|
الجزء التاسع والعشرون 12:00 الظهر قسم الشرطه ..غرفة وكيل النيابه.. البحرين عبداللطيف: بعد ان تأكد للنيابه ان الشاهد الاول كان موجود في مقهى بيروت الواقع بالمنامه.. وبعد الاستماع الى الشهود الذين اكدو وجود الشاهد الاول هناك.. اطلب من وكيل النيابه ان يلغي شهادة الشاهد في حق موكلي وكيل النيابه: تلغى الشهاده منير: بالنسبه للشاهد الثاني.. نقدم دليل لحضراتكم من طبيب العيون الذي يتعالج عنده الشاهد الثاني.. الذي قدم لنا تقريرا عن حالة الشاهد ومفادها ان حالة النظر عنده متعسره حتى بوجود النظاره ونسبة النظر لديه لا تتعدى 15 مترا في النهار.. وحيث ان منزل الشاهد يبعد عن منزل الضحيه ما يقارب 35 متر.. والجريمه حصلت باليل.. هذا يعني ان الشاهد حلف كذبا.. وارجو من وكيل النيابه الغاء شهادته وكيل النيابه يتفحص تقرير طبيب العيون: تلغى شهادة الشاهد الثاني احمد: وهذي ورقه نتقدم فيها برفع دعوى على الشهود للحلف كذبا وزورا امام العداله.. ومحاوله لاتهام بريء وكيل النيابه: نأمر بحبس الشهود.. جبر الشرطي: نعم سيدي وكيل النيابه: خذ الشهود واحبسهم لحد ما اطلبهم مره ثانيه سعود: يعني شنو!!! احمد يبتسم: لا تستعجل على رزقك يا بوعبدالعزيز سعود بحده كبيره: لا تناديني بوعبدالعزيز يا كلب.. هذي لاهو ولدي ولا اعرفه وكيل النيابه بحده: سعووووووود.. كلمه ثانيه احبسك منير: حضرت وكيل النيابه.. ودي اسأل زوج الضحيه كم سؤال وكيل النيابه: تفضل منير: صورة جوازك الي بيدي تثبت انك كنت بالسعوديه ليلة ارتكاب الجريمه سعود يشوفه باحتقار: تنتظر مني اجابه؟!!! منير بتريقه: لا ابدا.. انا كنت اقول لك على حقيقه سعود: يا فرحتي.. فرحتني يوم قلت الي قلته احمد يضحك: السؤال خذه مني.. انت كنت في السعوديه ليلة ارتكاب الجريمه؟ سعود: أي نعم احمد: يعني ما دخلت البحرين عن طريق غير مشروع مثلا سعود: تصدق أي.. دخلت البحرين وانا راكب سجادة علاء الدين تعرفها احمد يضحك: لا ما اعرفها سعود: زين الي قلت لي عشان اقول لك عنها احمد: وانا احب اسمع.. اشلون دخلت البحرين يوم الاثنين تاريخ 7/ يونيو سعود بحده: من صجك انت.. يعني اشلون.. لا بس طاقية اخفى؟ احمد: ما جاوبت يا سعود سعود: انا ما دخلت البحرين لا عن طريق مشروع ولا عن طريق غير مشروع احمد: حضرت الوكيل عندي شهود يأكدون وجود سعود يوم الاثنين تاريخ 7/يونيو في البحرين وكيل النيابه مصدوم: شنو؟!!! منير: حضرة الوكيل اوعدك انك تغير رايك في سعود اول ما تسمع شهودنا اش عندهم سعود: الي عندهم خله يجيبونه.. انا عندي اثبات اني كنت برا البحرين احمد: لو كان الاثبات الي بيدي صحيح وواثق منه ماكنت تجيب شهود زور تتهم فيه عبدالعزيز.. حضرت الوكيل الشاهد الاول.. صبحي متولي.. بواب العماره الي ساكن فيها المتهم سعود يرتبك: ....................... وكيل النيابه: المتهم عنده بيت!!!! احمد: المتهم متزوج بزوجه ثانيه.. ومسكنها في عماره وكيل النيابه مصدوم: جبر الشرطي: نعم سيدي وكيل النيابه: نادي على صبحي متولي &&&&&&&&&&&&&&&&&&&&& 1:20 الظهر فيلا العايله ..مجلس الرجال.. السعوديه بوسلطان بحده: انا سكت عنك وقلت اسمع الي تبي تقوله.. بس الان لا غسان منزل راسه: ما اقدر صلاح: الي تقوله جنون.. تبي تخرب بيتك وبيت اختك.. هذا عز الجنون غسان: هذي اختي الي دفنتها بوسلطان: بنتنا بعيده عنا.. ولدنا حنا بعد راح.. ما عملنا زي منت ناوي تعمل صلاح: ما فكرت في ولدك؟ غسان ينتبه: نسيته بوسلطان بكل غضب: ماهي سواة رجال.. طول عمري اشوفك رجال.. الان اول صدمه تعمل فيك كذا !!! غسان مشتت: ماني قادر بوسلطان: منت قادر ابتعد.. بدل ما تخرب بيوت.. الافضل انك تبتعد.. روح سافر أي مكان كم يوم وارجع.. بس لا تجلس هنا وتزيد من وجع قلوبنا.. زوجتك يا يبا مالها ذنب.. وبعدين مين اكد لك ان لافي ورا موتهم غسان: الحراس قالو لي انه هدد سلطان بوسلطان: ومتى قالو لك غسان: يوم الي سلطان اطرده من هنا بوسلطان: وانت سكت طول هالمده وجاي تتحرك الان غسان: انا ماظنيت انها توصل لحد كذا بوسلطان: وتظن زوجتك لها يد بذا كله دامك ما ظنيت غسان ينزل راسه: .......................... بوسلطان بحده: رد علي لا تنزل راسك صلاح: اذا ودك تنتقم انتقم من الي آذاك.. لا تتشطر على الي مالهم ذنب.. زوجتك وزوجتي مالهم ذنب.. واولهم ناصر بوسلطان بحده: قوم روح تطمن على زوجتك واياك اسمع انك اهملتها.. تراني ابوها اذا ما دريت.. ومابرضى على بنتي الي انت تقوله غسان مستغرب: والله اني ماني مصدق الي تقوله.. كنت متوقع انك تقوم الدنيا وما تقعدها عشان سلطان مات بوسلطان بحزن الدنيا: وتظن قلبي ماهو موجوع.. ادفن بكري وانا ما فرحت فيه.. ولدي الي المفروض يدفني انا ادفنه غسان يحضنه: لك طولت العمر ياعمي بوسلطان يبعده عنه: وخر عني لا تقرب مني.. ما ظنيت قلبك قاسي كذا على زوجتك وولدك.. انت حتى نسيت ولدك صلاح: قوم تعوذ من ابليس.. وروح تطمن على زوجتك.. وطمنها انك جنبها.. اسمعها مني انت دفنت اختك.. لا تنتظر حتى تدفن ولدك بغبائك.. بتموت اسف اذا صار هالشي معاه حق.. قمت من مكاني وبست راس عمي ومشيت.. رحت على جناحي.. فتحت الباب وسمعت صوتها وهي تبكي.. خايفه اتركها.. تقول لناصر.. "ليت الله ياخذ روحي ولا غسان يتركني.. مااعرف اعيش من غيره.. بموت حسره عليه" جيت بطلع من الجناح.. بس ما قدرت اكمل دربي جلست على الكرسي منهار.. اسمع كلامها الي يذبح.. تركت الخوف يغلبك يالعنود.. وين راح عشقي لك.. احس كل شي راح انتهى &&&&&&&&&&&&&&&&&& 2:00 الظهر شقة ليال ..الصاله.. البحرين خوله: انا خايفه عليها.. ماهي ليال هذي وحده ثانيه احمد: خليها تعوض حزنها في الشغل عبدالرزاق: وينها الحين خوله: مع لينا في الطابق التاسع.. اتصلو على مهندس.. وقالت له تبي تفتح الشقق وتبي تزيح الحيط احمد: فهمتها تبي تسوي مكاتب مفتوحه خوله: صح هذا الي قالته عبدالرزاق: جراح وين احمد: لا تجيب طاريه.. مكان ما يكون خوله: ول ليش عاد!!! احمد: نرفزني اليوم الصراحه خوله تبتسم: ما يبي يجبرها على وجوده.. ما يبي يزعلها احمد: وبعدين يعني خوله: احمد.. خلي ببالك انها ماقالت تبيه.. هي ماهي موافقه احمد: لا حول ولا قوة الا بالله عبدالرزاق: اتركك من ليال الحين وقول لي عن عبدالعزيز احمد: تركتهم وطلعت.. عشان يكملون باقي المسرحيه خوله بفرح: يعني شنو خلاص بيطلع اليوم احمد: لا ماهو اليوم.. يمكن يومين بعد خوله بملل: كل يوم تقول يومين احمد يضحك: لا تخافين دام انه برئ لا تخافين ماعليه شر ان شا الله ليال تدخل مع لينا: احمد انت هنا.. بشر عن عزيز &&&&&&&&&&&&&&&&&& 3:00 الظهر شقة خالد.. غرفة لبنى.. البحرين دخلت الشقه وانا ميت تعب.. شفتها نايمه على السرير بس ما كنت عارف اذا كانت صاحيه ولا نايمه صدق.. قالت تبي تعيش فترة خطوبه.. صحيح كنت متضايق بس قلت بسوي لها الي تبيه.. ماراح ارد أي طلب لها.. صحيح ما سألتها ليش.. بس كنت اشوف السعاده بعيونها وهذا يكفيني.. فتحت الثلاجه ووقفت قدامها.. جعان بس ماابي اكل بروحي.. سكرت باب الثلاجه ورجعت الصاله.. فتحت التلفزيون.. وجلست اشوف لبنى تطلع من الغرفه: وصلت حبيبي خالد فاتح ذراعه: وصلت ياروح حبيبك لبنى تجلس بحضنه: خالد خالد يبتسم: يا قلب خالد لبنى: جعان خالد يلعب بشعرها: جعان وما ابي اكل بروحي لبنى تقوم عنه: الحين يجيك احلى غدا خالد يحضنها بقوه: احبك لبنى بفرح كبير: لا تبتعد عني خالد بخبث: افهم من هالشي انك.............. لبنى بتوتر: لا ما قصدت.. خالد ودي افرح معاك ما شبعت حتى......... خالد يشوف خوفها: تدللي وتدلعي لحد ما تشبعين.. دامج بحضني سوي الي يريحج لبنى تحضنه بقوه: لا تحسب اني رافضتك خالد.. انا ماني مصدق الي اشوفه.. حلمي يتحقق من غير مشاكل.. خالد ما ودي اصحى من هالحلم.. ابي اشبع منه خالد يلعب بشعرها: ماراح اجبرك على شي يا قلبي.. يكفيني انك بحضني &&&&&&&&&&&&&&&&&& 7:00 الليل شقة جراح ..المطبخ.. البحرين جراح: وانتي كيف تتصرفي من غير لا تقولي لي مزيان: انت نايم.. وهم مشغولين يجهزو للشركه الجديده.. قلت فرصه اعزمهم على العشا جراح: مزيان انا عارفك زين مزيان تضحك: خلاص دامك تعرفني زين.. خلاص جراح بحنيه: عشان خاطري لا تحرجيها مزيان تضحك: طلعت عارف الي افكر فيه من صدق جراح: واكيد خوله متفقه معاكي على شي مزيان تداري ضحكتها: بصراحه جراح يشوفها بحده: ايوا مزيان: ايوا.. انا وخوله متفقين على شي جراح بحده: لا.. الغي الي اتفقتو عليه انتي وخوله تسمعين مزيان تعمل حالها مشغوله: جويل لا تنسي السلطات جويل: لاء شو انسى.. لا تعتلي هم.. ان شا الله بتنجحي بالي راح تعمليه مزيان تضحك: يا حبي لك والله جراح: انا اكلمك ما تسمعين جويل: شو ماما ما سمعتك شو قلت جراح يمسك نفسه: ما ودكم اني ازعق فيكم صح جويل: لاء يوه شو تزعق وتنرفز حالك.. روح يا ماما شوف صبا ازا صحيت العب معا شوي جراح بحده: جويل اسكتي.. مزيان مزيان: خير يا خوي تناديني جراح يسحبها: ان عملتي شي يضايقها الليله.. تراني بزوجك غصب عنك مزيان تضحك: ليه انا ما قلت لك جراح: عن ايش مزيان: عن زواجي جراح يناظرها بحده: ................... مزيان: اخوي مره قال لي انه يبي يزوجني وانا هذيك الايام رفضت.. بس انا موافقه الان جراح ماسك ضحكته: تراني مجنون واعملها مزيان: عادي ياروحي.. وانا بعد مجنونه واعملها جويل: وي وي ان شا الله الف مبروك يا ماما.. هيك ما بتفرحيني مزيان تضحك: معلش جويل.. سامحيني المفروض انك اول وحده تعرفي جويل: الله يهنيكي يا ماما.. ما بتعرفي كيف فرحت لأليك جراح يمشي عنها: انا طالع وماراح ارجع غير بكره مزيان بصراخ: مع السلامه حبيبي.. وانا بأجل العزومه لحد ما ترجع بالسلامه ياقلبي جراح يرجع لها: لا تعانديني مزيان بجديه: مالك شغل انت.. ابعد روحك.. ووقت الي تشوف مني اشاره تحرك.. عارف اذا ما تحركت.. صدقني يا جراح لا انت اخوي ولا انا اعرفك فاهم جراح بحده: هالكلام لي!!!! مزيان: اكيد لك.. ركضت ورا وحده من الشارع والكل حذرك منها.. ركبت راسك وتزوجتها.. الان وقت الي لقيت وحده عدله منت قادر تخليها تحبك!!.. اسمع مني هالمره بتاخذ هالبنت انت سامع جراح: ليه ماتبين تفهمي.. هي ما تبيني.. ام صبا كانت تبيني.. كانت تبين لي حبها.. هذي لا مزيان: هذيك قليلة حيا وطمعانه فيك.. اماهذي وحده متربيه جويل: مزيان ماما تعي دوئي التبوله وأولي رأيك فيا مزيان تضحك: تراها تكلمك.. عارفه انك تحب التبوله.. روح ذوقها وقول لها رايك جراح يطل على جويل: اشوف كلامك ما توجهينه لي.. توجهينه لمزيان جويل تطنشه: ماما مزيان تعي شوفي السلطه اليونانيه مناسبه جراح يمشي: طيب انا ماشي مزيان بعد ما مشى: حرام عليكي كنتي رديتي عليه جويل: سيبك منو هاد طول عمرو هيك.. الدلع ما بنفع معو.. هو عاوز التطنيش مزيان: واجع قلبي هالجراح جويل: ألبي موجوع عليه من زمان &&&&&&&&&&&&&&&&&&&& يتبع |
--------------------------------------------------------------------------------
9:00 الليل شقة احمد ..الصاله.. البحرين احمد على التلفون: وين وصلت صلاح: نص ساعه واكون عندكم احمد: لا تنسى شي من الي قلته لك صلاح: ماني ناسي.. بس اذا هي فعلا ما تبيه احمد: يا خوي تبيه وخايفه.. تراني اخوها بعد.. وماكلمتك في هالموضوع الا لاني ادور مصلحتها صلاح: والله يا خوي انا خايف احمد: مافي مجال للخوف.. الموضوع متوقف على كلمه منك.. فكر كويس صلاح: التفكير يبي له وقت يا احمد.. يومين ثلاثه ماهو بهالسرعه اقرر مصير اختي احمد: لافي ما ترك لنا مجال للتفكير.. صلاح الله يخليك.. جراح ورقة امان لليال وعيالها صلاح باستسلام: ماشي ماشي احمد: سلام لينا: احمد انا ماني موافقه على الي تسويه احمد: مافي وقت حتى توافقي على الي براسي لينا: ليال ماهي بهيمه حتى نرميها جذي احمد باعتراض: من قال انها بهيمه لينا: اسلوبك وفكرتك يا احمد يكفيها الي فيها.. ماهي قاصره انها تتزوج بهالطريقه احمد ينزل راسه: ما اقدر اظمن حياتي يالينا عشان افديها.. لافي يتحرك بسرعه.. وماعندنا احد ينقل لنا تحركاته.. سلطان راح في غمضة عين.. اشلون بأمن حياة ليال لينا بحيره: ما ادري احمد: اطلبي من الله انه ييسر الامور لينا: يارب &&&&&&&&&&&&&&&&&&& 9:15 الليل فيلا العايله ..جناح غسان.. السعوديه طلعت برا البيت شوي اغير جو.. ارتاحت نفسي شوي.. طول منا بالطريق افكر فيها وفي الكلام الي قالته لناصر.. رجعت الفيلا ودخلت الجناح ولقيته فاضي.. يمكن انها مع الحريم.. ريحت على السرير شوي ام غسان تنادي: غسان يما انت هنا غسان يقوم: ايوا يالغاليه تعالي ام غسان تحضنه: كيفك يما غسان بتعب: احسن الان ام غسان: مافي قلبك شي على زوجتك غسان بضيق: لا يما مافي شي ام غسان: كويس يما.. قوم معاي غسان: وين يما ام غسان: زوجتك ما اكلت شي من امس.. اجلس معاها يما.. انا خسرت بنتي وانا مهتمه فيها.. لا تخسر ولدك باهمالك.. والكلام الي براسك ذا.. كلام فاضي.. تعوذ من ابليس.. بسمه اليوم قالت لي انها مالها غير زوجها.. وزوجها ماله ذنب بالي صار.. لا تطلع انت الخسران الوحيد.. قوم ياروح امك.. اجلس مع زوجتك.. منظرها يوجع القلب.. وجهها ذابل وحزنها يبكي.. ماهو حزن على اختك و زوجها.. هذا حزن عليك يما.. وين تلاقي وحده تحبك وتخاف تخسرك كذا غسان: وينها في ام غسان: بالحديقه مع اخوانها قمت مع امي ونزلت.. رحت الحديقه وشفتها جالسه بحضن ناصر.. لساها تبكي.. وقفت شوي اشوفها.. انا ما حزنت على اختي قد حزن العنود علي.. مالها ذنب.. دنيت منها ومسكت شعرها غسان: حبيبي يبكي!!! العنود يزيد بكاها: ...................... غسان يحملها: نوف الله يخليكي.. قولي لهم يجهزو لنا العشا.. لي ولحبيبتي نوف بفرح: ان شالله كانت حاضنتني.. وتبكي لحد ما صلت الجناح.. رحت للصاله وجلستها بحضني.. كانت تبكي من قلب.. ما سكتني بقوتها.. ما قدرت حتى اتكلم ضاع الكلام مني.. كنت اهمس في اذنها احبك.. بدل هالكلمه ما تهديها صارت تبكي بزياده غسان: انا اسف.. لمتك على شي ما عملتيه العنود تبكي: ....................... غسان: صرتي ما تحبيني عشان اهملتك صح.. بذبح روحي اذا قلتي انك ما تحبيني العنود تبكي: بموت معاك غسان يضحك: احبك يالعنود العنود تبكي: غسان غسان: ياروحه العنود تشوف عيونه: بتتركني غسان بحنيه: عشان زعلان شوي.. اترك حبيبة قلبي.. ابعدي هالشي عنك.. انتي روحي &&&&&&&&&&&&&&&&&&& 9:50 الليل شقة جراح ..الصاله.. البحرين عبدالرزاق: وينها ياخوله خوله: ما ادري عنها.. قلت لها اننا بنتجمع على 9:30 احمد يضحك: اكيد حاسه لينا: والله اني خايفه.. انا عارفتها.. بتزعل علينا يا احمد.. اش بيرضيها ساعتها خوله: ماعليكي منها زين لينا: ما فكرتي اذا زعلت وقررت انها ترجع السعوديه الحين؟ خوله بخوف: وه يا حسرة قلبي عبدالرزاق: لا تخوفك لينا عاد لينا: والله انكم محسبين المسأله سهله.. محسبينها لبنى بنلعب عليها وبنزوجها.. هذي ليال عبدالرزاق: انا ما اشوف له داعي خوفكم.. وبعدين احنا ما بنتكلم صلاح عليه كل شي.. احنا بعيدين عن الموضوع تماما لينا: طيب اتفقتو على هالشي مع جراح احمد يضحك: لا طبعا ما تكلمنا لينا بحده: حتى جراح ما يعرف!!!! احمد يضحك: لا لينا بحده: ياربي لا تضحك.. والله انك بتقلب الليله علينا.. احمد الله يخليك.. شيل هالفكره من راسك عبدالرزاق يضحك: لينا.. دام جراح ما يعرف بتكون ردود فعله عاديه.. ماهي مقصوده.. واذا عرف بتكشفه ليال.. وبتعاند ساعتها مزيان تدخل: خوله حبيبتي خوله: هلا ياروحي مزيان: كل شي جاهز لينا فاتحه عينها: وانتي بعد معاهم مزيان تبتسم: وليه لا.. اخوي وابي مصلحته.. والبنت مافي احسن منها.. ليه ما اسعى لهم لينا: يا مزيان ياقلبي.. افترضي الليله تصير مشكله كبيره بيننا كلنا.. افترضي ليال تزعل وماتكلمنا.. ايش الصرفه بعدين مزيان تضحك: اقول بعدي روحك عن الموضوع انتي.. واتركيها على الله خوله: لينا حبيبتي ابتعدي عن الموضوع عشان اذا ليال ازعلت مني.. تكونين قريبه منها لينا بتعب: ياربي رحمتك مزيان: ليال لسا ما جات!!!! خوله: اتركيها شوي وبتصل فيها مزيان: والله ماني مصدقه اني بزوجها لجراح لينا: آآآآآآآآآآآآآآآآآه يا قلبي جراح يدخل الشقه: السلام عليكم عبدالرزاق: هلا ياهلا.. عليكم السلام احمد يضحك: وعليكم السلام جراح: منتو خالين ايش عندكم احمد: كل خير عبدالرزاق: اجلس ابيك بموضوع جراح: اذا يخص ليال.. فهو لا احمد يسحبه: اقعد زين.. قال لا جراح يجلس: البنت ماهي بيعه وشروه.. البنت لها قيمه كبيره عندي.. ماراح العب لعبه عشان اتزوجها عبدالرزاق: وهذا الي نبيه.. نبي قيمتها وقدرها جراح: مافهمت احمد: صلاح جاي بالطريق.. ويمكن انه وصل الحين جراح متفاجأ: والمطلوب عبدالرزاق: ابد تطلب ليال.. وتترك الباقي علينا جراح يفكر: لا ماني موافق.. دام الموضوع فيه لعبه.. لا مااقدر احمد: كل هذا حب.. اقول استريح.. واسمع الكلام خوله: جراح البنت مياله لك بس تعاند.. خوفها من لافي مصور لها اشيا كثيره جراح يغمض عيونه: ولو ما اقدر اتزوجها بهالطريقه احمد بحده: أي طريقه.. اخوها بيوصل الحين.. وانت بتطلبها منه جويل: السيد خالد والست لبنى وصلو مزيان: يا هلا ومرحبا حياكم خالد: السلام عليكم احمد: عليكم السلام.. اهلين لبنى: مسا الورد خوله: هلا ياقلبي تأخرتو لبنى: ما تأخرنا.. شفنا صلاح وسلمنا عليه.. راح لليال وجيناكم على طول احمد يغمز لخالد: كل شي تمام؟ خالد يضحك: تمام التمام لينا بخوف: يا ربي سترك لبنى: تبين الصراحه انا بعد خايفه خالد: يعني شنو!! بنعيد الي قلناه.. خلاص عاد توكلو على الله.. وان شا الله خير خوله: حنان وين؟ لبنى: مع ليال جراح: عبداللطيف ووليد ومنير وينهم احمد يضحك: ماعليك منهم.. بيتأخرون شوي جراح يغمض عيونه: الله يستر منكم ومن لعبتكم ما كنت مصدق حالي.. معقول تكون زوجتي والليله؟!!.. احس انها قريبه مني كثير.. ضروري اقوي قلبي حتى ما اضعف قدامها.. احبها.. شوقي لشوفتها الان كبير &&&&&&&&&&&&&&&& 9:55 الليل شقة ليال ..الصاله.. البحرين ضايق صدري.. وماني حابه اروح لعزومة مزيان.. بس المسكينه ترجتني وانا ماحبيت اردها بطلبها.. ياربي طلعت للبلكون قلت اشم شوية هوا يمكن قلبي يرتاح.. وقفت شويه بالبلكون صرت افكر بسلطان.. ما كنت ابي افكر فيه حتى ما اغرق بحزني عليه.. ماكنت ابي شي يكسرني.. حتى التفكير بموته.. ابي انسى انه مات.. ابي اكذب على نفسي انه لسا عايش.. واني بشوفه وبيجيني ويفاجأني زي ما عمل اخر مره حنان تجيها: ليال حبيبتي ليال بحزن: خير ياقلبي حنان بقلق: ليش حزينه جذي ليال: فكرت بسلطان.. ما ابي افكر فيه حنان تحضنها: ليش يا قلبي.. انتي حاسه بشي ليال: بضيق يا حنان.. حاسه بضيق بيذبحني حنان: بعيد الشر عنك.. طيب اجلسي شوي.. وانا بدق عليهم اقول لهم اننا بنتأخر ليال بحزن: ودي ما اروح حنان: دام متضايقه جذي.. لازم نروح حتى تنسي ضيقك معا الكل ليال بخوف: هذا الجرس يندق حنان تضحك: يا خوفي يكون جراح.. العاشق الولهان الي خايف على حبيبته من نسمة الهوا ليال تتركها: صدق متفرغه حنان تضحك: طيب وليش تخبين فتحت الباب وانا متأكده اني بلاقي جراح جاي وخايف علي.. ماصدقت اني القى صلاح.. ما صدقت اني اشوفه بثاني يوم بعد وفاة سلطان.. ما صدقت انه ممكن يترك الي عنده ويجيني.. كنت اناظر عيونه وانا تايهه.. ضايعه.. اقترب مني وانا واقفه في مكاني.. ماتحركت.. ما نطقت.. كل الي اعرفه اني من شفته زاد الهم والضيق بصدري.. احس يتعب الدنيا تجمع بقلبي.. حضني وانا جامده واقفه ما تحركت.. ايش بقول له وسلطان راح من بيننا.. ايش المفروض اني اعمل.. اصرخ.. ابكي.. انهار.. ما عرفت ايش اعمل.. سحبني لحد الكرسي وجلست.. انتبهت لحنان وكاس المويه الي بيدها.. شربتها كلها ليال بترجي: ابي بعد حنان بخوف: حاضر ياقلبي صلاح بخوف: انتي بخير؟ ليال بحزن: ماني بخير.. ماني بخير صلاح يحضنها: الله يرحمه ليال تهزر راسه: الله يرحمه صلاح: ما قدرت اتأخر عليكي ليال بحزن: كيف امي وابوي صلاح يبتسم: تصدقيني اذا قلت لك انهم بخير ومبسوطين ليال مستغربه: مبسوطين انهم فقدوه!!!! صلاح: لا طبعا.. ابوي يقول يكفي انه ناوي عمره ومات وهو رايح يعتمر ليال تهز راسها: ايوا صح حنان: ليال ياقلبي ليال تنتبه: ايوا حنان: الماي ياروحي ليال تاخذ الكاس: صلاح صلاح: ياروحي ليال: ودي نروح البحر صلاح يبتسم: نروح ياقلبي.. تبين نقول......... ليال تقطعه: انا وانت بس.. الله يخليك صلاح: من عيوني.. قومي اجهزي قمت وجهزت بسرعه.. وطلعت معاه.. طول منا معاه كنت ساكته.. كان يسوق السياره وعيونه علي.. وصلنا البحر.. ونزلنا.. وقفت عند الشط.. ورحت اتنفس هواه.. كنت ابي اغرق فيه.. كنت ابي المويه تلامس رجولي.. صلاح واقف جنبي وعيونه علي.. حضني وصرت ابكي من قلبي على سلطان.. من جد ما شبعت منه ومن حنيته الي كان نفسي اشوفها بعيونه من زمان.. ما كنت ابي ابكي عليه حتى ما احس انه مات من جد.. ما ابي اقتنع انه راح.. بس بكيت لحد ما حسيت اني تعبت وصدري وجعني من البكا &&&&&&&&&&&&&&&&&& يتبع |
10:15 الليل شقة جراح ..الصاله.. البحرين كنت مشغول عليها وخايف.. جاتني فكرة اني اروح اتطمن عليها.. بس رجعت بفكرتي قلت اذا رحت لها الان بخرب الي بيصير.. وانا ما ابي أي شي يخرب زواجي بها.. كنت ابيها.. ليتني اقدر اعوضها.. صرنا الساعه 10:15 والكل منتبه لقلقي عبدالرزاق: خوله روحي شوفي ايش اخرها هي وحنان خوله تقوم: ان شا الله لبنى: بجي معاج احسن خوله: يلا ياقلبي جويل: الست حنان وصلت جراح بلهفه: ليال معاها؟ جويل تشوف لهفته: لا استاز.. جات لحالا مزيان تقوم: حنان حياكي يا قلبي حنان تدخل: السلام عليكم خوله: وعليكم السلام.. وينها!!! حنان: تعبت.. اخذها صلاح وطلعو جراح: وين راحو حنان: قالت تبي تروح البحر خوله: خلونا نروح لهم حنان تمسكها: قالت تبي تجلس مع اخوها.. البنت ضايق صدرها على موت سلطان عبدالرزاق ينزل راسه: لا حول ولا قوة الا بالله كيف نسيت حزنها على سلطان.. شفتها قويه.. كان المفروض اني اعرف انها تخزن الحزن بقلبها.. جيت صلاح فجرت الالم عندها.. يا حبيبة قلبي انتي.. ليتني جنبك.. سرحت بفكري بعيد عن الكل.. سحبت روحي عنهم وطلعت من الشقه.. وصلت سيارتي وركبتها.. ابتسمت وانا اتحرك بها.. انا احلم بزواجي بها.. وهي الحزن ماليها على اخوها.. انا وين وانتي وين يا قلبي.. كان بيني وبين زواجي بك ساعات بسيطه.. الله ما كاتب.. كنت اسوق ولاني عارف وين اروح.. لا انا عارف وين اروح.. وصلت البحر.. رحت ادور بين السيارت على لوحه سعوديه.. لقيتها.. وقفت جنبها.. ونزلت.. رحت ادور عليها.. لمحتها من بعيد.. شفت انكسارها وهي بحضن اخوها.. شفت ألمها وانا بعيد عنها.. شفت خوفها وهي ترتجف.. شفتها تهدى وهي ماهي لاقيه النفس تتنفسه.. يا وجع قلبي عليكي يا ليال &&&&&&&&&&&&&&&&&& 11:45 الليل فيلا العايله ..جناح ناصر.. السعوديه كنت مهموم.. ضيق يهد الحيل.. احساس غريب.. ضيق غريب.. لافي ناوي يلعب على الكل.. يبي يكسر الكل.. ماني عارف اتصرف.. ماني عارف احمي احد.. ضعيف ضعيف.. شعور يكسر الرجوله.. تمنيت اني ما اشوف بسمه.. ما ودي ادخل معاها في حوار.. ولا ودي اقرب منها.. دخلت غرفتي.. لقيتها فاضيه.. تذكرت ليال.. اهتمامها دلعها روحها.. كانت تجهز لي ملابسي وتخليهم على السرير.. الان ماحد يهتم لهالشي.. دخلت اخذت دش وغيرت ملابسي.. شفت بسمه داخله بسمه ببتسامه: جبت لك العشا ناصر يشوف عيونها: شكرا بسمه: منت جعان؟ ناصر يجلس على الكنب: بصراحه لا بسمه بقلق: انت ما اكلت شي اليوم ناصر: من قال لك بسمه: سألت غسان ناصر بضيق: بسمه ماودي آكل.. ما احس اني جعان بسمه: طيب خليني اترك الاكل بالصاله يمكن تجوع بعد شوي كنت ساكت.. اشوفها بضيق.. مع ليال غير.. كانت تتدلع علي وتأكلني بيدها.. حتى لو كنت شبعان.. تجبرني بدلعها اني اكل.. كاره حياتي.. تسرعت الي رديتك يا بسمه.. الي باين اني بعيش بذكرى ليال على طول.. جاتني فكره اني اسافر البحرين اشوفها.. بس اشوفها.. انتبهت ان بسمه اجلست جنبي.. ابتسمت لها بسمه: في شي مضايقك؟ ناصر: سلامتك.. تعب بس بسمه: ودك تنام؟ ناصر: لا ما احس بالنوم سرحت عنها شوي.. طبعا سرحت مع ليال.. غمضت عيوني.. متضايق.. حزين.. ماني عارف ليه هالضيق ذا.. شوقي لليال كبير والليله بالذات.. بسمه المسكينه ريحت على السرير.. وانا طلعت للصاله وسرحت بليال من جديد &&&&&&&&&&&&&&&&&&&&&& 1:00 الصباح شقة عبدالرزاق ..غرفة عبدالرزاق.. البحرين عبدالرزاق بضيق: ماله حظ هالجراح خوله: ان شاالله ربي يجعل له الحظ الكبير عبدالرزاق: تطمنتي عليها خوله: اكيد.. نايمه ياقلبي عبدالرزاق: ما تبين تجلسي معاها خوله: لا.. ام لينا نايمه معاها عبدالرزاق: في وشو سرحانه خوله تبتسم: في خطه ثانيه عبدالرزاق: لا خطه ثانيه ولا ثالثه خوله تفز: ليش خلاص جراح الغى الموضوع!!!!! عبدالرزاق: لا طبعا.. سحبنا صلاح قبل لا يرجع على السعوديه.. وجراح طلبها من صلاح خوله بفرح: وساكت!! ليش ما فرحتني عبدالرزاق: عشان صلاح أجل الموضوع خوله: ما عنده سالفه عبدالرزاق: المسكين كان مهموم.. حالتها وجعت قلبه خوله: ولو كان وافق على الاقل عبدالرزاق: قلت لج ماهو بعقله تبينه يوافق على وشو &&&&&&&&&&&&&&&&&& 10:00 الصباح بيت عيسى ..عند باب البيت.. الكويت مشاعل: من ورا الباب وليد: انا حاب اشوف ام عيسى.. جاي لحاجه ضروريه روحي قولي لها اختي ابي اشوفها ضروري مشاعل تشوفه من فتحت الباب الي ما فتحته له: لحظه شوي كنت محسب اني بشوف مشعل.. لو اني شايفه كان الموضوع هان شوي.. على الاقل بيتذكرني وبيعرف الحقيقه.. الحين اشلون بقنعها اني اجلس معاها.. غبي لو اني طالب مشعل كان سهل لي الموضوع الحين مشاعل تجيه: جدتي تقول ما تعرفك وما تبي تشوف احد وليد: مشعل موجود مشاعل: وتعرف مشعل بعد.. لحظه شوي بناديه لك الحين بتمشي الامور.. مشعل بيسهل لي الي ابيه.. انتظرت شوي وجا مشعل.. وقفت اتكلم معاه برا البيت.. تذكرني وصار يسمع كلامي.. كان يعرف عمه عبدالعزيز.. او يسمع عنه من جدته وامه.. حسيته ميال لعبدالعزيز.. بس الي انتبهت له انه يشبه عبدالعزيز بتصرفاته واخلاقه.. دخل البيت وفتح لي المجلس واستأذن مني حتى ينادي جدته.. كنت اشوف البيت وحالته التعبانه.. اشلون عبدالعزيز ساعدهم؟!! وين الفلوس الي عطاها لامه؟!! مشعل يدخل وبيده جدته: جدتي هذا عمي وليد صاحب عمي عبدالعزيز ام عبدالعزيز بنرفزه: خير وش تبي وليد يبتسم: الي بقوله لج انتي عارفته.. ويمكن تسمعين عنه من زمان.. بس انا ابي أي خيط يعرفني اشلون انقذ عبدالعزيز.. انا واثق انج بتساعديني ام عبدالعزيز تشوفه باحتقار: ........................ وليد: عبدالعزيز مسجون.. سعود اتهمه بقتل زوجته مشعل مصدوم: ليش؟!!! عمي طيب كثير ما يسويها وليد يبتسم للجده: وهذا مشعل يشهد في صالح عمه الي ما عرفه غير كم يوم ام عبدالعزيز بقسوه: وش تبي مني الحين وليد: انا محامي عبدالعزيز.. ابي شوية معلومات عن سعود.. احنا واثقين من برائة عبدالعزيز.. وكل الي ابيه مساعدتج مشعل يترجاها: يما الله يخليج.. عشان خاطري انا.. قولي له الي يبيه.. عمي عبدالعزيز مافي منه.. احن علينا من ابونا ام عبدالعزيز نشوف مشعل بحزن عليه: بقول لك بس بشرط وليد: اسمعج ام عبدالعزيز تشوف مشعل: تقول لعبدالعزيز امك تقول تكتب مبلغ كبير باسم مشعل وليد يشوف هالحرمه باحتقار بعد الي سمعه منها: الحين اكتب لج الي تبينه ام عبدالعزيز: وش تبي تعرف وليد: سعود ليش يكره عبدالعزيز جذي.. الي اعرفه ان سعود يعشق تراب عبدالعزيز ام عبدالعزيز: سعود عيشني بجهنم.. كان يشك فيني.. دمر حياتي بشكه.. عشت معاه مستحمله ذله.. عشان كنت ابي اعيش.. وما كنت ابي ارجع للفقر.. سعود عيشني براحه بيت وخادمه والي ابيه الاقيه عندي.. بس من تعرف على واحد من اصحابه انقلبت حياتي معاه.. سعود صار انسان ثاني.. من جبت عبدالعزيز يمكن حياتي تغيرت للاحسن معاه.. حسيته رجع سعود الي عرفته.. اهتم في ولده وفيني صار يعشق تراب عبدالعزيز.. وهالشي فرحني.. جا صاحبه الكلب بيوم ووقف عند الباب يبي سعود.. قلت له سعود ماهو في البيت لقيته يدخل البيت غصب عني.. صرت اصرخ خوف من حركته.. كان ناوي علي الشر.. الخادمه ساعدتني وفكتني من يده.. ورفعت سماعة التلفون تتصل على الشرطه.. هو من سمع طاري الشرطه طلع من البيت خايف سكرت الخادمه وهي ما لحقت تكلم احد.. رجع سعود وخفت اقول له.. كنت خايفه يرجع لشكه فيني.. ما قدرت امسك اعصابي قدام سعود.. سأل عبدالعزيز.. وقال له على الي صار وليد بحده: بس عبدالعزيز كان بسن صغير.. لا تقولين انج كرهتيه لانه قال لابوه ام عبدالعزيز: أي كرهته.. لاني لقيت من يد سعود الشي الكثير.. كنت عايشه بجحيم.. لا اظن الجحيم ارحم من الي شفته مع سعود وليد يشوفها باحتقار: وش سويتي حتى سعود يكره عبدالعزيز ام عبدالعزيز: كنت ابي احرق قلبه.. اتصلت فيه بعد سنين وقلت له ان عبدالعزيز ماهو ولده مشعل ماهو مصدقك: يما!!!! وليد فاتح عيونه: اشلون تسوين جذي بولدج!!!!! ام عبدالعزيز: ما يجي شي من الي سواه فيني.. المهم عندي ان سعود حياته انقلبت نسيت تفسي وهدوئي صرت اقول لها على الي سواه سعود في عبدالعزيز طول هالسنين.. كنت اتكلم بصوت عالي وقوي.. ما اهتزت شعره منها.. حسستني اني اكلم حيطه.. اعوذو بالله في قلوب قاسيه جذي!!.. ذكرتها ان عبدالعزيز شرى لها بيت حتى تطلع من الفقر الي هي فيه وترك لها فلوس كثيره تعيشها بعشيه ممتازه.. قالت "ما عوضني شي من الي شفته من سعود".. ما لقيت كلمه اقدر اوصف فيها شعوري ناحيتها.. لقيتها وقفت وجرت رجولها لحد الباب وفتحته.. وقالت "الفلوس الي طلبتها لمشعل ابيها تكون بحسابه اليوم.. وما ابي تشرفني بزيارتك مره ثانيه.. حتى لو عبدالعزيز مات ما ابي احد بقول لي" &&&&&&&&&&&&&&&&&&&&&& 10:30 الصباح ..بعد اسبوع.. شقة ليال ..البلكون.. البحرين اسبوع مر.. وجعي على سلطان هدى شوي.. بس الشغل وتنفيذه اخذ وقت كبير.. وعزيز طول بحبسه.. صحيح ان احمد يطمني ان الامور في صالح عزيز بصوره حلوه ومطمنه.. بس كيف اتطمن دامه ماهو قدام عيني.. وليد رجع من الكويت قبل ثلاث ايام.. راح يشوف ام عزيز ويسألها عن ولدها.. قال لنا على الي قالته الام.. انوجع قلبي على اخوي اكثر واكثر.. رحمت حاله وحزنه وانعزاله عن الناس.. عرفت سبب حزنك ياخوي.. عرفت ان كلمتي له زمان جات في مكانها.. زي منا في حياتي رجال قلب كياني.. في حياته حرمه قلبت كيانه.. بس مو أي حرمه هذي امه.. ما قدرت امسك دموعي وهو يقول الي قالته ام عزيز.. حتى وانا قدام جراح الي حسيت بغيرته بعديها بيوم جات مريم وقالت ان زوجة سعود مستعده انها تشهد ان سعود كان موجود ليلة مقتل سهام في البحرين.. وانها مستعده تمثل الجريمه الي سعود قال لها عليها بشرط انها تتطلق منه.. احمد وعدها انه راح يجيب لسعود اعدام يخلصها منه العمر كله.. عشان كذا فرحت واصرت انها تشهد ضد سعود وترتاح منه.. احمد يقول انها جريمه مع سبق الاصرار والترصد.. يعني القاتل كان ناوي على القتل.. ماهو بدافع الدفاع النفس او عن طريق الخطأ.. جريمه متعمده.. احمد يقول ان الجريمه اغبي جريمه دبرت في العالم.. الي سمعته من احمد ريحني هاليومين.. كنت اعيد حسابتي في كل شي..كل شي.. قمت من البلكون سمعت الجرس ورحت للباب افتح مزيان: هاااااااااااي للحلوين ليال تضحك: هاااااااااااي يا احلى من الحلوين مزيان تبوسها: عسل ياربي ليال: وبعدين معاكي مزيان: وين الحريم اخلصي ليال: انا مع لمى.. خوله مع زوجها ولينا مع زوجها.. لبنى مع زوجها وحنان مع عيالها.. وخالتي ام لينا طلعت مع خالتي ام عبداللطيف مزيان: حلو يعني الموجودين هم.. مطلقه وارمله وعانس لمى تطلع لها: اشوف خولوه علمتك على طول السان مزيان تضحك: ياربي ليه ما تبين تقتنعي انك عانس.. طيب تزوجي وانا ارحمك لمى بملل: خليت الزواج لك يالارمله ليال تضحك: ايش تشربو مزيان: كل شي من يدك حلو لمى تسحب مزيان: تعالي القعده في البلكون تجنن دخلت المطبخ وقلت للشغاله تجهز الضيافه والعصير.. طلعت لهم وجلست معاهم.. صارت الجلسه احلى بوجود مزيان.. شوي وادخلت خالتي ام لينا ومعها خالتي ام عبداللطيف.. وصار الضحك والتريقه على لمى العانش وعلى مزيان الارمله وعلي.. شوي وجات خوله وحنان وصار الجو احلى واحلى.. شوي ودخلت لينا مع لبنى.. ماني عارفه ليه كنت افكر بجراح.. ايش هالاحساس.. ليه كان ودي اشوفه.. يمكن صار لي من الصباح ما شفته.. معودني اني اشوفه بكل وقت.. اليوم تأخر.. صحيح اني ماحبيته بس بديت احس انه واحد من المجموعه.. كنت عارفه عن الشباب وينهم فيه.. الا جراح ماني عارفه هو وين.. كنت ابي اسأل عنه.. بس عارفه الكل بيفسرها بتفسير ثاني.. طلعت للصاله.. اتبعتني خوله خوله: في وشو تفكرين ليال تنتبه: ابد سلامتك خوله: صرت حافظتك ياليال.. عارفه تعابير وجهك ليال: وايش تقولك تعابير وجهي الان خوله: قلقه على مين هالمره ليال بحيا: مافي احد خوله تبتسم: الله يخليكي قولي ليال: اذا قلت راح تفهميني غلط خوله تمسكها وتجلسها: ماراح افهمك غلط قولي ليال تنزل راسها: انتي الوحيده الي راح تفهميني غلط خوله بفرح: اشم ريحة جراح ليال تبتسم: لا جراح ولا غيره خوله: حلفتك تقولي ليال: طيب.. اممممممم انا احسه واحد من المجموعه.. واحد مننا وبس خوله بفرح: ممتاز ليال متردده: كان ودي خوله: أي شنو ودج ليال: اسأل عنه بس خوله تبتسم: حتى مزيان ما تعرف هو وين ليال: يعني كان عندي حق اقلق؟ خوله: اش رايك اتصل فيه ليال بخوف: لاطبعا بيعرف اني جالسه جنبك.. وبيفسر سؤالي انه حب خوله: لا تخافين ماراح اوصل له هالشعور.. وبقول اني فقدته اليوم ليال تبتسم: خلاص دقي.. بس حلفتك اياكي تقولي له اني سألت عليه خوله تتصل: خلاص فهمنا عمتي انكتمي بس ليال تمسك ضحكتها: انكتمنا خوله تأشر عليها عشان تسكت: هلا جراح يتبع |
جراح: اهلين ام سالم
خوله: مشغول جراح: لا ابد خير.. ليال فيها شي؟ خوله تناظر ليال: لا ليال بخير مافيها شي.. انا فقدتك اليوم ما شفتك.. سألت مزيان عنك تقول ما تعرف عنك شي.. قلت اسأل جراح: ليال جنبك؟ خوله عشانها حلفت: لا.. انا بروحي جراح: انا وصلت للعماره.. شوي واكون عندكم خوله: بس مافي احد من الرجال هنا جراح: كلهم معاي.. يلا سلام خوله مستغربه: سلام ليال بخوف: مالك ايش قالك خوله: يقول انه جنب العماره.. يقول شوي واكون عندكم.. قلت له ان الرجال ماهم هنا.. قال كلهم معاي ليال متستغربه: مستحيل انا عارفهم هم وين كيف صارو مع جراح؟.. مافهمت!!! خوله: أي والله وانا بعد لينا تجيهم: اش صاير خوله: لا ولا شي ليال تروح البلكون: بروح اطل من البلكون خوله: خذيني معاكي ام عبداللطيف في البلكون: اش صاير يما ليال تطل على الشارع: والله ما ادري خالتي خوله تشوف ليال بأستغراب: السيارت كلها هنا!!!! ليال بخوف: الله يستر خوله: لا تخافين صوت جراح ما يقول انه في شي خطير ليال: الحمدلله ام لينا: وجعتو قلبي يابنات.. قولو ايش صار لمى تقوم: انا بفتح الباب خوله: هذا هم وصلو.. ونشوف اش عندهم ما اكذب اذا قلت اني خايفه.. ماني عارفه ليه خايفه.. حاسه بخوف.. طلعو الحريم مع خوله.. ووقفت بالبلكون شوي.. خايفه متردده اني اطلع.. سمعت صراخ لمى.. وسمعت ضحك خالتي ام لينا وخالتي ام عبداللطيف.. سمعت خوله تهلي وترحب.. مين الي جا!!.. يكون صلاح!!.. مستحيل ابوي!!! ما يعرفوه.. يكون سلطان ما مات!! ليه تمنيت ان هالامنيه تتحقق.. ليه تجمعت الدموع بعيوني.. دنيت من باب البلكون.. وشفته.. شفت فرحتهم وشفت دموعه بشوفتهم.. شفته كيف يدور على شي ضايع له.. شفت كيف ماهو قادر يسيطر على مشاعره.. وكيف عبدالرزاق يبكي معاه.. كيف وليد يصفق ويغني ويصارخ.. شفت منير وهو متعلق بكتفه وماهو راضي يتركه.. شفت احمد كيف يضحك بجنون ويمسح دموعه.. شفت جراح كيف يشوفني بحده.. انتبهت لحالي.. دموعي عرفت لخدي طريق.. انتبهت له وهو واقف يشوفني بكل حنيه.. تمنيته اخوي حتى ارمي بروحي عليه. ليال تايهه: سلطان مات عبدالعزيز ودموعه ماهي راضيه توقف: الله يرحمه ليال تبكي: انا ضايعه عبدالعزيز ماهو قادر بسيطر على دموعه: كلنا معاج ليال: الله لا يحرمني دخلت واحد فيكم علي تركتهم ورحت غرفتي.. جلست على سريري.. كنت ابكي.. ماقدرت اسكت.. قبل كنت اتمنى شوفته حتى نفسي ترتاح.. الان نفسي ماهي راضيه تهدى.. دخلت خوله ولينا.. وانا منهاره.. ماني عارفه اضبط مشاعري.. ماني عارفه شوفته ايش عملت بي.. كنت اتعوذ من ابليس.. كنت اذكر الله وارجع ابكي.. وقفت وفرشت سجادتي.. وسجدت سجودي.. ودي نفسي ترتاح.. ودي انام.. احس بضعف كبير.. كبير.. انا ماكنت كذا.. طول عمري قويه.. ليه انا بهالضعف.. خصوصا بشوفة عزيز &&&&&&&&&&&&&&&&&&& 4:00 العصر شقة جراح ..غرفته.. البحرين عبدالرزاق بحده: ممكن تهدى جراح بصراخ: احس النار تاكل قلبي عبدالرزاق: وانت تشوفها قالت له احبك جراح بحده: مبين حبها له يا عبدالرزاق.. مبين بموت قهر.. وانا الي رايح اليوم من الصبح اكمل اجرائات خروجه.. قلت بفرحها.. اتاري شوقها فاق الحدود له عبدالرزاق: لا حول ولا قوة الا بالله.. يا اخي انت منين تجيب هالكلام جراح بعصبيه: لا تجنني.. كل شي صار قدامك.. شوي وترتمي بحضنه.. تقول له انا ضايعه.. ما حسبت حساب للي اسويه لها.. انا وين من حياتها ولا شي ولا شي عبدالرزاق: قلت لك من زمان ان عبدالعزيز انظلم زيها تمام.. احساس الاخوه يفرق ياجراح.. الحب غير والاخوه غير يا جراح.. وكفايه غلط على البنت.. انا ما ارضى عليها جراح يهدى شوي: ماني قادر اصبر اكثر من كذا.. بكره انا رايح السعوديه عبدالرزاق: ليش!!! جراح: بطلبها من ابوها عبدالرزاق: انت طلبتها من صلاح جراح: وما عمل لي شي.. بكلم ابوها عبدالرزاق يشجعه: على خيرة الله.. روح وانا بكلم صلاح اتفق معاه جراح باصرار: ايوا.. كذا صح جويل: اسمح لي استاز جراح: خير جويل جويل: الست خوله مع الست مزيان.. عاوزه تشوفك جراح يقوم: جاي معاكي عبدالرزاق يضحك: شكلها سمعت صراخك على ليال وجايه تعطيك كم كلمه جراح بضيق: تقول الي تبي تقوله المهم اني اتزوجها.. حتى لو بغت تضربني ماعندي مانع.. يا ناس احبها احبها مزيان تسمعه: ما قلت لك.. نايم صاحي يقول احبها خوله تضحك: خليه.. عساه دوم يارب عبدالرزاق يضحك: شكلك ماسمعتيه خوله: سمعته وما اقدر اجاوبه.. بخلي مزيان تقول له عشاني حلفت لليال ما اقوله جراح يجلس جنب خوله: ايش قالت ها.. قولو لي بسرعه عبدالرزاق بحده: جراح انت جلست جنب خوله جراح ينتبه ويفز: اه انا آسف عبدالرزاق: اقدر اخذ زوجتي واخلي مزيان ما تقولك حرف من الي قالته لها خوله جراح بخوف: والي يرحم والديك يارجال انا ما قصدت.. والله يارجال ان خوله اختي عبدالرزاق يبتسم: زي ما عبدالعزيز اخ لليال وبس جراح يفهم: وصلت يا عبدالرزاق.. وصلت عبدالرزاق يبتسم: قولي يامزيان خليه يريح قلبه جراح ينتبه: اشوفك عارف عبدالرزاق: اكيد عارف.. خوله ما تخبي عني شي مزيان: اليوم يا طويل العمر.. ناس افقدوك جراح بفرح: والله!! احلفي مزيان تضحك: الله يعينك جراح: كملي لا تلعبي باعصابي مزيان: تقول لخوله فقدته اليوم وما ادري وينه.. معودني اني اشوفه كل يوم جراح يمسك قلبه: يا قلبييييييييييييي خوله ميته ضحك: الله يعينك على بلوتك جراح: وايش بعد قولي قولي مزيان تضحك: هذا الي صار جراح بحده: لااااااااااااا بس كذا.. ماقالت شي بعد عبدالرزاق مستغرب عليه: يا اخي كويس انها قالت.. ايش تبي اكثر من كذا.. لا تصير طماع عاد جراح: ما قالت احبه.. تعلقت فيه.. روحي فيه عبدالرزاق: اقول شكلك محتاج كف يفوقك جراح بحزن: الله يخليك لا تفوقني سيبني غارق بهالحلم الحلو خوله يوجعها قلبها عليه: معلش طول بالك.. البنت تسأل عنك اليوم.. بكره تعترف جراح يقوم: وانا ايش يصبرني لبكره عبدالرزاق: اش ناوي عليه جراح: رايح السعوديه.. بكلم ابوها.. عبدالرزاق كلم صلاح وقوله عن جيتي خوله: لا تستعجل يا جراح.. الروحه هناك خطره.. لا تنسى ناصر عايش معاهم في بيت واحد عبدالرزاق: انا بكلم صلاح الحين وبشوف اش يقول.. وبعدين تتحرك &&&&&&&&&&&&&&&&&& 5:30 العصر فيلا العايله ..الحديقه.. السعوديه صلاح على التلفون: هههههههههههههههههههههه عبدالرزاق: اقول لك الرجال رايح فيها صلاح: بيني وبينك.. انا متعمد اني اترك الموضوع عبدالرزاق: وليش عاد.. الرجال شوي ويجن صلاح: كان ودي اشوفه ايش يعمل.. كيف بيتصرف.. كنت ابي اعرف اذا يستاهل ليال او لا عبدالرزاق: من حقك ياخوي.. بس صدقني.. جراح منهبل صلاح يضحك: حلو هذا الي ابيه عبدالرزاق يضحك: الله يرج ابليسك.. فرحان عشان الرجال منهبل صلاح: لا فرحان عشان لقيت واحد يحب اختي من قلبه ويفديها بعمره عبدالرزاق: في مشكلة ناصر صلاح: ماعليك انا اتصرف مع ناصر.. المهم قول لي متى جراح يوصل عبدالرزاق: والله ياخوي جراح جاكم.. يعني ساعه بالكثير ويكون موجود صلاح: خلاص توكل على الله.. ان شا الله خير.. دق عليه وقوله يبلغني اذا وصل.. حتى اشوف الوضع عندي عبدالرزاق: الي تشوفه..سلام صلاح يبتسم: سلام بوسلطان: بشر يبا صلاح: شاريها ومنهبل عليها بوسلطان: انت واثق فيه صلاح: ثقتي بالله يبا.. جراح رجال والنعم فيه.. على الاقل بيحميها من الكلب لافي بوسلطان: والبنات يبا صلاح: اذا جا نتفاهم معاه على كل شي بوسلطان: خير.. ان شا الله خير صلاح: يبقى اني اكلم سوسن بوسلطان: ليه يبا!! صلاح يقوم ويمشي: ابي صور ليال الي بجهازها بوسلطان: ليه ساكته ما تكلمتي ام سلطان بحزن: ودي اقول لك اني فاقده روحي.. قلبي موجوع يا بوسلطان بوسلطان يبتسم لها بحنان: على الاقل حنا عارفين ولدنا وين راح وكيف راح.. الاهم قلوبنا متطمنه عليه حتى لوعيوننا ما تشوفه.. لا تستعجلي يام سلطان مابقى بالعمر كثر الي راح.. بنشوفه قريب ام سلطان بحزن الدنيا: الله يجمعنا بجنته.. خلنا نزوج البنت ونتطمن عليها ما ابي قلبي ينوجع عليها وهي بعيده عني &&&&&&&&&&&&&&&&&&&& 7:00 الليل شقة ليال ..الصاله.. البحرين خوله: ليش قلقه جذي ليال: ما ادري يا اختي.. عندي احساس.. بس ماني عارفه ايش يعني خوله: اقول يا مكثر احاسيسك ليال بقلق: ودي اكلم سوسن.. احساسي ناحية اهلي مزيان: كلميها ياقلبي ليال بتردد: سوسن ماراح تقول لي على شي.. طول عمرها تخبي علي الحقيقه لمى: اتصلي في امك وابوكي.. اذا شفتي انهم بخير.. اتصلي على خواتك وبعديهم صلاح خوله: لمى معاها حق.. اتصلي فيهم وكلميهم.. لا تكلمين سوسن بس ليال اخذت تلفونها وراحت غرفتها: صح.. بكلمهم كلهم مزيان: ياخوفي منها.. هذي احساسها قوي خوله: ليلحين ماعرفتي ليال مزيان: يا خوفي لا تعرف ان جراح عند اهلها لينا: انا الي مرعوبه خوله: تطمنو كل شي بخير لمى: يا واثقه خوله: الحمدلله.. ربي ييسر الامور مزيان: الله يسمع منك لمى: وانتي ليش متلهفه على زواجها من اخوج!!!! مزيان: عشانها وحده سنعه.. بتحافظ على جراح وعياله لمى: ليش حاسه انك تبين ترمي مسؤولية جراح وعياله على ليال وتتفرغين لحياتج.. بس السؤال مع مين مزيان تضربها بالمخده: زوجي نفسك ولا تشغلي بالك بحالي علي يالعانس لمى تضحك: صدقيني المسأله فيها إن &&&&&&&&&&&&&&&&&&&& 8:30 الليل فيلا العايله ..المجلس.. السعوديه بوسلطان: وكيف أأمن على حياة بنتي جراح: يا عمي لافي ذا مايقدر يعمل لها حاجه.. يا عمي انتو مكبرين راسه على الفاضي صلاح: الي باين لي انك ما تعرفه زين جراح: اعرفه واعرف عقله زين.. بس ماهو ذا الي ممكن تخافو منه بهالصوره بوسلطان: انت عارف ان صلاح متزوج بنته جراح: ايوا عمي.. عبدالرزاق قال لي بوسلطان: وقال لك بعد انه جانا في بيتنا.. وجبرها تاكل حبه.. وفي ليلتها سقطت ولدها جراح: عارف هالشي.. ومخلي حراسه يا مكبرها عند العماره.. يعني لو يدخل على ليال بجيش.. ما راح يقدر يلمسها بوسلطان: وعارف انه له يد بموت سلطان جراح يشوفه بصدمه: .......................... بوسلطان: ايوا يبا.. له يد بموت ولدي.. ما ابي انه يذبح الكل وبالاخير يوصل لبنتي يكمل عليها جراح: ثق بالله يا عمي بوسلطان يبتسم: انت باين عليك طيب جراح يبتسم: طيب مع الطيبين.. وماراح امدح في نفسي.. انا شرس جدا مع خصومي بوسلطان: في الحق يبا؟ جراح: اكيد يا عمي.. انا اخاف الله صلاح: وليال دايم تقول لا تخاف من الي يخاف الله جراح يبتسم: قولها حق صلاح: بقا آخر شي نتكلم فيه جراح: خير صلاح: ضروري تعرف انك راح تربي عيال ناصر.. ناصر بن لافي يتبع |
جراح: تقصد عيالي وعيال ليال.. واذا ليال قالت ابوهم يعرفهم هذيك الساعه بنفذ لها الي تبيه بوسلطان: ماراح يضايقك انك تربي عيال ناصر؟ جراح: يا عمي.. ليال بتربي بنت وحده غريبه عليها.. يعني يضاقني اني اربي عيالها وما يضايقني انها تربي بنتي!!! بوسلطان يناظر صلاح ويبتسم: يعني اتطمن يبا جراح: توكل على الله يا عمي بوسلطان يضحك: شكلك مستعجل جراح يضحك: ............................ صلاح: ايوا يضحك ومن غير تعليق.. يعني زوجوني بسرعه وارحمو حالي جراح ينحرج: يعني راح تردوني صلاح: بردك بحاله وحده جراح بخوف: ايش هي صلاح: انت عارف ان ليال تحب ناصر حد الجنون جراح بحده: مافهمت صلاح: عطني مجال افهمك جراح بحده: صلاح.. انا جيت اطلب بنتكم.. ما جيت عشان تقول لي انها تحب طليقها حد الجنون صلاح: طول بالك علي.. انا اوصف لك حال اختي.. ليه تزوجت ناصر جراح بضيق: وبعدين صلاح: شوف الصور هذي جراح يشوف الصور: ايش ذا!!!!!! صلاح: هذا الي عمله بها ناصر.. قطع وجهها.. اهله لعبو عليه ان ليال تخونه.. ما كثر خبر.. دخل عليها بسكينه وقطع وجهها جراح مصدوم: عارف هالشي بس.......... بوسلطان: نبي نقول لك يا يبا.. ان ليال كانت تحب زوجها حد الجنون.. بس الان لا تصدق اذا جا يوم وسمعت فيه ان ليال تحب ناصر.. الي عمله بها شي مستحيل تسامحه عليه جراح تدمع عيونه: كذا!! يعمل فيها كذا!! عبدالرزاق قال لي على الي صار لها بس ما ظنيت انه كذا صلاح ينوجع قلبه عليه: جراح.. عشان كذا نبي الامان لها.. حنا مانطلب منك أي شي غير امانها جراح باصرار: عمي انا حجزت لدكتورك الي شفته بالبحرين من قبل.. بيجي البحرين بكره.. ابيك تكون انت وصلاح وعمتي موجودين بكره عند ليال.. تشوف الدكتور بالاول وبعدين تجون عند ليال بوسلطان: أي دكتور؟!!!! صلاح يضحك: الدكتور الي كشف عليك بالبحرين يبا من قبل.. جراح مخطط ومجهز كل شي بوسلطان يحضن جراح: يعني بكره بشوف بنتي يبا جراح: تشوفها وتقضى احلى اسبوع معاها صلاح: اسبوع؟!!! جراح: ايوا قول للي عندك انك حجزت بمنتجع.. عشان الوالد يكمل علاجه بوسلطان بفرح: جعلني ما انحرم منك يا يبا جراح: والوقت الي تبي تشوف ليال فيه قول لي عليه.. وتلقاها عندك &&&&&&&&&&&&&&&&&&&&& 12:00 الصباح سيارة جراح البحرين اخيرا دخلت البحرين.. اخير بوصل عندها.. احس ان المسافه قربت بيننا ياليال.. كلها بكره او بعده وتكوني زوجتي.. سعاده ما اقدر اوصفها.. راحه عجيبه.. كلما فكرت ان ليال خلاص راح تصير زوجتي غصب علي ابتسم.. لما وصلت السعوديه.. رحت لصاحبي واخذت سيارته.. حتى اذا لافي يراقب البيت بيكتشف ان صاحبي هو الي زارهم.. بيفكر ان بين صاحبي وصلاح شغل.. كنت مبسوط من صلاح وقت الي قال لي انه اصر على ناصر ياخذ زوجته ويطلع معاها شوي.. تزوج المهم عندي انه يبتعد عن ليال وينسى انها تكون له.. اخذت راحتي في الجلسه مع عمي وصلاح.. رجعت ابتسمت.. من قلت عمي ابتسمت.. تذكرت انها فتره بسيطه وتكون ليال زوجتي.. متى اوصل العماره واروح لها.. عارف ان الوقت تأخر بس اكيد انها صاحيه.. وحتى لو كانت نايمه بصحيها.. بقول لها جيت اتطمن عليكي.. اليوم فقدتني.. اكيد فقدتني الان بعد.. يا حبيبة قلبي.. احس الدرب طويل.. متى اوصل بس واشوفها.. تلفوني!! جراح: الو احمد: يا عيني على الو.. رااااااايقه يا راااااااايق جراح يضحك: هو باين اني رايق؟ احمد يضحك: باين؟!! هذا واضح جراح يضحك: كيفها احمد: زوجتي تقول انها حاسه.. كلمت اهلها وتطمنت عليهم.. وبالاخير سألت عنك جراح يضحك: صلاح قال لي انها كلمت الكل احمد: طيب قول اش صار مع ابوها جراح: كل خير.. اهلها طيبين يا احمد احمد: المهم انك توفقت جراح يبتسم: الحمدلله توفقت عطيت احمد التفصيل الملل لكل شي صار.. وبعديه دق علي عبدالرزاق.. وبعد عطيته تفصيل ممل للي صار مع عمي وصلاح.. وصلت اخيرا.. تأكدت من رجالي ان كل شي بخير.. وطلعت لها.. وصلت لشقتها وانا الشوق ذابحني.. فتحت لي الخادمه الباب.. اصدمتني بالي قالته.. قالت انها ماهي بالشقه.. وانها في المكتب مع عبدالعزيز!!.. حسيت بالغيره تاكلني.. نزلت للطابق التاسع.. دقيت على احمد وكلمته بحده.. كنت حاس اني بذبحها.. جالسه مع عبدالعزيز لحالها؟!! يا خوفي لا تكون تشكي له حالها وهو بعيد عنها.. فتحت الباب ودخلت من غير لا اضربه حتى.. لقيتها واقفه جنب لوحه وتشرح الي فيها لعبدالعزيز.. كانت حاده في كلامها معاه عبدالعزيز ينتبه: هلا والله بجراح وينك يا اخي جراح يحاول يضبط اعصابه: ابد كان عندي شغل ليال: وخلصته جراح يشوفها بقهر: ايوا خلصته عبدالعزيز: اجلس ياخوي ليال: اجلس جراح مالك واقف كذا جلست.. وراحت تشرح وتعلق وتتكلم بصوره رسميه.. صحيح انها تتكلم في الشغل.. ومستوره.. وما كان باين عليها غير انها مهتمه بالشغل.. بس الان الساعه 1:30 الصباح.. اكيد انجنت هذي.. ماني قادر اضبط اعصابي.. حسيت احمد تأخر علي.. ابي اصرخ عبدالعزيز بهدوء: كل الي قلتيه انا معاج فيه.. بس سيف هذي عنده شورط.. والقوانين الي انتي حاطتها ما توافق شروط سيف ليال بحده: هو عارض انه يكون شريك.. ماراح يمشيني على كيفه.. قبل بعرضي ياهلا ومرحبا ما قبل نشوف غيره عبدالعزيز: ما عندنا وقت نشوف غيره.. انتي تبين تطلعين للسوق الحين.. وتبين شي ناجح عشان ليال: والي اقوله بيظمن لي النجاح احمد يدخل: السلام عليكم عبدالعزيز يبتسم: هلا والله احمد: اش عندكم!!! عبدالعزيز: تبي تمشي سيف على قوانينها احمد: بس سيف عنده شروط عبدالعزيز: ماهي مقتنعه.. تبي تمشيه على كيفها ليال بحده: لا تجنني انت وياه.. نعرض قوانينا وبعدين نشوف رايه عبدالعزيز يبتسم: بيرفض يا ليال ليال بحده: والحل عبدالعزيز: خلينا نكون صريحين شوي.. انتي كل الي جالسه تسوينه عشان توصلي للافي صح ليال: صح عبدالعزيز: هذا يعني اننا ننسى سيف ونفكر في شخصيه قريبه مننا.. عارفه لافي كويس.. وعندها استعداد انها تساعدنا ليال تنزل راسها: لا احمد: لا شنو ليال: انا مصره اننا نبتدي مع سيف احمد: من تقصد بالشخصيه القريبه مننا عبدالعزيز: جراح طبعا ما صدقت الي اسمعه.. ما انتبهت ان عبدالعزيز يقصدني.. ما توقعت ابد انه ممكن يفكر يجيب سيرتي.. لاني متأكد انه ينافسني على قلب حبيبتي.. كنت اشوف ردة فعلها وانها ماهي موافقه على فكرت وجودي كشريك.. بس جاتني الجرائه اني اتكلم معاها جراح: من ايش خايفه ليال: ولا شي.. وجودك معاي خطر على الكل عبدالعزيز: انتي اساسا مالج وجود.. احنا بنشتغل باسم منصور الشيخ.. ليال النشمي مالها وجود احمد: عبدالعزيز معاه حق جراح: من ايش خايفه ليال تتركهم وتمشي: ولا شي تبعتها.. ما قدرت امنع نفسي.. تبعتها وهي سرحانه.. في شي مضايقها.. ودي انها تقول لي عليه.. ودي لو مره تعمل لوجودي اعتبار انا من عرفتها وهي تصد عني وتبتعد بصوره واضحه للكل جراح داخل المصعد: ودي تقولي لي ايش الي مضايقك ليال: انت منت تارك لي مجال تكون اخوي جراح بحده: انا ماني اخوكي.. سبق وقلت لك هالكلام ليال: عشان كذا ما ابي اتعامل معاك جراح بحنيه: خايفه من ايش ليال: خايفه على بناتي.. بنات ناصر جراح يبتسم: خايفه عليهم مني!!! ليال: خايفه عليهم من ناصر ولافي جراح: ولا يقدرو يلمسوهم ليال تطلع من المصعد: المشكله انك منت قادر تشوف حجم المشكله الي انا فيها جراح: انتي مكبرتها ليال بحده: لانها كبيره لا تجنني جراح جراح يبتسم: اهدي طيب.. كل شي له حل.. ليال ثقي بالله ثم ثقي بي.. هذا كل الي اطلبه ليال تمشي عنه: عطني وقت جراح: وقت عشان تحبيني ليال تشوفه بضعف: انا ماقلت كذا.. ابي وقت عشان اثق فيك جراح: بكره عندي لك مفاجأه ليال بشوق: ايش هي جراح: كيف تكون مفاجأه اذا قلتها لك ليال تناظره: محتاجه شي يسعدني.. قول لي جراح يبتسم: بكره بجيب ابوكي وامك وصلاح لهنا ليال تبتسم: من صدقك!!!! جراح: وبتقضين معاهم احلى اسبوع بعمرك ليال ببرائه: من جد!! جراح يضحك: جد الجد حسيت بسعادتها.. ليه حسيت ان ودها تحظني.. ليه حسيت انها تبي تسولف معي.. ليه حسيت انها قريبه مني وخلاص صارت زوجتي.. كنت ابي ادخل معاها واجلس واسولف.. لا ما ابي اسولف ابيها هي تسولف.. ابي اسمع كلامها.. ابي اسمع حزنها.. ابي اطبطب عليها واحسسها بالامان احمد يمسكه من كتفه: اخينا يالي واقف لحالك جراح ينتبه: متى جيت؟ عبدالعزيز يضحك: تراني معاه جراح يبتسم: اهلين احمد: صار لك زمان واقف جذي عبدالعزيز يضحك: الحب مبهدله.. اتركه يروح لشقته يرتاح شوي جراح: شاكر لك وقفتك معاي عبدالعزيز: حاضرين للطيبين.. بس خلي ببالك.. هذي اختي الي بيزعلها بذبحه بيدي جراح يضحك: والنعم بك اخ مشيت عنهم.. سعيد مبسوط.. دخلت شقتي ولقيت مزيان صاحيه.. دخلت غرفتي معاها.. رميت نفسي على السرير حتى ماقدرت اغير ملابسي.. راحت تلح على تبي تعرف ايش صار معاي.. الي اذكره اني كنت اسولف لها.. بس بعدين حسيتها تغطيني وتسكر نور الغرفه وتمشي عني &&&&&&&&&&&&&&&&&& 12:00 الظهر ..اليوم التالي.. شقة ليال ..الصاله.. البحرين خوله عند باب الشقه: وينها الحين لمى تضحك: في المطبخ من الصبح.. استأذنت مزيان واخذت جويل.. ومن الصبح في المطبخ معاها.. ما بقى صنف ما عملته خوله تضحك: يمكن عشان عبدالعزيز لمى: والله يا اختي ما ادري.. بس باين عليها مبسوطه حيل خوله: دوم ان شالله..خليني اروح لها لمى: وانا بشوف الباب ولا حقتج خوله: لا تتأخرين علي.. يمكن نحط من هالاكل وناكل منه لمى تفتح الباب: اهلين مزيان مزيان بفرح: هلا ياقلبي لمى: اهلين جراح جراح: اهلين وين ليال لمى تضحك: في المطبخ من الصبح.. مابقى صنف اكل ما عملته مزيان توصل للمطبخ: جعلك العافيه يا ليال.. ليه كل هالاكل!!!! ليال بحيا: في ناس عاملين لي مفاجأه خوله تنط: من هالناس ليال: وانتي مالك.. المفاجأه لي ماهي لك مزيان تضحك: عساكي دوم السعاده يا ليال ليال: تسلمي ياقلبي جويل: تعا ماما.. دوق التبوله جراح يدخل: ذوقيني ياجويل ليال مستغربه: ليه انت تحبها!!!!! جراح يستطعم: وااااااااااااااو.. حلوه ياجويل حلوه.. اول مره تعمليها بهالحلاة جويل تضحك: هي الست ليال عاملتا جراح منصدم: وان شا الله الست ليال تعرف تطبخ؟!!! خوله بحده: اتركك من الست ليال الحين وقولو لي.. مين الي مسوي لها مفاجأه وانا مااعرف مزيان: انتي لسا بهالسالفه خوله بحده: ابي اعرف قولو لي جراح يناظر ليال: مزيان انا ماشي اذا قصرك شي دقي علي مزيان تضحك: من عيوني ليال تتركهم في المطبخ وتلحقه: جراح جراح يبتسم: يا عيون جراح ليال بحيا: ماقلت لي متى يجون جراح يبتسم: وانتي لاحقتني عشان تسأليني هالسؤال ليال ببرائه: ايوا جراح يضحك: بدق عليكي اول ما يوصلو.. تامرين شي ثاني ليال: وهم لسا بالسعوديه!! جراح: لا ياقلبي.. انا جبت الدكتور الي عمي تعالج عنده قبل كذا.. يعني تقدري تقولي تغطيه على جيتهم.. هم عنده الان.. يخلص الوالد فحصه وتلاقينهم عندك ليال بحزن: طيب جراح ينتبه: مالك ليال بضيق: ولاشي جراح: مالك يا قلبي من شوي كنتي مبسوطه ايش الي زعلك ليال بجديه: لا تقول يا قلبي جراح ينتبه لنفسه: انا آسف ما انتبهت لنفسي ليال: انتبه لنفسك جراح.. وبعدين التكاليف هذي انا راح ادفعها جراح يبتسم: اذا هالشي يبسطك خلاص.. بقول لك على التكاليف.. ولا اشوفك زعلانه ليال بحيا: تسلم جراح: تامرين شي ثاني ليال تشوفه بلهفه: لا شكرا جراح يفهمها: ليه احس انك تبين تسأليني وين رايح ليال تتلخبط عشانه فهمها: انا؟!! لا لا وانا ايش دخلني.. كنت ابي اتطمن على اهلي وبس جراح يضحك: طيب تراني رايح المستشفى لهم عشان اجيبهم ليال تضحك: مع السلامه ليه ناسيه روحي معاه.. اليوم شعوري غريب.. كنت كلما اشوفه اخاف من وجوده.. اليوم شعوري غريب.. كل ذا عشان جاب اهلي عندي.. ليه كان ودي اسولف معاه اكثر.. ليه ما كان ودي انه يمشي عني.. كنت اتمنى اني اروح لهم معاه.. ليه ما وافقت على الزواج منه.. كنت الان رايحه معاه براحتي لهم خوله: انتي يالي هناك ليال تنتبه: هلا مزيان تموت ضحك: ما كان ودك تروحي معاه ليال بحيا: لا عيب.. ايش يوديني معاه لمى: قلنا هالشي.. قلتي اطلعو منها ليال: وانتو ماعندكم شي ثاني تغنو عليه خوله: عندنا ياقلبي.. عندنا ليال: طيب غني ولا تسمعيني جويل جات تصرخ: الحئي ست ليال.. التبوله انكبت ليال مجزوعه: لااااااااااا اعجبت جراح جويل ميته ضحك: أي ئولي انك حبيتيه خوله جلست على الارض من الضحك: احلفي عاد اعجبت جراح مزيان ميته ضحك: يا حبي لك يا ليال.. والله ان اخوي ما يلاقي زيك لمى تضحك من قلب: تطمني هذي مقلب.. خوله اتفقت مع جويل عليه ليال تتركهم وتمشي: فاضيين &&&&&&&&&&&&&&&&&&& يتبع |
| الساعة الآن 08:37 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.3.0 ©2009, Crawlability, Inc.
شبكة ليلاس الثقافية