|
(يلا حماس) اسرة سعيدة .........متجدد
السلام عليكم ورحمة الله وبركاته كيف احوالكم؟ فكرة موضوع في بالي من فترة ويارب تعجبكم كتير مننا في سن 20-30 وكتير مننا لسة ماتجوزوش وفي منهم بيفكروا ومحتارين وخايفين ليفشلوا بعد كدة ايه رأيكم نتناقش هنا خطوة بخطوة ازاي نبني اسرة سعيدة على اساس قوي من الحب والتفاهم ويكون رضا الله وفايدة ديننا اهم اهدافها؟ يلا نبتدي مع بعض: واول خطوة: اختيار شريك الحياة: - فلانة -نعم ياماما -فلان متقدملك, هو كذا وبيشتغل كذا و......... ها ايه رأيك؟ فكري براحتك وردي عشان اقول لوالدك رأيك -بس أنا خايفة, اوافق ولا ارفض على اساس ايه؟ - يابني ياحبيبي, مش هتتجوز بقى عشان اطمن عليك؟ -ربنا يسهل يا امي -طب ايه رأيك في فلانة؟ -طب افكر ايه رأيكم في حيرتهم؟ تعالوا نشوف سوا ايه هيا اسس الاختيار الصح: اول حاجة واهم حاجة: الدين: هو دة اهم اساس للاختيار: فالرسول صلى الله عليه وسلم قال: (ان جاءكم من ترضون دينه وخلقه فزوجوه) وقال: ( فاظفر بذات الدين تربت يداك) النصيحة هنا موجهة للطرفين انهم يخلوا الدين اساس لاختيار الطرف التاني لما يكون شريك حياتك يعرف دينه كويس هيراعي ربنا فيك, وهتقدري تأمنيه على نفسك, وهتقدر تطمن انها هتربي ولادكم صح تاني حاجة: القبول: ومش بقصد بيه القبول الشكلي فقط وانما لازم يكون معاه ارتياح نفسي كمان بمعنى: ان ميكونش في نفور بين الطرفين يوم مايروح الخاطب يتقدم للبنت, ويراها, لو اي طرف منهم شعر بعدم ارتياح للطرف الثاني دة بيكون سببه ايه؟ هنشوف سوا: لما بتشوف حد لأول مرة, مش ساعات بتحس كأنك مرتاحله وتعرفه من زمان مع انك اول مرة تشوفه؟ وأوقات لما بتشوف حد لاول مرة بيبقى نفسك يمشي من قدامك بأسرع وقت لأنك مش طايقه؟ نفس الموقف بيتكرر في الحالة دي اوقات لما بيشوفوا بعض لأول مرة بيحسوا كأنهم مش طايقين بعض, أو بمعني آخر مش قابلين بعض, مع انهم مش عارفين بعض. ساعات بيكون الانطباع دة صحيح, وساعات بيكون غلط, عشان كدة مش المفروض نحكم من اول لحظة وانما نفكر كويس قبل ما ناخده دليل على ان الجوازة دي ماتنفعش تالت حاجة: التكافؤ: وزي ماتناقشنا في موضوع لين في الحوار الجاد: مش لازم يكون تكافؤ علمي وانما تكافؤ ثقافي لان مش كل واحد معاه درجة علمية عالية بيكون مثقف, ولو كان الفرق بينهم كبير هيكون كل واحد فيهم كأنه ف وادي تاني ومش هيعرفوا يتواصلوا مع بعض كمان لازم ننتبه لنقطة: التكافؤ المادي: مش دايما بيكون مهم, ولو ان البعض بيهتم بيه جدا, لكنه اساس غير صحيح للاختيار, اه لازم يكونوا قريبين من بعض لكن مش لازم يكونوا متساويين تماما صح؟ هي دي اهم الاسس ومنتظرة مناقشاتكم عشان نشوف ايه تاني ممكن يكون اساس للاختيار؟ والخطوة الجاية: اول مقابلة أو الرؤية منتظراكم:flowers2: وعقبال عندكم جميعا |
انا من ناااحيتي بخاف من هذا الموضوع
مابعرف ليش يمكن انا بطبعي طفوليه ووو بحس اني مش قد اني اتحمل الواجبات الزوجيه والعائليه رغم اني في بيت اهلى طباخه ماهره والبيت كله علي بس انا احس اني ما ابغى وبمجرد ما اسمع بطاري خطبه بخاف وبصد وبس |
اهلا روز
شوفي ياستي الخوف شيء طبيعي جدا طبيعي اننا بنكون كلنا خايفين اول ماتلاقي مامتك بتقولك جالك عريس بيملا الرعب قلبك بنخاف لاننا بنحس فجأة اننا كبرنا وان دي مسئولية كبيرة علينا ويمكن بنخاف من بكرة وياترى هيكون الارتباط دة ناجح ولا لأ طبيعي الخوف المهم مايسيطرش على كل تفكيرنا ويشل مخنا لكن نستغله صح نخاف وايه يعني لكن مانقولش لأ عشان خايفين صح ولا ايه رأيك؟ منتظراكي تاني وتالت وعاشر بالمناسبة فين باقي الاعضاء؟ |
أهلين اسراء ياقلبوووو
اسراء انا الحمدلله قاده على تحمل المسؤليه ومتحملتها حاليا >>يعني اذا على البيت >>فهو الان فوق راسي وبعرف اني كبيره بس عارفه انا ما بتصور حالي ام ما بتصور حالي مع رجل غريب بخااااف كثير بتعرفي انا ابن عمي لما بيتصل على التلفون وبرد عليه >>بالصدفه بس بطبش التلفون بوشوه يعني بخجل كثير واخاف اكثر فاهمه علي ماني متخليه حالي زوجه ابدااا يمكن لوحاول حد و زوجوني له غصب بس اوصل ع الفندق بقفل الباب على حالي وابكي وبس >>بعرف انو غلط حكيي بس ما بعرف ليه انا هيك رغم اني رومنسيه اووي وبحب الحب واتمنى اعيشه يوم واحب واتحب بس من بعيد لبعيد وبس فاهمه علي اسراء يمكن انا عقدتك هههه |
هاى اسراء عايزة اقولك ان الموضوع يجنن وعجبنى موووووووووووت وبعدين انتى ماشية فيه بسلاسة جميلة اوى وترتيب جامد جداا بشكرك جداا على الموضوع اختيار ممتاز نيجى بقى للمناقشة انا سنى 19 سنة ومن الفئة اللى فعلا ممكن تكون على وش جواز هى خطوة تقيلة مسئولية فعلا كبيرة يمكن عليا كبيرة جداااااااااا لان انا تحسى انى طفلة شوية تصرفاتى ومشاعرى طفولية حبتين يعنى مش بالعقل اللى اقدر ارتبط بيه واحدد الرجل اللى هعيش عمرى كله معاه وهنكون اسرة سوا بس برضه احيانا كتيرة بفكر فى الموضوع دة انى ارتبط بواحد كويس احبه ويحبنى وسوا نسعد بعض ونبقى اسرة سعيدة حلم جميل طبعا تتمناه كل انثى وانتى بصراحة بتساعدينا اننا نحول الحلم دة لحقيقة بس بشوية عقل يعنى نفكر صح ومش نتسرع وناخد الامور بهداوة عجبنى جداا موضوع ان احنا لازم منتسرعش فى الانطباع الاول ولازم ندى نفسنا فرصة قبل ما نقول اه او لا ومش شرط القبول الشكلى فقط لان لو على اساسه تمت الموافقة يبقى دة غباء لان احيانا بيكون فيه شباب جذابين جداا لكن لا يصلحون لان يكونوا ازواج صالحين وطبعا الدين نقطة مهمة جدااااااااااا لازم فعلا ناخد بالنا منها لان التقى واللى يعرف ربنا هو بس اللى هيصونى ويحبنى ويحافظ عليا ويراعى ربنا فيا واكيد التوافق فى المستويين الثقافى والمادى مش شرط يكون توافق تام بس لازم يكون فيه تناسب وقرب وان اعتقد ان لازم الرجل يكون اعلى من زوجته فى ثقافته لان المرأة لا تحترم الرجل الذى اقل منها فى ثقافته لكن لو هى اعلى منه فى المستوى المادى عادى اما الثقافة لأ00تختلف مرسى ليكى كتير على الموضوع الرائع مستنية الجزء الثانى على نااااااااااار |
اهلا اهلا اهلا وسهلا سرو عندنا يا دي النور يادي الهنا :dancingmonkeyff8: شوفي ياستي موضوع جميل والحوار فيه لاينتي وفي جعبتي حاجات وحاجات وحاجات شوفي ياستي .. ذكرتي نقطة مهمة اوي التكافؤ : تصدقي انو في ناس كتير بلخبطو في المفاهيم ويفكرو ان دي ليها علاقة وطيدة بالعنصرية انه يكون العريس قريب عشان يكون مكافيء ليها .! دا غلط فادح ..لازم نلاحظو !! تعرفي انتي ذكرتي نقطة التكافؤ واحد خطب وحدة قبل يومين في مشكلة هنا انو مافيش تكافؤ مادي برغم انهم من نفس العيلة ولكن ما شاء الله ما شاء الله البنت يتيمة وغنية واخدت ورث ابوها بالملايين انا كنت اشوف دي مشكلة رغم انهم قنعوني ان دا شيء ثانوي طالما هو قرر انو يصرف ومايمسك من مالها ولا ريال .! ........ ههههههههههه ضحكتيني يا روز اشك انو دا مش خجل .؟! دا رعب حتى مش خوف ههههههه :lol::lol: طيب ليه بتحسي كدا؟ ماعندك احلام معينة يكون عندك اطفال وتسافري معاهم و..و..و اشكركم حبيباتي مستمتعة بنقاشي معاكم :flowers2: موضوع يستحق 5 نجوم رائع ..يطلق العنان للقلب والفكر للتعبير :55::55: جميل جدا:55::55: سلامي |
هههههههههه
لين يا قلبو نورتي يا عسل اه هو هذا الشعور اقرب للرعب الا بحلم يكووون عندي اطفال وبموت فيهم كمان بس مش عارفه بدي اطفال بس من دوون ما اكلم اي راجل ولا يحاكيني اي راجل مع العلم اني بنت وحيده بين اخواتي الشباب |
اقتباس:
ماعقدتنيش روز انا متعقدة جاهز مش غلط حبيبتي نحكي ونتكلم عن مخاوفنا بالعكس كدة احنا بنساعد نفسنا نتغلب عليها بس محدش هييجي وهيقولولك انتي فرحك النهاردة اكيد في فترة الخطوبة هتقدري تتعودي ان يكون في حد ف حياتك تعرفوا طباع بعض وتتعودوا على بعض وتفهموا كل واحد فيكوا بيفكر ازاي يمكن زي ماقلتي انتي ولين انه بيكون شعور اقرب للرعب لكن اكيد هتلاقي نفسك بتتغلبي عليه لو حاولتي منتظراكي تقوليلي فرحي بكرة وتابعي معانا باقي الحلقات |
اقتباس:
تعرفي بالرغم من اني بشتغل حاليا ومسئولة عن عيادة وزي روز متعودة على تحمل المسئولية الا اني برضه بشعر احيانا بنفس شعورك: اني طفلة واسلوبي اسلوب طفلة المفروض فعلا نفكر بهدوء وبعيد عن اي انفعال, يعني ماينفعش مثلا تاخدي القرار في موضوع زي دة وانتي تحت اي ضغوط لأي سبب زي مثلا ضغوط الامتحانات(لو مثلا كان في افندي مستعجل اوي وجاي يتقدم وقت الامتحانات غلاسة بقى) او حتى ضغوط الأهل لازم يكون ذهنك صافي وتفكيرك هادي وبعقل, وماتسلميش لأي ضغوط, لأن القرار دة بيترتب عليه حياتك ومستقبلك كله بعد كدة عجبني جدا كلامك ان المستوى المادي لايهم المهم المستوى الثقافي, ودة رأيي برضه انهم يكونوا متساويين او هو اعلى منها وفي مثل اعتقد انك تعرفيه: خدوهم فقرا يغنيكم ربنا: فاهماه؟ لو هو مستواه المادي اقل منها وايه يعني؟ ممكن سوا يساعدوا بعض لغاية مايبنوا بيتهم, وفكرة العريس الجاهز اعتقد انها مرفوضة, لان مش لازم يكون غني ومعاه وعنده و......و......... عشان يكون مناسب, في اعتبارات اهم بكتير زي ما قلنا قبل كدة الدين والاخلاق وطريقة التعامل والطبع, وكمان مدام بيشتغل يبقى ايه المانع نكون حياتنا سوا؟ شكرا ليكي جين ومستنياكي دايما |
اقتباس:
حبيبة قلبي انا مكاني هنا اصلا ولا نسيتي؟:lol: شوفي ياستي: قلتي حاجة مهمة جدا: ان البعض بيفتكر ان التكافؤ معناه انهم من نفس العيلة ودا غلط كبير, مش لازم يعني الواحد يتجوز بنت عمه والبنت تتجوز ابن خالة جوز خالتها مثلا عشان يكونوا من نفس العيلة وقرايب ومتكافئين المثال اللي ذكرتيه توتة لفت نظري: في حاجة لو الزوجة اعلى من زوجها في المستوى المادي الاعتراض على النقطة دي لانها ممكن تسبب حساسية بينهم في التعامل, ولو كان الزوج غير امين هتحصل مشكلات كتير لكن لو كان زي مانتي ذكرتي اعتقد مافيش مشكلة وربنا يوفقهم ........... معاكي في ان روز مرعوبة وانا كمان مرعوبة اكتر منها ..................... شكرا على الخمس نجوم والترحيب لين:flowers2: ودايما مستنية مناقشاتك في باقي الموضوع وتعليقك على الردود |
ورجعت تاني مع مناقشة تاني وجزء تاني من الموضوع
دلوقت كنا اتكلمنا عن اهم اسس الاختيار وقبل ماندخل على خطوة تاني في شوية حاجات نسينا نقولها تعالوا نشوفها سوا: بالنسبة للتكافؤ نسينا حاجة مهمة قوي وهي التكافؤ العمري: بمعنى انه لازم يكون فرق السن مناسب, طبعا الاغلب بيفضل انه الشاب يكون اكبر من البنت وتقريبا كل البنات تفضل كدة لكن لازم ميكونش فرق السن كبير قوي عشان يكون تفكيرهم قريب من بعض, ولانه لو كان الفرق كبير قوي هتحصل مشكلات كتير بينهم كمان حاجة مهمة لكل واحد فينا مواصفات معينة وصفات يتمنى انه يلاقيها في شريك حياته مهما كانت الصفات دي لازم يكون اول حاجة فيها الدين والاخلاق بعد كدة اي صفات تاني لازم مانكونش مبالغين فيها وكمان مش لازم نتمسك بيها كلها يعني لو لقينا ان معظم شروطنا متوافرة يبقى ماندقش على صفة واحدة مالقينهاش الا ان كانت حاجة جوهرية وفي صفات كلنا متفقين انها لازم تكون موجودة ف اي حد يقدم على خطوة الزواج: واهم حاجة هي القدرة على تحمل المسئولية: لازم الشاب او البنت يكونوا قادرين وفاهمين يعني ايه مسئولية بيت وزواج وانها مسئولية كبيرة ومشتركة بينهم هم الاتنين يعني ايد لوحدها ماتسقفش ولازم يتعاونوا سوا عشان المركب تمشي ونخلي بالنا من حاجة مهمة جدا: ( كلكم راع وكلكم مسئول عن رعيته) لازم الشاب ينتبه ان مسئوليته مش فلوس وانه يزعق في البيت وصوته يكون عالي وبس ولازم البنت تفهم ان مسئوليتها مش طبخ وتنضيف وخلفة وبس لازم نفهم ان اسرة معناهها كبير اه دي جزء من مسئولياتهم لكن كمان مسئولين انهم يكونوا نموذج لاسرة مسلمة مفيدة لدينها ومجتمعها لازم ينتبهوا انهم من اهم مسئولياتهم تربية جيل قادر على انه يخدم دينه وبلده ومن مسئولياتهم انهم يخافوا على بعض ويهتموا ببعض وانهم يساعدوا بعض في قيادة سفينتهم لغاية ماترسي على بر الامان ولسة في كلام تاني وان شاء الله ارجع مع تاني خطوة في الزواج وسمعونا زغرودة |
كلااااااااامك جميل أسرائووو
وانا متحمسه وبأنتظاررر الخطوات التااليه >>باين حنتقوز على ايديك اسراء^_* وهي احلى زغروده لولولولولولووووووووووووش ^_^ |
وراكم لحد ماجوزكم روز ماتقلقيش
وبعد قليل لي عودة مع جزء جديد |
ونرجع نكمل تاني:
وخلاص ياعمنا اخترت العروسة وهتروح تزورهم اول مرة في البيت وانتي ياست العرايس وافقتي ان سيادته يجي تعالوا نشوف بقى ايه اللي المفروض يحصل: اول حاجة بلاش نلبس اللي على الحبل نكون شيك عشان نسيب انطباع كويس لكن ميكونش مبالغ اوي في لبسنا ولا تصرفاتنا يعني بلاش تمثيل بالعكس كل مانكون على طبيعتنا كل مادا كان احسن عشان كل طرف يقدر يكون فكرة مظبوطة عن الطرف التاني بالنسبة ليك: خد بالك انك تحاول تكون هادي على اد ماتقدر, وماتخليش كلامك بطريقة تفاخر وانا بعمل وعملت وسويت لا حاول تتصرف بطبيعتك, وتعبر عن طريقة تفكيرك واسلوبك وطبعك, واسألها واتكلم معاها خد بالك انها بتكون مكسوفة جدا وبالتالي مش هي اللي هتفتح مجال للكلام ودي مهمة حضرتك وماتنساش حماك وحماتك في الكلام يعني مش تركز مع العروسة وتنسى اهلها, لانهم برضه بيكونوا عايزين يعرفوك كويس قبل ما يدوك بنتهم واي استفسار منهم جاوبه بصراحة ووضوح, وماتزعلش من اي سؤال لانهم طبيعي جدا بيكونوا عايزين يطمنوا على بنتهم وبالنسبة ليكي ياست البنات: خدي بالك لتدلقي الصينية عليه, وياسلام لو كان فيها شاي او اي حاجة سخنة يبقى موقف رائع جدا, وبدل ماتروحوا للمأذون تروحوا للمستشفى قسم الحروق وحاولي تكوني هادية ومش متوترة, اعتبريها قعدة عائلية عادية , وحاولي تتكلمي وتتناقشي وتسألي عن اللي عايزة تسألي عنه وماتتكسفيش اوي( اتكسفي نص نص ^_^) لو حماتك المستقلبية موجودة معاه: اتكلمي معاها واهتمي بيها هي كمان, وماتضايقيش لو لقيتيها بتسألك اي سؤال داطبيعي, ماتنسيش انك هتكوني زوجة لابنها ان شاء الله خدوا بالكم انتوا الاتنين: لازم تكونوا واضحين في شروطكم واتفاقاتكم من البداية, ولازم تكونوا متفقين على كل حاجة عشان تقدروا تكملوا بعد ما سيادتك تروح, وانتي تدخلي اوضتك, طبعا هتقضوا الوقت تفكير, وياترى ياماما ايه رأيك؟ وايه رأيك يا فلانة؟ زي ماقلنا قبل كدة, مانستعجلش, ولا ناخد القرار بسرعة بناء على اول انطباع, يعني مهما كانت فكرتنا من اللقاء اللي تم دة لازم نفكر كويس, ونستشير اهلنا ونسمع رأيهم, ومانخدش القرار الا بعد اقتناع تام وياريت يا عريس تنتبه لنقطة مهمة: انها بتكون محرجة جدا ومكسوفة,وخدي بالك ياعروسة انه ممكن يكون متوتر, يعني خدوا دة في اعتباركم وانتوا بتفكروا وتحللوا كل التصرفات والكلام اللي اتقال وكمان نقطة مهمة اوي: مفيش حد كامل, يعني لايمكن نلاقي حد فيه كل الصفات اللي عايزينها, ولا هنلاقي حد مافيهوش عيوب, لكن المهم هل العيوب دي هنقدر نتحملها ونتعايش معاها؟ وبلاش نفكر في العيوب بس لازم نقارن بين المميزات والعيوب ونشوف اذا كنا نقدر نتكيف مع العيوب, وهل اغلب شروطنا متوفرة ولا لأ بكدة نقدر نقرر هل نكمل ولا لأ ولو لقينا ان معظم مواصفاتنا متوفرة, وفي قبول وارتياح من الطرفين, نقدر كدة بقى نحدد ميعاد الخطوبة ونشتري الدبل منتظرة مناقشاتكم وتعليقاتكم, واي اضافات ليكم, قبل مايجي ميعاد الخطوبة والف الف مبروك وربنا يتمملكم بخير |
اقتباس:
اهلا يا سرووو الموضوع جميل وانا متابعاكي بس معلش ح اناقضك في جزء اللي فات لاني مابتمناش يفوتني والنقاش معاكي حلوو ومفيد:dancingmonkeyff8: شوفي ياقمري انتي قلتي في حاجات جوهرية .. تتوقعي .. ان من الحاجات دي ’’ مش عارفة اشرحها ازاي’’ يعني يكون مابيتأثرش بكلام اللي حوليه مثلا انو اهلو مايكنوش حشريين وبيدخلو فيحاتهم يعني ممكن قصدي مسيطر على بيتو وافكارو وسلوكه ومنفصل عنهم فكرياً لكن معاهم روحياً .. يحبهم ويخاف عليهم ويوصلهم ومايقطعهمش لكن ما يتأثرش بالكلام او المشاكل ؟؟ بالنسبة للتكافؤ العمري ممكن تحطي كم سنة فرق؟؟ طبعا لازم نحط في اعتبارنا انه في شواذ عن دي القاعدة في ناس ناضجة وتسبق سنها كتير ومش هينفع تترتبط الا بناس ناضجين زيها ولا ايه رأيك؟؟ والف شكر:flowers2: مستمتعة جدا بالنقاش :friends: سلامي |
اقتباس:
طبعا ممكن تناقشيني بأي جزء حبيبتي شوفي انتي قلتي حاجة مهمة مش عارفة ازاي راحت عن بالي لازم ولا اهله ولا اهلي يتدخلوا في حياتنا نودهم ونتواصل معاهم لكن من غير حشرية وتدخل يخرب بيوت اكتر حاجة بتهدم البيوت وتسبب المشكلات الاسرية هي تدخل الاهل كمان حاجة مهمة: ماينفعش ان كل اسرار بيتنا تكون عند اهلنا, مش كل مشكلة نروح نشتكي وندخل اهلنا فيها, ماهي كدة هتكبر وتبقى مصيبة كمان لازم مانعيبش في الطرف التاني قدام اهلنا او اهله, بالعكس نمدح ونشكر حتى لو في مشكلات لان مفيش حياة تخلو من المشكلات كمان ماينفعش ان الطرف التاني يكون ودني بمعنى انه يكون من النوع اللي بيسمع لكلام الناس ويصدقه على طول من غير مايفكر او يسأل ان كان صح ولا غلط, لانه بالطريقة دي هيسمح لأي حد يوقع بينهم بالنسبة للفرق العمري: كل واحد بيكون ف باله فرق معين, واحدة اعرفها قالت عايزة الفرق مايقلش عن 10 سنين, واحدة تانية قالت يكونوا بنفس السن,شباب يفضلوا انها تكون اصغر منه بكتير, وهكذا يعني المسألة نسبية لكن لازم مايكونش الفرق مبالغ فيه اوي يعني ماينفعش واحدة عندها 20 سنة تتجوز واحد عنده 50 سنة دلوقت ماعادش ينفع لان طريقة التفكير اختلفت , وكدة الفرق بينهم كبير جدا اه لكل قاعدة شواذ زي ماقلتي حبيبتي لكن مش لدرجة ان واحدة تتجوز واحد اد ابوها صح؟ مستمتعة بالنقاش معاكي في انتظارك |
اقتباس:
اهلا اه طبعا 20 تتجوز 50 ممكن اوي مايتوافقوش لانه هيكون وشبع من الحياة ولقى اللي عاوزو بينما هيا لسها في عمر الزهور عايزة تدخل في الحياة وتتمتع بيها جميل اوي النقط التانية اللي ذكرتيها تبعت .. الاحترام المتبادل قدام الاهل والاخرين وفعلا لما الوحدة بتقدر زوجها قدام اهلو واهلها وتبقى تستشيرو وتاخد برأيو .. تكبر مقدارو هوا كمان ح يكبر مقددراها فقلبو وح يحترمها اشكرك جدا : ) انتظري تعليقي على الجزء اللي بعدو :friends: سلامي |
شكرا ليكي لين
في انتظارك حبيبتي |
اسراء
اسلوبك رائع جدااااااااا بيشد وبيجذب جدااااااا وتلاقى فيه متعة كبيرة انا مستمتعة جدا وانا بقراه وموافقاك على كل اللى قلتيه عين العقل والله ومنكم نستفيد عشان الخطوات دى هنمر بيها يبقى معانا بقى كتيب ارشادات هههههههههههههههه ودى زغرودتى لووووووووووووووووووووووووووووووووووووووولىىىىىى مستنية الخطووووووووووووووووووووووبة بارك الله فيك |
اقتباس:
شكرا ليكي ياقمر على كلامك الرقيق المهم ان كتيب الارشادات دة من واحدة خايبة جدا ههههههههه معلش توقفت شوية وهنرجع نكمل تاني ويلا احلى زغرودة وعقبالكم كلكم يابنات جوازكم على ايدي ان شاء الله |
ودلوقت نرجع نكمل:
خلاص كل واحد فيكم اقتنع بالتاني والحمدلله يلا بقى روحوا اشتروا الدبل والشبكة كمان لو متفقين على شبكة: في حاجة مهمة: قبل مانحدد ميعاد الخطوبة لازم نتفق على كل حاجة وكل طرف ايه التزاماته, طبعا دا كلام يخص الاهل, لكن مفيش مانع ان احنا اللي نفكرهم بيه , لان زي مابيقولوا: اللي اوله شرط اخره نور يعني لما نتفق وكل واحد عارف هيعمل ايه ويجيب ايه بيكون افضل عشان نتجنب المشاكل همسة لكل اهل البنات: مانغاليش في الطلبات, نراعي ان جيلنا دة حالته المادية صعبة جدا, يعني مافيهاش حاجة لما يبتدوا صغيرين, بكرة يكبروا واحدة واحدة ومع بعض, هيكون طعم الحياة احلى بكتير لما يحسوا بكفاحهم وجهدهم سوا كمان قال الرسول صلى الله عليه وسلم مامعناه ان خير النساء اقلهن مهرا ومش الشبكة اللي بكذا والعفش اللي معرفش اد ايه هو اللي يحفظ حق بنتكم, اللي يحفظ بنتكم وحقها زوج صالح يعرف ربنا ويتقيه في معاملته ليها, زوج طيب امين محب غيور, هو دة الاصلح ليها شوفوا بقى ياعرسان: لما تروحوا تشتروا الدهب خدوا بالكم من شوية مواقف سخيفة بتحصل وممكن تسيب اثر سيء في النفس بعد كدة تعالوا نشوف ايه هي المواقف دي: - مثلا ياعروسة تيجي تختاري حاجة معينة وتلاقي حماتك مثلا علقت عليها انها مش عاجباها, وانتي مقتنعة بيها ولقيتي ان عريسك كمان موافقك, حاولي ماتحسسيش حماتك ان ابنها خلاص مبقاش يسمع كلامها لان دة غلط, المفروض انها والدته ولازم يفضل يطيعها طول عمره, ولو معملش كدة يبقى مالوش امان لان اللي مالوش خير في اهله مالوش خير في اي حد طب تتصرفي ازاي؟ حاولي بقدر الامكان ماتخليش العريس يتدخل لو حسيتي انه موافق, عشان والدته ماتحسش انك معصياه عليها, وانما حاولي بذوق ولطف انك تقنعيها, ولو مافيش فايدة مش لازم تنشفي دماغك اوي ممكن تسمعي كلامها, وبعد كدة انتي وجوزك لو حبيتوا تغيروا الحاجة براحتكم, المهم عدي الليلة على خير -كمان انت حاول تقنع والدتك وعروستك وتوفق بينهم , ماتكونش سلبي ولما تدخل اتدخل بطريقة ذكية بحيث مايحسش طرف انك جاي معاه على حساب التاني, الخناقات اللي بتحصل في الموقف دة كتير, وجزء كبير من حلها ممكن يكون بايدك لو اتصرفت صح وبعقل وهدوء, وممكن تتعقد لو اتصرفت تصرف مش محسوب -حاولوا دايما تتجنبوا صراع الحموات المبكر في المرحلة دي, بالعكس حاولوا توفقوا بين اهلكم بقدر الامكان - لو سمعتي اي تعليق من أهله على فستانك مثلا او مكياجك ماتاخديش الامور بحساسية لو كان التعليق باسلوب راق وبهدوء والقصد منه نصيحتك, يعني فكري الاول التعليق كان ليه, وماتفترضيش سوء النية دايما -زي مابتاخدي راي مامتك وانتي بتشتري الشبكة , كمان خدي رأي حماتك, هتسيبي فيها اثر طيب , وهتحس انك بتقدريها جدا, وهتعلى قيمتك في نظرها -وانت كمان ماتتجاهلش حماتك واتناقش معاها وخد رأيها, هتقرب منها وبالتالي هتقرب من بنتها معلش الخطوبة بكرة بقى^_* تصبحوا على خير دلوقت ماتنسوش ياعرسان: ناموا كويس بكرة يوم طويييل, ولازم تكونوا مصحصحين وفايقين, دا يوم خطوبتكم ياحلوين |
طب تعرفى والله الارشادات مفيدة جدا
اصلنا الاسبوع الجاى رايحين نشترى الشبكة لخطيبة اخويا فهنقلها كلامك دة يا اسراء اصلها صاحبتى اوى وانا اللى عرفتهم على بعض شفتى بقى ازاى وفقت راسين فى الحلال ههههههههههههههه مازال استمتاعى قائم بكل ما تكتبيه لا تتاخرى بالتكملة بليز |
شكرا لمتابعتك جين
وان شاء الله لي عودة لاستكمال الموضوع |
وبعد توقف نستكمل الموضوع لأهميته( من وجهة نظري على الاقل)
لان الطريق لأمة عربية مسلمة قوية يبدأ بأسرة قوية مترابطة مسلمة مش بس بالاسم, اسرة سعيدة واعية ومتفاهمة ونكمل سوا: يوم الخطوبة: خدوا بالكم من شوية حاجات غلط بتحصل في اليوم دة وللاسف كتير بيعملوها: - مش معنى ان دة يوم فرح انالتبذير فيه على اشده, بالعكس بيكون اجمل وافضل لو كان بسيط جميل بدون بذخ من غير تفاخر ولا منظرة على الفاضي - خدوا بالكم من غلطة بترتكبها بعض البنات: تلاقي الواحدة فيهم محجبة وتروح تشيل الحجاب يوم خطوبتها او فرحها قدام الناس, وتروح لكوافير راجل يعملها شعرها ويعمل المكياج, كأن الفرح مش هيكمل غير بالمعصية دي ماقلناش حاجة نفرح لكن في حدود ديننا, مش من حقك تكشفي شعرك ولا تخلي راجل غريب يلمسك بحجة المكياج وتسريحة الشعر والكلام دة, ولو لازم كوافيرة عشان الميك اب يبقى تكون واحدة ست والستات مالين الدنيا في المهنة دي -كمان انتبهوا لنقطة مهمة: الخطوبة مجرد وعد بالزواج, يعني لايحل اي طرف فيهم للتاني, لا من حقهم يكونوا لوحدهم ولا من حقها تكشف شعرها ولا تلبس المحزق والضيق قدامه - لو كانت الاغاني مباحة في الفرح يبقى تكون كلماتها محترمة وليها معنى مش اغاني هابطة زي العنب واشباهها -نصيحة لكل بنت: يوم خطوبتك او فرحك حاولي يكون فستانك بسيط وشيك, والميك اب هادي, هتكوني اجمل بكتير والف مبروك والمرة الجاية ان شاء الله نتكلم عن فترة الخطوبة ويادبلة الخطوبة عقبال كل الحبايب |
دكتورة إسراء بجد موضوع أكثر من رااائع جزاكي الله خيرا عليه تحياتي ليكي تسلم الإيادي |
--------------------------------------------------------------------------------
وبعد توقف نستكمل الموضوع لأهميته( من وجهة نظري على الاقل>>>>بالعكس اسراء موضوعك هذا يهمني كثير واحرص على قراءته وانتي ما شاء الله عليك اسلوبك رائع ^_^ كلام جميل وكلام رائع بتعرفي انا بعرف بنات كثير بيكون لبسهن طول عمرهم مستر ولما يجي يوم زواجهم بيلبسوا الفستان اللي بيكون البطن مكشوف والصدر والظهر كله ومش مستره حاجه وبتظهر قدام اخوانها الشباب وابوها والنساء وهذا كله لا يجوز الله الهادي ان شاء الله يعطيك العافيه^_^ وبانتظار التكمله ^_^ ويادبلة الخطوبة عقبالنا كلنا^_^ |
اقتباس:
في انتظار متابعتك دايما للاجزاء التالية |
اقتباس:
فينك يابنتي ربنا يخليكي كل ذوق تعرفي ان هي دي اكتر حاجة بتغيظني ان البعض بيبتدي حياته بأكبر معصية وبحجة الفرح الفرح بايه بمعصية ربنا؟ ربنا يهدي الجميع نورتي ياقمر ومنتظراكي في الباقي تنوريني وتناقشيني( وراكي لغاية ماتتجوزي^_*) |
ونتكلم عن فترة الخطوبة:
احلام البنات والشباب كمان ان الفترة دي بتكون كلها رومانسية وكلام حلو وتسبيل وحركات من دي كلام جميل ماقلناش حاجة لكن مش هو دة الهدف الرئيسي من الخطوبة امال ايه؟ تعالوا نشوف مع بعض ونناقش ايه اللي المفروض يحصل وايه السلوكيات المطلوبة والمرفوضة والمواقف اللي بتحصل في فترة الخطوبة: شوفوا ياحلوين: اول حاجة لازم نعرفها : ايه هو الهدف الاساسي لفترة الخطوبة؟ اهم حاجة لازم تحصل في الفترة دي ان الطرفين يقربوا من بعض, يفهموا طباع بعض ويعرفوا كل حاجة عن بعض, وكمان كل واحد فيهم يتعود على التاني, ويتعود انه يتحمل مسئولية حد وانه يكون مسئول من حد يعني: الشاب مسئول عن ومسئول من خطيبته زي ماهي مسئولة منه ومسئولة عنه ايه الكلام الملعبك دة؟ نقول بطريقة ابسط: كلنا فاكرين حديث الرسول صلى الله عليه وسلم:( كلكم راع وكلكم مسئول عن رعيته), لما نطبق المثال دة على الاسرة هنلاقي ان الزوجة مسئولة عن زوجها وليها واجبات ناحيته زي ماهو ليه واجبات ناحيتها صح؟ فترة الخطوبة تعتبر تدريب للمسئولية دي, بدل ماكنت بترجع من شغلك تدخل تنام او تخرج مع صحابك, وبدل ماكان وقتك مابين صحابك والشغل او الدراسة هتلاقي ان في طرف تاني دخل حياتك, محتاج اهتمام منك وجزء من وقتك هتعيد تنظيم حياتك عشان تتوافق مع المسئولية دي, وبنتدرب على كيفية الحياة مع طرف ربما كان لغاية وقت قريب غريب عننا تماما - وكمان دي حاجة مهمة اوي في فترة الخطوبة, ان كل طرف بيتعرف على التاني بصورة اكبر, بيبدأ يفهم طريقة تفكيره واراءه وازاي بيتصرف وايه اهتماماته, ولازم نعرف كمان ايه الحاجات المشتركة بيننا وبين الطرف التاني, ايه الحاجات اللي بيحبها وايه الحاجات اللي بيكرهها, لكن مش نخليها ف صورة تحقيق لا كل دة بيتعرف بالتدريج وواحدة واحدة مانستعجلش -جميل جدا اننا في الفترة دي نفتح قلوبنا لبعض, ونحاول نقرب من قلب الطرف التاني, كلمة حلوة بيكون ليها تأثير كبير, فيها ايه لو قلتي لخطيبك وحشتني؟ وفيها ايه لو قلت لخطيبتك اشتقتلك؟ والاحلى والاجمل لو وصلتوا للحب -كتير بيفتكروا انهم لازم يحاولوا يبينوا افضل مافيهم بس في فترة الخطوبة: جميل لكن المفروض عيوبنا كمان نعرفها للطرف التاني عشان مايتفاجئش بيها, ومانبينش حاجة مش فينا لانه هيكون كدب كمان الفترة دي ممكن نستغلها ف اننا نغير من بعض الصفات اللي عارفين انها غلط فينا, ونحاول نتغير للاحسن ونساعد بعض على دة من غير دكتاتورية -فترة الخطوبة مش بس كلام حب ونظرات هيام, لازم تحاولوا تتناقشوا سوا في مستقبلكم, وخططكم لبكرة, وتشتركوا سوا ف كل حاجة بس مش كله جد وبرضه مش كله هزار من دا على دا عشان ماتبقاش الحياة مملة, وياريت لو قدرتوا تحافظوا على دة بعد الجواز -ماتنسوش غلطة بيقعوا فيها كتير: كل واحد فيهم بيركز على الطرف التاني وبينسى الاهل: يعني البنت بتهتم بخطيبها وتتصل عليه وناسية اهله , ونفس الكلام بالنسبة لحضرته, كل شوية يتصل بيها ومايفكرش حتى يسلم على اهلها, ودي غلطة كبيرة وبتعمل مشاكل كتير وبالذات للبنت وهرجع تاني اكمل لان الفترة دي فيها كلام كتير ولسة هنتكلم المرة الجاية عن المشكلات اللي بتحصل وعن تجهيزات الفرح والحب بين المخطوبين امال فين الشربات؟ |
الله عليك يا اسراء
والله جامدة جداااااا انا فعلا بحب اقرا جديدك فى الموضوع دة رااااائع بجد ونصايح مفيدة وهايلة ثانكس يا قمر ومستنية الجزء الجديد على ناااااااار |
لولوولوولولولولوولولوتش
>>مبسووووطه بيك اوي والله يا أسراء يا دي النور يا دي النور ^_^ اسوره كلامك جدا رائع بتعرفي احيانا المخطوبين بحسهم بيبحثوا عن مساوء بعض ولما بسألها ليه بتقول لي علشان ما أتفاجئي فيه وأكتشفه وأحنا لساتنا على البر وكمان بعض المخطوبين بتكون أغلب حديثهم وهما مع بعض عن التجهيزات والفلوس من دون اي تفكير بأنهم يحاولوا يتقربوا لبعض او يقولوا كلمتين حلوين ولما نسألهم ليش بيقولوا لاحقين على اننا نتعرف ببعض والكلام الحلو وحنزهق منوه اممممممممممممم اسراء هو صحسح حلو كلامك ده > > ((فيها ايه لو قلتي لخطيبك وحشتني؟)) بس انا ما أعتقد اني بقدر اقوله له في ((وقت الخطوبه )) يمكن اذا هو قلي وحشتيني انا اقوله وانا كمان بس اني اقولها وبالفم المليان >>ما بعرف ما بظن اني راح اقدر ^_^ أسراء >>>>فيه سؤال طرى في بالي الان >>>انتي متزوجه ^_^؟! ويعطيك الف عافيه عزيزتي على كلامك الرائع والمفيد جدا >>انا عندي اختبارات وخشيت ارد على موضوعك >>أدعيلي ^_^ >>>>( وراكي لغاية ماتتجوزي^_*) من بؤك لباب السماء ههههههههههههههههههههههههه يعطيك العافيه ياقلبي ^_^ وادي الشربات يا ستي ويا بخت من وفق راسين بالحلال ^_^ وبانتظار التكمله ^_^ ويادبلة الخطوبة عقبالنا كلنا^_^ |
اقتباس:
ميرسي ياقمر على متابعتك منورة دايما:flowers2: |
اقتباس:
شوفي ياستي طبعا ماقولش البنت تقولها كدة بصراحة وانما ممكن تلمح بيها, وهو لو ناصح يفهم بقى طبعا اكبر غلط حتى بين الاصدقاء مش المخطوبين بس اننا ندور على عيوب بعض دايما لكل انسان في مميزات مهما كانت عيوبه ومهما كانت كتيرة لكن لازم يكون في ميزة يبقى مانمسكش في العيوب وننسى الصفات الكويسة بالنسبة لسؤالك ياقمر: الحمدلله لا متجوزة ولا مخطوبة ^_* بس كل اللي بكتبه من اللي بشوفه وبسمعه,من نصايح الكبار ونصايح اللي حواليا ومن حاجات كتير وزي ما بيقولوا اللي يعيش ياما يشوف ربنا يوفقك في امتحاناتك روز منورة ياعسل:flowers2::flowers2: |
ازيكم
وعودة للموضوع بعض النقط نبهتني ليها صديقة عزيزة وهي حاجات مهمة جدا في الفترة دي: اول حاجة ازاي نساعد بعض اننا نتغير للافضل؟ لازم نعرف الاول ان البعض بيرفض التغيير وخصوصا لو كان جاي بصورة مباشرة وبالامر, او كان في صورة تأنيب مستمر من الطرف التاني, وبينقلب الموضوع لصورة عكسية امال نعمل ايه؟ ممكن نلمح بهدوء وبأسلوب رقيق وغير مباشر ونختار الوقت المناسب كمان لازم ننتبه ان لكل شخصية مفتاح, ولكل واحد مدخل تقدر توصل لقلبه وعقله منه -حاجة كمان كنت كتبتها وماشرحتهاش: ان البعض في فترة الخطوبة بينسى تماما أهله وبينعزل عنهم, ودا غلط كبير جدا: المفروض البنت في الفترة دي تقرب لأمها اكتر وتسمع منها نصايحها وتحكيلها على اللي بيدور ببالها من غير ماتفشي اي اسرار خاصة بخطيبها, او بعلاقتهم ونفس الكلام من الشاب المفروض يقرب اكتر من اهله ويسمع منهم ويقرب خطيبته ليهم -في حاجات حلوة ممكن نعملها في الفترة دي: ممكن نشجع بعض اننا نقرب من ربنا اكتر : بحاجات بسيطة وجميلة وهتقربنا من بعض كمان, وتخلينا نبتدي حياتنا بطاعة ربنا: -ممكن نتفق اننا نصحي بعض وقت الفجر برنة موبيل مثلا ووقت كل اذان نرن لبعض عشان نفكر بعض بالصلاة نحاول نحفظ سوا القرآن,نتفق سوا على صفحة نقراها يوميا او نحاول نحفظها دعاء نقوله قبل ماننام حاجات صغيرة لكن الفكرة فيها انها بتقربنا من بعض وكمان بتخليك تحس ان في واحد بيشاركك الطاعة اللي بتعملها دلوقت وبيشجعك عليها وبيساعدك وانه بيعمل نفس اللي بتعمله في نفس الوقت ولسة الفترة دي فيها كلام كتير هرجع تاني للتكملة وربنا يتمم لكم بخير |
أهلين اسراء ياعسل
بتعرفي اكيد الواحد بيحاول يتغير علشان اللي بيحبه بس بحدود المعقول اذا كانت صفه مش كويسه اه بحاول نتساعد سوى ونغيرها بس اذا كانت صفه عاديه بس هوو مش حاببها وعاوزني ابطلها امممم ابطلب منه اولا يقنعني اقتعني اكيد ببعد عنها اما اذا ما اقنعني اذا كنت بحبه كثير بحاول اتفاهم معاه عليها او راح اعملها كرماله وممكن ارفض ^_^ تسلمي اسراء يلا كملي هههههههههههههه انا معاك في العزوبيه والجواز لنشوف بالنهايه وين حوصل ^_^ وبانتظار التكمله ^_^ ويادبلة الخطوبة عقبالنا كلنا^_^ |
اقتباس:
هههههههههههههههه وراكم لغاية ماجننكم مش قلتلكم بداية انفصام في الشخصية مش عارفين عايزة اجوزكم ولا بحرضكم ع العزوبية^_* |
معلش اتأخرت
وراجعة بشوية نقاط تاني ولسة في فترة الخطوبة: اوقات في الفترة دي بتحصل خلافات بين المخطوبين طبيعي وعادي جدا مانقلقش دا نتيجة لاختلاف الطبع واختلاف طريقة التفكير, ولأن كل واحد مازال غريب عن التاني ولسة بيكتشف اسلوبه وطباعه وطبيعي جدا انهم ممكن يتصادموا مع بعض في الاول, لان كل واحد فيهم لسة ماوصلش لمفتاح شخصية التاني طب نعمل ايه عشان نقدر نفهم بعض؟ في الفترة دي اهم حاجة ننتبه انها مش مجرد كلام حلو وتسبيل وبس, لا دي تمهيد لخطوة مهمة,ومحاولة لان كل واحد فينا يكتشف التاني لازم نتناقش ايه بنحبه وايه بنكرهه,مافيهاش حاجة لما تسأليه ايه اللي خطيبك بيحبه من التصرفات والطباع,بيحب يعمل ايه,ايه اكتر حاجة بيحبها في الهوايات, بيكره ايه , وانت كمان مافيهاش حاجة لما تعرف منها كل دة لازم تحاولوا تقربوا من بعض عشان ماتتفاجأوش بدا بعد الجواز طبعا بالتدريج ومش هجوم مرة واحدة خدي بالك ياست العرايس ان الراجل بيكره التحقيق معاه وانت كمان خد بالك انك لازم ماتحسسهاش انك خنقة, بالعكس حسسها انك مهتم بيها وعشان كدة بتحاول تفهمها لو حصلت مشكلة بينكم لاقدر الله: بلاش تتكلموا وقتها عشان ماتتعصبوش على بعض وتزيد المشكلة استنوا شوية لما تهدوا وبعد كدة اتناقشوا بهدوء في المشكلة واسبابها عشان تتلافوها بعد كدة وخدوا بالكم كمان: مفيش حياة خالية من المشاكل,المهم ازاي تتعاملوا مع المشاكل دي معلش نكمل مرة تانية ياحلوين ربنا يهنيكوا بالخطوبة وعقبال الفرح^_* |
للرفع
بفكر ارجع اكمله ^_^ |
يسلمووووووووووا على الموضوع اختي اسراء
وسوري على تأخري في الرد أكيد انوا الزواج خطوة كبيرة ولازم على كل بنت تتحملها لأنوا هادي سنة الحياة وصح ان كل ما يجيبولي سيرة الزواج معدتي تنقلب واصفر واحمر واخضر^^^^من الخوف والخجل والتوتر لأن ما اتعودناانوا نتحمل مسؤلية كبيرةحتى لو كنا شايلين البيت كله على راسنا غير انوا لما يكون بيت لحالك؟؟! وما اتعودنا انوا نتخالط برجال من غير محيط البيت(ابهاتنا.اخواننا) وصراحه انا هادا اكبر خوفي لأني خجوووووووله ومن يوم ما استحي احمر ويضيع الكلام الي في راسه كله:Tgn04610: وعارفة انوا دا كله حيروح مع التعود بس انا هادا اكبر مخاوفي واكتر شي يهمني في الارتباط انوا الواحد يكون يفهني لأن صعب تلاقي هادا النوع دحين:cgE05050: |
| الساعة الآن 01:41 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية