|
1 مرفق
فصلٌ سابع عشر
~~ لأجلكَ ياقلـــب ~~ المحتوى بالمرفقات *** |
فصلٌ ثامن عشر .. ~~ احلامٌ مكسورة ~~ لحظة التقى فيها الأمل باليأس واصطدم الرضا بالغضب ونُفي القبول بالرفض ليه الموضوع هذا بالذات كل ماقال فُرِج انكسر قبل مايفرح فيه .. نزل فهد راسه وهو يسمع اعتراض مشاري بكل انفعال وعصبية .. وابو مشاري يسكته ... بــ : ولـــد مالك كلمة بعد كلمتي واطلع برا لااشوفك في مجلسي . رد ابو فهد بتعقل وزرانة رجل في الخمسين له خبرة وحنكة في الحياة : ياابو مشاري .. اصبر وانا اخوك لاتستعجل هذا زواج مهوب عطية .. وولدك محد(ن) يلومه وانا اخوك .. اخذ راي بنتك ، وشاور اهلك ، واسألوا عن ولدنا ، ثم ردوا لنا خبر ، تلفونات عيالنا عندكم وتعرفون دربنا لابغيتونا . وقف الكلام بالحلوق .. وجمد مشاري بذهول وندم وخوف من العواقب .. وفهد متفاجيء ومتلعثم .. مابين رفضه للي يصير ويأسه من السالفة كلها ..! ونايف على وجهه علامات الضيق والقهر . لحظات مرت والمجلس صامت ومذهول ..! رفع فهد نظره لمشاري الباهت ومتشتت ومنزل نظره للأرض .. واختنق كله بغصة قهر .. المكان مزحوم بالربكه وموقفه لايحسد عليه .. وقف وهمس بــ : عن اذنكم .. اسمحوا لي . طلع مو مكترث لردة فعل ابوه وعمه او تركه لمجلس الرجال .. حس مشاري انه خسر فهد الرجل اللي محد ينكر موقفه وفضله عليهم بغض النظر عن رفقته وصحبته .. وفز ولحقه . تشبث بذراع فهد الصلد القوي قال : اصبر يافهد .. خلني افهمك . سحب فهد يده بقوة من يد مشاري وتركها خاوية قال : كلامك وصل يامشاري .. ولك حق ترفض اذا منت شايفني مناسب لاختك وانا مو زعلان منك ولافي خاطري عليك شي . حال مشاري بينه وبين البوابه لايطلع قال : اصبر يافهد اسمع مني ثم قول اللي تبي . : ماعاد فيها كلام يامشاري .... قاطعه مشاري بإلحاح : ارجوك يافهد اسمعني . ازاحه فهد عن الباب بقوة ماقدر مشاري يتصدى لها .. ومشى لسيارته شغلها وطلع من الحي كله بسرعه .. رجع مشاري للمجلس خالي الوفاض واحساسه بالذنب عظيم .. خسر زوج لاخته من افضل الشباب بنظره .. وفقد احترام ابوه له .. وضيع مستقبل اخته .. جلس في مكانه وتفكيره يوديه ويجيبه والسوالف حوله بارده مالها طعم .. نظرات نايف اللي تلومه تحرقه .. وسوالف فواز وابو فهد بعيد عن الخطبه والزواج فاترة وكأن الملل اصابهم .. وابوه وفرحته المبتورة ووجهه الباهت يزيده شقا وتعذيب .. انتهت الزيارة على عكس ماتمنوا والوجوه مكفهرة وواجمه . *** جالسين في المزرعه بعد ماصرف العمال واعطاهم اجازة .. قالت بعفوية وهي تناظر المكان : تدري اش احلى شي في المزرعه . حط عماد التكاية تحت ابطه ومدد رجوله وعيونه تاكل ملامحها .. قال : وش . رمت نظرها في انحاء المزرعه حتى ماتواجه عيونه قالت : بس لاتضحك عليّ . ابتسم قال : قولي ماني ضاحك ..! ردت وهي تستنشق ريحة الطين والعشب المبلول : ريحة الطين تنعشني . طالعت فيه وابتسامته تتسع قالت : لاتضحك . ضحك عماد بصوت عالي قال : آآآآه بس .. اذا ريحة الطين تنعشك ريحة عطرك تدوخني مو تنعش .. اكتسى وجهها حمرة خجل وطالعت في الارض بحرج وحاولت تشغل نفسها بتجميع البيالات ولم السفرة .. شافها مرتبكه وكأن المكان ضاق عليها وحب يغير الحوار بحوار اكثر جدية .. عدل جلسته وربع رجوله قال : شادن . رفعت له نظرها وطالعت فيه وهمست بـ : هلا مبحوحة وخجلانه . سكت ثواني يناظرها وغاب في لحظ عيونها .. قالت بربكه : عماد اصب لك شاهي ولا خلاص اشيله . صحى من نشوة سكره قال بصوت بارد : ابي اسألك سؤال وجاوبيني . ارتجفت شفايفها بـ : اسأل .. وخوفها انه يفتح مواضيع تخص زواجهم وتنهيه . : علامك خايفه ..؟ رجعت خصلتها اللي عانقت جبينها وخدها ورى اذنها قالت بعد مابلعت ريقها باستغراب كاذب : خايفه ..؟ لا خايفه ولاشي ..!! بس انتظر اسألتك . وجَّه نظره على وجهها بدقه قال : انا مااقدر اصدق انك ماتحسين بالظلم معي ؟ قاطعته بسرعه وخوف من انه يتمادى في الكلام هذا قالت باندفاع : كلامك هذا هو اللي يظلمني ... عماد لو سمحت . : شادن .. شادن .. هدَّي اعصابك .. حنا قاعدين نسولف . عقدت حواجبها قالت بحزم : ماابغى السوالف هذي .. بعدين انا عايشه معاك مرتاحه ومبسوطه ... عمري اشتكيت .؟ قاطعها وهو يعدل التكاية لجهته الثانية بتوتر قال : واذا مااشتكيتي يعني انك مرتاحه ..؟ بعدين وش يضمن لي انك مو عايشة معي بحكم الواجب والشفقه وولد عمتي ماابي اتخلا عنه ومن هالكلام . حاولت تتكلم وسكتها وهو يستطرد : لاتستغربين كلامي .. تراني ادري انك عارفه اني مريض . اعتلتها قشعريرة من المفاجأة وصدمة الكلام .. قال : ايه ادري لاتتفاجأين ولاتنفجعين .. بس اللي ماادري عنه انتي تدرين وشو مرضي ولا لا . هزت راسها بإيه وهي تطالع في الأرض .. قال : وتدرين انه خطير ومعدي وعلاجه صعب . قالت بضعف وخوف : عماد مو خطير فيه ناس تشافوا منه .. وفيه ناس عاشوا حياتهم . قاطعها وهو يرفع راسه ويطالعها : عاشوا حياتهم وهم مرضى ..؟ هزت راسها ودموعها تنذر بالهطول : عاشوا .. ودوروا على علاج .. سكتت ثواني وكملت بهمس خَجِل : وجابوا عيال كمان . تنهد ومسد جبينه بإصبعين وقال بقلق واضح : هذاني دورت على علاج غير علاج المستشفيات اللي مانفعتني كله عشانك انتي . على قد ماهي فرحانه انه بدا يكلمها بأموره الا انها حست ان صدرها يضيق لاحباطه قالت بتشجيع : وبتتشافى ان شاء الله .. عماد لازم تتأمل في الله خير .. جرب العلاج الجديد واستمر عليه ومابتخسر شي وانا راح اساعدك .. اذا تحب اقرأ عليك يومياً سورة البقرة وان شاء الله ربي مايخيبنا .. غمض عيونه بقوة وفتحها وشتت نظره لبعيد قال : شادن تحسبين مرض الكبد سهل .. انا عندي فايروس بي وهذا يؤدي للسرطان اذا استمر نشط ... ابتسم بوجع وكمل : ماقد حللت ولقيته خامل دايما في حالة نشطه .. وتقولين علاج وتفاؤل وحياة . اغرورقت عيونها بالدموع قالت : عماد خل املك بالله كبير .. الله يخليك لاتيأس . قام وجلس على التكاية اللي بجنبها قال : ابيك تصيرين قوية .. عشان تواجهين حياتك وتختارين مصلحتك .. انا ماقلت لك هالكلام الا عشان تكونين على بيِّنه وهدى خاصة اني مااقدر اتركك من نفسي ، ابيك تعرفين الرجال اللي ربطتي مصيرك فيه وش بلاه وش يرده عنك وابيك تقررين حياتك بنفسك .. فتحت شنطتها الصغيره وطلعت مناديل مسحت عيونها وخشمها وهي تنتفض قالت : انت عارف اني اخترتك من زمان وماعندي خيار ثاني .. رفعت نظرها له بألم قالت : انت بتتعافى ياعماد ... بس لاتحاول تبعدني عنك الله يخليك . نفسه يضمها .. يلمها ويهدي قلبها ويطمنه .. بس يطمنها بأيش .. بالمستقبل معاه ولا بالبعد اللي ماتبيه ولاترضاه .. مسح على راسها مرتين وثلاث وكأنه يدور على الكلام اللي يناسب .. بس وين الكلام وهو متبعثر معها ومتعثر بحاله ..! قال بهمس : ارفعي راسك وطالعي فيني .. شادن انا من الحين بقولك .. الطبيب اللي رحت له في الاردن قال شهرين بالكثير وتبين النتيجه ..وانا بنتظر خمسة شهور ان مابانت نتيجه .. قاطعته بانفعال وصوت مخنوق حاولت جاهده انه يبرز ويثبت : بانت ولا مابانت فيه شي اسمه تطعيمات .. سكتت وكملت بتجلد وجرأة : انا اخذت وحده وباقي ثنتين راح آخذها و اكمل حياتي معاك وتعيش معي غصباً عنك .. الصدمه جمدته وسكتت الكلام .. كملت بصوت جاد ومنفعل وفيه رجفة : عماد اذا ماتبغاني لاتتحجج بالمرض .. جلس على الارض بجنبها ورفع راسها وطالع بعيونها اللي اختنق فيها الدمع وتحجر قال : متى اخذتيها ..؟ نزلت راسها للارض بحرج وهمست : لمن رحنا لجده ..! لمن رحنا لجده ..؟؟ يعني يوم كانت منهارة ..! يوم بكت بدل الدمع دم .. يوم كانت تايهه وضايعه وماتدري وين تروح ولاوش تسوي .. يوم كانت تقربني وانا اصد وابعد .. يبيها ويبي قربها وصعبتها عليه الظروف .. يحبها ويودها بس يخاف الزمن يقسى عليه اكثر ويفارقها مكره ومجبور .. حست انه ضايع مابين معترض ومتقبل .. نظره مشتته لبعيد وتفكيره محصور بشي تجهله .. مدت يدها على يده وضمتها قالت : عماد .. الله يخليك تنسى سالفة النقل .. اذا انت تقدر تعيش بدوني انا مااقدر . ضم على يدها بيده الثانية قال : البعد شر لابد منه ياشادن .. خلينا نبعد قبل لا ... وقف الكلام بحلقه قبل يكمل واخذ نفس عميق قال : قومي خلينا نمشي . هزت راسها بحاضر ولبست عبايتها ووقف هو يشيل الاغراض عنها .. ركبت في السيارة وهي تدعي وتستجدي ( ياحي ياقيوم برحمتك استغيث اصلح لي شأني كله ولا تكلني الى نفسي طرفة عين ) وكررت ( لاحول ولاقوة الا بالله ) مرات عدة لعلها تبعد الضيق عنها وتفرج همها .. انتبهت وهو يركب بجنبها وملامحه جامده ونظراته تايهه .. وقف بنص الطريق وهو يشوف العنود جايتهم تجري ووقف لها وهو يطالع في شادن قال : جات بنت لافي الله يكفيني شرها ..؟ ردت شادن بضحكه وعفوية مصطنعه تحاول تغير بها الجو المكتئب . : لاتخاف مامعاها رسايل . التفت لها متفاجيء قال : انا ولد ابوي ... حتى هذي عرفتيها .. اجل وش بقى ماعرفتي ..؟ وصلت العنود ناحية شادن وفتحت لها شادن الشباك قالت بابتسامه واسعه : يا هلا يالعنود تبغين شي حبيبتي . ردت العنود وهي تلهث : ابلا بعلمتس .. نوف اختي بتجي بكرة مع رجلها حمود وامي تقول بنسوي لهم عشا ابلا تكفييييين تعالي عندنا اذا نوف جات . قالت شادن بضحكة ماقدرت تخفيها : هههههههههههه ياقلبي ان شاء الله اذا قدرت راح اجي . اخذت نفس عميق وقالت بصوت حاولت انه مايوصل لعماد : ابلا انا اخذت حجرة نوف وكتبت على الباب حقها بالفحم غرفة العنود لافي ال..... فتحت شادن عيونها وضحكت من العنود وبراءتها وسذاجتها قالت : خلاص حبيبتي اذا جيتك اشوفه .. ارجعي للبيت والبسي شي في رجولك عشان ماتتعورين . رفعت العنود رجالها وطالعت في باطن قدمها قالت : عادي ماتعورني . : طيب ارجعي الحين لبيتكم . راحت العنود .. والتفتت شادن لعماد وهو شارد النظر لبعيد .. قالت شادن : يالله نمشي ترى البنت راحت . طالع فيها بنظره جادّة قال : تدرين عن سوالف اختها وساكته .!! ردت عليه بجدية اكثر : لو اني شايفه منك شي ماراح اسكت ... بس اللي شفته منك وسمعته يخليني احترمك واقدرك . زم شفايفه وحرك سيارته متوجه لبيته وهو يحسها تقيده بوثاق غليط .. تحتويه وتغلق جميع منافذ الخروج من حصارها ..! *** في غرفتها ..! على نور الأبجورة الخافت وقفت على الشباك اللي زجاجه يعكس النور .. تأملت الشوارع بصخبها .. اضاءات اعمدة الكهرباء وانوار السيارات والمحلات التجارية .. هنا حياة وشعور واحساس بالدنيا .. تذكرت كلام شادن وهي تسولف لخلود " الجو هنا في الديرة هدوء عكس الازعاج في جده " تنفست وهي تقول بصمت أي ازعاج ياشادن .. آآه بس لو اعيش هنا طول عمري واروح لاهلي زايرة وارجع .. سكرت الستارة واضاءت نور الغرفه وراحت لأكياس الأغراض اللي اشترتها هي وحمود من الجامعه مول .. حطت هدايا العنود لوحدها .. وهدايا نورة اللي اختارتها بذوق يناسب نورة ..! وهدايا امها وعمتها ام حمود وخوات حمود مع بعض .. تخيلت ردة فعل العنود من اللي جابته لها وردة فعل امها ونورة يوم تسولف لهم عن حياتها اللي عاشتها في جده .. عن البحر وكبره .. والاسواق والمطاعم اللي كانت تسمع عنها من زميلاتها ومسلسلات القناة الأولى ..! والأهم عن الحرم يوم زارته مرتين واعتمرت وصلَّت فيه ورى الشيخ السديس والشيخ الشريم .. سمعت اصواتهم حقيقه مو بس في الاشرطه والراديو والتلفزيون .. وقع نظرها على الكيس اللي اعطاه اياها حمود وقال لها انه هدية منه .. ماهمها حمود بقدر ماهمتها الهدية ووش هي بالضبط .. حمود في حياتها كرت عبور لدنيا ثانية .. ورقة رابحه كانت غافلة عنها بتوريها عالم جديد ومختلف ولايمكن تفرط فيها بسهولة .. لكن حمود كشخص وزوج في حياتها مارغبته ابداً ولا استهواه قلبها رغم انها ماتكرهه ولاتحقد عليه ..!!! فتحت عيونها وصكت وجهها بيدنها بخجل .. وش هاللبس .. ياويلي ان لبسته .. رفعت راسها لحمود اللي دخل عليها فجأة وقال وعلى وجهه ابتسامه واسعه : نوف .. قومي البسيه . حاولت تعترض بس كان حمود اسرع منها وحسم الموضوع وهو يقول بلهجة رجا : قولي لي طيب وعلى امرك ولاتعارضين .. ترى مايجوز تردين رجلتس . صح مايجوز تعارضه وتقول له لا .. هذا اللي حفظته بعد من امها وخالاتها .. تقديس الزوج وتلبية رغبته واتباع امره واجب لايمكن التخاذل فيه .. قامت مكرهه ووقفت على المراية وقاسته على جسمها مو قصير بس شفاف . اشوا ان عليه روب طويل وساتر . ابتسمت وهي تتذكر انها قد شافت مثل هالموديل على ممثله .. قال : انا بدخل الحمام ابي اطلع الاقيتس لابسته . دخل الحمام ولبسته بسرعة قصوى ولبست الروب عليه واحكمت رباطه ووقفت تتأمل نفسها على المراية . مرت دقايق مو طويله وخرج حمود .. تأملها وهي واقفه على المراية وعلى وجهها ابتسامه احيت ملامحها .. وجهها خالي من أي مزينات .. هو نفسه وجهها اللي عشقه من صغره .. رغم انها مو جميله لدرجة الفتنه ولفت النظر الا انها عاجبته ويحب ملامحها .. غمض عيونه وهو يحمد ربه مية مرة انها معاه وحلاله .. انها صارت من نصيبه بعد جهد جهيد ومحاولات عديدة ..! قرب منها ولف يده بعفويه مصطنعه حول خصرها والتفت لوجهها ودقق فيه من قرب .. شافها مغمضه عيونها ، خجل ، ورفض ، واعتراض .. بس ..!!! ماباليد حيله ولاتقدر تعترض .. قال بهمس : علامتس كل ماقربت منتس خفتي تراني وش حليلي مااروع . علا صدرها وهبط بتنهيده معبره عن اعتراضها لقربه قالت بأسى : موب خايفه منك ... بس انا ... : انتي وشو ..؟ : مدري علامي . هو يدري وش فيها .. كانت رافضته لأنها ماتبيه اخذته غصيبه .. وما حبته .. طول الفترة اللي راحت وهي تلهي نفسها بالتمشيات والأسواق والمشاغل والدنيا اللي ماشافتها .. لكنه طموح وعزيمته قوية للوصول لقلبها .. مسك يدها وقرب فمه من اذنها وهمس : انتي ماتدرين وش كثر غلاتس عندي . نزلت نظرها للأرض قالت مغيرة الموضوع : بكرة بنرجع للديرة ..! وكأنها تثبت له ان سعادتها بوجودها هنا مو بوجودها معه . قال بلطف وحنان : كلها كم شهر وننقل للطايف ونفتك من الديرة .. ولا ماودتس تنقلين معي . صدمه اخرستها ومفاجأة ماكانت على البال ولا الخاطر .. اذهلتها لدرجة الشلل والجمود .. طالعت فيه بفرح مندهش .. واكتفت بالنظرة تسأل اذا هو صادق ولا يستهبل عليها .. جلسها على السرير وجلس بجنبها .. قال وهو يسحب خصله من شعرها ويلفها على الصبعه السبابه وعلى وجهه ابتسامة حب :تحسبيني يانوف اقدر اداوم واخليتس في الديرة ... الله يصبرني لين تنقلين معي بس . سكت ولفها عليه وكمل وعيونه تاكل ملامحها وجسدها دفنها بحضنه ولمها بيدينه وهي تنصاع له بعطا مقابل عطا .. *** نزلت بعكازها بمشية شبه مختله مع الدرج .. ووقفت بمكانها بمنتصف الدرج على صوت ابوها الصارخ واللي انهال على مشاري بالسب والشتم : فشلتني .. كسرت كلمتي .. طيحت وجهي بين الرجال .. هذا وانت ولدي اللي اشد حزامي فيك .. ضيعت نصيب اختك . حسبي الله عليك من ولد . رد مشاري بمحاولة منه لامتصاص غضب ابوه الثاير : يبه هد اعصابك الله يخليك ومالك الا اللي يرضيك .. انا اعتذرت من الرجال وقلت له قصدي من كلامي . : قصدك في عينك ... تكسر كلمتي وتقول قصدي وماقصدي . فتح ابو مشاري زراير ثوبه العلوية وهو يقول : جيبي لي مويه ياام مشاري . فزت ام مشاري بسرعه للمطبخ ومشاري يطالع في ابوه الباهت ومتجهم .. قال بخوف : يبه تحس بشي . بلع ابوه ريقه بتعب واضح ورمى شماغه على الكنب وجلس بتعب .. وصلته ام مشاري بكاسة المويه وشرب نصها دفعه وحده قال : ولدك هذا بيجيب لي امراض الدنيا . جثى مشاري على الارض واخذ يد ابوه وباسها وهو يقول : اعصابك يبه .. سامحني انا والله ماقصدت ازعلك ولا اكسر كلمتك بس الموضوع يحتاج تروي اسبوع على الاقل تفكر فيه سارة من حقها يبه توافق او ترفض . ردت ام مشاري وهي تمسد كتف زوجها الهادر غضب : ابو مشاري هد اعصابك الله يرضى عليك .. ترى الامور ماتستاهل ومشاري ماغلط .. يبغى مصلحة اخته . عقد حواجبه قال بتعب : يعني انا ماابغى مصلحتها ..؟ لو يبغى مصلحتها كان وافقني على كلامي ولاَّ سكت وما زعل الناس مني . انا عارف ان سارة ماراح توافق وهذي نفسيتها وانا احاول اطلع بنتي من حزنها وانتي واقفه في صفه . كمل كاسة المويه وشرب نصفها الباقي جرعه وحده قال بندم : الرجال هذا من يوم شفته وانا اتمناه لبنتي ... وولدك ياام مشاري خرب عليّ فرحتي . كان الكلام الغاز .. بس الحين اتضح لها وفهمت معناه .. نزلت بحذر واتجهت الانظار لها بعد ماسمعوا صوت دق عكازها على الأرضيه الرخام .. قالت : يبه انا موافقه . مرت ثواني صامته وسط الذهول .. ابتسمت وكملت : مو انتوا راضين عنه .. خلاص انا موافقه . تنفس ابوها بارتياح وفتح لها يده بمعنى تعالي في حضني .. جات لابوها وجلست بجنبه وسلمت على راسه قالت : يبه انا عارفه انك تبغى مصلحتي وعارفه انك انقرصت من تجربتي الأولى ومستحيل تغامر مرة ثانية بحياتي ومستقبلي . ضمها ابوها على صدره وسلم على راسها قال : هذي هي بنتي اللي تفهمني وتدور رضاي .. مو اخوك اللي بغى يجلطني عند الرجال . كان مشاري يطالعها بعتب .. لاتتسرعين فكري وخذي وقتك .. انتي حتى ماتدرين من هو اللي وافقتي عليه . ردت النظرة بنظرة مطمئنة واثقه .. انا واثقه منك انت وابوي لازم ارضي ابوي وافرح امي واعيش حياتي .. وقف وطلع من البيت مشتت مايدري هو صح ولاخطأ .. مايدري سارة صادقه ولاتكذب عليهم وتجاملهم .. قالت ام مشاري : الله يوفقك يمه بس لاتستعجلين .. صلي الاستخارة واستخيري ربك . قالت سارة وهي تشد على يد ابوها : حاضر بصليها وان شاء الله ربي يكتب لي الخيرة .. التفتت على ابوها وكملت : يبه الله يخليك لاتزعل من مشاري . نزل ابوها راسه وهزه بقهر قال : احرجني في المجلس وكسر كلمتي وخرب عليّ فرحتي . : خلاص يبه سامحه هو اكيد يبغى مصلحتي ... يبه الله يخليك لاتخرب عليه فرحته بزواجه . رد ابوها وهو يسمع اذان المغرب ويوقف قال : انا مسامحه بس ابيه يحس بغلطه .. التفت لها وكمل : صلي الاستخارة وبكرة زي هالوقت ان شاء الله اشوفك راضيه . وقفت سارة وعكازها في يدها .. توجهت للدرج على نية انها تروح لغرفتها وتصلي فرضها ثم تشاور ربها .. هو ملاذها وقت الشدة .. هو اللي نزع خالد من قلبها ومشاعرها يوم لجأت له .. هو اللي اعانها على حزنها ومصابها اللي ماتقوى على حمله ا لجبال .. هو اللي بيطمن قلبها سواء رفضت ولا وافقت من تجاربها معه ماقد خيبها ..! واليوم ناصيته من اجل رضى ابوها وفرحة قلب امها .. *** يوم ثاني .. مرت على عماد في مكتبه وشافته منشغل مابين اللاب توب واوراق وملفات على المكتب .. دقت الباب ودخلت رفع لها نظره واعاده لشغله .. قال : ليتك جبتي لي معك شاهي ولا قهوة . وقفت عنده قالت : سويت قهوة وحطيتها عند عمي وجدتي ... انت عارف ان عماني رجعوا . رد عليها وهو منشغل مابين القلم والكيبورد : ايه عارف قابلتهم في المسجد ! : اش قالوا ..؟ : ابو مشاري وافق بس حاسهم مشاري يقول البنت لازم تاخذ وقتها ومن هالكلام وفهد زعل وطلع وهم رجعوا على نية ان ابو مشاري بيرد عليهم هاليومين . : ممم الله يكتب لهم اللي فيه خير .. طيب تعال تقهوى مع جدتي وعمي . لمحها بطرف عينه وهي حاطه الجلال على اكتافها ولامه شعرها بشباصة ووعيونها مزينه بكحل داخلي وشفايفها تلمع بقلوس لحمي .. رد عيونه لجهازه قال : روحي جيبي لي شي اشربه . : ماحتيجي تتقهوى معانا ..؟ : لا عندي شغل مااقدر اتركه .. رجعت وهي زامة شفايفها قالت : بجيب لك قهوة تراها كويسه عشانك . طالع فيها ورمى القلم من يده على المكتب قال : شادن . رجعت ووقفت مقابلة له عند المكتب قالت : نعم . : وش بغيتي يوم جيتي وقلبتيني فوق تحت . ابتسمت باستغراب قالت : هااا ..؟ اش سويت انا ..؟ وقف وهو يقلدها : هااا ..؟ اش سويت انا ..؟ عدل صوته وكمل بهدوء جاد : ماسويتي الا الخير بس وش بغيتي اكيد ماجيتي عشان تسألين عن خوالي ..؟ : مممم بصراحه كنت ابغى جوالك بكلم امي وسارة ابغى اعرف اش رايها ..! رجع لدرج مكتبه اخذ جواله وفتحه ومده عليها هو يقول : وبس ..! الجوال وراعيه تحت امرك .. كم عندنا من شادن .. خذي وكلمي اللي تبين . اخذته من يده وهي تهمس بشكراً خجوله .. قال : بالله اقنعيها ترى فهد رجال وينحط على اليمنى . ابتسمت ملامحها وقالت بدلع عفوي : اقنعها بس على مسؤوليتك انت ..؟ رفع حاجبه وكأن حركتها نرفزته قال : ايه على مسؤوليتي ... يالله روحي كلميها بس قبل سوي لي نسكافيه . هزت راسها وابتسامتها على وجهها وطلعت من عنده . وهو رجع لجهازه وشغله يدور اللي يشغله ويبعده قدر الامكان عن التفكير فيها او في نفسه . *** جالس في الشركه يكمل الشغل بعد ماانصرفوا الموظفين .. انتبه لجواله يدق وشاف اسم مشاري . ضم على الجوال بحنق وكلام مشاري امس يرن في اذنه ... وقف الرنين وسرعان مابدا مرة ثانية .. قفل الملف اللي قدامه ووقف وطلع من المكتب بملل وجواله لساته يدق .. طلع من الشركة وركب سيارته من دون مايهتم لمشاري واتصاله وش عنده ..؟ بيعتذر من جديد ..! ماابي له عذر .. يبي يبرر ..؟ ماابي اسمع له تبرير .. دق جواله من جديد ورد لأن المتصل نايف ولد عمه .. رد عليه بملل : هلا . : هلا بك .. السلام عليكم . : عليكم السلام وش تبي ..؟ : لااااه اش فيه المزاج ..؟ : اش بعينك .. نعنبو ابليسك رجال طول في عرض ماتعرف تقول وش ..؟ : وش بعينك انت .. لهجتي وماني مغيرها عشانك ..؟ : مااقول غير خسارة منال فيك ... قاطعه نايف بحده : انا اللي مااقول الا خسارة سارة فيك والشرهه مو عليك عليّ انا اللي ببشرك ان البنت وافقت . سكت فهد ثواني .. ماتوقع انها توافق بسهوله او حتى انها توافق ولو بعد امد .. قال مبعد شكوك نايف ان سكوته صدمه او فرح : وافقت على وشو ..؟ : وافقت على جدي ... يعني على من بالله ..! : انت شكلك تستهبل .. الموضوع منتهي من امس .. رد نايف بعصبيه ومتفاجيء : اييييييييييييييش ..؟ : ايه منتهي .. انا موب ملطشه على كيف مشاري شوي يقول لا وبعده يجي يقول خلاص تعال . : هييييييي فهد .. صاحي انت ولا مجنون . : مالك شغل وعرس بطلنا .. ماعاد نبي نعرس ..! : لاوالله ..؟ على كيفك الدعوة ... تسحب عماني وتجي تخطب من الرجال والحين ... قاطعه فهد : والحين الموضوع منتهي ومع السلامه ولاعاد تفتح السالفه هذي معي .. قفل في وجه نايف بدون مايسمع منه أي كلمه .. دق نايف عليه مرة ثانية وثالثه وهو مطنش وماسك الطريق اللي يودي للبحر .. المكان اللي خطر في باله بعد زخم الافكار اللي تحاشرت في ذهنه .. ابيها ..؟ ايه ابيها ولا ابي غيرها ..! طيب البنت وافقت ..! بس مشاري امس اهانني وجرحني في مجلسه . اعتذر وقال لك وش يقصد ومعاه حق .. خله يتعلم ان الغلط له نتيجه وجزا . طيب وهي وش ذنبها ..! صح وش ذنبها .. انا بعد وش ذنبي .. سمع اصوات البواري على عليه من اتجاهات عدة وتجاوز شاحنه تمشي بنص الطريق بقدرة قادر ولولا عناية الله كان تسبب في حوادث كثيرة مو بس واحد . التفت على واحد وهو يشتم ويخاصم من بعيد وثاني بجنبه يرميه بأبشع الكلام وثالث يأشر له بمعنى مجنون انت ولا شارب شي . تعوذ من ابليس قبل لاينزل ويوقف الطريق كله ويقلبه هواش ومضاربات وكمل طريقه بقلق وتوتر وتضارب افكار وبعثرة مشاعر .. *** قفلت من سارة والتفتت على شهد وهي تجري متوجهه لعماد في مكتبه .. قالت لعمتها اللي دخلت : ياهلا ياهلا .. وين الناس من متى ماشفناك . سلمت فوزية على شادن وهي تقول بصوت واطي : عندكم ناس غثيثين واخاف ارتكب فيهم جنايه .. ضحكت شادن قالت : تعالي عند جدتي وعمي وليلى في غرفة جدتي انا بودي جوال عماد وارجع لك .. راحت فوزية لغرفة امها ودخلت شادن لمكتب عماد وهو يسولف مع شهد الجالسه قدامه على المكتب .. قال وهو معقد حواجبه : العنود متى كبرت وهي امس تسابق الريح من بيت لبيت . لوت فمها قالت : خلاص البارحه في الليل صارت كبيرة .. : ههههههههههههههههههه وانتي وش دراتس . : هي جات عندنا وقالت لي خلاص صارت كبيرة واخذت غرفة اختها المديرة هذيك نووف اللي كانت تقزك مع الشباك وودوها لمسفر عشان يطلع الجني حقها . قاطعها : خلاص قومي لامتس وفكيني من الكلام هذا .. ولا عاد اسمعتس تتكلمين في الناس ثم ازعل منتس .. نزلها من فوق المكتب وهي تقول : والله ياعماد ماكذبت عليها حتى اسأل العنود . رد بتحذير : الكلام في الناس مايجوز ربي مايرضى علينا . شهقت شهد قالت : خلاص آسفه ياربي . طلعت من المكتب تاركه شادن وعماد وراها يضحكون .. تقدمت شادن ومدت الجوال على عماد وهي تقول : تفضل .. جزاك الله خير .. ترى نايف يسلم عليك ويقول لك كلمني ضروري .. عدل جلسته على الكرسي العريض قال : وش يبي ماتدرين ..؟ : لا ماقال .. بس يقول يبغى يكلمك ضروري . : زين اكلمه الحين . اعطته ظهرها بتخرج وناداها : شادن لحظة ... التفتت عليه وكمل : وش قالت لك خويتك ؟ . عدلت جلالها عليها قالت : خلاص . رفع حاجبه قال بجديه مقاطعه : مااسمع شي .. فتحت فمها بتعيد كلمتها وسبقها بـ : تعالي عندي هنا .. اشر على مكان قدامه وكمل : وقولي لي وش صار ..؟ قربت من المكتب ووقفت مقابل له قالت : خلاص استخارت .. رد وهو يطالع في السقف : مااسمع صوتك تعالي عندي . رفعت صوتها بـ : اقول لك .. قاطعها : مااسمع الا اذا جيتي هنا . وقفت باحراج وعلى وجهها ضحكة خجل ولفت من ورى المكتب ووقفت عنده قال : ايوووه الحين اقدر اسمعك .. علميني وش قالت خويتك . : خلاص وافقت بعد ماصلت الاستخارة . مسك يدها اللي ارتجفت بوسط يده قال : وانتي صليتي الاستخارة ...؟ ردت بارتباك : ها ..؟ ليه ..؟ قصدي متى ..؟ مو فاهمه عليك ..!! ضحك عماد بصوت مسموع وضم على يدها الناعمه قال : اقصد يوم وافقتي عليّ صليتي الاستخاره . صدت بوجهها عنه بعتب قالت : صليت كثير قبل ماتجون عندنا . : ايه وش كان رايك ..؟ طالعت فيه باستغراب وابتسامة واسعه وخجلة قالت : ماادري اش رايك انت . : يعني راضيه وموافقه . : اش تشوف . طالع في جلالها على قميصها الوردي بأكمامه القصيرة وسحبه من عليها قال : اشوف ان هذا ماله داعي ليه لابسته وانتي في بيتك وماعندك اغراب ..؟ ضمت على يدينها وطالعت في الباب وراها قالت : مستحيه امشي كذا قدام عمي ..! جمع الجلال بين يدينه وشد عليه وناظر في لاشيء وكل تفكيره محصور في اعجابه في سترها وخجلها وصبرها وحفظها له واحترامها وحبها . مده عليها قال بجدية : الله يعين احمد على علته .. بالله ياشادن علميها الستر . : لا الله يخليك ماابغى احتك فيها يكفي اني قلت لها كلمه نطت في وجهي خلتني اقصد واعني .. بعدين عمي الله يهديه صاير قاسي عليها كل شوي يكلفها بشغله وهي نص الشغل ماتعرفه . توجه عماد بكرسيه للمكتب قال بلا مبالاه : خليه يربيها .. حرمته يبي لها سنع من زمان ... فتح الدرج ورفع راسه لها قبل ماتخرج كأنه تذكر شي : الا صحيح شادن .. انا فاقد لي ورقة من هنا ماتدرين وينها لاتكون هذي داخله مكتبي تراني مااستبعد عليها شي . وقفت مكانها وجهها تكسوه حمرة احراج قالت بحذر : لا محد دخل .. بسس .. ممم .. :دام فيها بسس وامممم معناها انتي .. ابتسمت بحرج قالت : بصراحه ايوه انا .. قرأت لي قصيدة مالها داعي واخذتها عندي . قفل لاب توبه بهدوء ووقف وجا عندها ... قبض على معصمها بقوة قال : مالها داعي ها ..؟ ليه مالها داعي ..؟ غمضت عيونها بقوة قالت : انت عارف ليه .. : لا ماني عارف علميني ..! ولما ماشاف منها رد ضحك بخبث وقال : اختاري اما تقولين ليه مالها داعي ولا وربي لاشيلك وألف بك البيت كله .. فتحت عيونها بخوف ونظرها على الباب قالت : لا لا الله يخليك انا اقول لك .. بس سيب يدي . ترك يدها وهو يقلدها : سيب يدي .. وكمل بصوته : هذاني سبت يدك يالله قولي . تأملت مكان مسكة يده في معصمها وفي لمح البصر كانت خارج المكتب .. دخلت غرفة جدتها وجلست بجنبها .. قالت فوزية : علامك يالعنود ..؟ اخذت نفس سريع وهي تضحك قالت : استغفر الله خلوا العنود في حالها انتي وبنتك .. وصلهم صوت عماد يلج بالمكان : ياولد تراني جيت .. نبي طريق لغرفة ام ناصر ياولد .. ناداه احمد بصوت عالي : تعال مافيه احد ... التفت لشهد قال : شهودة روحي لليلى قولي عماد في غرفة جدتي لاتجين الحين . دخل الغرفه واسفل ثوبه في يده .. اول مااستقر نظره ابتسم بخبث قالت ام ناصر : تعال ياوليدي خذ لك فنجال قهوة . جا وجلس بجنب شادن اللي صبت له فنجال قهوة ومدته عليه ومدت صحن التمر قالت بابتسامة انتصار : تفضل . حك رقبته قال بصوت يسمعه الكل : زاد فضلك .. قومي روحي جيبي جوالي من المكتب بكلم اخوك . عرفت وش هدفه قالت : ها ... لا لا مو لازم تكلمه الحين . : ليش مو لازم مو قايل لك خليه يكلمني ضروري .. رفع حاجبه بتمثيل على الجالسين قال : عجلي تأخرت على الرجال . قالت ام ناصر : ياوليدي شادن مافكت يدها من الشغل من يوم قامت من نومها .. خل فوزية تجيبه . وقفت فوزية قالت : اجلسي والله مايجيبه الا انا . عض على شفته السفلى ورشف من فنجاله قال لها بهمس : لاتحسبين انك بتفلتين . قالت بذات الهمس : افلت من ايش ..؟ : من سؤالي . : خلاص اجاوبك . : اسمع ...! : مالها داعي لأنها كئيبة .. ولأن فيها كلام يجيب المرض . : لاوالله ..؟ شافت عمها لاهي مع فيصل وجدتها تذكر الله بصوت عالي وتسبح وتستغفر وكملت وهي تعدل جلالها عليها : كمان عشان انا لزقة مامني فكه . طلع ورقه من جيبه ومدها عليها قال : طيب شوفي هذي لها داعي ولا لا ..؟ اخذت الورقه وفتحتها وقرأت .. ياقمر بالله قل لي من تكون ووش تكون بعدما حيرت فكري ياقمرنا من دهاك سافرت يمك حروفي بعد ظللها الجنون وسلمتني لرمش عينك يتلاعب بي حلاك وتهت بين الرمش مدري تهت مابين العيون حسبها الله ياعيونك سببت لي ارتباك جيت باوصفهم لقيت الوصف لايمكن يكون لانهم فوق الوصوف وسرهم فيه الهلاك حيرت شعري وفكري كيف باوصف سحر نون هد ياقلبي دخيلك .... بعدما ربــي ابتلاك طبقت الورقه وضمت عليها بيدها .. قال : ماقلتي لي . هزت راسها بإحراج قالت : انت اللي تجاوب هالمرة . دايماً تغلبه ..! ولا مرة قدر يغلبها لابالكلام ولا الفعل .. دخلت فوزية وجوال عماد الثريا في يدها ومدته على عماد اللي وقف فوراً وطلع من الغرفه بيكلم نايف .. رجع لهم بعد دقايق وهو يضحك بقوة قال لشادن من بين ضحكه : قومي فيه حرمه عند الباب تبيك . طالعت فيه بشك قال : اخذي فوزية معك ولا اقولكم خلكم هنا وانا اجيبها .. طلع برا ورجع قال بضحكه مكبوته : جاتكم الضيفه استقبلوها . دخلت عليهم الحرمة اللي طولها مايتجاوز المتر والكل تسمرت عيونه مذهول .. تكلمت العنود من تحت البرقع والجلال : السلام عليكم . حاولت فوزية تتماسك وخذلها الموقف وانفرطت من الضحك وبهيستريا .. وقف احمد وطلع ولحق عماد وهو متماسك بملامح ضاحكه .. ردت ام ناصر السلام وشادن ساكته وماسكة نفسها لاتضحك .. قالت بلهجة شخص كبير : امي تسلم عليكم تقول الله يحييكم على العشا عندنا . اخذت شادن نفس وطالعت في فوزية وهي حاطة المخده حقت امها بينها وبين العنود وتهتز من الضحك .. تماسكت شادن قالت : نوف جات يالعنود . .؟ ردت العنود بنفس اللهجة وكأنها كبرت عشر سنين على عمرها : ايه اليوم جو وتغدوا عند عمي غازي .. وعشاهم الليله عندنا . دخلت ليلى الغرفه وناظرت في العنود بنص عين قالت : بسم الله الرحمن الرحيم . دنقت العنود براسها منحرجة من لهجة ليلى المصدومه .. قالت ام ناصر تشجع العنود : هذي العنود بنت لافي البنت السنعه اللي تطيع امها وتسمع كلامها .. دخلت شهد وشهقت وهي تشوف العنود برجولها الحافية وبرقعها وجلالها قالت : العنوووووووود خلااص كبرتي ..؟ ضحكت العنود قالت : ايه كبرت . قالت فوزية بعد ماهدت نوبة ضحكها : العنود نوف شافت برقعتس . ردت العنود ببراءة : لا ماشافته .. شوي تجي وتشوفه . قالت فوزية بصوت واطي : عز الله بتكسر رقبتك .. رفعت صوتها موجهته للعنود وكملت : خلاص ياشاطرة سلمي لنا على امك قولي ان شاء الله نجي اذا قدرنا . طلعت العنود بصحبة شهد اللي تناظرها بقهر لأنها كبرت وسبقتها لحياة تتمناها وتنتظرها . *** جالسه بين امها ونورة .. وتحكي وتشرح وتسهب في الوصف .. قالت نورة لنوف : ها يانوف عساتس مبسوطه مع حمود . ردت نوف بامتنان : الحمد لله رب العالمين .. من بعد مارحت للحرم واعتمرت وانا احس ان حمل ثقيل انزاح من فوق صدري . احس اني تعافيت من ضيقة الخلق . قالت امها : يابنيتي ماخاب من توجه لربه .. طلعت جوالها تفرجهم على الصور بعد ما صارت تتقن استخدامه .. ورتهم البحر ونافورة الملك فهد .. والمطاعم والاسواق والشوارع والسيارات . . وعروض الألعاب الناريه اللي صادفتها في احد المنتزهات على الكورنيش .. كل الأماكن اللي زارتها كانت تصورها عشانهم .. تبيهم يشوفون اللي شافته .. وكل شوي تجيب طاري حمود ووش قال لها عن المكان اللي يروحون له . نادى لافي ام نوف وقامت له تلبيه واستغلت نورة الوقت قالت بهمس : ماقلت لتس ان حمود طيب وينحب . لوت نوف فمها قالت : هو ابن حلال وماقصر معي ويدور رضاي بس انا مدري وش فيني . فتحت نورة عيونها بتحذير قالت نوف تطمنها : لايروح بالتس بعيد .. مافكرت في غيره من يوم اخذته .. اصلاً انا عرفت يانورة ليش كنت افكر في .. في .. في هذاك ... كنت ابيه يطلعني ويوريني الدنيا .. من يوم عرفت السبب وانا ناسيته الحمد لله ... بس ماادري ليش ماقدرت احب حمود ... انا مااكرهه بس ماقدرت احبه . ابتسمت نورة لاختها قالت : مع الوقت بتحبينه يانوف وتذكري كلامي .. اصلاً الحب مايجي الا بالعشرة لاتستعجلين اهم شي انتس ماتفكرين في غيره . : الله لايقول اني افكر بغير رجلي . دارت عيون نوف في المكان قالت بحماس : العنود وين راحت تراني جايبة لها هدايا وش كثرها . ردت نورة : قبل شوي هنا ترزز ببرقع امي وجلالها . رجعت امهم جلست وحطت امها يدها على راسها وهي تشوف العنود تدخل عليهم جاية من برا .. قالت : يافضيحتي من هالبنت .. رفعت صوتها موجهته للعنود : من وين جيتي الله لايحييتس . رمت العنود برقعها وهي تشوف جوال نوف بحماس .. قالت : رحت .. رحت .. طالعت في نوف بخوف ايه ايه .. رحت برا ورجعت . قالت امها بلوم : انا ماقلت لتس روحي اعزمي ام ناصر وبنتها وحريم عيالها . قالت بخوف : عزمتهم يمه . شهقت نورة وخبطتها على كتفها بقوة : رحتي بالبرقع الله يفشل عدوتس . قالت نوف : فكونا من العنود وتعالوا اوريكم هداياكم .. كانت العنود تراقب الاكياس ونوف توزع لامها اقمشه فاخرة وتولة وخاتم ذهب .. ثم لنورة عطر وعلبة مكياج واكسسوارات مشكلة .. .. خايفه ان نوف ماجابت لها.. نوف ماتحبها وياما ضربتها وهزأتها وخاصمتها .. رفعت نوف الكيس الكبير قالت : هذا حق العنود .. بلعت ريقها تنتظر .. دبدوب .. عروسة .. عيونها مفتوحه وهي تاخذ الهدايا وكأنه حلم تبي تتمسك فيه حتى يكون واقع .. ضحكت نوف قالت : اصبري باقي اهم شي .. راقبت الكيس تنتظر المفاجأة الثالثه او بالأحرى الحلم الثالث .. فستان ابيض ونفاش .. قالت نوف : هذا حق العيد . شرقت العنود وحكت بقوة وهي تجمع اشياءها الثمينه .. قالت نورة بضحكه : هيييييي تعوذي من ابليس الفرحه لاتوقف قلبتس . ردت العنود بدون شعور او تركيز : اعوذ بالله من الشيطان الرجيم .. بسم الله الرحمن الرحيم ..( قل هو الله احد ، الله الصمد ، لم يلد ، ولم يولد ، ولم يكن له كفواً احد ) . انفجروا امها واخواتها بالضحك .. وضحكت تجاريهم والفرح يرقص بداخلها ويغني ..! *** بعد اسبوع ..! جالس في شقة عماد وياكل فاكهه ..! الريموت في يده وهو ينتقل من قناة لأخرى ..! رمى الريموت بملل واخذ جواله فتحه وقرأ الرسالة للمرة الألف ..! صحيح ان عماد وبخه ولامه وخلاه يندم على قراره .. بس الرسالة زلزلت كيانه .. قلبته وخلته يندم ويحس بصغر نفسه وتهوره .. يمكن لولاها كان ماطل وتباطأ لين يرد اعتباره بعد ماحس ان مشاري اهانه ..! انتبه لعماد اللي توه صحى من نومه ودخل للمطبخ على طول .. قفل فهد جواله ولحق عماد للمطبخ : السلام عليكم . رد عماد وهو يحط في الابريق الصغير نعناع ويصب عليه مويه ويحطه على النار : عليكم السلام .. كلمت مشاري ولا لا . : كلمت ابوه وقلت اني سويت الفحص .. قال عماد بلهجة حاده : حدد الملكه معه خلنا نخلص من موضوعك .. خالي يوم درى عن هبالك ارتفع عنده السكر لولا عناية ربي ورحمته ولا يمدي صار له شي . جهز عسل في كوب كبير وصب مغلي النعناع عليه وكمل وفهد ساكت : الله يهديك بس .. ماتعرف تحكم عقلك وتوزن الامور وتقيسها من جميع النواحي . رمى فهد قشرة الموز في السلة قال : انت تعرفني متهور . : اذا انت متهور وش خليت لخالد اخوك .. صح انا متهور ..! بغيت اكون سبب في صدمة جديدة لها ..! قال : انا بطلع للديرة الحين بتفق مع ابوي على موعد الملكه قبل مااعطي الرجال كلمة . عدى عماد من عنده للصاله قال : اتفق مع الرجال على العيد الثاني خالي يبيك تملك اليوم قبل بكرة ! : بس لاتنسى عرس مشاري العيد الثالث . : ازين ملكوا قبل مايسافر اخوها . هز فهد راسه وراح لبس ثوبه واخذ شماغه على نية انه يمر ابومشاري ويمشي من عنده للديرة .. *** جالسة بين جدتها الثايرة لغياب عماد وعمها احمد ..! فضحها تفكيرها وشرودها والكل يرجع السبب لغياب عماد .. وجدتها ساخطه عليه لأنه في نظرها سبب ضيقها ..! ناظرت في عمها وهو مركز نظره في التلفزيون .. محد يدري اذا هو مع التلفزيون ولا لا ..! من الظلم انه يعيش على عماه ولا يدري من الانسانه اللي تعاشره ولا كيف تفكيرها ..! لوسكتت فهي شيطان اخرس وخاينه ..! ولو تكلمت يمكن تسبب مصيبه وكارثة ... محتاره وتايهه .. تعلم ولا تسكت ..! تكتفي بالابتعاد وعدم التدخل في حياة الآخرين ولا تفتح عيون عمها على حقيقة زوجته ... تنتظر عماد وتقول له ولا تقول لفوزية ولا تحسم الموضوع وتقول لاحمد ..! هي اضعف من انها تواجه احمد وتبلغه الحقيقه المرة عن زوجته .. ماتعرفه زين .. تخاف انه متهور ومتسرع وعصبي جداً .. دخلت عليهم فوزية وعلى وجهها ابتسامه وقطعت حبل افكارها اللي مافارق عمها وحياته ..! سلمت عليهم قالت : يدينكم على البشارة ..! ردت ام ناصر : الله يجعله خير ..! قالت شادن محزرة : زواج فهد ..!! هزت فوزية راسها بمعنى لا قالت : زواج فهد صار خبر بايت .. قال احمد بضيق : اعجلي قولي وش عندتس مو رايقين لتس . طلعت جوالها وأضاءت شاشته قالت : طالعوا . في البداية محد استوعب لكن صرخة ليلى اللي فرحتها بتشغيل الابراج اكبر من فرحة الباقين عرفتهم ببشارة فوزية : اشتغل الجوال . رمقتها فوزية بطرف عينها وباسلوب ساخر قالت : ايه ابشرك اشتغل . سكتت ليلى ونظرتها على احمد خشية انه يكون فهم من تلميح فوزية شي . قالت ام ناصر : ليت الماخوذ يشتغل عشان اتطمن على عيالي .. طالعت في احمد قالت : ها قوم دق لي على عماد ابي اكلمه . . فزت شادن وشبكت يدينها بخجل قالت : جدتي خليني ادق عليه انا .. ابغى افاجئه . طالعت ليلى فيها بنظرة مليانه غرابه وممزوجه بسخرية او استخفاف قالت : يعني بتثبتين لنا انك راضية عنه . رفعت شادن حاجبها قالت : وليه ماارضى عنه ..؟ ردت ليلى : بصراحة اللي يشوفكم يقول مو متزوجين وماكملتوا سنه وانتوا ماتشوفون بعض الا في الشهر اسبوع .. عاد بعد خمس سنين وش بتسوون . قالت شادن ببرود وبمغزى مقصود : بعد خمس سنين بندخل عيالنا للروضة ان شاء الله . صحيح اللي يسمعها بيقول انها تتشمت .. وصحيح انها ممكن ماتكمل حياتها مع عماد ومايجيهم عيال .. وصحيح انها جرحت احمد .. بس مصيرهم يعرفون انها ماقصدت تجرح احمد .. وان لها غرض ومقصد ... قالت ليلى باستغراب : احد يفكر بالعيال في بداية زواجه . : والله اهم شي نتفق انا وياه نجيب ولا مانجيب . تكلم احمد بعصبيه قال : اسكتي ياليلى ولا والله ماتعدي ليلتس على خير . ردت شادن ببرود : عمي انا آسفة بس احياناً فيه اشياء تجبرنا على قسوة الكلام . مافهم وش تقصد بس اللي يعرفه ان شادن عاقلة وماتطلع منها الزلة ..! وقفت ليلى قالت : اصلاً من يوم جيت هنا وانا ولا ليلة عدت عليّ على خير . قالت ام ناصر : لاحول ولاقوة الا بالله ، يهديتس الله ، يهديتس الله . سكتت ليلى ودخلت غرفتها المجاورة لغرفة ام ناصر وسكرت بابها بقوة .. قالت فوزية : هي علامها ..؟ رد احمد بسخرية واضحه : علامها يعني .. ليلى من يوم سافرت صارت هاي ماتتحمل تعيش في قريه وتعاشر ناس جهله ومتخلفين . قالت ام ناصر بلوم : ياوليدي ليلى غدت ( اصبحت ) مثل البدوية اللي ترعى غنم اهلها واعرست ، اخذت لها واحد مهوب بدوي ويوم جات لاهلها زايرة وشافت الغنم قالت : ياربيييه وش هاالسوادات اللي في روسها عوادات مااعرفها . ضحكت فوزية وشادن مو فاهمه من الكلام الا نصه ..! قالت فوزية : شادن فهمتي شي ..؟ هزت راسها بلا قالت : فهمت نصه . ردت فوزية : السوادات تقصد الغنم اللي لونها اسود .. اما العوادات فهي قرون الغنم تشبه الاعواد .. ابتسمت شادن وماحبت تضحك على ليلى عشان ماتجرح احمد اكثر .. قال احمد لشادن بصوت منخفض وجاد : شادن قومي دقي على عماد قولي له يجيب لي معه جهاز جوال جديد على ذوقه . قالت فوزية : ليش ..؟ رد : ليلى تقول ان جهازها مكسور وابلشتني تطلبه ليل ونهار . تبادلوا شادن وفوزية النظرات وانسحبت شادن لفوق متحاشية الخوض في شي يخص ليلى اكثر من اللي صار قبل شوي ..! *** في طريقه لبيت اهله واللي يمر بجنب ملعب الكورة اللي يجتمعون فيه عيال القرية .. عقد حواجبه وعيونه يتطاير منها الشرر وهو يشوف خالد اخوه يسحب نفس عميق من سيجارة دخان .. وقف فهد السيارة ونزل منها وهو بحالة ر عب وغضب عارم .. آخر شي توقعه وتمناه خالد انه يشوف هالانسان .. لو ابوه كان ارحم .. لو بندر كان اخف .. لكن فهد ..!!! فر يجري لوجهة تبعده عن فهد وتوصله لموطن امان ..! رجع فهد للبيت وهو يزمجر ويهدد ويسب ويتوعد ..! والتفت على خالد اللي دخل من باب قسم الرجال وتوجه لغرفته وقبل مايوصد بابها كان له فهد بالمرصاد . اقرب شي له يفش غله فيه ويسنعه ويتوبه ويصحي قلبه هو العقال .. احياناً الضرب وسيلة للتربيه .. وأحياناً يكون سبيل للخوض في الخطأ من جديد وبتحدي وعناد . لكن ضرب خالد بيد فهد وعقاله كفيل انه يحرم طاري اصحاب السوء كفيل انه يصحيه ويوعي قلبه ..! كفيل انه يخليه يتوب التوبه اللي مابعدها رجعه للخطأ لأن العقاب مو سهل ابداً .. كان يصرخ بين يدينه والعقال يلطم كل منطقه في جسمه : التوبه يافهد والله مااعيدها التوبه .. خلاااص يافهد .. خلاص التوبه .. وقف فهد على صوت ابوه اللي دق الباب بقوة وصرخ على فهد يفتح الباب ويترك اخوه . فتح لابوه الباب وطلع وهو ثاير .. سلم على ابوه بارتباك قال : خلوا هذا ينحبس مثل الكلب وان سمعت انه طلع من البيت ترى بيجيه ضعف اللي جاه عشر مرات . رد ابوه بانفعال : وش هو مسوي علمني ..؟ رد فهد بقهر : لقيته يدخن . رجع ابوه من عند خالد وهو يتحسب الله عليه قال : اجل حقه وماجاه .. واذا تبي تزيده ماني رادك . تشبثت امه في يده وهي تسأله بالله ماعاد يرجع . سلم فهد على راس امه وربت على كتفها ومسح دموعها اللي اغرقت وجهها قال : لازم يتربى يايمه .. ولا انتي تبينه يفسد . تكلم خالد بصوت باكي : انت محد قال لك شي يوم تهيت في البر بالاسابيع جاي الحين تضربني وانا رجال طولك . حاول فهد يرجع له من جديد لولا انه امه حالت بينه وبين خالد قال من بعيد : تخسي انت موب رجال .. انا يوم اروح للبر مافسدت .. ولا دخنت وماشيت الدشير والحرامية . : حتى انت موب رجال .. لو انك رجال مااخذت المطلقه وتركت البنات . وقف فهد بمكانه ونظره على خالد وهو ينتحب ويحاول يفرغ شحنة الغضب والألم بالكلام ... قال ابوهم : توضا يافهد والحقني للمسجد .. التفت لخالد وكمل : احترم اخوك الكبير وان سمعت الكلام هذا بعد اليوم والله لتشوف اللي ماشفته لامن فهد ولاغيره . قفل خالد باب غرفته بقوة وأوصده بالقفل وارتمى على السرير والألم ينهش جسده والندم ياكله والخوف من تكرار التجربه يرعبه ..! قال ابو فهد : هاعطني اخبارك . شمر فهد عن ساعده وتوضأ من المغسله وهو يكلم ابوه : اتفقنا على العيد الثاني . : اييييييييييه زين ماسويت الله يوفقك .. التفتوا لصرخة حنان بفرح وهي تجري لمنال : مكلة فهد العيد الثاني . طلعت منال ومدت على فهد مناديل مسح وجهه وسلم عليها وباركت له قال : ذكريني اعطيك اغراض مرسلها ابن الحلال اللي ابلشني عليتس . توهج وجهها بخجل ورجعت للغرفه بسرعه من غير ماترد وهو يبتسم قال ابوه : انت وش قلت لها .. : ماقلت لها شي .. خلنا نمشي الظاهر انه اقام . *** جالس في شقته يخزن معلومات في جهازه ومنشغل كالعادة .. دق جواله وبلا انتباه او تركيز في الرقم فتح الخط وحطه على اذنه .. قال : الو مرحبا . : السلام عليكم . طالع في الشاشه ورجع حطها على اذنه قال : عليكم السلام .. شادن ...؟ : لك حق تنسى صوتي . : فيكم شي ..؟ من وين تكلمين ..؟ قالت بهمس : تأخرت عليّ ورجعت لاهلي زعلانه . شد شعره ورجعه على ورى قال : من جابك ..؟ ضحكت على صوته وهو جاد ومتكدر قالت : اشبك صدقت بسرعه ..؟ يعني من عقلك بطلع من بيتي من دون مااستأذن منك ...؟ ماتغير من ملامحه شي قال : طيب من وين تكلمين ..؟ : من بيتنا . سكت ثواني وخمن ان برج الجوال اللي نصب من اسبوعين اشتغل قال : رجيتيني حسبي الله على عدوك . ضحكت اكثر قالت : جهز حالك ترى جدتي مرة زعلانه . سند براسه على الكنبه قال : بس جدتي اللي زعلان ...؟ ردت عليه بجديه يتخللها عتب واضح : ليه انت يهمك غيرها ..؟ : اكيد يهمني غيرها وانتي تدرين . قالت بخجل : لاماادري . ابتسم قال بهمس : بسيطه اذا جيتك علمتك . جمعت كل شعرها على جنب قالت : متى بتجي ..؟ : ماادري والله ودي اكمل شغلي قبل العيد . سكتت شوي بعدين قالت : عماد . قال بلهفه وتلقائية : لبيه . سكتت ثواني ثم قالت : كيفك الحين ..؟ : قصدك صحتي ولا حياتي ولا وش بالضبط ..؟ تفاجات من سؤاله قالت : اول شي .. مداوم على العلاج ولا لا ..؟ : وش تتوقعين ..؟ : ان شاء الله انك مداوم عليه وماتخذلني . قفل جهازه اللاب توب بدون تركيز قال : ماتركته ولا يوم . : طيب ماتحسنت صحتك .. صعب انه يأملها وفيها يمكن ويمكن ..! يخاف يمشيها على خط الأمل ثم تسوَّد دنياها باليأس وقطع الرجا .. قال : الحمد لله على كل حال . ابتسمت بوجع قالت : عادي لساتك في البداية اهم شي لاتيأس .. بعدين الخلطه حقت الثوم والزبادي والكزبرة ليه ماتستخدمها . رد عليها وهو يمسد شعره : هذيك فيها ثوم وصعب اروح للمسجد وانا ماكل ثوم .. . باغتته بردها على طول : هذي حلها بسيط بعد ماتاكلها كل لك شوية بقدونس وتروح ريحة الثوم . ضحك بصوت منخفض قال : وانتي دايماً الحلول عندك جاهزة ..؟ ردت بضحكه : امي زمان كانت تحط لابوي الله يرحمه الثوم مع الزبادي عشان الثوم مفيد للقلب .. وكانت تعطيه بقدونس حتى تروح ريحة الثوم . : الله يرحم خالي رغم انه عاند ابوه وعصاه الا ان ربي رزقه بعمتي اسنع الحريم تراها كل يومين ترسل علي غدا ولا تعزمني .. : الله يطول بعمرها .. قال باستعجال : آمين .. طيب شادن ذكريني اجيب معي بقدونس .. ايه صح .. طالما الجوال اشتغل ارسلي لي رسالة بالاغراض اللي ناقصتكم متى ماجيت جبتها معي .. : حاضر .. اكتبها لك الحين . : عندكم احد ..؟ : عمتي فوزية .. ترى هي اللي بشرتنا بالجوال وابلشتنا على الهدية . ضحك عماد بهدوء قال : تستاهل البشارة ام فيصل . : طيب انا بنزل تحت الحين .. ابتسمت وكملت : تراني راح ازعجك .. : هههههههه متى مابغيتي اتصلي .. تامريني على شي . : سلامتك بس لاتتأخر عشان جدتي ماتزعل منك . قال بخبث : عشان جدتي ماتزعل مني ها ..؟ : عشان محد يزعل منك طيب . : ههههههههههههه زين زين ان شاء الله مااتأخر ... يالله مع السلامه . : بحفظ الله . *** جالسة قدام التلفزيون وتتابع برنامج غير حياتك على قناة ابو ظبي ..! مندمجه مع البرنامج وتسمع بإصغاء لدرجة عدم احساسها باللي حولها .. اذا الانسان يبغى يغير حياته فهو بيده مو بيد غيره .. يقرر ويسعى ويجتهد .. يقنع نفسه ان ربي اعطاه عقل وقدرة على التفكير والعمل وان الدنيا فيها الجميل مثل مافيها القبيح .. واللي يبغى الجميل يبحث عنه ويسعى له .. هي ودها تغير حياتها ..! اذا مو عشانها عشان ابوها وامها اللي تعبوا معاها وعشان مشاري اللي وقف وقفة الأخ السند وقت الشدة ..! فزت من مكانها وهي تشوف شاشة التلفزيون تغلق .. رفعت راسها وشافت ابوها واقف بجنبها والريموت في يده قالت : يبه .. فجعتني ...! : لي ساعه انادي عليك ماتردين . : يوووه ماانتبهت كنت مركزة في البرنامج . نزل ابوها الريموت قال : فهد جا وقرر الملكه العيد الثاني . حاولت تعترض بس تكلم ابوها : انا لو بيدي ناديته الليلة .. بس عاد هو يبغى اهله يجون معاه . عورها بطنها وحست بغصة في حلقها .. ملكة من جديد ...! ورجل في حياتها وزواج وأمنيات .. وأحلام ممكن تكون وردية وممكن تكون سوداء مثل احلامها مع خالد ..! قالت ببرود مبطن بخوف ورهبه : يبه على كيفك اللي تبغاه يصير بس انا لي شرط . : اشرطي وآمري باللي تبغينه ..! قالت بثبات : ماابغى لانظرة ولاشبكه . لما شاف ملامحها الصارمه بعد قرارها ماحاول يعترض وقال : ولو اني ابيك تشوفين الرجال اللي اخترته لك .. لكن مانبغى نعارضك طالما هو شرط . كملت وهي تشد على عكازها : كمان ماراح اكلمه قبل الزواج .. سكت ابوها لحظات وتنهد قال بثقه : ياسارة لاتخلطين بين فهد وخالد ترى الفرق بينهم فرق المشرق عن المغرب . : حتى ولو يبه .. انا للحين تعبانه وماابغى اتأثر بأي شي ... طالما انه حيكون زوجي خلاص اعرفه بعد الزواج . هز ابوها راسه متفهم وضعها قال : لك اللي طلبتي ياسارة بس ماراح نتكلم الين هو يطلب وانا مااعتقد انه يقول ابغى اشوفها او اكلمها لأنه مو من عاداتهم . حمدت ربها وشكرته لأن ابوها مااعترض خاصة انه متعصب لفهد بشكل مبالغ فيه من وجهة نظرها . *** دقت على عماد مرة ثانية وقالت له يكلم جدتها اللي طلبت تكلمه .. اعطت جدتها الجوال والثانية استهلت المكالمة بالعتب واللوم .. وين انت عن بيتك واهلك .. وراك ابطيت علينا .. اللي يشوفك يقول ماوراه حرمةٍ تحتريه ( تنتظره ) . عدت شادن للمطبخ وقلبها يتقطع على عمها الشارد بعيد وكلامها قبل شوي لزوجته عن الاطفال ينخر قلبها لأنها جرحته ..! اشرت لفوزية تلحقها وثواني كانت فوزية تشاركها طاولة المطبخ وتسألها : وش فيه ..؟ عماد قال لك شي ..؟ هز راسها بلا وشكبت يدينها في بعض .. التفتت على الشغاله الملتهية بتقطيع الخضار واذنها مسلطتها عليهم .. قالت : لسلي اطلعي للحوش برا دخلي فيصل وشهد عليهم برد . فتحت فوزية عيونها قالت : فكينا منهم بيزعجونا وشغالتي معاهم . : خليها بس تروح لهم .. روحي يالسلي . انصرفت الشغاله من المطبخ قالت : عمتي بقول لك شي وانا بصراحه مرة متردده . :قولي وقفتي قلبي .. قامت شادن وفتحت احد الادراج وسحبت منه شريط حبوب قالت : تعرفي هذي ..؟ شهقت فوزية قالت : تاخذين حبوب منع الحمل وحنا نتمنى شوفة عيالكم ... جلست شادن بقلق قالت بصوت خافت : هذي مو لي .. هذي حبوب ليلى . كان الخبر مثل الصاعقه على راس فوزية .. ياليتها كانت لك انتي ولا تكون لليلى اللي هاجس حملها متعبنا كلنا .. انتي بنعذرك ونقول عرسان ..! لكن هي وش عذرها واحنا اللي ننتظر عيالهم من اربع سنين .. وحجتها ان المشكله مو منها وانها من احمد .. ضمت فوزيها راسها بكفينها قالت شادن : عمتي ماكنت ابغى اقول لاحد بس حرام اسكت .. بس لاتتصرفين بتهور . وقفت فوزية قالت : مايبي لها تصرف .. رفعت صوتها تنادي احمد .. قالت شادن : عمتي لاتكلمين عمي استني كلميها هي اول شي .. يمكن تخاف وتتركها .. : ماينفع .. احمد لازم يعرف هذي اربع سنين لو انها شهور ولا سنه يمكن .. لكن اربع سنين ؟.. هذي اسمها خيانه وخداع ياشادن واحمد حرام يعيش مع خاينه مو كافي بلاوي الجوال . قالت شادن في نفسها " ولوتدرين عن البلاوي الثانية اش بتقولين " وتكلمت برجاء : عمتي بالهداوة انا خايفه انا ظالمينها .. يمكن مريضه والحمل خطير ... قاطعتها فوزية : ليلى مافيها الا العبط والفشر الزايد والغرور وشوفة النفس . وعشان مااظلمها بسأل احمد اول شي اذا فيها شي ولا لا .. دخل احمد وسكتت فوزية قال : وش تبين ..؟ ومن هذي اللي بتسأليني عنها . قالت فوزية بجرأة وقوة : بسألك عن زوجتك .. الحمل خطير على صحتها ..؟ فيها مرض .. ؟ لها عذر يوم تاخذ موانع ...؟ وليه تقول ان العيب منك و.... عقد احمد حواجبه قال مقاطعها : صاحية انتي ولا تستهبلين .. وشو اللي موانع وخرابيط ..؟ طلعت شادن على صوت جدتها اللي نادتها .. وتركت احمد في هول صدمته وفوزية بعز ثورتها ..! اخذت جوالها من جدتها ولحقت احمد اللي مر من عندها متجهم ، هادر ، وغاضب فضل انه يطلع من البيت .. لو شافها يمكن ذبحها وشفى غليل اربع سنين صبر فيها عليها وعلى غلاستها وغرورها وتكبرها ولامبالاتها وعدم اهتمامها .. نادته شادن برهبه : عمي استنى الله يخليك .. تسمر بمكانه يدور على امل انه ماعاش مع ليلى على كذبة .. تكفين قولي مظلومه .. قولي فوزية مسوية مقلب ولا الحبوب لك انتي مو لها ..! قولي اني ماعشت معها على كذبة كبيرة وخداع غير مساوئها وعيوبها .. قولي شي يطمني ويريحني حدق فيها قال : وش تبين ..؟ قربت منه قالت : عمي لاتزعل نفسك .. يمكن الموضوع فيه سوء فهم .. يمكن .. قاطعها : وين لقيتي الحبوب ..؟ عقدت حواجبها كارهه الاجابة على السؤال وكرره بحده مرة ثانيه : وين لقيتيها ..؟ ردت مكرهه : شفها وهي تاخذ منها وتخبيها في دولاب المطبخ . بس حتى ولو ياعمي لاتتهور الله يخليك . انهار جسر الأمل اللي بناه في لحظات ..! وهز راسه باقتناع قال : زين بس لااحد يكلمها غيري . راح يتوضأ لعل غضبه يهدأ .. وصلى ركعتين يهرب لله من شيطان غضبه .. انهى صلاته بعد ما دعى ربه انه يوجهه للصواب ويعينه .. وراح لغرفتها .. فتح الباب قال بكره وحقد واحتقار : اجمعي اغراضتس بوديتس لاهلتس . حذفت ليلى المجله من يدها وفزت بفرح وحمدت ربها وشكرته انه اخيراً بينفذ لها رغبتها ويخليها عند اهلها لين ترجع معه لعمان .. قالت بغرور ظاهر : اخيراً .. طيب ابيك تعطيني فلوس اشتري لي جهاز من عند اهلي ماعاد ابغاك تشتريه . هز راسه قال : انتي اجمعي اغراضتس ثم يصير خير . *** مرت ثلاثه ايام .. بكرة اول ايام عيد الأضحى المبارك .. خلصت شغلها وطلعت فوق .. راحت اخذت لها شور وجففت شعرها بالمجفف ولبست بيجامه بلون زرقة السماء برمودا وبدي قصير .. فتحت الدولاب محتارة وش تلبس بكرة وتمنت لو انها نزلت السوق واشترت شي جديد.. كل ملابسها اللي تصلح لمناسبة كالعيد استهلكتها ولبستها قبل .. طلعت الطقم اللي لبسته صباحية زواجها .. تأملته بإعجاب وقررت تكويه وتلبسه في العيد .. رجعت لها ذكرى صباحيتها ... رغم ان مافيها مايفرح الا ان لها طعم خاص مع عماد .. لمسته ليدها وتأمله لنقشة الحنا على كفها واعجابه فيها اللي ماقدرت عيونه تخفيه .. شهقت بفجعه وهي تشوفه واقف على الباب بقميص كحلي ومقلم بأبيض بخطوط رفيعة وأكمامه طويله وفي يده كيس كبير ..! حطت يدها على صدرها قالت : فجعتني الله يسامحك .. متى جيت .. ماتحرك منه شي وهو يتأملها ولانبس ببنت شفه .. قالت بابتسامه : آسفة .. الحمد لله على السلامه ... تذكرت ان قطع بيجامتها قصيرة وماتستر .. ولفت يدينها على جسمها وتراجعت تدور روب ولا جلال ولا شي يسترها .. تقدم وهو يقول : الله يسلمك .. قرب وسلم على خدودها وجبينها .. وأوصد معصمها بقبضة يده .. قالت بخجل : دقيت عليك اليوم ثلاث مرات جوالك كان مقفول . سحبها وجلسها بجنبه على السرير وهو يقول : الشحن خلص .. وش اخبارك ..؟ : الحمد لله . مد عليها الكيس قال : خذي ماادري يناسبك ولا لا .. اخذت الكيس ونزلته بجنبها وهمست بـ : شكراً . لمحت عيونه وصدت ورجعت طالعت فيها غصب .. صد عنها بجهد واجتهاد .. وتمنت لو يلتفت لها وتشوف عيونه من جديد .. فيها بريق غريب .. ووجهه يشع بحيويه مااعتادتها .. وقف واعطاها ظهره بيطلع ورجع يطالع فيها قال : صحيح تذكرت ياشادن .. بكرة بنروح ونعيد على ابوي من بدري ... مستحي منه ماجيته للحين . هزت راسها بحاضر وعيونها تدور في ملامحه بأمل .. التقت عيونه بعيونها لحظات طويلة وغضت طرفها خجل وعدم جرأة ..! هي البحر الجارف .. جاذبيتها اجبرته غصب للدنو .. قرب ورفع راسها .. تأمل عيونها من قرب همس بـ : طالعي فيني .. غمضت عيونها اكثر وصدت عنه .. : هه وتقولين ليه تنقلني ..! طلع من عندها ورجعت جلست على السرير دقايق طويله ووجها تحت يدينها يجري فيه الدم بقوة .. تنفست بعمق لعل روحها تسكن ويهدأ روعها .. مدت يدها المرتعشه على الكيس بمحاولة منها انها تلتهي فيه .. خرجت الفستان الحرير الناعم .. على نفس طولها ولونه وردي باهت مايزينه الا فص كريستالي كبير من تحت الصدر وجاكيت قصير على اكمامه الكت .. على قد ماعجبتها الهدية وفرحت فيها على قد مافرحت بأن عماد بدا يهتم فيها ويتذكرها ويحس بوجودها .. سمعت صوته يناديها ولبست روبها وخرجت له بسرعه .. قال : انتي مرتبه غرفتي ..؟ : ايوه انا .. ليه .؟ قال وهو يطالع في دولابه ويمد عليها مفتاح من ضمن مجموعه مفاتيحه الكثيرة : خذي افتحي لي الدرج الصغير وطلعي كل الاغراض اللي فيه . اخذت المفتاح منه وهو تمدد على سريره وسند بظهره على السرير ينتظرها ويناظرها .. فتحت الدرج وطلعت كل الاوراق اللي فيه حطتها على سريره وطلعت الدفتر الاسود بمواجعه وذكرياته .. قال : شفتي الدفتر والاوراق هذي .. هذي اسراري اللي ماعرفها غير الله ثم انتي .. ابيك تحرقينها وانا حي ماابي مخلوق يشوفها . قاطعته بخوف وغصة : ليه تقول كذا .. : ماتبين تحرقينها ..؟ خلاص رجعيها مكانها . جمعت كلها وحطتها في كيس احد الأدوية اللي كان يستخدمها قالت : بحرقها كلها طبعاً .. لأن مالها داعي . ابتسم قال بكسل ووجع قال : رجعنا لمالها داعي . ردت عليه بجديه : عماد اش فيك اليوم انت مو طبيعي ..؟ سند براسه على المخده قال : تعالي اقري عليّ . قربت منه وهي خايفه من تصرفاته قالت : عماد تحس بشي ... ليه تخوفني عليك ..؟ غمض عيونه وتغطى وهو يقول : اقري عليّ ياشادن . جلست على طرف السرير وقرأت ( اعيذك بكلمات الله التامات من شر ماخلق ) .. و ( اعيذك بكلمات الله التامة من كل شيطان وهامَّه ومن عينٍ لامَّه ) ( اللهم رب الناس ، اذهب الباس ، اشفهِ أنت الشافى ، لاشفاء إلا شفاؤك ، شفاء لايغادر سقما ) كررتها جميعاً ثلاث مرات وهي تمسح على جنبه الايمن وهو مغمض وساكن ومسترخي ومستريح .. رددت قل هو الله احد وسورتي الفلق والناس عليه اكثر من ثلاث مرات وقرأت الفاتحه سبع مراته ويدها على جنبه .. اخذت المصحف وفتح عينه لمن حس بحركتها قال : وش بتسوين .. قالت : بقرأ سورة البقرة .. انت نام ماعليك .. اخذ المصحف من يدها ورجعه مكانه قال : انا كل يوم اقرأها مع كل صلاة فجر لي اسبوعين الحين .. سحب يدها قال بهمس : شادن .. : هلا .. : ابيك تضميني . خنقتها العبرة والخوف يدب بقلبها عليه ..! وضمته بلا شعور ..! بلا تفكير .. وبدون تردد .. همست بخوف : عماد حبيبي تحس بشي ..؟ تنهد وراسه على صدرها واكتفى بالصمت ..! خايف من الجاي ..! خايف عليها اكثر من نفسه .. مايبيها تنصدم .. وخايف يقتل احلامها وأمنياتها في عز مخضها وولادتها ..! سمع شهقاتها وهي تنتحب ورفع راسه لها .. قالت بخوف : اش صار لك قول لي لاتخبي عليّ . تأوه من عمق قلبه قال : لاتبكين جعلني ماابكيك .. لف يده من وراها وضمها على صدره .. قال : ماصار شي بس امسحي دموعك . مسحت دموعها بقفا كفها وهي تشهق قالت : الا صار وبتقول لي . *** قراءة ممتعه ارجوها لكم |
فصلٌ تاسع عشر ~~ .. هاك قلبي .. ~~ *** لحظات جمعت احاسيس مختلفه ..! حزن وشعور بالرغبة في البكاء .. خوف على الحبيب القريب ممزوج بالأمان على صدره وبقربه .. امل لأن ملامحه تنبيء عن العافيه ..! وتعاسة لأن تصرفاته تدل على انه كئيب وحزين ..! متبعثر وبعثرها ..! يبي قربها والعقل يقول ابعد وارحمها وخاف ربك ..! بكل بساطه هي حلاله بس الزمن حرمها عليه ..! كانت تحس بنبضه يعلو وهو يدفنها في صدره ويدفن اوجاعه وهمومه وخوفه بين اضلاعها .. علّها تساعده وتشيل عنه جزء من الحمل ..! التضاد دايماً صعب في كل شي .. وتضاد الهم هو اقسى انواع العذاب ..! كانت تنتحب بصمت خوفاً انها تضايقه ولا تحسسه باليأس والاحباط .. رفع جسدها النحيل عنه وامتد المنديل من فوق الكومدينو وراها وسحب منه واحد .. وهو يقول : انا متنكد خلقة وانتي زدتيني نكد . ارتجفت وشهقت ببكاء موجع وهي تهمس : عماد اش فيك الله يخليك تقول لي .. حاولت تاخذ المنديل من يده وشد عليه ومسح دموعها برفق وهو يقول بصوت هامس ومبحوح : اعلمك باللي فيني بس وقفي هالدموع لااشوفها . صدت عنه قالت بهمس مشابه : خلاص وقفت بس قولي اش اللي صاير .. امس لمن كلمتك ماكنت كذا . رجع خصلتها ورى اذنها وهو يتأمل ملامحها قال بهدوء : تبين تعرفين وش فيني ..؟ ماقدرت تقول ايه ولا لا .. فقط تنتظر وعيونها عليه .. رجع بجسمه للخلف وتنهد وسند بظهره على السرير .. شد شعره على ورى باحباط ونفخ بقوة دلاله على ضيقه وثقل همه .. قال وعلى وجهه كآبة ماقدر يخفيها : لازم نبعد عن بعض .. بكرة ولا بعده بالكثير لازم اوديك لاهلك . سكت ثواني وهي تشوف خيط احلامها ينبتر وهالة من الحباط تسوتطن عمق مشاعرها وقلبها .. كمل ببرود وبمحاولة انه يبرر لها بمصداقيه وصراحه : كنت احسب نفسي قوي واقدر اقاومك بس يوم عن يوم اضعف .. صد عنها ورجع طالعها بتدقيق ويقول بتأكيد : يابنت الناس انا خايف عليك مني ...! لازم نبعد عن بعض ... ارحميني واحمي نفسك . طالعت فيه مشتته .. فاهمته ومتفهمته .. وضعه صعب .. بس وشلون تقدر على البعد ... بعده صعب .. واصعب من الصعب .. البعد يعني فراق .. والفراق نهاية .. وهي ماتقدر تعيش بدونه .. ماتقدر تعيش ماتنتظره وتكلمه وتشوفه .. طالع فيها جامده ونظراتها تايهه وضم على يدها اللي تحولت لقالب ثلج بقوة وملامحه ترتجي وتطلب انها تفهمه وتقدر ..! نظرة عيونه المكسورة .. طلبه لها وهو في اقصى حالات ضعفه .. ضعيف لأنها عنده .. ضعيف بوجودها وقوي بدونها وبعيد عنها .. جف دمعها وبهتت ملامحها واستكانت كل مشاعرها في حالة برود او ضياع اوتشتت او يمكن استسلام .. المهم انها ماعادت تحس بأي شي حولها .. سحبت يدها من يده ووقفت .. قال بصوت حاني : شادن . التفتت عليه قالت ببرودة سرت في اطرافها وبرود تمكن من مشاعرها : يعني خلاص بتطلقني ..... فز من سريره وهو يهز اكتافها بيدينه ويشد عليها .. قال بانفعال مشاعر : لا ... طلاق لا ... طلاق لا ياشادن ... الا اذا انتي تبينه . ماتحرك منها ساكن واكتفت بـ : انا ماابغى شي .. يكفي يكون اسمي شادن زوجة عماد . رغم همه الا ان حالها اضاف فوق همه هم .. كملت بنفس البرود : مهما حصل انا مافي حياتي غيرك .. وبموت مافي حياتي غيرك فاااهم ..! توثق الحبل بالعهد ..! يعني حتى لو فارقتني ماراح افكر بغيرك حتى لوتبيني اشوف حياتي ماراح اشوفها مع غيرك .. رفع وجهها البارد وطالع في عيونها الضايعه نظراتها قال : تقدرين تصبرين . صدت عن نظراته المليانة اسئلة ولهفة قالت بنفس البرود وبهدوء : اصبر ..؟ الصبر يكون على المآسي والعذاب .. وانا من يوم ربطت اسمي باسمك ماعشت لامأساة ولاعذاب .. رجعت وجهت نظرها على عيونه وكملت : واللي يحب مايصبر على اللي يحبه .. ينتظر ويعيش معه على الحلوة والمرة .. تصبح على خير .. نام ماباقي شي على الفجر ووراك قومة من بدري . اهمل يدينه وانسحبت من بينها .. لملمت اوراقه الملونه والبيضا والمختومه بأسماء مستشفيات بعضها بالعربي وبعضها بلغات مختلفه .. واخذت الدفتر السر .. او دفتر الأسرار .. او بالأحرى دفتر همومه .. وطلعت بخطوة ثقيله لغرفتها .. هم زوجها مثقلها وهم بعده مضيعها ومشتتها ..! وهو جلس بعدها بكل همه . هم المرض وهم سحرها وقيدها له وهم فرقاها .. غمض عيونه وشد شعره بقوة .. وهو يتذكر آخر كلامها .. اعلنت له حبها .. أقرته فعلاً وقولاً ووعداً وعهداً .. رمى نفسه على مخدته ودفن وجهه بمخده صغيره .. الحيرة والرجا والأمل والخوف .. كلها مجتمعه ومتزاجمه قدام باب مستقبله .. *** كلاً بهمه منشغل ..! مانام طول ليله .. ليلته هذي مثل باقي لياليه الماضيه .. ليلى فجرت بداخله كره لجنس حواء وشوهتهم في نظره .. اصعب شيء على الرجل خيانة المرأة له .. وأصعب شيء على المرأة تجاهل الرجل لها .. كل ماضاقت به الوسيعه لجأ لها ودور صوتها وصورتها وريحتها لعل همه يخف وتهدى نار القهر بداخله .. توجه لامه الملاذ الآمن وشافها تلثم سجادتها بعشقٍ ازلي ..! والثانية وافيه ومخلصه تسمع لنجواها وشكواها وتكتم وتبثها الامان من عند الرحمن ..! بعد ماسلمت اكثرت من التسبيح والتهليل وختمت باستغفرك اللهم واتوب اليك انت ربى لا اله انت خلقتنى وانا عبدك وانا على وعدك وعهدك ما استطعت اعوذ بك من شر ما صنعت ابوء لك بنعمتك عليّ وابوء بذنبى فاغفر لى فانه لا يغفر الذنوب الا انت .. التفتت ام ناصر على احمد المهموم ... احمد ضناها اللي يبين الهم على وجهه مثل مايبهج الفرح ملامحه ويوضح عليها .. هو عكس عماد اللي محد يدري وش وراه يضحك وهو مهموم ويسكت وهو فرحان .. ربعت رجولها بصعوبه قالت بلهفة وحرقة قلب : ياوليدي وسع صدرك وان الله اشاء واراد جوزتك اللي تنسيك ليلى وسنين ليلى . شد شعره بيدينه وامه تغرس سكاكين الكلام بجروح الخيانه وذكرى ليلى .. قال : ماعاد ابي لاحريم ولا طاري حريم . تنهدت بهم وضيقة وقالت : تعوذ من ابليس وانا امك ثم الحريم اشكال وانواع .. منهن الطيّبة ومنهن الردية .. مهب ليا صارت مرتك ردية معناتها كل بنات الناس رديات .. مس يدينه ووقف بيهرب من السيرة قال : تكفين الله يخليتس لي لاعاد تجيبين لي طاري هالسوالف ... اقول يمه تدرين ان عماد جا البارح . هزت راسها وعرفت انه غير السالفه وجارته في رغبته : ايه دريت مرني وسلم عليّ وانا ماقصرت عليه باللوم .. هز راسه بعدم رضا قال : لاحول ولاقوة الا بالله .. يايمه الله يخليتس لي دام ان حرمته راضيةٍ(ن) عليه خليه على كيفه .. هو رجال عنده شغل يبي له مقابل مهب فاضي . ردت بحدة : وش هالشغل اللي يمسكه بالاسابيع وقبل مايعرس كل يومين وهو عندي . حك احمد راسه بملل قال : رجال وادرى باموره يايمه .. سكت عن الكلام وهو يقارن بين شادن وبين ليلى .. لو في شادن شي من ليلى يحق لعماد يغيب بالايام بس الفرق شاسع وواسع .. جمع قبضة يده وضرب على اطار الباب بحنق يعبر عن مافي داخله .. ساد الجو صمت هدوء مايقطعه الا همس امه بتسبيحها على انامل اصابعها و هو سارح في ماضيه الاسود مع ليلى كان ليلها سهر ونهارها نوم .. عمرها مااستقبلته الا بوجه متجهم وكان يغزي حالها للغربه وبعدها عن اهلها ويقدر .. واكله من المطاعم اكثر من اكله في بيته بمئات المرات .. ضحكها مايعرفه الا وجوالها على اذنها ولا قدام شاشة الكمبيوتر اللي رافقها اكثر مما رافقها هو .. مكرها وخداعها وهي تروح للمستشفى بحجة الفحوصات والكشف واذا رجعت له قالت الدكتورة تقول ماعندي مشاكل .. معقوله ماكانت تروح للدكتورة ..؟؟ اجل وين كانت تروح ..! عض على شفته السفلى وبجوفه سعير ونار توقدها الخيانه واحساسه بالاستغفال .. التفت لعماد اللي نزل من فوق لابس طاقيته وشماغه على كتفه ومفاتيحه في يده قال : وين ..؟ طالع عماد في ساعته قال : ماباقي شي على الاذان بروح للمسجد اقرأ لين يأذن تخاويني ..؟ وكأنه عرف وش يحتاج ..! محتاج السكينه والذهاب للقاء الله .. هو اللي يبثه القوة ويعينه على النسيان .. شمر عن سواعده قال : انتظرني اتوضأ بس . مر عماد من عنده ودخل عند جدته وهو يقول : اعجل عليّ انتظرك عند جدتي . *** اصبحوا معيدين ...! اعياد كل الناس فرحة وبهجه .. وعيدها شوهه عماد بقراره وهمه .. واقفه في المطبخ تحضر الفطور بمساعدة فوزية اللي جات تعايدهم من بدري .. قالت فوزية بمرح : كل هذا يطلع منك ياابو مشعل .. طالعتها شادن بوجوم قالت : اش اللي طلع منه ...؟ عقدت فوزية حاجبينها دلالة على كآبة شادن وعبوسها قالت : الفستان الروعه هذا .. بصراحة ذوق ... بس عقدة الحواجب هذي ليه ..؟ اغتصبت شفايفها ابتسامه ميته وفردت حواجبها وآثرت السكوت .. جهزت الفطور وكان عبارة عن تقاطيع وحواضر ودبيازة من صنع شادن ( ادبيازة هي الوجبة الرئيسية لفطور العيد عند اهل الحجاز مكونه من قمر الدين والمكسرات وتين وتمر ناشفين وتؤكل بالعيش ).. قالت لعمتها وهي تنفض يدها : عمتي خلاص كل شي جاهز خلي لسلي تساعدك وانتي دخليه المجلس عشان عيال عمي فيه .. طالعتها فوزية باستغراب قالت : وين بتروحين ..؟ سحبت مناديل من العلبه قالت وهي تعطيها ظهرها خارجه من الباب : عندي شغله فوق بكملها واجي .. قطعت كلامهاوهي تشوفه داخل للبيت ويمشي بسرعه ماانتبه لها .. رابط اسفل ثوبه على وسطه .. وشماغه لافه على عقاله بإحكام .. مسحت يدها بالمنديل بتوتر .. تروح له ولا تبعد بزينتها وتخليه في حاله ولاتزيد همه .. صدت بألم في لحظة لمحته لها وتقدم لها بسرعه وهو يقول : شادن .. افاااا مالك نية تعايديني . وقفت بمكانها ووصلها وهو يفك رباط ثوبه ويعيده لوضعه .. قال : تراني دخلت بعد ماجيت من المسجد ودورتك قالت الشغاله انك عند الحريم ورجعت مع خوالي نذبح الاضاحي ونوزعها .. سلم على جبينها وهي في حالة برودها وسكوتها .. قال : كل عام وانتي بخير . ردت ببرود : وانت بخير . رغم انها ماتكلفت في زينتها الا انها بالفستان الوردي ومكياجها الخفيف على سواد شعرها الناعم تغريه وتفتنه .. انقاد لها بكل مشاعره واحساسه .. مااتخذ قراره الا بعد ماوصل هالمرحله وشاف نفسه ماعنده أي قدرة على المقاومه .. انكسر قلبه وهو يشوف نظراتها الشاردة ولونها الباهت وملامحها الواجمه .. هو يدري باللي فيها .. وش اللي مكدرها ومحزنها .. بس ماعنده شي يضيفه ولا له قدرة على الخوض في مواضيع مؤلمة في وقت ومكان مثل هذا .. قال مبتعد عن السبب الحقيقي لحالها ودور على سبب واهي : شادن انتي تعبانه ماتقدرين تروحين معي لابوي ..؟ طالعت في الأرض بكدر قالت : لامو تعبانه خلاص افطر بعدين نمشي . : اذا ماتقدرين تروحين عادي اجلسي . ردت عليه بتوتر وحواجبها معقوده : لاعماد بروح معاك .. اصلاً لازم اشوف اهلك قبل ... سكتت وغمضت عيونها بألم وفتحتها بسرعه .. كملت بسرعه : خلاص على بال ماتفطر اكون جاهزة .. هز راسه والتفت على فوزية اللي تتبع الشغاله وتقول : ياعيني على الرومنسية .. اقول عماد لاتفوتك الدبيازة تراها من صنع شادن . ابتسم وفك شماغه عدله وتبعها وهو يقول : ارجعي ارجعي لشادن خليها تفطر زين تراها تعبانه ... وخلي الفطور انا ادخله . التفتت فوزية على شادن ورفعت حواجبها ولوت فمها قالت : من قدك ياست شادن وهو مهتم فيك هالكثر .. يالله قدامي افطرك تنفيذاً لأوامر البيه . ابتسمت شادن وهي تدخل المطبخ مع عمتها اللي مسكت يدها وسحبتها بدون انتظار لردة فعلها . *** عند اهلها وجوالها في يدها .. اتصلت عليه مرتين وثلاث واربع والنتيجه الجوال مغلق .. دخلت عليها العنود بفستانها الحلم ...!!! شعرها مفتوح ورجولها تحتضن جزمة نورة اختها البيضا ومطرزة بأحمر وأخضر .. وشفايفها يلونها روج احمر صارخ سايح من اطراف شفايفها .. قالت نورة اللي تراقب اختها القلقانه : العنود الله ياخذ عدوتس .. هذا وشو اللي انتي مسويته في عمرتس ..؟ طالعت نوف في العنود وهزت راسها وهي تحمد ربها وتشكره قالت : جزمة نورة وش تبين فيها ..؟ رصت العنود شفايفها على بعض وحركتها قالت : عشانها طقم فستاني . زفرت نورة بقهر : ياويلي من هالبنت تبي تجيب لي السكته القلبيه .. تخيلي لو يجنيا احد من بعيد .. ولاتطلع لعيال الديرة والله لتصير مضحكتهم طول العمر .. طيرت العنود عيونها المدعوجه بكل حجر ناشف من كحل امها قالت بحماس : احد بيجينا من بعيد ..؟ قالت نورة وهي تلم شعرها وتمسكه بشباصه كبيرة وتعدل بلوزتها الطويلة على تنورتها الجينز : وانتي ماهمتس غير الناس محد جاي انا اقول تخيلي ماقلت بيجون اكيد .. دقت نوف على رقم حمود من جديد بتوتر ورجعت قفلت الزر الاحمر بضيق وهي تقول : مقفل للحين .. نورة انا وش اسوي ...؟ قالت نورة : هدي اعصابتس يانوف الغايب عذره معه .. كلها ساعه ساعتين ويوصل بالسلامه .. يمكن ماسلّم ولا ماعنده شبكه ولا جواله مافيه شحن . : الله يستر .. قالت العنود : تلقين صار عليه حادث مثل محمد اخو مريم زميلة.... قاطعتها نوف : فالتس ماقبلناه .. اعوذ بالله منتس ومن شرتس ... قومي انقلعي عن وجهي انتي وروجتس اللي يجيب المرض . حطت يدها على قلبها بخوف .. لو يصير لحمود شي ..! وفي لحظة شيطانية تخيلت وشلون تعيش ان صار لحمود شي .. حمود اللي بنت عليه آمال واحلام وتحققت على يده أمنياتها .. ان مات ولا صار له شي من يعوضها عن اللي شافته ومن يكمل لها بقية احلامها .. نفضت راسها وتعوذت من ابليس وهذا تفكيرها .. واستدركت بايمانها والطيبة المتأصلة في قلبها تجاه ولد عمها وزوجها اللي بدت تحس بأهمية وجوده في حياتها .. الزوج الحنون .. الصابر طويل البال ووسيع الصدر .. حمود الانسان الكريم طيب المعشر .. حمود اللي يحبها ويحن عليها ويراسلها ويكلمها بأجمل انواع الغزل والحب .. رفعت نظرها للسما ولهجت بـ : يارب رده لي سالم . طالعت في خواتها والعنود تصرخ على نورة : اقول لتس هاتيها انا ماعندي جزمه مثل فستاني .. ونورة تصرخ : ياعالم هذي وشلون تفهم .. انقلعي البسي الصندل اللي جابته لتس نوف مع فستانتس . ردت العنود باصرار : مابي العله هذاك اللي يربط رجولي هذا وسيع واقدر انزله على طول . وقفت نورة وهي تقول : والله ان مااستنعتي وسمعتي الكلام لااخلي ابوي يوديتس مسفر ولا وضحى اللي تكوي ثم اخليها تربع لتس راستس يالمتخلفه . ( تقصد ان تقوم المعالجة بكيِّها على راسها في اربع جهات بحديدة او سيخ رقيق ويستخدمونه بعض المعالجين الشعبيين كحل لبعض الأمراض خاصة النفسيه والعقليه ) تراجعت العنود وفتر عنادها قالت بزفره وضيق : خلااااص ماعاد ابي لتس شي . بروح احرس سحيمان لايذبحه ابوي اشوفه له يومين يقزه والظاهر انه ناوي يضحي به . ردت نورة بارتياح : ايه روحي احرسيه تراني سمعته يقول لياغفلت عنا العنود بنذبحه . ضربت العنود على صدرها بهلع وعيونها مفتوحه بفجعه وهي تقول : ياويل قلبي على خروفي .. طلعت مع الباب تجري متناسية الجزمة والصندل والحذاء عموماً .. ونورة تنادي : تعالي يالخبله البسي صندلتس .. ماردت عليها العنود ومضت في طريقها ووجهتها حوش الغنم القريب من بيتهم . اخذت نوف عبايتها وهي تقول : انا بروح لبيت عمي بشوف جاتهم اخبار عن حمود ولا لا . وقفت نورة معاها قالت : ماشاء الله يانوف اشوف الخوف على حمود .. قالت نوف بلهفه : حمود ولد عمي ورجلي اذا ماخفت عليه وش ابي بعمري . اخذت شنطة يدها وطلعت بسرعه وسط دهشة نورة وفرحتها ودعواتها لها بالاستقرار والهداية ..! *** رغم ان اليوم المنتظر اقترب .. الا ان عيده مكتظ بحزن الذكريات الموجعه .. دخل لبيت ابوه وهو متلثم بشماغه بعد زيارته للمقبرة وسوالفه على سعود ودعواته له وزيارة اهله .. اول ماشاف خالد اللي لمحه ولاذ خلف البيت خوفاً منه .. نادى فهد بصوته العالي وبزفرة غضب ممزوجه بقهر الفقد اللي نكأته زيارة قبر رفيق الروح : خااااااااالد ... خااااااااااااااالد .. وبلا مجيب ولا استجابه من خالد .. لحقه بخطوات سريعه ولف ورى البيت ومالقى له ا ثر .. رجع ودخل البيت اول ماشاف منال قال : منال ماشفتي خالد ..؟ ردت منال : لا ماشفته كان مع ابوي وبندر .. رجع لقسم الرجال ثم لبقية الغرف والنتيجه ماله وجود . عض على شفته وهو يهدد ويتوعد بغضب هادر بداخله والصمت يغلفه .. جات حنان تمشي وجوال منال ( هدية نايف عليها ) في يدها قالت : خذي ازعجني ساعه وهو يدق ووصلك اكثر من ثلاث رسايل . اخذت منال الجوال بحرج وهي ترسل لحنان نظرات لوم ليه تجيبه وفهد واقف .. بحركة سريعه خطف فهد الجوال من يدها وهو يقول : من اللي يدق عليتس ..؟ حست انها تدوخ وراح يغمى عليها من الخجل والخوف قال وهو يبتسم ويمد جوالها عليها : استغفر الله كل هذا مطنشته .. روحي ردي عليه وعايديه . صدت منال عنه ونزلت نظرها للأرض وهي غايصة في خجلها قالت : ماني مكلمة احد . ضحكت حنان على شكل اختها قالت : عزالله بيموت ماردت عليه بس دق عليه وقول له لايتعب نفسه . طالع فيها فهد ورفع حاجبه قال : هي عاقلة ورزين ليش انتي ماتعلمين منها . تنحنحت حنان وهي ترد ضحكتها بصعوبة قالت : بصير عاقله بس خلنا بكرة نروح معك .. رد عليها بسرعه :وش تدورين معي ..؟ : بشوف سارونه اشتقت لها .. رد عليها بجديه : لا مافيه روحة واركدي وخلي عنتس المراويح . شاف امه تطل من باب المطبخ وترجع بسرعه وراح لها .. سلم وردت عليه السلام وهو يجوب المكان بعيونه قال : ماشفتي خالد ..؟ ردت امه بحدة يتخللها رجاء : انت علامك على اخوك ماتشوفه الا وتهاوشه ..! زم شفايفه قال : يعني هو جاتس واشتكى مني ..! معناتها مسوي شي وخايف ... قاطعته امه : لاماسوى شي واتركه مالك شغل فيه . هز راسه وتمتم بـ : يصير خير . وطلع من المكان وهو محتار أي الطرق تنفع مع اخوه وتفيد ..! *** في بيت ابو عماد دخل عماد قبلها لقسم الرجال وللمجلس تحديداً .. توجهت شادن بأمر من عماد لقسم الحريم وهي تتأمل المكان .. بيت مسلح ( نظام فيللا صغيره لكنه مبني بطريقة البيوت الشعبية ) الوانه جديده وأثاثه باين انه جديد .. دخلت للمجلس واستقبلتها بنت سمرا وملامحها دقيقه وناعمه وجسمها متناسق .. عمرها في حدود 18 وهي ترحب وتهلي .. سملت شادن عليها قالت : اكيد انتي مها ..؟ ردت البنت بابتسامه : ايه انا مها اخيراً شفت حرمة اخوي .. تفضلي تفضلي الله يحييتس . دخلت شادن للمجلس وجلست بعبايتها ولفت طرحتها عليها زين بانتظار ابو عماد اذا جا يسلم .. رغم انه يُعتبر عمها الا انها تحس برهبة من مقابلته والسلام عليه ..! صبت لها مها فنجال قهوة قالت : امي لو درت انكم بتجون ماراحت .. سألت شادن وهي تمتد الفنجال : وين راحت ..؟ : راحت تعايد خوالي . : وانتي ليه مارحتي معاها ..؟ : وشلون اروح وابوي في البيت والضيوف والناس داخلين طالعين .. سكتت شادن واستطردت مها : عاد لو تدري امي ان عماد جا وهي موب هنا بتنقهر .. سألت شادن ببرود : ليه ..؟ : عماد الله يخليه لنا فارض غلاه على الجميع ... وامي تغليه وتعزه . بلعت ريقها بغصه وحست بألم في عمق قلبها واكتفت بابتسامه باهته .. مرت دقايق قصيرة صامته وقطعتها شادن وهي تجول بنظراتها في زوايا المجلس وتحاول تخلق سالفة تنشغل بها قالت : ماشاء الله بيتكم جديد . ضحكت مها وامتدت فنجال شادن صبت لها ثاني قالت : لاوالله يمكن له سنه ونص بس قبل رمضان جدده عماد الله يخليه لنا .. ماعلمتس ...؟ ابتسمت شادن قالت بغصة : تعرفين عماد مايحب يقول سويت واعطيت . : صادقه والله .. ترى هو اللي بنى بيتنا وعطى ابوي الفلوس يبيه يبني عماره بس ابوي الله يعافيه تصرف في الفلوس ومابقى الا اللي يسوي مسلح ... التهت بطرحتها وهي تفتحها وتلفها من جديد .. .. كل مكان تروح له تشوف له اثر طيب .. وكل من يعرفه يثني عليه ويمدحه .. اولهم هي وامها واخوها .. من يلومها لو تجلس معه طول عمرها وتضحي بكل شي لاجله ولاجل قربه .. رفعت راسها للأعلى .. تحس انها مخنوقه .. تبي هوا .. اوكسجين نقي يفتح لها شعبها الهوائية اللي ضاقت بذكرى فراقه .. ودها تختلي بنفسها .. ودها تبكي فراقه وبعده .. ودها تبكيه من قلب .. تبكي ضعفه وقهره وقسوته على نفسه قبل مايقسو عليها بابعادها عنه . سمعت صوته يقترب وهو ينادي : يامها .. ياام فيصل .. وقفت مها وطلعت ورجعت معاه وهو يسألها بجديه : وشلون فيصل في دراسته ..؟ قالت مها باهتمام : ماعليه انا معه اول بأول وتراني اهدده اني اعلمك عليه ان اهمل وماجاب الدرجات كامله . : ها قرأتي الكتب اللي جبتها لتس ..؟ : ايه قرأتها كلها وابيك تجيب لي كتاب لاتحزن لعايض القرني . : ان شاء الله المرة الجاية اجيبه .... سكت عن الكلام وعيونه عليها وجهها شاحب والدمع مختنق بعيونها .. جلس بجنبها قال لمها الواقفه : مها جيبي كاسة مويه . راحت مها تنفذ امره ومسك يد شادن بسرعه قال : متضايقه من الجلسه هنا ..؟ تبينا نمشي ..؟ بلعت ريقها ورفعت نظرها وهي تتحاشاه قالت : لا عادي .. لسه ماسلمت على ابوك . زم شفايفه قال : بيجي الحين ... اهمل يدها وهو يسمع خطوات مها اللي دخلت وفي يدها صينيه فيها كاسة مويه .. مدها على شادن وقال لها بصوت منخفض : اشربي مويه .. شربت جرعه صغيره من الكاسة ونزلتها وهي تسمع صوت ابو عماد ينادي ويتنحنح كعادة كل من يقرب من مجلس الحريم اذا فيه مناسبه ولاعندهم ضيوف .. دخل ابو عماد .. طوله يشبه طول عماد لكنه اعرض بكثير .. ملامحه مختلفه كلية عن ملامح وشكل عماد وله لحية سكسوكه مكتسحها الشيب بقوة .. رحب في شادن وهو يردد : ياهلا .. يالله ان تحييها .. مابغينا نشوفتس .. والرجال هذا لايعرف وصل ولا ذكر . ردت بحرج وبكلمات مختصرة ومعدوده وهي تناظر الارض .. فتح عماد شماغه ونسفه من جديد قال : الله يخليك لي بس .. الحين انا مااعرف لاوصل ولا ذكر .. ترى مايردني عنك الا الظروف . رد ابوه بسخريه : ايه ايه مايردك عني الا الظروف .. وراها ماتردك عن جدتك وخوالك ولا هم اقرب لي مني واولى بوصلك . سكت عماد وماحب يجادل ولا يراد ابوه ويطيل الحكي .. قالت مها بمحاولة منها تضييع السالفة : عماد لاتروحون تغدوا عندنا اليوم . رد عماد : مستعجلين يامها الايام جاية وبنجي ان شاء الله .. سلمي لي على امتس واخوانتس . قال ابو عماد اللي كان منشغل باسئلته لشادن عن احوالها واخبارها .. : انت وين تبي ..؟ ماتجيني الا في السنه حسنه وان جيت حتى الفنجال ماتشربه ..! يدري ان ابوه مايلح على زيارته وجلسته الا اذا يبي منه شي .. قال مجامل : لو اليوم مو عيد يمدينا جلسنا .. بس من امس مانمنا ومن الصبح على عظمين وورانا مشوار لجده . حست بالأرض تزلزل تحتها .. وسرت رجفة بداخلها وهي ترفع له نظرها وترجع تنزله للأرض بأسى .. مشوار جده هو اللي كسرها وخنقها وذبحها ..! سمعت ابوه يقول بحده : ها تبي تسوي لي اللي قلت لك عليه ولا اروح اتسلف واخدم عمري بعمري ..؟ هز عماد راسه وهو يقول : كلي لك ياابوي .. انت تامر امر .. عطني بس اسبوع بالكثير ومايصير الا اللي يرضيك بس لاتنسى اللي قلت لك عليه تراني ابي الرد اليوم .. هز ابوه راسه وهو يقول : خلني اشاور مها وامها ثم ارد عليك . التفت عماد لمها وهي تناظر بالارض وكأنها فهمت الغازهم .. قال عماد : مها مهب معارضة(ن) اختياري لها ... ماحب يحرجها اكثر وكمل كلامه موجهه لشادن : يالله ياشادن مشينا . اخذت شادن نقابها ولبسته وثبتت عبايتها على راسها بعد ماغطت عيونها .. تكلم ابو عماد وهو يمشي معهم يوصلهم للباب : دريت يوم بنت عمك انخطبت ..؟ رد عماد بعدم اهتمام : أي بنت عم ..؟ : عذبة اللي انت حيرتها ثم خليتها .. رزقها ربي برجالٍ سنع . تنفس عماد بارتياح قال : الله يبشرك بالخير .. منهو اللي خطبها ..؟ : اخذها عبدالرحمن بن صالح ال.. حس عماد باطمئنان وراحه بعد احساسه بالذنب تجاهها رغم انه مااذنب الا في نظر الناس والمجتمع ..! قال وهو يطلع من البيت : الله يوفقها ويرزقها .. يالله مع السلامه . : مع السلامه ولاتبطي عليّ تراني مستعجل ان ماعاونتني ولا شفت غيرك . هز عماد راسه وركب سيارته محتسب ومفوض امره لربه وكل خير يقدمه لابوه يرجو فيه رضى ربه من رضاه ..! *** مسكت جوالها بين يدينها بتوتر .. ترد عليه وتكلمه مثل مايبي .. ولا ترد برسالة ..؟؟ ولا تطنشه وتخليه يمل ..! قالت حنان اللي تشاركها الغرفه ومتغطيه بلحافها تنتظر النوم يغزو جفونها : منال ياقلبي اذا موب رادة عليه وشو له تفتحين الجوال وتستقبلين رسايله وتخلينه يدق عليتس ..؟ التفتت عليها منال بضيقه وقلق قالت : انا مافتحت الجوال الا بعد ماالحت عليّ عمتي فوزية وانتي تدرين . تعدلت حنان على ظهرها وسحبت اللحاف لوجهها قالت : ياختي احمدي ربتس ان فيه احد معطيتس وجه واهتمام .. لو ان اللي خاطبتس من الديرة يمديه مادرى عنتس الا ليلة العرس . عقدت منال حواجبها قالت : طيب وش الحل ..؟ هذا قاعد يهدد الحين .. رفعت حنان اللحاف بسرعه وجلست قالت : احلفي .. يهدد وش يقول .. تكفين منال عطيني اقرا رسايله . ردت منال بنفس الضيق : يقول اذا مارديتي جيت للديرة وشفتك غصب عنك . حطت حنان يدها على قلبها قالت : يارب ارزقنا .. ردي ردي عليه وعيشي حياتس دام انتي ماتخالفين ربتس .. وفهد بنفسه قال ردي عليه وعايديه . عضت منال على شفتها السفلى بضيق قالت : برد عليه برساله وافك راسي . فتحت الرسايل وكتبت ( من الفايزين .. وانت بخير ) وارسلتها على رقم نايف . مرت ثواني ووصلتها منه رساله ( اذا مافتحتي الخط وكلمتيني شغلت سيارتي وجيتكم عاد ان صار لي شي وانا سهران ومواصل انتي السبب وان جيتكم بالسلامه لاتلوميني على اللي راح اسويه ) شهقت ورمت الجوال وحطت يدينها على وجهها . قالت حنان بملل : هذا والله الشغله .. ان ماخليت شادن تفكنا منتس انتي وياه وتخليكم تعرسون مع فهد .. الا صحيح منال عرس فهد متى ..؟ ردت منال وهي تشوف الجوال يدق : خلي فهد يملك اول ثم اسألي متى عرسه ... يوووه ياربي ساعدني .. فتحت الخط وهي تثني ركبها وتنزل راسها عليه بحرج وحطت الجوال على اذنها ويدها الثانيه على راسها .. وصلها صوت نايف : الوو .. اخيراً فتحتي الخط .. الووو منال . ردت بهمس : هلا . : يابعد عمري ياهالصوت .. اش اخبارك ..؟ : الحمد لله . : طيب مافيه كيفك انت ، اش اخبارك ، وحشتني ، اشتقت لك ..؟ سكتت منال وسط هاله من الاحراج حست ان الصوت يضيع وحرارتها ترتفع ودمها يفور .. تنهد نايف قال بصبر وطولة بال : الوو منال .. ترى انتي زوجتي .. حلالي مافيها شي لوكلمتيني .. وانا بنفسي كلمت فهد قلت ابغى اكلمها قال على كيفكم يعني لاتخافين من احد .. همست : عارفة بسس .. دفنت وجهها اكثر بين ركبها وتمنت لو مافتحت الخط .. رفعت راسها فجأة وطالعت في حنان اللي غلبها النوم وغفت عينها وهي تسمعه يقول : ترى والله لو ماتتكلمين وتسمعيني صوتك لااخلي زواجنا اول يوم في الاجازة . قالت بحرج غيّر صوتها واستبدله بصوت مخنوق : ها ..؟ لا خلاص بتكلم ... بس وش اقول ..؟ ضحك نايف بصوت واضح رغم ان اثر ا لسهر واضح عليه : ههههههههههههههههههه قولي أي شي .. قولي كيفك ..؟ قولي احبك .. اشتقت لك .. قولي أي شي ان شاء الله نايف حاف بدون شي بس اهم شي ابي اسمع صوتك . ابتسمت وعضت على شفتها محرجه .. واسكتها الخجل وهو يقول بحنان وصوت رخيم : منال تراني مواصل من امس وابي انام على صوتك . ضمت بيدها على لفة شعرها الكبيرة بتوتر وخجل ممزوج بسعاده .. يدغدغ مشاعرها ويتملك من قلبها وإحساسها .. قالت هامسة : خلاص سمعت صوتي روح نام . : آآآه يازين هالصوت وراعيته .. طيب منال الحين انا بنام بس ابي اصحى على صوتك اذا الحين ماتبغين تتكلمين . بسرعه تحركت من مكانها ووقفت قالت : لا خلاص ولو سمحت لاتحرجني وتدق عليّ .. انا رديت عليك عشان ماتزعل بس . تأفف نايف بملل قال بزعل : اوكي .. ماراح نزعجك ياست منال .. يالله مع السلامه . زعل ..! ماابيه يزعل .. بس ماابيه يتمادى يكلمني واكلمه اذا هو شايف مكالمتي عادية انا اشوفها شي جديد وغريب على عاداتنا وتقاليدنا .. عقدت حواجبها وزعله آخر شي تتمناه .. ماانتظر منها رد وقفل بسرعه وطالعت منال في الشاشه اللي طفى نورها بعد ثواني .. نزلت جوالها بقهر والهم يعتليها ويسكن قلبها ..! غمضت عيونها وتمددت واندست في لحافها ونايف متملك من تفكيرها وشعورها .. يغزوها بصوته ووجوده في حياتها وكل خوفها انه يزعل ولا ياخذ على خاطره منها .. *** عمره ماكان ضعيف بهالشكل .. وشلون يكف دموعها الصامته ويواسي حزنها وظلمها وهو السبب .. قادته مشاعره قبل رجله لباب غرفتها .. فتحه بهدوء ودخل عليها .. نايمه وحواجبها معقودة دلالة ضيقها وعدم ارتياحها .. اقترب من سريرها دون ارادة او تفكير ..! تأمل وجهها وهي نايمه على جنبها واللحاف مغطي نصها باهمال .... بجامتها المكونه من قطعتين .. بدي وهو الظاهر له ومبين صدرها واكتافها واسفل بطنها .. والقطعه الثانية تحت اللحاف يجهل شكلها .. روبها بجنبها على الكومودينو حاطته احتياط وحرص منها اذا جاها احد .. ويمكن احتياط له هو ..!!! تأملها بحريه وكأنها فرصه ولايمكن تحين الا هالمرة .. يهيم بكل تقاسيم خلقها وملامحها .. مكانها على السرير دايماً واحد .. وكأنها تقول هذا مكانه ولابد يجي يوم ويتخذه وينام فيه .. جلس بجنبها بثوبه ونزل شماغه وعقاله اللي لازموه من الصباح لين بعد المغرب ورماهم على طرف السرير بإهمال .. مد يده بتردد لوجهها وشد قبضة يده بألم وردَّها بعزيمه ..! مايبي يزعج نومتها .. ومايبي يكدر عليها اكثر .. تقيده من معصمه ومن كاحله وتعلقه من شرايين قلبه .. التفت عليها وهي تتحرك وكأنها حست بوجود احد .. وقرب منها وطبع قبلة خفيفه بجنب شفتها وتراجع بسرعه ..نزل ثوبه ورماه على الارض باهمال ورفع اللحاف الكبير وفاحت ريحة عطرها اللي تدوخه وحس انه يذوب في عالمها .. واندس في اللحاف وحاول انه مايقرب منها اكثر حتى مايقلقها ان حست بوجوده اكثر من كذا خاصة ان التعب باين عليها من كثر السهر والشغل ..! غمض عيونه عليها تشاركها همومه وآلامه وآماله ..! وأخيراً تمكن النوم منه وغفت عينه في عالمها من عطر وذِكر وصورة ..! *** مسك جواله بيده وهو يقرا الرسايل اللي وصلته مهنئة .. من احمد موظف عندهم بالشركه وعلاقته فيه صارت قوية .. ( كل عام وانتم بخير وعيدكم مبارك ) سامي السكرتير الخاص بمكتبه ( كل عام وانتم بخير ) فايز مدير الشركه ومكتب عماد ( من العايدين وعساكم من عواده ) امير .. ايمن .. زملاء الدراسه فيصل وعبدالله ومحمد .... مشاري ( كل عام وانت بخير ياابو ناصر ترانا بكرة في انتظاركم ) ضم على جواله وهو يتذكر الساعات القادمه .. ماباقي الا القليل وتصير زوجته ..! رجع فتش في الرسايل القديمه وطاحت عينه على اسم مشاري مرة ثانية وفتح الرسالة الموجعه واللي قلبته وغيّرت من تفكيره وهجدت تخبطاته ( فهد اختي مو حمل صدمات جديدة وهي مكسورة لاتكمل عليها ولا ناوي تدخلها شهار بحركتك وتهورك .. اصحى يافهد ترى سارة مالها ذنب في اللي يصير ) (شهار .. مستشفى كبير ومعروف للأمراض النفسية بمدينة الطايف .. ) ضم على الجوال بيده وهو يلوم نفسه مثل كل يوم من اول ماوصلته رسالة مشاري .. متهور ..! ومتسرع ومااحكم عقله في قراراتي ..! بغيت اضيعها وانا اللي اغليها واحبها .. ابتسم وهو يتخيلها ويتذكرها بجلستها وابتسامتها ودموعها وبكاها كل الصور بكل حالاتها في ذاكرته تأسره وتعجبه تسللت لأنفه ريحة دخان وارتعب من مكانه ورمى بطانيته وفز يدور اثرها وصاحبها ..! فتح شباك غرفته وماشاف احد ولا سمع صوت في الحوش .. طلع من غرفته بسرعه ببنطلونه الابيض وفنيلته القطنية البيضا .. شاف منال جالسه في الصاله وحنان منسدحه وتتفرج على فلم تعرضه روتانا سينما .. جلست حنان اول ماسمعت باب غرفته انفتح وعدلت منال جلستها قال : خالد وين .. ماشفتوه . طالعوا البنات في بعض قالت منال : ماادري يمكن نايم .. فهد تراك ماصليت المغرب والعشا ابوي حاول فيك تصحى وماقدر .. التفت لحنان قال : حنان خالد وين هذي موب معلمتني . طالعت حنان في منال قالت : بصراحه يافهد جا عندنا وعاث فينا وضربني وطلع . رمتها منال بنظرة غاضبه وهي تقول : فهد اتركه اذا رجع تفاهم معه لاتضربه لأنه عنيد وكل ماضربته يرجع علينا وينكد على امي ويزيد في عناده . زم فهد شفايفه محتار وش يسوي معه قال : بندر وين ..؟ ردت منال : مشى بعد المغرب لمكة . رجع بسرعه وتوضأ وصلى فروضه الفايت وقتها ولبس ثوبه وطلع ومنال وراه وتطلبه : فهد اسألك بالله لاتقول لخالد شي .. فهد تراني سألتك بالله .. فهد اسمعني خالد مراهق يحتاج اللي يكلمه باحترام مو يضربه ... قاطعها وهو يقفل زراير ثوبه ويقول : ارجعي وصكي الباب لحد يشوفتس . رجعت منال بقلب خايف وقلقان قالت لحنان لايمه : ها ارتحتي الحين يوم علمتيه ونافقتي على خالد ..؟ رجعت حنان وانسدحت واخذت الريموت رفعت صوت التلفزيون وردت ببرود : يستاهل خويلد خلي فهد يربيه .. اجل عاجبتس يوم كل مادخل كفخني وقطع شعري وطلع على كيفه وامي ماغير تداري عليه وتقول خلوه ليا كبر عَقَل . مر من الوقت دقايق ومنال تلوم بخوف وقلق وحنان تبرر بملل وبرود .. وانتهى الحوار بدخول فهد وخالد وراه .. ساد صمت لثواني وتكلمت منال اللي ارتاحت ان خالد رجع بدون اضرار جسديه : فهد تراني مرجعة لك عشا تبيني اجيبه لك . التفت على خالد وزم شفايفه قال : ادخل غسل وتعال اكل معي . راقبه خالد بنظرات شك خايفه قال بتوتر : لا .. ماابي عشا .. انا متعشي وابي ادخل انام . تنفس فهد بعمق بمحاوله منه انه يهدي اعصابه ويضبط تصرفاته : اسمع الكلام .. غسل يدينك وغير ملابسك ثم تعال ابيك بسالفه . رد خالد بجرأة مبطنه بخوف وقلق : وش سالفته .. قول لي اللي عندك الحين قبل ادخل انام . جلس فهد قريب من حنان قال : قومي رتبي ملابسي اللي غسلتيها حطيها في شنطتي وجهزي لخالد شنطه ملابس . دارت فيه الارض .. سجن .. ؟ مستشفى ..؟ دار رعاية ..؟ انتفض جسمه على هالأفكار المخيفه والتفت لفهد قال بحده : وين بتوديني ..؟ رد فهد بهدوء ظاهري وبداخله براكين غضب : انت ناسي ان بكرة ملكتي .. وان اخواني لازم يروحون معي .. بعدين ابيك تقضي اجازتك عندنا في جده واذا بدت الدراسه ترجع معي . حاول خالد يعترض وسكته فهد وهو لازال ماسك اعصابه : خالد اسمع الكلام ولاترادني ولا تعصاني لاتخليني اعصب عليك ثم مااخلي فيك عظمٍ(ن) صاحي . جات منال تمشي بحذر ومسكت يد خالد وهي تقول : خلود تعال بكلمك .. رد عليها خالد بنعرة : وش تبين ..؟ فكي يدي وانقلعي . همست له بهدوء : خالد عمري تعال امي لاتقوم على صوتك .. تكفى خالد طلبتك مانبي مشاكل ومانبي فهد يمد يده عليك .. اسمع منه هو مهما كان اخوك الكبير .. كانت تتكلم بسرعه خوفاً من المشاكل .. وخوفاً على خالد وخوفاً على اعصاب امها ومن غضب ابوها ان عرف ان خالد ماتاب عن الدخان . سحب يده منها بقوة وهو يقول : بسمع كلامه عشان امي بس مهوب عشانه . : طيب قصر صوتك لايسمعك . رجع خالد اكمام ثوبه اللي اعتاد انه يلفها بطريقه مرتبه وزفر وقال بصوت اقصر : واذا سمعني وش بيسوي يعني .. ترى ماني ساكت له هالمرة لو مد يده عليّ .. مشى من عندها ودخل غرفته وقلبه قلقان وماآمن لفهد خاصة ان فهد شافه والزقارة في يده وللحين ماناقشه ولاهاوشه ولافتح الموضوع معه . *** في غرفتها .. وبعد صلاة الفجر .. صحت على صوت مزعج ..! رنين حاد ويؤذي السمع خاصة للنايم .. فتحت عيونها بكسل وعرفت انه صوت منبه الجوال .. وطالعت في الشباك شافت خيط نور ماوضح يغزو المكان من تحت الستارة.. عرفت ان الوقت بعد الفجر وانها طولت بنومها .. غمضت بقوة وهي تتذكر متى نامت وكيف نامت .. امس رجعت ودخلت للبيت قبله وتركته مع احمد وجدته .. بدلت وصلت الظهر ونامت ولاحست الا الحين .. تذكرت ان اليوم آخر يوم تنامه في هالبيت قبل فراقها لعماد اللي ممكن يكون ابدي وممكن يكون مؤقت .. حاولت ترفع اللحاف وحسته ثقيل وفتحت نور الأبجورة بسرعه وخوف .. وكان المشهد مفاجيء وماتوقعته .. ابعدت للخلف وهي تحس قلبها تحرك من يسار قفصها الصدري ليمينه بعنف وألم .. اش اللي جابه ..؟ لايكون مريض ولا حس بشي .. مدت يدها عليه ورجعتها بنص المسافه خوفاً انه يحس بشفقتها وقلقها عليه ويزيده همٍ على همومه ..! اختارت انها تلبي امر ربها بالصلاة قبل ماتلبي قلبها ومشاعرها واحاسيسها .. لبست روبها وقامت للحمام .. توضأت وصلت الفروض اللي فاتتها وهي تستغفر ربها وتطلب عفوه ورضاه وانه يهونه عليها حزنها وفراق المكان واهله ..! كملت صلاتها والتفتت عليه وشرشف صلاتها الأبيض الطويل يلف راسها وجسدها .. كان لاف ذراعينه تحت راسه ويطالعها .. سحبت شرشفها بهدوء وقالت بحرج : كنت بصحيك عشان تصلي . رد عليها بصوت نايم وهو يبتسم : تعالي صحيني . ماردت عليه والتهت بتطبيق شرشفها قال : شادن تعالي . رجعت وطبقت سجادتها .. قلبها يقول اقربي وعقلها يقول ابعدي .. ليه يعذبها بصده وقربه .. ليه يعذب نفسه قبل ويعاقبها بالاقتراب منها وهو صعب .. ليه يبعثرها ولايقدر على لمّها .. ليه يكسرها يوم عن يوم وهي من يوم جاته مكسورة .. سمعته يقول بصوت هادي : تراني موب عجزان اقوم واشيلك واجيبك غصب بس المشكله اني كسلان . التفتت عليه قالت بحده : عماد تعوذ من الشيطان وقوم صل ترى عليك ثلاثه فروض . اخذ جواله وطالع في الساعه قال : لا ماراح عليّ الا صلاة العشا والفجر .. مانمت الا بعد المغرب .. بس وربي انها نومه عن نوم سنين . تجاهلت كلامه الأخير عامده وهي تفتح الدولاب وتطلع لها ملابسها وترميها على طرف السرير قالت : طيب قوم لاتستهين في الفرضين ترى وقتهم راح وكل دقيقه تمر تحسب عليك . رفع اللحاف عنه بألم ذاتي وهو يشوف انفعالها من خلال حدة صوتها وحركتها وهي تطلع الملابس .. وقف ومر من عندها وابعدت عنه حتى يمر ولايقرب منها .. عدى من عندها بصمت وراح لغرفته ..! وهي سحبت شنطتها الكبيرة وبدت ترمي ملابسها فيها بدون ترتيب واهتمام .. فتحت الادراج بسرعه وطلعت اغراضها وحطتها في شنطه ثانية .. ماراح تخلي ولاغرض .. بتاخذ كل شي من هنا لأنها ماتأمن كلامه .. وماتبي تخلي لها آثار وبقايا ..! جمعت حاجياتها في وقت قياسي ولبست جلابيه عادية ولمت شعرها بشباصه واخذت جلالها لفته على راسها وجسمها ونزلت تحت ..! *** للآن ماجا خبر عنه .. خوفها عليه يزيد وقلبها احترق والقلق فاض وتحول لرعب لو الحياة تكون بدون حمود .. حطت يدها على بطنها وحست بألم في معدتها .. من اسبوع وهي تحسه وتحاول تداريه عن اللي حولها .. فزت من فراشها وراحت للحمام رجعت كل اللي في معدتها وانثنت على المغسله الصغيره الملصقه بالجدار بطريقة بدائية ولها مراية صغيره نصها مكسور .. نزلت دمعتها وهي تتخيل الخبر اللي بتسمعه عن حمود .. وقفت العنود وراها وهي ماسكة خروفها الغريب بلونه الأسود بدون أي خليط لأي لون آخر .. قالت : نوف علامتس .. انتي وجعانه ..؟ رفعت راسها وغسلت وجهها قالت : عنود روحي جيبي جوالي من عند فراشي . وفكيني من العله هذا اللي اقرفتني ريحته . : هذا سحيمان مروشته امس عشان يعيد وهو نظيف . رفعت نوف صوتها بعصبيه وقرف : عنوووووووووووووود روحي جيبي الجوال واقلعي العله هذا عني . راحت العنود تجيب الجوال وهم نوف مقلقها ومحيرها .. من امس تشوفها تبكي وتداري عنهم .. تشوفها تتوجع وكل ماسألتها قالت مالتس شغل ولا مافيني شي . رجعت بعد اقل من دقيقه بجوال نوف في يدها ويدها الثانيه تحوط رقبة الخروف وهي تقول : خذي لقيته يدق . كان الرقم غريب .. اكيد احد بيقول لها عنه خبر شين .. قبل ماتضغط زر الاتصال على الرقم اللي دق رن الجوال في يدها وحطته على اذنها فوراً ووصلها صوت حرمه فرحها واحبطها ..! : نعم من بغيتي .. ردت الحرمه بهدوء واحترام : انتي نوف لافي . : ايه انا .. من معي ..؟ : انا سميرة .. مدرسة اختك نورة .. ماادري نورة كلمتك عن الموضوع اللي قلته لها ولا لا ..؟ عقدت نوف حواجبها قالت باستغراب : أي موضوع ..؟ سكتت سميرة ثواني وتكلمت بعدها : مممممممم معناتها نورة ماكلمتك .. طيب اختي انا شفت نورة البنت الصالحة والخلوقه وبصراحه من سنه واكثر ومن اول ماعرفت اختك وانا اتمنى انها تكون من نصيب اخوي .. ياليت تعطيني موعد نجي نقابل اهلك فيه . زمت نوف شفايفها من الم معدتها وغمضت بعيونها قالت : طيب اختي يصير خير .. خليني اكلم اهلي ثم ادق عليك وابلغك . : اوكي .. مشكورة اختي وآسفه اذا اتصالي بهذا الوقت ازعجك . : لا اختي عادي .. مع السلامه . : مع السلامه . تحس بغثيان ورعشه ورغبة في البكا .. نزلت دمعتها ومسحتها بسرعه رغم ان العنود مسلطه عيونها عليها ومايفوتها كلمة او حركه من نوف . راحت نوف لنورة في المطبخ قالت : نورة ترى ابلا سميرة كلمتني . طاحت بيالة الشاهي من يد نورة على ارضية المطبخ المفروشه بمشمع بلاستيك وتحولت لشظايا ونوف تبتسم والألم باين عليها قالت : لااله الا الله كل هذا ارتباك .. اجل تدرين وش تبي يالظالمة ولاعلمتيني ..؟ طالعت نورة في العنود قالت : طلعي الراديو اللي بجنبتس ثم اعلمتس . تركت العنود خروفها من يدها وجلست على الارض بسرعه وهي تقول : والله ثم والله ثم والله مااعلم ا حد ... اشرت على حلقها وكملت : الله يقطع رقبتي ان علمت احد ... وعسى ابوي يوديني مسفر ان تكلمت . قالت نوف بتعب : طيب روحي شوفي خروفتس راح لحرجتي لاياكل دفاتركم . . حركت العنود يدها ببراءة قالت : اصلاً هو ماتعود ياكل القراطيس انا معودته يشرب الببسي وياكل البطاطس اللي اشتريهم من البقاله . ماقدرت نوف تجادلها بسبب تعبها والتفتت نورة للمجلى تغسل بقية الأواني قالت : ابلشتني كل ماتشوف وجهي قالت ابي اخطبتس لاخوي وانا معلمتها مية مرة قايلة لها ابوي مايزوج اللي من بعيد .. ردت نوف ويدها على معدتها : وش دراتس يمكن ابوي يوافق . : تخيلي وانا اجي لابوي اقول ترى فيه مدرسه بتخطبني منك .. : لا تعالي كلميني ولا كلمي امي موب شرط تقولين لابوي... سكتت نوف وطلعت بسرعه متوجهه للمغاسل وسط ذهول نورة وسرحان العنود .. قالت نورة : هذي وش فيها ..؟ وين راحت ..؟ علامها ..؟ قالت العنود بهدوء وابتسامه على وجهها للخبر الجديد : كل شوي تستفرغ يمكن وجعانه . رمت نورة الصحن من يدها في المجلى وغسلت يدينها عن الصابون بسرعه ولحقت نوف . والعنود وراها تدورعلى خروفها وتقول بفرح : ان اعرستي بيصير عندي حجرتين موب حجرةٍ وحدة .. انتقل نظرها لأنحاء البيت تدور على سحيمان اللي كان ياكل من كراستها حقت الرسم ..!!! وطيرت عيونها عليه لاهي اللي تقدر تلومه ولاهي اللي تقدر تنجد الكراسه .. سمعت نورة جاية تمشي وراها وهي تقول : ازين حقتس وماجاتس كله ليته اكل الكتب كلها وتقعدين السنه هذي بدون كتب وترسبين يوم ماتسمعين الكلام . طلعت العنود لسانها تقلد نورة وتردد كلامها ثم قالت بصوتها : ان شاء الله تعرسين بسرعه عشان افتك منتس ومن وجهتس . *** حضرت فطور لها ولعمها احمد اللي كان جالس عند التلفزيون وشكله صاحي من بدري .. اول مارتبت الصحون على السفرة شافت عماد ينزل من فوق .. قامت بخفه وهي تقول لعمها : عمي تعال افطر وانا بشوف جدتي صاحية ولا نايمه . رد عمها بملل : صاحيه وافطرت من بدري .. عدى عماد من عند احمد ولحق شادن اللي سبقته لغرفة ام ناصر .. منسدحه على سريرها والراديو بجنبها وتسمع برنامج ديني على اذاعة القرآن الكريم .. همست بالسلام وهي تسلم على جبين جدتها وردت الثانية وقالت : قمتي يابنيتي .. عساتس ارتحتي عقب امس . ابتسمت بحب لجدتها وألم بُعْدها ينغرز في حنايا ضلوعها قالت : ارتحت ياجدتي الحمد لله .. انتي نمتي زين ولا لا .. قاطعها عماد وهو يدخل الغرفه ويده تقفل زراير قميصه البني قال : يالله صبحها بالخير . جلست ام ناصر موسعه مكان لعماد على طرف سريرها الثاني وهي ترد : صبحه بالرضا والعافيه ... يالله لاتخليني منهم وارزقهم بالضنا الصالح اللي اقر به عيني قبل لا تطفي . كأنها شرخت قلبها بمشرط .. وكأن الدنيا في نظرها ضاقت الى ان اصبحت مثل ثقب الابرة ماعاد فيها تحتمل من امس وهي تقاوم وتكبت .. وبلحظة اذهلت ام ناصر واحرقت قلبها وآلمت عماد في الصميم .. انفجرت شادن باكية بحرقه وقهر ويدينها على وجهها صعب فراقك يالغاليه .. صعب تكسير احلامك وآمالك .. صعب انك عايشه طول الفترة اللي راحت بوهم .. ومخلينك تنتظرين الماء وهو اصلاً سراب ..! كانت تبكي بمرار وعماد يردد بوصت واطي : لاحول ولاقوة الا بالله .. هذي سواة ياشادن ... استهدي بالله وتعوذي من ابليس .. قالت ام ناصر بلهفة وخوف : علامتس يابنيتي .. شادن يابنيتي علامتس وش انتي سامعه .. شادن .. تهدج صوتها واهتز الجبل بداخلها وتخلخلت القوة وعلى وشك الانهيار .. رمت شادن نفسها في حضنها وضمتها والثانية تنهار بالتدريج ودموعها تنزل على خدودها اللي جعدها الدهر ..! قال عماد بلهجة حادة : شادن قومي جدتي ماتتحمل دموعك هذي اللي اربع عشرين ساعه شغاله .. قومي غسلي وجهك . شدت عليها ام ناصر وضمتها وهي تقول : علامتس يابنيتي تونسين شي ( تحسين بشي ) .. سامعة خبر(ن) شين .. علميني علامتس يابنيتي . التفتت لعماد وكملت : انت قايل لها شي ..؟ هزت شادن راسها ورفعته والتفتت تدور مناديل .. مد عليها عماد مناديل من جيبه ومسحت دموعها فيها وريحة عوده توغل في الجرح اللي بقلبها وتزيدها الم وقهر .. قال : الحين جدتي وسوست بسبب هالبكا اللي ماله داعي . غمضت عيونها بقوة على حرارة دمعها قالت : مافيه شي .. بس عشاني بروح لاهلي اليوم ومااقدر اخليك هنا لوحدك . التفتت ام ناصر لعماد قالت : انت بتوديها لاهلها . هز راسه بإيه قال بهدوء : بتروح لاهلها تعايدهم وتحضر ملكة خويتها وعرس ولد جارهم .. مااقتنعت ام ناصر ان سبب انفجار شادن ودموعها عشانها بتروح لاهلها وبس واكتفت بصمتها وداخلها الف سؤال وتساؤل ..! وقف عماد ومشى جهة شادن وهو يسحبها بيدها ويدها الثانيه غطت بها عيونها قال : قومي اطلعي افطري والبسي خلينا نمشي الحين . سحبت يدها منه وهي ترجع لجدتها وتجلس عندها قالت : افطر انت وانا بجلس عند جدتي شويه . اصر عماد انها تمشي معاه خايف انها تزل بكلمه وتفضح امرهم وهو يدري ان جدته من النوع الفطين اللي يفهم الأشياء بالتلميح وناوي يمهد لها النقل ثم قرار السكن في جده لين اموره ترسي على اللي خطط لها .. قال : امشي معي .. انتي مااكلتي من امس .. بعدين ابيك تطلعين لي ملابس خلينا نمشي قبل الشمس تظهر وتحرقنا في الطريق . اضطرت انها تقوم آسفه ومقهورة وطلعت فوق على طول من دون أي كلام ولا نقاش وهو راح لخاله اللي ينادي يبيه يجي يفطر معه .. اخذ عماد يد جدته وساعدها على الوقوف وراديوها في يده الثانية قال : ترى شادن تنزل دمعتها بسرعه لاتقلقين عليها . هزت راسها بقهر وهي تقول : بنيتي واعرفها ليا صارت منقهرة .. مهب غريبة عليّ بس علمني علامها ..؟ التفتت عليه وكملت : احد مضايقها امس يوم راحت معك . .؟ : محد ضايقها ابوي رحب فيها ومها بغت تشيلها من فوق الارض من الفرحه فيها .. حاول يضيع السالفه قال : تراني خطبت مها لاحمد من ابوي .. طالعته جدته بفرح قالت : ووافق ..؟ رد عماد بتأكيد و ثقه : ايه وافق . عرفت انه معطيه مقابل ولا انه راح يعطيه قالت : وش عطيته علمني . جلسها عماد قريب من احمد وهو يقول : ماعطيته شي للحين .. طلب مني فلوس يقول انه بيسوي محلات في الديرة .. مخبز وسوبر ماركت صغير ومطعم . : انا عارفه انه مهب موافق الا يبي له بلعه . سكت عماد ماعقب على كلامها والتفت على احمد قال : وش قلت يااحمد بموضوع امس . رد احد وهو يصب له كاسة شاهي : الغه ولاتطريه لي مرة ثانية .. انا مسافر بعد اسبوعين .. ماني فاضي لالعرس ولا لمشاكل حريم . قال عماد : تبي تسافر وهي معك ان شاء الله . مارد احمد عليه والتهى بالاكل وهو مستبعد سالفة الزواج نهائياً .. قالت ام ناصر : قاله الله وانا امك .. بعد اسبوعين ان الله احيانا وطول في عمري ماتروح الا وحرمتك معك . رمى قطعة العيش من يده قال : ضربتين في الراس توجع ياام ناصر .. والمؤمن لايلدغ من جحرٍ مرتين . رد عماد وهو يسوي جلسته على السفرة : ماكل الحريم عقارب ولا كل زواج ضربة في الراس ... واختي انا اعرفها يكفي يااحمد انها ملتزمة وراعية بيت وهي صغيرة تقدر تربيها على كيفك . وقف احمد وتمطط وهويقول بعدم اهتمام : انسوا سالفة عرسي وخطبتي واختك دور لها رجال يناسبها غيري . : انا خطبت لك وانتهى الموضوع .. لاتسوي سواة ولد اخوك اللي بغى يفشلنا في الرجال اللي خطب منهم . مشى احمد وعطاهم ظهره وهو يقول بصوت وصلهم : والله محد قال لكم توهقوا واخطبوا لي من دون علمي . كمل عماد فطوره براحة واطمئنان وهو يقول لجدته : كلمتين مني ومنتس تطرح عناده لاتشيلين همه .. وترى مها مامثلها ستر وسنع وحشميه .. اسألي شادن وبنات خالي ناصر عنها تراها كانت معهن في مدرستهن ويعرفنها . تمتمت ام ناصر لربها برجا وطلب انه يسعد احمد ويعوضه خير ..! |
*** بعد ماقالت لابوها على سالفة المدرسه اللي كلمتها وهو شارد .. يزوج بنته لناس غرب ومن بعيد ولا يخليها متى ماجاها نصيبها يجها من اهل الديرة .. حك لافي لحيته وهو يهوجس ويحسب حساب كل خطوة لو اتبعها ..! جلست عنده ام نوف بصينية القهوة والتمر ومدت عليه فنجال وهي تقول : الله يرحم ابوك ياابو نوف لاتجوز بنتي للغريب .. رد عليها بحكمه : الحين العرب تجوز الغريب والقريب .. والديرة بناتها اكثر من شبابها وبنتس طافت العشرين ياحرمه . ردت بقلق : انت من عقلك انهم يبون بنتنا .. قلوا بنات المدن يوم ياخذون بنت الديرة . جلست نوف عندهم بوجه باهت وملامح ذبلانه قالت : يبه النصيب اذا جا محد يقدر على رده .. كملت بغصه ..: انا ماكنت ا تخيل اني باخذ حمود .. الله يجيبه سالم .. وهذاني من نصيبه وهو صار نصيبي . قال ابوها : ايه يابنيتي بس حمود ولدنا ونعرفه ومربيه انا بيدي بس الغريب من يعلمنا عنه ..؟ قالت نوف : يسأل عنه حمود . ان جا يسأل ..! ان جا بيسأل بس المشكله انه مايجي ولايعود لي ..! تذكرت اهتمامه بكل اللي يهمها .. اهلها ومشاكلها في المدرسه والأمور اللي يهتم لها ابوها من مزرعه لغنم للبيت اللي يجمع له فلوس ويحاول يبنيه مثل مابنوا اهل الديره وجددوا بيوتهم .. تخيلت ضحكته وكلامه وغزله وحبه لها ..! هداياه وعطاياه اللي من يوم اخذته ماكفها ولا استكثرها عليها .. واستدراجها لقلبه ومحاولته الوصول لقلبها بشتى الطرق والوسايل .. لهج قلبها بـ "يارب رده لي بالسلامه .. يارب لاتاخذه مني .." انتبهت لاحتدام النقاش بين امها وابوها قالت : يمه يبه .. انتظروا خلونا نشوف العرب ونسأل عنهم ان اعجبونا فهذي قسمة الله وان مااعجبونا مالهم نصيب عندنا وكلن يروح في سبيله . وصلهم صوت العنود وكأنها طايرة والارض ماتشيلها وهي تنادي : نوف نوف .. يانووووووووووف . ردت نوف بسرعه : تعالي انا هنا ..! وصلتهم وهي تلهث وفي يدها كيس فيه شكولاته وعصاير قالت : شوفي شوفي جابها لي حمود . يعني حي وموجود .. وصل ..! فزت نوف وطلعت من الغرفه وسط فرحة امها وابوها اللي رغم قلقهم عليه الا انهم اخفوا القلق عشان نوف ..! قالت للعنود : وين راح ..؟ ردت العنود وهي تفتح قارورة عصير السيزر وترشف منها بسرعه : راح لاهله بس علمته انتس وجعانه وتبكين عليه وكل شوي تدقين عليه . حطت نوف يدها على راسها قالت : الله ياخذ عدوتس .. مسرعتس تعلمينه بالاخبار . وقفت نورة وراها وهي تقول : وتلوميني يوم اقول انها وكالة رويترز اللي توزع الاخبار على محطات الاخبار . ضحكت نوف متجاهله آلام معدتها واحساسها بالضيق والغثيان ودخلت تستعد لمقابلة حمود اللي اكيد بيجي يدورها ..! قالت لنورة : نورة وش رايتس البس لبس العيد ولا شي ثاني . قالت نورة : ايه البسي لبس العيد حلو عليتس . دخلت نوف الغرفه ولهفة قلبها تقودها تنفذ اوامر الشوق والوله لحمود وتتزين وتنتظره ..! *** لبست عبايتها ونزلت وعماد معاه شنطتها الكبيرة واللي نزلها مع المصعد كونه يلوذ عن جلسة جدته وقريب من الباب .. مرت جدتها وسلمت عليها وهي بغطاها وتنتفض تحته بكا وهلع من الفراق ورعب لمجرد تخيلها انها ماترجع للبيت راعيته وزوجة صاحبه .. ياترى بشوفك مرة ثانية ولا لا .. وان شفتك بكون راعية البيت هذا ولا اجيك زايره وارجع .!!! وصتها جدتها تسلم لها على امها ونايف وتنتبه لنفسها .. وهي وصت جدتها على نفسها وصحتها وأدويتها .. وطلعت .. رمت بجسدها وحملها وهمومها على مقعد السيارة الأمامي ..! وعيونها تناظر الأمكنة حولها .. حبت الديرة وتراب الديرة لأن احبابها فيها .. لأنها ملتقاها هي وعماد .. لأنها زرعت وغرست فيها اجمل ذكريات وأجمل احلام .. هناك في المرزعه .. وعند باب المدرسة .. وقدام بوابة البيت .. وفي الحوش .. وداخل البيت في كل ركن من اركانه لها معه ذكرى .. في المطبخ وفي المكتب وفي المجلس .. وفوق .!!!! وشلون تروح وتخليها .. طلعوا من الديرة وهي تتأملها مودعه ..! يمكن ارجع مثل اول يوم جيت فيه وعرفتها ..! ويمكن ربي يرجعني احسن من اول .. ويمكن ماعاد لي رجعه ..! كان السكوت هو المتسيد والفارض وجوده وقوته .. مر من الوقت اكثر من النص وهو ساكت وشارد الذهن ومستحضر نظره يراقب المكان .. وهي تايهه وضايعه .. جارته لأنها حست فيه .. وانصاعت لقراره ونفذت رغبته بس عشان تهون همه وتخفف من حزنه .. مد يده على مشغل السي دي وضغط زر تشغيله .. فضل انه يبثها رسايل غراميه بصوت عبادي .. ابسألك .. هو أنا استاهلك ؟ استاهل الدمع اللي جرّح وجنتك ؟ استاهل اني اعشقك ؟ ابسألك عن حالنا .. انتي وانا ياللي احس انك انا حالنا ما هو غريب انـّا نكون متأكدين ان الفراق ما هو بعيد بالرغم من جرح السنين عشقنا دايم يزيد ماهو غريب .. اني لو مرة في همي نسيت وبكلمة جرحتك قبل ما تتألمين .. اللي ينزف هو دمي ابسألك ماهو غريب .. استاهلك ابسألك لو قلت لك ان الحنان اللي في قلبك ينبت من الصخر الزهر .. وان النهار اللي في خدودك يخلي النسمة عطر .. وان العذاب اللي في عيونك يعلـّم الناس الشعر .. ولو قلتلك اني احبك اكثر من هموم البشر وكثر الجفا وكثر السهر ... لو قلت لك وانك اقرب من عيوني للنظر كل الذي اقدر اقوله واللي ما اقدر اقوله استاهلك .. حبيبتي ؟! وباجاوبك .. للأسف ما به احد يستاهلك كان يدندن بصوت منخفض وواضح لشادن مع الأغنية والظاهر لها انه حافظها .. سكتت الأغنية وبدت اغنية ثانية .. تدرين وادري بنفترق تدرين قلبي بيحترق .. حنا اتفقنا في كل شي الا الزمن عيى الزمن لا نتفق ولاتزعلي لو نفترق قلبك خلي وقلبي انا اللي بيحترق ياوردة في كل الفصول يافرح عيّى لايطول قولي واقول ان كان عندك لي حلول يافرحة القلب الحزين الوقت يمر .. ومالك عذر كانك تبين ننسى العمر .. ننسى السنين وانذوب في حب وحنين تدرين وش سر الحكاية الوقت يمر .. ولكل شي لابد نهاية وحنا قربنا من النهاية ومالك عذر يابسمة الثغر الخجول ان كان عندك لي حلول وان كان ودك نتفق والا ترانا بنفترق ولاتزعلي لو نفترق قلبك خلي وقلبي انا اللي بيحترق ياحب .. يادنيا جديدة يا احلى ابيات القصيدة ان كان جرحي ما كفى انزف لك جروح ٍ جديدة وان كان شعري ماوفى انسى الحكي وانسى القصيدة يا احلى ايام العمر كثر الحكي وش بيفيد ومابقى عندي صبر والجرح في قلبي يزيد مالك عذر يابسمة الثغر الخجول ما اظن عندك لي حلول وما اظن ودك نتفق واحنا ترانا بنفترق ولاتزعلي لو نفترق قلبك خلي وقلبي انا اللي بيحترق انتهت الأغنية ورجع اعادها مرة ثانية .. وقف للإشارة والمكان على غير عادته هادي ومافيه زحمة .. الدنيا عيد والوقت اجازة وحزة صباح ..! التفت عليها وهي مسنده راسها على المرتبه .. قال : شادن . عدلت راسها والتفتت عليه قالت بصوت مبحوح وبارد : هلا . : اذا احد سألك عن جيتك قولي عماد بيسافر . ردت بسرعه : انت بتسافر ..؟ هدى السرعه عشان نقطة التفتيش اللي مر بجنبها قال : سفريات صغيرة للشغل .. بس أي احد يسألك وش جابك ولا ليش جالسه عند اهلك قولي عماد بيسافر وبيخلني عند اهلي .. اشر له الشرطي يمشي بمجرد ماشاف الحرمه في السيارة ورجع عماد لنفس سرعته قال : الحين انتي بتدخلين عند اهلك بحالك هذا ..؟ همست بصوت مجروح ويدل على انها مجروحه ومقهورة قالت : عادي . : لاموب عادي .. خلينا اول نروح نتغدى في شقتي واذا ارتحتي نروح العصر لاهلك ... قاطعته بتودد : لا عماد الله يخليك امي تنتظرنا من اول ماقلت لها .. وكمان مسوية لنا غدا . هز راسه مقتنع وملبي واكتفى بتنهيده طلعت عفوية بدون قصد .. مد يده ورفع صوت المسجل ورجع يدندن مع عبادي واصابعه تتحرك وتدق على الدركسيون بدقة وتناغم مع الأغنية والأغنية تعزف على وتر قلبه ومشاعره ..! *** صحتها امها بصعوبه الين فاقت وحست باللي حولها .. : طيب خلاص صاحية .. : سارة اش هالبرود .. اللي يشوفك يقول الناس موجايين بعد شوي ..! تمطط بكسل ورجعت شعرها القصير اللي قصت اطرافه وصبغته بألوان هاي لايت قبل يومين عشان زواج مشاري .. قالت : واذا جوا بعد شوي .. انا اش دخلني كل اللي عليّ ان راح اوقع مااعتقد هذي يبغى لها قومة وتجهيز . ردت امها بحده : ترى الرجال لوطلب حقه الشرعي في النظرة مانقدر نقول له شي . جلست بسرعه قالت : لا يمه اذا ابوي مو قد كلامه ا نا كمان مو قد كلامي . : لاحول ولاقوة الا بالله العلي العظيم .. جلست امها بجنبها وكملت بحنان : سارة يابنتي مو كل الناس زي بعض .. شوفي مشاري اخوك زي خالد ..؟ حطت اصابعها في اذانها قالت بعتب وزعل : يمه مليون مرة قلت لكم لاتجيبون لي هالسيرة .. هذاك الله يسامحه ويغفر له فكينا من ذكره خلوني اتشافى منه . مسحت امها على راسها قالت : عشان تتشافين منه لازم تشوفين اللي احسن منه وحل محله . هزت راسها بلا وحست انها مخنوقه قالت برجا : يمه الله يخليك لاتغصبوني . اخذت جوالها من فوق الكومودينو ودقت على شادن اللي ردت على طول : هلا سارة . قالت سارة وهي تتمطط وبكسل : اهلين فيك .. ها فينك ..؟ : جايين في الطريق . : قريب من جده ولا بعيد ..؟ سمعتها تقول لعماد احنا فين الحين ورد عليها .. قالت شادن : احنا الحين قريبين من مكه يعني باقي ساعه تقريباً ونوصل بس ماراح اجيك الا بعد المغرب . قالت سارة بردة فعل سريعه وتهور : لاااااااااااا شادن من السيارة عندي .. ولا اقول لك سلمي على امك ونايف وتعالي عندي لاتنزلين العباية الا عندي تكفين شدون مرة مشتاقة لك . ابتسمت شادن وردت عليها ببرود : خلاص اذا وصلت اكلمك . سكتت سارة ثواني ثم قالت بهدوء : بنت اش فيك ليه صوتك حزين كذا ..؟ ردت شادن : مافيني شي .. بس شوي اجيك ان شاء الله . : نتقابل ان شاء الله على خير .. : مع السلامه . : الله معاك . قفلت من شادن وانتبهت ان امها قد خرجت وقامت من سريرها وقلبها مقبوض من صوت شادن .. فيها شي ..! حزينه .. مو نفسها اللي تكلمني كل يوم .. !! وقفت سارة على المرايه وهي تطالع بشكلها .. شعرها بعد الصبغه والقص معطيها طله احلى .. ومشيتها رغم انها ثقيله الا انها اريح بكثير من لمن كان الجبس فيها . خللت شعرها بأصابعها ورجعت لمته بشباصة وراحت للحمام تتوضأ وتصلي الظهر ..! *** سلم على عمه وعمته .. وجلس ينتظرها ..! جات العنود وقارورة العصير في يدها والشكولاته ملطخة شفايفها وخدودها .. قالت ام نوف بلهجة حاده : عنود قومي اغسلي وجهتس . ردت بعد مارشفت رشفه صغيرة من قارورة العصير واللي مابقى فيها الا القليل وصارت تقتصد فيها .. قالت : يممه اصبري بكمل عصيري . ضحك حمود ومسح على راس العنود وهو يقول : خلوها على راحتها متى ماكملت عصيرها تقوم تغسل وجهها .. طلع جواله من جيبه قال : خذي وديه نوف خليها تشحنه . ردت العنود : نوف تشيل عفشها تبي تروح معك لبيتك .. ازين اخذها كل شوي تبكي ولا تستفرغ كله عشانك .. حمود حمود انت جبت لها هدية صح ..؟ رغم ان كلام العنود مزعج الا انه يريحه ويسعده يعني فقدته وتبكي عشانه .. وناوية ترجع معه قبل يقول لها .. عدل جلسته وهو يطالع في ساعته قال : اجل روحي ازهميها خلينا نمشي . راحت العنود لنوف والح ابو نوف وامها على حمود انه يجلس يتغدى لكن الحاح حمود في الرفض كان اقوى وحجته تعبان ومواصل وبيروح ينام ويرتاح في بيته والحقيقه شي ثاني .. وقف ونادى بصوت عالي : يالعنود استعجلي نوف . جات تمشي بتنورة لونها سكري كلوش ومطرزة بكحلي من الأسفل والتوب بلوزة قطنية بكم طويل سادة وعليها جاليه سكري ومطرز بكثافه بلون كحلي .. صافحها واستحى يسلم عليها في وجهها بحضرة امها وابوها والعنود اللي تراقب كل تصرفاتهم وكلامهم .. قال : يالله البسي عبايتس وامشي تراني تعبان ابي ارتاح . سألته بعتب : انت وين كنت ..؟ اقلقتنا عليك .. ؟ رد عليها وعيونه على العنود اللي احرجته بمراقبتها ونقل نظرها بينه وبين نوف قال : بغيت اجيكم قبل موعد تسليمي وتكلمت على الضابط يوم عيا يطلعني وجازاني .. حبسني 24 ساعه . قالت نوف بدون تفكير : حسبي الله عليه .. طيب ليش ماعلمتنا عشان مانقلق عليك والله اني قلت صار عليك شي . طلع جواله من جيبه قال : له ثلاثه ايام وهو طافي .. حتى الحجز مافيه احد اقدر اكلمكم من جواله .. العالم كلها معيده .. همس لها بصوت حاول يخفته عن العنود قال : عجلي بنمشي لبيتنا . نزلت نظرها للأرض بحيا وطالعت في العنود اللي قالت : حمود حمود انت مادريت يوم ابوي بغى يضحي بسحيمان و افتكيته ..... قاطعتها نوف بلهجة حاده : بنت روحي اغسلي وجهتس ولمي شعرتس . ضحك حمود وهو يمسك يد نوف ويقول : خليتس من العنود واعجلي علي انتظرتس في السيارة .. اشر لها بشفايفه وهو يصد عن العنود ويوجه لنوف : مشتاق لتس حييل . بلعت نوف ريقها وسحبت يدها منه وراحت تجمع اغراضها وهو راح ينتظرها في سيارته . *** بعد صلاة المغرب .. كان جالس في وسط المجلس وعيون كل اقارب ابومشاري متجهه ناحيته يراقبون حركته ويدققون في كلامه وردة فعله وترديده لكلام المأذون اللي حضر من بدري .. همس مشاري لابوه : قلت له على شروط سارة ..؟ قال ابو مشاري : بقول له الحين . تنحنح ابومشاري قال : فهد ياولدي .. انت تعرف الظروف اللي مرت بها بنتي .. طالعه فهد باهتمام قال بذكاء وفطنه : عندها شروط ..؟ : والله ياولدي البنت الحت عليّ الا اقول لكم شروطها .. قاطعه فهد : حقها ياابومشاري قول ولاتردد . تكلم ابو مشاري بينه وبين فهد وصوته وصل لعماد الشاهد الأول وفواز الشاهد الثاني .. : البنت رافضه النظره .. نزل راسه للأرض ثواني ورفعه قال بعدم رضا : وتقول انها ماتبي مكالمات قبل الزواج . عقد فهد حواجبه قال : من قال اصلاً اني ابي نظرة ولا ابي اكلمها هذا مهوب من سلومنا ولاعاداتنا .. وسع صدرك ياابو مشاري وعطنا باقي شروطها . زم ابومشاري شفايفه قال بحرج : شرطها ان الزواج يكون مختصر .. تعرف زميلاتها اللي ماتوا في الحادث ... قاطعه فهد للمرة الثانية وقلبه يقول " ان هذا رايه وقراره قبل لايكون رايها وشرطها " : ولو انه مهب من حقها تطلب ان الزواج يكون مختصر لكن ابشر ياابو مشاري لها اللي تبيه .. قطب ناصر حواجبه بعدم رضا .. وطالعهم فواز بقهر وقلة حيلة بعد موافقة فهد .. فهد اكبر عيال ناصر من حقه يسوي له عرس يعزم عليه كل من يحب ويود .. من حقه تفرح به امه وخواته واهله .. اما عماد فعدل جلسته وهو الأدرى ان الشرط هذا يرضي فهد لأنه مقرره من قبل عشان سعود وذكرى سعود اللي نبشتها امس زيارته لقبره .. قال بصوت رزين وواثق وكأنه معتاد على ادارة الأمور حتى اللي ماتخصه : اسمح لي يافهد انا بتدخل هالمرة . ومن نظرة من فهد فهم عماد انه موافقه على كل اللي راح يقوله .. أكمل عماد وهو يربت على فخذ فهد : مادام مافي العرس تكلفه والبنت تبيه مختصر اجل نبي نقدم العرس بنخليه مع عرس عمه احمد بعد اسبوعين ان شاء الله .. ماله داعي التاخير . تهلل وجه ناصر لراي عماد وانشرح صدر فواز وبانت آثاره على ملامحه .. وفهد متردد وفي حيره .. سكت ابومشاري ثواني يحاول يحسبها صح .. ثم قال بتفهم : طالما انكم وافقتوا على شروطنا مالكم الا من يرضيكم .. بعد اسبوعين الزواج وعسى الله يتمم على خير . التفت ناصر لفهد الجامد بمكانه قال بفرحه : مبروك يافهد .. وعلى بركة الله .. تقدم مشاري بقهر وكتم غيظه وابتسم له قال : مبروك يافهد عسى الله يتمم على خير . باركوا له الجميع وتمنوا له السعادة والتوفيق وهو يرد : الله يبارك فيكم ويجزاكم خير ..! ... وفي مكان ثاني من البيت .. جالسه مع شادن اللي تحاول على قد ماتقدر انها تظهر بصورة طبيعيه قدام ساره .. والثانيه منشغله بسالفة موعد زواجها اللي حاولت تعارضه وسكتوها ابوها ومشاري بحكم انها قالت شروطها وقبلوها الناس وعليها تقبل شروطهم . كل شي غريب .. موافقتها وشروطها وهالموعد اللي ماكان على بالها .. وطقوس الملكه الغريبه مااعتادتها في مجتمعها وقرايبها .. ليلتها هذي مختلفة كليةً عن ملكتها على خالد .. هذي هادية وفيها خوف من القادم وترقب وحيطة وحذر بكل خطوة وكلمة من قبلها هي .. والاولى صاخبه وفيها فرح وتفاؤل وحب واحساس بالسعاده ايضاً من قبلها هي .. فركت سارة يدينها قالت بقلق : مستحيل اوافق ان الزواج يكون بعد اسبوعين .. اش هذا انا موقادرة استوعب ان هالآدمي بيصير زوجي .. اقل شي يبغى لي سته شهور عشان اقدر استوعب . .. مو بعد اسبوعين اصير انا وياه في بيت واحد .. ردت شادن وهي تحرك السكر في قاع بيالة الشاهي : اش اللي تستوعبين وماتستوعبين .. احمدي ربك انه يسر لك وكتب لك فهد . ردت سارة بخوف : ياربي حتى شكله ماادري كيف ولاحتى اتخيله . طالعتها شادن وابتسمت قالت : هذي سهله انا اوصفه لك .. طويل وعنده عضلات وملامحه مااتذكرها زين بس كأني لمحت وجهه عريض وعيونه واسعه وشعره طويل . صبت سارة في بيالتها شاهي ونست تحط السكر وهي مرتبكه وموحاسة بتصرفاتها قالت : ليه انتي ماقد شفتيه ..؟ : وين اشوفه ..؟ مرة وحده لمحته وهو ينادي السواق وانا راجعه معاه من المدرسه .. وماطالعت فيه صديت عنه وهو اصلاً اعطاني ظهره وقعد يكلم السواق ... تأففت سارة وهي منشغله بموعد الزواج قالت : تخيلي مشاري موافق ومبسوط قال ايه اللي قاهره انه راح يقطع شهر عسله بسببي . رشفت من بيالتها وكشرت بوجهها قالت : يوووه مافيه سكر .. ضحكت شادن من اسلوب سارة وهي زعلانه قالت : من يصدق انك انتي ومشاري تتزوجون بنفس الشهر ... بس من جد ياسارة فهد مافيه منه وعماد يضمنه لك ... هزت ساره راسها قالت : ادري عنه وعن مواصفاته اللي ماتنتهي .. كملت بصوت يقلد ابوها : رجال وكريم وراعي نخوه وشهم وشجاع وكل صفات الدنيا فيه بنظر ابوي ومشاري .. رجعت تتكلم بصوتها الطبيعي : ياشيخه هم مايطلعون على حقيقتهم الا بعد مانقرب منهم ونعرفهم بس الله يستر. ردت شادن بحمية ودفاع : لاحبيبتي هذا ولد عمي وعماد يعرفه زين ونايف اخوي يعرفه وانا اعرف اهله وبيئته وفهد واضح لكل الناس والردي ياسارة الا مايطلع عنه كلام . هزت سارة راسها وهي تقول :ليه ماطلع الكلام عن خالد الا بعد ماملكنا .. انا اصلاً ماعاد عندي ثقه في احد .. تدرين ياشادن اني قاعده اهيء نفسي لأي صدمة قادمه . تمددت شادن على الكنبه اللي بجنب سرير سارة وهي تقول : هيئي نفسك لكل شي متوقع بس لاتظنين السيء في فهد ولاتخلين الشيطان يوسوس لك في زوجك ويدخل الشكوك لقلبك . قبل ماترد سارة دوى جوالها بنغمة تعلن وصول رساله .. التقطته على طول وفتحت الرساله وكانت وسائط .. قالت : اكيد هذي ريهام بتبارك لي ... يؤ غريبه وسائط من مشاري ..!!! امتقع وجهها احمر وهي تطالع في المقطع وتشوف ابوها والمأذون والرجال في المجلس .. فزت شادن على صوت المقطع وجلست بجنبها وهي تشوفهم .. وحده سرحت بالشخص اللي يهمها .. ملامحه المألوفه لها وحركته وثباته ونظراته المتزنه وكأنه لوحده يملا المكان بنظرها .. والثانية سرت في جسدها رعشة وهي تطالع في الجالسين وموعارفة أيهم اللي صار الليلة زوجها .. قالت شادن ببرود تملك منها حد النخاع : شوفي هذا فهد اللي بجنب المأذون .. ماشاء الله عليه رجوله ووسامه وموناقصه شي . سرحت سارة فيه تتأمل شكله .. ملامحه مختلفه تماماً عن اي صورة توقعتها له .. مايشبه مشاري اخوها .. ولايشبه خالد اللي عمرها مااعجبتها ملامحه رغم حبها اللي كان له ..!!! عيونه واسعه ونظرته حرة وجريئة .. اكتافه عريضة وشامخ في جلسته رغم حركته المستمرة .. قالت سارة بارتباك : ماتخيلته كذا ..!! ابتسمت شادن ببرود وبصوت باهت قالت : الله يستر عليه .. تكفين ياسارة حاولي تحبينه وتتمسكين فيه وتسعدينه تراه من بعد وفاة صاحبه يقولون مر بحزن ماتشيله الجبال .. ساعديه على النسيان واسعديه .. سكتت ثواني وساره مستغربه الكلام عنه وكأن قلبها رق في لحظة ضعف امام الفقد والحزن اللي جربته .. كملت شادن وصورة عماد تعيد لها مرارة وضعها وحياتها الآن .. : سارة ماعليه انا برجع للبيت احسني تعبانه . عقدت سارة حواجبها قالت : لا تكفين لاتروحين الا بعد العشا .. بعدين يادبه استناك من سنه ولمن اشوفك تقعدين ساعه وتمشين . اخذت شادن عبايتها وهي تقول بتعب وملل : حرام عليك من قبل المغرب وانا عندك .. وان شاء الله الايام جاية بتطفشين مني .. وقفت سارة معاها قالت : لولا ان التعب واضح عليك كان ماخليتك تروحين وتراني متأكدة ان فيك شي وتدارين عني .. بس بخلي التحقيق وقت ثاني لمن ترتاحين . ماردت عليها شادن والتهت بجوالها تدور على رقم نايف .. قالت سارة : تبغين اكلم السواق يوصلك ...؟ دقت شادن على رقم نايف وحطت الجوال على اذنها وهي تقول : لا بخلي نايف يوصلني ... هلا نايف .. رد نايف بصوت واطي : هلا . : ماعليه توصلني البيت بروح ارتاح .. : ليه اش فيك ..؟ : تعبانه شويه .. : اوكي اطلعي لي برا انتظرك .. امي بتروح معاك ..؟ : لا امي بتجلس مع خالتي ام مشاري وتجي بعد العشا اكيد بس انا بس اللي برجع . اخذت شنطتها وطلعت بصحبة سارة اللي تمشي بعرج خفيف وتوجهت لامها تبلغها برجعتها للبيت ..! *** حياتها لاتطاق في بيت اهلها .. اخوها مو معطيها فرصه تدخل النت وتاخذ حريتها مثل ماكانت في بيتها .. واتصالاتها تحسبها بالدقايق بعد ماكانت تكلم بالساعات واحمد متكفل بالفاتورة وعذرها انها في غربه وتحن لاهلها ولازم تكلمهم .. احمد مطنشها وهي اللي اعتادت على وجوده في حياتها وان كان وجوده مثل عدمه الا انها حست بفراغ الآن من بعده ..! دقت عليه من رقمها الجديد اللي طلعه لها اخوها بعد ماالغى احمد رقمها الاول لأنه كان باسمه .. وما رد عليها ..! زفرت ليلى بقهر .. هذا وش فيه لايرد ولايكلم ولا كأني زوجته .. ان شاء الله يبينا نسافر وانا مانزلت السوق .. دقت عليه مرة ثانية وثالثه اخيراً صار يعطيها مشغول .. وقفت وراحت لاخوها اللي كان جالس في غرفته على الكمبيوتر دقت الباب ودخلت قالت بعصبيه : محمد شوف لي العله هذا ليه مايكلمني ولايرد عليّ . صغر اخوها المحادثة والتفت عليها بعصبيه قال : ارجعي ماني فاضي لتس الحين . عقدت حواجبها قالت : اقول لك ماكلمني من يوم جيتكم ولارد عليّ تقول ماني فاضي . نزل الهدفون من فوق راسه قال : برا .. برا لوسمحتي واذا بينتس وبين رجلتس شي تفاهموا بعيد عني ماني رايق لتس انتي ومشاكلتس ولسانتس اللي اذيتي به خلق ربي . رجعت بقهر وهي تهدد وتتوعد .. راحت لامها قالت : يمه كلميه انتي يمكن يرد عليتس خليه يرسل علي فلوس بنزل السوق . قالت امها بأسف على حال بنتها : هذا اللي همتس الفلوس والسوق ..؟ الرجال شكله زعلان منتس وانتي تقولين ابي فلوس وسوق بدال ماتقولين ابي رضاه . ماردت على امها وانشغلت بالبحث عن رقم فوزية في قائمة ارقامها .. هي اللي بتوصل لها وش سالفة احمد حتى وان كانت ماعاد تهضمها بس لابد تتحمل .. دقت رقمها ثلاث مرات وماردت فوزية .. المرة الرابعه انفتح الخط وبدون صوت .. تكلمت ليلى بقرف من طبع فوزية وتشددها في بعض التوافه مثل تجاهلها للأرقام الغريبه .. قالت : الو .. ردت فوزية لمن عرفت ان المتصل حرمة : هلا . : وش اخبارك يافوزية ..؟ : هلا هلا ليلى بخير الحمد لله ... اخبارك انتي ..؟ : اخباري ..؟ ماتقولين لي وش فيه اخوك مايكلم ولايرد ولا يعبرني ..؟ : والله ا سألي نفسك واعرفي وش سويتي معه واكيد بتدرين عن سبب زعله . : ها ..؟ وش سويت قولي لي .. ولا احد منافق بيني وبينه ..! غيرت ليلى لهجتها لرجاء وخوف : فوزية انتي قلتي له عن سالفة الجوال ..؟ : لاياقلبي ماقلت له .. اللي عرفه احمد بلاويك الثانيه غير الجوال ووسخه .. معليش ياليلى انا مشغوله الحين وعندي ضيوف . ردت ليلى بتشتت وبدون تركيز قالت : مع السلامه .. خايفه يكون عرف عن الصور اللي عندها ..! لا لا مستحيل يعرف ..! شهقت وهي تتذكر شادن يوم مدت عليها الصورة اللي طاحت منها .. صورة سعيد اللي دمجت صورتها معاها وطبعتها من جهازها .. عضت على شفتها وخبطت بالجوال في يد راحة يدها بقلق وهي تصر عيونها .. انا غبيه ليه ماقلت لها انه اخوي .. عقدت حواجبها وكملت لوم " المشكله سعيد كان لابس عماني وشلون بتصدق انه اخوي .. الله ياخذك يوم تخليت عني وضيعت حياتي مع احمد بسببك .. زفرت وقالت بصوت عالي : حبه العمى لويحبني صدق يمديه ماتزوج وسحب عليّ . وقفت على المرايه في غرفتها قالت محاكية صورتها : مالت عليّ انا ووجهي هذا اللي استفدته من النت لاحبيب بقى لي ولازوج صبر علي ولاعيال ونسوني واشغلوني بهالفراغ اللي يقتل .. تذكرت اول معرفتها بالنت وعالمه .. ايام كانت تشكي الطفش والملل في الغربه واحمد يغيب اكثر من نص النهار واذا رجع يرجع منهك وتعبان ومن كثر شكاويها من الطفش والملل اشترى لها لاب توب وعرفها على الانترنت والمنتديات .. تدكرت يوم دخلت شات وهي ماتفقه فيه الا كتابة اسمها .. واول من تلقفها سعيد اللي من عرف انها ساكنه في عمان وهو مهتم فيها وكأنها ملكة الشات الين تطورت علاقتهم لحب ووصلت للمسنجر ثم التلفون ثم المواعيد في كوفي شوب ومطاعم .. بس في النهاية طلع سعيد خاين بنظرها وأناني مافكر الا بنفسه .. رجعت لغرفة اخوها ودقت عليه الباب بعصبيه وكأنها تبحث عن مخرج من الواقع لعالم خيالي آخر عاشت فيها سنين طويله اكثر من واقعها وكان يبعث لها سعادة وهمية ومؤقته .. : محمد قوم ابي النت ..! : انا مشغول .. تعالي بعد ساعتين . : اقول لك ابيه الحين .. انت ماتفهم .. وقف اخوها بملل قال : اطلعي برا .. موب تهاوشين مع احمد وتعودين عليّ .. مسكها من يدها وطلعها وسكر الباب . ورجع لجهازه ..! *** رجع احمد من المزرعه والبندق ( البندقية ) على كتفه .. وفي يده طيور صغيره صادها لشهد وكهواية حب يمارسها ..! اول ماشافته شهد جات تجري عنده واخذت الطيور قالت : خالي صدق انت بتتزوج وحده ثانية غير ليلى العله .. وقف احمد وطالعها قال : انتي ماتحبين ليلى ..؟ : لاااااا وعععععععع منها اصلاً هي ماتستحي .. عقد حواجبه قال : وشلون ماتستحي ..؟ : جوالها هذاك اللي كسرتي امي في حاجات وسخه . عض على شفته قال : وش الحاجات علميني .. زمت شفايفها حتى ماتضحك وفتحت عيونها قالت : لأ عيييب .. امي قالت عيب . هز راسه قال : ودري الطيور للشغاله تنظفها وتشويها ..! شافته فوزية بوجه كئيب وحزين ومتضايق ونسبت ضيقه لامها اللي اصدرت قرار بانه معرس معرس والله لايعوق بشر ولاَّ زعلها اللي مايقدر عليه .. رفع البندق فوق مكتبة التلفزيون الكبيرة واللي تتوسط الصاله ورجع للمغسلة .. وقفت فوزية عنده وهو يغسل .. قالت بضحكه : ياعريس ترى عماد كلمني يقول انه بكرة جاي .. ويقول لك تروح تسوي الفحص لأن ابوه كلمه يقول بكرة بيودي البنت تسويه .. غسل احمد وجهه بقوة وهو يقول : ولد اختس هذا مهب صاحي .. يبي يمشي العالم على كيفه .. وامي ماصدقت خبر .. قالت فوزية وهي تضحك اكثر : حسبي الله على ابليس فهيدان الظالم يقول نبي نلحق ونجوز جدتي ولا تراها ماخلت احد من اهل الديرة ماجوزته . ماتغير من ملامحه شي وقال بصرامه : الحين انا شاكي لهم يوم يقولون نبيك ترتاح ... قاطعته فوزية : لاوالله ..؟ تضحك عليّ انت .. يعني حنا مانعرفك متى تصير مرتاح ومتى تصير متضايق .. كملت بلهجة تحذيريه وحاده : احمد اصحى لنفسك وحياتك ولاتخلي ليلى تضيعك اكثر .. على فكرة تراها دقت عليّ اليوم وماعطيتها وجه .. مسح احمد وجهه ويدينه بمناديل قال : وانتي ليش تردين عليها من الاساس . : ماعرفت رقمها الجديد .. بس تكفى يااحمد انا اعرف مها اخت عماد والبنات منال وحنان يعرفونها .. حتى حنان يوم درت طارت من الفرح قالت هذي هي اللي تناسب عمي . : كل الحريم صنفهن واحد .. ردت فوزية باندفاع : كل الحريم مثل بعض يااحمد ..؟ اجل مها المصليه الصوامه مثل ليلى اللي ماتركعها ..؟ التفت عليها بذهول اكثر منه استغراب قال : وش دراتس انها ماتصلي ..؟ ردت فوزية بندم وهي تقول : استغفر الله العظيم .. ياخي كل ماقلنا لها صلي قالت صليت ولا شوي اصلي ومن يوم جتنا لين راحت ماشفناها تصلي . رجع بذاكرته .. صحيح ماقد شافها تصلي .. اصلاً ماعرف لها سجاده ولاشرشف صلاة مثل سجادة امه وشرشف صلاتها ..! ولا قد سمعها تقول بروح اصلي مثل ماتقوله شادن عند كل فرض .. نفض راسه ورجع يطالع في فوزية بإمعان قال : وش بعد ..؟ ردت فوزية بسخريه ممزوجه بخيبة : وش بعد ..؟ ماخفي كان اعظم على قولة شادن .. بس الله يحب الستر . صك على اسنانه قال بحده وقلة صبر : فوزية وش بعد من بلاوي ليلى . تنهدت فوزية وهي تشوف اخوها يحترق بسوء فعايلها قالت : ماادري هذا اللي عرفته عنها بس شادن قالت لي ان هذي اهون من الباقي وعيّت وحلفت انها لتستر عليها ولاتعلم عنها . : وش سالفة الجوال اللي تقوله شهد .. عقد فوزية حواجبها قالت : تكفى احمد طلبتك فكني من الموضوع هذا بالذات تراني مريضه منه للحين .. هز راسه بعد مافهم السالفه و عدى من عندها .. راح لامه اللي تسمع لسورة البقرة بإصغاء وتحاول تردد بعض آياتها لعل وعسى انها تحفظ منها شيء وتتقن كلماتها ولو كان بمشقه .. اخذ جواله بدون كلام واعطاهم ظهره خارج من البيت وبراكين الغضب في جوفه ثايره .. *** ليلة زواج مشاري ..! رغم الفرح والزغاريد الا انها تحس هالة من الحزن والكآبة تحيط بها ومو قادرة على التجرد منها ..! وفي القاعه الكبيرة الفخمة بإضائتها الخافته وألوانها الغريبة ..! واقفه بفستانها النمري القصير وجزمتها الطويلة اللي تغطي سيقانها بأناقتها البسيطه ومكياجها الهادي واكسسواراتها الناعمه وشعرها المنسدل بحريه على اكتافها .. وبجنبها سارة بفستانها الأحمر الحرير .. واللي يطوقه من عند اكتافها وحلقها خيوط ذهبيه .. وشعرها مرفوع بحركة ناعمه وبعض الخصل نازلة بلونها الذهبي الممزوج بالثلجي .. طالعت شادن في سارة وهي مقطبه وباين انها تتألم لأنها نست نفسها وطولت الوقفه على رجلها قالت لها باهتمام : سارة روحي اجلسي مايصير توقفين على رجلك كذا ترى .. مشت سارة بتعب لحد ماوصلت طاولة عليها قهوة وشاهي وانواع مشكله من حلا القهوة ومعجنات منوعه .. وجلست عليها وهي مقطبه وجهها من التعب قالت لشادن اللي قابلت لها : ياااااربي خلاااص مافيني اوقف .. تعبت اليوم بما فيه الكفاية .. احسني يبغى لي شهر راحه . ابتسمت شادن وهزت راسها وهي تصب لها فنجال قهوة وتمده عليها قالت : اللي يسمعك يقول للحين مو مصدقه ان زواجها بعد اسبوعين ووراها شغل وكرف في السوق . تنفست سارة بضيق قالت : بالله تسكتين لاتذكريني . رشفت سارة من فنجال قهوتها على قطعة الشكولاته اللي اكلتها وطالعت في شادن اللي سرحت لعالم بعيد ونظرة الحزن واضحه في عيونها قالت سارة بصوت رقيق ودافي : شادن ..! ردت الثانية بـ : هلا .. : وش الوضع ..؟ ليه هالحزن والكآبة ..؟ من عماد ..؟ ماتدري منه ولا عليه ولا منها هي ومن تخليها عنه حتى وان طلب هو وفرض .. صدت شادن عنها وطالعت على يمينها وهي تقول : شوفي بنت عمك الغبية كيف لابسه ...؟ حست سارة ان شادن تفوت الموضوع وتغيره بعلانية .. قالت وهي تلتفت لمنى بنت عمها بفستانها القصير وقصة شعرها الغريبه اللي تشبه قصة الولد : هذي منى السخيفه ماتشوفين الكل يتحاشاها . ردت شادن بقلة اهتمام : الله يهديها . انتقلت نظراتهم بين الحضور .. وحده تتأمل والثانية تنشغل عن التفكير لين بدت الطقاقه تطق وصدح صوتها وآلات الدف في القاعه .. الاضاءة خافته على الحاضرين ومركزة بألوانها المختلفه على المساحه الواسعه المخصصه للرقص .. والطقاقه تغني بـ من يقول اني لغيرك .. انا لك ماني لغيرك .. انا متعلق مصيري ... ياحبيبي في مصيرك .. مسكت دموعها واعصابها وهم الفراق اللي تتخيل عماد يقرر انه يكون ابدي في أي لحظة يعصف بقلبها .. وشلون يفهم اني له مو لغيره وان مصيري متعلق في مصيره .. عدى الوقت وبدا تصوير العريس مع عروسه اللي رفضت انها تنزف قدام الحريم .. بعد زفة العرسان خارج القاعه وبعد العشا مابقى الا اهل العريس وام نايف وشادن كونهم اهل وجيران .. دق جوال شادن وشافت عماد المتصل ... خفق قلبها بقوة وردت بغصة : هلا عماد . : هلا بك ياشادن .. اطلعي انتي وعمتي انا انتظركم برا . : ليه نايف وين ..؟ : نايف راح مع الشباب اللي يزفون مشاري للفندق . : اوكي خلاص ثواني وطالعين . قفلت منه ولبست عبايتها بعد ماقالت لامها ان عماد ينتظرهم وطلعوا له .. طول الطريق يسولف مع عمته وهي ساكته .. كان صوته وكلامه وشكله يشرخ قلبها وينزفه .. التفت عليها وهي جالسه بجنبه بعد ماحلفت امها انها ماتركب قدام مد يده وشبك اصابعه في اصابعها وضغط عليها بدون كلام .. غمضت عيونها واخذت نفس عميق حسته وصل لقاع بطنها وحرارة يده تتسلل لباقي جسدها ..! وصلوا للبيت ونزلت ام نايف بسرعه وهي تشكره وتترجاه ينزل ينام عندهم بدال مشوار شقته البعيد .. رفض سالفة النوم لكنه قال في الأخير : اذا شادن بتزين لي براد شاهي نزلت تقهويت ومشيت . قالت بدون تردد : انزل تقهوى وبحضر لك شي تاكله اكيد ماتعشيت . همس لها : اجل بتعشى انا وياك . سكتت وهي تشوف امها تدخل البيت قبلهم .. وفتحت الباب وهي تقول : انزل الله يحييك . طفى محرك السيارة ودخل وراها وتوجه لقسم الرجال .. ثواني وكان باب المجلس مفتوح له وشادن و راه بعبايتها وطرحتها .. التقت عيونه بعيونها المكحله بكثافه ومنثور عليها شادو بلونين عسلي وبني واضاءة من تحت حواجبها معطيتها رونق وجاذبية .. عيونها دايماً هي نقطة ضعفهسواء كحلتها ولا تركتها بدون كحل ... صد عنها بمحاولة للهروب وراح بسرعه وفتح التكييف .. قالت قبل ماتطلع : ارتاح بجيب لك العشا والشاهي .. قال : تعالي لاتصدقين سالفة الشاهي والعشا .. انا دخلت ابي اجلس معك شوي .. حست بأطرافها تفتر وهي تتخيل انه ناوي يبت في موضوعهم وينهيه .. هزت راسها بلا .. قالت بصوت مخنوق : اذا بتقول شي عن المواضيع اللي مااحبها الله يخليك مو وقتها . ابتسم رغم ان كلامها سكاكين تخترق قلبه قال : انتي تعالي اجلسي ووريني فستانك اللي حضرتي به .. بعدين ليه ماذكرتيني انزلك اليوم للسوق ولا اجيب لك فستان على ذوقي .. ولاذوقي مايعجبك ..؟ عماد تكفى لاتذبحني .. انا موحمل اوجاع وجروح ..! لاتخليني اعيش حلم ثم تصدمني بواقع .. وقف وهو يشوفها عاقده حواجبها وتطالع فيه وكأنها شارده .. قال : انا ابي اعرف بس وشو له كل هالزعل .. سحب طرحتها من فوق راسها وسحب العبايه وهي تحاول تشدها وتبتسم .. اناقتها وجمالها وهدوءها وبساطتها كلها تسحره .. ليه دخل من الاساس وهو يدري انها راح تغريه .. مشتاق ..؟ ولا مشتهي بس يشوفها وهي راجعة بكامل زينتها ..! حطت يدينها على صدرها واكتافها العاريه وهي تقول بعتب : عماد هات العباية .. لف العباية على الطرحه ورماها في آخر المجلس قال : ياحظك ياعماد وكل هالزين لك .. اكتسى وجهها بحمرة خجل وقهر من تصرفه اللي خافت من انعكاسه عليهم .. مسك يدها وضم عليها وهو يقول : شادن انتي متشائمة .. ماعندك امل ..؟ رفعت راسها وامتلت عيونها دموع قالت : الا عندي امل واملي بالله كبير .. اصلاً احنا نقدر نعيش حياتنا عادي بعد التطعيمات .. اختنقت اكثر وهزت راسها دلالة الخوف والرفض ودموعها تنزل على خدودها : انا خايفه منك ياعماد ... خايفه تتهور وتجني عليّ . ماعنده تعابير .. ولا رد الا ضمها على صدره .. تمتم بكلام من بين تنهيداته : احد يقدر يجني على روحه ولا يضرها .. شادن انتي الروح اللي اعيش بها .. انا اعيش عشانك انتي ليش ماتفهمين . رفعها من فوق صدره ولثمها بجنون على وجهها متحاشي شفايفها حتى مايؤذيها بنقل الفايروس .. : انتي ماتدرين اني اشتاق لك وانتي معي .. قاله وانتبه لها تنتفض وتبكي .. رجع ضمها على صدره دقايق طويله صامته .. اخيراً قال : عارف اني مخطي ياشادن بس اشوا انا مو في بيتنا .. ضمها اكثر وكمل : تدرين يوم ناديتك في غرفتي تقرين علي ليه ..؟ ماردت عليه واستطرد : كله عشان اذكر نفسي اني مريض ومايجوز اقرب منك .. هنا بعد اذا قربت اذكر نفسي اني عند ناس ويمكن امك و لانايف يدخلون علينا .. همست : عماد انا حلالك .. وراضيه باللي ربي يكتبه و... قاطعها بانفعال وهو يبعدها عن صدره : لاتخليني اندم ياشادن اني قلت لك اللي في خاطري .. الله لايقول اني اقرب منك وهذي حالتي .. شد على ذقنها بسببابته وإبهامه قال : تحسبين صحتك مو غاليه عندي .. عقدت حواجبها بقهر على حاله قالت بعيون غرقانه بدموعها : عماد ابغى منك طلب . اشر على عيونه قال بصوت محب وحنون : لو تبينهم . ابتسمت من بين الدمع : تسلم لي هي وصاحبها .. الله يخليك عماد لاتجيب طاري المرض .. حتى انت انساه لاتفكر فيه . ابتسم بخيبه ورفع يدها وباسها وضرب عليها بخفه .. قال : الله كريم ياشادن .. اهمل يدها وتحسس جيوبه قال : انا لازم امشي .. وانتي انتبهي لنفسك ولااسمع ا نك زعلانه ولا تعبانه ثم ازعل منك ... على فكره . قالت بابتسامة رضى : شو ..؟ : احمد وافق على العرس .. بنسوي عرسه مع عرس فهد يعني شي مختصر وكل واحد ياخذ حرمته ويفكونا من قلقهم . : الله يوفقهم .. : اللهم آمين ويوفقني انا وحرمتي .. قولي آمين . ردت بخجل : آمين . : يالله تبين شي تامرين على شي ... ناقصك فلوس . : لا ماابغى الا سلامتك وتجينا باستمرار . هز راسه وهو ينزل عقاله ويعيد ترتيب شماغه من جديد .. طلع مع الباب والتفت عليها قال : شادن . : هلا . اشر على صدر ثوبه قال : الحين وشلون اوديه للمغسله .. بيفضحني الهندي ويقول نسونجي . عضت على شفتها وهي تشوف اثر كحلها وروجها على صدره قالت : بسيطه جيبه بكرة معاك انا اغسله . ضحك قال : صلي ركعتين قبل تنامين وادعي ان الله يطول في عمري واشوف عيالنا . هزت راسها بإن شاء الله والقلق يدب في قلبها ويشل الكلام ويسكته ..! وكأنه شال خوفها من فراقها له وحط مكانها خوفها عليه وعلى صحته ..! *** ثلاثه ايام مرت من بعد زواج مشاري..! بعد ماحول المهر (50 الف ) على حساب ابو مشاري واستأجر الشقه المفروشه كحل مؤقت الين يكمل تأثيث الشقه اللي اختارها بعنايه للاستقرار فيها .. لازال فكره مشغول ببقية التجهيزات ..! جلس مقابل لعماد وخالد اخوه .. وعماد يسولف مع خالد ويعامله كأنه رجال كبير .. قال خالد : انا ابي دكتوراه ومااتخيل نفسي الادكتور اسنان .. رد عليه عماد : ممتاااز جداً .. بس الدكتوراه تبي لها واحد يشد حيله من الآن مو يقول اذا وصلت ثالث اشد حيلي . عدل خالد جلسته قال : تصدق ياابومشعل اني لو اشد حيلي يمديني جبت الدرجات كامله في كل المواد واني ادخل الاختبار احيانا على شرح المدرس لنا في الحصة واجيب درجات زينه بس موب ممتاز . قال عماد باهتمام : ياخي وش يردك لاتذاكر طالما انت ذكي وتقدر تكون مستقبلك بدون مشقه . رد عليه خالد بأسف : ماعندي احد يشجعني .. ان جبت درجة زينه محد درى عني وان نزلت درجاتي تذكروني بالتهزيء والهواش .. التفت لفهد قال : حتى فهد كل ماقلت له اني ابي ادخل علمي قال : علمي مايصلح الا لمنال وحنان وانت ادخل ادبي ويخب عليك . طالع عماد في فهد بلوم .. وتمدد فهد على ظهره بكسل قال : العلمي يبي له رجال يشد حيله موب واحد مايفتح كتبه من يوم يجي من المدرسه لين يروح اليوم الثاني .. الادبي كلن ينجح فيه .. وقف عماد وهو يقول : لك عليّ ياخالد ان نجحت هالسنة بتفوق اني لاشتري لك سيارة . فز خالد من مكانه ولحق عماد قال : صدق والله ...؟ : اجل اكذب عليك .. المهم انا بروح مواعد لي رجال وانت ابيك الرجال اللي اعرفه موب مثل علي وممدوح وطقتهم راعين الدخان والسهر والله اعلم ببلاويهم الثانيه . تغير وجه خالد ونزل نظره للارض قال عماد : انا ماابي اقول لك الكلام هذا عشان احرجك .. اعلمك بالكلام اللي لازم تسمعه .. انت رجال وغير عنهم ابوك رجال صالح واهلك صالحين وانت انسان ذكي وصالح لازم تفكر باهلك ومستقبلك وتختار اصحابك اللي يساعدونك على النجاح موب الفشل ..! التفت خالد لفهد اللي حط جواله على اذنه ورد على مشاري قال لعماد بحماس : وعد مني اصير مثل ماتبون بس تشتري لي السيارة . : وانا وعد مني اشتري لك السيارة اللي تبيها متى ماشفت خالي وامك راضين عنك وشفتك متفوق .. دخل عماد لغرفته وفهد يتكلم بصوت عالي : انا ماشي الحين للبيت انت لاتشيل هم .. يالله مع السلامه ولاتحجز لين ادق عليك . طلع عماد من غرفته وهو يقول : هذا من اللي يكلمك ..؟ لبس فهد ثوبه قال : مشاري يقول ان ابوه تعب عليهم وكلموه اهله ماعندهم احد .. حتى نايف في مكه مودي اهله ياخذون عمره .. اخذ شماغه في يده وجواله ومحفظته ومفاتيحه وكمل وهو يروح للباب : خالد اجلس لاتحرك من الشقه لين ارجع لك . رد عماد : خالد بيروح معي بس انت خلك مع عمك وطمنا عليه . طلع فهد وركب سيارته وبسرعته القصوى ساقها متوجه لبيت ابو مشاري وهو يحاول يدق على رقم بيتهم اللي اخذه من مشاري ..! قراةٌ ممتعة ارجوها لكم ... مع حبي وخالص اعتذراي ان بدر مني تقصير |
الفصل العشرون ~~ كـــافـــي قـــســـوة ~~ العجز الحقيقي هو انك تشوف عزيز عليك وماتقدر تعينه وتساعده .. والعجز الحقيقي انك تحاول تداري همك عن مريض والا تخونك دمعتك لشوفته وهو ضعيف .. وحدتها تكسر .. وضعفها يهد .. جالسه بجنب ابوها بقلة حيلة .. تمسد يدينه وتمسح حبات العرق اللي ينضخ بها جبينه .. قالت لامها اللي تضغط ازرة جوالها بتوتر .. : ها يمه ردت ام عدنان ..؟ . زفرت ام مشاري بقلق وعيونها على رفيق الدرب وحبيب القلب قالت : لاوالله ماردت شكلها نايمه .. غمضت عيونها بمحاولة انها تخفف من توتر اعصابها الثايرة وكملت : حتى السواق يقول انه للحين في الطريق وقدامه زحمه .. تنهدت وانهت الكلام ب " ياربي تساعدنا ". عضت سارة على شفايفها بألم ودموعها متخذه طريقها على خدها .. من اول ماشافت حال ابوها وعرفت انه مريض ومايقدر على الاعتماد على نفسه او حتى ادراك ماحوله بسهوله .. وهي عاجزه عن وقف الدموع .. قالت وهي توقف وتمسح دموعها بقفا يدها : يمه تعالي عنده .. انا بطلع ادور على ليموزين في الشارع ماراح يوصلون حقين الشركه بسرعه . استوقفها جوالها اللي رن في جيب بنطلونها .. طلعته وفتحت الخط بسرعه وهي تشوف المتصل رقم مشاري من ماليزيا .. قالت بصوت باكي ومتحسر على منجدها وسندها وهو بعيد : مشااااري ماجا السواق ولا سيارة الشركه وابوعدنان مو في بيته .. تكفى كلم احد من اصحابك .. ترى ماعاد فيني صبر . تنفس مشاري بصعوبه وبعده عن ابوه في ظرف مثل هذا وقلة حيلته يزيدون من احساسه بالهزيمة والقهر .. قال : سارة هدي نفسك فهد جايكم في الطريق بيوديه للمستشفى بنفسه .. : خله يجيب معاه دكتور افضل .. قاطعها مشاري : لا لا بيجي يوديه لمستشفى الـ ... لأنه قريب بعدين اذا حالته تحتاج تنويم وعناية اكثر ينقله لمستشفى كبير ... سمعت صوت دقات الجرس ملحة ومتواصله قالت بسرعه واعصاب اهدى من قبل : شكله وصل .. خلاص مشاري انا راح اتصل عليك واطمنك .. مع السلامه . قفلت بسرعه وشافت امها تسبقها وهي لابسه عبايتها وتتوجه للدرج .. التفتت سارة على ابوها وعيونه مغمضة باهمال وتعب .. رجعت بجنبه ومسدت يدينه ومسحت جبينه بمنديل رطبته بمويه .. وهي تهمس وتناديه تشوف هو صاحي ولافقد وعيه .. اخترق صوت فهد هدوء البيت بـ : ياولد .. نبي طريق .. يااهل البيت . دخل ورى ام مشاري اللي استقبلته ودلته طريق غرفة ابومشاري وسبقته عليها .. لمح ساره وهي تنزوي خلف الباب المفتوح وغض الطرف وصد .. تنحنح وتوجه لسرير ابوها بدون أي كلام .. قالت ام مشاري وهي تدف الكرسي المتحرك حق سارة بعد الحادث وتقربه من فهد .. : خذ الكرسي يافهد ثقيل عليك ماتقدر تشيله .. سمّى بالرحمن وهو يتلثم بشماغه ويربطه في عقاله قال بهدوء : مهوب ثقيل ان شاء الله مير الله يعافيه . دخل يده من تحت كتفين ابو مشاري ورفعه بقوة وبعد ثواني كان ابو مشاري ملقى بكل ثقل جسمه على فهد ويده تطوق عنق فهد حتى تثبته ورجوله ماتمس الأرض .. طلع من الغرفه وام مشاري تسبقه للمصعد وتأشر له : تعال من هنا اسهل .. المصعد يافهد . توجه معاها للمصعد وقفلت ام مشاري اللي دخلت معاه وعيونها ماتفارق زوجها و شدة التعب باينه عليه .. انفتح المصعد وطلعوا منه مريض على كتف فهد .. وزوجة تراقب وتنتحب بصمت .. وسارة بجنب الدرج ببنطلون اسود وقميص ابيص ورجولها حافية .. وجهها باين عليه اثر البكا ومحتقن بحمرة الاحراج من المحرم الغريب في بيتهم .. خوفها على ابوها نزلها .. وخجلها منعها انها تقول له ابي اروح معه وماابي افارقه وابي اتطمن عليه .. وقف فهد ثواني قصيرة مرتبكة .. وكمل طريقه وحصر اهتمامه وتفكيره بالمريض اللي ثقل جسمه اثقل حركته وانهك قواه .. سمعها تقول لامها بعصبيه : لازم نروح معاهم مااقدر اخلي ابوي واجلس . ردت امها بصوت واطي : قصري صوتك حتى انا كمان مااقدر اجلس واخليه . قال فهد وهو يطلع مع البوابه ويتوجه لسيارته اللي دخلها لسور الفيللا .. وام مشاري وراه : ماله داعي تروحون .. انا اتصل عليكم شوي واطمنكم عليه وان احتاج تنويم وديتكم العصر له .. قالت ام مشاري والعبره تخنقها وهو يمدد ابومشاري في المقعد الخلفي لسيارته : نلحقكم مع السواق بس أي مستشفى بتوديه . رد عليها وهو يسكر الباب ويتوجه لباب سيارته متخذ احقية الأمر والنهي بمجرد ماانتسب لهالعايلة : لا لاتلحقوني لين ادق عليكم واشوف وش الوضع .. ماحبت ام مشاري تجادله في وضع مثل هذا ومع شخص لازال يعتبر غريب عنها واكتفت بهزة راسها راضخه مو مقتنعه .. اعادت ادراجها للفيللا بعد ماعلقت قلبها في سيارة فهد مع ابومشاري .. كانت واقفه على الباب وتبكي بهلع قالت امها : ارجعي مارضى يخلينا نروح . : ليش مارضى مو بكيفه .. اصلاً السواق بيوصل الحين ونلحقهم .. سحبتها امها للداخل وهي تقول : ادعي لابوك بدال البكى .. وصلي ركعتين اريح لك واحسن لابوك . استجابت لامر امها مضطرة ودخلت وقلبها ولسانها يلهجون لربها بأنه يرد لها ابوها معافى ولايحرمها منه . *** ساكته وحاسة بوحشة .. اعتادت على رسايله واتصالاته اللي تجاهلتها .. اكيد زعلان ..! وشلون اراضيه ..! طيب هو ليش مايقدِّر وضعي وظروفي وعاداتي وتقاليدي .. يعني عشان هو عنده عادي يبيه يصير عندي عادي .. تأملت جوالها الساكن الساكت من يوم العيد مادق الا مرتين وكان من فوزية وشادن .. عضت على شفتها وعقلها مشغول بنايف .. ورفعت نظرها لحنان اللي صرخت بصوت عالي وهي تقول : الله اكبر عليهم الحين ننتظر عرس فهد لنا سنين آخرتها يخلونه مختصر .. ردت عليها منال ببرود : وش تبينهم يسوون مايمديهم يسوون عرس كبير وهم مامعهم الا اسبوعين .. قالت حنان بعصبيه : الحين وش ذنب فهد يصير عرسه مختصر .. عمي احمد وقلنا رجال مستعجل ووراه سفر وهذا موب عرسه الاول .. لكن فهد .. قاطعها بندر اللي دخل عليهم وشماغه على كتفه وهو يقول : اصصص ابوي لايسمع كلامتس هذا ثم يذبحتس واتركي عنتس تلهفتس على العرس .. طالع في منال قال : منال وش سالفتس .. من كم يوم وانتي موب عاجبتني . دست منال جوالها تحت المخده بخفه قالت بابتسامه حاولت تخفي وراها شعورها واللي تحس فيه : مافيني شي بس شايلة هم الترم هذا .. وشلون اقدر اذاكر وانا افكر بعرس فهد والاخت مبلشتني تبينا ننزل السوق علشانه . لبس بندر شماغه وعقاله على مراية التسريحة قال : عادي بعد يومين انزلكم السوق واجلسوا عند ام نايف ومتى ماخلصتوا منه ارجعكم بدال المشاوير والروحة والجية .. واذا على ابوي مهب معارض . فزت حنان من مكانها ووقفت عنده قالت : تكفى يابندر نبي نجلس في جده لين يقولون بكرة العرس ثم نرجع .. اقل شي خل جلودنا تجلى من شمس الديرة وسمومها . قاطعتها منال : لا جده لا .. بعدين وش اللي تجلى جلودنا .. انتي لو تجلسين في قزازة لمدة سنه ماتغير لونتس بس انثبري وفكينا من مطامرتس على المراويح واصلاً انا ماابي الا اسواق الطايف .. اسواق جده ماتعجبني .. ابتسمت حنان بخبث قالت : بندر تذكر في عرس عماد وش سوت . ضحك بندر وقرب من منال وهو يقول : الحين جده ماتعجبتس .. نسيتي النجار والحجاز ولمسات يوم حفيت رجولنا فيها .. امتقع وجهها بحمرة حيا وبلعت ريقها قالت : يووووه هذي صارت قديمه .. انا تعلمني شادن تقول ماعادت حلوة مثل اول .. انا ابي اسواق البندر اللي في الطايف ولا البرحه ... قاطعتها حنان : يابنت الحلال .. لاتحرمينا من روحة جده اذا ماتبين بيت عمي خالد ناخذ لنا شقه ... ولا شقة فهد يقولون جاهزة . رد بندر بحزم : موب على كيفتس انتي وياها .. السوق اللي تبيه امي تروحون له .. ثم شقة فهد لااحد يجيب سيرتها .. الرجال مستاجر مفروش مافيها الا غرفتين .. اذا اثث شقته الجديدة تروحون له على كيفكم . سكت بندر عن الكلام وهو يسمع صوت ابوه يزهمه وطلع بسرعه .. قالت حنان : منالوه .. زعلانه منه ولا مشتاقة له .. اخذت منال المخدة وحذفتها بسرعه وهي تقول : انتي موب صاحية لتس ايام لكن علاجتس عندي ان ماعلمت فهد تشوفين . ضحكت حنان وهي تتلقف المخده وتقول : اووووه فهيدان موب في حالتس تلقين سارة مسوية(ن) فيه سواة نايف فيتس . ابتسمت منال وهي تقول : الله يرفع عنتس .. صدق ماينشره عليتس وماتستاهلين اني ارد عليتس . قومي طسي عني خليني اراجع ولاتزعجيني . عقدت حنان حواجبها قالت : ياربي على ثقل دمتس انا مشغوله بهم عرس اخوي وعمي وانتي تذاكرين .. ياخوفي لاتاخذين الكتاب معتس ليلة العرس . سكتت منال ووجهت نظرها لكتاب الكيمياء وعقلها بعيد عن المعادلات والرموز والمسائل .. *** في المستشفى وبعد مرور ساعة فحص وكشف وتحليل دم لابو مشاري واسعافات اوليه من إبر ومحاليل .. كان فهد واقف مع الدكتور ومصغي له باهتمام قال : يعني اكيد مو محتاج تنويم ولا نقل لمستشفى اكبر ... عدل الدكتورالمصري نظارته السميكه ورد عليه بثقة : لا لا مش محتاج أي تنويم الا ازا انتو عاوزين تتطمنوا اكتر .. زم فهد شفايفه قال : وش عنده بالضبط .. : هبوط في السكر وادينا لو جلوكوز ومغزي وبئى دالوأتي كويس تئدر تدخل عندو وتشوفه حضرتك بنفسك .. ضم فهد على جواله بجيبه وده يطمنها ويطمن امها .. تذكر وجهها الباكي وهي ملغية كل الحواجر ومتنازلة عن شرطها وواقفه قدامه همها ابوها ولاغيره .. ابتسم بحنان وقبل مايطلع جواله آثر انه يدخل يتطمن على ابومشاري قبل مايكلمهم .. دخل الغرفه وانتبه لابو مشاري وهو جالس ويطالع بساعته اول ماجات عيونه على فهد تهلل وجهه بالرضا قال بصوت باين عليه اثر التعب : هلا والله بالنسيب .. حيا الله زوج بنتي .. ابتسم فهد واقترب منه سلم على راسه وتحمد له بالسلامه قال : روعتنا وروعت مشاري واهلك بس ستر ربي له الحمد والشكر . قال ابو مشاري وعلى وجهه ابتسامه امتنان : الحمد لله الذي لاحمد على مكروهٍ سواه .. اول مرة تصير لي هالاعراض واصلا ماكنت ادري ان عندي سكر . جلس فهد على كرسي بجنبه ورد عليه : السكر عند اغلب الناس وماأثر عليهم .. اهم شي اتبع حمية وقلل من الدسم .. هذا ابوي الله يطول بعمره عنده السكر من سنين والحمد لله صحته زينه . : ماشاء الله تبارك الله الله يطول بعمره ويخليه لكم .. ماطمنت اهلي . طلع فهد جواله وضغط على رقم بيت ابو مشاري وهو يقول : وانا جايكم قعدت نص ساعه وانا ادق محد رفعه .. قطع كلامه وصوت ام مشاري يخترق سمعه بألو متلهفه وقلقانه .. قال فهد : السلام عليكم .. بذات اللهفة ردت عليه : عليكم السلام ... فهد ..؟ ابتسم فهد قال بهدوء بمحاولة منه تهدئة اعصابها الشبه ثايرة : ايييييه فههههد وابشرتس عمي مابه الا العافيه .. سكتت مو مصدقه .. او مو مستوعبه .. اوان الفرحة الجمتها .. تكلم فهد : اذا ودكم تكلمونه هذا هو بجنبي واذا ودكم تنتظرونه تراني برجعه بعد نص ساعه . همست بفرح وهمهمات باكية باينه على صوتها : صادق ولا تمزح معاي . : الا والله صادق .. هذا هو خذي كلميه . مد الجوال على ابو مشاري اللي ضحك وهو يسمعها ويقول : يابنت الحلال طلع عندي نوبة هبوط في السكر .. والحمد لله عطوني سكر رفع مستواه لي وهذاني بخير .. ومن بكرة بوديك للمستشفى تتعلمين وشلون تعطيني الابر ولا تبيني اجيب ممرضة .. ضحك ابو مشاري من رد زوجته اللي اختلط بكاها بضحكها ودعواتها من دون ماتعلق على كلامه ..! وقف فهد طلع من عنده حتى يدفع الفاتورة ويرجع ابو مشاري لبيته .. *** بعد ماعرفوا بتعب جارهم .. انهوا عمرتهم وتوجهوا لجده بأقصى سرعه .. ام مشاري جلست مع صديقتها وجارتها وشادن مع سارة المنهارة .. ونايف توجه للمستشفى بعد ماكلم فهد .. ابومشاري الأب الحقيقي لهم بعد وفاة ابوهم وقف معاهم وقفة الصديق الوفي لابوهم .. عطاهم ومنحهم وحاول جاهد انه يحميهم . قالت سارة بانفعال : ولد عمك هذا شايف نفسه الآمر الناهي .. حتى لمن قالت له امي بنجي مع السواق قال لا . فاكر نفسه مين بالله .. ابتسمت شادن قالت : بنت تراه زوجك مايجوز تقولين عنه كذا .. بعدين معاه حق اجل تبغينه يشيلكم ومعاه شخص مريض ومايدري اش بيصير له . سحبت سارة منديل و مسحت به دموعها وهي تقول : رفع ضغطي بس اشوا انه اتصل وطمنا على ابوي .. تصدقين شادن ماادري حاسة انه غريب عليّ صوته يفجع .. عدلت جلستها وكملت : تخيلي تخيلي .. شال ابوي لوحده .. والله اني مو مصدقه الين شفت رجول ابوي ماتلمس الارض . خبطتها شادن على كتفها بخفه قالت لها : قولي ماشاء الله تبارك الله .. زفرت شادن وتابعت : الحمد لله اني ماشفت عمي ابومشاري وهذا حاله ماادري اش كان صار لي . حست سارة ان همها انقسم نصين .. نص بقلبها ونص شالته شادن عنها .. قالت : الحمد لله انو طلع سكر ومو جلطه او قلب او مرض خطير .. وقفت شادن وعدلت عبايتها وهي تقول : الحمد لله على سلامته .. خلاااص انا تطمنت على عمي وبرجع للبيت من زمان مااعتمرت واحس رجولي متكسرة .. حتى امي ياقلبي عليها تعبت من الطواف والسعي ولمن عرفت عن عمي تهيج عليها القولون .. وقفت سارة معاها وهي تمسك طرف عبايتها وتقول : طيب خلي خالتي ترجع للبيت ترتاح وانتي اجلسي معاي .. اقل شي لين ابوي يرجع . ردت عليها شادن وهي تقفل ازرار عبايتها تحت فكها ومع الجنب وتقول : بنجيكم بإذن الله الليلة او بكرة .. الحين انا هلكانه . طلعت لامها الجالسه مع ام مشاري ووجهها متهلل بسلامة الغالي .. وقفت ام نايف اول ماشافت شادن قالت : يالله الحمد لله على سلامة ابوكم احنا بنمشي ونجيكم الليلة ولا بكرة .. قدرت ام مشاري تعبها ووصلتهم هي وسارة للباب وسوالفهم ماانقطعت الا لمن خرجوا .. *** راجع من المستشفى وابو مشاري على يمينه يتفحص الأدوية اللي فرضها عليه الطبيب وعبوات الإبر المخصصة لمرضى السكر .. مرض السكر للي في الخمسين او الستين يعني اشارة خطر .. ممكن يجلب الجلطات .. ممكن يؤدي لأمراض اخرى منها الهشاشة والضغط .. قال فهد بمحاولة منه تشتيت افكار ابومشاري المحصورة في صحته ومستقبله .. : ابومشاري .. تراني دقيت على ولدك الخبل كان ناوي يرجع وحلفت عليه مايرجع الا بموعده .. موب مصدقني انك بخير وماصدق الا يوم كلمه نايف وحلف له . ضحك ابومشاري قال : كلمني وتطمن بنفسه عليّ .. والله ماكنت ابغاهم يكلمونه بس سارة الله يهديها قالت له . رد فهد عليه بابتسامه قال : الله يخليك لهم اكيد انه من خوفهم عليك . مرت دقايق صمت قطعها فهد وهو يمد يده على ابومشاري ويربت على كتفه ويقول : انزل انزل لبيتك والحمد لله على سلامتك .. قبل مايتكلم ابو مشاري باغته فهد بسؤاله : تقدر تمشي ولا تعبان . رفع ابو مشاري يده ويده الثانية تفتح الباب وعيونه على سيارة نايف اللي وقفت بجنبهم قال : الله يجزاك خير وفيت وكفيت وماقصرت ... بس انزل تقهوى معاي انا ونايف . طفى فهد محرك سيارته وترجل منها وأكياس ادوية ابومشاري في يده .. قال لنايف بصوت عالي : ياابو خالد ورى ماتروح ترتاح وانت جاي من مكه وتعبان . رمقه نايف بنظره زعل قال : ارتاح اذا تطمنت على عمي ابومشاري . رد ابومشاري بامتنان : طمن قلبك ياولدي ..الله يريحك باللي يرضيك . ابتسم فهد لنايف وهو يتبع ابو مشاري ويصاف نايف في المشي قال بصوت حاول ان ابو مشاري مايسمعه : وراك قالب(ن) خشتك لايكون منال مطنشتك للحين . رد نايف عليه بعصبيه : لا ماطنشنتني ابشرك سهران معاها للفجر . رفع فهد حاجبه قال بجديه : من جدك ..؟ دخل نايف ورى ابو مشاري لقسم الرجال متجاهل فهد بعد تجاهله لمكالمته وحرقة اعصاب نايف على ابومشاري اللي بمثابة والده .. دخل ابو مشاري لاهله وجلسوا فهد ونايف في المجلس .. قال نايف وهو يمس ظهره : والله ياتعبنا تعب اعوذ بالله ... الحرم مليان حجاج ماتلقى مكان لقدمك . رد فهد عليه وهو ينزل شماغه وينفضه ويلبسه من جديد : ايه اعوذ بالله مكه ماتنقرب الايام هذي .. آآآه يالتعب .. تصدق اني على عظمين لي ثلاث ساعات . دخل عليهم ابومشاري وهو يقول بتعب : الله يعينك يافهد على هالبنت .. خوافه وماعندها صبر ومتهورة ماتقدر تمسك دموعها .. التفت فهد لنايف وكأنه مايبيه يسمع .. قال نايف : اوووه هذا وانت ماشفت شادن ياعمي .. من اول مادرت عنك وطول الطريق وهي تبكي . ضحك ابو مشاري قال : الله يستر عليها انشغل فهد بتحريك جواله بين يدينه اخيراً حطه على اذنه ووقف قال : عن اذنكم دقايق . دق على رقم عماد وقبل لايضغط زر الاتصال شاف عند البوابة ولد ماتجاوز عمره ال12 سنه .. لابس شورت احمر وتي شيرت ابيض بدون اكمام .. جسمه الأبيض الناعم ممتليء وشعره الحرير منسدل على اكتافه بقصته اللي زادت نعومته نعومه .. رجع فهد جواله في جيبه وراح للبوابه .. وقف قريب من عدنان ولد جيران ابومشاري .. نفسه اللي تحرش فيه خالد قبل .. واللي انضرب خالد من مشاري بسببه .. كانت واقفه تراقبه وهو يتوجه للبوابه بخطوات سريعه وواثقه وجريئة .. بعد ماتراجعت عن استقبال عدنان .. اليوم بس اقتنعت ان الله ابدلها خيراً من خالد بوقفته ورجولته ونخوته وقوته وملامحه وشخصيته ككل .. حدقت بعيونها في فهد باعجاب .. وابتسمت بفخر ان الرجل هذا لها .. وان ربي رزقها رجل بمعنى الكلمه .. هو بالنسبه لها حلم وتحقق .. لحظات قصيرة كان الفرح والأمل ينثرون اهازيج السعادة على طريقها اللي راح تشارك فهد فيه بعد ايام .. وبلحظة ..! وفي عز الحلم .. انكسر الفرح على شفاه الحنايا .. والأمل انبتر قبل اكتمال الحلم ورؤية النور .. أظلمت دنياها في لحظة تهيؤات صورها لها شيطانها .. عيونها تراقب فهد المنثني لعدنان ويكلمه بصوت ماوصلها وغيِّبه عنها تخيلها وتوقعها اكثر من بعد البوابه وصوت الهواء .. يده تمتد لشعر عدنان وتي شيرته .. طالعت فيه وهو يكلم عدنان ويبتسم له ويمسح على راسه .. نفسه السيناريو ينعاد على هيئة كابوس خانق ويعيشها بدوامة مظلمة عادت لها الذكرى المريرة .. وخالد .. خالد اللي وصم حياتها بأقسى انواع الألم .. خالد اللي بكاها وكسر بداخلها اشياء كثيرة وخوفها من شي اسمه ثقة ورجل .. خالد بقذارته ودناءته واهتكه لأعراض الأطفال وهزه لعرش الرحمن .. وتلاعبه بمشاعرها وهو ابعد مايكون عن المشاعر والقلوب المرهفة .. ارتجفت كلها .. من راسها لساسها .. وصكت فمها بأصابع ترتعش خوف وندم وقهر وخيبة امل .. يعني كلهم مثل بعض ..؟ مايجيها النظيف .. ونصيبها مع سيء وأسوأ .. شدت شعرها الاشقر المخصل ونزلت يدها لرقبتها شدتها بألم .. والحواجز تنبني وتتكسر .. وهي تتعثر وتتبعثر .. خرجت له باندفاع .. محطمه كل القيود .. ومتنازلة عن الفروض والشروط .. واللي ماقالته للي قبله لابد تقوله وتعلن عن صخبها وضيقها واعتراضها .. : اطلع برا ياعدنان .. روح لامك ولاتكلم الناس الغريبه .. فتح عدنان فمه بيوصل لها كلام امه لكنه ماتمكن .. بهت لونه وضاع الكلام من حالها وصراخها .. شدته بيده الممتلئة وهي قرفانه ومتقززة وطلعته برا وصكت الوابه بقوة وحالتها يرثى لها .. طالعها فهد بذهول ورعب .. وش فيها ..؟ مجنونه وتعب ابوها مأثر عليها ولا الولد فيه شي وماتبيه يدخل بيتهم .. حارت الأسئله براسه ووقفت على كلامها اللاذع وبكاها ونشيجها .. التفت لقسم الرجال وخوفه ان نايف يطلع ويشوفها .. قال بارتباك وعدم فهم : وش بلاتس انتي ..؟ مسحت دموعها وتكلمت من عمق الألم وخيبتها الكبيرة .. : كلكم قذرين وتشبهون بعض .. كلكم قذرين الله ياخذكم .. شدها فهد من يدها بعد ماعرف قصدها واستوعبه : وش اللي تقولينه .. صاحية ولامجنونه انتي ..؟ تكلمت من بين شفايفها المرتعشه : مجنونة لمن دورت رضا ابوي ووافقت على واحد مثلك .. حقير وتافه وقذر .. هو معروف انه متهور ..! متسرع ومايحكمه الا الموقف ولحظته في اغلب اموره .. بس اللحظه هذي كان اقوى وأشد ..! مسك ذراعها وغرز اصابعه فيها وهو يقول : موب انا الحقير والتافه والقذر .. وكلامتس هذا بتندمين عليه قد شعر راستس .. ومااكون فهد ان ماربيتتس وعلمتتس السنع .. نفض يدها وهي تمسح مكان مسكته بقرف وتقول بتهور وانهيار : لاتلمسني ياوسخ .. وانقلع من بيتنا وحياتنا .. طلع من البيت بسرعه وقفل وراه وهي دخلت البيت مكسورة ومغبونه .. وأمامها موعد مع لياليها القديمه .. فيها بكا وحزن ولوم وندم .. .. دق على جوال نايف قال له انه انشغل واضطر انه يطلع بسرعه ومااعطى نايف فرصه يسأله .. محمل بالهم لدرجة ان نَفَسِه عليه ثقيل .. قفل جواله ورماه على المقعد المجاور له ومسك اول مخرج يخرجه من الحي .. اصعب شيء على الانسان انه يُتهم ظلماً وبهتاناً بأمر هو يحاربه ويمقته ويكرهه .. ومن اللي يتهمه .. ؟؟ الشخص اللي بيربط حياته فيه بعد ايام قليله .. والمفروض انه يكون اكثر الناس واثق فيه ويبني حياته معاه على طهر ونقاء حتى تمشي الحياة بدون عراقيل وعوائق .. في لحظة تمنى انه ماشافها ولاعرفها ولاعرف طريق اهلها وباب بيتهم .. تمنى انه ماتمناها بيوم .. تمنى انه للحين على بر وماربط عمره فيها وهي متعقده وشكاكه .. مسك الخط السريع مايدري وين وجهته بالضبط ولايدري الا ان الغضب بداخله متأجج وان الفضا عليه ضيق .. والأفضل انه يبتعد عن بني البشر حتى مايفجر غضبه بوجه مسلم ماله ذنب .. *** نايمه بعد تعب العمرة .. مايكدر عليها الا صوت رنين الجوال على الكومدينه .. فتحت عيونها ببطء والتعب ماخذ منها مأخذ وشافت اسمه يزين الشاشه .. ابتسمت بحب وحطت الجوال على اذنها وهمست بصوت مبحوح من اثر النوم بـ : هلا والله . سكت ثواني وماوصلها رد .. طالعت في الشاشه ورفعت راسها وعدلته على المخده .. ونادته بنفس الصوت : عمااد . سبقت صوته تنهيده من عمق اضلاعه وهمس : لبى هالصوت وراعيته . عقدت حواجبها واتسعت ابتسامتها وهي تسمعه يكمل : انا ماذابحني الا صوتك في التلفون .. تدرين ..! شكلي ماعاد اني ماخذ خالد معي للديرة وابيك تسولفين عليّ طول الطريق .. فزت وجلست لمجرد طاري الديرة ومشواره قالت : عماد بتروح اليوم ..؟ : ايه ماشي الحين طولت على جدتي وبروح اودي مها للسوق لازم تنزل اكثر من مرة وابوي الله يعافيه يقول مرة وحده تكفي . تمططت قالت بدون تفكير : اش نزلة وحده .. انا لمن كنت اجهز نزلت عشر مرات وكل نزله احمل مية كيس . سكت ثواني وتداركت كلامها : ليه ماتجيبها لجده وانزل انا وياها .. ضحك بصوت واضح قال : والله ياانتي لازم تتقطعين وتوزعين نفسك بين مرة فهد ومرة احمد . ردت عليه بضحكه وهي تقول : اش اسوي فاضيه ماعندي شي خلني اساعدهم . رد عليها بهمس وهو يحاول ان خالد اللي فتح باب السيارة مايسمعه قال : تدرين وش ودي فيه ...؟ : ايش ..؟ : ودي امرك وآخذك معي بس الشكوى على الله ماكل اللي نبيه نقدر نسويه .. رجعت لواقعها بعد ماخطفها عماد بعاطفته وغزله ورومنسيته دقايق ماطولها قالت بهدوء : الله كريم عماد وماعليه صعب .. صحيح خالد كيف الحين ...؟ رد عيها وخالد يجلس مكانه بعد ماحط اغراضه في المقعد الخلفي : خالد الله يسلمك يبي يرجع بسرعه عشان المدرسة وابشرك الرجال ناوي على الطب من الحين وانا وعدته بالسيارة .. كمل وهو يحرك سيارته : شادن تبين شي قبل امشي .. : ابغاك تتوكل على الله وتسمي وتقرأ دعاء السفر ولاتسرع وتوصل بالسلامه ان شاء الله . حرك سيارته بعد ماسكر خالد الباب قال : الله يسلمك يالله اسلم عليكم وسلمي لي على عمتي عندك . قفل من شادن وابتسم وهو يتخيلها ويتذكر صوتها .. لو يطاوع قلبه كان اقل شي لف على بيتهم وشافها وكلمها قبل لايمشي .. بس عليه انه يضبط تصرفاته وينتظر الى ان يفرجها الله عليه .. *** جالس في غرفته منغمس في كتابة ملاحظات على بعض الموظفين المسؤول عنهم في شركة ابو ابراهيم ... قطع عليه تركيزه رنة الجوال اللي انقطعت بسرعه .. رمى القلم وطالع في شاشة جواله اللي نورها لازال يضيئها .. وابتسم وهو يشوف اسمها .. رجع الجوال على مكتبه وانكب على شغله من جديد .. سياسة الزعل والتطنيش جابت معاها نتيجة .. ومع هذا انكسر قلبه عليها .. بس يحبها ويشتهي وصلها ويبي يغتني بصوتها عن صوت غيرها خاصة انه شاب ومحتاج انثى بحياته ومايبيها الا حلال .. اكمل شغله بارتياح بعد ماعرف انه على بالها وانها تفكر فيه .. وفي عز انشغال عقله بالاوراق اللي قدامه وقلبه بمنال ولاغيرها .. سمع طرقات خفيفه على باب غرفته قال : ادخلي ياشادن . دخلت شادن وعيونها باين عليها النوم وتمشي بكسل قالت بصوت لازال اثر النوم فيه : مساء الخير . رد عليها وعيونه على الملف اللي يكتب فيه : هلا والله مساء النور .. جلست شادن على طرف المكتب قالت : نايف عمري تقدر تجيب لنا عشا من البيك ولا مشاوي من شامي .. نزل نايف القلم وتمطط بتعب قال : اووووه ياكثر تعبك يانايف .. اطلبي لك عشا من أي مطعم ياشادن جسمي متكسر من العمرة ثم وقفتي بالمستشفى مع عمي ابومشاري .. ولا خلي الشغاله تسوي لكم عشا ترى امي معلمتها الطبخ . : ماابغى عشا من البيت طفشت منه لي كم شهر مااكلت من برا وكمان ماابغى اكل الشغاله . تثاوب بكسل وتعب وكمل : اهاااااا ... اجل استغلي الايام هذي وانتي هنا ولاترجعي لبيتك الا وانتي طفشانه من المطاعم . طالعت في سطح المكتب الخشبي اللامع قالت بصوت محبط : خلاص ماعادني راجعه لبيتي . سكت نايف ثواني مصدوم ومو مصدق قال بحدة : اش اللي ماعادني راجعه ..لايكون بينك انتي وعماد شي ..؟ هزت راسها بلا وأردفت : جاني نقل لجده وعماد يبغاني في جده عشان اكون قريبه منه .. تنهد نايف بارتياح قال : بغيتي تطيحين قلبي .. قولي لي انك نقلتي عشان تلصقين في عماد واصدقك . ابتسمت بخيبه قالت : لا تفرح كثير لأني مطوله عندك هنا .. عقد نايف حواجبه قال باستغراب : مطولة ..؟ استدركت كلامها بابتسامه كاذبه قالت : الين بيتنا يخلص عماد ناوي يبني بيت جديد ... وبذكاء غيرت الموضوع وأدارته حتى تشغله عن سيرتها والتفكير فيها قالت : ان شاء الله اذا كملت تأثيث جناحك وليلة زواجك اخليك واروح لزوجي . ابتسم نايف ووقف قال :طالما انك جبتي سيرة الزواج خلاص ابشري بالعشا من البيك بس لي شرط . رفعت شادن حاجبها قالت : اش شرطك ..؟ : دقي على منال شوفي لي وش اخبارها ولاتقولين اني انا اللي قلت لك .. هالبنت تبي تذبحني بزود حياها .. ضحكت شادن ونزلت من فوق المكتب قالت : عاد منال يووووه مرررة خجوله ... لايكون تتغلا عليها عشان تكلمك .. نايف ترى البنت كلمتني قبل يومين وحسيت ان فيها شي ..؟ عض على اسنانه قال : ليه ماقلتي لي انها كلمتك .. اش قالت لك .. ضحكت شادن قالت وهي تخرج من غرفته : ماقالت لي شي بس تسلم وتسأل عن اخباري ... يالله روح جيب العشا واذا رجعت تلاقيني مكلمتها .. طلعت من عنده وتركته في افكاره اللي راحت للديرة ولها تحديداً .. ولحقها بعد دقايق بعد مابدل بيجامته ببنطلون جينز عملي وتي شيرت بني .. مر من عند شادن وجوالها في يدها قال : لاارجع الا مسوية لي تقرير عنها .. طلع من دون ماينتظر منها رد على نية انه يجيب لهم عشا من البيك وهو شايل هم الزحمة اللي بيواجهها في المطعم .. *** في الطايف .. جالسه على الكنبة الطويل وهو منسدح على فخذها ويتفرج على قناة الاخبارية السعودية وتحديداً برنامج عن المخدرات وتأثيرها على شبابنا .. قالت نوف بتملل : حمود تكفى غير .. تراني مااقدر اشوف مناظر الشباب هذولا واشكالهم كذا .. قال حمود وهو لايزال مركز : قوي قلبتس وشوفي المخدرات وش تسوي في عيال البلد حسبي الله .... قطع كلامه مجبر لأنها وفجأة وبدون سابق انذار رفعت راسه وابعدته عنها وفزت من مكانها متوجهه للحمام الملحق بالصاله لشقتهم المفروشه .. لحقها حمود ووقف وراها وهي ترجع كل مافي معدتها .. مسحت وجهها بمناديل وأثر التعب باينه على ملامحها .. قال حمود بخوف : نوف وش اللي صاير لتس .. قاطعته بتعب : ماصار لي شي بس يمكن اني حامل . تهلل وجه حمود .. حبه يتوج بزواج وزواجه يتوج بطفل .. وش يتمنى اكثر من هذا .. صدمة الفرحة الذ معاني الحياة .. قال بابتسامة واسعه : متأكدة ..؟ : لا موب متأكدة بس ... قاطعها : نروح للمستشفى الحين ونتأكد . حاولت تعترض بس اصرار حمود عليها خلاها تذعن له وتلبي طلبه .. لبست عبايتها وطلعت معاه وهي واثقه من النتيجة وهو مابين يارب ويارب .. ورجاه وحلمه ان نوف تصير ام عياله وشريكته بكل شي .. *** دخل بيته بعد مانزل خالد .. لو انها هنا ..! رددها كثير ومن قبل مايوصل البيت ورددها بعمق ومعنى اقوى لمن فتح بابه .. شاف جدته واحمد جالسين في الصاله .. قال احمد بصوت عالي : لاتقول انك ماجبت شادن ترى من يوم راحت لاقهوة(ن) سنعه ولاعيشة(ن) سنعه .. ردت ام ناصر برجا وخوف : لا مهب مخلي بنيتي مايجيبها لي .. هو خابرني من يوم جتني وانا مااقدر اصبر عنها .. وخيب آمالهم بكلمته بعد ماسلم على جبين جدته .. وعلى احمد .. قال وهو يجلس ويتكي بتعب : لاوالله ماجبتها .. خليتها تقعد مع مرة فهد تقول انها ماتقدر تروح لحالها للسوق .. وهذيك امها مقابلة ابومشاري ماتقدر تخليه .. جاته الحجه ووصله العذر بفعل الاقدار .. التفت عليه احمد اللي كلمه وعرف منه عن مرض ابو مشاري : ها وشلون ابومشاري الحين .. عساه احسن . قال عماد : أي الحمد لله احسن .. تعرض لنوبة سكر ووداه فهد والحمد لله مابه العافيه . قالت ام ناصر اللي افتقدت شادن من ايام وهمها متى ترجع لها .. : ها علمني متى بتجيب مرتك ..؟ رد عليها عماد : متى ماكتب الله . اجابته زادت خوفها خوف .. وقلبها ماتطمن عليها وهذا حاله معها ..! صب عماد له فنجال قهوة ورشف منه قال : انا اشهد ان مابعد قهوة شادن قهوة .. رد احمد : عز الله صدقت .. انا وامي ذبحنا الجوع عقبها .. ابتسم عماد وهو ياخذ له حبة تمرة ويدسها في فمه قال : يارجال ماذبحك وانت مع ليلى اللي ماتعرف تسوي حتى بيالة الشاهي .. استغفر ربه واحمد يمد نظره للبعيد رغم اصطدامه بالأثاث اللي حوله الا انه تجاهلها وتجاوزها ورحل لآخر مدى وعقله يتوه وين يرسى ..؟ عند مين ..؟ ومتى ..؟ *** عدت الايام .. كلاً ملتهي بنفسه وشايل همه ومحتفظ به .. احمد يزفر ومكتئب ومتشائم من العرس والحرمه في حياته من جديد .. سايرهم في موضوع الزواج لمجرد الانتقام وتنفيذ لرغبة امه ومايبي يرد عطية عماد واختياره له ... ويمكن لأنه يبي له عيال .. ومافيه احسن من ابومشعل يكون خالٍ(ن) لعياله .. فهد بصمته الدفين على اللي شافه وسمعه .. ومستقبل حياته محفوف بالشك وياليته أي شك .. شكوكها في اكره الأمور وأسوأها لله والناس وله هو تحديداً .. تشك انه ممن يهز عرش الرحمن وياشين الابتلاء والظلم .. مرت ايامه خاليه من اي حماس .. والفرح بقلبه منطفي من قبل الفرح .. وعماد .. بيته في ناظره مهجور .. رغم صوت جدته يملاه ووجودها في حياته جنة وسعاده .. الا ان الدور اللي فوق بالنسبه له موحش ومهجور .. ومايقربه الا اذا كان مضطر ومحتاج .. وشادن تحسب الأيام وتعدها مترقبه ويدها على قلبها .. والعروس المتهورة الظالمه خايفه من اللقاء وصعوبة الموقف .. وشلون وكيف اسئله تدور في راسها بالاضافه لخطط حاولت جاهدة تتبع اسلمها وأفضلها .. والعروس الصغيرة .. خايفه من القادم ومن التجربة الجديدة عليها واللي ماكان لها الوقت الكافي انها تفكر وتتقبلها بهدوء .. لكن قوة ايمانها بربها وثقتها في اللي عينه ماتغفل عنها قوية .. معتزمه انها ترضيه اولاً وأخيراً في نفسها وزوجها وهو ماراح يخيبها .. ونوف نسجت احلامها مع كائن جديد بدا يتخلق بأحشائها .. تعد الساعات وتشوف بطنها يكبر ثم تحس بحركته ثم تشوفه في حضنها .. وحمود يترقب ابوته وطفل يحمل اسمه ويكون ولد نوف .. نوف الحبيبة والقريبه .. ويسعى جاهد انه يسعدها بكل اللي يقدر عليه وعسى الله يقدره ويساعده .. ،،، ومرت الايام .. والليلة زواج .. او بالأحرى زواجين .. اسمه فرح وماهو فرح .. فهد مكتئب ويتحجج بالصداع والتعب .. واحمد حزين ويتحجج بفراق امه واحبابه وسفرته الليله .. الجو هادي .. والمناسبة مختصرة .. في مجلس الرجال في بيت عماد كان اجتماع هادي وبسيط للجيران والأقارب .. وفي بيت ام فهد جمعة حريم .. قدروا بطريقتهم يسلون انفسهم ويخلقون جو زواج من رقص وأهازيج طقاقه عبر سماعات الاستريو اللي تبرعت فيه فوزية لليلة ماتحصل باستمرار مثل هذي .. وفي الجو الصاخب وزحمة حريم الجيران واطفالهن .. صرخت فوزية في منال الواقفه عند باب المطبخ وصوت المطربه حاجب بقية الاصوات عنها .. التفتت لعمتها اللي تعابير وجهها باين انها غاضبه .. قالت : هلا عمتي وش بغيتي تراني مااسمعتس ..؟ ردت فوزية بانفعال قالت : روحي جيبي المبخرة والعود اعطيها بندر واقف برا .. فتحت منال عيونها قالت : الحين ..؟ : ايه الحين احمد بياخذ حرمته ويطلع للمطار وفهد بيمشي لجده . طالعت منال في ساعتها قالت : بسم الله مسرعهم تو العشا مااذن .. قالت فوزية : ياشاطرة رحلة احمد بعد ثلاث ساعات يادوب يوصل المطار .. وفهد اربع ساعات ونص ويكون في جده متى تبينه يسري لحرمته نص الليل عشان ياخذها الصبح .. مرت من عندهم حنان وهي تهتز على صوت ( موضي الطقاقة ) قالت بضحكه : قسم بالله عرس فهد وعمي المفروض يسجلونه في التاريخ انه اغرب عرس في الدنيا .. اجل العرسان يروحون بعد المغرب ولا فهد ياربي لك الحمد بس عرسه في ديره وحرمته في ديره .. ضحكت منال وهي تعطيهم ظهرها وتقول : عسى عبدالله ياخذتس ليلة عرسكم لامريكا ..قولي آمين ياعمتي .. ضحكت فوزية ورفعت يدينها للسما وهي تقول : آآآمين واشوفها تلبس تنورة بدال الفستان عشان ماتطيح في المطار .. قالت حنان بغيض : اخ بس لو انتي موب عمتي كان وريتتس شغلتس .. الاشهد وينها بطلع حرتي منتس فيها .. ضحكت فوزية قالت : اليوم شهد ساحبه على عماد ولاتشوفه شي .. طول اليوم لازقه في احمد عشانه معرس .. ضحكت حنان قالت : هههههههههههههه خير ان شاء الله واذا معرس وش تبي منه هي وجهها ..؟ دقتها فوزية بطرف اصابعها وهي تطالع في جوالها قالت : المعرس الصغير يتصل . حطت جوالها على اذنها ورفعت صوتها بـ: الو .. رد فهد : هلا فوزية .. افصلي وحدة من السماعات فضحتونا في العالم . قالت فوزية : كل الناس تدري ان عندنا عرس . رد عليها بحزم : افصلي وحدة ولاجيت وفصلتهم كلها وقعدتن بدون رقص . عقدت فوزية حواجبها قالت : خلاص خلاص بنفصل وحده .. ماشي انت الحين ..؟ : ايه ماشي .. نادي لي امي وجدتي علميهم انا في مجلس الرجال بعد عشر دقايق . : طيب .. قاطعها قبل تنهي كلامها بـ : مع السلامه .. وقفل منها بسرعه وهي تطالع في حنان قالت : روحي افصلي سلك وحده من السماعات ونادي له امك وامي انا بروح اسنعه اللي مايستحي على وجهه ويقفل في وجهي .. شهقت فوزية قالت : ياويلي فهد لايجي ومنال عند نايف .. راحت بسرعه للمجلس وحنان تتبعها بنظرات ذهول ممزوجه بخوف لو احد يدري عن فعلة عمتها ..! *** خلاص برجع لايجي احد الله يخليك ... قالته منال وهي ترتجف ويد نايف تضم على يدها بقوة .. قال لها بحنان : اخليك تروحين وتوعديني انك تكلميني الليلة ..! : لا مااقدر اكلمك .. ابوي لو يدري ذبحني ...؟ زم نايف شفايفه على بعض قال : عمي هذا شكلي باخذه عندي يومين واسوي له غسيل مخ .. اجل يقول لي .. قلد نايف صوت عمه ولهجته وكمل : انتظر لين تاخذها لبيتك ثم هرجها ليل ونهار .. شد على يد منال اللي تحاول تفلتها منه ودموعها تملا عيونها قال : منال تبكين ..؟ افاااا .. من جد ماعندي ذوق .. خلاص انا آسف ولاعاد تكلميني ياشيخه ولاتجلسين معاي .. خلاص روحي اذا السالفة فيها دموع .. هزت راسها والدموع تبلل خدودها قالت بغصة : بس لاتزعل مني اذا ماكلمتك . : ماني زعلان والله وماراح اجبرك على شي ماتبغينه ... انا اصلاً واحد غثيث .. مسحت دمعها وانسحبت من قدامه بلا رد وقبل ماتطلع قال لها : منال .. بنتقابل في الصيف ن شاء الله . كملت طريقها لداخل البيت واخذ نايف المبخرة اللي يتصاعد منها الدخان المختلط بريحة العود الازرق .. وقبل مايطلع شاف فوزية تدخل عليه .. قالت : وش سويت في البنت انت ..؟ قال نايف : ماسويت لها شي بس خجولة بزيادة بغت تموت من الحيا .. سكتت فوزية وهي تشوف فهد يدخل وينادي بـ ياولد .. قال نايف : ادخل مافيه الا عمتي فوزية .. همس نايف لفوزية : اشوا انك جيتي لايفتح معاي محضر تحقيق . قال فهد : وين امي وجدتي موب قلت لتس خليهم يجون . عقدت فوزية حواجبها قالت : هذا شكل معرس بالله ..؟ ليه الاخلاق قافلة ..؟ وش منغص عليك يافهيدان ..؟ رمقها بنظره وبقلبه .. اشياء واجد يافوزية اولها فاقد(ن) سعود وتاليها الحرمة اللي انا بروح لها وبتصير زوجتي وام عيالي تحسبني ... استغفر الله بس .. غمض عيونه ونفخ بقوة قال بانفعال : الحين انا قاعد انتظر ومحد يمي .. قال نايف بهدوء : تراني ماشي معك . وبنفس الانفعال : وين تمشي ..؟ اقعد مهب لازم تروح . رد نايف : يارجال امي وشادن ماعندهم احد ولازم امشي . سكت وهو يسمع صوت ام ناصر اللي تذكر الله وترجوه انه يبارك لهم في زواجهم وفرحها مختلط بحرنها على فراق احمد اللي حان .. تقدم فهد وسلم على راس جدته وطلع نايف بعد ماسلم على ام فهد من بعيد وسألها عن حالها واحوالها .. سلم فهد على امه اللي دعت له وباركت له واستودعهم الله ولحق بولد عمه .. ركب سيارته وتوكل على الله ونايف يسلم على عمانه ويودعهم .. وتحرك باتجاه الطريق اللي يودي خارج القرية ولها ..! *** العروس الباكية .. ابكت شادن وذكرتها بحالها ليلة زواجها وشكلها يقول انها تخفي عنها سر ودفين .. رمت الكوافيرة قلم الكحل من يدها قالت : مابيصير هيك .. وراي تلات عرايس ولهلا ماإدرت كمل لك .. يابنتي خلاص هونيها وبتهون . اخذت شادن منديل ومسحت دموع سارة اللي نفرت الحكل من عينها وهي تقول : سارة اش اللي صاير ..؟ فهد قال لك شي ..؟ سارة لازم اعرف ولازم تقولين لي ..! هزت سارة راسها بلا .. وهي تضم على يد شادن بيدها الذبلانه .. قالت شادن : طيب انتي هدي اعصابك والله ياسارة ان عماد بنفسه يضمن فهد وانا اثق في عماد بعدين .. قاطعتها سارة منفجرة : اسكتي ياشادن اسكتي لاتكملين .. صكت وجهها بيدين اظافرها منمقة ومرتبه ومطليه بلون فضي يشبه لون فستانها اللي اختارته مع امها غصب عنها ..! تكرهه حد الحقد .. تكرهه اكثر من خالد الخاين لربه ثم لها ولاهلها .. وتكره اسمه وطاريه وقرب ابوها منه واعجابه فيه . وتكره الليله لأنها بتجمعها فيه ... وتكره الدنيا اللي فيها امثاله وامثال خالد .. دخلت ريهام زوجة مشاري بفستانها السواريه بلونه السماوي وتصميمه الناعم واللي ماتكلفت فيه وبمكياجها الهادي وهي تقول : سارة في ولد من جيرانكم اسمه عدنان واخته معاه جاي يقول بيشوفك .. سكتت ريهام واشرت لشادن بهمس : اش فيها ...؟ زفرت الكوافيرة وهي تشوف كل تعبها راح بسبب دموع سارة وبكاها .. قالت : ياسارة ياألبي مابيصير هيك ..؟ ورايا كمان عروستين بدّون شغل وتعب .. الله يرضى عليكي اهدي شوي .. قالت شادن : ماعليه سناء اعذريها اول مرة تبعد عن اهلها .. : ولك أي والله فاهمه بس كمان تمسك حالها شوي هي مو صغيره .. ابتسمت لها شادن ورفعت يدينها بمعنى ان مافي يدها شي .. والتفتت لعدنان الواقف يطالع في سارة برهبه وخوف وهو لابس ثوب ابيض مطرز وشعره الطويل مقصوص لرقم ثلاثه قالت شادن بمحاولة منها تشتيت تركيزه عن سارة اللي تنتحب بقهر : ماشاء الله عليك ياعدنان تعال حبيبي تعال .. اش هذي الحركات ثوووب وكمان محلق شعرك وصاير كبير .. شكلك الليلة بتطلع احلى من العريس .. لمس عدنان شعره الخفيف قال ببراءته المعهودة وابتسامته متسعه : ايوه عارف عشان خلاص صرت رجال .. عمو فهد قال لي اذا حلقت شعرك حتصير رجال .. وكمان قال لي اللي يطول شعرو ويلبس ملابس عريانه الناس حتقول عنو بنت مو رجال . فجأة سكتت .. ورفعت يدينها من على وجهها .. هااااا ..؟؟؟ اش قااااال ...؟؟؟ اللي سمعته حقيقه ولا خيال ووهم ..؟ يعني لمن شافه قال له خلك رجال بدل مايقول .... آآآآه وش اللي يصير لي وش اللخبطه اللي انا فيها ..؟؟ قالت بألم ممزوج بأمل : عدنان تعال . تقدم منها خطوتين وهو متردد قال : خالتو سارة لساتك زعلانه مني ..؟؟ هزت راسها بلا وحواجبها معقودة قالت : لاياعمري مو زعلانه .. انت زعلان مني .. : لا مو زعلان اصلاً انا احبك وجبت لك هدية ورده من بيتنا وكمان جبت لعمو فهد .. ابتسمت بشفايف ترتعش قالت : طيب حبيبي فهد اش قال لك هذاك اليوم . سرد لها عدنان بسرعه اللي قاله فهد .. وكلامه يخترقها زي السهم .. دمل جرح وفتح ثاني .. لازم اصير رجال والملابس حقتي مو كويسه ومااخلي شعري زي شعر البنات حتى الأولاد الكبار مايحسبوني بنت ويضربوني اذا خرجت في الشارع .. كمان قال لي لازم البس ثوب ولا بنطلون وقميص طويل .. شوفي خالتو سارة خليت بابا يشتري لي ثوب عشان لمن يجي عمو فهد يشوفني رجال ... وهو كمان وعدني يجيب لي غُترة وعُقال ... ضربت على وجهها وانهارت من جديد وحضنت عدنان .. اللي فجأة سكت عن سرد الكلام بسبب حركتها .. قالت شادن : بنت سارة .. وش فيك انتي ..؟ وقفت ريهام واخذت عدنان بيده بعد ماسحبته من بين يدين سارة وهي تقول : يالله عدنان روح جهز وردة عمو فهد لأنو جاي بعد شوي . طلع عدنان وعيونه تطالع في سارة المنهارة وتردد : ياولي من ربي ياويلي من ربي .. ظلمت الرجال وظلمت نفسي .. ياويلك ياسارة .. ياويلك كيف بيسامحك .. شدت شادن يدينها من على وجهها وسط ذهول ريهام اللي رجعت وتراقب سارة بعيون تحتجز دموعها .. قالت شادن بتجلد وهي تقريباً فهمت الموضوع وسر بكا سارة وعدم حماسها للسوق وطاري الزواج ولولا ان امها وابوها ماغصبوها ماجهزت لزواجها اي شي : بنت .. شوفي الوقت راح وانتي تتدلعين حتى ريهام بتخرب مكياجها بسببك . وقفت سارة قالت : تكفين شادن ابي رقم فهد .. تكفين ابيه الحين .. لازم اكلمه .. وقفت شادن معاها وقالت بحيرة : اش بتقولين له .. خلاص صدقيني ماينفع الحين .. كلها كم ساعه .. قاطعتها بانهيار نفسي وانهمار لدموعها : ابغاه وبس ياويلي لازم اكلمه .. ياربي ساعدني ياربي ماقصدت اظلمه ..! حاولت شادن تهديها وهي تقول : سارة عمري هدي نفسك .. رقمه موعندي والله .. بس اذا تبغين راح اطلبه من نايف الحين .. هزت ساره راسها قالت بقهر : لااااا ماابغى نايف يعرف انك اخذتيه عشاني .. طالعتها برجا وكملت : لازم اكلمه ياشادن ... تكفين لازم اكلمه قبل اشوفه .. رجعت ضربت وجهها وهي تردد : ياويلك ياسارة ياويلك ياسارة .. سحبتها شادن وضمتها على صدرها بقوة لعل وعسى انها تسيطر على انهيار سارة وتهديها .. وقفت ريهام عندهم وهي تمسح دموعها اللي فرت إثر موقف سارة قالت : سارة اش فيك بالضبط .. اش اللي صاير .. اذا الموضوع مهم بخلي مشاري يكلمك ويعطيك رقمه . رفعت سارة يدها باعتراض وشادن تضمها وتهمس لها بخلاص هدي نفسك .. ابتعدت عن شادن قالت بصوت مبحوح ووجه باكي وعيون فيها ندم وقهر : لا لاتكلمين احد .. خلاص ربي حيساعدني توكلت عليه .. ابتسمت ريهام وهي تشوفها تمسح دموعها وتحاول تهدي نفسها بكميات هوا تسحبها لصدرها .. قالت بمحاولة منها انها تضفي على سارة نوع من الارتياح : سارة زبطي مكياجك ووعد مني اجيب لك رقم فهد من مشاري من دون مااقول له عنك شي بس تكفين لاتخلين الرجال ياخذك بشكلك هذا ثم والله ليشرد .. اكشرت ريهام بضحكه واستطردت بمرح : اقول لك شي .. بصورك وبخليها لعيالنا بعدين اذا عذبوني ماناموا اخرعهم في صورتك عشان ينامون .. حطت سارة يدها على وجهها وهي تقول بطيف ابتسامه احيا ملامحها : لا ماابغى تصوير الليله .. شكلي مرة مايساعد . وخلاص لاتكلمين مشاري ولاتجيبين الرقم .. قالت سناء بملل : ولك أي دَحَكِي .. هيك بدياكِ .. يالله نكمل الميك اب ياسارة أبل مايجي عريسك ..وان شاء الله راح تتصوري وانتي رضيانه ومرتاحه .. وبدنا نشوفه هالعريس اللي اختار القمر هي .. يالله حياتي رخي لي راسك عـ ورى .. هزت راسها سارة قالت : خليني بس اغسل وارجع لك .. راحت غسلت وجهها ورجعت سلمت نفسها لسناء للمرة الثانية عشان المكياج .. وكأن الارتياح بدا يلامس شغاف قلبها بعد اسبوع وأكثر من الارهاق النفسي والدمع والندم .. *** في سيارة ثانية .. سواد لونها مثل سواد نظرة صاحبها للدنيا وللحياة .. ومثل سواد الجسم المتكوم على بعضه على المقعد الجانبي حياء وحرج في ليلة عمر ..! ومثل سواد الطريق الصامت مثله .. هو اسكته قلة حماسه لحياته الجديده واحباطه من التجربة الأولى .. وهي اسكتها الخجل والحيا ولاشيء غيرهم .. التفت لها .. كتلة سواد .. موباين منها شي .. حتى قدميها المزينه بنقشات الحنا اصرت انها تخفيها بشُرَّاب اسود تحت الجزمة البيضا المطرزة .. ويدينها متواريه خلف قفازات سودا وعباية الراس الواسعه مغطيتها من راسها لجزمتها .. قال احمد بمحاولة منه بثها شيء من الاطمئنان وكسر جو الصمت : مها .. همست بـهلا ماسمعها .. اعاد مرة ثانية بصوت ارفع : مهاااا . التفتت عليه وصدت بمجرد لهيئته قريبه منها قالت : سم . ابتسم لصوتها الناعم الهادي قال : سم الله عدوتس .. اكشفي عن عيونتس ترى مابه احد في الطريق . ماردت عليه من الحيا .. قال مرة ثانية : ماسمعتيني وش قلت ..؟ همست بضيق : الا سمعت بس ماتعودت ارفع عن عيوني .. غمض عيونه وهو يتذكر ليلى يوم اخذها من الديرة .. واول مشوار اخذها فيه للطايف .. كانت متغطيه وبعدها بأيام صارت تلبس النقاب وتضيق فتحته وبالتدريج توسعها .. في البداية تخاف تطلع بمكياج بعدين صار امر عادي بعد اول تجربه .. اخيراً على اللثمة وكل مرة تنزل فيها وتكشف عن عيونها المتخمه بالكحل وحواجبها المنمقه ومصففه بعنايه وتنزل لزوايا خدودها الملونه بالأحمر .. ويمكن لو تمادت واستمرت معاه رمت اللثمة وبعدها ليتها تتحجب بس .. كمل طريقه بصمت .. هالبنت مالها ذنب بليلى وفعايلها بس الحذر هالمرة واجب .. وثقته اللي اعطاها ليلى لابد يقتلها مع أي حواء ثانية .. وصل المطار ونزلت معه بسوادها ساترها وحاميها .. المكان غريب عليها .. ومع غرابته مافكرت انها تحاول تستكشفه بقدر مافكرت انها تستر فستانها الابيض البسيط وتلم عبايتها عليها .. رن جوالها هدية عماد لها وكانت نغمته دعاء للشيخ عبدالرحمن السديس .. طلعته من شنطتها وشافت رقم فوزية اللي سجله لها عماد ردت عليها والخجل يخنق صوتها ويربكه : هلا والله .. : هلا بك ياعروسنا .. وش اخباركم .. ردت بحيا واضح : الحمد لله .. حست فوزية باحراجها قالت : وينكم الحين احمد ادق عليه مقفل جواله ..؟ اكتفت مها باجابة مختصرة : في المطار . : زين اذا وصلتوا طمنونا عليكم .. ومبروك مرة ثانية .. سكتت مها وفوزية تقول بحرج من حرجها : يالله ماابي اطول عليك .. مع السلامه . : بحفظ الله . قفلت من فوزية وطالعت في مكانها لوحدها .. ماحولها الا ناس غُرب واجانب .. سمت بالرحمن وثبتت قلبها بذكرها واتكالها عليه .. شافته جاي يمشي من بعيد بوجه جامد ماله علاقة بالفرح المفترض على اسم ليلته .. حمدت ربها وشكرته على انه رحمها من انتظاره والقلق .. قال احمد وسط ضجيج المطار والاعلان عن الرحله : يالله مشينا .. مد يده على يدها الصغيرة وشافها مستحيه وخجلانه وآثر انه مايزيدها ومشى قبلها وهي وراه تكرر المعوذات ودعاء السفر بقلبها .. *** واقفه قدام المراية .. وجهها باهت وذبلان ومفتقد حيوية الأنثى ونضارة المرأة .. ليه وجهي باهت ..! ليه مو مشرق مثل وجه شادن اللي كانت نادراً تحط مكياج ونص اليوم تقضيه في شمس المدرسة .. ليه فوزية اكثر حيويه واسعد مني وانا مافيه وسيلة تسليه الا قدرت احصل عليها .. ليه احمد تركني بسهوله ولاهو اللي طلقني ولاهو اللي تفاهم معاي .. ليه تزوج ..؟؟ انثنت على المغسلة وغسلت وجهها ورجعت تطالع في المراية .. نفسها تبكي وتعبر بس البكا يرفض يساعدها ويخفف عن همها .. الليلة احمد عريس وعروسه صغيرة .. ويقولون ملتزمه .. آآآآه .. ملتزمه .. واحمد بيشوف الفرق بيني وبينها تذكرت كلام امها عن وحده من قريباتها في الديرة .. مرة احمد ملتزمة وراعية بيت يقولون محد ينافسها بالطبخ وتسوي حلى كل(ن) يمدحه .. يعني الفرق واسع وشاسع .. بكرة بتعامله مثل شادن اللي طار في اكلها وقهوتها وحلاها وسنعها .. وبيشوفها تصلي .. تأوهت اكثر وغسلت وجهها مرتين وثلاث وعشر .. ودي ابكي .. ودي اصرخ واقول انا وحده خاينة لربها ولزوجها اقول تراني ضيعت حياتي بيدي وفعايلي .. اقول تراني قتلت كلمة يبه من لسان طفل وحرمت احمد سماعها .. اقول تراني كلمت شباب واستغليت الانترنت لأهواء نفسي ونسيت ربي وقوانينه .. وآآآآه اقول اني دخلت مواقع ساقطه كنت اجلس فيها بالساعات واهمل زوجي بسببها واترك المواقع اللي تفيد وتذكري وتنصح .. طلعت من الحمام ومرت من عند امها في الصاله ودخلت غرفتها وصوت امها يتخلل مسامعها قلت لتس اهتمي فيه وراعيه وحياتس مهب حياة .. وياما نصحتتس وهذي النتيجه ياليلى .. شفتي الحرمه ليا اهملت رجلها وحرمته من العيال وشلون تصير رخيصه .. سدت اذانيها بأصابعها وهزت راسها رافضة سماع كلام امها اللي تعيد وتزيد فيه من اول ماسمعت بخطبة احمد .. تغطت بلحافها وسط هاله من الحزن .. والحسافه والندم وليه وليه وليه اسئلة مرت على ذهنها بلحظة صحوة وتأنيب ضمير ..! بس فاااات الوقت وانتهى وقت العتب واللوم وماعاد ينفعها ندم .. *** رجع لبيته بعد ليلة متعبه .. كل حفلة زواج متعبة سواء كانت مختصرة ولا كبيرة .. المهم نهايتها فرح وانجاز .. توجه لغرفة جدته وكأن البيت ضاق عليه وماعاد به متنفس الا هالغرفه .. طل عليها يشوفها صاحيه ولا نايمه ... شافها منسدحه ومتلحفه ... ومشى على اصابعه وبخفه قاصد آخر الغرفه .. قالت وهي بين الغفوة والصحوة وبصوت يهاديه النوم ويغازله : ياوليدي ريح عمرك انت من صباح الله ماقعدت . عرف انها صاحية وتأوه بتعب ورمى شماغه وطاقيته وفتح ازارير ثوبه وتمدد على الارض .. قال : الله يستر عليهم ويوفقهم .. توني ارتحت من سنين يوم احمد اخذ له حرمة(ن) سنعه . ردت ام ناصر بصوت ذبلان : الله يرزقك انت واحمد بالضنى اللي يقر عيني . سكت عماد بغية عدم ازعاجها وساد المكان وحشة صمت غريبه .. امتد شماغه وغطى فيه وجهه وغمض عيونه .. يتخيلها تكلمه وتسأله وتقهويه وتحوف البيت .. كل هاجسه " بس لوكانت فيه " استغفر ربه وتعوذ من الشيطان وهو يتمنى ويتخيل بــ لو رفع شماغه عن وجهه واخذ تلفونه .. فتح الرسايل وكتب منقاد لمشاعره وشوقه .. ( إلى متى من دون تفكير أناديـــــــك أحسبك عندي وأنت يابعد ممشــاك لو صار شوفك صعب ماني بناسيك ولو حال دونك يأس لا يمكن أنساك لو عشت طول العمر بالروح بفديك يالغالي اللي غالي الروح تفـــــداك ) ضغط ارسال ورمى جواله بجنبه ورجع تمدد على ظهره وغطى وجهه بشماغه باهمال .. وكانت دقايق قليله وداهم النوم فيها عينه على طيفها .. *** جالسه مع سارة اللي بدا شكلها مرتاح وماتفكر الا وشلون تواجهه .. بس كل شي يهون المهم انه ماطلع مثل ماتوقعت .. قالت لامها اللي تبخرها : يمه اهم شي شنطتي الصغيرة ماتحطونها في سيارة مشاري .. ردت امها : الحين انا ماادري انتم بتروحون لفندق ولا لشقتكم ولا كيف ..! التفتت سارة على شادن وهي منغمسه بعقلها وقلبها في مسج وصلها على جوالها ما كأنها معاهم قالت : شدون عمري انتي اللي تقدرين تعرفين من نايف او عماد .. عقبت ام مشاري : ايوه صحيح ياشادن تقدرين تدقين على نايف .. ماحست بكلامهم ولا التفتت عليهم قالت سارة بعصبيه وتوتر : شااادن .. هذا وقت غزلكم ..؟ ردي علينا . رفعت راسها وفتحت فمها وهي تبتسم لام مشاري وسارة الموجهين انظارهم عليها قالت : هاااا ...؟ اش قلتوا ترى ماسمعتكم . ردت عليها ام مشاري وهي تحاول تنفش فستان سارة البسيط من تحت : نقول اتصلي على زوجك ولا نايف اسأليهم فهد وين بيروح اذا اخذ عروسه .. سارة يمه والله فستانك هذا ماكأنه حق عروس .. الله يهديك بس انتي واختيارك .. شوفي كيف من تحت .. طالعت سارة في اسفل فستانها قالت : يمه اش اسوي تعرفين نفسيتي كانت تعبانه لمن اخترته ... بعدين مافيه لازفه ولا معازيم كثير ولاشي من بيشوفه يعني .. حتى تصوير مافيه . ضحكت شادن وهي تحط جوالها على اذنها للمرة الثانية وتحاول تكلم نايف قالت : الحين العروس تمشي والحفله لسه دوبها تبدا فهد هذا عليه حركات ..ركزت مع نايف اللي فتح خطه قالت : ايوه نايف هلا بك .... وينكم ..... بالله ........ يالله مع السلامه . قفلت منهم قالت : خلاااااص واقفين عند البوابه .. وصلتهم ريهام بسرعه وهي تتعثر بكعبها العالي قالت : خالتي مشاري له ساعه يحاول يدق علينا جوالاتنا مو معانا .. الحين دق على امي يقول انهم دخلوا البيت . جلست سارة على الكرسي بخوف .. قالت : ياويلي مسرعهم .. والله مااقدر اروح .. ردت امها وهي تمسح على راسها : يمه لاتقولين ياويلي مية مرة قلت لك ويل وادي في جهنم .. بعدين ليه ماتقدرين .. تحصني واستعيني بالله وخليك بنتي القوية اللي ترضى بقسمة ربها .. " ماتدرين يايمه وش انا مهببه معه .." قالته سارة في نفسها وهي توقف لريهام اللي مسكت عبايتها وهي تقول : يالله تكفين مشاري مرة معصب عشان محد رد عليه لايعصب اكثر اذا تأخرتي . طالعت شادن في سارة قالت : يالله يازوجة ولد عمي توكلي على الله وانزلي .. صحيح تذكرت ..! ترى حنان تسلم عليك وتقول لك مبروك وتقول لك ان زواجك بيتسجل في التاريخ على يدها . ابتسمت سارة والربكه مأثرة عليها قالت : يوووه انا فين وانتوا فين .. ياربي تيسر لي بس . ضمتها امها وعيونها تغرق بدموع الفرح ممزوجه بدموع الفراق .. قالت : الله يوفقك ويسعدك ياعمري .. بكرة تكلميني تطمنيني عليك .. لاتنسي .. ترى قلبي بدا من الحين ينشغل عليك .. قرصتها شادن بخفه قالت بمرح وهي تغالب الدموع : ياعمري ياسارة راح افقدك فهد بياخذك منا .. ابتسمت بغصه وكملت : بس اهم شي انا نقدر نطب عليكم بأي وقت بدون مانستحي منكم . شدت سارة على يد شادن قالت بهمس : شادن ادعي لي ماادري كيف بتعدي ليلتي .. شكله زعلان مني كثير .. ضمت شادن على يدها قالت : ياعمري فهد رجال وصدقيني راح يتفهم الموضوع اهم شي تكلمينه بهدوء وبدون تهور وحتى لو كان زعلان حاولي تراضينه بشتى الطرق اهم شي لاتعاندين زوجك ياسارة واكسبيه ترى فهد رجال وعلى قولة نايف ينشري . ابتسمت سارة وهزت راسها قالت : ذكرتيني بكلام أبوي ومشاري عنه بس عصبي ياشادن ... سكتت على صوت امها اللي رجعت لهم وقالت : يالله يالله ابوك يقول تنزل الحين الرجال مستعجل ومارضى يدخل . : نزل مع المصعد وعلى البوابه ولاتقولون لاحد اني خارجه .. اخذت امها عبايتها ولبستها قالت : اجل يالله البسي عبايتك هنا .. لبست سارة بسرعه وريهام تكلم مشاري وتقول له : خلاااص والله بتخرج الحين حتى شوفها لابسه عبايتها بس انت هدِّ نفسك لاتعصب .. قفلت جوالها وزمت شفايفها قالت : مشاري معصب يقول العريس طفش وابوي عصب . عقدت سارة حواجبها قالت : هذا والساعه للحين ماجات 12 .. والله حنان صادقه المفروض يتسجل زواجي في التاريخ .. طلعت تمشي مع امها وتوجهت للمصعد وخفقات قلبها مرتبكه ومتفاوته بين القوة والسرعه وبطء النبض .. *** *** |
| الساعة الآن 07:30 PM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية