××××× أقبل سعد مع نايف للبنات وهم مبسوطين قال نايف : بنات توقعوا وش شفنا قبل شوي أنا وسعد .. بدت عاد لقافة ألماس : وش شفتوا يالله بسرعة قول .. نايف : أول شي وش لي على هالخبر ريم تحاكي سعد : سعد أنا إختك مو صح سعد : ايه إختي إنجزي وش عندك ريم : دامني إختي زي ماتقول قلي وش شفت بلا مذلت خلق ربي <<< تقصد نايف وداد : أقول إخلص علينا وش عندك نايف : لالالالا ... ياروحي أول شي أضمن حقوقي عبير : سعد تكلم وداد تطالع لعبير وتغمز وتقول : أقول عبوره وش قلتيلي الأغراض اللي ناقصة حق الحلى .. عبير فهمة قصد وداد وكملت السالفة : أبد بس باقي البيض بسكويت حق الطبقات مسرع نسيتي .. نايف عرف قصدهم وإنقهر مسكوه من إيده اللي توجعه اللي هو الأكل .. سعد وريم ضحكوا وألماس محروقه تبي تعرف وش شافوا العيال .. نايف يخز وداد : ماله داعي هالحركات بقولكم وأمري لله .. ريم : كان ريحت عمرك وقلت بدل ما يهددوك .. نايف: بالله الحين واقفه معهم ضدي .. وداد : معك دقيقتين بتتكلم ولا بنرجع عشان نسوي الحلى .. جلسوا يضحكون عشان يقهرونه .. وداد : أقول سعد وش رايك انت تقول وتاخذ حصتك وحصة نايف وقولنا .. عبير : الحين ليش ذابحين أنفسكم عشان تعرفون هم وش شافوا .. وداد ضربة عبير بكوعها مندون محد ينتبه : وشبك انتي خلينا نعرف بس عشان نقهر نايف ونسحب على سعد وش ورانا حنا خلنا نأدبهم ويعرفون قيمتنا .. عبير ضحكت وقالت : والله إنك داهيه كل ذا يطلع منك .. وداد :افا عليك شوفي وش بسوي .. وعلت على صوتها وقالت : ماقلتلي سعد وش قلت .. نايف يخز سعد بقصده يعني لاتوافق .. سعد ضحك وإحتار مايدري وش يسوي يختار بطنة ولا صاحب عمره .. قال : بصراحة ودي وماودي .. قال نايف : بعدي ياسنايدي لاتوافق هذلن بيفرقنا بينا .. وضحك .. وداد قامت وقالت : بكيفكم يالله بنات خلنا نرجع البيت بيأذن المغرب على وشك .. نايف قرر يقول : أف مقدر كلش ولا بطني عاد إسمعي لقينا أنا وسعد حديقة تهبل أحلى من هذيك حقة البزران وقلنا نقولكم تجون معنا تتونسون .. ريم : واااااااااو يعني كيف شكلها ماقت لي كبيره بها شجر يعني تكلم ياخي .. نايف : أعصابك علي كل ذا أسئلة .. وداد : وين مكانها .. سعد : عند المسجد اللي نصلي فيه هناك عند الدوار شفتيه ..وهو يأشر بإصبعة .. عبير :عاد يمدينا نروح ونرجع ما أعتقد يمدينا نروح ونرجع قبل الأذان .. ألماس : ايه عاد لادرت أمي إننا رحنا للبعيد عز الله إنحبسنا وشغلتنا بالزرع حقها .. وداد : أقول بس خلونا نستانس حنا بننطق بالبيت بننطق فخلونا نفلها قبل نرجع ولا وش رايكم .. نايف : ايه أنا موافق هيه على كم جلدة بالعصا ثنتين وخلاص .. سعد : أجل يالله بسرعة قبل يأذن .. .......................................... بالبيت : أم نايف : ماكنهم تأخروا بالرجعة بيأذن المغرب وهم مارجعوا .. أم سعد : مدري والله أرسلي حدا العيال يشوفهم .. أم نايف : لاما يحتاج جود قومي طلي من الدريشة وشوفيهم هم بالحديقة ولا لا .. جود : طيب يمه .. راحت جود وطلت وماشافت أحد أبد شوي شافت وحدة من صديقاتها تأشر لها من دريشتهم أشرة لها جود وجلسوا يسولفون شوي وتذكرة جود أمها وقالت : ياربي نسيت أقولها الحين تعطيني محاضرة .. أم نايف تنادي على جود : وينك سنة لو كانت ذبيحة خلصت .. جود : جاية جاية .. راحت وهي تفكر معقولة وين راحوا هم قالوا للحديقة القريبة .. وصارت تمشي وتفكر وهي نازلة مانتبهة وصقعت بالجدار قبل مدخل الصالة اللي كانت موجوده فيها أمها وخالتها .. جود : آآآآآآخ .. ياراسي تقل ما كان ناقصني غيره أف .. أم نايف : خبل ماتشوفين الطريق عميا .. أم سعد : هاه قوليلي شفتيهم .. جود : ايه شاسوي كنت أفكر .. المهم ماشفت أحد بالحديقة .. مدري وين طسوا هالعيال .. أم نايف: طيب دامك ماشفتيهم وش اللي لطعك فوق هاه ساعة .. جود : شفت وحدة من البنات وكلمتني ونسيت صارت سالفة عاد .. أم نايف :اها بس قلتلك شوفيهم ماقلتلك كلمي خوياتك .. جود : ايه إنشاء الله .. جود قالت هالكلام بس عشان تخلص من الموضوع لأنها دارية بتسوي لها محاضرة فقالت تقصرها من أولها .. ××××××××××××××××× نرجع للبنات : البنات كانن فالينها لعب وهبال والعيال ماكانوا أقل منهم وناسه .. فجأة ألماس لمحت وحده من البنات اللي معها بالمدرسة .. وكزة وداد : ودادوووه شوفي ذي فطيم ياحول وين مارحنا نشوفها .. وداد : أي عورتيني يالخبلى أي فطيم منهي ..؟؟! عبير : شفيكم ..؟؟! وداد : ألماس تقول شافت وحده معاها بالمدرسة هنا ..!! ريم : وينها خلوني أشوفها ذي اللي تقولون عنها .. ألماس : شوفوها هذيك .. وداد : ايه ايه ايه .. عرفتها موذي إخت أريج خويت جود .. ألماس : ايه هي .. يالبلشى خبوني بنات خبوني لاتشوفني مالي خلقها .. وداد : تضحك من قلب على شكل إختها وتقول :يالخوافها عااادي تكت ايزي يختي طنشيها ولا وش رايكم نزعجها .. ألماس : اسكتي ذي فتينه كل شي تقوله شوي وتشوفين أهلنا دروى عننا من جود .. جوى العيال عند البنات وقالولهم قالوا طنشوهم .. عند فاطمة : فاطمة:لحظة بنات أنا أعرف هذي البنت استنوني شوي .. راحت فاطمة عند البنات وسلمت وألماس تدعي ربها .. فاطمة سولفت شوي واستأذنت وراحت ألماس : أف مابغت تروح .. البنات والعيال قاموا يضحكون على شكلها ------------------------------- أم نايف : هذولا وين ذلفوا الحين بتغيب ومابنحصلهم .. أم سعد : طيب والعيال الكبار يروحون يشوفون المخبل وين راحوا .. أم نايف : أنا الغلطانة اللي خليتهم يطلعون بس هين دواهم عندي لين يرجعون .. وأنتي يالكبيره مرابطة عند التلفون قومي خلصيني يالله .. جود : ياربية حتى التلفون بتمنعونا عنه طيب خمس دقايق بس .. أم نايف : إخلصي علي بس أهو وصكيه .. جود : طيب طيب .. ايوه أروج كملي السالفة .. أريج : وليش معصبة أمك الحين وش فيها .. جود : أبد طلعوا البنات والعيال على أساس رايحين الحديقة القريبة بس ماهم موجودين فيها .. أريج : لحظة تقول فطوم إنها شافت ألماس بالحديقة اللي عند الدوار الكبيرة عند المسجد .. جود : إحلفي المهبل وش موديهم هناك .. أريج : مدري علمي علمك أم نايف صارت تصارخ على جود عشان تصك التليفون جود : اوكي صكي انتي الحين بعدين نكمل لأن أمي بتذبحني اليوم .. أريج : اوكي أكلمك بعدين مع السلامة .. جود : مع السلامة .. راحت جود عند أمها عشان تقولها إنها عرفت وينهم موجودين .. جود قالت لأمها وين راحوا عاد أم نايف وأم سعد عصبوا من تصرف الأولاد الغير مسئول توهم ساكنين بالسكن هذا ومايعرفون عنه شي ماصار وقت طويل من سكنوه .. راحت إلبست عبايتها وأم سعد بعد وراحوا لهم وهم ناوين لهم نية شينة .. ×××××××××××××× بالحديقة : بعالم آخر يلعبون ويستهبلون ومعطين العالم أشكل سعد :نايف مو هذيك خالتي وهذي أمي نايف : ايه ايه ايه هم بس وش مجيبهم سعد :قل وش معرفهم ألماس: أكيد هذي فطيموه الله ياخذها ويريحني منها وداد ميته ضحك على أشكالهم :اعصابكم وإذا طيب يعني وش بيصير كلها كم قرصت إذن وانتهت السالفة عبير :طيب وإذا امي منعتنا نجيكم مره ثانية وش بتسوين سعد : ايه انتم قرصت إذن وحنا بالخيزرانه ريم :كل منكم ليتنا ماطعناكم ألماس : لامو منهم من الحماره فطيم اعرفها سوه وداد :اقول جاك الموت ياتارك الصلاة نايف :آآآآآآآآخ المشكلة مابيوقع فيها غيري وغير سعد أم نايف :تعالوا لا أجيكم وأجركم مع شوشتكم بسرعة وداد : امشوا بس امشوا إن ماجيناها هي بتجينا .. ريم : أقول حليلوني .. عبير تضحك : ماني محللتك هههههههههههه ألماس : ياويل حالي عز الله بننحبس على هالعمله .. أم نايف : يالله ماتسمعون هاه .. نايف : عجلوا قبل لاتخيشنا بقاعتنا .. وداد : الله يعين بس .. سعد :قل ماراح يخلونا نجيكم بعد اليوم .. راحوا العيال والبنات وام سعد وأم نايف تهزيئ بطول الطرق لين وصلوا البيت .. ×××××××××××××××× وش تتوقعون بتسوي أم نايف وأم سعد بعيالهم ..؟؟! ووشو العقاب اللي بيتخذونه معهم ..؟؟! و و و و و و و و ..؟؟! ابي توقعاتكم .. وش بيصير لأبطالي أنتظروا نزول البارةالثالثة .. تحياتي للجميع .. الــ وداد ــروح :lol: |
اختي وداد الروح يسلموووو وانا متفاعل جدا مع الاحداث واتمنى تنزلين البارة الثالثة وبأقرب وقت تحياتي .............] |
هلا بيج معنا هنا في ليلاس
وان شاء الله تلقين تشجيع البنات وكل مازدتي من الاكشن والاهداف بتلقين اعجاب بالتوفيق باذن الله مذهلة |
هلابك إختي مذهله .. هلابك أخوي .. ولا يهمكم بنزل البارت قريب يعني إذا دخلت بكره بنزلها لكم .. ومشكورين على الدعم .. تحياتي للجميع : الــــ وداد ــــروح .. :D |
جد أعتذر على التأخير .. بس حصل ظرف ومقدرت أدخل النت اليوم بنزل تكملة الرواية وبعد البارة عاد بنزل التعريف بالشخصيات .. ولكم مني تحية طيبة : الــــ وداد ــــروح |
.. بسم الله الرحمن الرحيم .. ـــــــــــــــــــــ البارة الثالثة *************** وصلوا البيت وقفت أم سعد عند الباب من جوا وأم نايف عند الباب من برى وكل مادخل واحد منهم عطته تهزيئ وضرب تبرد شوي حرتهم من سواياهم على كتفهم إنزلت جود على الصراخ والشغالة طلعت من المطبخ وراحت ركض عند الصوت وداد تقول وهي مقصره حسها عشان ماتسمعها أمهاولا خالتها : آآآآي يعور بشويش موكذا عاد .. عبير :ايه والله عورتني .. سعد : ليه تبينها تطقك كذا – ضرب وداد على كتفها بخفه – وش رايك .. وداد : -تتطنز – هاهاهاها ضخكتني لاتعرف تنكت .. نايف :أوووش وشبكم قصرو حسكم لاتسمعكم تزيدون الطين بله .. ريم : ايهه عاد وش بيسووون فينا ولا وش بيعاقبونا فيه .. الماس :ولله مدري وش تتوقعون امي تسوي فينا .. جود :وين حصلتيهم يمه .. أم نايف :وين يعني بنفس المكان اللي قلتي عليه .. أم سعد :قدامي يالله أمشوا داخل .. أم نايف :والله لا نكلكم على شان ماتعودون تسون هالسوات .. سعد بما إنه أكبرهم مشا قبلهم وهم مشوا وراه .. راحوا للصالة جود طالعتهم وضحكت على أشكالهم .. وقفوا وصفوا جنب بعض ووقفت أم سعد وأم نايف قبالهم وجود كانت جالسة عالكنب وتشوفهم وبس تضحك وتعلق عليهم وكانت مجلسه نواف بحضنها.. أم نايف :الحين كل واحد بقوله وش بسوي فيه بس بنبدا من الأكبر لين الأصغر .. أم سعد :يعني نبتدي بسعد وننتهي بـــريم .. أم نايف :يالله إبدي بولدك يا فاطمة .. أم سعد :سعد –مخصوم من مصروفك والطلعة ولعب الكورة والروحة للنادي وللكارتيه مفهوم .. سعد - ضاق صدره حيل - :طيب ليه كل هذا .. أم سعد :عشان تتوبون تروحون من دون ماتعطونا خبر .. سعد :لين متى بتحرميني هاه .. أم سعد :إسبوعين وإن سويت شي من وراي زادت وصارت شهر سامع .. أم نايف: الحين جا دور الماس .. الماس من سمعت اسمها تغير لون وجهها وتقول الله يستر .. أم نايف :مافيه تليفون ومافيه حديقة وعليك ترتيب الغرفة والخدامة إن إلمست شي بالغرفة ياويلك فاهمة ومخصوم من مصروفك .. الماس –فتحة عيونة من الصدمة - :ايش كل هذا لحالي .. أم نايف :ايه لحالك اللي يسمعك يقول مخليتك تسوين ذبايح اسكتي بس .. أم سعد :وإنتي ياعبير .. وداد تهمس لعبير :جاك الموت ياترك الصلاة .. عبير :اقول اسكتي تريك انتي بعدي .. وداد – ضحكت - :أدري وعقابي المعتاد طبعا لاشيء جديد .. عبير :أف اسكتي أنتي بس أبي أعرف وش بتسوي فيني الوالدة اسمعي اسمعي بس .. وداد :طيب طيب اعصابك .. عبير تطول صوتها : هلا يمه .. أم سعد :نافيه دلع وغياب .. وداد بهمس :يحليلكم إنتم تغيبون وحنا من إنولدنا على هالدنيا لونموت لو فينا ايش ماكان مانغيب من المدرسة ابد . أم سعد :من المدرسة للغرفة ومن الغرفة للمدرسة ومصرقك مخصوم منه .. عبير بهمس :أف وش بقت بالله عليك ياربي .. وداد: الله يكون بعونك لإسمعي وش عقابي وتحمدي ربك عقابك ولا شي عند عقابي .. عبير :ليش وش تعاقبك خالتي .. وداد :اسمعي وعرفين .. أم نايف :وإنتي ودادوه .. وداد ضحكت : إنتي بس لما تسمعين هالإسم تأكد فيه مصيبه اسمعي اسمعي .. وداد بصوت أعلى من قبل :هلا وغلا آمري وش عقوبتي أنا .. أم نايف :مخصوم من مصروفك .. وداد بهمس :عز الله اسفتاح مايبشر – بصوت أعلى – ايوه اسلمي .. جود ماتت عليهم ضحك .. أم نايف :مافيه تواعدين خوياتك وتطلعين معهم ولافيه لعب بالزلاجات بالحارة .. ولا فيه حديقة ولا تليفونات ..ولا.... وداد قاطعتها :الله الله الله كل هذا وش بقى بعد .. أم نايف :تونا عالبرى .. مافيه روحه للنادي إنتي وألماس .. ولافيه بروح عند صديقتي مسويه حفله ولا عازمتنا أنا وخوياتي ولا فيه بعزم خوياتي .. وداد بخاطرها - صبراٌ جميل والله المستعان -: لين متى طيب هالمره .. أم نايف :بريحكم كلكم لمدة اسبوعين واللي يعترض ولا يسوي شي ممنوع منه يتمدد لشهر ويزيد على سواياه وكل واحد ووش مسوي عاد .. أم نايف :وإنت يانايف .. نايف ابتسم :تدليلي .. أم نايف :مافيه طلعة من البيت ولا فيه كورة تلعبها ولافيه لعب بليستيشن ومخصوم من مصروفك .. نايف كشر :أف كل هذا يمه خففي علينا شوي .. وداد :أقول إحمد ربك اللي جاك ولا شي من اللي جاني .. أم نايف :اقول اسكتي انتي ومالك دخل .. نايف : يمه خففي شوي العقاب الله يخليك .. أم نايف :ولمدة شهر مو اسبوعين .. نايف : لالالالالا خلاص راضي راضي خلاص .. جود عجزت تكتم ضحتها عنهم وطلعت ضحكها بصوت عالي .. كلهم إلتفتوا عليها وقالوا :نشوف فيكي يوم .. وداد كملت : يا مطاط – وضحكت وداد والبقية بعدها - .. جود :مطاط بعينك وجعه.. ( مطاط :اسم سماها خالها عبد الله فيه كمعياره لها ومن سماها فيه والكل يناديها فيه عشان يغيضها بس ) نايف :ليه زعلتي وعصبتي عادي.. وداد :خليكي كووول ..- وضحكوا -.. ريم :خلاص عاد اسكتوا خلوني أعرف عقابي .. أم سعد: أووووش عاد خلوها تعرف عقوبتها .. مخصومه من مصروفك ومافيه تلفزيون ومافيه غياب ولا طلعه من البيت .. ريم :بس كثير .. سعد بهمس : احمدي ربك واسكتي لاتزيد عليكم وتوبين بجد .. أم نايف :والحين يالله قدامي اكنسوا الحوش كله .. أم سعد :هذا عقابكم الجماعي .. أم نايف :ومافيه نومه قبل ماتنظفوه .. الماس :وسوتارني ( اسم الشغالة اللي تشتغل عندهم ) وش شغلتها هنا .. وداد: تعطونها راتب ليه عشان تشتغل مو حنا .. أم نايف :عاد محد بينظف الحوش إلا إنتم ويالله الحين مافيه بعدين .. قدامي أشوف .. مشوا وهم يتأففون .. راحوا للحوش وأم سعد وأم نايف وراهم .. وداد مسكت( اللي - الهوز حق ماء الزرع ) والماس راحت عند صنبور الماء عشان تفتحه والبقية اثنين مكنسة واثنين مشطفة عشان التنظيف .. أم نايف وهي مستغربة: وش تسوون .. عبير :نظف خالتي .. وأم نايف: ليش الموية .. وداد :عشان نغسل الحوش .. أم نايف :أنا قلت اكنسوها ماقلت غسلوها .. نايف :يمه نغسلها أحسن من كنسها .. وداد متحمسه :خلاص يمه ازهليها اعتمدي علينا انتي روحي وخلينا نسوي المطلوب مننا .. أم سعد : موتلعبون بالمويه فاهمين .. سعد بهمس : ايه طيب بنلعب ونوسع صدورنا بعد .. |
:تدري عاد أحلى مافيك إنك تحب الوناسة يحليلك طالعلي .. سعد إستغرب وإلتفت وضحك :إحلفي الحين من أكبر أنا ولا إنتي .. :شوف ياحبيبي بالعمر إنت ولكن العقل طبعا أنا .. ريم :وداد شفيكي انتبهي رشيتيني بالموية .. وداد ابتسمت :سوري حياتي بس كنت اسولف ونسيت وين ارش المويه.. سعد :اقول احلفي عدال يم العقل شوفي المويه وانتبهي عليها .. وداد: اقول عن الطنازه فاهم – ورشت على سعد بالموية - .. سعد :هئئئئئئئ – مصدوم من اللي سوته وداد – وجعه ليش رشيتيني .. الكل ضحك على شكل سعد لكن يقولون الضحك بلوه .. سعد دخل المطبخ وكان للمطبخ باب للحوش هو دخل من هالباب.. خذا علبة مويه فاضية غسلها ونظفها وخرم الغطى حقها وعباها مويه من الحنفيه وسى كذا علبه له ولنايف (أكيد صديق وحبيب قلبه ) وقال بيسوي حرب ضد البنات هو ونايف .. عبير :يوه سعد وين راح وش بيسوي .. وداد :بين ضحكاتها .. والله مدري بس شكله كان تحفه .. ريم :الله يعينك يمكن راح يجيب سطل ماء عشان يرش فيها وداد .. وداد :لالاخفت يعني .. أقول ريموه خليك بحبيب القلب احسن لك .. عبير – ماقدرت تمسك الضحكة -:ههههههههههههههههههههههههههههههههههههههههههههه .. وينك نايف انقذ جوليت من الموقف المحرج .. وداد ضحكت على شكل ريم اللي انحرجت وعلى كلام عبير .. نايف :وداد مالك شغل في ريم فاهمتني .. وداد :لالالا تكفى تراني خفت بعدين إنت وش دخلك هذا شي بين البنات مالكم دخل فيه مفهوم .. الماس :هي كلش ولا خويتي ريومه .. ريم كان بيدها المكنسة طالعت وداد وابتسمت .. غمزت لـ الماس واشرت لها تاخذ المكنسة اللي بيد عبير .. الماس :عبير عطيني المكنسة وخوذي المشطفة لأني ماحب اشطف بليز عبور حياتي انتي .. وداد :أوف أوف أوف يلعن أم المصلح ياشيخ .. عبير تطالع الماس بطرف عين :احلفي .. مصلحجيه درجه أولى .. خذت الماس المكنسة وخذت عبير المشطفه وداد سمعت ريم تقول أنا ياوداد تقولين لي هالكلام .. التفتت وداد مستغربة من الكلام اللي تسمعه :وشبــ - شافتها تركض صوبها وبيدها المكنسة – يالخبلة وش تسوين .. الماس ركض ورى عبير وريم ورى وداد.. وداد رشتها بالموية لكن اللـــي ثقيل ماتقدر تسحبه بتاخذ وقت فرمته وصارت تركض .. نايف طالعهم :الحمدلله خبلات .. طلع سعد من المطبخ وقال :هع رجعتلكم .. نايف عجز يستحمل طاح عالأرض وهو يضحك : ههههههههههههههههههههههههههههههههههههههه لالامقدر خلاص وشفيهم العالم كلهم إنجنوا .. سعد وعلامة التعجب كاسي وجهه :وشبك تضحك ..؟؟! نايف :فاتك وش صار فاتك نص عمرك والله .. سعد بضحكه شريره :نياهاهااااااااا قل قل وش صار .. نايف :صحيح إن أهل العقول براحه ماكذبت وداد يمنها قالتها .. حكى نايف اللي صار لســـعد .. ــــــــــــــــــــــــــــــــــــــــــــــــــــــــــــ ـــــ .. عنـــــــــــد البنـــــــات .. وداد تركض :خلاص يالخبله وش فيك ماقلت إلا الحقيقة .. ريم :أي حقيقة هاه .. وداد :هئئئئئئئئئئئئئئئئئئ يعني كنتي تلعبين بمشاعر أخوي .. وداد دخلت البيت وصارت تركض وراحت للدرج وصارت يالله تلقط انفاسها .. وراحت لغرفتها وقفلت الباب .. وريم تطق الباب :ودادووه فتحي الباب أحسن لك .. وداد تضحك :يمه يمه خوفتيني اقول انقلعي بس في امك خير افتحي الباب .. ريم : هين ودادوه حسابك بعدين .. وداد :غزلان على غفله .. (غزلان اسم أم نايف) ــــــــــــــــــــــــــــــــــــــــــــــــــــــ ** انتهت البارة الثالثة ** ـــــــــــــــــــــــــــــــــــــــــــــــــــــــ أدري قصير بس إنشاء الله المره الجاية يكون أطول ابي توقعاتكم .. بالأحداث القادمة .. وراح يدخلون |
أتمنى تعجبكم البارة .. أبي ردودكم وتفاعلكم .. وراح يدخلون شخصيات جديدة بالباراة الجاية .. وش بيسوي نايف وسعد بالبنات ..؟؟؟؟؟!! وش سالفة الشخصيات الجديدة اللي بتدخل ..؟؟!! ووش قربهم لأبطالنا ..؟؟!! وش بيسون أبطالي مع العقوبات ..؟؟!! تحية طيبة مني لكم مكبحتكم :: الــــ وداد ــــروح ... ;) |
لالالالالالا ولا ررد إيش هالتحطيم .. البارات الجاية مابنزلها إلا إذا شفت ردود .. أبي أعرف رايكم عشان أكمل ولا أنسحب من البداية ..؟؟؟؟؟؟!!!:( وتحية طيبة : الــــ وداد ــــروح ;) |
متوقفه من 2009
تنقل للارشيف لحين عوده الكاتبه |
| الساعة الآن 11:29 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية