وعليكم السلام ورحمة الله وبركاته .

اولا احب ارحب بحضرتك واشكرك على المعلومات المفيدة التى اضفتها الينا وشكرا لك على قراءة البحث بالكامل انا عن نفسي لحد دلوقتي منتهتش من قراءة الكتاب كله ..

ثانيا انت اتكلمت على اكثر من نقطة بس احب اوضح نقطة محددة ومهمة جدا .

ان قوم عاد او الحضارة الفرعونية او اليونانية او الاغريقية او حضارة بيرو او اي حضارة اخرى دى تاريخ يعني البحث فيه بجانب انهم كافرة وانا معك بالتأكيد لكن بيكون البحث فيهم على اساس اعمالهم وانهم حضارات عريقة والا مكنش هيكون في حاجة اسمها تاريخ ، يعني عند دارسة تاريخ تلك الحضارات بيكون على اساس اعمالهم واثارهم وليس على اساس ديناتهم ، وانا مع حضرتك اننا لا ننسب انفسنا للحضارة الفرعونية او عاد او اي حضارة اخرى ،مش عشان انهم كافرة ، لأنهم حتى الان محدش يعرف من اين اتوا ، وممكن حضرتك تدخل على بحث قارة اتلانتس هتلاقي معلومات توضح ما اقوله .


طيب نقول بسم الله الرحمن الرحيم .

بالنسبة لكتب التفسير ، حتى الان القرآن الكريم متفسرش كله ، بمعنى ان الايات القرآنية تحمل الكثير من المعاني والتفاسير لانه نزل مجمل وليس مفصل ، معنى ذلك ان هيكون فيه كتب كتيرة جدا تفسير الاية باكثر من صورة ، وانا بصراحة شايف ان الباحث في الكتاب مفسر كل ادلته على تفسير القرآن الكريم فمعنى ذلك ان توضيحه محتمل للشك .

بالنسبة للصور ، حضرتك الصور دى ملحقة للكتاب واخي اميدو وضح ان فيه صورة فوتوشوب فممكن برده يكون محتمل الشك في البحث .

وبالنسبة للحديث بالتأكيد صحيح وهقولك على حاجة غير انه مذكور في الحديث الشريف ولكن دى معلومة علمية ، ان الانسان حجمه بيقل على مر العصور ودى على حسب العوامل الطبيعية والمناخ الذي يتغير باختلاف الزمن ، يعني مثلا حجم سيدنا آدم مختلف تماما عن حجم سيدنا محمد صلى الله عليه وسلم وعن احجامنا نحن ، فدى امر طبيعي جدا ان يكون فيه اختلاف في الاحجام والتماثيل ، لكن كما قلت من قبل ان اكتشفو جزيرة تقريبا او مكان مليئ بالتماثيل وكلهم عمالقة فممكن جدا يكون دليل على مكان قوم عاد والله اعلم .


وفيما يتعلق بالسحر ، انا هقولك على حاجة ، الحضارة الفرعونية عرفت بانها كانت يتستخدم السحر في كل شئ تقريبا ، وهو ما يلقب بالسحر الاسود ودى كان اللى بيستخدمه الكهنة وليس الملوك ، وهما استخدموه بغرض حماية المقابر من السرقة ، والله سبحانه وتعالى جعل معجزة سيدنا موسى مثل الشئ اللى هما مميزين فيه ، الا وهو السحر ، لكن فعلا هما استخدموا السحر وفيه مقابر فرعونية مليئة بالتعاويذ وبتموت اي شخص بيتعرض لهذه المقابر ، وممكن حضرتك تشوف بحث تمثال جدحر المسحور وهو تمثال لكاهن فرعوني مليئ بالتعاويذ وموجود في المتحف المصري ومحدش قادر يقرب منه حتى الاثريين ودى لانهم خايفين من التعاويذ الموجودة فيه .


وانا مع حضرتك تماما انهم لم يستخدموا الجن او سخروه لبناء الاهرامات ودى كذب وفيه ادلة على ذلك في كتاب معجزة الهرم الاكبر للدكتور زاهي حواس اثبت انهم استخدموا مكينات او ادوات لرفع الاحجار ، لو تحب اعرض لحضرتك ما قاله معنديش اي مشكلة .


واما الادلة اللى قلت عليها وشفتها بنفسي هقولك عليها حالا .

السلام عليكم ورحمة الله
انا متشكر ياستاذ شرف لمتابعتك الموضوع

وبالنسبه لموضوع الخضارات فانا بس كنت بوضح موقفى وده مش هجوم من اى نوع

اما بالنسبه للكتاب فبصراحه فعلا الكتاب محتاج يتقرا بالكامل علشان توصل الفكره كامله

وغير كده ياستاذ شرف الكتاب بيقدم براهين كتير ومعتمد على كتب علماء كبار ده غير استشهاده بالقران فى اكتر من مكان

فانت مش شايف معايا ان بدل من هاجم الكاتب او الكتاب فقط من باب الهجوم ان يتم الرد عليه

يعنى مثلا فى النقطه اللى بتقول ان مبانى قوم فرعون كانت من الطين واستشهد على ده بحديث فرعون لهامان فى القران الكريم غير طبعا اثار الفراعنه الباقيه

يبقى ازاى قدروا يبنى اهرامات عظيمه زى دى من الحجاره مش كانوا الاولى يبنوا منازلهم

والنقطه اللى بتقول انهم علشان يبنوا الهرم الاكبر محتاجين مليون عامل ومع ذلك المقابر اللى قيل عنها انها مقابر العمال كانت بتحتوى على عدد قليل جدا

ثانيا ياجماعه انتوا مش واخدين بالكم من موضوع مهم ان الراجل مابيقولش ان اللى بنا الاهرامات دول حد غريب ده بالعكس بيضم للحضارات اللى عاشت فى مصر اقوى حضاره عرفها التاريخ حضاره قوم عاد وده يضيف لنا مش ينقصنا ده بالعكس
يعنى الفراعنه يبقى هما اساس حضاره مصر من 7000 ولا عاد من 70000

وبعدين الراجل بيتكلم زى مانا قرات من مراجع وابحاث ودلائل من القران

فلازم نقرا الكلام من اتجاه محايد علشان نوصل للحقيقه

ولما نرد على الكلام يبقى الرد برده بادله وبراهين

ولا ايه رايك ياستاذ اشرف

وفيه حاجه تانيه ياستاذ شرف بالنسبه لكلامك

فى موضوع الصور انا كان قصدى انى مش خبير فى فن التصوير فمقدرش اعطى راى ده اللى كان قصدى

اما بالنسبه للسحر فلو حضرتك بصيت فى ايه السحرة وسيدنا موسى هتلاقى ان فرعون جمع اعظم سحره قومه علشان يواجهوا سيدنا موسى وكل اللى قدروا عليه انهم يسحروا عينه فقط اما بالنسبه للتعاويذ اللى حضرتك بتقول عليها فانا سمعت عن موضوع لعنه الفراعنه وانها نوع من البكتريا من اثر بقايا الموموايات

لكن بالنسبه للتمثال فانت شوقتنى لزياره خاصه للتمثال ده لانى بصراحه ملا اؤمن بموضوع التعاويذ

لان السحى زى ماتقال سابقا اما سحر عين او تسخير جن وفى الحالتين ينتهى بموت الساحر

والدليل على كده ان جن سيدنا سليمان لما علموا بموت سيدنا سليمان تركوا ما كانوا يفعلون

فاكيد مش هيطيعوا ساحر بعد ماما ت

ولا ايه راى حضرتك

غير كده حضرتك بتقول ان كلامه بالاستناد للقران فيه محل للشك

يبقى مؤكد الكلام المستند على احاديث الزؤرخين ادعى للشك من القران

وانا سعيد فعلا بالحوار ده

ومستنى ردك

طبعا حضرتك شفت البث الاذاعي الذي بث مباشر داخل الهرم واكتشاف الدكتور زاهي حواس الممرات والحجرات الداخلية ، انا هشرح فكرة عامة عن الهرم وما بداخله حتى نزل الى الادلة التي رأيها ، وعايز اقولك على حاجة ، بعد قرائتي الكتاب رحت بنفسي عشان اتأكد من المعلومات اللى موجودة في الكتاب ، ودى سبب معايا مشكلة وحصل شبه تحقيق بيني وبين ضابط في شرطة السياحة ودى لانه استغرب مني لاني كنت كل شوية بدخل في اماكن ممنوع دخولها وبسأل وبشوف بنفسي فالمهم اني شفت بعض الامور التى زكرت ليست كلها وبرده لصعوبة الوصول الى تلك الممرات والحجرات التى ذكرها الدكتور زاهي حواس ، بس خليني اقول الفكرة العامة عن الهرم .

الهرم الاكبر بداخله حجرات ثلاثة وممرات داخلية ، فيه حجرة منهم المسماه بحجرة الملكة ، وبداخل الهرم فيه خمس حجرات اخرى صغيرة ضيقة تعلو حجرة الدفن العلوية والتي قام باكتشافها " هيوارد فيز " عام 1837 ، وهذه الحجرات طبعا مدخلتهاش لان ممنوع دخولها لكن انا هشرح ما ورد بداخلها .

وقد بنيت هذه الغرف لهدف عملي حيث ان سقف حجرة الدفن الرئيسية او الثالثة المبنية من كتل الجرانيت التي احضرها المصري القديم من اسوان ، مسطح مما يجعله اكثر عرضة لضغط الاحجار عليه وبالتالي الي تهدمه ، فبني هذه الحجرات فوق بعضها البعض ولا يزيد اتفاع الواحدة منها عن متر الا قليلا ما عدا الحجرة الاخيرة فهي اكثر ارتفاعا وسقفها جمالوني حتى يعمل على توزيع ضغط الاحجار على الجانبين ، وتتضح اهمية هذه الحجرات ايضا من وجود كتابات جرافيتية كتبها عمال المحاجر عند قطع هذه الاحجار او نقلها لتستخدم في بناء الهرم ، وعن طريق هذه الكتابات تمكن العلماء من نسبة الهرم للملك خوفو او خوفوي ، والذي وجد اسمه بداخل الخراطيش على جدران هذه الحجرات .

زفي الحجرة الاولى الي يفتح مدخلها ناحية الشرق وهذه الفتحة بارتفا 81 سم وعرضها 72 وبطول 7.35 م ومدخل الحجرة الاولى ضيق جدا وارضية هذه الحجرة هي سقف حجرة دفن الملك ، فاذا زحفت لتصل الى داخلها ونظرت الى اعلى فستجد سقف الحجرة يتكون من تسع كتل من الجرانيت وضعت بتساو وانتظام والجدار الشمالي والجنوبي لهذه الحجرة من الجرانيت ام الجداران الشرقي والغربي فمن الحجر الجيري وهذه الحجرة خالية من آية نقوش ، وقد دخلها احد المغامرين الانجليز لكن دلوقتي اصبح المرور بداخل هذه الحجر مستحيل وذلك للاحتياطات الامنية وحضرتك تعلم ذلك طبعا .

اما الحجرة الثانية تشبه الحجرة السابقة ولكنها تمتاز عنها في نقوها فعلى شمال الجدار الغربي بقايا خرطوش للملك خوفو وبقايا اسم احدى مجموعات العمال الذين اشتركوا في بناء الهرم الاكبر ، وهي مجموعة " التاج الابيض لخنوم خوفو قوية " . وكانت تسبق اسم الملك خوفو ارقام تشير الى العام السابع عشر من حكم هذا الملك ، وعلى الجدار الشرقي المقابل وعلى الكتلة الاولى بجوار المدخل لهذه الحجرة بقايا خرطوش الملك ويظهر منه فقط الاناء والكبش الذي يعطي القيمة الصوتية للكلمة المعبرة عن اسم الاله خنوم المكون لاسم الملك ، ووجدت ايضا اثناء البحث على الكتلة رقم 2 بجوار المدخل على الجدار الشرقي ناحية الجنوب بقايا خرطوش الملك خوفو حيث يظهر حرف الفاء وحرف الواو واسفل هذا الخرطوش جزء من العلامة التي تعتبر تكملة صوتية لكلمة سخمت بالهيروغليفية وتعني جزء من اسم مجموعة التاج الابيض لخنوم خوفو قوية .

في الحجرة الثالثة ارضية وسقف وهذه الحجرة من الجرانيت الذي احضره العامل من اسوان ، اما الجدار الغربي منها فمن الحجر الجيري ، ويتألف كل منهما من مدماكين من الحجر وعلى الجدار الغربي من الناحية الجنوبية وعلى الكتلة الثانية من المدماك العلوي الموضوعة في موضع معكوس نقش جرافيتي ، يحمل اسم مجموعة اخرى من العمال الذين كانوا يعملون في بناء الهرم وهي مجموعة " حور مجدو طاهر ، مطهر الأرضين " و " حور مجدو " هو الاسم الحوري للملك خوفو اي المنتمي الى الإله حورس الذي يجسد الملكية على الارض ، وعلى الجدار الشمال عثر على علامة من علامات المحاجر بشكل مثلث داخله نقطة وعلى الجدار الجنوبي ناحية الشمال من المدماك الاول العلوي نقش يحمل بقايا الخرطوش الملكي حيث يظهر منه حرف الفاء ، ثم اسم مجموعة كتبت من بل في الحجرة الاخرى وهي " مجموعة التاج الأبيض ل خنوم خوفو قوية ، وخلفها تظهر علامة غير واضحة لم يستطع قرائتها .

اما الحجرة الرابعة تتألف ارضية هذه الحجرة من تسع كتل من الجرانيت اما سقفها فيتألف من ثماني كتل فقط ، وتبين من احجار الارضية آثار تقطيع الأحجار من الممر حيث توجد بها بعض الخطوط التي كانت تحدد مواضع القطع والجدران الشمالى والجنوبي من هذه الحجرة بنيا من الحجر الجيري ويتألفان من مدماكين ، بينما بنيت بعض الاحجار في الواجهة الغربية من الحجر الجيري ، وبهذه الحجرة نقوش جرافيتية من الجدار الجنوبي حيث النقش الذي يعبر عن مجموعة من العمال كتبت اسماؤها في الحجرة السابقة ويشير الى ان هناك مجموعات معينة كانت مخصصة لنقل الاحجار الجيرية والجرانيتية لعمل الحجرات الخمس ، وهي مجموعة حورس مجدو طاهر ، مطهر الارضين ، ويتكرر هذا النقش مرة اخرى على نفس الجدار ، على الكتلة الرابعة من المدماك الثاني ، جهة الشمال ، بقايا نقش ربما يمثل النقش الذي يوجد في الحجرة الثانية .

اما الحجرة الخامسة والاهم ، مكونة من سقف جمالوني مكون من كتلة من الحجر الجيري ويتميز سقف هذه الحجرو بأنه يحمل نقوشا جرافيتية لعل اهمها هو خرطوش الملك خوفو ، الذي يعد اوضح وهو اسم " مجموعة اصدقاء خوفو " وايضا على هذا السقف علامة نفر بمعنى جميل وتصاحبها ارقام مثل رقم 4 ، 5، 8 ، 12 ، ورقم 22 على الناحية الجنوبية ، ويعتقد هذه الارقام تشير الى ارقام الكتل المستخدمة وترتيبها وإن كان يعتقد ان العمال لم يعيروا اهتماما الى وضع هذه الكتل بالترتيب ، وعلى الجدار الشرقي قرب المدخل ، يوجد نقش على الكتلة الاولى ، يحمل علامة نفر ايضا واسفل هذا النقش ، نقش على المدماك الثاني السفلي يمثل الصقر ، وعلى نفس الكتلة الاولى من الداخل جهة الجنوب نقش واضح على شكل ارنب ، وهو يمثل علانة " ون " الهيروغليفية ، وعلى الجدار الشرقي نقش يمثل علامة نفر ايضا ولكن العمال لم يكتبوه بشكل صحيح ، ونقش هيروغليفي اخر يعني مجموعة وعلى الجدار الشمالى ايضا نقش يمثل مجموعة التاج الابيض على الكتلة رقم 4 وعلى الجدار الجنوبي كلمة " وعب " بمعنى طاهر ولذلك يحتمل انها جزء من اسم مجموعة العمال " مجموعة حورس مجدو طاهر ، مطهر الارضين " ويلاحظ في كتل الجرانيت التي تمثل الارضية لهذه الحجرة ان بها ثقوبا وفتحات ربما كي تثبت بها السقالات المؤقتة ، كذلك يلاحظ على سطوح هذه الكتل العديد من علامات المحاجر .


دى دليل واضح وثابت ان هرم خوفو ملك للحضارة الفرعونية وليس قوم عاد .

اما الدلائل التي رأيتها فساقولها حالا .

تحياتي لك

بتعرف اخي انا بحب النوع ده من المناقشات ، يعني بحب ان يكون نقاش وحوار في الابحاث والمواضيع التي تطرح ، فاهلا وسهلا بحضرتك في اي وقت .

طيب بالنسبة للشك في ادلة الباحث ، بص يا اخي السنة النبوية جاءت مفصلة لما ورد في القرآن الكريم ، ولذلك ستجد بعض الاحاديث توضح امور مش موجودة في القرآن ، يعني عند دراستي في الكلية كنت بدرس شريعة اسلامية وكانت موضحة تلك النقطة بالتفصيل ، لكن انا عموما بما بقرأ اي بحث وخصوصا في تفسير قرآني ممكن يكون صحيح وممكن خاطئ ، ولذلك لعظمة القرآن الكريم ، فانا مش بحب افسر البحث على آيات قرآنية تفسيرها ممكن يكون مش هو ده المقصود ، الا اذا لو ثبت فعلا ان تفسيرها ذلك فبكده بتأكد ان المعلومة دي صحيحة .


اما السحر بص يا اخي ، فيه فرق بين التعاويذ وبين لعنة الفراعنة ، برده انا ذكرتها في بحث تمثال جدحر ، وهقولك على حاجة في الصعيد انا سمعت حكايات حقيقية ، في منتهى الغرابة ، لان حضرتك تعلم ان الصعيد فيها اثار كثيرة مدفونة في الصحراء وفي الجبل وفيه ناس بتطلع الجبل لتبحث في تلك المقابر وفعلا بيلاقو لكن اغلبهم مش بيرجع حي ، ومثل ما قلتلك انا سمعتها بنفسي يعني مثلا اللى يشوف ديك وبنت بتجري وبتختفي في منطقة وفجأة يلاقي حد بيلاحقو مثلا صقور او حاجات تانية وبيلاقوهم ميتين وبجانبهم كميات كبيرة جدا من الذهب .

لكن يا اخي السحر موجود ومذكور في القرآن وفيه سحر لحد دلوقتي وانا شفت ناس مسحورة ومش شعوذة لكن فعلا الموضوع ده حقيقي وبيكون سحر اسود ، وفيه جن واماكن مسكونة .

تحياتي لك