|
بســــــــــــــم الله الرحمن الرحيــــــم
السلام عليكم ورحمة الله وبركاته اولا وقبل البدايه آسفه للاطاله لكن اتمنى تعذروني جهازي مريض شوي ويحتاج اداريه ثانيا شاكره لك من عقب ونورني بوجوده ثالثا الاحداث مازالت تعريف تقريب للشخصيات رابعا ماراح اطول اكثر واليكم البارت قراءه ممتعه الــــبارت "4" يجلس بثقه ويتصفح الملف بين يديه يحيط به الوان عمليه وديكورات فخمه كان مندمج في شغله حتى قاطعه طرقات على الباب رفع راسه ونزله بسرعه <ابوندى >.. تفضل تقدم السكرتير بكل احترام يستئذنه .. ابو مشعل برا طال عمرك سكر الملف ومده له ..خله يدخل ولاتخلي احد يدخل علينا واطلب لنا قهوه ..ابشر واستدار كانت اقل من دقيقه استغرقها للدخول للمكتب وباابتسامه عريضه <ابو مشعل > ..صباح الخير طال عمرك وقف بوقار واحترام ..هلا والله صباح النور "يالله حيه كان يحط يده بيده ويصافحه .. الله يحييك "وشلونك طال عمرك وهو يجلس وياشر له بالجلوس .. الحمدلله طيبين وقت قصير استغرقوه للسلامات والمجاملات والمقدمات فتح ابومشعل الموضوع ..خير طال عمرك "طالبني!! ابتسم وحط يده على المكتب .. خير بس بغيت منك خدمه تخص مشروعنا الي تشاركنا فيه ..آمر " يكفي انك تكرمت ووافقت تساهم معنا "دخولك بحد ذاته اعلان لنا قبل حتى نبدا هز راسه وابتسم ومع نظره تملاها الثقه بنفسه .. افا عليك ياابو مشعل انا بعد مستفيد انا تاجر وولد سوق ولايمكن اضر نفسي ومدام انا نفيدك ونستفيد وش المانع حوار طويل يبدا في الشغل وينتهي فيه وامور معقده لايفهمها الا اصحابها ابو مشعل وابو ندى تعرفوا على بعض من فتره بسيطه لكن عزيمة ابومشعل واصراره على رفع نفسه والاستفاده من صداقته مع ابو ندى قرر يشاركه بااي شكل "رجل صاحب مركز وخبره وسلطه مارزقه الله الا ببنت وحيده ظهرت من خلال سياق الاحداث ...................................................... كان يجلس وحيد ويظن ان الكل طالع لكن تفاجاء بماجد داخل عليه ويتلفت ببلاهه ويصطنع الغباء ويتكلم بتعجب ..اكيد هذا ماهو بيتنا !! ابتسم ببرود يعرف اسلوب ماجد .. وليش ان شالله!! نزل كوب الكوفي على الطاوله .. يعني اليوم السبت والشمس للحين طالعه وانت موجود" انت عمرك ماقعدت عن شغلك ولاترجع الابعد المغرب اخذ الكوب ورشف منه وبهواده ..فيصل جاي بعد شوي وقاعد استناه رفع راسه ..والله ماهو هين هالفيصل الي قعدك عن شغلك وقف وسئله ..وين امي ؟؟ هز كتفه .. مدري يمكن نايمه او جالسه بغرفتها ..طيب انا طالع البس خلهم يجهزون القهوه والفطور واذا جا فيصل دخله المجلس ..فراش عندك انت ووجهك انا وراي محاضره بعد شوي ضربه على مؤخرة راسه ومشى ..لك ساعه تهذر ماتذكرت محاضرتك الا الحين "رح الله يهديك سو الي قلت لك عليه .............................................. نايم بوقت الناس طالعه لااشغالها "رجل لايعوقه أي شي عن من هم في عمره خلص الجامعه بعد ماكان يخلص السنه بسنتين "المساله ليست غبا ولاكسل ولكن انسان تربى في بيت تعود يكون فوق الناس" كبر وهو يأمر والكل ينفذ واذا احد عارضه كانت جدته هي خصمه كل من في البيت شدددو عليه بالنصح لكن يعاند لمجرد العناد حس بالي سحب اللحاف عنه ونهره ..طلال طــــلال فتح عيون بصعوبه وفركهم وتمغط وبصوت كله نوم .. نعم يبه !! صرخ بصوت عالي وبالم يملاء قلبه .. الله ينعم عليك" الحين يأذن الظهر وانت نايم !! رجع سحب اللحاف وحط طرفه تحت خده .. اذا اذن اقوم اصلي من جديد نفض اللحاف من تحته وبعصبيه .. انت متى تعلم تصير رجال متى تريحني من همك جلس بملل ونفخ ورجع شعره الطويل بيده .. كل هذا لاني تاخرت شوي بالنوم تخاذل وملاه اليأس تعدا مرحلة التعليم وتعدا مرحلة الضرب مابقا قدامه الا انه يدعي ربه انه يهديه .. هي بس اليوم ياطلال كل يوم هذا حالك وكل يوم اقول يمكن اليوم يتعدل ويفكر فيني وفي هالمسكينه الي تنام وتقوم وهي تدعي ان الله يهديك كان عنده امل ان هالكلام وان كان بلهجه عنيفه يتسلل لروحه لكن للاسف .. انتم بس تحبون تنكدون علي انا بحالي عمري ماضريتكم جالس وحاط يديه على ركبته .. سواتك بنفسك تضرنا لانها تضرك نفض اللحاف عن رجليه وقام ..بلاه هالنوم كله بس اذا طفشت من هالبيت لاتلومني هز براسه وهو يتوجع من حال هالولد ........................................... ..خالتي قالت نأجل الموضوع لين تخلص عدتها فيصل الي كان توه راجع من قريته واصر عليه راكان يمره قبل يروح لبيته .. طيب وكل هالمده وش راح تسوي تافف وحرك راسه كانه يبعد الضيقه عن نفسه ..اوف والله مدري تعبت من التفكير ابتسم يخفف عنه الحيره وينسيه صعوبة الموقف ..تفرج ان شالله خلنا الحين بس نتقهوا .. وين سلطان ماشفته؟؟ .. راح لشغله لويدري انك جاي كان استناك بس انا ماقلت له انك جاي هنا وقف وشال جواله ومفتاحه ..يالله انا رايح اشوفك بالليل ..وين بدري !! .. ودي ارتاح شوي من رحت هناك مانمت وقف راكان معه يقدر ان فيصل موجوع ومتضايق حتى لو مابين .. طيب وش رايك تجي تعشا معنا وتشوف سلطان كأن الفكره اعجبته وخصوصا انه بحاجه لتضيع الحزن .. يصير خير ان شاالله ودعه راكان وتركه يروح لوحدته وعزلته كان قبل وفاة ابوه يعد الايام لنهاية الاسبوع لكن الان الوحده تفتك روحه ولولا وجود راكان يمكن قتلته .................................................... رجع من لحظات من مقابلته مع ابو ندى وانها بعض الاشغال الي طلبها منه كانت الصاله فاضيه دقايق انفتح الباب ودخلت اصغر عياله واقربهم لقبله شقت وجهه ابتسامه عريضه وهي تقرب منه وتفرد يديها وتحضنه .. هلا هلا ببنتي الغاليه رمت نفسها عليه اكثر وحده تجرؤ على هالحركه من بين اخوانها <جوري >..يبه ليش ماجيت تاخذني من المدرسه انت قلت لي انك بتجي تاخذني ونتغدا انا وياك بس حط يده ورا كتفها وضمها .. ماعليه حبيتي اليوم صار عندي شغل بس خيرها بغيرها"قومي غيري وقول لامك تحط لنا الغدا ..ماراح تستنا اخواني ؟؟ لمها زياده وابتسم ..لا ماابي استناهم انتي بس تتغدين معي وهم براحتهم خلال كلامهم دخلت البنت الثالثه لاابو مشعل يظهر عليها جنون المراهقه من طريقة لبسها وحركة شعرها اقتربت بشموخ <امجاد>.. السلام عليكم <<وحبت راس ابوها بلهجه قاسيه تعود عليها مع بناته .. وعليكم السلام "وش عندك متاخره اليوم؟ بشي من الارتباك الخفي وهي توقف ثابته .. اليوم تأخرنا بالطلعه وفواز تاخر ماجاني ..وليش ماجيتي مع السواق؟ كانت تبرم طرف طرحتها بين اصابعها .. السواق راح يجيب هند من الجامعه آخر من دخل كان اخوها الي يكبرها بحوالي سنتين وزياده سلم ومثل امجاد حب راس ابوه .. يالله اطلعوا ومابي ازعاج انت وياها ..................................... منزعج من ابوه ومعصب طير النوم من عينه ونكد راحته طلع من الغرفه واهله جالسين بعد الغدا "من شافته جدته واشرت بيدها للمكان جنبها ..تعال اجلس عندي جلس اواتكا على نفس مركاها قبل حتى يعتدل بجلسته .. هي " انتي قومي اكوي ثوبي بااطلع صكت اسنانها وعجزت تبلع ردها ..وانا مالي اسم يعني!! مزنه ماكانت تحب فــ مشاعل قلة احترامها لاخوها وكانت مستميته انها تجعل منه شخص مرعب .. مشاعل وجع ليه تردين على اخوك ماكفر ترا قال لك اكوي ثوبي اطرقت براسها ومنى تترقب بعيون تحمل الخوف من انقلابه عليها .. بس انا ماني شغاله ومدام انه اخوي يحترمني عشان احترمه الاثنين هبوا بصوت واحد .. مشــــاعل كملت الجده ..قومي بسرعه لااكسر هالعصا على راسك " قومي يالله بسرعه نفخت بغبن ونفضت نفسها وقامت بينما طلال نهر منى الجالسه .. وانتي وش مجلسك انقلعي ورا اختك قامت بهدوء على انها تحس بالاحراج من اسلوبه امه ماكانت ابدا راضيه لكن مابيدها حيله .. مايصير ياطلال الي تسويه بخواتك مزنه دائما بصف طلال حتى لو كان غلطان واكثر شي تكرهه ان احد يناقشه ويحسسه انه غلطان ويعقب على كلامه .. خليه يكسر روسهم البنات ما يمشي معهم الاسواة طلال فيهم .. بس انا ماشفتهم سوو شي يخليه يحرجهم ويقومهم هذولا خواته عفست وجهها بااستهزاء .. لطيفه لاتقوين البنات على اخوهم قمة العصبيه وصلها ونقاش امه وجدته زاد عليه ..اوهـــو خلاص انا طالع ومخلي لكم البيت>> وقام من المكان هنا مزنه جن جنونها .. انا مدري وش فيك على الولد ماتحملين منه كلمه "وش تبين منه؟؟ حبست عبرتها وردت بصوت مرتعش ..وش ابي منه يعني غير الي تبيه الام من ولدها "ابيه عصاي الي اتعكز عليها يوم اطيح" ابيه جدار يظلل على هالبنات عقب عيونا ابيه لنفسه ولي ولاابوه ولخواته مااكتمل كلام ام طلال ومزنه الاطلال واقف عند باب الشارع ناظر للي نزلت من السياره بقرف ونفخ نفخه تعمد انها تسمعها ناظرت بتعجب من استعجاله وطلعتة المبكره قياسا بوقته المقلوب دخلت وكانت جدتها تجلس لحالها وواضح من نظرتها ان حاصل مشكله ..السلام عليكم رفعت راسها وردت السلام بطريقه غير مريحه ..علــــــيكم السلام "ادخلي ادخلي اجلسي مع لطيفه وبناتها "كملي معهم الصفه <<وبصوت اقل ارتفاع ..مايجي من وراكم الاوجع القلب ........................................ |
بعد يوم شاق وطويل وبعد موالها اليومي طلعت تلف منشفتها على شعرها دخلت للغرفه مسرعه توقفت فجاءه " منيره الي كانت تعبث في دولابها وهي الثانيه تفاجئت وللحظه ارتبكت لكن ظبطت نفسها
.. وش قاعده تدورين فــ دولابي ميلت رقبتها وبوقاحه .. قاعده ادور شي البسه بكره تقدمت خطوات وحطت ظهرها على بابه .. بس هذي ملابسي وانا ماسمح لك تعبثين بااغراضي مطت شفتها وجاوبت بطريقه كلها ازدراء .. انا اخذ الي ابيه وماتقدرين تمنعيني بينت عليها العصبيه "كانت دائما تسكت يمكن هالسكوت سبب تمادي منيره " تدرك ان ابوها مايرحم والموقف راح ينعكس عليها لكن هاللحظه غبن ايام مضت طلعت بدون ماتفكر بعواقبه .. ماراح تاخذين شي من اغراضي يامنيره هالمره ماراح اسكت "اغراضي تجيبهم لي خالتي وانتي مالك حق فيهم " واذا فكرتي تستلفين شي منهم تستئذنين اول ..هه ضحكتيني والله أمالك كبيره انا استئذن منك اصواتهم جذبت جواهر من الصاله وامها من غرفتها .. وش فيه وش عندكم اصواتكم واصله لبرا؟؟ منيره وهي ثايره وفكها يرتجف من الغيض ومن صدمتها بأعتراض العنود وبااعلى صوتها .. طلبتها من ملابسها وهبت فيني صارت فوزيه بينهم وعطت وجهها لعنود وظهرها لمنيره .. والله طلع لك لسان ياعنيد الظاهر نرسلك لخالتك وتشيشك علينا" ان ماخليت ابوك يحرمك الروحه لها ماني فوزيه بدون ماتحس بنفسها كان صوتها يتعالى ونفسها يتسارع ..كذابه انا جيتها تفتش بااغراضي وسئلتها كان بصدرها كلام كثير لكن لان الصراخ عاده ماتعودتها انربط لسانها عن باقي الكلام ..بــــــــس" بنتي ماتكذب انت الي كذابه وقليلة حيا صمام مربوط داخلها انفجر جمله ماقدرت تتقبلها .. مأسمح لك انا ماني قليلة حيا قاطعتها بصوت اعلى ..الا قليلة حيا ولاتربيتي "وانا الي راح اربيك قلبها يضرب بعنف وجسمها يرتجف قدروا يكسرون سكوتها لحظه من زمان يحاولون يقربونها .. ربي بنتك اول انا متربيه غصبا عنك وعنها سوا الحظ مع هذه الكلمه سمع ابوها ووقف مع صرختها بوجه فوزيه الي كانت هي ومنيره يشوفونه وسكتوا واتركوا الكلام له .. العنــــــــــــــــــــــود تجمدت عظامها وابتلعت ريقها ومغص طوا احشائها من الخوف تمنت المشهد ينعاد وتسكت مثل ماهم الحين ساكتين وعيونهم تضحك "ماقدرت على الكلام .. وش هالكلام الي تقولينه ابتعلت ريقها للمره الثانيه ورجفتها تزيد ..يبــ ـــه اخــ ــــذت اغراأأضي ووو حط اصبعه عند فمه ..اص مابي اسمع اصواتكم من ناظر لفوزيه نطقت كانها تحفظ الكلام ومتدربه على الطريقه .. كل هذا لان اختها قالت لها عطيني من ملابسك والله لوكنا ندري انها راح تعصب ماطلبنا منها كانت عيونه تنتقل بينهم ويتطاير منها الشر كملت فوزيه بعجله .. انا كنت بقولك تشتري لها بس ادري انك ماتقدر ماكتملت جملتها الاهو واقف قريب من العنود الي انسلت على باب الدولاب وحطت يديها على وجهها والكل كان بلحظة ذعر فوزيه ومنيره رعب انه ينولهم من ناره قبس وجواهر خوف على العنود الي تكورت وهو يضربها بكل مكان من جسمها بعد دقايق من الضرب نزل وجلس مقابلها ومسك شعرها الطويل بعد ما طاحت المنشفه الي تغطيه ومسكه وصار يهزها ..هالمره تركتك حيه لكن مره ثانيه ماتركك الا وانتي جنازه رفع راسه لمنيره فوقه ويده مازالت بين خصلات شعرها ..الحين تاخذين كل ملابسها لك وان تكلمت قولي لي ونفضها بعنف وطلع بعد مادفع جواهر عن طريقه بسرعه منيره سوت الي قاله وطلعت هي وامها بدون كلام لاخر لحظه كانوا غير واثقين من السلامه الى ان طلع من المكان اما جواهر مشت لها وهي تهتز بعد ماتوقعت انه ماراح يتركها قبل تطلع روحها حطت يدها على كتفها"رمقتها بعين غضبانه ونفضت يدها ..وخــــري عني خلني واطلعي برا فعلا مابيدها شي تسويه ومالها مقدره توقف بوجوههم "طلعت واتركت لها المكان تونسها الآم قلبها والآم جسدها .................................................. ..وش سويت مع عمامك ؟؟ موضي "جالسه وسلطان جنبها وماجد ويزيد مقابلينها وراكان مبتعد شوي ويشتغل بكمبيوتره .. غريبه يمه ماسئلتيني الا اليوم وش الحكمه من تاجيل السؤال !! ضحكت لفطنته بالفعل كانت تتعمد تأجل السؤال او تلغيه عشان مايحس باهمية هالمقابله .. توقعت انهم يضايقونك فقلت اتركك لين تهدا عشان ماتقول كلام ماله داعي تقوله "بس شفتك ماتكلمت قلت اكيد مر كل شي على خير "انا حتى ماسئلت اخوانك لانهم مايشوفون الي تشوفه من باب خبرتك فيهم حرك شفايفه وتكلم بتهاوان ..مثل ماتوقعتي ماصار شي يذكر لااحتكوا فيني ولا احتكيت فيهم " صدق ماحسيت حراره بسلامهم ولاشفتهم متشفقين علينا بس انا مايهمني المهم انهم ماحاولوا يستفزوني التفت لماجد ..وش رايك بعمامك ياماجد ؟؟ ماجد بذات اسلوب سلطان .. على قد ماكنت متحمس لجمعتهم على قد ماتمنيت يخلص هالاجتماع الممل عقدت حواجبها بااستفسار ..وشلون ممل وليه ؟؟ ..يعني اجتماع العايله المفروض يكون عفوي والكل ياخذ راحته "شفتهم مثل ماشوفهم بمناسبه عامه رسميين ومملين حتى عيالهم مثلهم "الوحيد الي كان مبسوط فينا مشعل يزيد من سكت ماجد نطق بدون مااحد يسئله بحماس .. صادق ماجد مملين ماصدقت متى نطلع ابتسم ماجد على ترديده للكلام ..انت مااحد طلب رايك كشر بحرج وحاول يرد اعتباره ..انا اقول بدون مااحد يسئلني " ولا انت بس تحب تفشلني ضحكوا كلهم واضح من رده انه زعل من قلب مسحت موضي شعره ..وش فيك زعلت اخوك يمزح معك غورقت عيونه لكن قاوم .. وش فيك كنت امزح معك والا انت ماتحب المزح بصوت هادي ..الا بس مو تسكتني ماجد يحب مشاكسته اجل من اليوم ورايح راح اعلمك المزح عشان يتوسع صدرك قام من بينهم مسرع ومغبون من احساسه بالامتهان وهم يضحكون على انفعاله ........................................... تتمدد على سريرها وترفع ظهرها بطرف السرير صوت جوالها ازال الهدوء بكسل رفعت الجوال قدام وجهها ابتسمت ..الــــــــو بصوت عالي قريب للصراخ ..مســــــاااء الخير غمضت عيونها الصوت اخترق اذنها نقلت الجوال لااذنها الثانيه .. وجع فجرتي اذني اصطنعت الزعل وبمسكنه .. افا نجوده وانا مشتاقه لك ومتصله اسولف معك جلست وهي ماده رجلينها .. سولفي بس قصري صوتك ..خلاص خلاص بس عطيني منى فتحت عيونها على وسعها بسرعه تطلع على حقيقتها .. يالكذابه من شوي تقولين مشتاقه لي .. تطمنت عليك "وبكلم منى بعد هي بنت عمي ومن حقها على اني اتطمن عليها كانت فاتره غير متفاعله لاي حدث مالت بجسمها ..لحظه " مــــــنى "مـــــــنى وصلتها بخطوات هاديه "كانت تتوقع انها مطلوبه على التلفون وجوال نجود اسهل شئ يتواصلون من خلاله لان تلفون البيت مايرد عليه احد بحضور مزنه ..نجد تبيك اسرعت والتقتطه من يدها منى ايضا بارده بعض الشي بانفعالتها لكن نجود اسلوب مصطنع اما منى فهذي هي حقيقتها ..الــــــــو هبت بسرعه بوجهها .. ساعه ماتجين تمشين على بيض انتي ..شوي شوي" نجود بغرفتها ويالله سمعتها وهي تناديني غمضت عيونها بعصبيه مصطنعه ..انا مدري متى ترحمنا هالعجوز وتفك الحصار عن التلفون او تخليكم تطلعون جوالات برضا وقناعه وتقبل .. عادي تعودنا وش عندك شاده حيلك اكيد عندك شي !! بمرح مخلوط بعفويه على شكل صراخ .. زين والله اكتشفتي اثريك تعرفين تفكرين يالفاهيه" زين تسوي فيك جدتي اصدرت بفمها صوت يعبر اخيرا عن مللها ..نــجد ترا ازعجتيني عندك شي مهم قولي ماعندك ضفي وجهك بنام وراي مدرسه بكره بتهكم اعادت كلمتها ..بــــــنام "نامي يالدجاجه الشرهه على الي داقه بقولك لك ان سعود استأجر استراحه وراح نجتمع فيها نهاية الاسبوع فرحتها فاتره وممله ولاتشجع .. صـــــدق !! بقرف من ردة فعلها البارده ..هذا الي قدرك الله عليه !! نفخت .. وش تبيني اسوي "انا مستانسه بس انتي مايعجبك أي شي مني هزت راسها وصكت اسنانها .. افرحي عبري عبــــــــــري "لو علينا دايما نجتمع بمزرعة خالي بس انا مبسوطه لانكم هالمره معنا ..نجد ترا والله ازعجتيني خلاص وصلتي الخبر جزاك الله خير نجد هدت نبرتها وشدة انفعالها ..اقول منى سمعتي آخر نكته ..اوف لا ماحست الابصوت تسكيرة الجوال بوجهها "مطت شفتها بعدم مباله "مدت الجوال لنجود بنفس الوقت الي كانت تسمع فيه سؤال مشاعل الي دخلت بعدها على طول ووقفت عند الباب تنتظر نهاية هالمكالمه .. وش تبي نجد منك ! اكيد ماتبي تسئلك عن الدروس لانها آخر اهتمامتها تباطئت بوقوفها وبجوابها ..تقول جمعتنا هالاسبوع بااستراحه نطت مشاعل بفرحه وصفقت بيديها وبعدين تراجعت ..ونجد متاكده والا من راسها تسولف وهي تطلع من باب الغرفه ..الا تقول سعود أستأجرها تجمدت فـمكانها من ذكر اسمه وعبور سيرته حتى لوكانت اسرع من غمضة العين |
يسلمووووووووووووووووووووو خيتو
|
مشكوره نووفه على النقل الرائع
بليز متى ينزل البارت منتظرينك على ناااااار |
[
..يعني جا وراح بدون تقدم !! وهي مندمجه في برنامج على التلفزيزن وتشرب الشاي .. هذا الي فهمته من مشعل عصبت وخصوصا ان علاقتها بمشعل متوتره .. ولدك مايعرف يتكلم زي الناس كأن الكلام بفلوس بتذمر من الحاحها المتواصل تفني نفسها بس تعرف وش صار بينهم .. وش يسوي فيهم ابوك وعمامك مايحبون سلطان واخوانه وهو سوا الي عليه خبطت كتابها على الاراض .. لا ماسوا شي هو اكثر واحد سلطان يفتح له قلبه ليه مايحاول يفاتحه او يمهد للموضوع التفت لها بسرعه وبصراحه .. تراك صجيتيني "خلاص بكيفه ماانتي ميته اذا ماتزوجيه الرجال اكثر من الهم على القلب بعد ماكانت تجلس نصف جلسه تربعت تقهرها امها اوقات تتحمس وتحمسها واوقات تشعرها ان حلمها الي زرعته وكبرته داخلها مستحيل .. لاه" ماهو انتي الي تقولين خليك شاطره وجيبي راسه وهذا ولد عمك وانتي اولى فيه من الغريب ولانسيتي انك دايما تقولين سلطان من حقك لين صدقتك شفت من شاهيها بدون مايأثر فيها كلام هند .. انا قلت حاولي ان حصل خير على خير وان ماحصل هو الي خسران وصلت ذروة الغضب من رد امها .. لا والله انا الخسرانه واذا كنت خسرت كله بسبتك انتي وابوي ومشعل ضربت يد على يد واستفسرت .. وحنا وش دخلنا اخذت كتابها ووقفت .. انتي الي طردتيه وكرهتيه فينا من صغره وابوي طول عمره قاسي عليه وحتى بعد مااستغنى عنه ماتغير ومشيعل حبه له على الفاضي بس وين رايح مع سلطان ومنين جاي من سلطان مالت عليه وعلى سلطان ومالت على حظي تقول كلامها وهي واقفه وتحرك يديها ومن خلصت كلامها تحركت لغرفتها اما امها بعد ماكانت جالسه وتراقبها بعدم اهتمام شافتها تقفي .. اسمعي ياهند اذا كان عندك كلام قوليه لاابووك طولة لسانك لاتطلعينها على" وولدي مالك دخل فيه سمعتها هند لكن ماردت لان الي عندها قالته ومقتنعه فيه .................................................... جسمها تملاه الكدمات وروحها ترهقها الاهانات قامت مرغمه لشغل البيت "اليوم الكل ساكت عنها ماعدا طلبات اهل البيت من طبخ وغسيل وكوي "استوفوا حقهم منها ومتاكدين لو تكلموا ماراح ترد عبد الرحمن افتقدها اليوم سئل امه عنها الظهر واوهمته انها نايمه طلع يلعب كوره قريب من بيتهم عاده يوميه يحبها" من رجع جلس مع اخوانه في مجلس الرجال الصغير يتفرجون على التلفزيون انتبه لصوتها مخنوق وحدق فيها النظر .. تعالو العشا جاهز اخوانها الصغار مندمجين كررت كلمتها ..عمر فهد يالله عشاكم جاهز قامو وتعدوها مسحت شعورهم وهم قريب منها ..يالله دحومي قوم وقف ومشى لها وابتسم .. دحومي!! صرت اطول منك وللحين تقولينها رفعت يدها لشعره تقريبا مقاربها في الطول .. ولين تصير تمشي على عصاك اقولها لك شرد بوجهها طبعا ماتضرر لكن ناله من ضرب ابوها .. العنود ابوي ضربك نزلت راسها بسرعه وحبست دموعها وماتكلمت ..ليش ؟؟ عجزت عن الكلام وعضت شفايفها وهزت كتفها مو لانها ماتدري لكن لانها ماراح تقدر تتكلم "ومع ان عبد الرحمن الشخص الوحيد الي ممكن يسمعها لو تقعد ايام تسولف لكن تخاف يثور ويصير بينه وبين ابوه مشاكل ولانها ماتبي تأثر على نفسيته .. وامتحانك !! رغم الضباب الي صار بينها وبينه بسبب دموعها ابتسمت لانه يتذكران عندها امتحان هزت راسها بقوه قبل تطلع الكلمه منها ومسحت دمعتها قبل تطلع ..مارحت" كنت تعبانه تافف وتاالم عبد الرحمن هو الشخص الوحيد الي تتوسم فيه الخير وتتامل انه يكون عزوه لها مسكت يده ومشت قبله .. لاتشيل همي راح اكلم الاستاذه تعيده لي "وانت عشاك برد ووراك مذاكره وواجبات ودوام بكره ........................................... ضغطت جوالها بين يديها بقهر مافي وسيلة اتصال فيها حتى تلفون في البيت ماعندهم غيابها مخيف تغيب عن امتحان مهم وتغيب اليوم الي بعده ماتعرف احد دورت منيره في الجامعه لكن ماعطتها جواب يبرد قلبها كانت مستعد تتحمل أي كلام منها " المهم تتطمن على العنود رمت نفسها على السرير واستلقت على ظهرها وسرحت تحاول تلاقي منفذ لحيرتها تكلمت مع نفسها ..لو اني ماخذه رقم خالتها يمكن تدري عنها كانت رجلينها تتدلى على طرف السرير وتحدق في السقف استقعدت في مكانها مع طرقات الباب ..ادخل انفتح الباب وتقدمت منها وجلست جنبها مسحت شعرها <ام دانه > .. تعوذي من الشيطان ان شالله مافيها الاالعافيه نفضت راسها بقلق وتاففت ..اووف يمه غياب العنود مايطمن اكيد وراه سالفه كبيره "اناخايفه يكون ابوها منعنها من الجامعه مسكت يديها والتصقت فيها .. طيب يمكن تعبانه شوي وتبي ترتاح يومين دخلت اصابعها فـشعرها وطخت راسها للارض .. والله لو يمنعها من دراستها يمكن تموت مااعجب امهاالكلام وانزعجت منه .. حرام عليك لاتفاولين على البنت يعني ماداومت يومين خلاص سويتيها سالفه كانت تحرك اصابعها وتفكر بصوت عالي .. يالله لو كان عندي اخو كان زوجته اياها وريحتها رغم امنيتها المستحيله ورغم الغصه رنت ضحكتها الناعمه بصوت عالي .. كل هذا حب لها ياندى !! ياحظها هالبنت فيك بملل عفست وجهها كانها تنتقد نفسها ..وش حظها فيه وانا مااقدر اساعدها بشي "تدرين يمه اني قلت لها ااعطيها جوال ورفضت خايفه من ابوها وتقول لو ابي كان خالتي جابت لي "تصدقين اني ارحمها "حتى مكافئتها ماتتهنى فيها سكتت تستمع لها يمكن حياتها الفارغه اجبرتها تنشغل في العنود وتتقرب منها اكثر وتعايش مشكلها وبالتالي تصبح جزء مهم في حياتها ................................................ بعد ماتعشت امها واخذت علاجها تمددت "طلعت مجموعه من الكتب تحتفظ فيهم من سنين وسحبت واحد منهم وصارت تقراءه بتمعن " كانت من النوع المحب للدراسه "وفي عز اندماجها رفعت راسها على صوت جوال امها ولانها مشغله خاصية التحدث سمعت الاسم اعتدلت امها شوي وهي رجعت لقراءتها بنظرها بس .. الو ..السلام عليكم بعد ترديد السلام بينهم لفتره لاباس فيها .. ان شالله ياخاله ماينفصكم شي قبل تفهم وش يتبع هالكلام بحماس ..تسلم ياوليدي ماينقصنا الا شوفتك ..تسلمين ياخاله " انا احتمال هالاسبوع مااقدر اجي الا اذا كنتم تحتاجون شي ضروري اسلوبه مايعجبها ولو كانو بالفعل يحتاجون شي ماراح تطلب كان هذا اكثر شي مخوفها باارتباط فيصل بغاليه انه مجبور لكن ماحبت تحسسه بشي يمكن فعلا عنده ظروفه .. لا لاتجي حنا ماعلينا قاصر "والي نحتاجه جيرانا يجيبونه تنهد تنهيده طويله " مشتت ومحتار .. تكفين ياخاله اذا كنتي محتاجه شي قولي لي اعادت اجابتها بتاكيد "الحاجه ماكانت ماديه كانت شي معنوي صعب شرحه له لكن عندها امل انه يفهمه .. ان شالله "بس انت لاتشيل همنا وخلك بالي انت فيه ارتاح شوي من طريقتها .. طيب " مع السلامه ..في امان الله نزلت الجوال في الاراض وعينها على الي بعالم ثاني "ماتدري انها بنفس عالمها ومعها بنفس الدوامه وتعيش حيره اكثر من حيرتها تدري ان امها تتأملها تكلمت يمكن الكلام يجيب الي داخلها ..هذا فيصل ابعدت نظرها عن الحروف الي تحس وكانها تراكبت على بعضها وماعادت تقدر تفككهم لدرجة ان عيونها عورتها لكن بسرعه ..وش يبي ؟؟ < وهربت بنظرها .. يقول اذا ماحنا محتاجين شي ماراح يجي تصطنع عدم الاهتمام وتوهم نفسها وتوهم امها انها ماتفرق بين غيابه وحضوره .. خلاص براحته " ماله داعي يتعنى كل اسبوع وحنا نقدر نصرف امورنا ركزت نظرها فيها اكثر والثانيه تمنت تهرب بعيد عن تحديقات امها وبصوت واثق ..غـــــــاليه ابتلعت ريقها المر من احساسها ان السؤال يخصهم الاثنين قدرت تتمردت على ارتباكها .. سمي يمه كل ثانيه تمر كانت تشوف شي ماتعرف تفسيره يزيد وضوحه في وجهها .. انتي صدق جيت فيصل ماتهمك " والا تقولين هالكلام لانك تستحين تقولين غيره ابتسامه مشلوله بترتها بردها .. وليش استحي " انا ادري انه رجال مشغول والطريق طويل ليش نحمله فوق طاقته تتنمى انها تعبر وتشرح احساسها ولاتترك شي يجول في خاطرها .. بس هذا رجلك وانا اعرف ان المره يضايقها ان رجلها مايتشفق على شوفتها من رد امها عليها حست انها اقوى مخلوقه لانها نجحت بتمريره بدون ماتنهار .. الله يهداك يمه "انا للحين ماوصلت لها المواصيل رجال اسمع بس عنه وهو نفس الشي هالامور بدري عليها خليني لين اعاشره واعرف طبايعه "خليني الحين مرتاحه ولاحقين على كل هذا سكتت الام لانها تاكدت ان مابعد هالكلام كلام ومستحيل تقول اكثر منه يمكن فيه شي من المنطيقه للي يسمعه لكن ماراح يحسه الا الي جربه " " نهاية البارت لا اله الاانت سبحانك اني كنت من الظالمين |
| الساعة الآن 03:25 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية