|
ذئب على ألمسنجر غير ممكتمله
ألسلام عليكم أنا عضوة جديدة بالمنتدى وهذه أولى مشاراكاتي
وهي رواية من3أجزاء قصيرة كنت قد أنزلت أولى أجزائها في منتدى أخر لكني سأكمل أنزال ألرواية كاملة هنا لاتحرموني من ردودكم ذئب على ألمسنجر ج1 كذب.. خداع.. أحتيال.. عالم مغرق في ضبابيته.. موغل في وحشته... تنسج فيه ألأحلام ألوردية... تغتال فيه ألقلوب بسهام ألعشق لتغرق في هذا ألعالم ألغامض أللامحدود أللامكانيات.... في ألبداية..فأني أعتذر لكل جنس أدم ممن ستصدمه حكاياتي.. ممن سيقول أنا لست بهذا ألسوء وبطل ألقصة لا يعبر عني هذه حقيقة دون شك فهذا ألأنسان قد يكون نادرا بوجوده لكنه في ألنهاية موجود... موجود ..ويمتلك ألقدرة على على خلق ألمآسي والكوارث.... وللاسف فأن هذا ألنوع من ألكوارث..تدفع به ألضحية ألثمن أولا واخيرا.. في مجتماعاتنا ألعربية.. .. ذئب على ألمسنجرج1 ألساعة تشير لتمام ألعاشرة كان بريدها ألالكتروني يضئ ..أبتسم وهو ينتظرها لتتصل به..مرت دقائق قبل أن تبعث له -مثل كل مرة أني ألي أدزلك فرد بسرعة أعتبرينه أختبار للشوق يا حياتي وأبشرك نجحت بأمتياز أنتظر لدقيقة _ألباقي تنجح أنت عموري ضحك بلا وعي _أنجح بس يا داليا لج أني أموت واتعذب بس حتى أحصل نظرة قداحة من عيونج ألحلوين وأحس بشئ من ألملل ورغب أن يفتح محادثة أخرى مع بريد ألكتروني جديد أضافه لكنه قرر أن يركز على هدفه ألذي لن يخطئه هذه ألمرة لقد أتعبته هذه ألداليا من 15يوم وهو لا يستطيع أن يحصل منها على صورة _حبيبتي أنتي ما تصدكيني? _بلى حبيبي _حبيبي....وضحك وهو يستند على كرسيه ويلعب باصابعه على ألماوس -ألكم أحد يقرصني أني ما مصدك واخيرا گلتيها .والله أني عد أهلهل وجنت راح أسمعج صوتي بس ألمايك عاطل _زين فأسرع يكتب لها _أعتقد لكل حبيب ألحق بأن يشوف حبيبته _رجعنا لنفس ألموصوع فأخذ نفسا عميقا وهو يستعد للخطبة ألتي حضرها لكنه قرر أن ينتظر لدقيقة أخرى وقبل في تلك أللحظة أجراء حوار مع ألبريد ألاكتروني ألجديد ألذي يحمل عنوان )زهرة ألياسمين)zahraalyasmen وبعد أن كتب هاي عاد ليكتب داليا أني مو جاي ألعب وياج والدليل إني رايد صورتج لأنني حبيتج وأريد أن أكمل معاج مشوار حياتي أني عجبتني شخصيتج واسلوبج وثقافتج ألعالية ،أنت هي ألأنسانة ألي حلمت بيها من أسبوعين كاملين فليش تحرميني حكي بشوفة حبيبتي وأنتظر طويلا بعدها..سأل زهرة ألياسمين شكد عمرج أختي (هذه ألمرة خلي أكتب ألأخت حسناء) وأطلق ضحكة خافته (أشكد خايف لا أتفشل وأنسى واحد من أسمائي فد يوم لازم أسجلها بموبايلي) وجاءه ألرد -عمار أنت شراح تسوي بصورتي روعة صرخ بلا وعي -راح أحفظها بگلبي وانام يمها واملي عيوني من شوفتها وأحلف أن تكون صاحبتها شريكة حياتي فجاءه ألرد بسرعة منو ألي يضمنلك أني حلوة (هاي شأكتبلها...) أقفل ألمحادثة مع زهرة ألياسمين بقوله أختي ألعزيزة أني راح أضطر أطلع لأن أمي تريدني بشغلة بس أكيد نحجي بعدين وعاد ليكتب بسرعة -أني حبيبتج وحلمت بيج وشمرت روحي وأسهرت ألليالي لعيونج گبل ما أشوفج .شلون ما يكون شكلك ما مهم لأن ألحلو بيج هو روحج وأحاسيسج واخلاقج بس أني محتاج أحصل صورة حبيبتي وذباحة قلبي -و بعد تأفف بضيق وقام وهو ينصت لصوت ماكنة ألخياطة ألذي ينبعث من ألصالة.. وعاد ليكتب وهو واقف وأبتسامة خافتة ترتسم على شفتيه -وخطيبتي وزوجتي وام جهالي وأميرة بيتي -وشنو ألي يضمن موافقتي? (واو...هسه وصلنا)..عاد للضحك وأتكئ بجسمه كله على ألكرسي -داليا أني ما ينقصني شي ماشاء ألله مهندس ومتعين بالجامعة وحالتي ألمادية زينة و وسيم كلتيها بعظمة لسانج ..أگدر أفهم ليش تجرحيني بهذا ألرد? يمكن هذا جزائي لأني حبيتج لم ينتظر أكثر من ثواني وجاءه ألرد -عمار أني ما قصدت أجرحك أني أسفة -مو كافي..كتبها وهو يخرج سيكارة -شنو طلبك -صورة ألي خبلت عمار وعملت بيه ألويل.. وخلته بس مدوخن و يصفن .لج أنتي ما أحد گدر يسوي بي ألي سويتيه -ليش حاولت مع قبلي - أعترفلج أني عرفت گبلك بنات بالجات مو بلمسنجر بس وداعتج وبراس أمي ولا وحدة هزت من راسي شعرة بس أنتي وكفت شعري سبايكي و عملت بيا عمايل.. -أشگد أكره ألولد ألي شعرهم سبايكي -مقبولة منج أنهان وأتبهدل وأذب بروحي بالشط فوكاتها على مودك.. ألكم ألعشق گتال -سلامتك عموري من ألگتل -عموري..أتخبل رسمي من وراج هي ظلت على ألگتل.. وهسه ألصورة لا توهيني بالحجي -أوكي ..أفحمتني! على رأي أمي .راح أدزلك لك صورتي واني گاعدة بالمرجوحة بحديقة بيتنا هههههه..ضحك دون توقف.. ( بألقصة گعود ومرجوحة والله وكعت ياداليا و(نو بودي) سمى عليج) ونفث بدخانه على شاشة ألكمبيوتر لكن نظراته شخصت وهو ينظر للصورة ألفتاة جميلة لأبعد حد لها شعر كستنائي مجعد وقصير وبشرة بلون ألثلج وشفاه وردية رقيقة.. عيونها ألنعسانة تعكسان شخصية بنت مدلله.. وفستانها ألوردي ألقصير يبين طول وجمال ساقيها كتب لها -أنت ما ممكن تكوني بشر لج أنتي ملاااااك -شنو عجبتك? ردت بعد لحظة -داليا..أنا يمكن أذا ظليت أباوع أكثر راح أحجي وياج باجر من ألنت مال عصفورية أنت تخبليييييين فدوى ألج توقف للحظة قبل أن يرسل (ههههه حلو دأزيد ألجرعة) ثم كتب بسرعة أنت أنجلينا جولي لو توگف وياج محد يباوعلها بعد لحظات -عمار أني أريدك عاقل مو مخبل.. -وداعتج ألي يشوف هذا ألگمر يا عقل يظل بيه تجاوز مرحلة ألصدمة..وعادت له أبتسامته ألخبيثة.أحس بشئ من ألتردد وهو ينسخ ألصوره ألى ملف-ألغبيات- لكنه صرخ باعماقه (هاي شنو بسام راح تحن عليها أنت نسيت ثأرك ووعدك أن ما تخلي بنية بحالها? ) عاد ليكتب..وأحساس بالنشوة يعتريه.. داليا توافقين تتقدم أمي لخطبتج ولم يصدق عينيه حين جاء ردها -جرب وراح أشوف.. صفر طويلا..وألدهشة تشل ملامحه ردد بصوت عالي (واضح راح أصل معاج أبعد مما جنت أتصور) ثم كتب -داليا أني جاد..أني أريد أخطبج على سنة ألله ورسوله فكتبت -أوكي..لو ما شعرت أنك صادق جان ما دزيتلج صورتي -حلو ثم أخذ نفسا عميقا -بس أني ما أندل عنوانج -أني بألواقع طالبة بكلية ألاداب قسم لغة فرنسية مرحلة 3 وأسمي ألحقيقي دلال ومو طالبة بكلية علوم حياة -دلال وكلية أداب هاي شنو,...... |
السلام عليكم ورحمة الله وبركاته
هلابيج اختي منورة اهلا وسهلا بك بيننا ممكن سوأل القصة من تأليفك انتي !!!!!!! اهلا وسهلا بيج مرة اخرى |
-أحتياطات أمنية..عمار تعرف أني ما جنت أعرفك بأألبداية
-زين.. وبأي حي تعيش بزونتي دلال..وكتب بسرعة يلى يا أم جهالي المولدة راح تطفي بعد دقايق -بزيونة من جهة دار ألأزياء نحن بيت أبو عزام . مدد رأسه على مسند ألكمبيوتر وتمتم( يا فرحة عزام بيج يا دلال....) -دلال ألمولدة أنطفت لحظات واطفي ألكمبيوتر وألله أتمنى لو أحجي وياج للصبح بس ألups يطول تشغيله بس دقيقة -زين حبيبي....باي.. -باي روحي.. وبعد لحظة..غير بريده ألالكتروني ألى وضع غير ظاهر.. وتمتم (وهسه..يادلال لازم صورتج تمر بحمام ألفوتوشوب..أنرادلها شوية فيكات...) ثم القى نظرة تائهة على ملف "ألغبيات"" 10 صور... 10ضحايا جميعهم بأستثناء نور لم يقبلن أن يقابلنه ويخرجن معه لكن صورهن نزلت بعد أن حورها ألى كل ألمواقع ألاباحية ألتي يعرفها نور ألوحيدة ألتي قبلت ألمخاطرة.. حدق دون أن يضحك بملامحها ألطفولية.. كتب تحت صورتها نور عبد ألخالق مسكينة ومظلومة من عمها وزوجته لهذا..سلكت هذا ألطريق... أرتسم طيفها في مخيلته حين كانت معه بسيارته ألمظلله ألنوافذ.. دموعها وتوسلاتها..وجهها ألاسمر ألرقيق ورموشها ألكثيفة.. كانت ضحيته ألأولى..صدقت..وعوده وألحاحه بالقسم بأنه سيخلصها من ألجحيم ألعائلي ألذي تعيشه مع عمها وزوجته وبأنه سيكون لها زوجا وأبا وصديقا... لم يفرط بهذه ألفرصة... وعادت ألذكرى للحظات.. -لؤي راح تزوجني صح? لم يجبها وهو يقود ألسيارة بصمت.. أعطته نظرة ترجي وهي تعيد ترتيب ملابسها.. -لؤي راح تجي ألوالدة وتخطبني من عمي مو ?... رد ببرود قاتل -ما راح توافق عليج..ماما تريد تزوجني من بنت خالي -شنو..صرخت غير مصدقة وأخذت تلهث وهي تقول -وآني? وأمسكت بسترته -خليني أركز لا أرتكب حادث وتصير فضيحة بالنسبة ألج لكنها ردت وهي تبكي وتضرب بيديها وجهها -وحالي هسه مو فضيحة وصوري ألي تهددني بيها فأبتسم -نوارا..تذكرت من ترجعين للبيت لا تنسين تصفحي موقع............ وراح تلگين مفاجأة حلوي كتير ههههه ..وهسه يلى أنزلي ما راح أوصلج لباب ألدار يا نونا كان وجهها غارقا بالدموع وجسدها يرتجف من ألانفعال لكنها قالت -سويتها يا نذل? نزلت صوري -أول مرة أعرف أنج ذكية لهذي ألدرجة وشعر بالخوف لحظتها من سكوتها ألمفاجئ ..نظر أليها بحذر وهو يتخيلها تخرج سكينا أومسدسا.. لكنها أكتفت عند فتحها لباب ألسيارة بالقول -إلهي يا لؤي يأخذ بثاري منك ألهي وينتقم من أعز أحبابك أحس بالصدمة وهو يتذكر والدته وشقيقته..لكنه ضحك -على فكرة ألدعاء ما يعود ألي أني مو أسمي لؤي ولا أني طالب بالادارة والأقتصاد ههههه جاو مدام... أوووف..قال بهمس وهو يدير نظره عن صورتها..لولا هذا ألدعاء لكن لم عليه ألخوف?..... زينة ألعنيدة لم تستعصي عليه وهاهي في ألصورة تحيط بذراعها رقبة ممثل غير معروف من أمريكا أللاتينية هند ألمتدينة..أرسلت له صورتها أو بالأحرى أرسلت ألصورة لصديقتها شهد كتذكار للصداقة كان بارعا في تركيبه للجسد لائم رأسها تماما.. أفاق على صوت رسالة ألكترونية من بنت ألليل -أوعى تفتكر أني سدأت أنك مش علخط يا وليد -ولو..يا.......أني شلون أهرب منج.. باقي ألحديث من أل 11 مساء حتى أل2صباحا..... مشفر... ....رقابة..... نهاية ج1 |
وعليكم ألسلام أختي
نعم ألقصة من تأليفي كتبتها بدافع أنساني وهو تبيان خطر نماذج سيئة على مسنجر |
هلابيج مرة ثانية
واتمنى ان توصل الرسالة للجميع بصراحة اسلوبك ممتع جدا بس اكو كلمات عراقية قوية ممكن البعض ميعرف معناة او يصير لبس عنده مثل (انكتل ) ممكن تكتبين انقتل بصفها بين قوسين حتى يتضح المعنى للقارئ الغير عراقي اتمنى ان ارى لكي قصص اخرى اسلوب جدا ممتع ومشوق موفقة عزيزتي |
السلام عليكم ورحمة الله وبركة هــــــــــلا وغلا فيك حماااااااامة قلبي اهلا وسهلا بك كاتبة ضمن اسرة ليلاس المحبة اتمنى ان تجدي ما تأملين بيننا حللتي اهلا ونزلتي سهلا وانا سعيده جدا انك من العراق ويارب نشوف لكي قصص اكثر علشان نتعرف اكثر علي الشعب العراقي علي عاداتهم وفقك الله عزيزتي http://www.liillas.com/up2//uploads/...f53ac9ea23.gif اتمنى لك التوفيق لك خالص ودي وتقديري http://www.liillas.com/up2//uploads/...9a805a2ebe.gif |
ألعامرية
أشكر تشجيعك و هلا بيك وباهل سعودية |
... ذئب على ألمسنجرج2
عند أنتصاف أل10 -ليش أنت مستعجل هيجي?بسام خليني أشوف ألصور زين -يا حبيبي أني تعبت لما لميت هذي ألصور تجي وتباوع ببلاش .... ثم بادل أبن خالته نظرة ساخرة وهم بقفل ملف ألغبيات -بس لو أعرف أنت شراح تسوي بهل صور وامسك بيده محاولا منعه من أغلاق ألملف ضحك بلا وعي - ههههه ولاشي أتباهى بيهم بس -لحظة لحظة هذي ألبنية أعرفها حينذاك حدق بقسمات قريبه ميثم باهتمام -منو.. -هذي ألي على أليسار ألي لابسة ألبدي ألأخضر لمعت عيناه ببريق خاطف -هذي غدير.. -غدير? لا أسمها سنبل هذي معانا بنفس ألمرحلة - صدك?..وفتح فمه غير مصدق ألحقيرة گالت لي أنها طالبة بالثانوية.. -بسام..ألبنية شكلها خجولة ومحجبة شلون دزتلك صورتها بهيج هدوم -أمم..وأقفل ألملف... سويت شوي تحويرات -شنو? وسحب ميثم فأرة ألتحكم(ألماوس)وفتح ألملف -بسام أنت شنو خومو شيطان -هههه أني بساااام ألفناااان ثم أستدرك -ميمي لزوم ألخدمة ألي سويتها لي تگدر تسحب ألصور على فلاشك وأني ألممنون لم يصدق ألأخير وأدخل ألفلاش بسرعة لكنه قال بعد لحظة .. - ما فتهمت عن أي خدمة تحجي -ما أصدك أنك ما سامع عن صواريخ ألبلوتوث بالجامعة. هم زين سحبت ألصور على موبايلي. -لااااااااااااا حرام ألبنية -كافي تصرخ لا تسمع خالتي.. أغمض ميثم عينيه و هو ينسخ ألملف.. -بسام .أتق ألله أبنات ألناس لاتحملني ذنب ألمخلوقة قام مبتعدا..وأمسك بيد ميثم -خلي نحجي وجلسا على ألسرير..وركز نظره على صورة ألفنانة ميسم نحاس على ألجدار وهو يقول -ماكو أحد أجبر سنبل هذي تبعث صورها وما دامها... فقاطعه ميثم فورا -ولو..هذا ما يبرر أنك تفضحها بهيج طريقة -بالنسبة لي أكو ألي يبرر.. -شتقصد?.وتقلصت ملامح وجهه وأعاد طرح ألسؤال بسام أنت شنو قصدك -أقصد أن ماكو بنية بهذي ألدنيا تستاهل تفكر بمصلحتها فتنهد ميثم لكنه رد بلهجة حادة -أنت ترضى أحد يسوي هيج أبسمة?.. ولم يملك لحظة سماع أسم شقيقته نفسه فصاح وقد أمسك بقميص ميثم - ألزم حدودك ولاتقارن بسمة بهذولا ألبنيات لكن ميثم أبعد كفه عن قميصه بهدوء وقال -هذولا ألبنيات عدهم أخوة همين فأرتبك وسار بأتجاه ألحاسبة وقال ليغير ألموضوع -لاتنس أل فلاش.. وحين كان يهم بسحبه دخلت خالته ومن خلفها بسمة ومروة -بسام ليش جان صوتك يلعلع فرد ميثم وهو ينظر ألى شقيقته بنظرات غاضبة -ماكو شي. ألوگت تأخر ماما -أي والله وأبوك يدك علينا والتفتت لمروة وبسمة وهي تضحك -خلو أخباركم ألي ما تخلص للمدرسة -فصاحت بسمة -خالتي ألله يخليج هو بيتكم على بعد خطوتين خلي مروة تبات عدنا أليوم -لا قاطعهم ميثم بحدة وألتقط ألفلاش من يد بسام ألذي كان ينظر أليه نظرات ساخرة -أخوج عنيد..رد بشماته -مو أعند منك يا أبن خالتي.. -أنتم شنو ألي صاير بيناتكم .. صاحت أم ميثم -هاي شنو خالة? نحن جنا نتناقش عادي..أصلا ميثم حبيبي وهو يعرف زين أني ما أزعل منه بقي ميثم ينظر أليه بأحتقار وهو يقول -يلى مروة گدامي عل ألباب وأنت ماما ألبسي عبايتج وعند باب ألغرفة أستدار نحوه -بسام بلييييز لا تفضح ألبنية -زين راح أفكر بالموضوع -أشوفك على خير .قالها ميثم وخرج أل10ونص..صفر وهو ينظر للساعة.. (ألجماعة ينتظرون) أسرع ليدخل ألى أيقونة ألياهو مسنجر مر بخاطره دلال أين ستنتهي معها ألامور أليوم?) علق بخفوت(يجوز نبدي فصل جديد) أصغى لصوت ألباب ألخارجي يغلق... ريثما يصبح على ألخط... (زهرة ألياسمين هذه ألتي أضافت بريده واضح أن ورائها قصة..أليوم سيتفرغ لها .. أكيد أنها أخذت أخر بريد له من واحد من ألمنتديات فهو يتعمد أن يجعله ظاهرا للجميع ودون أن يشير لجنس جنة ألحبheaven love@.من يستطيع أن لا يضيف بريدا كهذا) فور أن أضاء بريده جاءته رسالة من دلال نص ساعة تأخير عمار ?ألعاشرة صارت عشرة ونصف لحظة وضحك بعدها وهو يعلق (سمسمة منورة..زهرة ألياسمين بعد مافتحت.وديدمونة ماكو ألها حس من أسبوع) وأدار ناحية سمسمة... بعثت له برسالة أخرى -زينب ألحگيني أبن عمي طلب إيدي ومن رحت گلت لقيدار گال أنو ما يگدر يخطبني بهلفترة هذا ألسافل غمز بعيناه..وردد بسخرية (زينب بألخدمة..) وكتب لها بسرعة -ألسافل وعاد ليرد على دلال حبيبتي أني أسفة...عاد ليصلحها أني أسف بس گرايبنا جان عندي والتهيت معاه گبل شوي بس طلع طقطق باصابعه وهو ينتظر ألرد بعثت له دلال -هذا ما يجوز هذا تعدي على و گتي أني أنتظر أل10بفارغ ألصبر بعد ما نتزوج راح يصير ألو گت كلو ألي (نامي بألعسل)..ضحك بأستهتار وفي تلك أللحظة دخلت والدته ألى ألغرفة وهي تحمل بيدها برتقالة وسكينا وبلمح ألبصر غير ألشاشة أمامه ألى صفحة ألword جلست على ألكنبة بجانبه وهي تقشر ألبرتقالة -شلونها معنوياتك على تقديم باجر -كل شي تمام..علق بثقة -زين.. وبعد لحظة صمت ألتفت لوالدته -سكينة كل هلكبر دتگشري برتقالة -والله ما أدري وين تختفي ألسكاكين ألصغيرة -زين أسألي بسمة ولا ألسنيورا ما أختصاصها تدخل مطبخ -خلي أختك بحالها باجر عدها أمتحانات وكل شي مادرست بعد ومن طلعت مروة گعدت تبجي -ياحول ألله.هذا بدل ما تگعد تطمس راسها بالكتاب علق بتهكم..وهو يتناول ألبرتقاله -.وأخذت والدته نفسا عميقا قبل أن تقول -همين هي مقهورة من خلف ألبلوزة والله هي ما ضيقة كلش واعطته نظرة أستعطاف -ماما..هذا ألموضوع منتهي.. ترجعين ألبلوزة باجر أو أروح أني للسوك ألجمعة وأرجعها بنفسي -ما كو داعي.مروة راح تشتريها گالت ألبرتقالي يلوگلها قالت أمه بلهجة جافة - أحسن..وتناول فص ألبرتقالة دون أن يلتفت لوالدته وبعد لحظات صمت وقفت والدته خلفه ومررت أصابعها على شعره.. أرتبك..وعادت لنفسه ذات ألذكريات ألقديمة - حبيبي عاد والله حرام ألي گاعد تسويه أبسمة أنت دتحول حياتها ألى جحيم لم يرد وغالب أرتباكه بأن أخذ يكتب حروف عشوائية فأستدركت بغضب -ماظل ألا تجبرها تلبس ألنقاب -ههه گصدك ألخمار وقريبا كلش.وألتفت خلفه..هذا ألذي حجيتيه صاير وسيلة ليبين ألعدسات والكحل ألاسود ألعميق وألظل ألناري تعاي شوفي عدنا بالجامعة -أعوذ بالله من ألشيطان ألرجيم.. وأبعدت والدته كفيها -أنت شگاعد تحجي? بسام لاتنس أني ألمسؤولة بهل بيت بيت وماراح أسمحلك أن... قاطعها بغضب -ما راح تسمحيلي شنو? أن أحمي أختي ها..بعدين أني صاحب ألكلمة هنانا -راح يكون أحسن لو تحميها من تصرفاتك .. ومشت مسرعة تجاه ألباب ثم صفعت ألباب خلفها... .... بقي ساكتا للحظات.. أمتز ألبرتقالة ..وقلبه يدق بسرعة.. (بسمة لماذا أصبحت ألمسمار ألذي يدق به ألجميع على قلبه..?ماهذه ألأفكار ألبالية?.بسمة من بعد سيطرته لا تعرف كيف تضع مكياج..ولا تقدر أن تشاهد أغنية أمامه أو تتجرأ وتطلب موبايل به كاميرا) أغمض عيناه..(.له ألحق أ |
أغمض عيناه..(.له ألحق أن يفعل ..هذا ألحق ألذي أعطى لأم جميل راح سيستغله هو أيضا...
وألعذاب ألذي عاشه بطفولته سوف يسلطه على ألأخرين ومن دون رحمة..) فتح بريده..وهو يحس ببعض ألأرتباك? ثلاث رسائل تنبيه( Buzz ) من دلال مع ثلاث كرات صفراء لوجوه غاضبة رسالة من سمسمة زينب وين أنطميتي? واو..صرخ بعدها.. زهرة ألياسمين فتحت وبعثت له على ألفور -حسناء شلونج?... (طب وحدة وحدة وبلاش كل دا يجي مرة وحدة لاتجنن كدا )غنى بهمس ثم تمتم(هسه لازم أتفرغ لدلال) بعث رسالة واحدة ألى سمسمة و زهرة ألياسمين أختي أني أسفة بس راح أضطر أسوي أتصال ويا صديقتي ربع ساعة وأرجع بس ظلي على ألخط أوكي? .... (يلى يادودو خلي نشوف وين راح نننتهي معاج أشك أنك راح تضطريني أصدر صورج مع سنبل باجر بألحرم ألجامعي ههههه) ونفخ بعجوة ألبرتقالة على ألشاشة..... ألسواريه ألذهبي ألي لبستك هو راح يفجر مفاجأة ألموسم بكلية ألاداب... بعدها أخذ نفسا عميقا وكتب لدلال -أسف روحي بس ألخط فصل عندي -بس أنت ظليت على ألخط -أي أعرف بس شكله جهازي كن صار بيه فايروس كايم يقفل -أوكي -مشتاقلج حيااااتي هوااايا -أني همين (ههههه أنت راح تشتاقيلي دوم) -همين شنو? -عامل نفسك غشيم -فدوى گوليها? (هههه ما ظل شي ويخلص هل فلم ألهندي) -همين مشتاقة - بردت گلبي أي شلونج حبيبتي أن شا ألله دلولة ما ناقصها شي -سلامتك عموري -ألله أشگد حلو يطلع أسمي من تگوليه.. وعلق بخفوت (بسومي ماجان تضبط أبد هههه) -تصد گين أني ما نمت ألبارحة لحظة وحدة? -ولا أني عمار.. -سلامت عيونج ألنعسانة ..أكسيرة كلبي ليش ما نامت ? -جنت أفكر بيك وشلون دخلت گلبي.. (هذا شلون أنتصار)...تمتم بشماته -حبي أني جنت أحضن صورتج طوال ألليل وأباوع بيها واطرد ألنوم من عيوني طرد حتى ما أشرد لحظة وحدة عن شوفة حبيبتي -و حلمت بي? (أنت شلون غبية أكولج ما نمت)..تمتم وهو يتذكر سهرة ألامس.. -دلال عندي طلب?... (بدينا بالجديات..هههه..) -شنو حبيبي? -أريد أقابلج باجر بالجامعة.... أنتظر لثلاث دقائق دون رد... (يلى)... بعدها كتبت -ليش?.. (طبعا متوقع هيج رد بالاول منج)تمتم وهو يكتب -حتى أحجي وياج وجه لوجه وأنجن بيك أزيد -بس أني ما أكدر -و ليش أكسيرة كلبي.. مط شفتيه باستهزاء -أختي تداوم معاي بنفس ألكلية.. -زين..أنتظريني عند باب ألجامعة وأجي أخذج بسيارتي ألي تشبه سيارة مهند شاد أوغلو -شنو? مستحيل عمار (أنتهى شهر ألعسل) كتب لها -وليش مستحيل.. -عمار أنت ما ترضالي هذا ..وأذا جنت راح تخطبني راح نطلع بعدها شگد ما نريد.. -أرجوج..حبي..أني أريد أشوفج گبل ألخطوبة -أسفة عمار بس ما أ گدر (فرصة أخيرة ألج) علق وهو ينظر للساعة -ما راح تغيرين رأيج? بصيص أمل بزونتي -لا ...مستحيل.. لمعت عيناه بخبث -دودو..وصورتج ألي دزيتها لي ما راح تدفعي ثمنها راح أنشرها بالنسختين أصلية ومحورة وبالكلية همين -? -عنوانج ألي عطيتني هو صحيح مو.ورقمج همين? -عمار شنو قصدك -عندج كثير معارف بألكلية وأختج راح تنگل أخبار صورج للبيت أكيد -عمار أنت شكاعد تحجي -أسمي مو عمار للمعلومة بس -لحظة..أنت ما يمكن تكون حقير لهل درجة -تقابليني باجر بأل12عند باب ألجامعة يا أخت عزام والا أنفذ كل تهديداتي وأحلفلج راح أنشر صورج بالجامعة وأتصل على أهلك أخبرهم بسوالف ألليل ما لتج هذا بس أذا ما شفتك .. وبالمناسبة ولا وحدة كبلج عطتني عنوانها ألدقيق بهل ألهبل باي دودو.. وأقفل بريدها ومسحه بذات ألدقيقة... (أنتهينا بربع ساعة بالضبط يا هلا بالضيوف.). أرسل لزهرة ألياسمين مرحبا أختي ما تعرفت عليج أني أسمي حسناء عراقية مقيمة في سوريا أتاه ألرد أنا بدور من ألموصل..ضفت بريدكي بعد ما لفت نظري من فترة فد شعر رومانس شاركتي بمسابقة بمنتدى....... -هذا من ذوقج يا حبيبتي أشكرج من كل گلبي وادار ناحية سمسمة -أسفة حبي تمارا ألمهم أنت شقررت تسوين? و أعتصر باصابعه قشر ألبرتقالة وهو ينتظر ألرد -ولا شي راح أترك هذا ألتافه وأرضى بقسمتي. تأوه بضيق.(.وحدة راح تخلص بس مو على بسام) كتب بسرعة ولم يهتم للأشعار برسالة من زهرة ألياسمين -بس شلون ويا قيدار حاولي وياه مرة ثانية ولاتظلمين گلبج حبيبتي ترى تتندمين بعدين.. وادار ناحية زهرة ألياسمين وهو مرتبك -حسناء أريد أكولج ماكو واحد بالدنيا يستاهل تكتبيله هذا ألشعر ألحلو -وليش بدور.. (هنانا عدنا قصة لازم أكتشفها..) وجاء ألرد فوريا -ليش?..يا أختي ألخداع والخيانة هما ألي يحكمون بزمنا... (شنو هذا ألملل) علق ثم كتب ببطئ -يمكن أنت ما تعرفيني زين أني مجرد بنية مغتربة مع أهلها بسوريا بس يا أختي أني عندي ألقدرة أفهم مشاعر ألأخرين وأ گدر أساعدهم وراح أطمع أن تفتحيلي قلبج.. ريثما ترد..(.تمارا أني ألج) كان رد ألأخيرة -بس لا تسأليني عن هذا ألنذل لج عمل نفسه جنه ما يعرفني بعد ما گلت له عن أبن عمي (مو كلش نذل هذا ألقيدار لو جنت محله جان سويت بلاوي) علق وهو يضحك كتب وهو يفرك أصابعه -تمارا صدك هذا أبن عمج شيشتغل ما حاجية عنه گبل ..(.وهسه ألى بدور...) كان ردها غريبا -أني أحتاج ألي يسمعني بس مو أليوم ما أريد أحجي بألموضوع هسه.. ياه...وقام وهو يحس بالصداع... (مي خالف بدورة ننتظر..وكتب لها وهو واقف) -براحتج يا أختي... مشى بضع خطوات وشرب كأس ماء وأحس بعدها بطاقة غريبة تمارا راح تزوج.شلون أسمح بهذا قرأ ردها -أبن عمي عندو محل بألبياع) وعندو أختين وأخ صغير -زين أنت تحبينه.. جلس متكئا على مقعده وقد مدد ساقيه على قاعدة ألكمبيوتر -يجوز أحبه بعد ألزواج (شني هل سخافة...أني ما راح أسمحلج تبني حياة جديدة وسوالفك مع قيدار كلها محفوظة) -أبن عمج شنو أسمه? وركز نظراته على لوحة ألمفاتيح كان ألرد صاعقا له -وليش زنوبة -حتى أعرف توافق أسمائكم يا فالحة يلى يلى وأنزل قدماه على ألأرض -زوزو أني ماأؤمن بهذي ألامور -طيب..تمارا نحن صديقات من شهر ولا أعرف رقم تلفونج ولا موبايلج وفرك على عينيه ألتين كانتا تؤلماه -زينب أرجوج أفهميني بس أسفة ما أكدر... بعدها كتبت أستأذن..باي حبي (هاي..شلون تجرأت بس مي خالف أني ما راح أكون بسام أذا ما منعت زواجك حتى لو دورت بمحلات ألبياع كلها عن واحد ديخطب وحده گرايبه).... 3كرات صفراء تضئ..لكنه فقد ألرغبة على ألكذب وألتأليف.. تجاهل بريد بنت ألليل ألذي يضئ دوما أخر ألليل وخرج من ألمسنجر كله.... علق بيأس (ما أكتملت فرحتي بدلال..تمارا نفذت بلا صورة أو رقم بس ألايام جايا وما راح أعوفج أبد) وبلمح ألبصر..أحس بأن جارته ألقديمة أم جميل وابنتها تنظران أليه بشماتة.. أبتعدي يا غولة مسح على وجهه ليبعد طيفها عنه هي وابنتها ذات ألاسنان ألمكسرة... بسام..تعال خلي نلعب سو |
بسام..تعال خلي نلعب سوا
لم يكن يفهم وهو بسن ألرابعة شيئا مما تفعله به هاتان ألمرأتان....جعلتاه كاللعبة تلهوان بجسده كما تشاءان ولم تعرف والدته ألتي كانت تتركه عندهما وتذهب لدوامها بهذا ألا بعد شهور طويلة بعد أن تراكمت تلك ألصور ألتي أدرك مدى بشاعتها لاحقا في مخيلته..لتتحول ألى رغبة خفية في ألأنتقام من ألجنس ألأنثوي برمته..... كاناتا ترضيانه بانواع ألشكولاته واللعب كي لا يخبر أحدا..ولكن لسانه زل مرة امام خالته ألتي ثار جنونها واخبرت والدته على ألفور .. والمصيبة أنهما تكتمتا على ألامر خوفا من ألفضيحة وتركتا ألموت وحده ينال من أم جميل بعد أن زوجت أبنتها.وهذا ما جعله يكره حتى والدته ويحملها مسؤولية ماحدث.. روحوا عني...قام وهو يخفي عيناه باصابعه.. ثم أطفأ ألكمبيوتر وقد منع نفسه بصعوبة من ألبكاء نهاية ج2 |
انتظر التكملة بشوق غاليتي
|
جزاك الله الف خير
رائعة ننتظر جديدك |
القصة رائعة وهادفة .. عجبتني كثيير مع إني ما انجذبت بالبداية من مضمونها لكثرة الكلام عن هذي القضية والمواضيع عنها .. لكن كقصة وبهذي الطريقة شوقتينا جدا لمعرفة الاحداث القادمة ولمعرفة مصير الشخصيات .. بالرغم من كرهي لبسام لكني اشفقت عليه كثير .. هو مسكين مثله مثل ضحاياه .. رح انتظرك بشوق وتقبليني متابعة معك .. وعلى فكرة اللهجة راائعة ومفهومة .. موفقة يالغلا
|
ألسلام عليكم
في ألبداية أعتذر جدا عن تأخري بأنزال هذا ألبارت ألأخير بسبب أنشغالي بالامتحانات... شكر عميق لكل من شجعني بردودهم وارجو أن يكون هذا حافزا لي لأنزل قصصا وروايات أخرى بين أيديكم ألجزء ألأخير ا وسأنتظر ردودكم ذئب على ألمسنجر ج3 ألله أكبر ألله أكبر كان صوتها يرتفع بالتكبير تنهد بضيق وهو يدلف ألغرفة لكنه أطال ألنظر أليها عيناها لا تتحركان عن موضع ألسجود ولسانها يلهج بالتلاوة وكأنها في عالم أخر أنها في أل73 ورغم مرض ألروماتزم فهي تصر على عدم أستعمال ألكرسي... أعطاها ظهره وهو يجلس على ألكمبيوتر لن يؤثر به شئ أبدا... لكن تلاوة ألقرآن وصوت ألاذان يصيبانه بالتوتر والضيق أنه لا يستطيع ولو للحظات أن يستمع لصوت أي قارئ مهما كان مؤثرا بغيره حتى في مجالس ألعزاء ألتي كان يضطر لحضورها أحيانا كان يحاول أن يصم أذنيه بوسائل لا تجذب أليه ألأنتباه كأن يتمتم باي أغنية أو يشغل نفسه بحديث جانبي.. قناة ألمجد للقرآن ألغاها دون علم والدته واقنعها بعد هذا إن ألمشكلة في ألتردد وأشرطة ألكاسيت كان يتعمد أتلافها واحدا تلو ألأخر وكان يوقع أللوم دوما على عبدألله وسيدرا أصغر أولاد خاله . . أو يحاول أقناعها بأن ألسبب يعود لقدم ألاشرطة وكثرة أستهلاكها.. مر كل هذا بخاطره وهو يشغل ألكمبيوتر ويدخل ألى ألماسنجر.. ( هش نانا هش) تمتم بهمس بعد أن سمع لفظ سبحان.......... لا أحد على ألخط باستثناء بريد جديد بعنوان Robe** . لكن لديه رسالة على(ألاوف لاين) من بريد أضافه لكن لم يتكلم معه "أنت دمرت حياتي ومستقبلي خسرت بسببك كليتي وأحترام أهلي إللي صايرين يعاملوني مثل الخدامة..بس والله وتراب ألحسين آني أدعو عليك طول ألليل و بكل سجود ينتقم منك ربي ويلعنك دنيا وآخرة" (منو هاي) تساءل ليشغل نفسه باكتشاف صاحبة ألرسالة.. لايمكن أن تكون دلال أو سنبل فصورهما قد غزت ألجامعة أليوم فقط وقصة صاحبة ألرسالة قديمة.. ليست زينة أو إيمان بالطبع فهما لم تدخلا ألكلية بعد سمر أحتمال بعيد..ولبلبة مسيحية (منو) (همهم نور, شاكيرا أو يمكن هند) (هند..كان أهلها يعاملوها باحترام).... (أو هذي حمراء ألشعر ألتي كانت تتصور نفسها فنانة..)..ربما فهنا لديه أثباتات كافية تسجيل مكالمات..وصلت لوالدها فورا.... صفحات صور خاصة باسم ألفنانة والرسامة شوشو في موقع...........,مدموجة باعترافات سرية كانت تقر بها في ساعات ألليل ألمتأخرة وفيديوهات وغناء على ألمايك ولو كانت تعيش في محافظته لحصل منها على ما هو أكبر...هل مازالت حية لتبعث لي برسالة كهذه? (لا لا ما أتصور أهلج أكتفوا يعاملوج كخدامة.....) علق بسخرية ليست نور فطوال عمرها لم تلقى أحتراما..من عمها وزوجته...... (أف) قال أخيرا (مراح تگدرين تأذيني ولا أحد يگدر يسوي وياي أي شي) ... أشعار برسالة من Robe** -مين بدو يتشرف بمعرفتي -(زين آني أتصرف وياج) وابتسم بخبث وهو يلتفت لجدته ألتي كانت تجلس وتسبح بمسبحتها ألزرقاء ألاثرية -أسمي شكرية... وضحك بخفوت كي لا تلاحظ جدته لكنها أنتبهت وقالت -أكو شي يضحك بدراستك أبني -لا..وأستدار ضاحكا بس أني لكيت موضوع جنت أدور عليه عبر ألگوگل هذا محرك للبحث نانا... صدمت جدته لجوابه ..وعادت ألى تسبيحها..لكنها قالت بعد لحظة -لا تنسى تصلي گبل متنام -أكيييييييييد نانا قالها وهو يقرأ ألرد على رسالته -أديش عمرك يا شكرية? - 75سنة.. ووضع كفه على فمه وعيناه تدمعان من ألضحك -ويا ترى شو هو ألي بيأعدك على ألأنترنت يا جدة!!!! -بنتي...أومأ برأسه آني أؤمن بأن ألانسان لازم يعيش يومه وما دامنا نعيش بعصر ألتكنلوجيا فلازم علينا أن نتكيف مع لغة ألعصر ثم آني مو من ألعجائز أللواتي يعيشن على أنقاظ ألماضي وقبل أن يرسل كتب أخيرا آني حتى أشوف إنو صوت أليسا أحلى من صوت أم كلثوم. - ههههههه شو هلحكم !! (طيب) وعاد ليكتب -أنتي متصدگيني ? -طبعا ما بسدأك وانا اسمي روبي من سوريا وعمري 20سنة فقط وبجمال روبي وخفة دمها وفي تلك أللحظة أتاه إشعار بأن زهرة ألياسمين على ألخط (واو آني ألج يا بدورة أليوم راح أجيب خبرج ألاكيد) واسرع يبعث لها -أختي ألعزيزة جوابج ألبارحة ماطمني أتمنى أگدر أعرف مشكلتج واساعدج بحلها ووقع نظره بخطف على ألسكين ألذي قشرت به والدته ألبرتقاله امس لقد نسيته هنا...كان نصله يعكس جزءا من صورة هيفا وهبي ألتي جعلها خلفية للحاسبة.. وضعه جانب ألطابعة في ألمسند ألعلوي وعاد ليقرأ -شكرا حسناء آني يا أختي محتاجة شخص يساعدني لأني واگعة بمصيبة واريد مشورة أحد (بيسو موجود بألخدمة ههههه أختصاصي نشر ألمصايب والكوارث ألعائلية والاخلاقية وصاحب ألامتياز في منتديات.......ألثقافية! ههههه) تمتم بهمس واسرع يكتب -بدور ما أدري إذا جانت هذي صدفة بس هم يسموني بألبيت و بألمنتديات حلالة ألمشاكل وعندي رغبة أساعد كل ألناس وأخفف عنهم بكل ألوسائل ويجوز من حسن حظج إنج تعرفتي علي كتب جملته ألأخيرة وهو يخرج لسانه باستهزاء (زين على ما تبعث بدور مصيبتها خلي أروح لروبي) وانتقل بحركة ألية نحو ألبريد ألأخر.. -تريدين أبعثلج صورتي حتى تصدگين?.. -يا ريت كان ألجواب سريعا.. (مو على بيسو) وقام ليمشي ناحية جدته -نانا أريد أخذلج صورة رفعت جدته رأسها وحدجته بنظرة صارمة قبل أن تقول -صورة إلي? لا يا بسام لا فجلس على ألارض بجانبها وأبتسم لها - آني أريد أحتفظ بصورة جدتي وتاج راسي الله يخليج?..والله راح اشتاقلج من تروحين لبيت خالي باجر أطرقت جدته وضحكت -بسام آني مو صغيرة حتى تلعب علي بهل كلمتين فقاطعها -نانا تبخلين على أبكر أحفادج بصورة ليش تحتفظين بصوري آني بألبومج هذا ألذي عليه صورة شلال -زين ..يا ولد.. يلا بسرعة لعد... بس وين ألكامير -تعالي..وأمسك بيدها وهو يعينها على ألوقوف بكل جهده -باوعي هذي إللي فوق ألكمبيوتر -ذكرتني بجدك ألله يرحمه كانت هوايته أخذ ألصور تجاوز تعليقها وهو يقرأ من بعيد رسالة روبي -لك وين ألصورة يا جدة -أبتسمي بس. -أبتسمنا يلا يا وليدي خلصني -روعة.قالها وهو يضغط على مكبس ألكامير -نانا وألگمر أخوان. شوفي صورتج شلون تنور ألكمبيوتر -ياولد هذا ألحجي تگوله لصديقتك ثم أستدارت مفاصلي توجعني -أرتاحي أگعدي قالها وهو يرسل ألصورة..ثم كتب تحتها وهو واقف -شنو رأيج بنتي ولاتنسي تشوفي ألساعة خلفي أل9ألى ربع هذا بس حتى تصدگيني .. -شكاعد تكتب تحت صورتي? جلس على كرسيه وهو يبتسم أكتب أنو جدتي هي أحسن نانا بالدنيا -ألله يحفظك يا بسام ويعلي مراتبك ويخلينا نشوف فرحة تخرجك |
-ألله يحفظك يا بسام ويعلي مراتبك ويخلينا نشوف فرحة تخرجك
-هذا ألدعاء والا بلاش يانانا... -ماما ..دخلت والدته وهي تقول -ألمسلسل راح يخلص وانتي ويا بيسو وفتحت جدته عيناها -أي والله نسيت شصار من إيناس وغنى لا يكون ماتوا من ألحادثة مالت البارحة -ههههه تعالي ماما وشوفي وخرجت جدته ووالدته -باي ياشباب سلمولي على ليلى والبنات..قالها بتهكم وهو يشيعهما بنظرة ساخرة........ (هاي شنو شو بدور ساكتة وماارسلت شي يلا خل أتسلى ويا روبي) لكن ألأخيرة أرسلت له -جدة شكرية أديش حبيتي شباب بحياتك?.. (هههه آني أراويج) ثم أتكأ برأسه على كرسيه لحظات وهمس بمرح قصة حياة نانا مع بهارات بيسو -بنتي آني تزوجت صغيرة بعمر أل15 بس زوجي أستشهد بعد3سنين بثورة ألشواف جابولي جثته بعد ما علگوه ألشيوعيين على عمود كهرباء وبعدها تزوجت من أبن عمتي وهو طبيب وجان يحبني من طفولتي (من هنانا يبتدأ ألتأليف هههههه) وجان ألله يرحمه حنون وياي و أصر يدخلني مدرسة محو أمية وعشت وياه أجمل 30سنة بحياتي گبل ما يتوفاه ربنا من 10سنين وجان موته صدمة مگدرت أتغلب عليها لحد أليوم . لأن بعد مساندته لي دخلت أل... (خلي أخليها ألمعهد ههه) ألمعهد وألله رزقني 6جهال كلهم هسه شخصيات بارزة بالمجتمع ف3من ألولد و2من ألبنات يعملون بحقل ألطب وابني ألأخر مهندس وزوجتهم كلهم وعندي 9أحفاد.. نفخ على أصابعه( واو تكسرت صوابعي واحلى شي هذي ألارقام 3و30و10و6و9ههههه بس مو مشكلة يا مغرورة شوية صبر وكذب مفيد) (واخيرااااا ..رسالة من زهرة ألياسمين خل نقرأ -حسناء شكرا مرة ثانية... ماأدري شگول آني بس أبجي (هاي شنو يابنت واضح أنو وراج قصة من قصة) -أحجيلي بدور قصتج حبيبتي لا تقهريني أكثر عليج لا تستحين بس أفتحيلي گلبج ومن عيوني أساعدج (رومانسي حضرتي خل نقرا شكتبت روبي) -أنتي فعلا أم وجدة عظيمة -مشكورة حبيبتي تقبلين تصيرين حفيدتي بعد لحظات جاء ألجواب (هاي ألبنت تكتب أسرع مني) علق وهو يقرأ -أوافق..لأن أنا يتيمة ألأجداد (هذا شلون يتم ) وكتب وبعينيه نظرة حزن -زين أبوج وامج عايشين؟ وبقي ينتظر ألاجابة -أي ..دادي ومامي أغلى شئ عندي بالدنيا.. (مو مهم ) وشرد للحظات هو لم يعرف معنى أن يكون له أب أخذت ألحرب منه والده وهو بعمر أل3..لم يختبر هذا ألشعور ربما لو كان والده موجودا لأخذ بثأره من أم جميل كان يحترق بالغيرة والحسد حين كان يرى أباء زملائه في ألمدرسة.. يتمنى حتى لو كان له أب قاس وعصبي مثل أبو أقرب أصدقائه مصطفى.. كلاهما كان يحسد ألأخر على مكانه لكنه لم يعترف له يوما بحقيقة مشاعره.وكان يتباهى أمامه حين يسمع هذه ألعبارة منه (بس لو تعطيني مكانك بسام أنت عايش بجنة) كان يجيبه بضحكة -إحلم .. وكان في داخله يصرخ(ياريت أدخل هذا ألجحيم ألي تكول أنك عايش بيه ولو يوم) طوال حياته لم يقل له أحد لا .أعطته والدته مطلق ألحرية منذ طفولته دللته ولم تحرمه من أي شئ تمناه .لكن دلالها ألزائد جعله أنانيا يهتم فقط بأن يأخذ دون أن يعطي أو أن يخاف مثلما ولدت أم جميل ألرغبة في داخله ليدمر حياة ألأخرين دون رحمة.. أستفاق من شروده ليقرأ رسالة زهرة ألياسمين -حسناء ألموضوع بدى من جان ينتظرني شاب على باب ألمدرسة ويتعمد يتغزل بجمالي ..أو يذب گصاصات رسايله قريب مني ومرة لزمت وحدة و قريت كلام رومانسي مسمعت بحياتي بروعته. وبعدها بدت بت عمته وهي طالبة وياي بالمدرسة تقنعني إنه يحبني ويريد يخطبني بس يحتاج يحجي وياي شوية خارج ألمدرسة وبالفعل بديت أقابله بألفروع ألجانبية خلف ألمدرسة وأهداني بأول لقاء موبايل حديث مع خط خاص بيناتنا واتصال بالانترنت ... (روعة يلا كملي أكيد ألحكاية راح تتطور) وهسه لهذي ألمغرورة -جدتج ياروبي تريد تكحل عيونها بشوفة حفيدتها ألحلوة (هكذا بأختصار ومن دون أنتظار وافقي حتى أحصل على بضاعة من أول جلسة) بعد لحظة -بس.. -بنتي آني عطيتج صورتي وحكاية عمري لاتبخلي على جدتج بصورة حفيدتها بعد دقائق ....أستلام صورة (صورة صغيرة لوجه فتاة سمراء مع مكياج برونزي وشعر مصبوغ بذات أللون) (عادي عادي جدا) قال بصوت عالي..ثم همس( بس اكو مجال للتركيب أذا أكتفيت بهل ألصورة بألمرات ألجاية أكيد هاي روبي إلها أعترافات خاصة هههه) لكنه كتب -عين ألله باردة عليج بنيتي (وهسه خلي نخلص منج) -روبي راح أضطر أروح عيوني بدت توجعني) وعلى ألفور غير بريده ألى وضع غير ظاهر.متجاهلا 5عنواين بريد تضئ (راح أتفرغ إلج هسه يازهرة ألياسمين) وقرأ رسالتها -بعدها صار يتصل بي كل يوم على ألموبايل و بكل مرة كان يسمعني قصايد تخبل جان يگول أنه يألفها بنفسه وكنا نحجي بألليل على ألجات وبالساعات ألى أن أقنعني مرة أنو ما أروح للمدرسة حتى يجي ويأخذني بسيارته ونفر ألموصل كلها ونتونس سوا.. ظلينا نفر بالسيارة ساعتين وجان ألجو مطر . بعدها أقترح علي نروح لبيت والدته حتى يعرفني عليها ونتغدى هناك (لج ما تعرفين هذي ألحيلة من ألافلام) دمدم دون وعي -إي وبعد؟.. كتب وهو يبتسم ويتثاؤب -أستقبلتنا هناك حرمة عجوز برحابة صدر و گالتلي إنها حبتني وراح تخطبني و قدمتلي ألشاي وبعدها كعدت وشفت نفسي بحضن ذاك ألحيوان وگال وهو يضحك أنه نال مني كل إللي يريده وانه كان مستأجر ذيج الحرمة تمثل دور أمه (هذا شلون محظوظ علق وهو يمط شفتيه هذي ألغبية دلال ما إجت أليوم ورضت بألفضيحة وانتي تسلمين روحج بهل ألبلاهة..) -هذا شلون نذل وشراح تسوين? لحظة.لحظتان..ثلاث لحظات واستدار نحو ألساعة وهو يتابع عقرب ألثواني -ما أدري حسناء والمصيبة لو عرفت أمي وإلا أخوية بالموضوع جان كطعوني وصل وخصوصا وآني هسة مو بنية (أحتاج لصورة بس حتى أذيع حديث ألموسم بموقع......) -بدور بس أنتي ليش ضيعتي نفسج هيجي -أنتي متعرفين حالي.يا أختي آني أعيش بمعتقل مو بيت كل شئ ممنوع بقوانين أخوية لاحفلات عيد ميلاد صديقاتي,لا سفرات ويا ألمدرسة لا موبايل حديث ..حتى قنوات ألأغاني والافلام شفرها تصوري مرة گلب ألدنيا و شبعني ضرب بس لأن عرف آني غيرت ألقمر للهتبرد...جان غسان بالنسبة لي ألمنقذ من سلطة أخوية قرأ رسالتها ألأخيرة ثلاث مرات(واضح آني مو ألوحيد إلي أعامل أختي بهل ألطريقة) لكنه أحس بعدم ألراحة فهو ذاته كان قد ضرب بسمة مرة قبل شهور لأنه شاهدها وهي تتفرج على أغنية لمساري على قمر ألهتبرد (هاذي شلون صدفة)...تمتم بضيق (يلا بيسو قفل... يكفي هذا أليوم لكنه كتب وعيناه نصف مغمضتان -زين أبوج بعده عايش وصرخ بداخله (شنو لزوم هذا ألسؤال بيسو ) بقي صامتا ..وشعور بالانقباض يسيطر عليه -لا توفى قبل ولادتي بشهور.... (صدف صدف صدف) بعدين هي تگول توفي جان تگدر تگول أستشهد بحرب ألقادسية..همس وهو يحاكي نفسه وتذكر لحظتها أمر |
-لا توفى قبل ولادتي بشهور....
(صدف صدف صدف) بعدين هي تگول توفي جان تگدر تگول أستشهد بحرب ألقادسية..همس وهو يحاكي نفسه وتذكر لحظتها أمرا.. -تحاجيني من موبايل صح? ... بعد دقيقتين -أي بس ليش هذا ألسؤال?... (بسام شصايرلك لا يمكن تكون شاك أبسمة لو كنت شاك بيها جان رحت لغرفتها هسه بس ميحتاج هذي مجرد صدفة وبعدين ألبنية من ألموصل) (زين..ميحتاج أروح طبعا لا .. شنو ألفايدة? .. آني عندي هنا قصة خطيرة) ولكن أصابعه كانت ترتجف وهو يكتب -بدور آني راح أحاول أساعدج و راح أستشير والدتي وهي طبيبة نسائية حتى تشوفلج حل أو ترشدج بنصيحة(يا غبي نسيت أنك كلتلها أنك تحجي من سوريا) (بسيطة) واستمر بالكتابة بس خط ألانترنت راح ينقطع عدنا بدمشق لمدة شهرين فليش مترسليلي رقمج حتى أخابرج عليه خلال هذي ألفترة -ما أگدر تصنع ألابتسامة(ميحتاج الرقم أليوم) ورغم هذا عاد ليكتب(خل نتسلى أكو أمل) -بدور أنت ما تثقين بي ?أعتبريني مثل صديقتج بالمدرسة وصدگيني أنتي مراح تخسرين شي. -معاج حق آني مراح أخسر أكثر من إللي خسرته (أوووف وألرقم) -زين يا بدور والرقم? -*******0770 كان قد أغمض عينيه وهو يستقبل ألرسالة وحين فتحهما وشاهد ألرقم لم يحرك أي خلجة من حواسه بقي ذاهلا وهو يتأمل في ألارقام وحدقتاه قد أتسعتا لأبعد حد لحظة..لحظتان..أخذ قلبه يدق بعنف(..ل...ل...لا.)تقطعت ألحروف في شفتيه.. هذا رقمها (..لا) يشبهه فقط هو ليس متأكدا جدا..رقم بسمة ليس به 9بل هناك هو يحفظه.. لا أنت لست متأكدا.. لا يابسمة.. وقف وهو يرتعش والعرق ألبارد يغطي جبهته وامسك بجواله ونقل ألرقم ثم أتصل عليه لااااااااااا... جاري ألأتصال بسمة.. كان هذا ألاتصال ألخنجر ألذي مزق كل خلايا ألشك ألواهية ألتي تعلق بها أدار رأسه وألذهول يسيطر عليه ناحية مسند ألكمبيوتر ..أمسك بالسكين ووضعه في جيبه بحركة ألية .. لكن ماذا سيفعل..? مشى بخطوات مترنحة تجاه ألصالة.. سمع صوتها.. ماما ليش يدك علي بسام .. -إسأليه بلكت يدك بلغلط بقي واقفا في مكانه دون حراك (مو بهل ألطريقة يا ربي) وامتلأت عيناه بالدموع (بسمة ألبنت إللي ألبزونة تاكل عشاها..تسوي هيج ) قطع سلسلة أفكاره دخولها ألى ألغرفة -ليش تخابرني ها? وجهها شاحب كيف لم ينتبه لهذا.. قد نحفت بشكل لم يلحظه ألا ألان..شعرها ألكستنائي مهوش باهمال على غير عادتها.. -لأن..لأن.ولهث قبل أن يقول ببطئ لأن انتي عطيتني رقمج قبل شوية -شلون? وتجمدت ألأبتسامة على شفتيها بعدها وضعت كفها على فمها -أنت تتقشمر? لم يجبها وبقي يحدق بها بنظرات تقدح بالشرر وأنفاسه تتصاعد بتتابع -ب ب بسسام أخاف تكون أنت هي حاولت أن تجد ألكلمات لم تستطع..فأخذت ترتجف -آني حسناء يا بدور نطق عبارته ببرود قاتل لا لاااااااااا مستحيييييل واندفعت تركض نحو ألصالة أسرع خلفها وقد بدأ يستوعب ألموقف..وهو يصيح -آني راح أكتلج راح أشرب من دمج هسه هسسسه -بسام شكاعد يصير? -ماما راح يگتلني ماما أحميني منه أحتضنت والدته بسمة والمفاجأة تشلها - أنت تخبلت? وأخفت بسمة خلف ظهرها -بنتج فضحتنا وضيعت شرفها صرخ وهو يحاول ألهجوم عليها آني راح أ گتلها راح أ... وحاول أن ينقض عليها بعد أن أخرج ألسكين من جيبه فأمسكت والدته بيدها وجرتها راكضة نحو غرفتها ثم اقفلت ألباب عليهما أخذ يدق ألباب بجنون .. أفتحي يا..... والله مراح أعوفج ..راح أذبحج مراح تهربين مني أستفاقت جدته ألتي كانت تنام بالصالة على صوت صراخه لكن صوتها ألمرعوب ضاع خلف ضجيج صراخه وطرقه ألهستيري على ألباب راح أكسر ألباب وأخذ يدفعه بقوة ويضربه بالسكين ..راح أموتج يابسمة.. أندفعت جدته نحوه بسام أبني بعد هذا ألسجين . -عوفيني ..واستمر بضرب ألباب على ألجانب ألأخر كانت بسمة تشهق بالبكاء وتحضن والدتها بكل أطرافها وألام مصدومة لاتعرف ماتفعل.. فقط تصرخ به أن يتوقف لايريد أن يفكر للحظة سيقتلها وليحدث بعدها ما يحدث -أفتحوا.. وأخذ يدفع ألباب بكل جسده.. لكن صورهن تتابعت بالظهور واحدة تلو ألأخرى أم جميل تضحك زينة..نور..هند..لبلبة..شاكيرا..سمر..أيمان..سنبل.دلال. ألجميع يضحكن من حوله.. تترنح أطيافهن.. أبتعدوا.. وابعد جسده عن قبضة جدته ألقوية والدموع تغطي وجهه توقف لثواني..وأخذ يبكي دون وعي.. ظنت جدته أنه قد هدأ.. فحاولت أن تسحبه بعيدا تعال بسام بس خلنحجي ونفهم شنو القصة أشرحلنا شصار? شرد قليلا وهو يجلس على ألأرض..ويصغي لنحيب شقيقته وصراخ أمه -إبنيتي أنتي شسويتي?..أحجي بعدها قام وأخذ يدفع ألباب مجددا -منو هذا ألسافل يافاجرة أنطقي من هو حتى أگتلج واگتله وأشرب من دمه ودمك.. -زين أگتله بالأول..صاحت جدته وهي تحاول دون جدوى أن تبعده -منو غسان هذا يلا كولي ألباب يترنح وبدفعة قوية سيفتح بسام لا لا..صاحت ألجدة يا ناس يا جيران لحكونا لحكوووووووووونا ورفعت صوتها لأعلى حد لكنها لم تتحرك من مكانها وبقيت تمسك بذراعه لأنها خافت أن لا يسعفها ألوقت لو ذهبت لتنادي ألجيران... بساااااااااااااام صاحت والدته من خلف ألباب بسمة ما تتحرك...صايرا مثل قطعة لحم بيدي... أختك ماتت ماااااتت -هذي كذبة لأن ألباب إنكسر بيدي واندفع للغرفة... وجدته من خلفه تتشبث به .. صاحت والدته -شوف حتى نبض ماكو كانت بسمة مستلقية على ألأرض.. .. -بنيتي كعدي وقف جامدا بجانبهما وألسكين لاتزال بيده -هذي حيلة هي مغمى عليها بس فعادت للصياح وهي تضرب وجهها بكفيها - أگولك لانبض ولانفس...راح أخذها للمستشفى -لا...خليهاا تموت .. -مجنون أنت مجنون وحاولت أن تحملها تعالي ماما ساعديني -آني راح اتصل بالاسعاف.. قالت ألجدة وهي تدفعه بأتجاه ألعتبة لكنه جلس على ألارض..وأخذ ينظر أليهما كأشباح متحركة.. ثم قام مجددا وفي يده ألسكين لينقض ثانية عليها فوقفت جدته بوجهه..وهي ترمي ألجوال صوب والدته -كافي وصفعته بشدة مرة..مرتين ..ثلاث ..ألبنية تموت شنو هلوحشية سقط على ألأرض من قوة صفعات جدته بسمة ضيعت شرفها و.... راقب أمه وهي تصيح أسعاف حالة مستعجلة لهذا ألعنوان ..../..... بنتي ماتتنفس ونبضها متوقف -شلون عرفت? يجوز تكون غلطان بعدين أذا قتلتها راح تفضحنا أكثر بسام بس إهدى و ذب ألسكين..قالت جدته وهي تبكي لا أنه لا يريد أن يهدأ.. ولا يريد أن يفكر..سيقتله ألتفكير لأنه سيعرف لحظتها أنه ألسبب بكل شئ.. .أسرعت جدته ووضعت بطانية على ألارض وحملت والدته بسمة عليها وبسرعة رفعتاها وخرجتا ونظراتهما ألمرتعبة مركزة عليه.. لم يتبعهما..بقي جالسا على ألأرض... صوت بعيد ماذا كنت تظن? تلهو في بنات ألناس وتنشر صورهم وتفضحهم دون أن تنال أي عقاب.... (لا لا لا.جنت أرضى أموت وما يصير هيج) عاد ألصوت أقوى |
عاد ألصوت أقوى
تذكر نور..صرخاتها وبكائها (ألهي ينتقم منك بأعز ألناس عندك) ألرسالة ألتي جاءته على بريده أليوم هي ألأنذار ألالهي ألأخير... (كافي كافي) وأخفى وجهه خلف كفيه هند ألبريئة ألتي كانت تحدث صديقتها عن ألهداية والايمان.... وزينة ألطفلة أبنة أل14.. سمر ألمصرية ألتي بعثت صورها من باب ألتعارف دون أن تعرف ماينتظرها أبتعدوا عني.. دلال أخر ضحاياك.. (كافى..كافى..) شاكيرا ألفنانة ألي كانت تطمح أن تصبح رسامة مشهورة فشهرتها لكن بطريقتك وأيمان ألشاعرة ألبصراوية..ألطيبة ألتي أسكرتها بكلمات ألأعجاب على قصائدها حتى بعثت لك بصورها وباسرار حياتها ألعائلية (لا لا لا لا لا لا لا... ) هاهي بسمة قد دفعت ثمن أخطائك بعد أن جعلتها تعيش حياتها كالمساجين بسبب خوفك من هذه أللحظات... (كافي أرجوكم).صاح بمرارة.. (هذولا ألبنيات ألهم أخوة همين..قالها ميثم بالامس) صوت سيارة ألاسعاف يصم أذنيه.. صرخات بسمة.. حتى أم جميل تقف بعيدا وتضحك (أنتي ألسبب..أنتي إلي خليتيني أكره كل نسوان ألدنيا..) (أنتي ..أنتي..ألسبب.أن أن أنت وبقي يتمتم بهذه ألكلمات....ويجهش بالبكاء لساعات طويله وصور ضحاياه ألساخرة تطارده بتسلسل ودون أنقطاع... تمزق وتفتت أعصابه بسياط ألألم ... تذكره..بأن في ألسماء ربا عادلا..يمهل ولا يهمل أبدا......... ........أنتهت....... ...بقلمي.. هاقد أنهيت بينكم ثالث رواياتي ألتي كتبتها والوحيدة ألتي كتبتها باللغة ألعامية.. هل نال بطل ألقصة ما يستحقه من نهاية? أليس ألموضوع ألذي تكلمت عنه سببا في ضياع ألكثيرين? لا أدعو أبدا ألى ألخوف ألمحموم من أستخدام ألمسنجر أو غياب ألثقة ألمطلقة مع من نتحدث معه لكن فقط لنتعامل بحذر ولا نغتر خلف سيل ألكلامات ألجذابة كي لا نسقط ضحايا أخرين.. أختكم من ألعراق حمامة قلبي |
السلام عليكم ورحمة الله وبركاته
بصراحة ودون مجاملة القصة روعة واسلوبك جدا رائع وجد اشكرج لانك تناولتي بقصتك المسنجر وعواقبه بطريقة مختلفة تماما بينتي العقاب الذي ممكن ان يتلقاه الانسان عند العبث بشرف الاخرين حقيقي تأثرت بالقصة انقهرت على طفولة بسام التي لم يعشها طبيعية وياكثر من هم على شاكلة بسام ايتام الحروب ولكن بالتأكيد ليس كلهم بسام واعجبتني طريقة عرضك لتحرش الجنسي بالصغر وعواقب بالبكبر لا ادري عن ماذا اتكلم كل ما اقوله وفقك الله وانتظر المزيد |
رائعة هي قصتك واسلوبك غاليتي دمت بود ننتظر جديدك
|
قصة وااااااااااااااااااااااااااااااااااايد حلوة
|
ارادة الحياة
ميمي وجواهر سعدت جميعا بمروركم وتشريفكم لروايتي وعذرا على تأخر الرد |
ارادة الحياة
ميمي وجوهرة سعدت جميعا بمروركم وتشريفكم لروايتي وعذرا على تأخر الرد |
متوقفه من 2009
تنقل للارشيف لحين عودة الكاتبه |
| الساعة الآن 04:02 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية