|
رسائل خاصة من عشاق على الانترنت
حب... عشق وضياع ثم دمار... هل سمعتم عن عشاق من الانترنت؟؟ حالات كثيرة تمكن منها الذئب البشري هذا من خداع النعجة الساذجة... عن طريق الانترنت... جميعكم يامن تقرأون كلماتي تستخدمون الانترنت... ولكن السؤال هل منكم من وقع بهذا الشرك؟؟ والالغام موجودة في كل مكان ابتداءا من غرف الدردشة ومرورا بالمنتديات... بإسم الحب خدعها... بإسم الاحساس تمكن من السيطرة عليها... شوهوا الحب واستغلوه لأغراض دنيئة... ولكن ماذنب ريم؟؟ صدقته... أحبته بإخلاص قبل أن تراه وعشقته بعدها... تسلى بمشاعرها وجعلها لاترى غيره... هل الذنب ذنبه أم ذنبها؟؟ قد تقولون كلاهما!! بالفعل كلاهما!! ولكنها مراهقة تسمع لأول مرة كلمة حب... ساذجة وصغيرة... هربت من ظروفها لترميها عند من ظنته منقذها ولم تعلم إنه من سيغرقها في النهاية... أعلم إنه ليس بعذر... ولكني لن أقف ضدها ولن أقف بصفها فقط سأحكي قصتها... قصة عشاق على الانترنت...
**** يتبع |
ج1
رسائل خاصة من عشاق على الانترنت أمسكت بصورته ذات الاطار الذهبي الراقي ورمتها على الحائط لتصبح مئة قطعة وهي تصرخ::حقير... أكرهك... أكرهك...لو أكره نفسي؟؟... آني غبية صدقته... وأكبر غبية... جلست تبكي حظها او بالأصح غبائها بعدها أمسكت بالموبايل وطلبت رقما وقالت وعينيها تملأها الدموع:: سدرة... تعالي بسرعة الله يخليج... **** أغمضت ريم عينيها لتتذكر أسوأ ساعة في حياتها... في اللحظة التي تدمر فيها حلمها ... في لحظة علمت أن لا مكان للحب على هذا الكوكب... وإنه مجرد كلام ساذجين لاأكثر... كانت تقف مع إحدى صديقاتها القديمات من أيام المدرسة قبل أن يفترقوا وتدخل ريم الهندسة المعمارية وتدخل صاحبتها رشا هندسة الحاسبات...أخبرتها رشا عن خطبتها وعن خطيبها المهندس أحمد... رشا:: أنتظري شوية أعرفج عليه... ريم:: كانت خطبتكم عن حب؟؟ ليش ما كلتيلي قبل؟؟ رشا:: لا صارت عن طريق الاهل بس حتى آني ما أعرفه كلش زين لي هسة... -صباح الورد والفل والياسمين... إلتفت الاثنان بإتجاه صاحب الصوت وتعلقت زوجان من العيون ببعضهم... أصيبت ريم بصدمة من رؤية أحمد حبيبها الآن وقد أخبرها إنه لن يعود... سافر ليعمل في إحدى دول الخليج... هل عاد الآن أم ماذا؟؟ هل عاد لأجلها؟؟... ولكن الصدمة الحقيقة كانت عندما تكلمت رشا... رشا:: مرحبا أحمد... هذي ريم أعز صديقاتي مع إنا أفترقنا كل وحدة بقسم شكل... ثم إلتفتت تكلم ريم وهي تقول...هذا خطيبي المهندس أحمد... أتسعت حدقتا عينا ريم من دهشة... استغراب... واستنكار... لايمكن أن يكون هذا كابوسا!! كيف حدث هذا؟؟ أحمد الذي لم تعشق غيره يأخذ أخرى ومن؟؟ صديقتها!! جاءها صوته الواثق وكأنه لايعرفها:: أهلا آنسة ريم... تشرفنا بمعرفتج... عادت لدهشتها مرة أخرى فهو لايخون فقط ولكنه محترف بالكذب أيضا... كم صدقت منه من الوعود... كم وكم وكم... وألآن؟؟ كأنه لايعرفها بتاتا!! يمكنها الآن فقط أن ترى ضحكه على غبائها من وراء نظاراته الطبية... عادت ريم لنحيبها وأمها بالخارج تحاول الدخول لكن لا فائدة...تذكرت كلماته في رسالته التي وصلتها قبل شهر وقبل سفره المزعوم "أحبج يالغالية... ماراح أنساج أبد رغم المسافات" وغيرها من كلمات الحب التي أسكرها بها... حتى جاءت سدرة... سدرة:: كافي ياريم مايستحق دموعج... آني ماراح ألومج...بس كتلج أنو هذا خطأ من البداية وماراح يستمر... ريم:: سدرة... آني أحبه مراح تفهمين هذا ابد... سدرة:: ليش متريدين تسمعين صوت الحق... هو يكذب عليج... يتسلى بمشاعرج... مايحب غير نفسه... صرخت ريم من الألم النفسي التي أصابتها بها كلمات سدرة ووضعت يداها على أذنيها لتمنعها من الاستمرار:: كااااااافي... كافي... لاتحجين أكثر... ثم بدأت تتكلم بهستريا:: هو يحبني... ما تفهمين... يحبني آني... مايحب رشا مايحبها كولي هو مايحبها... ليش تركني ليش؟؟ سدرة:: ليش كل هالانفعال ياريم... لاتكوني غبية هيجي... بما أنه تركج أتركيه ولاتكوني عاطفية همينه... آني -للأسف- عرفت بهذي العلاقة متأخر وإلا ماكان راح أخليج تضيعين نفسج... ثم برقت عينيها وهي تقول:: آتمنى تكوني كلتيلي كل شي" صح؟؟ ريم بخوف:: شنو قصدج؟؟ فجرت سدرة القنبلة:: تورطتي وياه؟؟... ريم كولي الصراحة؟؟ **** يتبع |
نعود بآلة الزمن الى الوراء لأكثر من عام حيث تجلس ريم أمام شاشة الكمبيوتر لتفتح منتداها المفضل وتبتسم وهي تقرأ كلمات رسالته الخاصة:: ((رسالة خاصة من المهندس)) وعليكم السلام أختي, بالبداية أقدم أعتذاري عالشي اللي صار, ما كنت أتصور أن يتطور الموضوع هيج وما تصورت إنج راح تأخذينه بهذي الحساسية, في المنتدى إحنا أخوة... وأرجو أنو ماتترددي بأرسال أي شئ لي في المستقبل أخوج المهندس@ **** عادت تكتب إليه... أعجبها اسلوبه وكتاباته في المنتدى... بالرغم من إنها جديدة هنا... وكانت مترددة كثيرا قبل أن ترسل له لأجل المشكلة التي حدثت منذ يومين وأحست بإنها مست كرامتها... فكرت إنها ستكسر مبادئها إذا أرسلت له أو تكلمت معه... فما أجتمع رجل وأمرأة إلا كان الشيطان ثالثهما... كيف تكتب له وقد عاهدت نفسها بعدم الأحتكاك بالرجال أو التكلم معهم... ولكن كرامتها غلبتها في الآخر وجعلتها ترسل لمن يسمي نفسه المهندس... ولكنه فاجأها بأدبه ولباقته في الكلام وأعتذاره الصريح... فرض أحترامه عليها من أول يوم... ومن أول رسالة... تلك الرسائل الخاصة اللعينة... **** ((رسالة خاصة من أميرة في خيالي)) أشكرك أخي على كلامك الجميل, ماتوقعتك تتقبل كلامي برحابة صدر... وأعتذر منك أذا تكلمت بعصبية بس عندي شوية ظروف صعبة خلتني سترس... وماراح أتردد أبعثلك عند أي شي أو أي مشكلة... وبالنسبة لي انت مثل أخوية الكبير... أختك أميرة في خيالي@ **** -أخوج الكبير؟؟ مو مشكلة هسة... بس مبينة خام ومتعرف سوالف الشباب!!! هكذا كان يتكلم أحمد مع نفسه وهو يجلس على سريره وبحضنه اللابتوب... **** ((رسالة خاصة من المهندس)) عادي ياأختي لاتعتذرين ماصار شي ومثل ماكلت... هنا كلنا أخوة وقلب على قلب وإن شاءالله مانقصر بأي شي بالمستقبل... بس أذا ماكو بيها تدخل مني ممكن أعرف شنو ظروفج... يعني إذا ممكن أساعدج بشي؟؟ أرجو ماتفهميني غلط؟؟ أخوج المهندس@ **** تأملت ريم رسالته قليلا... هل تكتب له مرة أخرى... هي كسرت القاعدة لأجل شئ ضروري أو لأنها ظنته ضروري ولم تكن بنيتها الاستمرار في الكلام معه... ولكن لايبدو إنه ينوي إيقاف تلك الرسائل... بنفس الوقت هي تحترمه وبسذاجتها ظنته مختلف... ولكن لماذا يكون مختلف؟؟أليس كالبقية؟؟ هذا السؤال الوحيد الذي لم يبدر لذهنها في ذلك الوقت ... ربما لو فكرت أكثر لغيرت حياتها للأبد... **** ((رسالة خاصة من أميرة في خيالي)) ابدا ماكو شي بس تدري قلق من النتايج اللي ممكن تطلع باجر أو بعده وأبوية مسافر ولازم يرجع من يومين وانت تعرف الحدود وتعقيداتها وبس... أختك أميرة في خيالي@ **** ((رسالة خاصة من المهندس)) إن شاءالله أختي يرجعلكم الاهل بالسلامة ويارب متفوقة ومن أعلى الدرجات بس مگلتيلي أنتي معلمة لو مهندسة لو دكتورة لو شنو؟؟ حتى تجي الدعوة بمكانها.... أخوج المهندس@ **** جميل مايخطه قلمه أو بالأصح جميل ماتطبعه أنامله... محترف في أختيار كلماته بدقة ليوقع فريسته... يختار اسئلته بذكاء في محاولة منه للوصول إلى مايريد... وبكل براءة أعني بكل سذاجة وغباء كانت هي تصدقه... **** ((رسالة خاصة من أميرة في خيالي)) شكرا أخي بس آني ولا وحدة من هذولا حاليا... آني لي هسه طالبة ثانوية عامة أنتظر نتائج القبول بس ممكن بالمستقبل أصير وحدة منهم... أختك أميرة في خيالي@ **** -صغيرة وساذجة!! تراهن ياعلي أوقعها بإسبوع؟؟ قال أحمد مخاطبا شقيقه الأصغر علي... علي بنظره حادة:: أحمد... صحيح انت أكبر مني بس هذا مايمنع إنو أنصحك... أترك عنك هالسوالف وعوف البنية لحالها وأنتبه لدينك ياأخي... أحمد:: يووووه كافي نصايح ياشيخنا... آني أعرف مصلحتي... ومجاي أغصبها على شي... علي:: بس أنت دتضحك عليها ياأحمد... ياأخي لاتتعدى على حرمة الناس حرام عليك انت عندك خوات... ولما لم يجد جوابا من أحمد الذي كان مستغرقا في كتابة رسالة جديدة خرج وهو يقول:: لاحول ولاقوة إلا بالله ربنا يهديك ياأحمد... **** ((رسالة خاصة من المهندس)) إن شاءالله ناجحة ومن الاوائل لعد عليج حشم إذا طلعت النتايج تجيبيلي ليز... وشغلة ثانية كنت أريد أكول دايما ابعثيلي لاتنقطعين عنا أبدا... وآني بالخدمة أذا أحتجتي شي معاج المهندس أحمد خريج هندسة الاتصالات لهذي السنة... المهندس@ **** أبتسمت ريم على رسالته الأخيرة... وأبتدأت الاحلام الوردية التي لم تعلم مسبقا إنها مجرد كوابيس سوداء حالكة لايخالطها النور ابدا... فكرت كم هو مختلف عن اي شاب قد تكلمه في الانترنت... اسلوبه محترم ومثقف وخريج كلية الهندسة... كم أحست إنها قريبة منه أوتعرفه منذ عصور ودهور... عدد قليل من الرسائل الالكترونية جعلها هكذا... ياترى مايخبئه لكي المستقبل ياريم؟؟ **** ((رسالة خاصة من أميرة في خيالي)) إن شاءالله أخ أحمد نظل على تواصل, الله يشهد معتبرتك مثل أخوية الكبير... وهسة آني مضطرة اطلع مع السلامة... أختك أميرة في خيالي@ **** قطب أحمد حاجبيه وهو يقرأ رسالتها قائلا بصوت ساخر:: أخوج الكبير منو ياعيني؟؟ بس هم مو مشكلة... إلا أجيبها... **** ((رسالة خاصة من المهندس)) انتظر رسايلج دائما بس الله يخليج لاتكولين أخوية الكبير لأنها تحسسني إني شايب عمري70سنة وسنوني مكسرة وعلى حافة قبري... ممكن تقولين أحمد بس أو براحتج؟؟ تحياتي المهندس@ **** ضحكت ريم على تشبيهه الظريف ثم قالت:: تواصل؟؟ شلون نتواصل وأخون مبادئي؟؟ بس هي كلمة طلعت وخلاص... بعدين شيريدني أكول غير أخوية الكبير؟؟ **** ((رسالة خاصة من أميرة في خيالي)) إن شاءالله أخ أحمد... بس آني أكول أخوية الكبير أحتراما لك مو لأنك عجوز حسب مافهمت... عالعموم مثل مگتلك مضطرة استأذن هسة لأن تأخر الوقت... سلااام@ **** ((رسالة خاصة من المهندس)) مع الف سلامة وتصبحين على خير وآمان... تدرين ماانتبهت عالوگت لأن آني همينة راح اطلع مو هسة المولدة راح تطفي... سلااااام من أحمد المهندس@ **** هذا كان أول يوم وأول خطوة في قصتنا... ياترى مانهايتها معك يااحمد؟؟ أي ضمير لديك لتلعب بمشاعر مراهقة في عمر أخواتك؟؟ ألا تخشى غضب ربك وأن يرتد هذا الفعل على أهل بيتك؟؟ **** نهايةج1 |
اتمنى اشوف ردودكم وتعليقاتكم عالبارت الاوا اذا عجبكم بكمل..........للعلم هي شبه مكتملة عندي.........دمتم بكل الخير
|
ج2
رسائل خاصة من عشاق على الانترنت في اليوم الثاني كانت ريم عند إبنة عمتها وكاتمة اسرارها سدرة تخبرها عما حدث بالأمس وعن المهندس أحمد... ريم:: تعرفينه ياسدرة؟؟ سدرة:: شلون أعرفه؟؟ ليش هو أكو أحمد واحد؟؟ وآني هسة صرت مستوى ثاني وهو حسب كلامه تخرج يعني مو من جماعتنا... بعدين منو گال هالحجي صحيح؟؟ هو كلمن گال كلمتين صدقتيه؟؟ ريم اسمعي كلام الأكبر منج لاتحجين وياه بعد... أوكي؟؟ ريم:: إي طبعا لاتوصين حريص... سدرة بنظرات متفحصة:: نشوف... **** في المساء تجلس ريم أمام شاشتها وتفتح منتداها الوحيد الذي تدخله والذي أصبحت متعلقه به دون اسباب واضحة... تذكرت يوم تسجيلها به لاتعلم سبب ضيقها تلك اللحظة ولكن صوت بداخلها يخبرها إنها تدخل حقل ألغام... طردت تلك الفكرة بسرعة وسجلت دخولها... كان المهندس موجودا كالعادة في ذلك الوقت... بعد دقيقة بالضبط... ((رسالة خاصة من المهندس)) أهلا أميرة شلونج... ترى عليج حشم تدخلين وماتسلمين؟؟ لعد صارو 2ليز... المهم بشري أخبار النتايج؟؟ أحمد@ **** ((رسالة خاصة من أميرة في خيالي)) اسفة أخ أحمد بس ماانتبهت لوجودك... عالعموم ماطلعت نتائجنا اليوم... انت بس أدعيلي والله خايفة كلش ماادري ليش بس أخاف مااجيب الكلية اللي أريدها... وهو بس يطلع القبول يجيك مو بس ليز واحد يجيك عشرة بس شلون تريدني أبعثهم؟؟ رسالة خاصة يعني؟؟ أميرة في خيالي@ **** أحمد:: لاوالله خوش نكتة كال تبعثهم رسالة خاصة!! **** ((رسالة خاصة من المهندس)) ياربي تجيبين أعلى قبول وأحسن كلية وتصيرين دكتورة... بعد شتريدين وكولي أحمد مايدعيلي؟؟ أحمد@ **** ((رسالة خاصة من أميرة في خيالي)) شكرا أحمد والله يسمع منك بس آني أريد ادخل هندسة من زمان رغبتي بيها... مااريد طب... وهو خلي يطلع القبول بالاول بعدين أتشرط على كيفي... أميرة في خيالي@ **** -كتلك أوقعها بإسبوع... هاي صارلنا يومين بس وأنشالت التكلفة من بينا... بس والله ينضحك عليها بسرعة... قال أحمد هذا لشقيقه علي بعد أن قرأ الرسالة الخاصة الأخيرة لريم بينما هز الأخير رأسه أسفا وعاد لقراءة كتابه... عقب أحمد قائلا:: لا وشوفها تريد هندسة... هو أكو أحد يحب الهندسة وفوكاها ماكو تعيين... مثل ماكتلك ساذجة ومتعرف شي... **** ((رسالة خاصة من المهندس)) واو يعني راح يصير عدنا مهندسة جديدة شي حلو والله وأي قسم ببالج لو مو إشكال؟؟ لو تحبين هندسة الاتصالات مثلي؟؟ ومثل ماكتلج آني موجود أذا أحتجتي أي شي... أحمد@ **** ((رسالة خاصة من أميرة في خيالي)) إن شاءالله والله يسمع منك ومو مهم القسم أهم شي الموفقية... ماأعرف شكول بس كنت أريد استشيرك بشغلة... بس ياريت الكلام يظل سر بينا... سلام من أميرة@ **** ((رسالة خاصة من ألمهندس)) شنو هالكلام أختي أحجي سرج بجيخانة قصدي ببير... وانا على كد مااكدر اساعدج... بس ياريت بسرعة لأن وره عشر دقايق راح تطفي الكهرباء... سلام من المهندس@ **** ((رسالة خاصة من أميرة في خيالي)) والله يااخ أحمد قبل يومين أجتني طلب أضافة للمسنجر وبعد مارفضتها بدت تصلني رسايل غريبة من نفس الايميل بس الأغرب أنو هالشخص يعرفني ويعرف كثير عن حياتي ودوامي...الخ... بالبداية كلت يمكن مقلب من وحدة من صديقاتي أو أحد أعرفه بس الظاهر الموضوع جديات ويكول واحد معجب راح اعرفه بعدين... وآني معرف شسوي بصراحة خايفة ومدأعرف منو هو بس مااريد أحد يتعرضلي بمكان... انت شنو رأيك؟؟ سلاااام@ **** ياترى ماتأثير كلماتها عليك يااحمد؟؟ هل بدأت تلين وتغير نظرتك للحياة أم إنك لازلت مصرا على عبثك؟؟ هل سيخفق هذا القلب يوما أم إنك ستضل في ضلال؟؟ ماتأثير ريم عليك وماتأثيرك عليها؟؟ سنرى ذلك في الرسائل القادمة... **** ((رسالة خاصة من المهندس)) ولا يهمج... انتي بس انطيني الايميل مالته والله لأشعل حاسبته شعل... هسة افكرلج بشي مرتب... أحمد@ **** ((رسالة خاصة من أميرة في خيالي)) إي أخوي تسلم... وانت تعرف شغلة حساسة ومااكدر أحجيها لأحد... والايميل هو ****@yahoo.Com واشكرك مقدما على كل شي... سلاااااام@ **** أحساس غريب بدأ يلامس وجدان أحمد... هل ستتغير مع ريم أم إنك ستستمر في تضييع البنات... هل بدأت تميل لريم أم إنه إحساس عابر... بصراحة انا لاأعلم... ربما سأعلم مستقبلا... **** ((رسالة خاصة من المهندس)) عيب أختي لاتوصين حريص وإن شاءالله ماكو إشكال المهم آني هسة أشوف شغلي وياه بس انتي كوليلي لو تعرضلج بأي مكان أو دزلج رسالة ثانية عالايميل... سلاااااام@ **** |
| الساعة الآن 01:30 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية